1. ¿Ja mräkätre kwati tä dre nuainne sribikäre bäri Jehová kräke?

 KÄ NE kebera krüte aune sribi tä nuaindre krubäte nie (Mat. 24:14, TNM; Luc. 10:2; 1 Ped. 5:2). Ni jökrä tö sribibätä bäri Jehová kräke. Yebätä ja mräkätre kwati tä sribire krubäte. Ja mräkätre ruäre tä ja töi mike ja mikakäre prekursor, rikakäre sribire Betelte o sribikäre ju Ngöbökwe sribeta yebätä. Aune ja mräkätre kwati tä ja töi mike rabakäre siervo ministerial aune ni umbre ji ngwanka konkrekasionte (1 Tim. 3:1, 8). Nitre Jehová mikaka täte tä juto biare sribikäre ye käi juto Jehovabätä (Sal. 110:3; Is. 6:8).

2. ¿Sribi meden ie ni tö ñaka nemen nikwe ngwane ja raba nemen ruin ño nie?

² Ne madakäre kä nikanina ta aune sribi meden ie ni tö nämäne ye ngämi nemen nikwe ngwane, ni raba nemen ulire krubäte raba ruin nie. Kä nuäi nibiti o kukwe meden tä ni kisete ye köböite ni ñan raba sribi ruäre nuainne juta Jehovakwe te ye raba nemen tare nie (Prov. 13:12). Kukwe ye kwrere nemen bare Melissabätä, * niara tö sribibätä Betelte aune rikabätä Kwela Nitre Gobran Ngöbökwe Kukwei Driekä kräke yebätä. Niara tä niere: “Ti niena umbre ne kwe ti nübaidre sribi ye kräke. Sribi ye tita bämike jerekäbe ja töite. Yebätä ruäre ngwane tita nemen di nekä”.

3. ¿Sribi ruäre biandre nuaindre ja mräkätre ie yekäre rabadre dre nuaindre?

³ Ja mräkätre ruäre bati aune kwin akwa sribi mada biandre ietre yekäre rabadre nemen ünä kukwe ja üairebiti aune ja di ngwandre kwetre ja töi mikakäre kwin. Ja mräkätre ye töbätä, sribire töi kwatibebiti aune kä jutobiti akwa täbe ja kitadre ietre kukwe ngibiakäre bätärekä, sribikäre kwin aune nitre mada mikakäre  ütiäte jai. Ja di ngwain kwetre ja töi mikakäre kwin ngwane, ñaka ngibiata kwetre ngwane sribi mada bian raba ietre. Ja mräkä kädekata Nick, yebätä ani blite. Kä nämäne 20 biti ngwane ñan kädekani siervo ministerial yebätä namani ulire krubäte. Niara tä niere: “Ti ñan nämä sribire kwin rababa ruin tie”. Akwa ñaka ja di ngwani nekä kwe, ñakare aune raba sribi meden nuainne konkrekasionte aune kukwe driekäre bäri yebätä ja töi mikani metrere kwe. Kä nengwane, tä sribire ni Comité Sukursal erere.

4. ¿Dre rabai gare nie kukwe ja tötikara nekänti?

⁴ Sribi meden ie ni tö ye ngämi nemen nikwe ngwane, ¿yebätä nita di nekä? Ye erere ngwane ja ruin ño nie ye nikwe niedre Jehovai (Sal. 37:5-7). Kukwe medenbätä täbe ja töi ükadrete nie yebätä nikwe blitadre ja mräkätre ie kukwe gare yebe aune dre niedre kwetre nie ye nikwe mikadre täte. Nikwe ye erere nuaindi ngwane, sribi meden ie ni tö ye raba nemen nikwe. Akwa, sribi meden ie ni tö ye ñan raba nemen nikwe nemen bare Melissabätä erere ngwane, ¿ni raba dre nuaindre? ¿Kä tädre käre juto nibätä yekäre nikwe dre nuaindre? Kukwe ketamäbätä blitai kukwe ja tötikara nekänti yebiti mikai gare nie. Kena, dre raba kä mike juto nibätä. Ketebukäre, nikwe dre nuaindre ne kwe kä tädre juto nibätä. Aune ketamäkäre, nikwe sribi meden mikadre nuaindre jai ne kwe kä tädre bäri juto nibätä.

5. ¿Kä tädre juto nibätä yekäre nikwe ja töi mikadre drebätä metrere? (Eclesiastés 6:9).

⁵ Kä tädre juto nibätä ie ni tä ngwane kukwe nieta Eclesiastés 6:9 ye nikwe mikadre täte (ñäkädrebätä). * “Dre tuin ni okwä ie” ye nire tä käi ngwen juto jabätä ye ie ja ruin kwin. Ñodre kukwe meden tä kisete nengwane, yebätä ja rabai ruin kwin ie. Akwa nire ‘ja töi mikadre ngwarbe nekwäre sekwäre jondron jiebiti’ dre ñan raba nemen kwe ye käre tö tuabätä nemen jakwe. ¿Kukwe ne tä dre driere nie? Kä tädre juto nibätä ie ni tö ngwane dre ñan raba nemen nikwe yebätä nikwe ñan ja töi mikadre ñakare aune dreta nikwe yebätä nikwe ja töi mikadre metrere.

6. ¿Kukwe bämikani medenbätä ni bike blite aune dre rabai gare nie?

⁶ Nierare ni töta nemen ja kitai jondron mada mrä nuainkäre. Akwa, ¿erametre jondron tä nikwe yebätä ja raba nemen ruin kwin nie? Jän. Jondron tä nikwe ye käi raba nemen juto nibätä. ¿Nuain raba ño? Jesukwe kukwe bämikani talentobätä yebätä ani blite, ye raba kwen nie Mateo 25:14-30 yete. Ni raba dre nuainne kä rabadre juto nibätä yekäre aune kukwe ño ben nita ja tuin akwa yebiti ta kä rababa nemen ño bäri juto nibätä ye rabai gare nie kukwe Mateo yekänti yebiti.

7. Jesukwe kukwe bämikani talentobätä yebätä mä raba kukwe mike gare.

⁷ Jesukwe kukwe bämikani yebätä blitabare kwe ni iti nikani kä mada kokwäre yebätä. Rikadre ye känenkri, nitre klabore kwe ye käräbare kwe aune talento biani kwe itire itire ie sribi nuainkärebiti. * Iti ie talento biani krärike kwe, mada ye ie talento biani krobu kwe aune madai talento biani krati kwe raba dre dre nuaindre ye ererebätä. Nibutre känekäne ye käkwe sribibare krubäte aune ngwian ganainbare bäri bökänkä kwe ye kräke. Akwa nimäkäre ye käkwe ñaka sribibare talento biani ie yebiti, yebätä bökänkä kwe käkwe kitaninkä.

8. ¿Ni klabore iti kädekaninte käne yebätä kä namani juto ye ñobätä ni raba niere?

 ⁸ Ni klabore käne ye ie bökänkä kwe talento biani krärike yebätä ja namani ruin kwin ie raba ruin nie. Ngwian ye ere krubäte aune bökänkä kwe nämäne tö ngwen nuäi ie ye bämikani kwe ie kukwe yebiti. ¿Akwa dre nie raba ni klabore nibukäre yebätä? Talento ñan biani krubäte ie biani ni klabore iti ye ie näre yebätä rabadre ulire näre. ¿Akwa dre nuainbare kwe?

9. ¿Jesukwe kukwe meden ñan niebare ni klabore nibukäre yebätä? (Mateo 25:22, 23).

⁹ (Ñäkädre Mateo 25:22, 23 yebätä). Ni klabore nibukäre ye ie talento biani krobu yebätä namani romon o ye namani blo kräke ye ñan mikani gare Jesukwe. Aune ñaka kukwe ne kwrere niebare kwe mikani gare Jesukwe arato: “¿Ne aibe bian bike tie? ¡Ni klabore ie talento bini krärike, ye kwrere kukwe nuain gare krubäte tie! Ti bökänkä ñan tä ti mike ütiäte jai yebätä ti bike talento kubu ne dobo mete aune ti bike ja näkwite sribi tikwebätä”.

10. ¿Ni klabore nibukäre ye käkwe dre nuainbare talento biani ie yebiti?

¹⁰ Ni klabore käne erere, ni klabore nibukäre ye kötärä sribi mikani ye nuainbare bökän kwe aune sribibare jume kwe bökänkä kwe ye kräke. Ye köböire talento krobu mada ganainbare kwe. Ye käi namani juto bökänkä kwebätä yebätä jondron ütiäte biani kwe ie ja di ngwani kwe yebätä aune sribi mada mikani kwe kisete.

11. ¿Kä rabadre bäri juto nibätä yekäre nikwe dre nuaindre?

¹¹ Ye erere arato nita sribire Jehová kräke ngwane, sribi meden biandre nie ye nikwe ja di ngwandre nuainkäre, ye köböire kä raba nemen bäri juto nibätä. Nikwe ja di ngwandre kukwe driekäre aune sribi nuainkäre konkrekasionte  (Hech. 18:5; Heb. 10:24, 25). Nikwe ja ükadrete kwin ja mräkätre dimikakäre kukwe nieta nikwe gätäte yebiti. Ni kitata dirikäre bäri kwin gätä nuainta bämän ngrabare yebiti, ye nikwe mikadre tuin bökän jai. Sribi meden bianta nuaindre nie ye nikwe ja di ngwandre nuainkäre kä kitani nuäi nie ye erere te aune nuaindre kwin. Sribi ruäre ye ñan ütiäte aune ñaka kä diandrekä jai nuainkäre ye nikwe ñaka nütüdre. Nikwe ja di ngwandre kukwe nuainkäre bäri kwin (Prov. 22:29). Ni täi käre sribi ja üaire nuainne ngwane ni ririai bäri jötrö ja üairebiti aune kä rabai bäri juto nibätä (Gál. 6:4). Aune sribi meden ie ni tö ye biandre ja mräkä madai ngwane, kä rabai bäri juto nibätä (Rom. 12:15; Gál. 5:26).

12. Kä rabadre bäri juto Melissa aune Nickbätä yekäre, ¿dre nuainbare kwetre?

¹² Melissa tö namani rikabätä Betelte o Kwela Nitre Gobran Ngöbökwe Kukwei Driekä kräke yebätä abokänbätä blitani párrafo 2 yekänti, ¿ye törö munye? Namanina umbre yebätä ñan raba sribi ye nuainne akwa niara tä niere: “Titä ja di ngwen sribi prekursor nuainkäre aune kukwe driedre ño ye erere tita nuainne. Ye tä kä mike juto krubäte tibätä”. Aune Nick ñan kädekani siervo ministerial abokänbätä blitani párrafo 3 yekänti namani ulire krubäte, ¿akwa dre nuainbare kwe ja tuakäre kukwe yekwe? Niara tä niere: “Ti raba dre nuainne yebätä tikwe ja töi mikaba metrere: Tikwe ja di ngwanba kukwe driekäre aune kukwe niekäre gätäte ja mräkätre dimikakäre. Solicitud Betel kräke yebätä tikwe ja kä tikaba aune kä rikaba kwati ta ye bitikäre ti nübaiba”.

13. Sribi tä nuaindre nie gwäune ye nikwe ja di ngwandre nuainkäre ngwane, ¿dre raba nemen bare? (Eclesiastés 2:24).

¹³ Ye medenbätä, sribi bianta nuaindre nie gwäune ye nikwe ja di ngwandre nuainkäre ye köböire, ¿ja känenkäre sribi mada biandi nie ni raba niere? Jän raba ruin nie, namani bare Nickbätä ye erere. Akwa ñakare ngwane kä rabai juto nibätä aune ja rabai ruin kwin nie Melissa ye erere (ñäkädre Eclesiastés 2:24 yebätä). * Ne madakäre, sribi nuaindre nikwe ye käi nuäre ni Dänkien Jesukristobätä ye käkwe kä mikai juto nibätä ye gare metre nie.

14. ¿Nita sribire Jehová kräke ngwane nikwe dre ngwandre törö jai?

¹⁴ Ni niena ja di ngwen sribi nuainkäre Jehová kräke gwäune. Yebätä, ¿ni ñan raba sribire bäri Jehová kräke ye meden gärätä? Ye ñan ai gärätä. Kukwe meden raba ni dimike kukwe driekäre kwin aune dirikäre kwin ja mräkätre dimikakäre ye nikwe mikadre nuaindre jai aune nuaindre. Nikwe ja ngwandre töbätä aune kukwe jökrä ye ni ñan raba nuainne tädre gare nie aune nikwe ñan ja töi mikadre jabätä ñakare aune nikwe ja töi mikadre nitre mada dimikabätä, ye köböire kukwe ye raba nemen nikwe (Prov. 11:2; Hech. 20:35).

15. ¿Nikwe sribi meden mikadre nuaindre jai ye käkwe kä mikai juto nibätä?

¹⁵ ¿Ni raba kukwe meden mike nuaindre jai? Dre dre nuain raba nikwe aune kukwe ño ben nita ja tuin yebiti ta ni raba dre nuainne yebätä Jehovakwe ni dimikadre ye nikwe kärädre ie (Prov. 16:3; Sant 1:5). ¿Sribi keta kabre kädrite  párrafo kena yekänti ye meden ni raba nuainne? Ñodre, ¿ni raba sribi prekursor ausiliar, regular, Betel o ju Ngöbökwe sribere? ¿Ni raba ja kite blitakäre kukwe madabiti ne kwe nikwe kukwe driedre nitre kwati ye ie o medente ja mräkätre ribeta kukwe driekäre yekänti ni raba niken? Mä tö kukwe mikai gare bäri jai ngwane, mä raba ñäke tärä Organizados para hacer la  voluntad de Jehová kapitulo 10 yebätä aune mäkwe blita nitre umbre ji ngwanka konkrekasion mäkwe yete ye ben. * Mä tö dre nuainbätä ye mäkwe ja di ngwain ne kwe rabadre mäkwe ngwane, kä rabai bäri juto mäbätä aune mä kitera nirien kukwe ja üairebiti ye jutuai nitre ie.

16. ¿Sribi meden ni ñaka raba nuainne gwäune ngwane nikwe dre nuaindre?

¹⁶ Sribi meden nikwe mikadre nuaindre jai abokänbätä blitaniri ye ñaka raba nemen nikwe gwäune ngwane, ¿ni raba dre nuainne? Sribi meden raba nemen bare nie ye nikwe mikadre nuaindre jai. Kukwe meden kädekatebike jatäri nebätä ni raba töbike.

17. 1 Timoteo 4:13, 15 tä niere erere, ¿ja mräkä iti tö rabadre dirire kwin yekäre rabadre dre dre nuainne?

¹⁷ (Ñäkädre 1 Timoteo 4:13, 15 yebätä). Mä brare aune mäkwe ja ngökanina ñöte ngwane, mäkwe ja di ngwan kukwe kädriekäre kwin aune dirikäre kwin. ¿Ñobätä? Ñobätä ñan aune mäkwe ñäkädre kwin täräbätä, mäkwe kukwe kädriere kwin aune mäkwe diridre kwin yebiti nitre mä kukwe nuaka ye mäkwe dimikai. Kukwe kädriedre ño bäri kwin mikata gare täräkwata Ñäkädre kwin täräkwata aune diridre kwin yebätä. Mäkwe ja töi mika ja tötike täräkwata yebätä aune dre nieta yete ye mäkwe mika täte. Kukwe ja tötikara keteitire keteitirebätä mäkwe ja tötika, mäkwe ja kita krubäte gwi aune dre nemen gare mäi ye mäkwe ja di ngwan mikakäre täte mätä kukwe kädriere ye ngwane. Ni mäträkä gätäte * o ni umbre ji ngwanka mada “tä ja di ngwen blitakäre aune dirikäre kwin” gätäte ye ie nikwe ja di kärädre (Tim. 5:17). Kukwe meden nemen gare nie täräbätä ye nikwe ñaka ja  töi mikadre ye aibe mike täte, ñakare aune tödeka ja mräkätrekwe ye nikwe mikadre dite aune dimikadre kukwe mike täte. Ye köböire, kä rabai juto nibätä aune nitre ni kukwe nuaka yebätä kä rabai juto arato.

18. ¿Dre raba ni dimike kukwe driekäre kwin?

¹⁸ Kukwe driedre aune nitre mikadre ja tötikaka ye tä nuaindre ni kristiano jökrä ie (Mat. 28,19, 20; Rom. 10:14). ¿Ni tö diribätä kwin sribi ütiäte krubäte nebätä? Yekäre nikwe ja tötikadre täräkwata Diridre kwin yebätä aune kukwe meden nemen gare nie ye ni tö mikabätä täte ngwane, nikwe kukwe mikadre nuaindre jai. Kukwe ja jie ngwankäre gätäte Nita Dirire aune Ja ngwen Ño aune kukwe nieta blita kömikakäre mikata tuare videote bämän kratire kratire, yete kukwe ütiäte kukwe driekäre mikata gare nie. Kukwe mikata gare ye nikwe ja di ngwandre mikakäre täte ne kwe medenbiti ni raba kukwe driere kwin ye rabadre gare nie. Kukwe mikata gare ye nikwe mikai täte ngwane ni rabai nemen dirikä kwin ye käi rabai juto krubäte nibätä (2 Tim. 4:5).

19. ¿Dre käkwe ni dimikai ja töi mikakäre kwin ni kristiano erere?

¹⁹ Nikwe ja töi mikadre kwin ni kristiano erere, kukwe ye mikadre nuaindre jai ye bäri ütiäte nikwe ngwandre törö jai (Gál. 5:22, 23; Col. 3:12; 2 Ped. 1:5-8). ¿Ni raba nuainne ño? Ñodre, tödeka nikwe rabadre dite ye ie ni tö rabadre ngwane, täräkwata meden tä blite kukwe ye ererebätä, yebätä nikwe ñäkädre. Aune JW Broadcasting^® yete ja mräkätre ruäre tä tödeke krubäte bämikani kwetre kukwe tare yekänti, ye ni raba mike ñärärä arato. Biti ni raba ja ngwen ño niaratre erere yebätä nikwe töbikadre.

20. ¿Kä tädre juto nibätä aune ni ñaka tädre ulire yekäre ni rabadre dre nuainne?

²⁰ Ni jökrä tö sribibätä krubäte Jehová kräke nita nuainne matare nengwane ye kräke. Kä bä nuäre käbämikata Jehovakwe yete ni rabai sribire kwin krubäte Jehová kräke. Ni raba dre nuainne ye erere nikwe nuaindre ye köböire kä täi juto nibätä aune ni ñaka täi ulire. Aune bäri ütiäte Jehová “Ngöbö kä juto bökänkä” ye nikwe mikai ütiäte aune käikitaikä (1 Tim. 1:11, TNM). Aisete ni raba dre nuainne Jehová kräke ye käi tädre juto nibätä.