1. Andũ aingĩ mareka atĩa nĩguo matungatĩre Jehova makĩria?

 TŨRĨ na wĩra mũingĩ wa kũruta o ũrĩa mũthia wa thĩ ĩno njũru ũrathiĩ ũkuhĩrĩirie. (Mat. 24:14; Luk. 10:2; 1 Pet. 5:2) Ithuothe twendaga gũtungatĩra Jehova ũrĩa wothe tũngĩhota. Aingĩ aitũ nĩ tũrandandũra ũtungata witũ. Amwe nĩ meriragĩria gũkorũo magĩtungata marĩ mapainia. Angĩ nao nĩ meriragĩria gũtungata Betheli kana wĩra-inĩ wa mĩako ya ithondeka. Nao ariũ a Ithe witũ aingĩ nĩ marerutanĩria nĩguo magĩrĩre gũtuĩka ndungata kana athuri a kĩũngano. (1 Tim. 3:1, 8) No mũhaka akorũo Jehova nĩ akenaga mũno ona andũ ake marĩ na roho ũcio wa kwĩrutĩra.—Thab. 110:3; Isa. 6:8.

2. Kũngĩthiĩ atĩa mũndũ angĩaga gũkinyĩra mĩoroto mĩna ya kĩĩroho?

² O na kũrĩ ũguo, no tũigue tũkuĩte ngoro ihinda inene rĩngĩhĩtũka tũtarĩ tũrakinyĩra mĩoroto itũ ya kĩĩroho. Ningĩ o na no tũkue ngoro tondũ mĩaka itũ kana maũndũ maitũ matiratwĩtĩkĩria kũheo mĩeke mĩna ya ũtungata. (Thim. 13:12) Ũguo nĩguo kũrĩ ũhoro-inĩ wĩgiĩ Melissa. * No ende gũtungata Betheli kana gũthiĩ Cukuru ya Ahunjia a Ũthamaki, no aaugire ũũ: “Mĩaka yakwa nĩ mĩingĩ ndĩngĩnjĩtĩkĩria. Mĩeke ĩyo harĩ niĩ ĩkoragwo ĩhaana iroto. Kũrĩ hĩndĩ njiguaga nguĩte ngoro mũno.”

3. Nĩ makinya marĩkũ andũ amwe mangĩbatara kuoya nĩguo mehokerũo mĩeke mĩna ya ũtungata?

³ Andũ amwe ethĩ na marĩ na ũgima mwega wa mwĩrĩ, no mabatare  gweterera nginya makũrie ngumo itiganĩte nĩguo mehokerũo mĩeke ya ũtungata. Kwa ngerekano, no makorũo na ũũgĩ, ũhoti wa gũtua matua na ihenya, na makorũo mehaarĩirie kũruta wĩra, ĩndĩ no mabatare kwĩruta gũkorũo na wetereri, kũruta wĩra mabacĩrĩire, na gũtĩa andũ arĩa angĩ. Ũngĩrutĩra wĩra ngumo iria ũrabatara gũkũria, no wĩhokerũo mweke wa ũtungata o na ũterĩgĩrĩire. Ta wĩcirie ũhoro wĩgiĩ Nick. Rĩrĩa aarĩ na mĩaka 20, nĩ aaiguire ũũru mũno nĩ ũndũ wa kwaga kwamũrũo atuĩke ndungata ya kĩũngano. Aaugire ũũ: “Ndonaga ta ndĩ na gathĩna.” No Nick ndaakuire ngoro. Nĩ aathiire na mbere kwĩrutanĩria kĩũngano-inĩ na ũtungata-inĩ. Ũmũthĩ atungataga Kamĩtĩ-inĩ ya Wabici ya Rũhonge.

4. Tũkwarĩrĩria maũndũ marĩkũ gĩcunjĩ-inĩ gĩkĩ?

⁴ Hihi nĩ ũiguaga ũkuĩte ngoro nĩ ũndũ wa kwaga gũkinyĩra mweke mũna wa ũtungata? Angĩkorũo nĩ ũiguaga ũguo, menyithagia Jehova ũndũ ũcio. (Thab. 37:5-7) Ningĩ no warie na aarĩ na ariũ a Ithe witũ agimaru kĩĩroho magũteithie ũrĩa ũngĩagagĩria ũtungata waku harĩ Ngai, na wĩrutanĩrie kũhũthĩra maũndũ marĩa megũkwĩra. Gwĩka ũguo no gũgũteithie gũkinyĩra mweke ũcio wĩriragĩria. Ĩndĩ o ta Melissa ũrĩa ũkũgwetetwo hau igũrũ, no kũhoteke ihinda-inĩ rĩrĩ ndũngĩhota gũkinyĩra mweke ũrĩa wĩriragĩria. Ũngĩka atĩa nĩguo ũthiĩ na mbere gũtũũria gĩkeno gĩaku? Nĩguo tuone macokio ma kĩũria kĩu, gĩcunjĩ gĩkĩ nĩ gĩkwarĩrĩria (1) kũrĩa ũngĩona gĩkeno, (2) ũrĩa ũngĩongerera gĩkeno gĩaku, na (3) mĩoroto ĩrĩa ũngĩĩigĩra ĩgũteithie kũgĩa na gĩkeno makĩria.

5. Twagĩrĩirũo kũiga meciria maitũ harĩ maũndũ marĩkũ nĩguo tũkorũo na gĩkeno? (Kohelethu 6:9)

⁵ O ta ũrĩa Kohelethu 6:9 yonanĩtie, no tuone gĩkeno tũngĩgĩetha handũ harĩa hagĩrĩire. (Thoma.) Mũndũ ũrĩa ũkenagĩra “kĩrĩa maitho make marona” nĩ aiganagĩra na maũndũ marĩa arĩ namo. Ngũrani na ũguo, mũndũ ũrũraga agĩthingata merirĩria make aikaraga akĩĩriragĩria kĩndũ atangĩhota kwĩgĩĩra nakĩo. Tũreruta atĩa? Nĩguo tũkorũo na gĩkeno twagĩrĩirũo kũiga meciria maitũ harĩ maũndũ marĩa tũrĩ namo na maũndũ marĩa tũngĩhota gũkinyĩra.

6. Tũkwarĩrĩria ngerekano ĩrĩkũ, na ĩgũtũteithia kwĩruta maũndũ marĩkũ?

⁶ Hihi no kũhoteke mũndũ aiganĩre na maũndũ marĩa arĩ namo? Andũ aingĩ meciragia atĩ gũtingĩhoteka tondũ nĩ twendaga gũikara tũkĩgeragia maũndũ merũ, ĩndĩ ũrĩa kũrĩ nĩ atĩ no kũhoteke. No tũhote gũkenera maũndũ marĩa tũrĩ namo ihinda-inĩ rĩrĩ. Nĩ kĩĩ kĩngĩtũteithia gwĩka ũguo? Nĩguo tuone macokio, rekei twarĩrĩrie ngerekano ya Jesu ĩgiĩ taranda ĩrĩa ĩrĩ thĩinĩ wa Mathayo 25:14-30. Nĩ tũkwĩruta ũrĩa tũngĩgĩa na gĩkeno, na ũrĩa tũngĩongerera gĩkeno gitũ maũndũ-inĩ marĩa tũrĩ namo ihinda-inĩ rĩrĩ.

7. Taarĩria na njĩra nguhĩ ngerekano ya Jesu ĩgiĩ taranda.

⁷ Thĩinĩ wa ngerekano ĩyo, nĩ harĩ mũndũ wendaga gũthiĩ thabarĩ. Atanathiĩ nĩ eetire ngombo ciake na akĩhe o ĩmwe yacio taranda nĩguo cionjorithie. * Tondũ nĩ aamenyaga atĩ ngombo icio ciarĩ na ũhoti ũtiganĩte, aaheire ngombo ya mbere taranda ithano, ya kerĩ akĩmĩhe igĩrĩ, na ya gatatũ akĩmĩhe ĩmwe. Ngombo cia mbere igĩrĩ nĩ cierutanĩirie mũno kuonjorithia taranda iria ciaheirũo. No ngombo ya gatatũ ndĩoonjorithirie mbeca iria yaheetwo, na kwoguo mwathi wayo akĩmĩingata.

8. Nĩ kĩĩ kĩngĩatũmire ngombo ya mbere ngerekano-inĩ ĩyo ĩkorũo na gĩkeno?

 ⁸ No mũhaka akorũo ngombo ya mbere nĩ yakenire mũno nĩ kũheo taranda ithano nĩ mwathi wayo. Icio ciarĩ mbeca nyingĩ mũno, na ũndũ ũcio woonanirie atĩ mwathi wayo nĩ aamĩhokete mũno. Ĩ nayo ngombo ya kerĩ? Nĩ ĩngĩakuire ngoro tondũ ndĩaheirũo taranda nyingĩ ta iria ngombo ya mbere yaheetwo. No yekire atĩa?

9. Nĩ maũndũ marĩkũ Jesu ataugire megiĩ ngombo ya kerĩ? (Mathayo 25:22, 23)

⁹ Thoma Mathayo 25:22, 23. Jesu ndaugire atĩ ngombo ya kerĩ nĩ yarakarire kana ĩkĩiga muku nĩ ũndũ wa kwamũkĩra taranda igĩrĩ tu. Ningĩ Jesu ndaugire atĩ ngombo ĩyo nĩ yatetire ĩkiuga ũũ: ‘Ici nocio ndaheo? Na githĩ o na niĩ to hote kuonjorithia taranda ithano ta ngombo ĩyo ĩngĩ? Angĩkorũo mwathi wakwa nĩ aranjĩkĩrĩra nganja-rĩ, o na niĩ nĩ gũthika ngũthika taranda ici igĩrĩ na thingate maũndũ makwa.’

10. Nĩ ũndũ ũrĩkũ ngombo ya kerĩ yekire na taranda ciayo?

¹⁰ O ta ngombo ya mbere, ngombo ĩyo ya kerĩ nĩ yoire na ũritũ wĩra ũrĩa yaheetwo na ĩgĩkĩra kĩyo mũno gũtungatĩra mwathi wayo. Yoonjorithirie taranda igĩrĩ iria yaheetwo igĩtuĩka inya. Nĩ yarathimirũo na njĩra nene nĩ ũndũ wa kĩyo kĩayo. Mwathi wayo nĩ aakenire mũno na akiuga atĩ nĩ yagĩrĩirũo kwĩhokerũo maũndũ makĩria.

11. Tũngĩongerera gĩkeno gitũ atĩa?

¹¹ Ũndũ ũmwe na ũcio, o na ithuĩ no tuongerere gĩkeno gitũ na njĩra ya kwĩrutanĩria wĩra-inĩ o wothe tũheetwo ũtungata-inĩ  wa Jehova. Koragwo na kĩyo wĩra-inĩ wa kũhunjia na ũkerutanĩria biũ kĩũngano-inĩ. (Atũm. 18:5; Ahib. 10:24, 25) Rĩrĩa ũrathiĩ mĩcemanio, wĩhaaragĩrie wega nĩguo ũkahota kũruta macokio ma gwaka andũ arĩa angĩ. Oyaga na ũritũ gacunjĩ ka mũrutwo karĩa waheo thĩinĩ wa mũcemanio wa gatagatĩ-inĩ ga kiumia. Na angĩkorũo nĩ waheo wĩra mũna thĩinĩ wa kĩũngano, tigagĩrĩra nĩ waũhingia ihinda-inĩ rĩrĩa rĩagĩrĩire. Ndũkonage ta wĩra mũna waheo ta arĩ wa gũgũtera mathaa. Wĩrutanagĩrie kwagagĩria ũhoti waku wa gwĩka maũndũ. (Thim. 22:29) O ũrĩa ũkwĩrutanĩria maũndũ-inĩ marĩa wĩhokeirũo, noguo ũgũkũra kĩĩroho na wongerere gĩkeno gĩaku. (Gal. 6:4) Ningĩ nĩ ũrĩonaga ũrĩ ũndũ mũhũthũ gũkena hamwe na arĩa maheo mĩeke ĩrĩa o nawe ũngĩenda kwĩhokerũo.—Rom. 12:15; Gal. 5:26.

12. Nĩ makinya marĩkũ Aira a Jehova erĩ mooire nĩguo mongerere gĩkeno kĩao?

¹² Hihi nĩ ũraririkana mwarĩ wa Ithe witũ Melissa ũrĩa ũkugĩte atĩ nĩ eriragĩria gũtungata Betheli kana gũthiĩ Cukuru ya Ahunjia a Ũthamaki? O na gũtuĩka ndangĩhota gũkinyĩra mĩeke ĩyo, aaugire ũũ: “Nĩ ndĩrutanagĩria mũno ũtungata-inĩ wa ũpainia, na kũhũthĩra njĩra nyingĩ itiganĩte cia kũhunjia. Ũndũ ũcio nĩ ũtũmĩte ngĩe na gĩkeno kĩnene.” Nake Nick nĩ kĩĩ kĩamũteithirie kwaga gũkua ngoro nĩ ũndũ wa kwaga kwamũrũo arĩ ndungata ya kĩũngano? Aaugire ũũ: “Ndaigire meciria makwa harĩ maũndũ marĩa ingĩahotire kũhingia, ta kũnyitanĩra ũtungata-inĩ na kũruta macokio ma gwaka mĩcemanio-inĩ. Ningĩ nĩ ndaiyũririe fomu ya ũtungata wa Betheli na ngĩtwo mwaka ũrĩa warũmĩrĩire.”

13. Maumĩrĩra mangĩkorũo marĩ marĩkũ ũngĩĩrutanĩria mĩeke-inĩ ĩrĩa ũrĩ nayo mahinda-inĩ maya? (Kohelethu 2:24)

¹³ Hihi ũngĩĩrutanĩria mĩeke-inĩ ĩrĩa ũrĩ nayo mahinda-inĩ maya-rĩ, no wĩhokerũo mĩeke ĩngĩ makĩria mahinda marĩa maroka? Ũndũ ũcio no wĩkĩke o ta ũrĩa gwathiire harĩ Nick. No angĩkorũo ndũkwĩhokerũo o ta Melissa, gĩkeno gĩaku no kĩongerereke na ũiganĩre nĩ ũndũ wa maũndũ marĩa ũrahota kũhingia. (Thoma Kohelethu 2:24.) Makĩria ma ũguo, nĩ ũrĩkoragwo na gĩkeno kĩnene nĩ kũmenya atĩ kĩyo gĩaku nĩ gĩkenagia Mwathi witũ, Jesu Kristo.

14. Nĩ ũndũ ũrĩkũ twagĩrĩirũo kũririkana ũhoro-inĩ wĩgiĩ mĩoroto ĩrĩa tũreigĩra ũtungata-inĩ wa Jehova?

¹⁴ Hihi kũiga meciria maitũ mĩeke-inĩ ĩrĩa twĩhokeirũo ihinda-inĩ rĩrĩ nĩ kuuga tũtige gwĩciria ũrĩa tũngĩongerera ũtungata witũ harĩ Jehova? Aca. Nĩ twagĩrĩirũo kwĩigĩra mĩoroto ya kĩĩroho ĩngĩtũteithia gũthiĩ na mbere gũkorũo na maumĩrĩra mega ũtungata-inĩ, na ĩtũteithie gũthiĩ na mbere gũteithia aarĩ na ariũ a Ithe witũ. No tũkinyĩre mĩeke ĩyo tũngĩiga meciria maitũ harĩ gũtungata andũ arĩa angĩ handũ ha kwĩĩciria ithuĩ ene.—Thim. 11:2; Atũm. 20:35.

15. Nĩ mĩoroto ta ĩrĩkũ ũngĩĩigĩra ĩgũteithie kuongerera gĩkeno gĩaku?

¹⁵ Nĩ mĩoroto ta ĩrĩkũ ũngĩĩigĩra? Hoya Jehova agũteithie kũmenya nĩ mĩoroto ta ĩrĩkũ ũngĩhota gũkinyĩra. (Thim. 16:3; Jak. 1:5) Hihi no wĩigĩre muoroto ũmwe harĩ ĩrĩa ĩkũgwetetwo  kĩbungo-inĩ kĩa mbere, ta gũtuĩka painia wa gũteithĩrĩria kana wa mahinda mothe, gũtungata Betheli kana mawĩra-inĩ ma mĩako ya ithondeka? Ningĩ no gũkorũo no ũhote kwĩruta rũthiomi rũngĩ kana ũthiĩ kũndũ kũngĩ ũkahunjie ũhoro ũrĩa mwega. Nĩguo ũmenye maũndũ marĩa ũrabatara gwĩka nĩguo ũkinyĩre mĩoroto ĩyo, no ũthome gĩcunjĩ gĩa 10 kĩa ibuku rĩa Ithondeka Rĩrĩa Rĩkaga Wendi wa Jehova na waranĩrie na athuri  a kĩũngano kĩanyu. * Ũngĩĩrutanĩria gũkinyĩra mĩoroto ĩyo, andũ arĩa angĩ nĩ marĩonaga kĩyo gĩaku na gĩkeno gĩaku nĩ kĩrĩongererekaga.

16. Ũngĩka atĩa angĩkorũo ihinda-inĩ rĩrĩ ndũngĩhota gũkinyĩra muoroto mũna wa kĩĩroho?

¹⁶ Ũngĩka atĩa angĩkorũo ihinda-inĩ rĩrĩ ndũngĩhota gũkinyĩra mĩeke ta ĩyo yagwetwo? No wĩigĩre muoroto ũngĩ ũrĩa ũngĩhota gũkinyĩra. Rekei twĩcirie ũhoro wĩgiĩ mĩoroto ĩigana ũna tũngĩĩigĩra.

17. Kũringana na 1 Timotheo 4:13, 15, mũrũ wa Ithe witũ angĩka atĩa nĩguo atuĩke mwarimũ mwega makĩria?

¹⁷ Thoma 1 Timotheo 4:13, 15. Angĩkorũo ũrĩ mũrũ wa Ithe witũ mũbatithie, no wĩigĩre muoroto wa kwagagĩria ũhoti waku wa kwaria na kũrutana. Nĩkĩ? Tondũ ‘ũngĩrikĩra’ ũhoro-inĩ wĩgiĩ kwaria, gũthoma, na kũrutana, nĩ ũrĩhotaga gũteithia na njĩra nene andũ arĩa ũrathomithia. Wĩigĩre muoroto wa kwĩruta na kũhũthĩra mathomo mothe marĩrĩirio thĩinĩ wa broshua ya Wĩrutanĩrie Gũthoma na Kũrutana. Wĩrutage ngumo ĩmwe thutha wa ĩrĩa ĩngĩ, ũkemenyeria ngumo ĩyo ũrĩ mũciĩ, na ũkerutanĩria kũmĩhũthĩra rĩrĩa ũraruta tũcunjĩ twaku. No ũhoe ũtaaro kuuma kũrĩ mũtaarani wa gũteithĩrĩria kana athuri angĩ a kĩũngano “arĩa merutanagĩria ũhoro-inĩ wĩgiĩ kwaria na kũrutana.” * (1 Tim. 5:17) Ndũkaigage meciria maku o harĩ ngumo ĩrĩa ũrarutĩra wĩra, no ningĩ wĩcirie ũrĩa ũngĩteithia athikĩrĩria aku gwĩkĩra wĩtĩkio wao hinya kana ũrĩa ũngĩmateithia kũhũthĩra maũndũ marĩa mareruta. Weka ũguo nĩ ũrĩkoragwo na gĩkeno makĩria,  na ũkamateithia o nao gũkorũo na gĩkeno makĩria.

18. Nĩ maũndũ marĩkũ mangĩtũteithia gũkinyĩra mĩoroto itũ wĩra-inĩ wa kũhunjia?

¹⁸ Ithuothe nĩ tũheetwo wĩra wa kũhunjia na gũtua andũ arutwo. (Mat. 28:19, 20; Rom. 10:14) Hihi no wende kwagagĩria ũhoti waku wĩra-inĩ ũcio wa bata? Wĩrutage broshua ya Gũthoma na Kũrutana, na wĩigĩre mĩoroto ĩngĩgũteithia kũhũthĩra maũndũ marĩa ũreruta. No wone ũhoro makĩria ũngĩgũteithia thĩinĩ wa Kabuku ka Mũcemanio wa Ũtũũro na Ũtungata na video-inĩ cia gũteereta na mũndũ ũtungata-inĩ iria cionanagio mũcemanio-inĩ wa gatagatĩ ga kiumia. No ũgerie njĩra itiganĩte cia kũhunjia na kũrutana nĩguo wone nĩ njĩra ĩrĩkũ ĩrakwagĩrĩra makĩria. Werutanĩria gwĩka ũguo, nĩ ũgũkorũo ũrĩ mũrutani mwega makĩria na ũgĩe na gĩkeno kĩnene.—2 Tim. 4:5.

19. Ũngĩka atĩa nĩguo ũkũrie ngumo cia Gĩkristiano?

¹⁹ Rĩrĩa ũreigĩra mĩoroto, ririkanaga atĩ muoroto ũrĩa wa bata mũno ũngĩĩigĩra nĩ wa gũkũria ngumo cia Gĩkristiano. (Gal. 5:22, 23; Kol. 3:12; 2 Pet. 1:5-8) Ũngĩka atĩa nĩguo ũkinyĩre muoroto ũcio? Kwa ngerekano, ta tua ũrenda gũkũria wĩtĩkio mũrũmu. No ũthome icunjĩ thĩinĩ wa mabuku maitũ iria cionanĩtie ũrĩa mũndũ angĩka nĩguo ekĩre hinya wĩtĩkio wake. No ũgunĩke kuumana na kwĩrorera icunjĩ cia JW Broadcasting^® iria cionanagia ũrĩa aarĩ na ariũ a Ithe witũ monanĩtie wĩtĩkio mũnene rĩrĩa marahiũrania na magerio matiganĩte. Ũcoke wĩcũranie ũrĩa ũngĩĩgerekania na wĩtĩkio wao ũtũũro-inĩ waku.

20. Tũngĩka atĩa tuongerere gĩkeno gitũ na twĩtheme gũkua ngoro?

²⁰ Hatarĩ nganja, ithuothe nĩ twĩriragĩria gũkorũo na maũndũ maingĩ ma gwĩka ũtungata-inĩ wa Jehova gũkĩra marĩa tũreka ihinda-inĩ rĩrĩ. Thĩinĩ wa thĩ njerũ ya Ngai nĩ tũkahota kũmũtungatĩra na njĩra nginyanĩru. No ihinda-inĩ rĩrĩ tũngĩĩrutanĩria ũrĩa wothe tũngĩhota mĩeke-inĩ ĩrĩa tũrĩ nayo, no tũkorũo na gĩkeno makĩria na twĩtheme gũkua ngoro. Na ũndũ wa bata makĩria, nĩ tũrĩtĩithagia na tũkagoocithia Jehova, ‘Ngai witũ mũkeni.’ (1 Tim. 1:11) Nĩ ũndũ ũcio, nĩ tũkenagĩrei mĩeke ĩrĩa tũrĩ nayo!