1. Ɛzɩma koobiya sakɩyɛ wɛɛ nɛ pañakɩ pana se pala sakɩyɛ Yehowa tʋmɩyɛ taa nɛ pɩkɩlɩ?

ƐJAÐƐ ɖɩnɛ ɖɩ-tɛm ñɔtɩ kpam nɛ pʋyɔɔ lɛ, ɖɩwɛnɩ tʋma sakɩyɛ se ɖɩlakɩ. (Mat. 24:14; Luka 10:2; 1 Pɩy. 5:2) Ða-tɩŋa payɩ ɖɩsɔɔlaa se ɖɩla ɖo-ɖoŋ ɖeɖe nɛ ɖɩsɛɛ Yehowa. Sakɩyɛ wɛɛ nɛ pawalɩsɩɣ pɔ-tɔm susuu tʋmɩyɛ. Nabɛyɛ liu wɛɛ se pɛkɛ nʋmɔʋ lɩzɩyaa. Lalaa ñɔsɔɔlaa se pala tʋmɩyɛ Betɛɛlɩ yaa paɖʋ nesi nɛ pama kuduyuŋ weyi ɩ-taa palakɩ teokrasɩ tʋma yɔ. Nɛ koobiya abalɩñɩma sakɩyɛ wɛɛ nɛ pañakɩ pana se pamʋna nɛ pɛkɛ ɛgbɛyɛ taa tʋmlaɖaa yaa ɛgbɛyɛ taa ɛzʋtʋyaa. (1 Tim. 3:1, 8) Alɩwaatʋ ndʋ Yehowa naɣ ɛzɩma ɛ-samaɣ haɣ ka-tɩ faaa mbʋ lɛ, pɩkɛdɩɣnɩ-ɩ siŋŋ!—Keɣa 110:3, nwt; Iza. 6:8.

2. Ye ɖɩɩpɩzɩɣ se ɖɩtalɩ fezuu taa kaɖʋsɩ nzɩ ɖɩwɛna yɔ sɩ-taa nasɩyɩ yɔ, ɛzɩma pɩpɩzɩɣ nɛ pɩlabɩ-ɖʋ?

² Ɛlɛ ye alɩwaatʋ sakɩyɛ ɛɖɛwa nɛ ɖɩtɩpɩzɩ nɛ ɖɩtalɩ fezuu taa kaɖʋsɩ nzɩ ɖɩwɛna yɔ sɩ-taa nasɩyɩ yɔ, pɩpɩzɩɣ nɛ pɩpaɣzɩ-ɖʋ tibu yɔɔɔ. Yaa pɩpɩzɩɣ nɛ pitibi-ɖʋ yɔɔɔ ye pɩlaba se ɖa-pɩnzɩ yaa wɛtʋ lɛɛtʋ eyeki se ɖɩtaapɩzɩ nɛ ɖɩwɛɛnɩ wala naayɛ yɔ. (Adu. 13:12) Wɛtʋ ndʋ tɩ-taa Melissa * wɛɛ. Ɛɛsɔɔlaa se ɛla tʋmɩyɛ Betɛɛlɩ yaa ewolo Kewiyaɣ tɔm susuyaa sukuli; ɛlɛ ɛyɔɔdaa se: “Mɛncɛzɩ pɩnzɩ nzɩ pɩpɔzʋʋ se ɛyʋ ɛwɛɛna nɛ paha-ɩ wala ana yɔ. Lɛɛlɛɛyɔ, wala ana apɩsɩ-m ɖoziye tɔm. Nabʋyʋ taa lɛ, pitiki-m yɔɔɔ.”

3. Nɩŋgbanzɩ nzɩ pɩpɩzɩɣ nɛ pɩpɔzɩ se nabɛyɛ ɩkpɛzɩ nɛ papɩzɩ nɛ paha-wɛ wala naayɛ?

³ Piya evelisi nzɩ sɩwɛnɩ tomnaɣ taa alaafɩya yɔ, pɩpɩzɩɣ nɛ pɩpɔzɩ sɩ-taa nasɩyɩ se sɩtasɩ pɩʋ nɛ sɩwɛɛnɩ wɛtʋ kɩbandʋ ndɩ ndɩ pʋcɔ nɛ paha-sɩ wala lɛɛna. Hɔɔlʋʋ nakʋyʋ taa lɛ, sɩ-taa nasɩyɩ pɩzɩɣ nɛ sɩwɛɛ lɛɣtʋ, sɩtɩlɩ lɩmaɣza kpaɣʋ lɛɛ lɛɛ, nɛ sɩsɔɔlɩ tʋmɩyɛ labʋ. Ɛlɛ hɔɔlʋʋ lɛɛkʋ taa lɛ, pɩpɩzɩɣ nɛ pɩpɔzɩ se sɩkpɛlɩkɩ ɛzɩma sɩwɛɛ suuɖu nɛ pɩkɩlɩ yɔ, ɛzɩma  sɩla sɩ-tʋma camɩyɛ nɛ pɩkɩlɩ yɔ, nɛ ɛzɩma sɩña lalaa nɛ pɩkɩlɩ yɔ. Ye ŋñaɣ pana nɛ ŋwɛɛnɩ wɛtʋ kɩbandʋ ndɩ ndɩ ndʋ pɩpɔzɩ-ŋ yɔ, papɩzɩɣ nɛ paha-ŋ wala alɩwaatʋ ndʋ ŋtaaɖʋna yɔ tɩ-yɔɔ. Iyele nɛ ɖɩna Nick kɩɖaʋ. Alɩwaatʋ ndʋ ɛɛwɛnɩ pɩnzɩ 20 yɔ piitibi-i yɔɔɔ siŋŋ, mbʋ pʋyɔɔ yɔ patɩha-ɩ waɖɛ se ɛkɛ ɛgbɛyɛ taa tʋmlaɖʋ. Ɛyɔɔdaa se: “Mamaɣzaɣ se nabʋyʋ ɛɛɖɔŋ mɔ-hɔɔlʋʋ taa camɩyɛ.” Ɛlɛ Nick tɩlɔ lidaʋ. Wala wena ɛtɛm wɛnʋʋ yɔ, ewobi pɩ-yɔɔ nɛ ɛlabɩnɩ-yɛ tʋmɩyɛ camɩyɛ. Sɔnɔ, ɛkɛ Ɛgbɛyɛ piliŋa kɔɔmiite nakʋyʋ taa tʋ.

4. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

⁴ Pitibi-ŋ yɔɔɔ mbʋ pʋyɔɔ yɔ ŋtɩtalɩtɩ fezuu taa kaɖʋwa nakɛyɛ? Ye ɛɛɛ yɔ, pʋbʋ heyi Yehowa ɛzɩma pɩlakɩ-ŋ yɔ. (Keɣa 36:5-7) Pɩtasɩ lɛ, pɔzɩ koobiya abalɩñɩma mba papɩ fezuu taa yɔ lɔŋ tasʋʋ nɛ ŋna mbʋ ŋpɩzɩɣ ŋla nɛ ñɛ-Ɛsɔ sɛtʋ tʋmɩyɛ wɛɛ ɖeu nɛ pɩkɩlɩ yɔ. Pʋwayɩ lɛ, ñaɣ pana nɛ ŋkpaɣ pɔ-lɔŋ tasʋʋ nɛ ŋlabɩnɩ tʋmɩyɛ. Ye ŋlabɩ mbʋ yɔ, ŋpɩzɩɣ nɛ ŋwɛɛnɩ waɖɛ nɖɩ yaa ŋtalɩ kaɖʋwa ŋga. Ɛlɛ ɛzɩ Melissa yɔ, pʋtɔma yɔ lɛɛlɛɛyɔ lɛ, ŋŋpɩzɩɣ nɛ ŋla mbʋ ŋŋsɔɔlaa se ŋla Yehowa sɛtʋ taa yɔ. Ye mbʋ, ɛbɛ ŋpɩzɩɣ ŋla nɛ ŋtaalesi taa leleŋ weyi ŋwɛna yɔ? Pɩsa nɛ ɖicosi tɔm pɔzʋʋ mbʋ pɩ-yɔɔ lɛ, tɔm ñʋʋ kʋnɛ kɩ-taa, ɖɩkaɣ naʋ (1) mbʋ pɩpɩzɩɣ nɛ pɩha-ɖʋ taa leleŋ yɔ, (2) mbʋ ŋpɩzɩɣ ŋla nɛ ŋhiɣ taa leleŋ nɛ pɩkɩlɩ yɔ, nɛ (3) kaɖʋsɩ nzɩ ŋpɩzɩɣ nɛ ŋɖʋ ña-tɩ nɛ pɩsa nɛ ŋhiɣ taa leleŋ nɛ pɩkɩlɩ yɔ.

5. Pɩsa nɛ ɖɩwɛɛ taa leleŋ taa lɛ, ɛbɛ yɔɔ pɩwɛɛ se ɖɩka ɖa-lɩmaɣza? (Eklesɩyastɩ 6:9)

⁵ Ɛzɩ pɔyɔɔdʋʋ Eklesɩyastɩ 6:9 taa yɔ, ɖɩpɩzɩɣ nɛ ɖihiɣ taa leleŋ ye ɖɩñɩnɩ-ɩ lone kɩbanɖɛ taa yɔ. (Kalɩ Eklesɩyastɩ 6:9.) Ɛyʋ weyi ɛkaŋ ɛ-lɩmaɣza ‘mbʋ ɛsa pee naɣ’ yɔ pɩ-yɔɔ yɔ, ɛwɛɣnɩ ɛsɩmɩyɛ mbʋ ɛwɛna yɔ pɩ-yɔɔ; pɩ-taa nabʋyʋ lɛ wɛtʋ ndʋ tɩ-taa ɛwɛ lɛɛlɛɛyɔ yɔ. Ɛlɛ ɛyʋ weyi ɛwɛnɩ falaa kɔɖɛyɩ yɔ, ɛwɛɣ nɛ ɛñɩnɩɣ mbʋ ɛɛpɩzɩɣ nɛ ɛwɛɛna yɔ. Ye mbʋ, ɛbɛ pɩkpɛlɩkɩɣ-ɖʋ? Pɩsa nɛ ɖihiɣ taa leleŋ lɛ, pɩwɛɛ se ɖɩka ɖa-lɩmaɣza mbʋ ɖɩwɛna yɔ pɩ-yɔɔ nɛ ɖɩtaaka ɖa-lɩmaɣza mbʋ ɖɩɩpɩzɩɣ nɛ ɖɩwɛɛna yɔ pɩ-yɔɔ.

6. (a) Eduuye nɖɩ taa ɖɩkaɣ tazʋʋ lɛɛlɛɛyɔ? (b) Nɛ ɛbɛ ɖɩkaɣ kpɛlɩkʋʋ ɖɩ-taa?

⁶ Ɛzɩ toovenim taa lɛ, ɖe-liu pɩzɩɣ nɛ pɩsɩbɩnɩ mbʋ ɖɩtɛm wɛnʋʋ yɔ? Pɩkɛ toovenim se alɩwaatʋ kaaɖɛɣ lɛ, ɖɩñɩnɩɣ se ɖɩla tʋma kɩfana. Paa mbʋ yɔ, ɖe-liu pɩzɩɣ nɛ pɩsɩbɩnɩ mbʋ ɖɩtɛm wɛnʋʋ yɔ. Toovenim taa lɛ, ɖɩpɩzɩɣ nɛ ɖɩnɩɩ leleŋ mbʋ ɖɩtɛm wɛnʋʋ yɔ pɩ-yɔɔ. Ɛzɩma ɖɩpɩzɩɣ nɛ ɖɩla mbʋ? Pɩsa nɛ ɖɩna ɛzɩma ɖɩpɩzɩɣ nɛ ɖɩla yɔ lɛ, iyele nɛ ɖɩtazɩ talaŋwaa eduuye nɖɩ Yesu tuu Maatiyee 25:14-30 taa yɔ ɖɩ-taa. Ðɩkaɣ-ɖʋ sɩnʋʋ nɛ ɖɩna ɛzɩma ɖɩla nɛ ɖihiɣ taa leleŋ wɛtʋ ndʋ tɩ-taa ɖɩwɛ lɛɛlɛɛyɔ yɔ tɩ-taa, nɛ halɩ ɖihiɣ taa leleŋ wɛtʋ ndʋ tɩ-taa nɛ pɩkɩlɩ yɔ.

7. Yɔɔdɩ talaŋwaa eduuye nɖɩ Yesu tuwaa yɔ ɖɩ-tɔm pazɩ.

⁷ Eduuye nɖɩ ɖɩ-taa, abalʋ nɔɔyʋ caɣaɣ ɖɛʋ nʋmɔʋ. Pʋcɔ nɛ ɛɖɛɛ lɛ, ɛya e-yomaa nɛ ɛcɛlɩ pa-taa paa weyi lɛ talaŋwaa se ɛlabɩnɩ tadɩyɛ. * Abalʋ ɛnʋ ɛnawa se mbʋ e-yomaa pɩzɩɣ nɛ pala yɔ, pɩwɛ ndɩ ndɩ; pʋyɔɔ ɛcɛlɩ talaŋwaa kagbanzɩ yom kajalaɣ ñɩnʋ, naalɛ lɛlʋ, nɛ kʋɖʋm tozo tʋ. Yom kajalaɣ ñɩnʋ nɛ naalɛ ñɩnʋ pañaɣ pana nɛ pala tʋmɩyɛ nɛ kpekpeka se pɩsa nɛ pa-caa liidiye huu. Ɛlɛ, yom tozo tʋ tɩlabɩnɩ tʋmɩyɛ liidiye nɖɩ pɛcɛlɩ-ɩ yɔ, nɛ ɛ-caa ɖɔɔnɩ-ɩ ɛ-tʋmɩyɛ taa.

8. Yom kajalaɣ ñɩnʋ weyi pɔyɔɔdɩ ɛ-tɔm eduuye taa yɔ, ɛbɛ yɔɔ ɛ-taa pɩzaɣ se pɩla leleŋ siŋŋ?

⁸ Yom kajalaɣ ñɩnʋ taa kaawɛ leleŋ siŋŋ se  ɛ-caa cɛlɩ-ɩ talaŋwaa kagbanzɩ. Pɩɩkɛ liidiye sɔsɔɖɛ kpem, nɛ pɩwɩlɩɣ se ɛ-caa kaata-ɩ liu siŋŋ. Piyele nɛ yom naalɛ ñɩnʋ yɔ? Pɩpɩzaɣ se pitibi-i yɔɔɔ mbʋ pʋyɔɔ yɔ, patɩcɛlɩ-ɩ talaŋwaa sakɩyɛ ɛzɩ yom kajalaɣ ñɩnʋ yɔ. Ɛlɛ ɛbɛ ɛlaba?

9. Tɔm ndʋ Yesu tɩyɔɔdɩ yom naalɛ ñɩnʋ yɔɔ? (Maatiyee 25:22, 23)

⁹ Kalɩ Maatiyee 25:22, 23. Yesu tɩyɔɔdɩ se yom naalɛ ñɩnʋ mʋ pana nɛ ɛcaɣnɩ ɛ-caa mbʋ pʋyɔɔ yɔ ɛlɛ cɛlɩ-ɩ talaŋwaa naalɛ ɖeke. Nɛ Yesu tɩyɔɔdɩ se yom ɛnʋ ɛwɛɛ nɛ ɛpɩɣyɩɣ nɛ ɛyɔɔdʋʋ se: ‘Pʋnɛ pi-ɖeke man-caa cɛlɩ-m? Ɛbɛ yɔɔ ɛlabɩ mbʋ? Ma ɖɔɖɔ manpɩzɩɣ nɛ mala ɛzɩ yom weyi ɛcɛlɩ-ɩ talaŋwaa kagbanzɩ yɔ! Ye man-caa ɛmaɣzɩɣ se mantɩkɛ tʋmlaɖʋ kɩbanʋ yɔ, pʋbʋ manpɩzɩɣ nɛ menpi talaŋwaa mba pa-naalɛ nɛ mowolo mala ma-maɣmaɣ man-tʋmɩyɛ.’

10. Talaŋwaa mba pɛcɛlɩ yom naalɛ ñɩnʋ yɔ, ɛbɛ ɛlabɩnɩ-wɛ?

¹⁰ Ɛzɩ yom kajalaɣ ñɩnʋ yɔ, yom naalɛ ñɩnʋ nɩ pɩ-taa se tʋmɩyɛ nɖɩ ɛ-caa ɖʋ-ɩ yɔ ɖɩkɛ tʋmɩyɛ nɖɩ ɖɩ-tɔm cɛyaa yɔ, nɛ ɛlabɩ-ɖɩ nɛ kpekpeka. Mbʋ pɩlɩ pɩ-taa yɔ lɛ se talaŋwaa naalɛ pɩsɩ talaŋwaa naanza. Yom ɛnʋ ɛ-caa hɛyɩ-ɩ mbʋ pʋyɔɔ yɔ ɛlabɩ tʋmɩyɛ nɛ kpekpeka. Ɛ-taa labɩ-ɩ nɛ leleŋ siŋŋ nɛ halɩ ɛsɔzɩ-ɩ tʋmɩyɛ!

11. Ɛbɛ ɖɩpɩzɩɣ ɖɩla nɛ ɖihiɣ taa leleŋ nɛ pɩkɩlɩ?

¹¹ Ða ɖɔɖɔ, ye ɖɩkaŋ ñʋʋ nɛ tʋma wena paɖʋʋ-ɖʋ Yehowa sɛtʋ taa yɔ, ɖɩpɩzɩɣ nɛ ɖihiɣ taa leleŋ nɛ pɩkɩlɩ. ‘Ñɛ-ɛsɩyɛ ɛsɛɛnɩ’ tɔm susuu tʋmɩyɛ, nɛ ŋɖʋ nesi ɛgbɛyɛ taa tʋma kiya. (Tʋma 18:5; Ebr. 10:24, 25) Woki kediɣzisi, ñɔɔzɩ-sɩ camɩyɛ nɛ ŋpɩzɩ nɛ ŋcosi  tɔm ndʋ tɩkpazɩɣ koobiya ɖoŋ yɔ. Kpɩtaʋ hɛkʋ taa kediɣzaɣ taa sukulibiya tʋma wena payɩ paɖʋʋ-ŋ yɔ, kpaɣ-yɛ se a-tɔm cɛyaa. Ye pɔpɔzɩ-ŋ se ŋsɩna nɛ pala tʋmɩyɛ naɖɩyɛ ɛgbɛyɛ taa yɔ, labɩ-ɖɩ alɩwaatʋ yɔɔ nɛ ŋwɩlɩ se papɩzɩɣ nɛ pata-ŋ liu. Paa pɩtɩɩkɛ tʋmɩyɛ nɖɩ paɖʋ-ŋ yɔ, taamaɣzɩ se ɖɩ-tɔm tɩcɛyɩ nɛ ɖɩtɩmʋna se ŋkpaɣ ña-alɩwaatʋ ɖɩ-yɔɔ. Ñaɣ pana nɛ ŋwɛɛ niye nɛ pɩkɩlɩ. (Adu. 22:29) Alɩwaatʋ ndʋ ŋkaŋ ñʋʋ nɛ fezuu taa tʋma nɛ tʋma wena paɖʋʋ-ŋ yɔ a-labʋ nɛ pɩkɩlɩ yɔ, ŋkaɣ wobinuu ɛsɩndaa lɛɛ lɛɛ nɛ pɩkɩlɩ; nɛ ŋkaɣ hiɣu taa leleŋ nɛ pɩkɩlɩ. (Gal. 6:4) Pɩtasɩ lɛ, pɩkaɣ-ŋ wɛʋ kɛlɛʋ se ña-taa ɛla leleŋ nɛ ɛyaa lalaa alɩwaatʋ ndʋ pahaɣ-wɛ waɖɛ naɖɩyɛ, nɖɩ ŋŋsɔɔlaa se paha-ŋ yɔ.—Roma 12:15; Gal. 5:26.

12. Ɛbɛ sɩnɩ Melissa nɛ Nick nɛ pehiɣ taa leleŋ nɛ pɩkɩlɩ?

¹² Ŋtɔzʋʋ Melissa weyi ɖɩyɔɔdɩ ɛ-tɔm tayʋʋ 2 taa se ɛɛsɔɔlaa se ɛla tʋmɩyɛ Betɛɛlɩ yaa ewolo Kewiyaɣ tɔm susuyaa sukuli yɔ ɛ-yɔɔ? Paa ɛtaapɩzɩɣ se ɛla mbʋ e-liu wɛɛ yɔ, ɛyɔɔdaa se: “Malabɩ mon-ɖoŋ ɖeɖe ma-nʋmɔʋ lɩzʋʋ tʋmɩyɛ taa nɛ mañaɣ pana nɛ malabɩnɩ tʋmɩyɛ tɔm susuu nʋmɔŋ tɩŋa. Pɩha-m taa leleŋ siŋŋ.” Nɛ alɩwaatʋ ndʋ patɩha waɖɛ Nick se ɛkɛ ɛgbɛyɛ taa tʋmlaɖʋ nɛ pitibi-i yɔɔɔ yɔ, ɛzɩma ɛlʋbɩnɩ wɛtʋ ndʋ? Ɛyɔɔdaa se: “Mankam ma-lɩmaɣza wala wena mɛntɛm wɛnʋʋ yɔ a-yɔɔ, ɛzɩ tɔm susuu tʋmɩyɛ nɛ tɔm yɔɔ cosuu camɩyɛ kediɣzisi taa mbʋ yɔ. Pɩtasɩ lɛ, mañɩɣ niye takayaɣ taa se malakɩ tʋmɩyɛ Betɛɛlɩ nɛ pɩnaɣ ŋga katɩŋ pʋwayɩ yɔ ka-taa, paya-m se mowolo Betɛɛlɩ.”

13. Ye ŋkam ñʋʋ nɛ tʋma wena paɖʋ-ŋ lɛɛlɛɛyɔ yɔ, ɛbɛ kaɣ lɩʋ pɩ-taa? (Eklesɩyastɩ 2:24)

¹³ Ye ŋkam ñʋʋ kiya nɛ tʋma wena paɖʋ-ŋ lɛɛlɛɛyɔ yɔ a-labʋ yɔ, ɛzɩ pakaɣ-ŋ ɖʋʋ tʋma sakɩyɛ cee wayɩ nɛ pɩkɩlɩ? Pɩpɩzɩɣ nɛ pɩla mbʋ, ɛzɩ pɩlabʋ Nick hɔɔlʋʋ taa yɔ. Ɛlɛ ye pɩtɩla mbʋ yɔ, ɛzɩ Melissa yɔ, ŋkaɣ hiɣu taa leleŋ nɛ pɩkɩlɩ, nɛ ŋkaɣ wɛʋ taa leleŋ taa siŋŋ mbʋ ŋwɛɛ nɛ ŋlakɩ Yehowa yɔ pʋyɔɔ. (Kalɩ Eklesɩyastɩ 2:24.) Pɩtasɩ lɛ, ña-taa kaɣ labʋ leleŋ siŋŋ mbʋ pʋyɔɔ yɔ, ŋnawa se ñɔ-tɔm wɛɛ nɛ pɩkɛdɩɣnɩ ɖa-Ñʋʋdʋ Yesu Krɩstʋ.

14. Alɩwaatʋ ndʋ ɖɩmaɣzɩɣ ɖe-fezuu taa kaɖʋsɩ yɔɔ yɔ, tɔm ndʋ yɔɔ pɩwɛɛ se ɖɩtɔzʋʋ tam?

¹⁴ Ye ɖɩkaŋ ñʋʋ nɛ tʋma wena paɖʋ-ɖʋ lɛɛlɛɛyɔ yɔ, pʋ-tɔbʋʋ lɛ se pɩtɩpɔzɩ se ɖɩtasɩ ñɩnʋʋ nʋmɔŋ weyi ɩ-yɔɔ ɖɩtɩŋna nɛ ɖɩwalɩsɩ tʋma wena ɖɩlakɩ Yehowa yɔ yaa we? Aayɩ. Pɩwɛɛ se ɖɩɖʋ ɖa-tɩ kaɖʋsɩ nzɩ sɩsɩɣnɩ-ɖʋ se ɖɩkɛ tɔm susuyaa nɛ wɩlɩyaa kɩbama nɛ pɩkɩlɩ nɛ ɖɩsɩnɩ ɖo-koobiya nɛ pɩkpaɖɩ yɔ. Ðɩkaɣ pɩzʋʋ nɛ ɖɩtalɩ kaɖʋsɩ nzɩ ye ɖɩtɩlɩ ɖo-ɖoŋ kamaɣ nɛ ɖɩkaŋ ɖa-lɩmaɣza ɛzɩma ɖɩsɩnɩ lalaa yɔ pɩ-yɔɔ nɛ ɖɩɩkaŋ-yɛ ɖa-maɣmaɣ ɖɔ-yɔɔ yɔ.—Adu. 11:2; Tʋma 20:35.

15. Kaɖʋsɩ nzɩ sɩpɩzɩɣ nɛ sɩsɩnɩ-ŋ nɛ ŋhiɣ taa leleŋ nɛ pɩkɩlɩ yɔ, sɩ-taa nasɩyɩ lɛ nzɩ?

¹⁵ Kaɖʋsɩ nzɩ ŋpɩzɩɣ nɛ ŋɖʋ ña-tɩ? Pɔzɩ Yehowa se ɛsɩnɩ-ŋ nɛ ŋtɩlɩ kaɖʋsɩ nzɩ ŋpɩzɩɣ ŋɖʋ ña-tɩ nɛ ŋtalɩ yɔ. (Adu. 16:3; Yak. 1:5) Ŋpɩzɩɣ nɛ ŋñaɣ pana se ŋtalɩ kaɖʋsɩ nzɩ pɔyɔɔdɩ sɩ-tɔm tɔm ñʋʋ kʋnɛ kɩ-kajalaɣ tayʋʋ taa yɔ; nzɩ yɔ: Ŋpɩzɩɣ nɛ ŋpɩsɩ nʋmɔʋ lɩzʋʋ sɩnɩyʋ yaa paa ɖooye nʋmɔʋ lɩzɩyʋ, yaa Betɛɛlɩ tʋmlaɖʋ, yaa ŋɖʋ nesi nɛ pama kuduyuŋ weyi ɩ-taa palakɩ teokrasɩ tʋma yɔ. Pɩtɩla yɔ, ŋpɩzɩɣ nɛ ŋkpɛlɩkɩ kʋnʋŋ kɩfalʋʋ nakʋyʋ nɛ pɩsa nɛ ŋwalɩsɩ ñɔ-tɔm susuu tʋmɩyɛ, yaa halɩ ŋsusi tɔm ageeta lɛɛna taa ɛyaa. Ŋpɩzɩɣ nɛ ŋtɩlɩ kaɖʋsɩ nzɩ sɩ-taa nasɩyɩ yɔɔ tɔm ye ŋkalɩ Pɔñɔɔzɩ pa-tɩ se pala Yehowa sɔɔlɩm takayaɣ ñʋʋ 10 nɛ ye ŋpɔzɩ  ñɛ-ɛgbɛyɛ taa ɛzʋtʋyaa yɔ. * Alɩwaatʋ ndʋ ŋñakɩ pana se ŋtalɩ kaɖʋsɩ nzɩ yɔ, ɛyaa lalaa kaɣ naʋ se ŋwɛɛ nɛ ŋwokini ɛsɩndaa nɛ ŋkaɣ hiɣu taa leleŋ nɛ pɩkɩlɩ.

16. Ye alɩwaatʋ tʋnɛ tɩ-taa, ŋŋpɩzɩɣ se ŋtalɩ kaɖʋwa nakɛyɛ yɔ, ɛbɛ ŋpɩzɩɣ nɛ ŋla?

¹⁶ Ye alɩwaatʋ tʋnɛ tɩ-taa, ŋŋpɩzɩɣ se ŋtalɩ kaɖʋsɩ nzɩ ɖɩyɔɔdɩ sɩ-tɔm yɔ sɩ-taa nakɛyɛ yɔ, ɛbɛ ŋpɩzɩɣ nɛ ŋla? Ñaɣ pana nɛ ŋɖʋ ña-tɩ kaɖʋwa ŋga ŋpɩzɩɣ nɛ ŋtalɩ yɔ. Maɣzɩ kaɖʋsɩ nzɩ sɩkɔŋ yɔ sɩ-yɔɔ nɛ ŋna.

17. Ɛzɩ 1 Timootee 4:13, 15 yɔɔdʋʋ yɔ, ɛbɛ koobu abalɩñɩnʋ nɔɔyʋ pɩzɩɣ ɛla nɛ ɛkɛ wɩlɩyʋ kɩbanʋ?

¹⁷ Kalɩ 1 Timootee 4:13, 15. Ye ŋkɛ koobu abalɩñɩnʋ weyi pamɩyɩsɩ-ɩ lɩm yɔ, ŋpɩzɩɣ ŋñaɣ pana nɛ ŋwɛɛ niye tɔm yɔɔdʋʋ nɛ tɔm wɩlʋʋ taa nɛ pɩkɩlɩ. Ɛbɛ yɔɔ? Mbʋ pʋyɔɔ yɔ, ye ŋkam ñʋʋ nɛ tɔm kalʋʋ, tɔm yɔɔdʋʋ, nɛ tɔm wɩlʋʋ yɔ, ŋkaɣ pɩzʋʋ nɛ ŋsɩnɩ ñɔ-tɔm welisiyaa nɛ pɩkɩlɩ. Ñaɣ pana nɛ ŋɖʋ ña-tɩ kaɖʋwa nɛ ŋkpɛlɩkɩ nɛ ŋlabɩnɩ tʋmɩyɛ tɔm yɔɔdʋʋ lɛɣtʋ ndʋ tɩ-taa patazɩ Ka ñʋʋ nɛ tɔm kalʋʋ nɛ tɔm wɩlʋʋ hatʋ cabɩ takayaɣ taa yɔ. Kpɛlɩkɩ tɔm yɔɔdʋʋ lɛɣtʋ ndʋ kʋɖʋm kʋɖʋm, ka ñʋʋ nɛ ŋfalɩsɩɣ ña-tɩ ɖɩɣa, nɛ ñaɣ pana nɛ ŋlabɩnɩ tʋmɩyɛ lɛɣtʋ ndʋ alɩwaatʋ ndʋ ŋwɩlɩɣ tɔm ɛgbɛyɛ taa yɔ. Pɔzɩ lɔŋ tasʋʋ Lɔŋ tasɩyʋ sɩnɩyʋ yaa ɛgbɛyɛ taa ɛzʋtʋyaa lalaa “mba palakɩ tʋmɩyɛ nɛ kpekpeka tɔm yɔɔdʋʋ nɛ tɔm wɩlʋʋ taa yɔ.” * (1 Tim. 5:17) Pɩwɛɛ se ŋñaɣ pana nɛ ŋnɩɩ lɛɣtʋ ndʋ tɩwɛ hatʋ cabɩ takayaɣ ŋga ka-taa yɔ tɩ-taa camɩyɛ, ɛlɛ pɩwɛɛ ɖɔɖɔ se ŋka ñʋʋ nɛ ɛzɩma ŋsɩnɩ ñɔ-tɔm welisiyaa nɛ pakpazɩ pe-tisuu ɖoŋ yɔ nɛ ɛzɩma ŋseɣti-wɛ nɛ palabɩnɩ tʋmɩyɛ  tɔm ndʋ pɛkpɛlɩkɩɣ yɔ. Ye ŋlakɩ mbʋ yɔ, ña nɛ wɛ ɩkaɣ hiɣu taa leleŋ nɛ pɩkɩlɩ.

18. Ɛbɛ pɩzɩɣ pɩsɩnɩ-ɖʋ nɛ ɖɩtalɩ kaɖʋsɩ nzɩ ɖɩɖʋ ɖa-tɩ tɔm susuu taa yɔ?

¹⁸ Paɖʋ ɖa-taa paa weyi lɛ tʋmɩyɛ se esusi tɔm nɛ ɛla ɛyaa nɛ papɩsɩ tɔmkpɛlɩkɩyaa. (Mat. 28:19, 20; Roma 10:14) Ŋsɔɔlaa se ŋwɛɛ niye tʋmɩyɛ kɩcɛyɩyɛ ɖɩnɛ ɖɩ-labʋ taa nɛ pɩkɩlɩ? Kpɛlɩkɩ Ka ñʋʋ nɛ tɔm kalʋʋ nɛ tɔm wɩlʋʋ hatʋ cabɩ takayaɣ, nɛ pʋwayɩ lɛ ŋɖʋ ña-tɩ kaɖʋsɩ nzɩ sɩsɩɣnɩ-ŋ nɛ ŋlabɩnɩ tʋmɩyɛ mbʋ ŋkpɛlɩkaa yɔ. Ŋpɩzɩɣ nɛ ŋna lɔŋ tasʋʋ kɩbam lɛɛbʋ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ—Kpɛlɩkʋʋ takayaɣ nɛ kɛdɛsɩ labʋ tɛ videowaa mba pawɩlɩɣ kpɩtaʋ hɛkʋ taa kediɣzisi taa yɔ pa-taa. Ñaɣ pana nɛ ŋlabɩnɩ lɔŋ tasʋʋ ndɩ ndɩ tʋmɩyɛ nɛ pɩsa nɛ ŋna pɩ-taa mbʋ pɩlakɩ tʋmɩyɛ camɩyɛ nɛ pɩkɩlɩ yɔ. Ye ŋlabɩnɩ tʋmɩyɛ lɔŋ tasʋʋ mbʋ yɔ, pɩtʋʋ fɛyɩ se ŋkaɣ pɩsʋʋ wɩlɩyʋ kɩbanʋ nɛ pɩkaɣ-ŋ haʋ taa leleŋ nɛ pɩkɩlɩ.—2 Tim. 4:5.

19. Ɛbɛ ŋpɩzɩɣ ŋla nɛ ŋwɛɛnɩ wɛtʋ kɩbandʋ ndʋ tɩkɛdɩɣnɩ Ɛsɔ yɔ?

¹⁹ Alɩwaatʋ ndʋ ŋɖʋʋ ña-tɩ kaɖʋsɩ yɔ, taasɔɔ se ŋñaɣ pana nɛ ŋwɛɛnɩ wɛtʋ kɩbandʋ ndʋ tɩkɛdɩɣnɩ Ɛsɔ yɔ. Kaɖʋsɩ nzɩ sɩ-tɔm kɩlɩ cɛyʋʋ yɔ, sɩ-taa nakɛyɛ lɛ. (Gal. 5:22, 23; Kol. 3:12; 2 Pɩy. 1:5-8) Ɛbɛ ŋpɩzɩɣ ŋla nɛ ŋtalɩ kaɖʋwa ŋga? Ðɩkpaɣ se ŋsɔɔlaa se ŋwɛɛnɩ tisuu sɔsɔm. Ŋpɩzɩɣ nɛ ŋkalɩ ɖɛ-ɛgbɛyɛ takayɩsɩ taa tɔm ñʋŋ weyi ɩtasɩɣ lɔŋ kɩbaŋ se pɩsɩnɩ-ŋ nɛ ŋcɛyɩsɩ ñe-tisuu yɔ. Ye ŋcɔŋnɩ JW Tɔm Ðɩyɔɔdɩyɛ^® yɔɔ hɔɔlɩŋ weyi ɩyɔɔdʋʋ ɛzɩma koobiya ndɩ ndɩ wɩlaa se pɛwɛnɩ tisuu siŋŋ alɩwaatʋ ndʋ pakatɩ kala ndɩ ndɩ yɔ, pɩtʋʋ fɛyɛ se pɩkaɣ-ŋ wazʋʋ. Pʋwayɩ lɛ, maɣzɩ nɛ ŋna nʋmɔŋ ndɩ ndɩ weyi ɩ-yɔɔ ŋpɩzɩɣ ŋtɩŋna nɛ ŋmaɣzɩnɩ pe-tisuu ñe-wezuu caɣʋ taa yɔ.

20. Ɛbɛ ɖɩpɩzɩɣ ɖɩla nɛ ɖihiɣ taa leleŋ nɛ pɩkɩlɩ nɛ pɩtaakɩlɩ-ɖʋ tibu yɔɔɔ?

²⁰ Pɩtʋʋ fɛyɩ se ɖa-tɩŋa payɩ ɖɩsɔɔlaa se ɖɩla sakɩyɛ Yehowa sɛtʋ taa nɛ pɩkɩlɩ ɛzɩma ɖɩpɩzɩɣ nɛ ɖɩla lɛɛlɛɛyɔ yɔ. Ɛjaɖɛ kɩfaɖɛ taa lɛ, ɖɩkaɣ pɩzʋʋ nɛ ɖɩsɛɛ-ɩ ɛzɩ pɩpɔzʋʋ yɔ. Pʋcɔ nɛ pɩtalɩ alɩwaatʋ ndʋ lɛ, ye ɖɩlakɩ ɖo-ɖoŋ ɖeɖe mbʋ ɖɩpɩzɩɣ labʋ lɛɛlɛɛyɔ yɔ pɩ-taa yɔ, ɖɩpɩzɩɣ ɖihiɣ taa leleŋ nɛ pɩkɩlɩ nɛ pɩɩkɩlɩɣ-ɖʋ tibu yɔɔɔ. Kɔzɩ kɔzɩ lɛ, ɖɩɖʋʋ ‘ɖɛ-Ɛsɔ koboyaɣ tʋ’ Yehowa hɩɖɛ nɛ ɖɩsamɩ-ɩ. (1 Tim. 1:11) Ye mbʋ, iyele nɛ ɖa-taa la leleŋ nɛ wala wena ɖɩwɛnɩ lɛɛlɛɛyɔ yɔ!