1. Eme inievo buobu a bi ru nẹnẹ?

 IRUO e vọ ukoko Ọghẹnẹ nọ ma re ru nọ akpọ omuomu nana o bi te ekuhọ no na. (Mat. 24:14; Luk 10:2; 1 Pita 5:2) Mai kpobi ma gwọlọ rọ ẹgba mai kpobi ru iruo kẹ Jihova. Inievo buobu a be ta usi uwoma vi epanọ a jẹ ta vẹre. Ejọ e gwọlọ jọ ekobaro. Efa e gwọlọ jọ Ebẹtẹle ru iruo hayo kuomagbe iruo ebabọ ukoko na. Yọ inievo-emezae buobu a be daoma re a te ahwo nọ a re ro mu idibo iruiruo hayo ekpako ukoko. (1 Tim. 3:1, 8) Ma riẹ nọ eva e be were Jihova gaga, nọ ọ be ruẹ nọ idibo riẹ a be gwọlọ rọ ẹgba rai kpobi gọe na.​—Ol. 110:3; Aiz. 6:8.

2. Ẹvẹ oma o rẹ jọ omai nọ itee jọ nọ ma bi le e gbẹ be sai te omai obọ họ?

² Nọ u te bi lehie gaga no yọ ma be sai le itee jọ nọ ma fihọ evaọ ukoko na tobọ họ, o sae kẹ omai uye. O sae jẹ kẹ omai uye re nọ ma gbẹ sai le utee jọ tobọ họ fikinọ ma vrẹ unuikpe ahwo nọ a re le utee yena no hayo fiki oware ofa jọ. (Itẹ 13:12) Oware utioye na o via kẹ Melissa. * Ọ gwọlọ nọ ọ rẹ jọ Ebẹtẹle ru iruo hayo kpohọ Isukulu Rọkẹ Etausiuwoma Uvie Na. Rekọ ọ ta nọ: “Mẹ gbẹ sai le itee nana ha keme mẹ kpako vrẹ unuikpe na no. Ẹsejọ o rẹ kẹ omẹ uye gaga nọ me te roro kpahe iẹe.”

3. Eme u fo nọ inievo jọ a re ru re a sai te kẹ uvẹ-iruo jọ?

³ Ẹsejọhọ o te gwọlọ nọ inievo jọ nọ e gbẹ maha jẹ rrọ  gragragra a wo oghẹrẹ iruemu jọ taure a te ti te kẹ uvẹ-iruo ofa jọ evaọ ukoko na. O sae jọ nọ inievo itiena a wo eriariẹ, gbe ajọwha, yọ a rẹ dhẹ siọ iruo ba ha. Rekọ ẹsejọhọ o te gwọlọ nọ a gbẹ riẹ epanọ a re thihakọ, epanọ a rẹ romatotọ ru oware, gbe epanọ a rẹ kẹ amọfa adhẹẹ ziezi. Whai izoge na, wha tẹ daoma wo emamọ iruemu nana, a te kẹ owhai uvẹ-iruo efa evaọ ukoko na, evaọ oke nọ wha ti tube rẹro riẹ hẹ. Joma ta kpahe oniọvo-ọmọzae jọ nọ a re se Nick. Oke nọ ọ jọ ikpe udhe, o jẹ dae gaga inọ a rehọ e riẹ mu odibo oruiruo ho. Ọ ta nọ, “Me je roro nọ me ru oware jọ thọ evaọ ukoko na.” O make jọ ere na, Nick ọ gbẹ jẹ daoma ru epanọ o re ro te kẹ odibo oruiruo. Ọ jẹ daoma ziezi evaọ ukoko na yọ o je kpohọ usi uwoma ziezi re. Enẹna, Nick ọ rrọ omọvo Ogbẹgwae Uwou Ogha.

4. Eme ma te ta kpahe evaọ uzoẹme nana?

⁴ Kọ o be kẹ owhẹ uye inọ uvẹ-iruo jọ nọ whọ gwọlọ evaọ ukoko na u bi te owhẹ obọ họ? O tẹ rrọ ere, lẹ se Jihova re whọ vuẹe epanọ oware na o be kẹ owhẹ uye te. (Ol. 37:5-7) Whọ sae jẹ ta kẹ inievo-emezae nọ i kruga ziezi evaọ ukoko na re a vuẹ owhẹ oware nọ who re ru re whọ sae nyaharo ziezi evaọ ukoko na. Kẹsena whọ vẹ daoma lele ohrẹ kpobi nọ a kẹ owhẹ. Who te ru ere, ẹsejọhọ uvẹ-iruo nọ who bi rẹro riẹ evaọ ukoko na u ti te owhẹ obọ. Rekọ ẹsejọhọ, wọhọ Melissa nọ ma fodẹ ẹsejọ na, itee jọ nọ who bi le evaọ ukoko na e sai te owhẹ obọ họ fiki oware jọ. O tẹ rrọ ere, ẹvẹ eva e sae gbẹ rọ were owhẹ evaọ ukoko na ghele? Re ma sae kuyo onọ yena, ma te ta kpahe eware esa jọ evaọ uzoẹme nana. Eye họ (1) eme ọ te ginẹ lẹliẹ eva were owhẹ evaọ ukoko na?, (2) ẹvẹ eva e sae gbẹ rọ were owhẹ vi epaọ anwẹdẹ? (3) itee vẹ who re le nọ o te lẹliẹ eva were owhẹ ziezi?

5. Eme ma re fi iroro mai họ re eva e sae were omai? (Ọtausiuwoma Na 6:9)

⁵ Obe Ọtausiuwoma Na 6:9 o vuẹ omai oware nọ ma re ru re eva e sae ginẹ were omai. (Sei.) Ohwo nọ ọ rẹ reawere “eware nọ ọ be rọ ibiaro riẹ ruẹ,” eware nọ o wo e rẹ dae ẹro yọ e rẹ were iẹe. Rekọ ohwo nọ o re ghoro gwọlọ eware nọ i bi si ei urru o re fi iroro riẹ họ eware nọ e rẹ sai tei obọ họ. Eme oria Ebaibol yena u wuhrẹ omai? Re eva e sae ginẹ were omai, oware nọ ma wo oye ma re fi iroro mai họ, ma ve je rẹro oware nọ ma riẹ nọ o rẹ sai te omai obọ.

6. Ọtadhesẹ vẹ ma te ta kpahe, kọ eme ma te jariẹ wuhrẹ?

⁶ Mai ahwo-akpọ ma rẹ gwọlọ ru oware okpokpọ nọ u te te oke jọ no. Nọ o rrọ ere na, kọ eva e sae ginẹ were omai ghele nọ ma te gbe bi ru oware nọ ma bi ru anwẹdẹ? Ee. Eva e sae gbẹ were ohwo ghele. Ẹvẹ ma rọ ta ere? Joma ta kpahe ọtadhesẹ etalẹnte nọ Jesu ọ kẹ evaọ obe Matiu 25:14-30. Ma te jariẹ ruẹ epanọ eva e sae rọ were omai ziezi fiki iruo nọ ma bi ru enẹna evaọ ukoko na.

7. Gbiku ọtadhesẹ Jesu na ze kpẹkpẹe.

⁷ Jesu ọ ta evaọ ọtadhesẹ etalẹnte na inọ ọzae jọ ọ gwọlọ kpohọ erẹ. Taure ọ tẹ te nyavrẹ, o te se erigbo riẹ jẹ kẹ ae etalẹnte nọ a rẹ rọ thueki. * Ọzae na ọ riẹ nọ epọvo na erigbo riẹ na a rrọ họ, fikiere ọ tẹ kẹ ọjọ etalẹnte isoi, ọfa etalẹnte ivẹ, ọrọ avọ esa kọ etalẹnte ọvo. Erigbo ivẹ ọsosuọ na a rọ  etalẹnte rai thueki ziezi. Rekọ ọrọ avọ esa na ọ rọ etalẹnte riẹ ru oware ovo ho, fikiere olori riẹ o te si ei no iruo.

8. Fikieme o sae rọ jọ nọ eva e te were ọrigbo ọsosuọ na?

⁸ Eva e te siọ ọrigbo ọsosuọ na ba ẹwere he inọ olori riẹ ọ kẹ riẹ etalẹnte isoi soso. Okolo ugho a kẹ riẹ na ha, yọ u dhesẹ nọ olori riẹ o gine fievahọ iẹe gaga. Kọ ọrigbo avọ ivẹ na? Eva e hae te dhae inọ etalẹnte riẹ i bu te erọ ọrigbo ọsosuọ na ha. Rekọ eva e dha riẹ hẹ. Ukpoye kọ eme o ru?

9. Eme ọrigbo avọ ivẹ na o ru hu? (Matiu 25:22, 23)

⁹ Se Matiu 25:22, 23. Jesu ọ ta nọ ọrigbo avọ ivẹ na o je muofu hu inọ etalẹnte ivẹ ọvo a kẹ riẹ. Yọ ọ jẹ go ho inọ: ‘Kọ fikieme a rẹ rọ kẹ omẹ ivẹ ọvo? Whaọ orọnọ ọrigbo nọ a kẹ isoi na o bi ru iruo vi omẹ hẹ! Otẹrọnọ iruo mẹ e be da olori mẹ ẹro ho, mẹ te tọ etalẹnte ivẹ na hotọ mẹ vẹ nyai ru iruo nọ me re ro wo ugho kẹ omobọ mẹ.’

10. Eme ọrigbo avọ ivẹ na ọ rọ etalẹnte nọ a kẹ riẹ ru?

¹⁰ Ọrigbo avọ ivẹ na o se iruo nọ olori riẹ ọ kẹ riẹ gboja ziezi, ọ tẹ rọ igho nọ a kẹ riẹ na thueki wọhọ epanọ ọrigbo ọsosuọ na o ru. Fikiere, o te wo erere etalẹnte ivẹ efa. Olori riẹ ọ hwa riẹ emamọ osa fiki emamọ oware nọ o ru na. Eva e were olori na gaga, ọ tẹ ta kẹe nọ ọ te kẹe iruo efa.

11. Ẹvẹ eva e sae rọ were omai ziezi evaọ ukoko na?

¹¹ Epọvo na re, ma tẹ be rọ ẹgba mai kpobi ru iruo nọ a kẹ omai evaọ ukoko Jihova, eva e te were omai gaga. Hae ‘rọ oke kpobi’ ta usi uwoma na, jẹ daoma ra kpobi  evaọ iruo ukoko na. (Iruẹru 18:5; Hib. 10:24, 25) Hae ruẹrẹ oma kpahe kẹ ewuhrẹ ziezi re whọ hae jẹ kẹ uyo nọ o rẹ bọ inievo na ga. A tẹ kẹ owhẹ ẹme evaọ ewuhrẹ udevie-oka, sei gboja. Nọ a tẹ kẹ owhẹ iruo jọ evaọ obọ Ọgwa Uvie, hai kaki te obei. Whọ dhẹ siọ iruo evo ba ha, ere whọ te rọ jọ ohwo nọ a rẹ rẹroso. Who du rri iruo nọ a kẹ owhẹ nọ i wuzou tere he he, inọ i te oware nọ whọ rẹ raha oke fihọ họ. Daoma riẹ epanọ who re ro ru iruo nọ a kẹ owhẹ ziezi. (Itẹ 22:29) Whọ tẹ be romakẹ iruo ukoko na je bi ru iruo nọ a kẹ owhẹ ziezi, whọ te nyaharo ziezi evaọ ukoko na yọ eva e te were owhẹ gaga re. (Gal. 6:4) U ti je ru nọ who ti ro lele inievo efa ghọghọ nọ ae omarai a te wo uvẹ-iruo nọ whọ gwọlọ evaọ ukoko na.​—Rom 12:15; Gal. 5:26.

12. Eme inievo ivẹ jọ a ru re eva e sae were ae vi epaọ anwẹdẹ?

¹² Kọ whọ kareghẹhọ Melissa, oniọvo-ọmọtẹ nọ ọ jẹ gwọlọ nọ o re kpohọ Ebẹtẹle hayo Isukulu Rọkẹ Etausiuwoma Uvie Na? Dede nọ ọ sai le itee riẹ na tobọ họ, ọ ta nọ: “Mẹ rẹ daoma ziezi evaọ iruo ọkobaro mẹ na, yọ mẹ rẹ daoma rọ koghẹrẹ koghẹrẹ ta usi uwoma na re. Fikiere, eva e be were omẹ gaga.” Kọ ẹvẹ Nick nọ o rẹro bẹ inọ dodokọ a rẹ rehọ iẹe mu odibo oruiruo? Eme o ru? Ọ ta nọ: “Me te je ru iruo nọ mẹ rẹ sai ru evaọ ukoko na. Me je kpohọ usi uwoma ziezi, yọ mẹ jẹ hae kẹ emamọ iyo evaọ ewuhrẹ. Me te je fi obe họ kẹ iruo Ebẹtẹle. Ukpe nọ u lele i rie a te zizie omẹ nya.”

13. Eme ọ te via nọ whọ tẹ be rọ ajọwha ru iruo nọ whọ jọ ukoko na wo enẹna? (Ọtausiuwoma Na 2:24)

¹³ Kọ a te kẹ owhẹ uvẹ-iruo efa nọ whọ tẹ be rọ ajọwha ru iruo kpobi nọ whọ jọ ukoko na wo enẹna? O sae jọ ere wọhọ epanọ o via kẹ Nick na. Rekọ o gbẹ make via ere he wọhọ epanọ o jọ kẹ Melissa na, eva e te were owhẹ ziezi ghele keme whọ riẹ nọ whọ be dao ẹgba ra kpobi evaọ ukoko na. (Se Ọtausiuwoma Na 2:24.) Ere ọvo ho, eva e te were owhẹ gaga re inọ oma nọ whọ be dawo evaọ ukoko na o be lẹliẹ eva were Olori mai Jesu Kristi.

14. Eme ma rẹ kareghẹhọ nọ ma tẹ gwọlọ fi utee jọ họ evaọ ukoko na?

¹⁴ Nọ ohwo ọ tẹ be tẹrovi iruo riẹ, kọ u dhesẹ nọ o re gbe roro epanọ o re ro le utee ofa evaọ ukoko na ha? Ijo. Ma sai le itee efa nọ i re fiobọhọ kẹ omai ta usi uwoma ziezi je fiobọhọ kẹ inievo ukoko na. Ma tẹ kareghẹhọ nọ u wo eware jọ nọ ma rẹ sai ru hu, je bi roro epanọ ma sai ro fiobọhọ kẹ amọfa viukpọ omobọ mai ọvo, ma sai le itee yena tobọ.​—Itẹ 11:2; Iruẹru 20:35.

15. Itee vẹ whọ rẹ sai le nọ e te lẹliẹ eva were owhẹ ziezi?

¹⁵ Itee vẹ whọ rẹ sai fihọ kẹ omara? Lẹ se Jihova re o fiobọhọ kẹ owhẹ riẹ itee nọ whọ rẹ sai le tobọ. (Itẹ 16:3; Jem. 1:5) Whọ sai le utee jọ evaọ usu enọ ma fodẹ evaọ  edhe-ẹme ọsosuọ uzoẹme nana, wọhọ ọkobaro obufihọ, ọkobaro oke-kpobi, iruo Ebẹtẹle hayo iruo ebabọ ukoko na. O tẹ lọhọ, whọ sai wuhrẹ ẹvẹrẹ ọfa re whọ sae ta usi uwoma kẹ ahwo ẹvẹrẹ yena. Re whọ gbẹ riẹ kpahe itee nana ziezi, whọ sai se uzoẹme avọ 10 orọ A Koko Omai Họ re Ma Ru Oreva Jihova. Whọ sae jẹ nọ mi ekpako ukoko ra. * Who te bi le itee  nana, a te ruẹ nọ whọ be nyaharo evaọ ukoko na yọ eva e te were owhẹ gaga re.

16. Eme who re ru otẹrọnọ whọ be sai le utee jọ nọ who fihọ tobọ họ?

¹⁶ Kọ otẹrọnọ who fi utee jọ họ evaọ usu enọ ma fodẹ na yọ whọ be sai lei tobọ họ, eme who re ru? Obọ u gbe te aha ehru hu u re te ọrọ otọ, fikiere daoma fi utee ofa họ nọ whọ riẹ nọ whọ rẹ sai le tobọ. Joma ta kpahe ejọ.

17. Wọhọ epanọ o rrọ 1 Timoti 4:13, 15, eme oniọvo-ọmọzae ọ rẹ sai ru re ọ riẹ epanọ a re wuhrẹ ahwo ziezi?

¹⁷ Se 1 Timoti 4:13, 15. Otẹrọnọ whẹ yọ oniọvo-ọmọzae nọ ọ họ-ame no, whọ sai wuhrẹ epanọ a re ru ẹme ziezi je wuhrẹ ahwo ziezi. Fikieme? Keme whọ tẹ “rọ oma kpobi kẹ” isase, ẹme-oruo, gbe ewuhrẹ, ohwo kpobi nọ ọ be gaviezọ o re wo erere no ẹme ra ze. Daoma romatotọ se uwuhrẹ kpobi nọ o rrọ obe Romakẹ Isase Ẹgbede avọ Ewuhrẹ na, who ve je ru oware nọ uwuhrẹ na o ta. Rọ ọjọ muhọ, re who wuhrẹ epanọ a re ro ru ei ziezi, kẹsena who ve ru eware nọ who wuhrẹ na nọ a tẹ kẹ owhẹ ẹme. Whọ sae ta kẹ oniọvo nọ ọ rrọ ọkohrẹ obufihọ evaọ ukoko ra, hayo ekpako ukoko na efa nọ i “bi ru iruo gaga evaọ ẹmeọta gbe amọfa owuhrẹ” re a fiobọhọ kẹ owhẹ. * (1 Tim. 5:17) Who te bi ru ẹme, who roro kpahe epanọ who re ro ru eware nọ whọ jọ uwuhrẹ jọ se ọvo ho, rekọ te epanọ whọ rẹ rọ bọ ẹrọwọ inievo na ga hayo ta ẹme nọ ọ rẹ lẹliẹ ai ru oware nọ u fo. Who te ru enẹ, eva e te were owhẹ gbe ahwo nọ a be gaviezọ kẹ owhẹ ziezi.

18. Eme ma re ru re ma sae riẹ usi uwoma ta ziezi?

¹⁸ Mai kpobi a ta kẹ nọ ma nyae ta usi  uwoma je wuhrẹ ahwo zihe ruọ ilele. (Mat. 28:19, 20; Rom 10:14) Kọ whọ gwọlọ riẹ epanọ a re ru iruo nana nọ i wuzou gaga na ziezi? Daoma se ibroshọ Romakẹ Isase Ẹgbede avọ Ewuhrẹ na, re who je ru eware nọ whọ jariẹ wuhrẹ. Whọ sae ruẹ eware efa nọ i re je fiobọhọ kẹ owhẹ riẹ usi uwoma ta ziezi evaọ Obe Ewuhrẹ Uzuazọ Oleleikristi gbe Usi Uwoma Ota Mai na gbe ividio usi uwoma ota nọ a re dhesẹ evaọ ewuhrẹ udevie-oka na. Hae rọ oghẹrẹ sa-sa ta usi uwoma, re who muẹrohọ onọ o be mae lẹliẹ ahwo gaviezọ kẹ owhẹ. Who te bi ru eware nana, whọ te riẹ usi uwoma ta je wuhrẹ ahwo ziezi, yọ eva e te were owhẹ gaga.​—2 Tim. 4:5.

19. Ẹvẹ whọ sai ro wo iruemu nọ u fo nọ Oleleikristi o re wo?

¹⁹ Whọ tẹ gwọlọ fi utee họ, whọ jọ utee nọ o mai wuzou o thọrọ owhẹ ẹro ho, koyehọ epanọ who re ro wo iruemu nọ u fo nọ Oleleikristi o re wo. (Gal. 5:22, 23; Kọl. 3:12; 2 Pita 1:5-8) Ẹvẹ whọ sai ro ru ei? Ma rehọ iẹe nọ whọ gwọlọ nọ ẹrọwọ ra ọ ga ziezi. Whọ sai se ebe ukoko na nọ e ta kpahe oware nọ ma re ru re ẹrọwọ mai ọ sae jọ gaga. Whọ sai je rri ividio JW Broadcasting^® nọ a jọ dhesẹ inievo nọ i kru ẹrọwọ rai evaọ oke nọ edawọ i te ai. Kẹsena whọ vẹ romatotọ roro kpahe ae, je ru ọkpọ eware nọ a ru.

20. Eme ma re ru re eva e hae were omai ẹsikpobi?

²⁰ Uzẹme riẹ họ, mai kpobi ma gwọlọ ru iruo kẹ Jihova vi epanọ ma be sai ru enẹna. Evaọ akpọ ọkpokpọ na, oware ovo o te whaha omai hi nọ ma gbẹ te sae rọ rehọ ẹgba mai kpobi gọ Jihova ha. Rekọ taure oke yena u te ti te, ma tẹ be rọ ẹgba mai kpobi ru iruo nọ ma rẹ sai ru evaọ ukoko na eva e te were omai, orọnikọ eva e te dha omai hi inọ uvẹ-iruo jọ u bi te omai obọ họ. Maero na, ma te wha orro gbe ujiro se Jihova, “Ọghẹnẹ evawere” mai na. (1 Tim. 1:11) Fikiere, jọ eva e hae were omai fiki iruo nọ ma bi ru evaọ ukoko na.