ORUPA RWOMAKONḒONONENO 33
Kara nondjoroka mu imbi mbi mo yenene okuungurira Jehova
“Okokuwa okukara nohange na imbi mbi u na vyo komeho yokuvanga okukara notjiṋa tjarwe aruhe.”—OMUZUV. 6:9.
EIMBURIRO 111 Oviṋa mbi tu pa enyando
OMAPU KU MATU KATARA *
1. Omomuano uṋe ovengi mu ve kondja okuungura ovingi motjira tja Jehova?
EṰE tu noviungura ovingi otja ouye mbwi tji mau ya komaandero. (Mat. 24:14; Luk. 10:2; 1 Petr. 5:2) Atuhe tu vanga okukarera Jehova tjinene otja pu matu yenene. Ovakambure ovengi ve ungura ovingi motjiungura tjokuzuvarisa. Nu tjiva ve vanga okukarera otjovakandjira. Varwe ve vanga okukarera poBetel poo okuvatera nomatungiro womatuwo wetu womerikotameneno. Nu ovarumendu ovakambure ovengi ve vanga okukarera otjovavatere vombongo poo otjovanene vombongo. (1 Tim. 3:1,8) Jehova u tjaterwa tjinene tji ma munu omuano ovakarere ve mu ve nonḓero yokumukarera.—Eps. 110:3; Jes. 6:8.
2. Okuhina okuyenenisa ozondando zetu motjira tja Jehova mape ya aku ṱunu vi ku eṱe?
2 Kombunda yoruveze orure indu tji tu ha yenenisire ozondando zetu tjiva motjira tja Jehova, mape ya otjiṋa ho atji tu wisa momuinyo. Poo mape ya atu u momuinyo indu tji tu hi nomerizirira tjiva motjira tja Jehova, mena rokutja oweṱe ovanene motjiwondo poo mena rozongaro zarwe. (Omiano 13:12) Omukazendu omukambure wena Melissa * wa ri mongaro ndjo. Eye aa vanga okuyenda koBetel poo kOskole yOvazuvarise vOuhona, posi yokutja wa tja: “Mena rokutja owami omunene tjinene motjiwondo, hi yenene okuyenda ku zo. Nu povikando tjiva otjiṋa ho tji ndji wisa momuinyo.”
3. Ovikwaye ovakambure tjiva mbi mave sokuungurira ko kutja ve pewe omerizirira motjira tja Jehova?
3 Imba omitanda nu mbe nouveruke ouwa, mape ya ave hepa okukara novikaṋena tjiva ngunda ave hi ya pewa omerizirira warwe. Otjotjihorera, tjiva mape ya ave rire ovandu ozonongo, mbe hakahana okutjita ozondando nu mbe nonḓero yokuungura. Posi yokutja, owo mape ya ave hepa okurihonga okukara nomuretima, nokuungura oviungura vyawo nongengezero nu wina ave hepa okurihonga okuraisa ondengero ku varwe. Tji wa ungura oukukutu okukara novikaṋena mbi mo hepa, ovarumendu ovakambure mape ya ave yenene okukupa omerizirira ngunda au hi nakuundjira ko. Tara kotjihorera tjomurumendu omukambure wena Nick. Indu tja ri nozombura 20, eye wa hihamwa tjinene momuinyo mena rokutja ka zikirwe otjomuvatere wombongo. Eye wa tja: “Ami ee munu kutja ngahino pe notjiṋa tji tji he ri nawa ohunga na ami.” Posi yokutja Nick ka yumbire ohama, eye wa kayenda komurungu okukurisa ovikaṋena mbyaa hepa. Nu aa ungura oukukutu mombongo na motjiungura tjokuzuvarisa. Ndino eye u karera otjokaṋepo kOkomiti yOrutavi rwomberoo.
4. Morupa ndwi matu kahungirira ku ye?
4 Hapo okuhina okuyenenisa ondando yoye motjira tja Jehova kwe ku wisa momuinyo? Ndoovazu peri nao kumba ku Jehova nu mu raera ohunga nomuano mbu mo fula. (Eps. 37:5-7) Ove wina mo yenene okuningira ondunge kovakambure mbe noupanga ouwa kuna Jehova okukuvatera okutjiwa kutja ovikwaye mbi mo hepa okuungurira ko, kutja u ungurire Jehova nawa. Nu okuzambo u kondje okuungurira ku imbi mbi ve ku raere. Indu tji wa tjiti nao, ove mape ya o yenene okumuna omerizirira ngo. Posi yokutja, tjimuna Melissa ngwa tamunwa rukuru, ove mape ya o ha yenene okukara nomerizirira kaaṋi ngu mo vanga nai. Hapo ove mo yenene vi okukayenda komurungu okukara nondjoroka? Okuzira epuriro ndo, morupa ndwi matu kahungirira komapuriro nga: (1) Ovikwaye mbi mavi yenene okutupa ondjoroka? (2) Omomuano uṋe mu matu yenene okukurisa ondjoroka yetu? Nu (3) ozondando zeṋe nḓu matu yenene okutwa po kutja tu kare nondjoroka?
OVIKWAYE MBI MAVI YENENE OKUTUPA ONDJOROKA?
5. Matu sokuyandja ombango ku ye kutja tu kare nondjoroka? (Omuzuvarise 6:9)
5 Omuzuvarise 6:9 ri kahurura kutja ovikwaye mbi mavi yenene okutuvatera okukara nondjoroka. (Lesa.) Omundu ngu yandja ombango ku imbi ‘mbye na vyo,’ eye u kara nohange mongaro aihe ndje ri mo. Posi yokutja, omundu ngu vanga okukara notjiṋa tjarwe aruhe, eye kamaa yenene okukara nohange na imbi mbye na vyo. Hapo matu rihongere ko tjike? Kutja tu kare nondjoroka, eṱe matu sokuyandja ombango koviṋa mbi tu na vyo nu kakoviṋa mbi tu hi nakuyenena okukara na vyo.
6. Omasanekero yeṋe ngu matu kahungirira ko nai, nu matu kerihongera ko tjike ku yo?
6 Hapo tjiri omundu ma yenene okukowa mu imbi mbye na vyo? Ovandu ovengi ve muna kutja kamaatu yenene, mena rokutja otjovandu twa suvera okukayenda komurungu okuvanga okurihonga omuano wokuungura oviṋa ovipe. Posi yokutja, eṱe tjiri matu yenene indu tji twa kara nohange na imbi ‘mbi tu na vyo.’ Omomuano uṋe mu matu yenene okutjita nao? Okutjita nao ngatu katare komasanekero wa Jesus nge ri mu Mateus 25:14-30. Eṱe matu kerihonga ohunga nomuano mu matu yenene okukara nondjoroka, na wina nomuano mu matu yenene okukurisa ondjoroka yetu mongaro mu tu ri.
OMOMUANO UṊE MU MATU YENENE OKUKURISA ONDJOROKA YETU?
7. Kahurura ousupi omasanekero wa Jesus ohunga novimariva ovisilveri omuhona mbya yandja kovakarere ve.
7 Momasanekero omurumendu aa sokutoora ouyenda. Ngunda e hi ya ya eye wa isana ovakarere ve nu a yandja ku auhe otjimariva kutja ve ungure na tjo ongetjefa. Omurumendu ngwi aa tjiwa kutja ovakarere ve ve nomasa nomasorero nga panguka, kunao eye wa yandja ovimariva ovisilveri 5 000 komukarere omutenga, nu komukarere omutjavari a yandja ovimariva ovisilveri 2 000 nu komusenina a yandja ovimariva ovisilveri 1 000. Ovakarere imba ovevari ovatenga va ungura oukukutu okuungurira omuhona wawo ovimariva ovingi. Posi yokutja, omukarere omutjatatu ka ungurire otjiṋa novimariva mbya pewa, kunao omuhona we mu ramba moviungura.
8. Ongwaye tji mape ya omukarere ingwi omutenga momasanekero a kara nondjoroka?
8 Omukarere ingwi omutenga mape ya wa ri nondjoroka tjinene kutja omuhona we mu pe ovimariva ovisilveri 5 000. Imbyo vya ri ovimariva ovingi nu aatji raisa kutja omuhona we u nongamburiro yomasa mu ye. Nu hapo tjike nomukarere omutjavari? Eye mape ya au momuinyo mena rokutja ka munine ovimariva ovisilveri ovingi tjimuna omukarere ingwi omutenga. Posi yokutja eye wa raisa ongaro iṋe?
Matu rihongo tjike okuza komukarere ingwi omutjavari momasanekero wa Jesus? (1) Eye wa muna ovimariva ovisilveri 2 000 okuza komuhona we. (2) Eye wa ungura oukukutu kutja ma munine po ovimariva ovingi komuhona we. (3) Eye wa munina po ovikwao 2 000 (Lesa oparagrafa 9-11)
9. Ovikwaye Jesus mbye hi na wa hungira ohunga nomukarere omutjavari? (Mateus 25:22, 23)
9 Lesa Mateus 25:22, 23. Jesus kena pa tja omukarere ingwi omutjavari wa pindikire mena rokutja wa muna ovimariva ovisilveri 2 000 uriri. Nu wina Jesus ka tjere omukarere ngwo aa unauna kutja, ‘Ongwaye omuhona wandje tje ndji pe ovimariva oviṱiṱi? Ami mbi ungura oukukutu tjimuna omukarere ingwi omutenga. Ndoovazu omuhona wandje ma munu kutja kawami omuungure omuwa, opuwo me horeke ovimariva mbye ndji pe nu e riungurire omuini e ha ungura pu ye.’
10. Hapo omukarere omutjavari wa ungurisa vi ovimariva mbya pewa?
10 Tjimuna omukarere omutenga, omukarere ingwi omutjavari wa ungura oukukutu okukarera omuhona we mena rokutja aa tjiwa kutja omerizirira omuhona we nge mu pe omananḓengu. Kunao, eye wa munina po ovikwao 2 000. Omukarere ngwo wa muna ondjambi okuza komuhona we mena rokuungura oukukutu. Omuhona we ka ri nenyando uriri posi yokutja we mu pa omerizirira warwe.
11. Omomuano uṋe mu matu yenene okukurisa ondjoroka yetu?
11 Momuano otjingewo, eṱe matu yenene okukara nondjoroka onyingi indu tji twa ungura oukukutu motjiungura atjihe tji twa pewa motjira tja Jehova. Na wina tji twa ‘panḓere po’ motjiungura tjokuzuvarisa nokuungura oukukutu mombongo. (Oviung. 18:5; Hebr. 10:24, 25) Rirongerisa nawa kozombongarero zombongo kokutja u kayandje omaziriro omayanḓiparise. Indu tji u norupa mombongarero yomokati kotjivike, vara orupa rwoye ndwo otjotjiṋa otjinanḓengu. Indu tji wa ningirwa okuvatera notjiṋa mombongo, kara moruveze nu tjita kutja ovandu ve tjiwe kutja mave yenene okuṱaṱera kove. O munu kutja otjiungura tji wa pewa katjinanḓengu nu ko nakuhepa okuungurisa oruveze rwoye okutjiungura. Kondja oukukutu okukurisa ondjiviro yoye motjiungura ho. (Omiano 22:29) Indu tji mo ungurire Jehova oukukutu, ove mo yenene okurira epanga re nu mo kara nondjoroka tjinene. (Gal. 6:4) Ove wina mo kara nondjoroka indu varwe tji va pewa omerizirira ove ngu mo vanga okukara na yo.—Rom. 12:15; Gal. 5:26.
12. Ovikwaye mbya vatera Melissa na Nick okukurisa ondjoroka yawo?
12 Hapo ove mo zemburuka Melissa ngwa tamunwa moparagrafa 2, nu ngwaa vanga okuyenda koBetel poo kOskole yOvazuvarise vOuhona? Nandarire kutja kaa yenene okuyenenisa ozonḓero ze nḓo, eye wa tja: “Ami ee ungura pu me yenene otjomukandjira motjiungura tjokuzuvarisa nokukondja okuungurisa omiano pekepeke vyokuzuvarisa. Okutjita nao kwe ndji yetera ondjoroka tjinene.” Nu hapo Nick wa tjinda vi omuhihamwatima indu tje hi na wa zikwa otjomuvatere wombongo? Eye wa tja: “Ami ee yandja ombango ku imbi mbi me yenene okutjita, tjimuna okuzuvarisa nokuyandja omaziriro omayanḓiparise pozombongarero zombongo. Ami wina mba tjita omaningiriro wokukaungura poBetel nu ombura ndja kongorera ko ami mba yakurwa.”
13. Ovikwaye mbi mavi kongorere ko indu tji wa yandja ombango komerizirira ngu u na wo nai? (Omuzuvarise 2:24)
13 Indu tji wa yandja ombango komerizirira ngu u na wo nai, hapo ove mo kamuna omerizirira warwe moruyaveze? Tjimuna Nick iho mape ya atji tjitwa. Posi yokutja, indu tji pe ha tjitirwe nao tjimuna Melissa, ove wina mo yenene okukara nondjoroka nohange mu imbi avihe mbi mo yenene okuungurira Jehova. (Lesa Omuzuvarise 2:24.) Ove wina mo kara nondjoroka tjinene mena rokutja mo tjiwa kutja mo yorokisa Omuhona wetu, Jesus Kristus.
OZONDANDO ZEṊE NḒU MAZE TU YETERE ONDJOROKA?
14. Matu sokuzemburuka ye aruhe, indu tji matu ripura ohunga nozondando zetu motjira tja Jehova?
14 Indu tji tu ungurira Jehova otja pu matu yenene nai, hapo ku heya kutja katu nakusokupaha omiano vyarwe vyokumuungurira nomasa? Kako katjiperi. Eṱe matu yenene nu matu sokutwa po ozondando nḓu maze tu vatere kutja tu rire ovazuvarise novahonge ovawa vEmbo ra Mukuru nokuvatera ovakambure ovakwetu. Eṱe matu yenene okuyenenisa ozondando nḓo, indu tji twa yandja ombango kokuvatera varwe pendje nokuripurira ku eṱe oveni.—Omiano 11:2; Oviung. 20:35.
15. Ozondando zeṋe tjiva nḓu maze yenene okukuvatera okukurisa ondjoroka yoye?
15 Ozondando zeṋe nḓu mape ya okara na zo? Kumba ku Jehova okukuvatera kutja u tjiwe kutja ozondando zeṋe nḓu mo yenene okuyenenisa. (Omiano 16:3; Jak. 1:5) Ove mo yenene okukara nozondando tjimuna inḓa nḓa tamunwa moparagrafa ondenga morupa ndwi. Tjimuna okurira omukandjira omuvatere poo omukandjira woruveze aruhe, okukarera poBetel poo okuvatera nomatungiro womatuwo wetu womerikotameneno. Poo ove mo yenene okurihonga eraka rarwe kokutja u zuvarise ombuze ombwa poo nandarire kutja u kazuvarise kovandu momaturiro warwe. Ove mo yenene okurihonga ovingi ohunga nozondando tjiva indu tji wa lese ekondwa 10 rembo ndi Organized to Do Jehovah’s Will nokuhungira ku novanene vombongo mombongo yoye. * Indu tji mo kondjo okuyenenisa ozondando zoye nḓo, varwe mave yenene okumuna omarundurukiro ngu mo tjiti nu mo kara nondjoroka tjinene.
16. Hapo ove mo yenene okutjita vi indu nai tji u hi nokuyenena okuyenenisa ondando yoye?
16 Hapo ove mo tjiti vi indu nai tji u hi nakuyenena okuyenenisa ozondando nḓa hungirwa morupa ndwi? Otjiṋa tji mo yenene okutjita okukara nondando yarwe ndji mo yenene okuyenenisa. Ngatu katare koviṋa vyarwe mbi mavi yenene okukuvatera.
Ondando iṋe imwe ndji mo yenene okuyenenisa? (Lesa oparagrafa 17) *
17. Otja ku 1 Timoteus 4:13, 15, ovikwaye omurumendu omukambure mbi ma yenene okutjita kutja ma rire omuhonge omuwa?
17 Lesa 1 Timoteus 4:13, 15. Indu tji u ri omurumendu omukambure ngwa papitisiwa, ove mape ya okondjo okurira omuhungire poo omuhonge omuwa. Omena raye? Mena rokutja tji wa kondjo nomasa okurira omulese omuwa, omuhungire nomuhonge omuwa, ove mo yenene okuvatera imba mbu mave puratene kove. Kondja okukara nondando yokukonḓonona nokuungurira komapu ayehe nga tamunwa mokambo nga Panḓera pokulesa nokuhonga. Konḓonona nokuungurira kotjikaṋena atjihe peke ponganda, nu u ṱakamise imbi mbi we rihongo indu tji mo yandja ehungi. Ningira ombatero komuyandje womaronga omutjavari poo kovanene vombongo varwe “mbe ungura nomasa tji mave zuvarisa nokuhonga.” * (1 Tim. 5:17) O yandja ombango uriri kokuungurira ku imbi mbi we rihongo mokambo, nungwari wina kondja okuvatera ovapuratene voye kutja ve kurise ongamburiro yawo, poo okuvevatera kutja ve ṱakamise imbi mbi ve rihongo. Indu tji wa tjiti nao, ove mo kurisa ondjoroka yoye na indji yovapuratene.
Ondando iṋe imwe ndji mo yenene okuyenenisa? (Lesa oparagrafa 18) *
18. Ovikwaye mbi mavi yenene okutuvatera okuyenenisa ozondando zetu motjiungura tjokuzuvarisa?
18 Atuhe tu nomerizirira wokuzuvarisa nokukaisa po ovandu ovahongewa. (Mat. 28:19, 20; Rom. 10:14) Hapo ove mo vanga okukurisa ondjiviro yoye motjiungura otjinanḓengu ho? Konḓonona okambo nga Panḓera pokulesa nokuhonga nu okuzambo u twa po ozondando nḓu maze ku vatere okuungurira ku imbi mbi we rihongo. Ove wina mo yenene okumuna omapu warwe okuza mokambo nga Ehupo retu rOukriste notjiungura tjetu tjokuzuvarisa—Okambo kOmakonḓononeno, poo okuza kouvidio wovihorera vyokuzuvarisa mbu raisiwa pozombongarero zetu zomokati kotjivike. Tara komapu pekepeke okutara kutja ooriṋe ndi mo yenene okuungurira ko. Indu tji wa ungurire komapu ngo, ove mo yenene okurira omuzuvarise omuwa nu iho matji kurisire ko ondjoroka yoye.—2 Tim. 4:5.
Ondando iṋe imwe ndji mo yenene okuyenenisa? (Lesa oparagrafa 19) *
19. Omomuano uṋe ove mu mo yenene okukara novikaṋena mbi tjata ku Mukuru?
19 Indu tji mo twa po ozondando, zemburuka kutja okukara novikaṋena mbi tjata ku Mukuru oondando onanḓengu ndji mo yenene okukara na yo. (Gal. 5:22, 23; Kol. 3:12; 2 Petr. 1:5-8) Ovikwaye mbi mo yenene okutjita okuyenenisa ondando ndjo? Otjotjihorera, ngatu tje mo vanga okukara nongamburiro yomasa. Ove mo yenene okulesa otupa momambo wetu tu matu ku pe omapu yoviṋa mbi mo yenene okutjita kutja u kurise ongamburiro yoye. Ove wina mo yenene okumuna ouwa mokutarera otupa two-JW Broadcasting® tu tu raisa omuano ovakambure mu va raisa ongamburiro yomasa otja tjaave tuurunga omauzeu pekepeke. Nu okuzambo tara komiano ove mu mo yenene okuhorera kongamburiro yawo mehupo roye.
20. Ovikeṋa mbi matu yenene okutjita kutja tu kare nondjoroka onyingi nokuhina okuwa momuinyo?
20 Otjingaperi kutja atuhe tu vanga okuungurira Jehova tjinene, nandarire kutja katu yenene nai. Mouye oupe eṱe matu yenene okukarera Jehova okuura. Moruveze rwanao, indu eṱe tji twa kondjo pu matu yenene motjiungura atjihe tji twa pewa, matu kara nondjoroka onyingi na tu ha u momuinyo. Nu tjinenenene, matu yandja ondjozikiro nohiviro ku Jehova ngu ri “Ndjambi omuwa.” (1 Tim. 1:11) Kunao, ngatu kare nondjoroka mu imbi mbi matu yenene okuungurira Jehova.
EIMBURIRO 82 “Ondjerera yeṋu ngai yere”
^ par. 5 Eṱe twa suvera Jehova tjinene, nu tu vanga okutjita avihe otja pu matu yenene motjira tje. Nu mena ranao, eṱe mape ya atu vanga okuungura ovingi motjiungura tjokuzuvarisa poo mombongo. Hapo tjike tji twa kondjo nomasa okuyenenisa ozondando nḓu twa tjita, posi yokutja komaandero atu ha yenene okutjita nao? Ovikwaye mbi mavi yenene okutuvatera okukayenda komurungu okukarera Jehova nokukara nondjoroka? Eziriro ndo matu kerimuna momasanekero Jesus nga yandja ohunga novimariva ovisilveri.
^ par. 2 Omana tjiva ya rundururwa.
^ par. 15 Ovarumendu ovakambure mba papitisiwa ve tunduuzwa okukara nozondando zokurira ovavatere vombongo poo ovanene vombongo. Tji mo vanga ondjivisiro ohunga noviundjirwa ko, lesa ekondwa 5 no 6 rembo ndi Organized to Do Jehovah’s Will.
^ par. 17 OMAMBO NGA KAHURURWA: Omuyandje womaronga omutjavari u rira omunene wombongo ngwa zikwa okuyandja omaronga ngu maye heperwa po kovanene vombongo novavatere vombongo kourike wawo, ohunga nomuano mu va yandja otupa twawo mombongo.
^ par. 63 OMAKAHURURIRO WOTJIPERENDERO: Kutja ma yenenise ondando ye yokurira omuhonge omuwa, omurumendu omukambure ma tjiti omakonḓononeno momambo wetu.
^ par. 65 OMAKAHURURIRO WOTJIPERENDERO: Kombunda yokutjita ondando yokuzuvarisa ngunda e he ri motjiungura tjokuzuvarisa, omukazendu omukambure ma yandja okakarata komahakaeneno komundu ngu me mu pe ovikurya.
^ par. 67 OMAKAHURURIRO WOTJIPERENDERO: Omukazendu omukambure ngu nondando yokurira ondjandje, ma yandja otjiyandjewa komukazendu warwe omukambure ngunda e hi nakuundjira ko.
