1. ¿Mbaʼe mbaʼépa ojapo hína heta ermáno ombaʼapove hag̃ua Jehová servísiope?

 ÑANDE ningo jareko hetaiterei traváho jajapo vaʼerã amáske hiʼag̃ui pe fin (Mat. 24:14; Luc. 10:2; 1 Ped. 5:2). Enterove jajapose voi opa ikatúva Jehová servísiope. Heta oĩ ombaʼapovémava hína predikasiónpe, ha algúnope hiʼãiterei oservi de prekursór. Ótro katu ombaʼaposeterei Betélpe térã konstruksiónpe, tahaʼe omopuʼã hag̃ua umi Salón del Reino, Salón de Asambléa, sukursál térã umi ofisína rremóta de traduksión. Avei hetaiterei ermáno ombaʼapo jejopy hína oiko hag̃ua chuguikuéra siérvo ministeriál térã ansiáno (1 Tim. 3:1, 8). ¡Oiménengo ovyʼaite Jehová ohechávo mbaʼéichapa ipuévlo kyreʼỹme oñehaʼã oservi porãve chupe! (Sal. 110:3; Is. 6:8).

2. ¿Mbaʼéichapa ikatu ñañeñandu ndaikatúiramo jahupyty peteĩ méta jarekóva Jehová servísiope?

 ² Péro ikatu hína ñañeñandu vai oiméramo heta tiémpoma ohasa, ha ndajahupytýi gueteri umi méta jarekóva Jehová servísiope. Ikatu avei ñañedesanima hína jahasáma haguére la eda jahupyty hag̃ua umi priviléhio jaipotaitereíva, térã ñane situasión nomeʼẽi rupi upearã (Prov. 13:12). Upéva ningo oiko vaʼekue Melíssare. * Haʼe ombaʼaposeterei vaʼekue Betélpe térã ohose pe Eskuéla de Evanhelisadórpe, péro haʼe heʼi: “Che ningo ahasapáma la eda ahupyty hag̃ua koʼã priviléhio. Upévare koʼã mbaʼe chéve g̃uarã peteĩ suéñontema, ha upéicha rupi añedesanima sapyʼánte”.

3. ¿Mbaʼépa algúno tekotevẽ ojapo oñemeʼẽve hag̃ua chupekuéra rresponsavilida Jehová servísiope?

³ Heta oĩ imitãva ha hesãiva, péro oñemeʼẽ mboyve chupekuéra hetave rresponsavilida, tekotevẽta oñehaʼã oreko umi kualida iporãva. Por ehémplo, oĩ umi iñintelihénteva, idesidídova ha iguápova, péro tekotevẽ gueteri oaprende ipasiensiave, ojapo  porãve hembiapo ha orrespetave ótrope. Oiméramo nde reñehaʼãmbaite eikóvo ereko hag̃ua umi kualida ifáltava ndéve, ikatu hína oñemeʼẽ ndéve peteĩ rresponsavilida reimoʼãʼỹve jave. Epensamíntena la oiko vaʼekue Nick rehe. Haʼe orekórõ guare 20 áño, oñeñandu vaieterei vaʼekue noñenombrái haguére chupe siérvo ministeriál. Haʼe heʼi: “Che apensa vaʼekue oiméne hag̃ua álgo ajapo vai hína”. Péro Nick noñentregái. Haʼe osegi ombaʼapo jejopy kongregasiónpe ha predikasiónpe, ha koʼág̃a g̃uarã haʼe oservíma hína peteĩ Komite de Sukursálpe.

4. ¿Mbaʼépa jahecháta ko artíkulope?

⁴ ¿Ndépa reñeñandu vai hína nderehupytýi haguére gueteri peteĩ méta erekóva Jehová servísiope? Oiméramo upéicha, eñemboʼe ha emombeʼu Jehovápe mbaʼéichapa eñeñandu (Sal. 37:5-7). Ikatu avei eporandu umi ermáno ijerovia mbaretévape mbaʼépepa ikatu emehora eservi porãve hag̃ua Jehovápe, ha upéi eñehaʼãmbaite esegi umi konsého omeʼẽva ndéve hikuái. Ejapóramo upéicha, ikatu hína rehupyty upe ne méta térã oñemeʼẽ ndéve pe priviléhio reipotaitéva. ¿Péro mbaʼépa ejapokuaa ndaikatúiramo ehupyty pe méta erekóva, oiko haguéicha Melíssare? ¿Mbaʼépa ikatu ejapo esegi hag̃ua evyʼa? Ñambohovái hag̃ua koʼã porandu, ko artíkulope jahecháta: 1) ¿Mbaʼépa ikatu ñanembovyʼa? 2) ¿Mbaʼépa ikatu jajapo javyʼave hag̃ua? Ha 3) ¿mbaʼeichagua métapa ikatu ñanepytyvõ javyʼave hag̃ua?

5. ¿Mbaʼe rehepa ñapensa meme vaʼerã ikatu hag̃uáicha javyʼa? (Eclesiastés 6:9).

⁵ Eclesiastés 6:9 heʼi mbaʼépa ñanepytyvõta javyʼa hag̃ua (elee). Peteĩ persóna ‘odisfrutáva umi mbaʼe ikatúva ohecha’ omombaʼe la orekóva, ha ovyʼa umi mbaʼe ikatúvare ojapo asegún pe situasión orekóva koʼág̃a. Péro peteĩ persóna ‘oipotáva umi mbaʼe ndaikatumoʼãiva ohupyty’ núnka noñekontentái, ha osegi odesea umi mbaʼe ndaikatúiva oreko. ¿Mbaʼépa ñanemboʼe upéva? Javyʼa hag̃ua, ñapensa meme vaʼerãha umi mbaʼe jarekóvare ha umi méta si ikatúvare jahupyty.

6. ¿Mbaʼépa jahecháta koʼág̃a, ha mbaʼépa ñaaprendéta?

⁶ ¿Añetehápe piko ikatu javyʼa umi asignasión jarekóvare koʼág̃a? Heta hénte opensa ndaikatumoʼãiha, pórke ñande ñaaprendese ha jajapose jepi umi mbaʼe pyahu. Péro añetehápe ikatu hína javyʼa umi mbaʼe jarekóvare koʼág̃a. ¿Mbaʼéichapa ikatu jajapo upéva? Jaikuaa hag̃ua ikatu ñaanalisa pe ehémplo Jesús oipuru vaʼekue Mateo 25:14-30-pe. Jahecháta mbaʼéichapa ikatu javyʼa, ha mbaʼépa ikatu jajapo javyʼave hag̃ua umi asignasión jarekóvare koʼag̃aite.

7. Emombeʼu mbykymi pe ehémplo Jesús omoĩ vaʼekue.

⁷ Upe ehémplope, Jesús omombeʼu peteĩ karai oho hague de viáhe. Péro oho mboyve, haʼe ohenói ijesklavokuérape ha omeʼẽ káda únope heta monéda de pláta ikatu hag̃uáicha onegosia hikuái. Pe karai oikuaa vaʼekue káda uno umi ijesklávo idiferenteha ojuehegui. Ha orekóvo upéva enkuénta, pe primérope omeʼẽ 5 vosa henyhẽva monéda de plátagui, pe segúndope omeʼẽ mokõi ha pe tercer esklávope omeʼẽ peteĩ. Pe primer ha segundo esklávo ombaʼapo jejopy oganave hag̃ua pláta ipatrónpe g̃uarã. Péro pe tercero ndojapói mbaʼevete pe pláta oñemeʼẽ vaʼekuégui chupe. Upéicha rupi pe patrón omosẽ chupe.

8. ¿Mbaʼérepa ovyʼaitereíne raʼe pe primer esklávo?

⁸ Pe primer esklávo katuete ovyʼaitereíne raʼe ipatrón oheja haguére ikárgope 5 vosa henyhẽva monéda de plátagui. Upéva ningo hetaiterei pláta ha ohechauka ipatrón ojeroviaitereiha hese. ¿Péro mbaʼépa ikatu jaʼe pe segundo esklávore? Haʼe ikatu kuri oñedesanima noñemeʼẽi haguére chupe heta pláta, pe primer  esklávope oñemeʼẽ haguéicha. ¿Péro mbaʼépa haʼe ojapo?

9. ¿Mbaʼépa Jesús ndeʼíri vaʼekue pe segundo esklávore? (Mateo 25:22, 23).

⁹ (Elee Mateo 25:22, 23). Jesús ndeʼíri vaʼekue pe segundo esklávo opyta hague ipochy ha ipyʼaro oñemeʼẽ haguére chupe mokõi pláta vosánte. Ha Jesús ndeʼíri vaʼekue avei pe esklávo oñemoĩ hague ojeplagea heʼívo: “¿Kóvante piko la oñemeʼẽva chéve? ¿Mbaʼére piko saʼive oñemeʼẽ chéve? Che ningo chevalénte avei pe ótro esklávoicha, péro chupe oñemeʼẽ voi 5 vosa. La che patrón nomombaʼéiramo la che traváho, ahátante avei añotỹ yvyguýpe koʼã mokõi pláta vosa ha ambaʼapótantema chejupe g̃uarã”.

10. ¿Mbaʼépa ojapo pe segundo esklávo umi mokõi pláta voságui?

¹⁰ Ojapo haguéicha pe primer esklávo, pe segundo esklávo ojagarra avei ensério pe rresponsavilida oñemeʼẽ vaʼekue chupe ha ombaʼapo jejopy ipatrónpe g̃uarã. Upéicha rupi, oganave mokõi pláta vosa chupe g̃uarã, ha pe patrón opaga porã chupe haʼe iguápo ha ivale haguére. Pe patrón ningo ndahaʼéi ovyʼánteva pe esklávo traváhore, síno omeʼẽ voi chupe hetave rresponsavilida.

11. ¿Mbaʼépa ikatu jajapo javyʼave hag̃ua?

¹¹ Upéicha avei, ñande ikatu javyʼave ñambaʼapo jejopýramo ñakumpli hag̃ua oimeraẽ asignasión oñemeʼẽva ñandéve Jehová servísiope. Jaipurupaitékena ñane tiémpo predikasiónpe, ha jajapo ikatúva guive japartisipa hag̃ua opa mbaʼe ojejapóvape kongregasiónpe (Hech. 18:5; Heb. 10:24, 25). Jajeprepara porãkena rreunionrã ikatu hag̃uáicha ñamokyreʼỹ ótrope ñane komentariokuéra rupive. Jajagarra  ensério oimeraẽ asignasión oñemeʼẽva ñandéve pe rreunión éntre semanaguápe. Umi ansiáno ojeruréramo ñandéve jajapo hag̃ua peteĩ traváho kongregasiónpe, ñanepuntuál ha ñakumpli porã vaʼerã upéva. Aníkena ñapensa naiñimportanteguasuiha peteĩ traváho oñemeʼẽva ñandéve, ha ndovaleiha la péna japerde hese ñane tiémpo. Ñañehaʼãmbaitékena ñandevaleve hag̃ua umi mbaʼe jajapóvape (Prov. 22:29). Amáske ñambaʼapo jejopyve Jehovápe g̃uarã, pyaʼeve japrogresáta ha javyʼaitevéta (Gál. 6:4). Avei ifasilvéta ñandéve javyʼa hag̃ua oñemeʼẽramo ótrope pe priviléhio ñande jaipotaite vaʼekue (Rom. 12:15; Gál. 5:26).

12. ¿Mbaʼépa oipytyvõ vaʼekue Melissa ha Níckpe ovyʼave hag̃ua?

¹²¿Ñanemanduʼápa Melíssare, pe ermána ñañeʼẽ hague  párrafo 2-pe? Haʼe ningo ohose vaʼekue Betélpe térã pe Eskuéla de Evanhelisadórpe. Péro ndaikatúiramo jepe okumpli umi isuéño, haʼe heʼi: “Che añemeʼẽmbaite che prekursorádope ha añehaʼã avei apredika diferénte hendáicha. Koʼã mbaʼe ningo chembovyʼaiterei”. ¿Ha mbaʼépa ojapo kuri Nick noñenombráirõ guare chupe siérvo ministeriál? Haʼe heʼi: “Añekonsentra umi mbaʼe ikatúvare ajapo, por ehémplo apredika ha ameʼẽ umi komentário omokyreʼỹtava ótrope rreunionhápe. Akompleta avei che solisitu ambaʼapo hag̃ua Betélpe, ha pe áño sigiénte añeinvita aha hag̃ua upépe”.

13. ¿Mbaʼépa oikóta ñambaʼapo jejopýramo ñakumpli porã hag̃ua pe asignasión jarekóva koʼag̃aite? (Eclesiastés 2:24).

¹³ Oiméramo ñande ñambaʼapo jejopy hína ñakumpli porã hag̃ua pe asignasión jarekóva koʼag̃aite, ¿heʼisépa upéva oñemeʼẽtaha katuete ñandéve hetave rresponsavilida amo gotyove? Ikatu mbaʼe, oiko haguéicha Nick rehe. Péro nahániriramo, oiko haguéicha Melíssare, lomímonte jasegíta javyʼa ha ñañeñandu porãitereíta umi mbaʼe jajapóvare Jehová servísiope (elee Eclesiastés 2:24). Avei katuete javyʼaitereíta jaikuaávo umi mbaʼe jajapóva ombovyʼaha hína ñane Patrón Jesucrístope.

14. ¿Mbaʼépa jasegi vaʼerã jajapo Jehová servísiope?

¹⁴ Oiméramo ñañehaʼãmbaite hína ñakumpli porã umi asignasión jarekóva koʼág̃a, ¿heʼisépa upéva nañañehaʼãvéima vaʼerãha jajapo hetave mbaʼe Jehová servísiope? ¡Ni mbaʼevéicharõ! Ñamoĩ vaʼerã umi méta ñanepytyvõtava ñandevaleve hag̃ua predikasiónpe, ñamboʼe porãve hag̃ua ha ñaipytyvõve hag̃ua ñane ermáno ha ermanakuérape. Jahupytýta koʼã méta jarekóva ñaneumílde ha ñanearandúramo, ha ñañehaʼãmbaitéramo jaservi ótrope ñapensa rangue ñandejehénte (Prov. 11:2; Hech. 20:35).

15. ¿Mbaʼeichagua métapa ikatu ñanepytyvõ javyʼave hag̃ua?

¹⁵ ¿Mbaʼeichagua métapa ikatu ñamoĩ? Jajerure Jehovápe tañanepytyvõ jaikuaa hag̃ua mbaʼeichagua métapa ikatúta jahupyty (Prov. 16:3; Sant. 1:5). ¿Ikatúpa ñañehaʼã jahupyty umi méta jahecha vaʼekue  párrafo 1-pe? Por ehémplo, jajapo ñande prekursorádo auxiliár térã rregulár, jaservi Betélpe térã ñambaʼapo konstruksiónpe. Ikatu avei ñaaprende ótro idióma japredika hag̃ua umi héntepe, osino java voi peteĩ lugár oñeñeʼẽhápe ótro idióma. Ñaaprendeve hag̃ua koʼã mbaʼégui, ikatu jalee pe lívro Pe organisasión ojapóva Jehová volunta kapítulo 10, térã ñañeʼẽ umi ansiáno oĩvandi ñane kongregasiónpe. * Ñañehaʼãramo jahupyty koʼã méta, enterove ohechakuaáta japrogresaha jahávo ha javyʼavéta.

16. ¿Mbaʼépa ikatu jajapo koʼag̃aite ndaikatúiramo jahupyty peteĩ méta jarekóva?

¹⁶ Péro oiméramo koʼag̃aite ndaikatúi jahupyty umi méta jahecha vaʼekue ko artíkulope,  ¿mbaʼépa ikatu jajapo upéicharõ? Ñañehaʼãkuaa ñamoĩ umi méta si ikatútava jahupyty. Jahechami koʼág̃a mbaʼe mbaʼépa ikatu jajapo.

17. Heʼiháicha 1 Timoteo 4:13, 15, ¿mbaʼépa ikatu ojapo peteĩ ermáno oporomboʼe porãve hag̃ua?

¹⁷ (Elee 1 Timoteo 4:13, 15). Oiméramo nde peteĩ ermáno vautisádo, ikatu eñehaʼãmbaite ejapo porãve hag̃ua nde diskúrso ha ndevaleve hag̃ua eporomboʼévo. ¿Mbaʼérepa? Pórke ‘epensa meméramo’ mbaʼéichapa ikatu elee porãve, eporomboʼe ha ejapo porãve umi nde diskúrso, nde haʼéta peteĩ vendisión umi nerendúvape g̃uarã. Emoĩ la méta estudia ha esegi hag̃ua káda konsého omeʼẽva pe folléto Jalee ha ñamboʼe porãve hag̃ua. Estudia káda uno umi leksión, eñensaja porã nde rógape, ha ejapo jave umi nde diskúrso eñehaʼãmbaite emoĩ en práktika umi mbaʼe eaprende vaʼekue. Ejerure suherénsia pe konsehéro auxiliárpe * térã umi ótro ansiánope. Haʼekuéra ningo ‘ombaʼapo jejopy oñeʼẽ hag̃ua Ñandejára Ñeʼẽre ha oporomboʼe hag̃ua’ (1 Tim. 5:17). Ndahaʼéi ningo eñehaʼãnte vaʼerã entende pe leksión oĩva pe follétope, síno epensa vaʼerã mbaʼéichapa ikatu eipytyvõ umi nerendúvape omombarete hag̃ua ijerovia, térã omoĩ hag̃ua en práktika umi mbaʼe oaprendéva. Ejapóvo upéicha, evyʼavéta nde ha haʼekuéra avei.

18. ¿Mbaʼépa ñanepytyvõta ñandevaleve hag̃ua predikasiónpe?

¹⁸ Ñande ningo enterove jareko la asignasión japredika ha jajapo hag̃ua disípulo (Mat. 28:19, 20; Rom. 10:14). ¿Mbaʼéichapa ikatu ñandevaleve ko traváho iñimportantetévape? Upearã ikatu jastudia pe folléto Ñamboʼe porãve hag̃ua, ha upéi ñamoĩ umi méta ñanepytyvõtava jajapo hag̃ua umi mbaʼe ñaaprendéva. Jatopáta avei  heta suherénsia iporãitereíva ñane prográma rreuniónpe g̃uarãme Mbaʼéichapa Jaiko ha Japredika vaʼerã, ha avei umi vidéo jahechávape umi rreunión éntre semanaguápe ohechaukáva mbaʼéichapa ikatu ñañemongeta la héntendi. Ñatanteakuaa umi suherénsia oñemeʼẽva ñandéve ha jahecha mavaitévapa oikovéta ñande territóriope. Jasegíramo koʼã suherénsia, ñandevalevéta predikasiónpe ha ñamboʼe porãvéta umi héntepe, ha upéva katuete ñanembovyʼaitereíta (2 Tim. 4:5).

19. ¿Mbaʼépa ñanepytyvõta jareko hag̃ua umi kualida Jehová oguerohorýva?

¹⁹ Ñapensávo entéro umi méta ikatúvare ñamoĩ, ñanemanduʼákena umíva apytépe oĩha peteĩ iñimportantetereíva: Ñañehaʼã jareko umi kualida porã Jehová oguerohorýva (Gál. 5:22, 23; Col. 3:12; 2 Ped. 1:5-8). ¿Mbaʼéichapa ikatu jahupyty upe méta? Por ehémplo, ñamoĩ chupe ñamombareteseveha ñande jerovia. Upearã jaleekuaa ñane puvlikasionkuérape umi artíkulo oĩháme umi suherénsia ohechaukáva mbaʼéichapa ikatu ñamombarete ñande jerovia. Ikatu avei ideprovécho ñandéve jahecháramo umi vidéo oĩva JW Broadcástingpe, ojekuaahápe mbaʼéichapa umi ermáno ijerovia mbaretéva ombohovái raʼe umi situasión ivaietéva. Upéi jahecha mbaʼéichapa ikatu jasegi iñehemplokuéra ha jajerovia avei haʼekuéraicha.

20. ¿Mbaʼépa ikatu jajapo javyʼave hag̃ua ha menove ñañeñandu vai hag̃ua?

²⁰ Katuete enterovépe hiʼãiterei jajapo hetave mbaʼe Jehová servísiope. Pe múndo pyahúpe ningo ikatúta jaservi porãiteve chupe, pórke ikatútama jajapo umi mbaʼe hiʼãitereímava ñandéve. Péro og̃uahẽ mboyve upe día, jaaprovechákena entéro oportunida jarekóva koʼág̃a Jehová servísiope. Péicha katuete javyʼavéta ha menove ñañeñandu vaíta. Iñimportanteveha, ñambotuicha ha ñamombaʼeguasúta hína Jehovápe, haʼéva ‘Ñandejára ovyʼáva’ (1 Tim. 1:11). Upéicharõ, ¡javyʼákena umi priviléhio jarekóvare koʼág̃a!