1. Yehowa a magam hta grau shang lawm lu hkra, masha law law gara hku shakut nga ma ai kun?

 JAHTUM nhtoi ni wa ai hte maren, anhte galaw ra ai bungli ni grai law wa ai. (Mat 24:14; Luk 10:2; 1 Pe 5:2) Anhte yawng gaw, Yehowa a magam hpe dang lu ai daram hpring tup gun mayu ai. Hpunau nauna law law gaw, shanhte a magam hpe maden jat nga ai. Nkau gaw, ningshawng hku nna magam gun na matu myit mada ma ai. Nkau gaw, nawku dawjau lam hte seng ai, uhpung a gawgap bungli hta shang lawm na matu (sh) Behtela hta magam gun na matu, myit mada ma ai. Hpunau law law gaw myitsu salang (sh) magam tau hku nna, atsam hpring wa na matu shakut nga ai. (1 Tm 3:1, 8) Shi amyu masha ni a sharawng awng ai myit jasat hpe mu nna, Yehowa kade daram myit dik nga na! —Shk 110:3; Esa 6:8.

2. Wenyi bandung nkau hpe n lu du ai nga yang, anhte gara hku hkamsha chye ai kun?

² Aten ni na wa tim, anhte a wenyi bandung nkau de garai n du shi ai ngu myit hkrup ai nga yang, myit daw wa chye ai. Asak kaba ai (sh) masa lam nkau a majaw, ahkaw ahkang nkau hpe n mai lu sai nga yang mung myit daw wa chye ai. (Gsh 13:12) Nauna Melisa * mung dai zawn hkamsha wa ai. Shi gaw Behtela hta magam gun na matu (sh) Kabu Gara Shiga Hkaw Tsun Ai Ni A Matu Jawng lung mayu ai. Raitim, shi ndai hku tsun ai: “Ngai asak lai mat sai. Ya gaw nye a matu, dai ahkaw ahkang ni gaw yup mang langai sha rai mat sai. Kalang lang ngai myit daw ai ngu hkamsha ai.”

3. Ahkaw ahkang ni lu la na matu atsam hpring wa hkra hpa galaw ra na kun?

³ Asak naw kaji nna hkam kaja ai nkau gaw, lit ni hpe kahtap na n gun shi yang, atsam ningja nkau hpe madun nna kunghpan ai ni rai ra ai. Shanhte gaw hpaji rawng ra ai, tup hkrak chye galaw ra ai, myit rawt ra ai. Grau myit galu chye na matu, bungli  hpe atsawm chye galaw na matu, hkungga chye na matu sharin la ra chye ai. Nang ra nga ai atsam ningja ni hpe rawt jat hkra laksan hku nna shakut na nga yang, hpunau ni gaw nang n myit mada da ai aten hta lit ni hpe ap ya chye ai. Hpunau Nik a mahkrum madup hpe yu yu ga. Shi asak 20 ning daram hta magam tau hku nna, lit n ap hkrum ai shaloi grai myit daw wa ai. “Ngai hta lama ma ra nga ai majaw rai na re” ngu shi tsun ai. Raitim, Nik asum n jaw ai. Hpaw taw nga ai ahkaw ahkang hpe hpring tup akyu jashawn wa ai. Ya, shi gaw Ginjaw Garan Rung Komiti hpung shang langai hku nna magam gun nga sai.

4. Ndai sumhpa hta gara lam ni hpe bawngban lu na kun?

⁴ Wenyi bandung nkau hpe garai n du shi ai majaw, myit daw nga ai kun? Rai yang, na a myit tsang ai lam ni hpe Yehowa hpe tsun dan u. (Shk 37:5-7) Dai hta n-ga, Karai a magam hta gara hku rawt jat hkra galaw lu ai ngu ai hpaji jaw ga hpe lu na matu, kunghpan ai hpunau ni hpe san nna, shanhte a hpaji jaw ga hte maren kaja htum hkan sa na matu shakut u. Dai hku galaw na nga yang, dai ahkaw ahkang hpe lu la na (sh) dai bandung de du lu na re. Raitim, Melisa zawn sha, nang lu mayu ai ahkaw ahkang hpe ya aten hta n mai lu sai mung byin chye ai. Rai yang, gara hku galaw na? Matut kabu gara hkra gara hku galaw na? Dai ga san a mahtai ni hpe lu na matu (1) Kabu gara lam hpe gara kaw tam mu lu ai lam, (2) Kabu gara lam law htam wa hkra gara hku galaw lu ai lam, (3) Kabu gara lam grau lu wa hkra gara bandung ni hpe jahkrat lu ai lam ngu ai hpe ndai sumhpa hta bawngban mat na re.

5. Kabu gara lam lu na matu hpa hpe myit maju jung ging ai kun? (Hpaji 6:9)

⁵ Hpaji 6:9 hta kabu gara lam lu la hkra, hpa gaw karum ya lu ai hpe sanglang da ai. (Hti u.) Ya aten hta byin nga ai masa zawn re ai “myi e nan mu lu ai akyu” hpe manu shadan ai wa gaw kabu gara lu ai. Raitim, tinang n mai lu ai lam hpe sha matut nna ra marin ai wa gaw galoi mung myit dik nga na n re. Hpa sharin la lu ai kun? Kabu gara lam lu na matu, anhte hta nga ai lam hte gaja wa myit mada mai ai lam hpe sha myit maju jung ging ai.

6. Gara ga shadawn hpe bawngban mat na kun? Hpa hpe myit maju jung mat na kun?

⁶ Nga ai hte sha myit dik nga na matu, gaja wa mai byin ai kun? Masha law malawng gaw n mai byin ai ngu shadu ma ai. Hpa majaw nga yang, lam nnan ni hpe matut nna sharin la mayu ai majaw re. Raitim, dai gaw gaja wa mai byin ai. Tinang hta nga ai hte sha gaja wa kabu gara lu ai. Dai hpe gara hku galaw lu ai kun? Dai hpe chye lu na matu, Mahte 25:14-30 hta mu lu ai Yesu a telen gumhpraw ga shadawn hpe bawngban yu ga. Ya aten hta lu da ai shaman chyeju ni kaw na kabu gara lam hpe gara hku tam lu ai lam hte kabu gara lam law htam wa hkra, gara hku galaw lu ai lam hpe myit maju jung mat na re.

7. Yesu a telen ga shadawn hte seng nna kadun dawk tsun dan u.

⁷ Ga shadawn hta bu hkawm hkyen ai la langai hte seng nna tsun da ai. Garai n hkawm shi yang, shi a mayam ni hpe shaga nna, shanhte langai hpra hpe hpaga galaw na matu, telen gumhpraw jaw da ai. * Shanhte langai hpra a atsam hta hkan nna, langai ngu na mayam hpe telen 5, lahkawng ngu na mayam hpe telen 2, masum ngu na mayam hpe gaw telen langai jaw ai. Shawng nnan na mayam lahkawng gaw, shan lahkawng hpe jaw da ai gumhpraw hte bungli shakut nna galaw ai. Raitim, masum ngu  na mayam gaw shi hpe jaw da ai gumhpraw hte hpa n galaw ai majaw, shi a madu gaw shi hpe bungli kaw na shapraw kau ai.

8. Ga shadawn hta lawm ai shawng nnan na mayam gaw hpa majaw kabu gara lu ai kun?

⁸ Shawng nnan na mayam gaw, telen 5 ap hkrum ai hpe ahkaw ahkang re ngu hkamsha ai. Dai gumhpraw gaw grai law nna, dai gaw shi madu shi hpe kam ai lam madun nga ai. Raitim, lahkawng ngu na mayam gaw taw? Shawng nnan na mayam daram, telen gumhpraw grai law hkra n lu ai majaw myit daw chye ai. Raitim, shi gara hku htang ai kun?

9. Lahkawng ngu na mayam hte seng nna Yesu hpa n tsun ai kun? (Mahte 25:22, 23)

⁹ Mahte 25:22, 23 hpe hti u. Lahkawng ngu na mayam gaw telen gumhpraw 2 hpe sha lu la ai majaw, myit n pyaw ai (sh) myit n dik ai ngu Yesu n tsun wa ai. ‘Ngai lu ai gaw ndai daram sha i? Telen 5 lu ai mayam zawn sha, ngai mung bungli shakut ai re le. Madu gaw ngai hpe dai daram ahkyak n shatai ai nga yang, ndai telen 2 hpe lup tawn da na tinang a matu sha tam sana’ ngu tsun wa ai ngu nna Yesu n tsun wa ai.

10. Lahkawng ngu na mayam gaw shi a telen ni hpe hpa galaw wa ai kun?

¹⁰ Shawng nnan na mayam zawn sha, lahkawng ngu na mayam mung, shi hpe jaw da ai lit hpe ahkyak shatai nna madu a bungli hpe shakut galaw wa ai. Akyu hku nna gaw, madu a telen ni hpe htam lahkawng lu hkra galaw lu wa ai. Dai mayam gaw bungli shakut shaja wa ai majaw shagrau hkrum wa ai. Shi a majaw madu kabu ai sha n-ga, grau nna pyi lit ap na matu gingdan ai ngu dawdan wa ai!

11. Anhte a kabu gara lam hpe gara hku rawt jat hkra galaw lu na kun?

¹¹ Dai zawn sha, Yehowa a magam hta anhte hpe jaw da ai lit hpa hpe raitim, shakut nna galaw na nga yang, kabu gara lam law wa na  re. Hkaw tsun bungli hta myit maju jung nna nawku hpung a galaw ai lam ni hta hpring tup shang lawm u. (Kas 18:5; Heb 10:24, 25) N-gun lu shangun ai mahtai ni hpe jaw lu hkra, zuphpawng ni a matu atsawm hkyen lajang u. Bat lapran zuphpawng ni hta lu la ai, gara jawng ma lit hpe raitim, ahkyak shatai u. Nawku hpung hta bungli langai ngai hpe karum ya na matu hpyi shawng hkrum ai nga yang, tup hkrak galaw nna, kam mai ai wa byin hkra galaw u. Tinang lu da ai lit ni gaw n ahkyak ai, de a matu aten n shama ra ai ngu hkum myit la. Na a atsam ningja ni rawt jat wa hkra galaw u. (Gsh 22:29) Wenyi lam hte lit ni hpe grau shakut magang, tinang mung lawan wan rawt jat wa nna, kabu gara lam mung grau lu magang rai na re. (Gal 6:4) Tinang ra ai lit hpe kaga ni lu la ai shaloi, shanhte hte rau kabu gara na matu mung grau loi wa na re. —Rom 12:15; Gal 5:26.

12. Sakse hkam lahkawng gaw shanhte a kabu gara lam rawt jat hkra, hpa lam galaw wa ai kun?

¹² Behtela hta magam gun mayu ai (sh) Kabu Gara Shiga Hkaw Tsun Ai Ni A Matu Jawng lung mayu ai lam hpe tsun wa ai Melisa hpe bai myit yu ga. Byin mayu ai lam ni n byin wa tim, shi ndai hku tsun ai: “Ningshawng magam hta hpring tup shang lawm lu na matu, hkaw tsun magam hte seng ai magam amyu myu hta shang lawm lu hkra ngai shakut ai. Dai gaw ngai hpe grai kabu gara shangun ai.” Ngut nna, Nik gaw magam tau lit hpe n ap hkrum ai shaloi, shi myit daw wa ai lam hpe gara hku hparan wa ai kun? “Hkaw tsun bungli hta shang lawm ai, Zuphpawng ni hta lachyum nga ai mahtai ni jaw ai hku nna ngai lu mai ai ahkaw ahkang ni hpe myit maju jung ai. Behtela magam hpe mung shawk shawn nna hpang shaning hta dai lit hpe lu la wa ai.”

13. Ya aten lu da ai lit hpe shakut shaja let galaw na nga yang, hpa akyu lu la na kun? (Hpaji 2: 24)

¹³ Ya aten, nang lu da ai lit ni hpe atsawm galaw lu sai nga yang, htawm hpang hta grau kaba ai lit ni hpe hkap la lu na kun? Nik mung dai zawn galaw wa ai. Lama na, dai zawn lit ni n lu ai nga yang mung, Melisa zawn sha kabu gara lam law wa nna, myit dik lam mung lu la wa na re. (Hpaji 2:24 hpe hti u.) Dai hta n-ga, na a shakut sharang ai lam gaw, anhte a madu Yesu Hkristu a ra sharawng ai lam hpe lu la shangun ai hpe chye lu ai majaw mung, kabu gara lam lu la na re.

14. Anhte a wenyi bandung hte seng nna hpa hpe myit hta bang da ra ai kun?

¹⁴ Ya aten lu da ai lit ni hpe myit maju jung ai ngu ai gaw, Yehowa a magam hpe maden jat lu na lam ni hpe n tam ging ai ngu ai lachyum kun? N re. Hpunau nauna ni hpe grau karum lu hkra, hkaw tsun magam hta grau rawt jat lu hkra, anhte hpe karum ya lu ai bandung ni hpe jahkrat ging ai. Hpaji rawng ai hku shagrit shanem let kaga ni hpe karum ya na matu, myit maju jung na nga yang awng dang lu na re. —Gsh 11:2; Kas 20:35.

15. Kabu gara lam law wa hkra karum ya lu ai bandung nkau gaw hpa ni kun?

¹⁵ Tinang a matu hpa bandung jahkrat lu na kun? Tinang gaja wa du lu ai bandung hpe chye lu hkra, Yehowa kaw karum hpyi u. (Gsh 16:3; Yak 1:5) Aten kadun ningshawng (sh) aten galu ningshawng byin lu hkra, Behtela hta magam gun lu hkra (sh) nawku dawjau ai lam hte seng ai gawgap bungli hta shang lawm lu hkra, ngu ai  laika pang langai hta tsun da ai bandung ni kaw na langai hpe du lu hkra shakut lu na kun? Shing nrai, kabu gara shiga chyam bra na matu, maigan amyu ga shaga ai lawk hta hkaw tsun na matu, amyu ga nnan hpe sharin la lu ai masa nang hta nga chye ai. Yehowa A Magam Gun Na Matu Hpawng De Da Ai Lam (BU) ngu ai laika buk a daw 10 hpe hti ai hku nna, nawku hpung hta nga ai myitsu salang ni hte ga shaga ai hku nna, dai bandung ni hte seng ai lam nkau  hpe chye hkra galaw mai ai. * Dai zawn bandung ni hpe shakut ai hte maren, na a rawt jat ai lam mung dandawng wa nna, kabu gara lam mung law wa na re.

16. Laksan bandung langai hpe ya aten n lu du shi ai nga yang, hpa galaw lu ai kun?

¹⁶ Raitim, lahta hta tsun wa sai bandung ni kaw na langai hpe pyi, ya aten n lu du ai nga yang gaw taw? Htap htuk nna nang du dep lu ai kaga bandung langai hpe jahkrat mai ai. Lawu kaw na byin mai ai lam ni hpe myit yu ga.

17. 1 Timohti 4: 13, 15 hta tsun da ai hte maren, hpunau langai gaw grau kaja ai sharin achyin ai masha byin wa hkra, gara hku galaw lu na kun?

¹⁷ 1 Timohti 4:13, 15 hpe hti u. Nang gaw hkalup hkam da ai hpunau rai yang, ga shaga ai hte sharin achyin ai atsam hta rawt jat hkra galaw mai ai. Hpa majaw kun? Hpa majaw nga yang, hti ai, tsun shaga ai lam hte sharin achyin ai lam hta shakut shaja nga ai nga yang, madat nga ai ni akyu lu la na re. Laika Hti Ai Hte Sharin Achyin Ai Lam Hta Shakut Nga U ngu ai laika hta bawngban da ai, ga shaga lu ai atsam langai hpra hpe hkaja na matu, tatut hkan sa na matu bandung jahkrat u. Kalang mi hta atsam ningja langai hpe hkaja nna nta hta shakut nna shaman u. Na a mungga hta dai atsam ningja ni hpe tatut madun lu hkra shakut u. Hpaji jaw ai wa (sh) “mungga hte sharin shaga ai lam” hta shakut shaja nga ai myitsu salang ni kaw na hpaji hpyi u. * (1 Tm 5:17) Dai ladat ni hpe chye na na matu sha n re ai sha, madat nga ai ni a makam masham hpe shangang shakang ya lu na matu (sh) shanhte sharin la wa ai lam ni hpe tatut hkan sa lu hkra shadut ya lu na matu, myit maju jung u. Dai hku galaw na nga yang,  na a kabu gara lam sha n-ga, shanhte a kabu gara lam mung law htam wa na re.

18. Anhte a hkaw tsun magam hta bandung du lu hkra hpa gaw karum ya lu ai kun?

¹⁸ Anhte yawng gaw hkaw tsun ai hte sape shatai ai lit lu da ai. (Mat 28:19, 20; Rom 10:14) Ndai ahkyak dik htum bungli hta na a atsam ningja ni hpe rawt jat hkra, galaw mayu ai kun? Sharin Achyin laika hpe hkaja nna, nang sharin la wa ai lam ni hpe tatut hkan sa na matu bandung jahkrat u. Anhte A Hkristan Prat Hte Magam—Zuphpawng Shaman Laika Buk hte bat lapran zuphpawng ni hta madun ai tsun shaga ladat video ni kaw nna, tatut re ai hpaji jaw ga ni hpe mung nang lu mai ai. Kaja htum gaw hpa re ai hpe tam mu hkra, ladat amyu myu hte shakut yu u. Ndai hpaji jaw ga hpe hkan sa na nga yang, atsam hpring ai Hkristan langai byin wa nna, n dang tsun lu ai kabu gara lam hpe mung lu la na re. —2 Tm 4:5.

19. Hkristan atsam ningja ni rawt jat hkra, nang gara hku galaw mai ai kun?

¹⁹ Tinang a matu bandung ni hpe myit ai shaloi, ahkyak htum re ai Hkristan atsam ningja hpe shalat lu na matu hkum malap u. (Gal 5:22, 23; Kol 3:12; 2 Pe 1:5-8) Gara hku galaw lu na kun? Ga shadawn, na a makam masham hpe shangang shakang mayu na re. Tatut re ai hpaji jaw ga ni lu na matu, anhte a laili laika ni hta lawm ai sumhpa ni hpe hti mai ai. Hpunau nauna ni gaw, makam masham chyam dinglik ai lam amyu myu hkrum ai shaloi, makam masham gara hku ngangkang wa ai hpe madun ai ga shadawn ni hpe JW TV lamang hta yu na nga yang, gaja wa akyu lu la na re. Shanhte a makam masham kaw nna, nang kasi la mai ai lam ni hpe myit yu u.

20. Anhte a kabu gara lam law hkra, myit daw ai lam yawm mat hkra, gara hku galaw lu na kun?

²⁰ Anhte yawng gaw Yehowa a matu, ya aten galaw lu ai hta grau nna galaw mayu ga ai. Karai a Mungkan nnan hta Yehowa a matu hpring tup magam gun lu na re. Ndai laman, anhte galaw lu ai ahkaw ahkang ni hpe akyu jashawn nna, kabu gara lam hpe law hkra galaw lu ai, myit daw ai gara hkamsha lam hpe raitim, yawm hkra galaw lu ai. Ahkyak htum gaw, anhte a “a rawng ai Karai Kasang” Yehowa hpe shakawn shagrau lu na re. (1 Tm 1:11) Dai majaw, anhte hta nga ai ahkaw ahkang ni hta kabu gara lam tam nga ga!