1. Anni i kukukuan na aru nga wawwaragi tapenu mas makapasserbi ira kani Jehova?

 ARU paga i mawag nga trabahuattam durante nga umara-aranni i panuppalan na mundo. (Mat. 24:14; Luc. 10:2; 1 Ped. 5:2) Kayà tam ngamin nga iyawa i kapianattam ta passerbi kani Jehova yari tu aru danuri palawadda i ministerio da. Goal na karuan nga mappayunir. Kayà gapa na karuan i masserbi ta Bethel onu manuffun ta konstruksion na teokratiko ira nga fasilidad. Aru gapa nga brother i mappuppursigi tapenu makualipika ira bilang ministerial nga aripan onu elder. (1 Tim. 3:1, 8) Siguradu nga magaya-ayayya si Jehova nga makasingan ta totolena nga sigga-paran nga masserbi nisa!—Sal. 110:3; Isa. 6:8.

2. Anni i matageno tam nu ariattam nga nagawa i karuan nga goal tam?

² Baka madismaya ittam nu ta pappasa na aru nga tiempo ay ariattam nga nagawa i karuan nga goal tam ta espiritual. Awayya na gapa nga makkafi i nono tam nu ari ittam ngana nga puede ta karuan nga pribilehio megafu ta edad onu tanakuan paga nga rason. (Prov. 13:12) Kunnatun i situasion ni Melissa. * Kakayà na i masserbi ta Bethel onu magiskuela ta School for Kingdom Evangelizers, ngem kinagi na: “Lampas ngà ngana ta edad tapenu makualipika para tatun ira nga pribilehio. Imposible ngana danatun para nio. Yayya nga makkafi i nono ku nu mittan.”

3. Anni i mawag tu kuan na brother ira tapenu makalawa tu tanakuan paga nga pribilehio?

³ Mabbing paga i karuan nga brother anna egga paga ira ta kasikannadda ngem mawag labbi tu makultiba da i kualidad ira nga kawagan tapenu makualipika ira ta mas aru paga nga responsibilidad. Awayya na tu ma-uto ira, mabi laman ira nga maddesision, anna kakayà da i manguffun. Ngem baka kawagadda  labbi nga gigiammuan nu kunnasi mabbalin tu mas mapasensia, mas memmugug ta pattrabahu, onu mas marespeto ta tanakuan. Nu ikagumammu nga ipasingan labbi i kawagan ira nga kualidad, duttal noka i tiempo nga meddakka tu pribilehio. Kunnatun i nesimmu kani Nick. Tagga ta 20 anios yayya, nadismaya yayya megafu ta ari yayya nga natunno bilang ministerial nga aripan. Kinagi na: “Nanono ku nga baka egga i kurang ta nio.” Ngem ari nga pinakkafi ni Nick i nono na. Kingngua na i adde na mawayya na ta kongregasion anna ta pallayyagayya. Sangawe, miembro ngana yayya na Branch Committee.

4. Anni i gigiammuattam taw nga artikulo?

⁴ Dismayadu ka kari megafu ta egga i goal mu ta espiritual nga ariammu paga nadde? Ipakimallo mu yatun kani Jehova anna ikagim nisa i mataga-tageno mu. (Sal. 37:5-7) Makkiddaw ka gapa tu suhestion ta ekspiriensadu ira nga brother nu kunnasim paga nga mapakasta i passerbim ta Dios, tapus kuammu i adde na mawayyam nga iyaplika i tabaradda. Nu kuammu yatun, awayya na nga madde mu i goal mu. Ngem baka egga ira i pribilehio nga ari ngana tu posible para nikaw, kagitta na kani Melissa nga nakagi ta gafu. Ngem anni i kuammu tapenu magayayya ka lagapa? Tapenu matabbag yatun, gigiammuattam taw nga artikulo (1) nu anni i mamagayayya nittam, (2) nu kunnasi ittam mabbalin tu mas magayayya, anna (3) nu anni ira nga goal i awayya tam nga addetan tapenu mabbalin ittam tu mas magayayya.

5. Anni nakuan i fokus tam tapenu mabbalittam tu magayayya? (Eclesiastes 6:9)

⁵ Ipakanawag na Eclesiastes 6:9 nu kunnasi ittam mabbalin tu magayayya. (Bibbigan.) Appresian na tolay nga ‘magayayya ta masingan na mata na’ nu anni i egga ira nisa, kagitta na maddaggun nga situasion na. Ngem ari vuluvuga nga makontentu i tolay nga “makkaraga ta ari nga mala.” Anni gafu i magigiammu tam tatun? Magayayya ittam nu nakafokus ittam ta egga nittam anna ta goal ira nga posible nga madde tam.

6. Anni nga ilustrasion i paguvovugattam, anna anni i magigiammu tam tatun?

⁶ Posible kari nga mabbalikka tu magayayya ta egga ira nikaw? Aru i makkagi nga imposible yatun. Ngatta? Kayà tam gare kanayun nga purueban i bagu ira nga gannug. Ngem puede ittam lagapa nga mabbalin tu magayayya ta “masingan na mata” tam. Kunnasi? Gigiammuattam i ilustrasion ni Jesus ta Mateo 25:14-30 meyannung ta talento ira. * Mammuattam tatun nu kunnasi mabbalin tu magayayya anna nu anni ira i kuattam tapenu mas magayayya ittam ta bendision ira nga egga nittam.

7. Istorian i ilustrasion ni Jesus meyannung ta talento ira.

⁷ Ta ilustrasion, egga i tadday nga tolay nga magganna-gannua nga umay ta biahe. Nige na nanaw, inagalan na i doroban na ira anna niddan na i kada tadday nira tu talento tapenu magganansia i kuartu na. * Ammu natun nga lalaki i abilidad na kada doroban na. Yayya nga niddan na tu lima nga talento i ollu nga doroban, dua gapa ta mekadua, anna tadday ta mekatallu. Nallallappo i ollu nga dua nga doroban tapenu magganansia i kuartu na yafu da. Ngem awan vuluvuga tu kingngua na  mekatallu nga doroban ta nekargo nisa, yari tu pinapanaw yayya na yafu na.

8. Ngatta magayayya i ollu nga doroban ta ilustrasion?

⁸ Kuruga magayayya i ollu nga doroban megafu ta lima nga talento i nitalo nisa na yafu na. Daka-dakal i balor natun nga kuartu anna ipasingan natun nga daka-dakal i pattalo nisa na yafu na! Ngem kunnasi gapa i mekadua nga doroban? Puede nakuan nga makkafi i nono na megafu ta ari tu kunnari kadakal i neyawa nisa kumpara ta ollu nga doroban. Ngem anni i reaksion na?

9. Anni i ari nga kinagi ni Jesus meyannung ta mekadua nga doroban? (Mateo 25:22, 23)

⁹ Bibbigan i Mateo 25:22, 23. Ari nga kinagi ni Jesus nga nadismaya i mekadua nga doroban ni tu nattaki i nono na megafu ta dua laman nga talento i nalawa na. Ari gapa nga kinagi ni Jesus nga marrerreklamo yatun nga doroban, nga gitta na kakkagian na: ‘Ngatta ta kunnaw laman i nalawa ku? Parefu kami mabba nga malappo nari na doroban nga nakalawa tu lima nga talento! Nu kunnaw laman i anningan nio na yafù, mas makasta nu ikokkog ku ngana laman yaw nga dua nga talento tapus kuakku lagapa i pammakapianakku.’

10. Anni i kingngua na mekadua nga doroban ta talento na ira?

¹⁰ Nallallappo i mekadua nga doroban tapenu passerbian i yafu na anna sinerioso na i responsibilidad nga neyawa nisa, kagitta na kingngua na ollu nga doroban. Megafu tatun, napabbalin na tu doble i karu na talento. Nabala-balakkan yatun nga doroban megafu ta lallappo na. Nalawa na i fabor na yafu na anna netalo nisa i mas aru paga nga responsibilidad!

11. Kunnasi ittam nga mabbalin tu mas magayayya?

 ¹¹ Mabbalin ittam gapa tu mas magayayya nu kuattam i adde na mawayya tam ta maski anni nga ipatrabahu nittam ni Jehova. ‘Ipay tam nakuan i ngamin nga tiempo tam’ ta pallayyagayya, anna makipartisipa ittam ta ngamin nga aktibidad na kongregasion. (King. 18:5; Heb. 10:24, 25) Mapprepara ka para ta study tapenu makeyawa ka tu makapagaram ira nga komento. Seriosowammu i maski anni nga parte nga meyasayn nikaw ta study ta midweek. Nu mekiddaw gapa nikaw nga manguffun ta tadday nga trabahu ta kongregasion, mapattalakkakka nakuan anna ariammu nga itala-talattan yatun. Ariammu nonopan nga ari tu importante i nepatrabahu nikaw. Mappursigi ka tapenu mabbalikka tu mas malalaki ta trabahum. (Prov. 22:29) Nu mas mallallappo ka ta espiritual ira nga aktibidad anna ta asayment mu ira, mas mabi ka nga mapprogreso anna mabbalikka gapa tu mas magayayya. (Gal. 6:4) Mas malogon laman gapa nikaw nga makitappagayayya ta tanakuan nu nakalawa ira tu pribilehio nga kayà mu nakuan gapa nga malawa.​—Roma 12:15; Gal. 5:26.

12. Anni i kingngua na dua nga wagi tapenu mabbalin ira tu mas magayayya?

¹² Ari tu posible kani Sister Melissa nga nakagi ta gafu i masserbi ta Bethel onu magiskuela ta School for Kingdom Evangelizers, ngem kinagi na: “Kuakku lagapa i ngamin nga mawayyà ta pappayunir ku anna puruebakku i nadduruma nga metodo na pallayyagayya. Yatutta kuruga magayayya ngà.” Anni gapa i kingngua ni Nick turi ta nadismaya yayya megafu ta ari yayya nabbalin tu ministerial nga aripan? Kinagi na: “Naffokus ngà ta makuà ira, gitta na pamministerio anna pakkomento tu makapagaram ta study ira. Nagaplay ngà gapa ta Bethel tapus nagalan ngà ta tumunug nga dagun.”

13. Anni i mesimmu nu kukukuammu i adde na mawayyam ta maddaggun nga asayment mu? (Eclesiastes 2:24)

¹³ Nu kukukuammu i adde na mawayyam ta maddaggun nga asayment mu, kayà na kari kagian nga makalawa ka tu mas aru paga nga pribilehio ta mappange? Posible yatun, gitta na nesimmu kani Nick. Ngem nu ari tu kunnatun i mesimmu, gitta na kani Melissa, awayyam lagapa i mas magayayya anna makontentu ta kukukuammu para kani Jehova. (Bibbigan i Eclesiastes 2:24.) Siguradu gapa nga magayayya ka megafu ta ammum nga magayayya i Yafu tam nga si Jesu-Cristo ta kukukuammu.

14. Anni nakuan i daddammattam nu mannono ittam tu goal ira ta espiritual?

¹⁴ Nu iyayawa tam ngana i kapianan ta passerbi kani Jehova sangawe, kayà na kari kagian nga adde tatun ngana laman i makua tam ta passerbi kani Jehova? Ari! Mawag tu mannono ittam paga tu goal ira nga mamabbalin nittam tu mas malalaki ta pallayyagayya anna pab-Bible study anna mas makoffun ta wawwaragi. Madde tam danatun nga goal nu agga-nono tam nga kukukuattam yatun para ta pammakapianan na tanakuan, ari tu ta baggi tam.​—Prov. 11:2; King. 20:35.

15. Anni i karuan ta goal nga awayya na tu mas mamagayayya nikaw?

¹⁵ Anni ira nga goal i awayyam nga addetan? Mappoffukka kani Jehova tapenu mammuammu danatun. (Prov. 16:3; Sant. 1:5) Awayyam kari nga addetan danuri goal nga nakagi ta  ollu nga parapo, kagitta na pa-auxiliary onu regular payunir, passerbi ta Bethel, onu panguffun ta konstruksion ira? Awayyam kari nga maggigiammu tu bagu nga lengguahe onu magali ta tanakuan nga lugar tapenu layyagayyan i totolay tari? Mammuammu nu anni i mawag nga kuammu nu bibbigammu i kapitulo 10 na libru  nga Organisado Upang Gawin ang Kalooban ni Jehova anna nu kiyuvovugammu i elder ira ta kongregasiommu. * Nu ikagumammu nga addetan yatun ira nga goal, masingan i papprogresom anna mas magayayya ka.

16. Anni i kuammu nu ari tu posible nikaw ta maddaggun nga gawatan i tadday nga goal?

¹⁶ Kunnasi nu ari tu posible nikaw ta maddaggun nga gawatan i goal ira nga napaguruvovugattam? Mannono ka tu tanakuan nga goal nga awayyam nga addetan. Anni danatun?

17. Segun ta 1 Timoteo 4:13, 15, kunnasi nga mabbalin tu mas malalaki ta panuddu i tadday nga brother?

¹⁷ Bibbigan i 1 Timoteo 4:13, 15. Nu tadday ka nga bawtisadu nga brother, awayyam nga kuan tu goal nga pakastan i pappalappa mu anna i panuddum. Ngatta? Megafu ta nu “talakkurugam-mu” i pabbibbig mu, pappalappa, anna i panuddum, mas moffunammu danuri maggigginna nikaw. Kuammu tu addetan nga gigiammuan anna iyaplika i kada leksion ta brosiur nga Mabbalin tu Efektibo ta Pabbibbig Anna Pattuddu. Sinaggi-taddayammu nga gigiammuan i kada leksion, praktisammu yatun tu mapia ta balenu, tapus ikagumammu nga iyaplika i nagigiammum nu egga i palappa mu. Makkiddaw ka tu suhestion ta auxiliary counselor onu ta tanakuan ira nga elder nga ‘mabbanna-bannag nga mallayyagayya anna mattuddu.’ * (1 Tim. 5:17) Ari laman nakuan tu i pangiyaplika ta leksion ira ta brosiur i agga-nono mu. Gakkag mu nakuan nga pasikannan i pangurug na maggigginna anna paguyuan ira  nga kuan i tadday nga gannug. Nu kuammu yatun, mabbalikka tu mas magayayya kunne na gapa danuri maggigginna nikaw.

18. Anni i kuattam tapenu madde tam i goal tam ira ta ministerio?

¹⁸ Neyawa nittam ngamin i annungan nga mallayyagayya anna mangngua tu disipulos. (Mat. 28:19, 20; Roma 10:14) Kayà mu kari nga pakastan paga i abilidad mu taw ira nga importante nga trabahu? Gigiammuammu gafu i brosiur nga Pattuddu tapus mannono ka tu goal ira nga makoffun nikaw tapenu meyaplikam i nagigiammum ira. Makala ka paga tu makoffun ira nga suhestion ta Pattolay Anna Ministerio Tam nga Cristiano—Workbook ta Study anna ta video ira na sampol nga pakiyuvovug nga mepagiraw ta study ira ta midweek. Puruebammu i nadduruma nga suhestion tapenu mammuammu nu anni i pinaka-efektibo. Nu tuttulammu danatun, mabbalikka tu mas malalaki ta pallayyagayya anna mas magayayya ka.​—2 Tim. 4:5.

19. Kunnasim nga makultiba i kualidad ira nga mamagayayya ta Dios?

¹⁹ Nu nononopammu nu anni i makasta nga goal, ariammu nakuan vuluvuga kattaman nga tadday ta kakastan nga goal i pakkultiba tu kualidad ira nga mamagayayya ta Dios. (Gal. 5:22, 23; Col. 3:12; 2 Ped. 1:5-8) Kunnasim nga makua yatun? Baka goal mu nga pasikannan i pangurug mu. Mabbibbig ka gafu tu suhestion ira ta publikasiottam nu kunnasim makua yatun. Mabbenefisio ka gapa nu girawammu i ekspiriensa na wawwaragi ta JW Broadcasting^® nga nakepasingan tu masikan nga pangurug maski nu napakaru i kapurueba da. Tapus nonopammu nu kunnasim maparigan i pangurug da.

20. Anni i kuattam tapenu mabbalin ittam tu mas magayayya anna ari ittam nga madismaya?

²⁰ Magga kayà tam ngamin nga mas makapasserbi nakuan paga kani Jehova anne ta makua tam ta maddaggun. Ngem meyawa tam laman i ngamin ta passerbi tam ta Dios ta napabagu nga mundo. Ta maddaggun, iyawa tam nakuan i kapianattam ta maski anni nga makua tam tapenu mabbalin ittam tu mas magayayya anna ari ittam nga madismaya. Medayaw tam paga si Jehova, i “magayayya nga Dios” tam. (1 Tim. 1:11, NW ) Yari tu magayayya ittam nakuan ta pribilehio ira nga egga nittam!