1. Iehova hesiai henia totona momo be dahaka idia karaia?

 INAI nega ena dokona ai, iseda gaukara be momo herea. (Mat. 24:14; Luka 10:2; 1 Pet. 5:2) Ita ibounai ita ura Iehova ena hesiai gaukara idauidau ita karaia. Unai dainai, momo be edia hesiai gaukara idia habadaia. Hegeregere, haida be painia gaukara idia karaia, haida be Betele ai idia gaukara eiava haida be konstraksen gaukaradia idia karaia. Bona tadikaka momo be idia gaukara goada hesiai eiava elda maduna idia abia totona. (1 Tim. 3:1, 8) Iehova ia moale bada badina ia itaia ena taunimanima idia ura Ia idia hesiai henia!​—Sal. 110:3; Isa. 6:8.

2. Iseda tahua gaudia ita hagugurua lasi neganai, iseda hemami be edena bamona?

² Nega daudau lalonai Iehova hesiai henia totona ita atoa tahua gaudia ita hagugurua lasi neganai, ita lalomanoka diba. Eiava ita buruka o badina ma haida dainai Iehova ena orea lalonai gaukara ma haida ita karaia diba lasi neganai, ita lalomanoka diba. (Aon. 13:12) Melisa * dekenai unai ia vara danu. Ia ura bada Betele eiava Basileia Evanelia Sikuli dekenai ia lao, to ia gwau: “Egu mauri lagani ia hanaia vadaeni dainai, unai hesiai gaukara lau karaia diba lasi. Bona nega haida lau lalomanoka.”

3. Haida be maduna ma haida huaia totona dahaka idia karaia be namo?

³ Haida be matamata bona goada, to maduna ma haida idia huaia totona, namona be lo taudia ai idia lao bona Keristani  kara namodia idia hahedinaraia. Hegeregere, haida edia diba be bada, disisen idia karaia haraga, bona idia ura gaukara idia karaia. To namona be inai gaudia idia dibaia, haheauka, gaukara karaia namonamo, bona ma haida matauraia karana. Bema oi gaukara goada Keristani kara namodia oi hahedinaraia totona, tadikaka ese oi dekenai gaukara do idia henia. Mani Nick ena ekspiriens oi laloa. Ena mauri lagani be 20 neganai, hesiai tauna ena maduna idia henia lasi dainai ia lalohisihisi bada. Ia gwau, “Toana be lau dekenai gau ta ia maoro lasi.” To Nick ia hesiku lasi kara namodia ia hahedinaraia noho totona. Ia be kongrigeisen lalonai bona haroro gaukara ai ia gaukara goada. Hari, ia be Brens Komiti ena memba ta.

4. Inai atikol ai dahaka do ita herevalaia?

⁴ Emu tahua gauna ta oi do hagugurua lasi dainai oi lalomanoka, a? Bema oibe, Iehova dekenai unai oi gurigurilaia. (Sal. 37:5-7) Bona danu, Dirava hesiai henia dalana oi hanamoa totona lo tadikakadia amo heduru oi tahua, bona oi gaukara goada idia henia sisiba oi badinaia totona. Bema unai bamona oi karaia, do oi hegeregere emu tahua gauna oi hagugurua totona. To matamanai ita herevalaia taihu, Melisa, hegeregerena, reana hari oi ura henia hesiai gaukarana oi karaia diba lasi. To, edena dala ai do oi moale noho? Unai henanadai haerelaia totona, inai atikol ai gau toi do ita herevalaia: (1) Moale do oi davaria dalana, (2) emu moale do oi habadaia dalana, bona (3) emu moale habadaia totona, dahaka tahua gaudia do oi atoa.

5. Ita moale totona, dahaka ita karaia be namo? (Hadibaia Tauna 6:9)

⁵ Hadibaia Tauna 6:9 duahia. Unai siri ese moale ita davaria dalana ia herevalaia. “Matana ese ia itaia gaudia” ia moalelaia tauna ese hari ia karaia diba gaudia ia laloa bada. To, ia ‘abia diba lasi gaudia ia tahua goadagoada’ tauna be do ia moale lasi. Unai amo dahaka ita dibaia? Ita moale totona, namona be ita karaia diba gaudia ita karaia noho, to ita karaia diba lasi gaudia do ita tahua lasi.

6. Edena parabole do ita herevalaia, bona unai amo dahaka do ita dibaia?

⁶ Hari ita karaia noho gaukara dekenai ita moale diba, a? Oibe, ita moale diba. Momo idia laloa do ita moale lasi, badina ita ura gau matamatadia do ita dibaia noho. To, hari ita karaia noho gaukara ita moalelaia diba. Edena dala ai? Unai ita diba totona, Iesu ena parabole Mataio 25:14-30 dekenai do ita herevalaia. Unai talent parabolena amo moale do ita davaria dalana, bona hari ita karaia gaukara dekenai ita moale noho dalana do ita dibaia.

7. Iesu ena talent parabolena mani oi herevalaia.

⁷ Parabole lalonai, tau ta be gabu ta dekenai ia lao. Ia do lao lasi neganai, ena hesiai taudia ia boiria bona idia ta ta dekenai talent ia henidia, bisinesi idia karaia totona. * Unai biaguna ia diba ena hesiai taudia edia diba bona goada be idauidau, unai dainai hesiai tauna ginigunana dekenai talent 5 ia henia, iharuana dekenai talent rua ia henia, bona ihatoina dekenai talent tamona ia henia. Hesiai taudia ginigunadia rua idia gaukara goada, edia biaguna ese ia henia moni idia habadaia totona. To, hesiai tauna ihatoina be moni habadaia totona  gau ta ia karaia lasi dainai, biaguna ese gaukara amo ia kokia.

8. Dahaka dainai hesiai tauna ginigunana ia moale be namo?

⁸ Reana hesiai tauna ginigunana be ia moale bada, badina ena biaguna ese talent 5 ia henia. Unai be moni bada herea, unai ese ia hahedinaraia ena biaguna ia diba unai moni do ia gaukaralaia namonamo! To hesiai tauna iharuana be edena bamona? Reana ia moale lasi badina ena biaguna ese moni momo ia henia lasi. To dahaka ia karaia?

9. Hesiai tauna iharuana be ia maumau, a? (Mataio 25:22, 23)

⁹ Mataio 25:22, 23 duahia. Iesu ia gwau lasi hesiai tauna iharuana be ia lalohisihisi bona ia badu, badina ia ese talent rua sibona ia abia. Bona Iesu ia gwau lasi unai hesiai tauna be ia maumau bona ia gwau: ‘Dahaka dainai egu biaguna ese lau dekenai talent momo ia henia lasi? Lau danu be talent 5 ia abia hesiai tauna hegeregerena lau gaukara goada! Bema egu biaguna ia laloa lau be gaukara goada tauna lasi, vadaeni ena moni do lau guria bona sibona egu bisinesi do lau karaia.’

10. Hesiai tauna iharuana be ena talent rua dekenai dahaka ia karaia?

¹⁰ Hesiai tauna ginigunana hegeregerena, hesiai tauna iharuana ia laloparara biaguna ese ia henia maduna be mai anina bada bona ia gaukara goadagoada. Unai amo, biaguna ese ia henia talent rua amo talent ma rua ia abia. Hesiai tauna ena gaukara goada karana dainai biaguna ese ia hanamoa. Oibe, biaguna be ia dekenai ia moale bada bona gaukara ma haida ia henia!

11. Edena dala ai iseda moale do ita habadaia?

 ¹¹ Unai hegeregerena, mai goada ida Iehova ena hesiai gaukara ita karaia neganai, iseda moale do ita habadaia. Namona be haroro gaukara ai ‘nega bada ita gaukaralaia,’ bona ita hekwarahi kongrigeisen ena gaukara idauidau ita durua. (Kara 18:5; Heb. 10:24, 25) Kongrigeisen heboudia totona ita hegaegae namonamo, unai amo haere namodia ita henia diba. Wiki ena hebou totona ita abia asainmen ita laloa bada. Bema kongrigeisen ai gaukara ta idia henia, namona be nega korikori ai unai oi karaia bona oi karaia namonamo. Namo lasi oi laloa idia henia gaukara be anina bada lasi bona nega bada do oi henia lasi unai oi karaia totona. To oi hekwarahi emu gaukara oi karaia namonamo totona. (Aon. 22:29) Bema Iehova totona oi gaukara goada, ena turana namona ai do oi lao bona do oi moale. (Gal. 6:4) Bona oi ura gaukarana be ma haida ese idia abia neganai, idia totona do oi moale.​—Roma 12:15; Gal. 5:26.

12. Dahaka ese Melisa bona Nick ia durua edia moale idia habadaia totona?

¹² Paragraf 2 ai ita herevalaia taihu Melisa be ia ura Betele dekenai do ia gaukara eiava Basileia Evanelia Sikuli dekenai do ia lao. Ena be unai tahua gaudia ia hagugurua diba lasi, to ia gwau: “Painia gaukara lau karaia noho bona lau gaukara goada haroro dala idauidau lau tohoa totona. Unai ese egu moale ia habadaia.” Nick be hesiai tauna ena maduna idia henia lasi neganai, edena dala ai ena lalohisihisi ia hanaia? Ia gwau: “Lau karaia noho gaudia dekenai lau gaukara goada, hegeregere haroro gaukara bona hebou dekenai haere namodia lau henia. Danu Betele gaukara totona aplikeisen lau atoa bona lagani ta murinai lau idia abia dae.”

13. Bema hari oi karaia noho gaukarana oi moalelaia, dahaka do ia vara? (Hadibaia Tauna 2:24)

¹³ Bema hari oi karaia asainmen oi moalelaia noho, gabeai oi dekenai gaukara ma haida do idia henia, a? Unai ia vara diba, Nick dekenai ia vara hegeregerena. To, bema lasi, Melisa hegeregerena, Iehova totona oi karaia gaukara dekenai do oi moale noho. (Hadibaia Tauna 2:24 duahia.) Danu, do oi moale bada badina oi diba iseda Biaguna, Iesu Keriso, oi hamoalea.

14. Iseda hesiai gaukara lalonai, dahaka ita laloatao be namo?

¹⁴ Hari ita karaia hesiai gaukarana dainai, ita laloa hesiai gaukara ma haida do ita karaia lasi, a? Lasi! Namona be tahua gaudia ita atoa, haroro bona hadibaia gaukarana ita hanamoa totona, bona iseda tadikaka taihu ita durudia. Unai tahua gaudia ita hagugurua diba, bema mai aonega bona manau ida ma haida edia namo ita laloa guna.​—Aon. 11:2; Kara 20:35.

15. Dahaka tahua gaudia haida ese emu moale ia habadaia diba?

¹⁵ Dahaka tahua gaudia oi atoa diba? Iehova oi noia oi do ia durua oi hagugurua diba tahua gaudia oi diba totona. (Aon. 16:3; Iam. 1:5)  Paragraf ginigunana ai tahua gaudia haida ita herevalaia, hegeregere, heduru painia, regula painia, Betele gaukara, eiava konstraksen gaukara. Unai tahua gauna ta oi hagugurua diba, a? Eiava gado ma ta oi dibaia o oi lao gabu ma ta dekenai oi haroro. Unai tahua gaudia dekenai diba ma haida oi abia totona, Organized to Do Jehovah’s Will bukana ena  karoa 10 oi duahia bona emu kongrigeisen ai elda taudia oi hereva henia. * Oi hekwarahi unai tahua gaudia oi hagugurua neganai, ma haida do idia itaia oi goada oi lao bona do oi moale bada.

16. Bema oi atoa tahua gauna ta oi hagugurua lasi, dahaka do oi karaia?

¹⁶ Bema oi hegeregere lasi inai atikol ai ita herevalaia tahua gaudia oi hagugurua totona, dahaka do oi karaia? Namona be oi hagugurua diba tahua gauna ta oi atoa. Mani dala haida ita herevalaia.

17. Timoteo Ginigunana 4:13, 15 hegeregerena, edena dala ai tadikaka ta do ia gaukara goada hadibaia tauna namona ai ia lao totona?

¹⁷ Timoteo Ginigunana 4:13, 15 duahia. Bema oi be bapatiso tadikaka, namona be oi gaukara goada tok henia dalana bona emu hadibaia karana oi hanamoa. Dahaka dainai? Badina unai bamona oi karaia neganai, kamonai taudia do oi durua. Namona be nega oi atoa Duahiduahi Bona Hadibaia Karana Oi Hanamoa buklet oi stadilaia, bona oi dibaia gaudia oi badinaia. Namona be unai point ta ta oi stadilaia, ruma dekenai oi praktis loulou, bona emu tok lalonai oi gaukaralaia. Danu, elda bona hesiai taudia ia sisiba henia tadikakana eiava idia ‘gaukara goada elda taudia amo heduru oi tahua diba. (1 Tim. 5:17) Buklet ai oi dibaia gaudia do oi badinaia dalana sibona oi laloa lasi, to emu kamonai taudia edia abidadama do ia hagoadaia eiava edia lalona do oi veria kara ta idia karaia dalana oi laloa danu. Unai bamona oi karaia neganai, oi bona kamonai taudia do umui moale.

18. Haroro bona hahediba gaukara oi hanamoa totona, dahaka oi karaia be namo?

¹⁸ Ita ibounai eda gaukara badana be, haroro  bona hahediba taudia halaoa gaukarana. (Mat. 28:19, 20; Roma 10:14) Unai mai anina bada gaukarana oi karaia totona, oi ura emu diba oi habadaia, a? Namona be Hadibaia buklet oi stadilaia bona tahua gaudia oi atoa, unai ese oi do ia durua oi dibaia gaudia oi badinaia totona. Bona Iseda Haroro Bona Mauri Dalana​—Hebou Pepana bona haroro herevadia ena vidio idauidau amo heduru namodia do oi abia diba. Namona be dala idauidau oi tohoa. Bema unai bamona oi karaia neganai, emu haroro gaukara do oi hanamoa bona hadibaia tauna namona ai do oi lao bona do oi moale bada.​—2 Tim. 4:5.

19. Edena dala ai Dirava hamoalea karadia oi hahedinaraia?

¹⁹ Namona be oi laloatao, oi atoa mai anina bada tahua gauna ta be, Dirava ia hamoalea kara namodia oi hahedinaraia. (Gal. 5:22, 23; Kol. 3:12; 2 Pet. 1:5-8) Dahaka oi karaia diba unai tahua gauna oi hagugurua totona? Hegeregere, reana oi ura emu abidadama oi hagoadaia. Namona be iseda pablikeisen idauidau ai emu abidadama do ia hagoadaia atikol oi duahia. Danu JW Broadcasting^® ai, iseda tadikaka taihu idia davaria hekwakwanai idauidau dainai idia hahedinaraia abidadama karana oi itaia diba. Bena emu mauri ai edia abidadama tohotohoa daladia oi laloa.

20. Dahaka do ita karaia iseda moale ita habadaia bona ita lalohisihisi lasi totona?

²⁰ Momokani, ita ibounai ita ura Iehova hesiai henia karana ita habadaia. Tanobada matamatana ai, do ita hegeregere Dirava ita hesiai henia hanaihanai totona. To, hari ita gaukara goada ita karaia diba hesiai gaukaradia ita karaia totona, unai amo eda moale do ita habadaia bona do ita lalohisihisi lasi. Bona mai anina bada gauna be, iseda “moale Diravana,” Iehova, dekenai hanamoa bona hairai do ita henia. (1 Tim. 1:11) Unai dainai, namona be ita karaia noho hesiai gaukaradia ita moalelaia!