1. Was sin fiile am mache fer mee tsu Yeehoowa xafe?

 KLAYCH, khomt tas ën fon tiise sisteem; pis tan, hon mer aarich fiil aarwayt fer se mache. (Mat. 24:14; Luk. 10:2; 1 Phe. 5:2) Meyer al wole Yeehoowa tiine in te pest aat wii mer khene. Fer tas, fiile tuun mee in te preetich aarwayt mache. Anere wole wii pyoneere tiine. Noch anere wole in Petël tiine orer in te paueray projëkte fon te Orkanisatsyoon helfe. Un fiile priiter hon tas tsiil fer ministeryaale tiiner orer elteste sin; un tii xtrenge sich fiil too traan aan. (1 Tim. 3:1, 8) Yeehoowa wërt wool wërklich froo sin wën eyer siit soo fiil layt sich aan xtrenge fer tëm tiine! (Psal. 110:3; Isa. 6:8)

2. Wii khene mer uns fine wën mer khene net een tsiil in Yeehoowa sayn aarwayt trefe?

² Awer wën ti tsayt rom keet un mer hon net ketrof tas tsiil woo mer hate, khente mer fiilaycht uns tiifsinich xpiire. Orer kepe mer oone muut wayl mer khene net etliche tinge in Yeehoowa sayn Orkanisatsyoon mache wayl mer tsu alt sin orer weeche een aner uersach. (Xpr. 13:12) Tas is ti situatsyoon fon Melissa. * Tii teet kërn in Petël tiine orer ti Xuul fer Preeticher fom Raych mache, awer tii saat: “Ich sin tsu alt fer tiise priwilëje kriin. Yets, sin se fer mich ploos een traam. Tes weeche, xpiire ich mich als mool oone muut.”

3. Was fer xrite mise etliche kepe fer mee flichte kriin?

³ Etliche woo yung un kesunt sin, manich mool mise phaar kwaliteete ëntwikele tas se khene mee flichte kriin. Tsum payxpiil: etliche sin xlau, pextimt, un wilich fer se xafe. Awer im xtant, mise se lërne ketulticher wëre, mee respekt fer ti anere  tsayche, un sayn aarwayt mit mee ketult mache. Wëns tuu tich traan halst aan te kwaliteete woos tuu prauchst, fiilaycht kriist tuu een flicht wëns tuu net waarte tuust. Kuk mool was mit Nick pasiirt is. Wii eyer 20 yoore alt waar, is eyer aarich traurich kep wayl eyer net wii ministeryaale tiiner in kesetst kep is. Tee saat: “Ich hon ketenkt tas etwas ferkheertes mit mich waar.” Awer Nick hot net uf kep. Tee hot sayn pestes in te kemaynt un in te preetich aarwayt kemacht. Hayt, tiint eyer wii mitkliit fon een Filyaal Komisyoon.

4. Was tuun mer in tiise artikel lërne?

⁴ Pist tuu oone muut wayls tuu noch net ketrof host een tsiil woos tuu in Yeehoowa sayn Orkanisatsyoon host? Tan, xprech mit Yeehoowa iwer tayn xpiirunge. (Psal. 37:5-7) Tuu khanst aach mit priiter woo fiil speryens hon fertseele. Tii khene tich etliche itee kepe iwer wiis tuu khanst tayn aarwayt fer Yeehoowa ferpesere. Wëns tuu tich aan xtrengst fer tëne sayn aanreete aan wëne, fiilaycht trefst tuu tas tsiil woos tuu kextelt host orer kriist tuu tas priwilëj woos tuu waarte tuust. Awer im xtant, soo wii Melissa, iwer weem mer foner traan kexproch hon, is es unmeechlich fer tich mache was tuu kërn teest in Yeehoowa sayn aarwayt. Un tan? Wii khanst tuu tayn frooheet hale? Fer tas antworte, tuut tiise artikel xpreche iwer (1) was khan tich frooheet kepe, (2) wii tayn frooheet ferkreese, un (3) was fer sorte tsiile khanst tuu xtele fer noch frooer wëre.

5. Fer froo sin, aan was sole mer uns traan hale? (Eklesyastes 6:9)

⁵ Eklesyastes 6:9 * leet uns aus was mer mache khene fer frooheet hon. (Lees.) Een persoon woo sich traan halt aan was sayn “aue siin” is tsufriite mit was se hot, mit sayn situatsyoon. Im keeche teel, een persoon woo imer winxt was se khan net hon, tuut nii tsufriite sin. Tan, was is ti lisyoon fer uns? Fer frooheet kriin, mise mer uns traan hale aan was mer hon un tsiile xtele woo mer trefe khene.

6. Was fer kexicht tuun mer yets noo kuke, un was tuun mer too tefun lërne?

⁶ Is es wërklich meechlich tsufriite sin mit was mer yets xon hon? Fiile layt mëne tas net, wayl mer tuun kërn imer was nayes lërne. Awer in woerheet, es is meechlich wërklich tsufriite sin mit te tinge woo mer xon hon. Wii kriin mer tas hin? Fer ti antwort fine, wole mer Yeesus sayn kexicht fon te talente noo kuke, woo in Matheus 25:14-30 xteet. Meyer tuun lërne wii frooheet kriin un wii mer khene noch frooer mit unser situatsyoon sin.

7. Tuu in khortse wërter fertseele Yeesus sayn kexicht iwer ti talente.

⁷ In tëm kexicht, teet eene man een rees mache. Awer, eep eyer fat kang is, hot eyer sayn sklaawe kesamelt un hot fer yeete eene fon tëne talente kep tas tii khente kexefte mit tëne mache. * Te man wust tas ti sklaawe unerxiitliche apiliteete hate. Tes weeche hot eyer 5 talente fer te eyerste sklaaw kep, 2 fer te tsweete, un 1 fer te trite. Ti tswaay eyerste sklaawe hon xtram kexaft fer mee kelt fer sayn hër kriin. Awer te trit sklaaw hot niks mit sayn kelt kemacht; tes weeche, hot te hër tëm nochter fat kexikt.

8. Warom khont te eyerste sklaaw fon tëm kexicht froo sin?

⁸ Kewis waar te eyerste sklaaw froo tas eyer 5 talente fon sayn hër kriit hat. Tas waar aarich  fiil kelt kewees un hot ketsaycht tas te hër fiil uf tëm ketraut hot. Awer, un te tsweete sklaaw? Tee khont oone muut kep sin wayl eyer net soo fiil talente wii te eyerste sklaaw kriit hot. Awer, was hot eyer kemacht?

9. Was hot Yeesus net kesaat iwer te tsweete sklaaw? (Matheus 25:22, 23)

⁹ Lees Matheus 25:22, 23. * Yeesus hot net kesaat tas te tsweete sklaaw pees kep is orer tas eyer sich keëricht hot wayl eyer ploos 2 talente kriit hot. Yeesus hot aach net kesaat tas te sklaaw sich pexweert hot, am saan: ‘Is tas ales was ich kriin?! Ich xafe soo xtram wii te aner sklaaw woo 5 talente kriit hot! Wën mayn hër tenkt tas ich khee kuute aarwayter sin, tan is es peser tas kelt too hiir in kraape un fer mich selepst xafe.’

10. Was hot te tsweete sklaaw mit sayn talente kemacht?

¹⁰ Soo wii te eyerste sklaaw, hot te tsweete sklaaw ferxtan tas ti flicht woo eyer kriit hat wichtich waar, un tee hot xtram kexaft fer sayn hër tiine. Weeche tas, hot eyer sayn 2 talente tsu 4 fermeert. Te hër is aarich froo kep un hot tiise sklaaw peloont weeche sayn xweyer aarwayt — tee hot tëm noch mee flichte kep!

11. Wii khene mer unser frooheet ferkreese?

¹¹ In te selwich aat, khan unser frooheet sich ferkreese wën mer xtram xafe in yeete aarwayt woo mer in Yeehoowa sayn tiinst kriin. Tuu tich ‘kans traan hale’ in te preetich aarwayt  un tuu flaysich in te kemaynt sin. (Aph. 18:5; Hep. 10:24, 25) Tuu tich foer perayte fer ti fersamlunge; soo, khanst tuu ufmuutiche komentaare kepe. Wëns tuu een teel in te mite woch fersamlung kriist, xtreng tich aan fer tas kuut mache. Wëns tich ferlangt wërt een aarwayt in te kemaynt mache, say phinktlich un een persoon woo ma traue khan. Tenk net tas een flicht woos tuu kriit host net soo important is un tas tuu prauchst khee tsayt traan tuun. Xtreng tich aach aan fer tayn apiliteete ferpesere. (Xpr. 22:29) Wëns tuu xtram fer Yeehoowa xafst, tuust tuu xneler foran keen un noch mee frooheet xpiire. (Kal. 6:4) Es wërt aach laychter fer tich froo wëre wën yemant anere een flicht kriit woos tuu kërn hëst. (Rom. 12:15; Kal. 5:26)

12. Was hot Melissa un Nick keholef mee frooheet xpiire?

¹² Erinerst tuu tich fon Melissa, ti xwester woo teet kërn in Petël tiine orer ti Xuul fer Preeticher fom Raych mache? Opwool es fer tii unmeechlich waar tiise tsiile trefe, tii saat: “Ich mache mayn pestes wii pyoneerin un fersuuche in al ti unerxiitliche aate preetiche. Tas kept mich fiil frayt!” Un wii is Nick mit sayn traurichkheet um kang wën eyer net wii ministeryaale tiiner in kesetst kep is? “Ich hon mich traan kehal aan ti priwilëje woo ich xon hat — saat eyer. — Tsum payxpiil: ich khont preetiche un ufmuutiche komentaare in te fersamlunge kepe. Ich hon mich aach aan kepoot fer in Petël xafe keen, un 1 yoer tëm noo, hon se mich in kelaat.”

13. Was tuut pasiire wëns tuu xtram xafst aan te aarwayt woos tuu yets host? (Eklesyastes 2:24)

¹³ Un wëns tuu xtram xafst aan te aarwayt woos tuu yets host, wil tas saan tas tuu in, te futuer, mee flichte kriist? Tas khan pasiire, soo wii mit Nick pasiirt is. Awer wën net, soo wii Melissa, khanst tuu noch frooer un tsufriiter sin mit was tuu fer Yeehoowa am mache pist. (Lees Eklesyastes 2:24.) * Un kewis, wërst tuu aach froo wayls tuu weest tas tayn aanxtrengung kefalt unser Hër, Yeesus Kristus.

14. Sole mer noo lose aate suuche fer mee tsu Yeehoowa mache? Lee tas aus.

¹⁴ Es is wichtich uns traan hale aan te aarwayt woo mer yets hon. Awer, wil tas saan tas mer sole net aate suuche fer mee tsu Yeehoowa mache? Kewis net! Meyer khene un sole tsiile xtele woo uns helfe peser preetiche, in lërne un unser priiter helfe. Meyer khene tiise tsiile trefe wën mer uns traan hale aan te anere tiine, xtats aan uns selepst. (Xpr. 11:2; Aph. 20:35)

15. Was fer sin etliche tsiile woo khene tich helfe tayn frooheet ferkreese?

¹⁵ Was fer tsiile khanst tuu fer tich selepst xtele? Ferlang Yeehoowa sayn hilef fer se wise was fer tsiile tuu trefe khanst. (Xpr. 16:3; Tya. 1:5) Im xtant, khene tas ti tsiile sin woo mer im  eyerste apsats fom artikel kexproch hon — een hilef orer rekulaar pyoneer sin, in Petël tiine, orer in te paueray projëkte xafe. Orer fiilaycht khanst tuu een aner xprooch lërne orer preetiche keen in een aner teritooryum. Tuu khanst mee iwer tiise tsiile lërne wëns tuu tas kapitel 10 fom puuch Organizados para fazer a vontade de Jeová leest un wëns tuu mit te elteste fon tayn kemaynt fertseelst. * Wëns tuu tich aan xtrengst fer tiise tsiile trefe, tuun ti anere siin tas tuu am foran keen pist un tayn frooheet tuut sich ferkreese.

16. Was khanst tuu mache wëns yets fer tich unmeechlich is een spetsiifix tsiil trefe?

 ¹⁶ In tiise artikel, hon mer xon iwer etliche tsiile kexproch. Awer un wëns fer tich unmeechlich is tiise tsiile trefe, was solst tuu mache? Fersuuch een tsiil xtele woos tuu trefe khanst. Kuk mool ti neekste itee.

17. Tëm noo 1^te Timoteus 4:13, 15, was khan een pruuter mache fer een peser leerer wëre?

¹⁷ Lees 1^te Timoteus 4:13, * 15. * Tsum payxpiil: wëns tuu een ketaafte pruuter pist, khanst tuu fersuuche peser reete hale un peser in lërne. Warom? Wayl wëns tuu tich aan xtrengst fer een peser reetner, leerer un leeser sin, tuust tuu noch mee helfe tii woo tich heere tuun. Tayn tsiil khan sin xtutiire un aan wëne yeete phunkt fon tëm piichelche Say een pësere leeser un leerer. Tuu een lisyoon noo te aner xtutiire, tehëm flaysich iipe un tan aan wëne was tuu kelërnt host wëns tuu reete halst. Tuu aach hilef ferlange fer te helfer woo aanreete kept * un fer anere elteste “woo xtram xafe im xpreche un in in lërne”. (1 Tim. 5:17) Hal tich net ploos traan aan te lisyoone fom piichelche aan wëne, awer aach aan helfe tii woo tich am horiche sin sayn klaape ferxtërke un aan wëne was se am heere sin. Wëns tuu es soo machst, tuust tuu tayn un tëne sayn frooheet ferkreese!

18. Was khan uns helfe tsiile in te preetich aarwayt trefe?

¹⁸ Meyer al hon ti flicht fer preetiche un tisipele mache. (Mat. 28:19, 20; Rom. 10:14) Teest tuu kërn mee apiliteet in tiise wichtich aarwayt  hon? Tan, xtutiir tas piichelche Leeser un leerer un xtel spetsiifixe tsiile woo tich helfe aan wëne was tuu kelërnt host. Im Unser kristlich leepe un preetich — Xtuutyum heftche un in te wiiteos Kexpreeche iwer ti Piipel, woo in te mite woch fersamlunge ketsaycht sin, khanst tuu anere itee fine woo tich helfe khene. Fersuuch unerxiitliche itee in tayn teritooryum aan wëne un sii was te pest pariire tuut. Wëns tuu tas machst, wërst tuu een peser leerer un tas tuut tich noch mee frooheet kepe. (2 Tim. 4:5)

19. Wii khanst tuu kristliche kwaliteete ëntwikele?

¹⁹ Wëns tuu am pleene pist was fer tsiile tuu xtele khanst, ferkes tich net fon een fon te haupste: kristliche kwaliteete ëntwikele. (Kal. 5:22, 23; Kol. 3:12; 2 Phe. 1:5-8) Was khanst tuu mache fer tiise tsiil trefe? Tsum payxpiil: wole mer saan tas tuu wilst een xtërker klaape hon. Tuu khanst artikele in unser puplikatsyoone leese woo khene tich helfe tayn klaape ferxtërke. Een aner tings woo aach tich sicher helfe tuut, is xtike fom JW Broadcasting^® kuke woo foer pringe priiter un xwestere woo een xtark klaape ketsaycht hon, soo kaar foer ti proope. Tan, khanst tuu tich frooe: ‘Wii khan ich tëne sayn klaape in mayn aychne leepe noo mache?’

20. Was khene mer mache fer unser frooheet ferkreese un net oone muut plaype?

²⁰ Meyer al teete kërn mee tsu Yeehoowa mache wii mer hayt mache khene. Awer in Kot sayn nay welt tuun mer tas hin kriin. Soo lang wii tas net khomt, wole mer unser pestes mache in ales was mer khene; tas khan uns helfe unser frooheet ferkreese un net oone muut plaype. Un noch wichticher: soo, tuun mer unser “frooe Kot” eere un loope. (1 Tim. 1:11) Tan, wole mer al uns fraye mit te priwilëje woo mer xon hon!