1. Mósĩ́ deè ní e gã́bug gbò a piigà ge bọ̀ọ̀vẹ̀ gbàà ba sìtóm kọ̀ kpẹ̀a ẹ́?

 È KPÁÀ ié gã́bug tóm gè sì boo tṍó e bàlà booí é gé iná kùbmàí. (Máát. 24:14; Lúùk 10:2; 1 Pít. 5:2) Dénè bẹ̀ì gbĩ́ gè sí tóm nè Jìhóvà dẹ̀ẹ̀a boo bé e bẹẹ kpóó sim tùlà naa. Gã́bug gbò a kpáá bọ̀ọ̀vẹ̀ gbàà ba sìtóm kọ̀ kpẹ̀a. Sìgà gbò ẹb dẽesĩ́ gè dú gbò gyà deèsĩ́ tóm kọ̀ kpẹ̀a. Dõòna gbò gbĩ́ gè sí tóm Bẹ́tẹẹ̀l àbèè ge sí tóm gè tìbgì bẹẹ gbò tọ gè tõó m fã̀ Bàrì. Vaá gã́bug pá vígà dì e bà gé piigà ge sìm tùlà ge dú neǹ nvèè bá sìtóm àbèè neǹ kànen. (1 Tím. 3:1, 8) Ẹ̀b bé e nyíè Jìhóvà é ẹ́ẹ ge mòn pá vígà e bà di kpènà ló gè sí tóm nèe naaà!—Ps. 110:3; Àìz. 6:8.

2. Àé láá tọáí ló naa vàẹ be née láà sìm tùlà gbò tóm e beè noo sẹ̀ẹ̀a sĩ́ gè sí nè Jìhóvà ẹ?

² Ge bugi togó boo gã́bug gbáá ea ni téní vaá è gáà sìm tùlà gbò nú e beè noo sẹ̀ẹ̀a sĩ́ é láá biiléi nyíe. Lóói é láá ọọ nagé be bẹẹ gbáá àbèe dìtõ̀ò náa kọ é gá sìm tùlà ge sí sìgà tóm mm̀ bõ̀ònatõ̀ò. (Pró. 13:12) Níà nú ea beè naaá ló Melissa ẹ. * A beè leemáe gè sí tóm Bẹ́tẹẹ̀l àbèè ge sí Tọọ̀ Kpá Ea Dì Nè Gbò Ge Vee Kpẹ̀a Boǹ Méné. Melissa kọ́ọ̀: “M sígá ló gbáá e bà bĩ́íná lọl bá gbò e bàé sí gbò tómí. À ólò ọọvẹ́m ló sìgà tṍó.”

3. Éé ní e sìgà gbò ni náa kọbé bà láá sìm tùlà ge sí sìgà tóm mm̀ bõ̀ònatõ̀ò ẽ?

³ Sìgà gbò nvín ãa e bà íe válá ló é láá ié bíí ló gè sìm tùlà gbò kpãa ea é náa kọ bàá láá sí sìgà tóm mm̀ bõ̀ònatõ̀ò. Boo dõona bá, àé láá dú kọọ̀ bà nyímá nu, bà ólò láá nè béèlàfùl, vaá ié tàn ge siimá tóm; sõò àé dú bíi kọ bàá nó  gè ié ĩ̀ìmà, tú ọ̀ẹ̀ dẽe siimá tóm, àbèè ge naa gbò nú ea é náa kọọ̀ gbò nen á fã̀va dẽe. Be ò piìga boo gè ié gbò kpãá ea dú bíi, pá vígà é né ni tóm ge sì tṍó e nóo beè ẹ̀bmà dẽe. Bugi togó boo nú ea beè naaá ló Nick. Lóóe beè palàge ọọ tṍó ea tóólá 20 gbáá boo béè kọọ̀ bà gáà ie bá ló naamá neǹ nvèè bá sìtóm. À kọ́ọ̀, “A beè tõoḿ ló kọ à íe nú ea dú boo.” Sõò náa beè òòà aaló gè toní gbò kpãa ea dú bíi. A beè pììgà bé ea kpóó sim tùlà naa ló gbò tóm ea gé láá sí mm̀ bõ̀ònatõ̀ò. Deè nieí, a dṹùnà Branch Committee.

4. Éé ní eé ló bel boo mm̀ nakà togó belí é?

⁴ É kọọ̀ lóó ni beè ọọ boo béè kọọ̀ ò gáà sìm tùlà gbò tóm eo beè noo sẹ̀ẹ̀a sĩ́ gè sí mm̀ bõ̀ònatõ̀ò? Beè vó, kọ́ bé e nu tọ́a ní ló naa nè Jìhóvà. (Ps. 37:5-7) Gbá ló vó, bĩiná lọ̀ọ̀gà bug lọl bá pá vígà e togó va tulà nu ea kil ló bé eo é láá bọ̀ọ̀vẹ̀ gbàà tóm eo gé sí nè Jìhóvà naa, vaá ò piìga boo gè tú ba lọ̀ọ̀gà bug siimá tóm. Be ò náa vó, òó láá sí tóm ea géè tàn ni gè sìa àbèè ge sìm tùlà gbò nú eo beè noo sẹ̀ẹ̀a sĩ́á. Belí bé ea beè naaá naa ló Melissa e beè kọ́ nú ea kil lóá, àé láá dú kọọ̀ tóm ea tan ni gè sì dú ní e nóo sim̀ tùlà kà lèlà tṍó eo ẹbmà dẽe ã́. Beè vó, mósĩ́ deè ní eo é láá kilsĩ́ gè ié zààvà ẹ? Ge aalá nakà bíbvá, togó belí é ló bel boo (1) kiẽ́e eé láá ié zààvà lọ̀l, (2) bé eo é láá kpáá palàge ié zààvà naa, nè (3) gbò nu sẹ̀ẹ̀a sĩ́ ea é láá naa kọ ó kpáá palàge ié zààvà.

5. Gbò éé ní eé ká bùlà gbẹẹ́ boo kọbé è íe zààvà ẹ? (Ẹ̀klìzíástìs 6:9)

⁵ Dì belí bé ea dọa bàlà kẽ naá mm̀ kpá Ẹ̀klìzíástìs 6:9, èé láá ié zààvà be è gbĩ́ lọl kiẽ́e ea bọ́lọ́. (Bugi.) Nen ea zaava ló nú ea “monmà dẽe” ólò ié dĩ̀ìnè ló. Sõò, nen ea tãagẽ a bùlà kilma ló nú ea tanníe gè ié ólò ká bùlà gbẹẹ́ boo gbò nú e náa é láá ié. Vóà naa, éé ní e níá nóòmài ẽ́? Kọbé è láá ié zààvà, à bọ́ló kọ é ká bùlà gbẹẹ́ boo nú e íè nè gbò nu sẹ̀ẹ̀a sĩ́ ea é válií ló gè teá tùlà.

6. Mókà nu dòòle ló ní eé ló bel boo é, vaá éé ní eé nó nú ea kil lóé?

⁶ É kọọ̀ gbò nú e íè é láá dĩinéi ló? Gã́bug nen bugi togó kọ náa válí, boo béè kọ à ólò leemái gè gbĩ́ gè naa ãa-ãa nu. Sõò, à palàge valí. Èé láá aa deè dé kpéè ló nú e íè. Mósĩ́ deè ní eé láá naa vóé? Kọbé è nyímá, naanii èé bugi togó boo nu dòòle ló Jíízọ̀s ea kil ló gbò bẹ̀lẹ̀ kpègè e kpá Máátìù 25:14-30 kọ́ nú ea kil lóá. Èé nó nú ea kil ló bé eé láá kpáá palàge ié zààvà kèbá dìtõ̀ò e dì naa.

7. Tú ńkpulu bá bààmà tẽ́ nu dòòle ló Jíízọ̀s ea kil ló gbò bẹ̀lẹ̀ kpègèa.

⁷ Mm̀ nu dòòle lóá, ene kà gbálà beè noo gè sí kyẽè. Besĩ́ à kalá àà, a beè kolí pá a gbò tóm vaá tú bẹ̀lẹ̀ kpègè e bàé ulmà ki nèva. * A beè bugi togó boo nú e buù ọ̀và é láá naa, vaá tú vòò bẹ̀lẹ̀ kpègè nè túá nen, à tú bàà bẹ̀lẹ̀ kpègè nè ní ea égè bàà nen, vaá tú enè bẹ̀lẹ̀ kpègè nè ní ea égè taà nen. Túá kà bàà nená beè tú agẹbá siimá tóm kọbé bà kpáá ièè gã́bug kpègè neè ba tẹ̀ tọ. Sõò ní ea égè taà nená náa beè tú kpègèa naamá tọ́ọ̀ kà nu, naa ní e a tẹ̀ tọ kpóe lọl ló tóm.

8. Éé ní ea beè láá naa kọọ̀ nyíè túá kà neǹ tóm ea di mm̀ nu dòòle lóá á ẹẹ ẹ́?

⁸ Nyíè túá kà neǹ tómá beè iège ẹẹ kọọ̀  a tè tọ palàge nveenìèe ka ló naa ní ea neèe vòò bẹ̀lẹ̀ kpègè. Níá beè dú kà tõ̀ò kpègè, vaá à zógè kọọ̀ a tẹ̀ tọ palàge dẹlẹ́ẹ nyíé boo! Sõò, èé kọ́ vàẹ kilma ló ní ea égè bàà neǹ tómá ẽ́? Lóóe gáẹ̀ beè láá ọọ boo béè kọọ̀ a tẹ̀ tọ náa née gã́bug kpègè ea ne túá kà neǹ tómá. Sõò éé ní ea beè naa ẽ́?

9. Éé ní e Jíízọ̀s náa beè kọ́ kilma ló ní ea égè bàà neǹ tómá ẽ́? (Máátìù 25:22, 23)

⁹ Bugi Máátìù 25:22, 23. Jíízọ̀s náa beè kọọ̀ ní ea égè bàà neǹ tómá beè biile nyíe kọ a tẹ̀ tọ neèe kóló bàà bẹ̀lẹ̀ kpègè. Vaá Jíísọ̀s náa beè ló bel belí kọọ̀ ní ea égè bàà neǹ tómá beè nuumi bel vaá kọọ̀: ‘Níì kùbmà kpègè ea láá nè nda ẹ́? Nda ólò tu nágé agẹbá siimá tóm belí nakà neǹ tóm ea ne vòò bẹ̀lẹ̀ kpègèaà! Be ńdáà tẹ̀ tọ náa nveè ka ló tóm em síì nèe, m̀ é li kpègèí vaá àà gé gbĩ́ ńdáà kpègè.’

10. Éé ní e ní ea égè bàà neǹ tómá beè tú gbò a bẹ̀lẹ̀ kpègè naamá ẽ́?

¹⁰ Ní ea égè bàà neǹ tómá beè nyimá kọọ̀ tóm e a tẹ̀ tọ neèeí palàge dú bíi, vaá a beè tú agẹbá siimá belí túá kà neǹ tómá. Vó beè naa kọ á ié dõòna kà bàà bẹ̀lẹ̀ tẹlẹ boo bàà bẹ̀lẹ̀ kpègè e a tẹ̀ tọ beè nèe ã́. Neǹ tómí beè ié kpẽ́ ló gè tú ọ̀ẹ̀ dẽe nè kalì siimá a tóm. Níì áá gè lèèlàẹ ní e a tẹ̀ tọá beè naa ẽ́ nì, a beè kpáá nèe gã́bug tóm!

11. Mósĩ́ deè ní eé láá kpáá palàge ié zààvà ẹ?

¹¹ Mm̀ tẽ̀ènè sĩ́ deèá, èé láá kpáá palàge ié zààvà be è piigà bé e bẹẹ kpóó sim tùlà naa gè sí tóm nè Jìhóvà. Tú “dénè [o] tṍó” kọọmá kpẹ̀a, vaá sí gbò tóm ea  di mm̀ bõ̀ònatõ̀ò. (Tóm 18:5; Híb. 10:24, 25) Kpoogá dee ló nònù kọbé ò láá aalá bel mm̀ sĩ́deè ea é síè kpóó ló nen. Tú gbò nu gè naa e bà né ni mm̀ nònù èèlè nyíè zẹ̀ẹ̀ sè kolmá nu. Tṍó e bà kọ́ ó nvèè bá sí ene kà tóm, vàlẹ̀bá sì, vaá ò síe mm̀ sĩ́deè e bàé dẹlẹ́ ni nyíé boo. Ó gá ẹ̀b tọ́ọ̀ kà tóm e bà né ni belí kọ bà dómá boo tṍó e náa bọ́ló. Pììgà ge sìm kilsĩ́ mm̀ o kalì. (Pró. 22:29) Bé eo piigà ge sí gbò tóm ea di mm̀ bõ̀ònatõ̀ò naa, níà bé eo é sim kilsĩ́ vaá kpáá palàge ié zààvà naa ẽ́. (Gàl. 6:4) Àé náa kọ ó láá zọ̀ dõòna gbò ié ẹ́ẹ́ nyíe tṍó e bà íe gbò dọ̀ tóm ea géè tànni gè ié.—Róm̀ 12:15; Gàl. 5:26.

12. Éé ní e bàà neǹ vígà beè naa kọ bé bà láá kpáá palàge ié zààvà ẹ?

¹² É kọ ò kẽèa boo Melissa, ea dú vígà pábia ea beè tànie gè sí tóm Bétẹẹ̀l àbèè Tọọ̀ Kpá Ea Dì Nè Gbò Ge Vee Kpẹ̀a Boǹ Ménéá? Náa kal ló béè kọ náa beè láá sì, à kọ́ọ̀: “M beè kpáá palàge pììgà ge naa leevè mm̀ nà tóm gyà deèsĩ́ tóm kọ̀ kpẹ̀a vaá nó gè tú kele-kele bá kọọmá kpẹ̀a. Ge naa vó beè kpáá palàge ẹẹlẹ̀m nyíe.” Vaá èé kọ́ vàẹ kilma ló bé e Nick beè ié ĩ̀ìmà naa tṍó e bà náa íe bá ló naamá neǹ nvèè bá sìtóm tṍó ea géè ẹ̀bmà dẽe ẽ́? À kọ́ọ̀, “M beè ká bùlà gbẹẹ́ boo gbò tóm em gé láá sí mm̀ bõ̀ònatõ̀ò tṍóá—dì belí ge kọ́ kpẹ̀a nè ge aalá bel ea é síè kpóó ló nen gbẹá bẹẹ gbò nònù. M beè naa nagé fíìl fóm̀ ge sí tóm Bétẹẹ̀l vaá ba beè kolím kà lèlà gbáá ea bẽene.”

13. Éé ní ea é silà aa m be è kpáá palàge pììgà ge sí gbò tóm e gé láá sì e? (Ẹ̀klìzíástìs 2:24)

¹³ Be ò piigà ge sí gbò tóm eo gé láá sí mm̀ bõ̀ònatõ̀ò, bàé né ni dõòna kà gbò tóm ea bọọ tṍó e tṍó é téní, belí bé ea beè naaá ló Nick naaá. Sõò be nóo íè, belí bé ea beè naaá ló Melissa naaá, òó láá kpáá ié zààvà nè dĩ̀ìnè ló mm̀ gbò tóm eo láà sí nè Jìhóvà. (Bugi Ẹ̀klìzíástìs 2:24.) Gbá ló vó, nyíé ni é kpáá palàge ẹẹ tṍó eo nyímà kọọ̀ tóm eo gé sí palàge leemá bẹẹ Tẹ̀ Tọ, ea dú Jíízọ̀s Kráìst.

14. Éé ní ea bọ́ló kọ é olòó kẽ̀èa boo ea kil ló bẹẹ nu sẹ̀ẹ̀a sĩ́ ẽ́?

¹⁴ É kọọ̀ ge ká bùlà gbẹẹ́ boo gbò tóm e gé láá sì tõó dọ̀ kọ née é gbĩ́ ná dõòna kà nèà deè ge siimá tóm nè Jìhóvà? Ẽ́èe! Èé láá, vaá à bọ́ló kọ é noo gbò nu sẹ̀ẹ̀a sĩ́ ea é náa kọọ̀ é láá palàge kọ́ kpẹ̀a nè ge noòmà nuù gbò nen, vaá nvèè bá nè bẹẹ gbò vígà págbálà nè pábia. Èé sim tùlà bẹẹ gbò nu sẹ̀ẹ̀a sĩ́ tṍó e nveè bá nè dõòna gbò èlmà ge ká bùlà gbẹẹ́ boo bẹẹ bá.—Pró. 11:2; Tóm 20:35.

15. Mókà gbò nu sẹ̀ẹ̀a sĩ́ ní ea é láá nvèè bá nè ni kọ ó kpáá palàge ié zààvà ẹ?

¹⁵ Éé ní eo é láá noo sẹ̀ẹ̀a sĩ́é? Bàn Jìhóvà kọ á nveenìè bá neè ni naa ní eo é láá noo gbò nu sẹ̀ẹ̀a sĩ́ eo é téá tùlà. (Pró. 16:3; Jém̀z 1:5) É kọ òó láá teá tùlà gbò nu sẹ̀ẹ̀a sĩ́ e beè kọ́ nú ea kil ló mm̀  túá kpòa—ea dú gè dú neǹ gyà deèsĩ́ tóm kọ̀ kpẹ̀a mm̀ ńkpùlù dẽè tṍó àbèè dénè tṍó, ge sí tóm Bẹ́tẹẹ̀l, àbèè ge sí tóm gè tìb tọ gè tõó m nè fã̀ Bàrì? Àbèè kọọ̀, be à sẹlẹ o dìtõ̀ò dú ní eo é láá nó dõòna kà dém bel naa ní eo é kọọmá kpẹ̀a gbẹá dõòna kà dó. Òó láá kpáá nó bọ̀ọ̀vẹ̀ ea kil ló sìgà gbò nu sẹ̀ẹ̀a sĩ́í lọl boo a 10 togó mm̀ kpá ea kọlà Organized to Do Jehovah’s Will, nè ge zọ̀ gbò kànen e bà di mm̀ bọọ bõ̀ònatõ̀ò loá bel boo. * Tṍó eo piigà ge  teá tùlà gbò nu sẹ̀ẹ̀a sĩ́á, o sìm kilsĩ́ é dọ́ bàlà kẽ vaá òó kpáá palàge ié zààvà.

16. Éé ní eo é náa be nóo láà teá tùlà nú eo beè noo sẹ̀ẹ̀a sĩ́é?

¹⁶ Éé ní eo é náa be nóo láà teá tùlà gbò nu sẹ̀ẹ̀a sĩ́ e ni ló bel kilma lóá ẹ́? Pììga boo gè noo dõòna kà nu sẹ̀ẹ̀a sĩ́ ea é váli ní ló gè teá tùlà. Bugi togó boo nagbò nú eo é láá naaí.

17. Dẹ̀ẹ̀a boo nú ea di mm̀ 1 Tímotì 4:13, 15, éé ní e vígà págbálà é náa kọbé à láá noòmà nu leevè e?

¹⁷ Bugi 1 Tímotì 4:13, 15. Be ò dúù vígà págbálà eo beè dììa múú, òó láá pììga boo gè sìm kilsĩ́ mm̀ o kalì ge nèèmà lòbèl nè ge noòmà nu. Ló éé? Boo béè kọọ̀ be ò piiga boo gè bugi nu, nè lòbèl, vaá noòmà nu leevè, òó nveè bá nè gbò e bà gé pãané ni tṍ ló. Pììga boo gè olòó nó nu vaá ò tú buù kà nu gè nò ea di mm̀ bróshọ̀ ea kọlà Nvèè Sĩ́ Ló Gè Olòó Bugi Nu Nè Ge Noòmà Nu siimá tóm. Nó buù kà kpãaí, pììga boo gè nó gbẹá tọ, vaá ò síímá tóm tṍó eo gé ne lòbèl. Bĩiná lọ̀ọ̀gà bug lọl bá auxiliary counselor àbèè dõòna kà gbò kànen e bà ólò láá ‘nè lòbèl vaá noòmà nu leevè.’ * (1 Tím. 5:17) Ó gá ká bùlà gbẹẹ́ boo áá gè tú gbò gá ea di mm̀ bróshọ̀í siimá tóm, sõò bugi nagé togó boo gè nvèè bá nè pá vígà kọ bàá agẹlẹ ló ba zìgà nè ge tú nú e bà nó siimá tóm. Ge naa vó é náa kọọ̀ olo nè gbò e bà gé pãané ni tṍ ló á kpáá palàge ié zààvà.

18. Éé ní ea é láá nvèè bá nè ni kọ ó teá tùlà o nu sẹ̀ẹ̀a sĩ́ ea kil ló gè kọ́ kpẹ̀a ẹ́?

¹⁸ Dénè bẹ̀ì íè tóm gè noòmà nu nè ge naa kọọ̀ gbò nen á nyoone nvéè Kráìst. (Máát. 28:19, 20; Róm̀ 10:14) Àé dú lé be  ò kpáá palàge sìm kilsĩ́ mm̀ o kalì ge siimá nakà tóm ea palàge dì bíií. Ié nú eo é sẹẹa sĩ́ gè naa tṍó eo bugi vaá tú gbò gá eo nóò lọl mm̀ bróshọ̀ ea kọlà Ge Noòmà Nu, siimá tóm. Òó láá ié nágé dõòna kà gbò lọ̀ọ̀gà bug ea é nveè bá nè ni lọl mm̀ Kpá Bõ̀ònaló Sìtóm—Bẹẹ Dùm Dìbelí Gbò E Gé Nyoone Nvéè Kráìst Nè Bẹẹ Sìtóm Kọ̀ Kpẹ̀a, nè lọl mm nu dòòmà bá gè dààmà togó loa sọ́l e ólò ẹ̀b gbẹá nònù èèlè nyíè zẹ̀ẹ̀ sè. Dò ge tú kele-kele lọ̀ọ̀gà bug siimá tóm vaá ò ẹb ní ea palàge dú lé. Tṍó eo túù gbò lọ̀ọ̀gà bugí siimá tóm, òó kpáá palàge ié zààvà ea dú ló gè kọ́ kpẹ̀a nè ge noòmà nu.—2 Tím. 4:5.

19. Mósĩ́ deè ní eo é láá toní gbò kpãá ea léémá Bàrì e?

¹⁹ Tṍó eo gé bugi togó boo gbò nú eo é noo sẹ̀ẹ̀a sĩ́, ó gá gbẹmà nvéè ge naa nú ea palàge dú bíi—ea dú gè toní gbò kpãá ea léémá Bàrì. (Gàl. 5:22, 23; Kọ́l. 3:12; 2 Pít. 1:5-8) Éé ní eo é láá naa ẽ́? Dì belí nu dòòmà bá, dòòmà dẽe ló kọọ̀ ò gbĩ́ gè ièè agẹ zìgà. Òó láá bugi gbò togó bel ea di mm̀ bẹẹ gbò kpá ea ne lọ̀ọ̀gà bug ea kil ló bé eé láá ié agẹ zìgà naa. Ge ẹ̀b JW Broadcasting^® ea ló bel boo bé e gbò vígà págbálà nè pábia beè ié zìgà tṍó e bà gé téní bá kele-kele ẹ̀bmà naa é nveè bá nè ni. Tṍóá, ò gbóó bugi togó boo bé eo é láá nó ba zìgà naa.

20. Éé ní eé láá naa kọbé è kpáá palàge ié zààvà nè dĩ̀ìnè ló bùlà tṍó e tóm e géè ẹ̀bmà dẽe náa válí é?

²⁰ À ólò tàn dénè bẹ̀ì ge kpáá bọ̀ọ̀vẹ̀ gbàà tóm e gé sí nè Jìhóvà. Mm̀ ãa bàlà boo, èé beè sí tóm nè Bàrì mm̀ sĩ́deè ea gbõoma. Sõò, be è piigà imá kiẽ́e e bẹẹ kpóó sim tùlà mm̀ gbò tóm e láà sí kátogóí, èé kpáá palàge ié zààvà nè dĩ̀ìnè ló bùlà tṍó e tóm e géè ẹ̀bmà dẽe náa válí. Bọọ èlmà tõ̀ò, àé nveè ka ló Jìhóvà, ea dú bẹẹ ‘Bàrì ẹ́ẹ́ nyíe.’ (1 Tím. 1:11) Vóà naa, naanii mè é kilsĩ́ gè ié zààvà mm̀ gbò tó e gé sí kátogóí!