MWAZI G’OKUYIGA 33
Ogwarhe Omwishingo omu by’Oli Wakolera Yehova
“Kwakaba kwinja omuntu asiimire eby’ali abona n’amesho mage ahali h’okukulikira enyifinjo zage.”—MUH. 6:9.
OLWIMPO 111 Sababu za Kuwa na Shangwe
OKU BUGEKE *
1. Nka gurhe banene bali balonza kukola binene omu kasi ka Yehova?
OKU LINOLA gulu libi lili lyayegera obuzinda, rhugwerhe kasi kanene k’okukola. (Mt. 24:14; Lu. 10:2; 1 Pe. 5:2) Rhweshi rhulonzeze kukolera Yehova bwenene nk’oku rhwakanagala. Banene bali bakola binene omu kasi ka Yehova. Baguma bali balonza babe bapainiya. Abandi bakasima bakole oku Beteli changwa omu kasi ke chiteokrasi k’okuyumbaka. Na bene-berhu banene bali bajira okwabo koshi bagalire yi bahikira oku muhigo g’okukola nka bagwasi b’akasi changwa bashamuka omu chibaga. (1 Ti. 3:1, 8) Yehova anayunva asimire bwenene ey’abona abantu bage bachihaana oku bulonza omu kumukolera!—Zb. 110:3; Isa. 6:8.
2. Nka gurhe rhwakachiyunva nka hali emihigo rhurhahikireko omu kasi ka Yehova?
2 Aliko rhwakachiyunva rhuchikire enungwe akaba rhurhahikire oku mihigo yerhu omu kasi ka Yehova enyuma wa siku zinene. Changwa hali oku rhwakavunika omurhima bulala emyaka changwa ehali zerhu zirharhuyemerere oku rhukole ngabane zilebe omu kasi ka Yehova. (Mez. 13:12) Ebyola bye byahikiraga mwali-werhu Melissa. * Alisimire akolere oku Beteli changwa aje oku Masomo m’Abayeneza Eyinjili y’Obwami, aliko aderhere ntya: “Emyaka yani erhanyemereraga. Mango maguma nanyunva nvunikire omurhima.”
3. Bichi baguma bakwanene kujira yibahabwa engabane omu kasi ka Yehova?
3 Baguma bachili misole banagwerhe amagala makwirire bakakenera bakuze ngeso zilebe zinja embere bahabwe engabane. Omufano, baguma bakaba bagwerhe obwenge, bayinji kuchishoga juba-juba ebi bakola, banayanguhire kukola. Aliko bakaba bakenere kuyiga binene oku bilolere oku lindira, okukola akasi kabo oku bwirhonzi, n’okugwarha bukenge bunene oku bandi. Nka wamachihangana kukuza engeso zinja okenere, bene-benyu bakakuha engabane, amango orhaliwazize. Waza oku byahikiraga Nick. Amango aligwerhe myaka 20, aliyunvire avunikire omurhima bwenene bulala arhashimikwaga kuba mugwasi w’akasi. Aderhere ntya: “Naliri nayunva nka hali echintu chirhaliri chagenda bwinja ku nyono.” Aliko Nick arhalekaga kukuza engeso zinja alikenere. Aliri akola okwage koshi agalire omu chibaga n’omu kasi k’okuhubiri. Zene akal’ali akola omu Komite y’Omurhabi.
4. Bichi rhwashambala mu gunola mwazi?
4 Ka wavunikire omurhima bulala orhazahikira mihigo milebe omu kasi ka Yehova? Akaba ntyo kubili, obwire Yehova okuntu oli wachiyunva. (Zb. 37:5-7) Kandi, oheme bene-benyu bakulire ekiroho amahano makakurhabala ojire amaja-mbere omu kasi ka Mungu, onachihangane bwenene okolese amola mahano. Okajira ntyo, wakahaabwa engabane changwa kuhikira ogola muhigo. Nk’okurhwabonaga oku bilolere Melissa, rhwashambalagako burhanzi, nkabaga engabane osimire orhakachizihikira zene. Nka gurhe wakagendereza omwishingo gwawe? Omu kushubiza kw’echola chibazo, mu gunola mwazi, rhwaganira 1) bichi byakakulerhera omwishingo, 2) nka gurhe wakayushula omwishingo gwawe, na 3) mihigo michi wakachihebera yakayushula omwishingo gwawe.
BICHI BYAKARHULERHERA OMWISHINGO
5. Yi rhugwarha omwishingo, bichi rhukwanene kuchisezako? (Muhubiri 6:9)
5 Nk’oku olwandiko lwa Muhubiri 6:9 luderhere, rhwakagwarha omwishingo nka rhwamagulonzeza ahantu hakwanene. (Osome.) Omuntu ochiseza oku ‘by’amesho mage mali mabona’ anatosheka n’eby’agwerhe, nk’akalamo alamire mu manola mango. Aliko omuntu okulikira enyifinjo zage, anagenderera kuchifija echintu arhakafa abwene. Bobuno, bichi ebyola birhuyigirize? Yi rhugwarha omwishingo, rhukwanene kuchiseza oku birhugwerhe n’oku mihigo rhwakagala kuhikira.
6. Mufano guhe rhwaganirako, na bichi gwarhuyigiriza?
6 Ka byakashobokana kweri rhutosheke n’ebirhugwerhe? Bantu banene banawaza oku birhakashobokana, bulala rhusima kugenderera kuyiga nka gurhe rhwakakola ebintu bihyahya. Aliko kweri byakahashikana. Kweri rhwakasimira ebintu rhugwerhe. Nka gurhe rhwakajira ntyo? Yi rhumenya, leka rhulole omufano gwa Yesu gw’etalanta guli omu Matayo 25:14-30. Rhwayiga oku bilolere okuntu rhwagwarha omwishingo na nka gurhe rhwakayongera omwishingo gwerhu omu birhuli rhwageramo zene.
OKUNTU WAKAYONGERA OMWISHINGO GWAWE
7. Derha oku bugeke oku mufano gwa Yesu gw’etalanta.
7 M’ogola mufano, hali omulume waliri alonza abalame. Embere agende, ahamagala abaja bage n’okuha buli muguma mubo etalanta z’okujira m’obuchuruzi. * Oyola mulume alimenyere obuhashe bwa buli muguma omu baja bage, che charhumaga aha muja muguma talanta erhano, aha owindi talanta ebiri, n’omuja wakasharhu amuha talanta nguma. Abola baja babiri b’oburhanzi balikolere bwenene yi babona echibayunguka omu talanta waliha wabo abahaga. Aliko, omuja wakasharhu yewe, ntacho alikoleseze etalanta yage, n’echola charhuma waliha wage amufukuza omu kasi.
8. Omu mufano gwa Yesu, bichi byakarhumire omuja murhanzi agwarha omwishingo?
8 Omuja w’oburhanzi agwarha omwishingo bulala waliha wage alimuhere talanta erhano. Ezola zaliri furanga zinene bwenene, n’echola chaliyerekene kangana gurhe waliha wage alimunihire! Aliko si, gurhe oku bilolere omuja wa kabiri? Akayunvire avunike omurhima bulala arhahaabwaga talanta zinene zingana n’ez’omuja murhanzi. Aliko si gurhe alijirire?
Bichi rhwakayiga kugerera omufano g’omuja wakabiri oshamberwe omu mufano gwa Yesu? (1) Waliha wage amuhaga talanta ebiri. (2) Alikolere bwenene y’efuranga za waliha wage ziyunguka. (3) Alikubire kabiri etalanta za waliha wage (Olole echifungo cha 9-11)
9. Bichi Yesu arhaderhaga oku bilolere omuja wakabiri? (Matayo 25:22, 23)
9 Osome Matayo 25:22, 23. Yesu arhaderhaga oku omuja wakabiri alivunikire omurhima changwa agaye bulala alihaabirwe talanta ebiri zonyine. Kandi Yesu arhaderhaga oku oyola muja agendaga eyi ali alunduma n’okuderha ntya: ‘Bulagurhe waliha wani ampere bigeke? Bulagurhe, oku nani nakagala kukola kuguma n’eyahaga talanta erhano! Akaba waliha wani aliwazize oku ntali mukozi mwinja, nkabaga nakahambire ezila furanga zage nje kuchikolera nyenine.’
10. Gurhe omuja wakabiri alikoleseze etalanta bamuhaga?
10 Kuguma n’omuja murhanzi, omuja wakabiri alibwene oku akasi waliha wage amuhere kali k’akamaro bwenene n’echola charhuma ezola talanta zayunguka mu zindi ebiri, zab’ene. Waliha ahemba omuja wage oku kasi kakomere alijirire. Waliha arhamubwiraga koko konyine, s’aliko ashuba kunamuyongerera binene by’okukola!
11. Nka gurhe wakayongera omwishingo gwawe?
11 Konagukuma, rhwakagwarha mwishingo gunene amango rhwamakola okwerhu koshi rhugalire omu kasi koshi-koshi rhwahabirwe omu kasi ka Yehova. ‘Ochiseze bwenene’ omu kasi k’okuhubiri onakole binene oku makasi m’omu chibaga. (Mdo. 18:5; Ebr. 10:24, 25) Orheganye bwinja embuganano, onahane ebishubizo binja byakaheba abandi omurhima. Obone buli ngabane wahabirwe oku mbuganano y’ahagarhi k’eboso oku eli y’akamaro. Akaba bakubwirire oku orhabale oku kasi kalebe omu chibaga, omenye wacherehwa, onabe muntu wakunihirwa. Orhawazaga oku akasi bakuhere okole omu chibaga karhali k’akamaro n’oku orhakaheza ebisanzi byawe omu kukakola. Ochihangane y’oyongera obufundi omu kasi kawe. (Mez. 22:29) Nk’okolere bwenene omu kasi ka Yehova, waba mwira wage mwinja wagwarha na mwishingo gunene. (Gal. 6:4) Washuba kubona oku bikuyorohere okuchishinga haguma n’abandi amango bamagwarha engabane nawe wakasimire ogwarhe.—Ro. 12:15; Gal. 5:26.
12. Bichi byarhabalaga Melissa na Nick bagwarhe mwishingo gunene?
12 K’ochiyibukire mwali-werhu Melissa, rhwashambalagako omu chifungo chakabiri waligwerhe enyorha y’okukola oku Beteli changwa y’okuja oku Masomo m’Abayeneza Eyinjili y’Obwami? Chiro akaba oku birhalimushobokere ahikire eyola mihigo, aderhere ntya: “Nalichisezeze omu kasi kani k’obupainiya n’okukolesa ezindi-zindi njira zoshi z’ okuhubiri. Ebyola byanderhere mwishingo gunene.” Na nka gurhe Nick naye ahimaga echibazo ch’okuvunika omurhima amango barhamushimikaga nka mugwasi w’akasi? Aderhere ntya: “Nachiseza oku lukengo ngwerhe, k’okuderha, okuhubiri n’okuhaana ebishubizo bihebere omurhima oku mbuganano. Narhuma efomu y’ okukola oku Beteli n’omwaka gwakulikiragaho bava bampamagala.”
13. Migisho mihe wagwarha amango wamakola engabane ogwerhe zene n’omurhima goshi? (Muhubiri 2:24)
13 Wagwarha ezindi ngabane omu siku zayinjire si? Byakagalikana nk’oku byahikiraga Nick naye. Akaba birhabere ntyo, kuguma na Melissa, omwishingo gwawe gwakachigenderera kuyushuka n’obusime bwawe bwagenderera kuluga omu by’oli wakolera Yehova. (Osome Muhubiri 2:24.) Kandi, nta ngangane wagwarha mwishingo gunene, omu kumenya oku waliha wawe Yesu Kristu ali asimiswa n’obushiru bwawe.
EMIHIGO ENAYUSHULA OMWISHINGO GWERHU
14. Bichi rhukwanene kuyibuka oku bilolere emihigo yerhu y’ekiroho?
14 Okuchiseza oku ngabane rhugwerhe zene kuli kuderha oku rhurhachikwanene kuchihangana kukola binene omu kasi ka Yehova si? Haba n’akatyu! Rhukwanene rhugenderere kuchihebera emihigo yakarhurhabala rhujire amaja-mbere omu kasi k’okuhubiri n’okuyigiriza yakanarhuma rhwaha bene-berhu na bali-berhu oburhabale. Rhwakahikira eyola mihigo, amango rhwamaseza obwenge bwerhu oku bwengehe n’olugero omu kurhabala abandi ahali h’enyungu zerhu rhwenyine.—Mez. 11:2; Mdo. 20:35.
15. Mihigo mihe yakakurhabala oyushule omwishingo gwawe?
15 Mihigo ehe wakachihebera wenyine? Obwire Yehova akurhabale ogale kurhegera mihigo ehe wakagala kuhikira. (Mez. 16:3; Yak. 1:5) Wakachihangana ohikire muhigo muguma omu mihigo eshamberwe omu chifungo ch’oburhanzi cha gunola mwazi, nk’okuba painiya mugwasi, changwa painiya w’okukahunda, kukola oku Beteli changwa kukola oku kasi k’okuyumbaka. Changwa wakayiga olulimi luhyahya y’ohubiri emyazi minja changwa wakaja kuhubiri omu eneo abenjiira balamiremo. Wakamenya binene oku bilolere emihigo eli nk’eyola, omu kusoma esura ye 10 y’echitabu Tengenezo Lenye Kufanya Mapenzi ya Yehova n’omukushambala n’abashamuka b’echibaga chawe. * Oku oli wachihangana kuhikira emihigo eli nk’eyola, amaja-mbere mawe mabonekana n’omwishingo gwawe gwayushuka.
16. Bichi wakajira akaba birhakashobokana zene ohikire muhigo gulebe?
16 Gurhe akaba zene orhakagala kuhikira muguma mw’eyola mihigo rhwaganirireko? Ech’akamaro kuli kuchihebera ogwindi muhigo gulala wakagala kuhikira. Rhuganirage kw’eyila ekulikire
Mihigo ehe miguma wakahikira? (Olole echifungo che 17) *
17. Nk’oku olwandiko lwa 1 Timoteo 4:13, 15 luderhere, bichi mwene-werhu akwanene ajire y’aba mwigiriza mwinja?
17 Osome 1 Timoteo 4:13, 15. Akaba oli mwene-werhu obatizwe, wakachihangana okomeze obufundi bwawe b’okuderha n’okuyigiriza. Bulagurhe? Bulala, amango “wamachiseza bwenene” omu kusoma, kuderha, n’okuyigiriza, warhabala bwenene abali bakuyunviriza. Ochihebere omuhigo g’okuyiga buli somo omu kabatu Fanya Bidii Katika Kusoma na Kufundisha. Oyige somo liguma-liguma onachihangane kulikolesa ahambuga n’okuchihangana kulikolesa amango oli wageza ejambo. Oheme ezindi mpanulo oku muhanuzi mugwasi changwa oku bandi bashamuka “bali bakola bwenene omu kuderha n’omu kuyigiriza.” * (1 Ti. 5:17) Orhachisezaga konyine omu kuntu wageza ejambo lyawe, s’aliko onarhabale abonviriza bawe bakomeze obwemere bwabo changwa obahebe omurhima bajire echibakola. Omu kujira ntyo, wayushula omwishingo gwawe n’ogwa abonviriza bawe.
Mihigo ehe miguma wakahikira? (Olole echifungo che 18) *
18. Bichi byakarhurhabala rhuhikire emihigo yerhu omu kasi kerhu k’okuhubiri?
18 Rhweshi rhwahabirwe akasi k’okuhubiri n’okujira abanafunzi. (Mt. 28:19, 20; Ro. 10:14) Ka wakasima okomeze obufundi bwawe mw’akola kasi k’akamaro? Oyige akatabu Kufundisha onachihebere emihigo yakakurhabala okolese eby’oli wayiga. Wakashuba kubona ezindi mpanulo zakakurhabala omu Kaye Utumishi na Maisha ya Mukristo n’omu video z’okuhwanzisa enganiro zinayerekanwa oku mbuganano y’ahagarhi k’eboso. Ochihangane kukolesa amawazo marhali kuguma oje walola lihe lyakola bwinja. Amango wamakolesa ezola mpanulo, waba muhubiri changwa mwigiriza mwinja n’echola chakulerhera mwishingo gunene.—2 Ti. 4:5.
Mihigo ehe miguma wakahikira? (Olole echifungo che 19) *
19. Bichi wakajira y’okuza engeso zisimisize Mungu?
19 Amango oli wagerereza emihigo wakachihebera, omenye wasuzagura omuhigo gw’akamaro bwenene, k’okuderha, kuyerekana engeso zisimisize Mungu. (Gal. 5:22, 23; Kol. 3:12; 2 Pe. 1:5-8) Bichi wakajira y’ohikira ogola muhigo? Omufano, nkabaga olonzeze kukomeza obwemere bwawe. Wakasoma emyazi omu bitabu byerhu bili mw’empanulo zakakurhabala okomeze obwemere bwawe. Wakagwarha nyungu zinene, omu kulola evideo zili oku JW Telediffusion ziyerekene okuntu bene-berhu na bali-berhu bayerekene obwemere bukomere eyi banali balwisa ebigeregezo bya buli lubero. Buzinda wanaja walola okuntu wakayiganya obwemere bwabo omu kalamo kawe.
20. Bichi rhwakajira yi rhuyushula omwishingo gwerhu n’okugehya ebyakarhuma rhwavunika omurhima?
20 Nta nganane, rhweshi rhusimire rhukole binene omu kasi ka Yehova kulusha ebirhwakajira zene. Omu gulu lihyahya lya Mungu, yi nji rhwagala kumukolera n’obuhashe bwerhu boshi. Okw’amola mango manahikaho, nka rhwamajira okwerhu koshi omu kasi koshi-koshi rhuli rhwakola zene, rhwayushula omwishingo gwerhu n’okugehya ebintu byakarhuma rhwavunika omurhima. N’ech’akamaro bwenene, rhwalerhera olukengo n’obukuze Yehova “Mungu [werhu] w’omwishingo.” (1 Ti. 1:11) Che chirhumire, rhujage rhwagwarha omwishingo omu ngabane rhugwerhe!
OLWIMPO 82 “Acheni Nuru Yenu Iangaze”
^ mus. 5 Rhuzigire Yehova bwenene, rhunalonzeze rhukole okwerhu koshi rhwakagala omu kasi kage. Echola che chirhumire banene mu rhwewe balonzeze kukola binene omu kasi k’okuhubiri changwa kukola binene omu chibaga. Aliko si gurhe rhwakajira akaba enyuma y’okujira okwerhu koshi rhurhahikiire mihigo milebe? Bichi rhwakajira yi rhugenderera kukola binene omu kasi ka Yehova n’okugenderera kugwarha omwishingo? Rhwabona echishubizo omu mufano gwa Yesu gw’etalanta.
^ mus. 2 Mazino maguma mahindamwirwe.
^ mus. 7 AMAFASIRIYO M’EBINWA: Talanta eyinganire n’efuranga omuntu akapata eyi amakola myaka 20.
^ mus. 15 Bene-berhu babatizwe baheberwe omurhima bachihangane bayeneze ebihemerwe yi baba bagwasi b’akasi na bashamuka. Y’omenya ebihemerwe, olole esura ya 5 n’eya 6 y’echitabu Tengenezo Lenye Kufanya Mapenzi ya Yehova.
^ mus. 17 MAFASIRIYO M’EBINWA: Omuhanuzi mugwasi ali mushamuka ohabirwe akasi k’okuhanula ababo bashamuka n’abagwasi b’akasi oku bilolere buli ngabane y’okuyigiriza bahabirwe kukola omu chibaga.
^ mus. 64 AMAFASIRIYO M’EFOTO: Y’ahikira omuhigo gwage g’okuba mwalimu mwinja, mwene-werhu ali alonza emyazi omu bitabu byerhu.
^ mus. 66 AMAFASIRIYO M’EFOTO: Enyuma y’okuchihebera omuhigo g’okuhubiri amango moshi-moshi, mwali-werhu muguma ali ahereza akarte ka jw.org omukazi oli amuha ebilyo.
^ mus. 68 AMAFASIRIYO M’EFOTO: Mwali-werhu ogwerhe omuhigo g’okuba muntu onahaana bwenene, amalerhera owindi mwali-werhu oluhembo buzira kumulaganya.
