1. Vahapu ohave linyenge ngahelipi komhumbwe oyo i li moukalele?

 OTU na oilonga ihapu oyo tu na okulonga, eshi exulilo lounyuni ou tali ende tali ehene popepi. (Mat. 24:14; Luk. 10:2; 1 Pet. 5:2) Atusheni otwa hala okulongela Jehova ngaashi hatu dulu. Vahapu ova tamununa mo oukalele wavo. Vamwe ova hala okuninga ovakokolindjila. Vamwe ova hala oku ka longa kObetel, ile okukufa ombinga moilonga yokutunga nokuwapekulula omatungo ehangano. Ofimbo ovamwatate vahapu otava longo noudiinini, opo va kale va wana okunangekwa po ve li ovayakuliongalo, ile ovakulunhuongalo. (1 Tim. 3:1, 8) Jehova iha kala tuu a hafa, ngeenge ta tale ovapiya vaye tava ningi ngaashi tava dulu, opo ve mu longele! — Eps. 110:3; Jes. 6:8.

2. Ohatu kala tu udite ngahelipi, ngeenge inatu hanga omalalakano etu amwe opamhepo?

² Otashi dulika tu kale twa teka omukumo, ile twa polimana, ngeenge opa pita oule wefimbo inatu hanga omalalakano etu opamhepo, oo twe litulila po. Otashi dulika tu kale twa teka omukumo, molwaashi itatu dulu okulonga shihapu moilonga yaJehova, shaashi tu na eedula dihapu, ile pe na omangabeko onhumba, ile ongadi. (Omayel. 13:12) Osho osha faafana nonghalo yaMelissa. * Okwa li a hala oku ka longa kObetel, ile okuya kOfikola yOvaudifi vOuhamba. Ndele okwa ti: “Eedula dange oda koyelela pwaado da teelelika. Omaufembanghenda a tya ngaho, paife oku li ashike ondjodi kwaame. Omafimbo amwe, ohandi kala nda teka omukumo.”

3. Ovo va hala okupewa oinakuwanifwa yonhumba, eenghatu dilipi va pumbwa okukatuka?

³ Vamwe ovo ve li ovanyasha nove na oukolele, otashi dulika va pumbwa okukula pamhepo nokukulika omaukwatya onhumba, opo va kale va wana okupewa oinakuwanifwa ya wedwa po. Ngaashi pashihopaenenwa, vamwe otashi dulika ovanaendunge, hava ningi oinima meendelelo nove na ondjungu. Ashike otashi dulika  va pumbwa okulihonga okukala ovalididimiki, hava longo oilonga noukeka nokukala va fimaneka ovanhu vakwao. Ngeenge owa ningi eenghendabala da mana mo, opo u kulike omaukwatya oo, ovamwatate otave ke ku pa oshinakuwanifwa, pefimbo opo ino shi teelela. Natu ka taleni koshimoniwa shaNick. Eshi a li e na omido 20, okwa li a nyemata, molwaashi ina nangekwa po e li omuyakuliongalo. Okwa ti: “Onda li nda mona kutya ondi na oupyakadi.” Ndele nande ongaho, Nick ka li a sholola. Okwa li ha longo noudiinini meongalo nosho yo moukalele. Kunena, oku li oshilyo shOkomitiye yOshitaimbelewa.

4. Oshike hatu ka kundafana moshitukulwa eshi?

⁴ Mbela owa teka omukumo, molwaashi ino hanga elalakano lonhumba lopamhepo, olo we litulila po? Ngeenge osho, lombwela Jehova osho to lipula nasho. (Eps. 37:5-7) Shikwao vali, pula omaetepo kovamwatate, ovo va pyokoka pamhepo, ve ku kwafele apa wa pumbwa okuxwepopala moilonga yaJehova nokukendabala okutula moilonga omayele avo. Ngeenge owa ningi ngaho, oto ka hanga elalakano olo we litulila po. Ndele ngaashi Melissa, oo a tumbulwa pehovelo, otashi dulika ito dulu okuhanga omalalakano, oo we litulila po, omolwomatomheno onhumba, ile ongadi. Ndele mbela ongahelipi to dulu okukaleka po ehafo loye? Ohatu ka mona enyamukulo moshitukulwa eshi, eshi hatu ka kundafana oitwa tai shikula (1) apa hatu dulu okuhanga ehafo, (2) nghee hatu dulu okuhapupalifa ehafo letu nosho yo (3) omalalakano oo hatu dulu okulitula po, opo tu wede ko kehafo letu.

5. Oshike tu na okuyandja elitulemo kusho, opo tu kale twa hafa? (Omuudifi 6:9)

⁵ Omuudifi 6:9, okwa yelifa osho tashi dulu oku tu kwafela tu kale twa hafa. (Lesha.) Omunhu oo ha yandje elitulemo kwaasho ‘e wete nomesho’ oha kala a a wanenwa kwaasho e na. Mepingafano naasho, omunhu oo ha kala ashike ta yandje elitulemo koinima oyo ita dulu okumona iha kala a wanenwa nandenande. Ndele mbela osho otashi tu hongo shike? Opo tu kale twa hafa, otwa pumbwa okuyandja elitulemo koinima oyo tu na, nokuhenuka okuyandja elitulemo koinima, ile komalalakano oo itatu dulu okuhanga.

6. Efaneko lilipi hatu ka kundafana paife, noshike hatu ke lihonga mulo?

⁶ Mbela otashi shiiva ngoo okukala wa wanenwa kwaasho u na nale? Ovanhu vahapu ohava ti kutya itashi shiiva, molwaashi otu hole okulihonga oinima ipe. Ashike otashi shiiva okukala wa wanenwa kwaasho u na. Ohatu dulu okuhafela oinima oyo tu ‘wete nomesho.’ Ongahelipi hatu dulu okuninga ngaho? Opo tu mone enyamukulo, natu ka kundafaneni efaneko laJesus li na sha noitalenti, olo tali hangwa muMateus 25:14-30. Ohatu ke lihonga nghee hatu dulu okukala twa hafa nanghee hatu dulu okuweda ko kehafo letu, she likolelela komanangeko noupuna oo tu na paife.

7. Ngonga pauxupi efaneko laJesus li na sha noitalenti.

⁷ Mefaneko olo, omulumenhu okwa li e li pokuya molweendo. Ofimbo ina ya, okwa ifana ovapiya vaye, ndele keshe umwe te mu pe oitalenti, * opo e ke i landakanife. Molwaashi omulumenhu oo okwa li e shii kutya ovapiya vaye ove na okudula kwa yoolokafana, umwe okwe mu pa oitalenti itano, mukwao oitalenti ivali, naau waxuuninwa okwe mu pa oshitalenti shimwe. Ovapiya vavali votete ova longa noudiinini, opo va monene mo omwene wavo oishoshela ihapu. Ashike omupiya omutitatu oshitalenti osho ine shi longifa sha, nomwene waye okwa li e mu taataa mo moilonga.

8. Omolwashike tashi dulika omupiya wotete womefaneko a li a hafa unene?

⁸ Omupiya wotete oku na okukala a li a hafela  oufembanghenda wokukala e lineekelelwa oitalenti itano yomwene waye. Oya li oimaliwa ihapu, naasho otashi ulike kutya omwene waye okwe mu lineekela neenghono adishe. Ndele ongahelipi shi na sha nomupiya omutivali? Okwa li ta dulu okukala a teka omukumo, molwaashi ina pewa oitalenti ihapu, i fike pwaayo yomupiya wotete. Ndele omupiya oo okwa li e linyenga ngahelipi?

9. Oshike Jesus ina popya shi na sha nomupiya omutivali? (Mateus 25:22, 23)

⁹ Lesha Mateus 25:22, 23. Jesus ina popya kutya omupiya omutivali okwa li a uda nai, ile a handuka, molwaashi ashike a pewa oitalenti ivali. Natango, Jesus ina popya kutya omupiya oo okwa li ta ngongota, ta ti: ‘Onda pewa ashike oitalenti inini? Omolwashike nee, ngeenge naame ohandi longo noudiinini nda fa omupiya, oo a pewa oitalenti itatu? Ngeenge omwene wange ina pandula oilonga yange, ohandi ka fudika ashike oitalenti yaye ivali, ndele handi mweneke omwenyo wange.’

10. Oshike omupiya omutivali a ninga shi na sha noitalenti yaye?

¹⁰ Ngaashi omupiya wotete, omupiya omutivali naye okwa li a tala ko oshinakuwanifwa shaye sha kwata moiti. Okwa li a longa noudiinini, opo a monene omwene waye oimaliwa ya wedwa po. Oshidjemo? Oitalenti yomwene waye oya li ya hapupala lwomapa avali. Omwene okwa li a pa ondjabi omupiya oo omolwoilonga yaye youdiinini. Omwene waye ka li ashike a hafa, ndele okwa li yo e mu lineekelela oinakuwanifwa imwe ya wedwa po.

11. Ongahelipi hatu dulu okuhapupalifa ehafo letu?

¹¹ Sha faafana, nafye ohatu ka hapupalifa ehalo letu, ngeenge otwa kala hatu longo noudiinini oshilonga keshe hatu pewa moilonga yaJehova.  Kala ho ‘longo nouladi’ moilonga yokuudifa nosho yo oilonga oyo to pewa meongalo. (Oil. 18:5; Heb. 10:24, 25) Kala ho lilongekida komesho yefimbo, opo u ka dule okuyandja omatyekosha taa ti sha pokwoongala. Kala ho tale ko oipopiwa yovanafikola i li oshinakuwanifwa sha fimana, oyo hai yandjwa pokwoongala kwomokati koshivike. Ngeenge owa lombwelwa u kwafele moshinima shonhumba meongalo, kala ho shi longo pefimbo nonoudiinini. Ino kala wa dina oshinakuwanifwa osho to pewa, u wete kutya osha fa ngeno tashi mane po efimbo loye. Kendabala okuxwepopaleka ounghulungu woye. (Omayel. 22:29) Ngeenge owa kala ho longele Jehova noudiinini, oto ka kala kaume kaye kopofingo noto ka kala wa hafa shi dulife nale. (Gal. 6:4) Natango, otashi ka kala shipu kwoove okuhafela pamwe naavo va pewa oshinakuwanifwa osho wa li wa hala okupewa. — Rom. 12:15; Gal. 5:26.

12. Eenghatu dilipi da katukwa kEendombwedi mbali, opo di kaleke po ehafo lado?

¹² Mbela oto dimbuluka Melissa, omumwameme oo a li a hala oku ka longa kObetel, ile okuya kOfikola yOvaudifi vOuhamba? Nonande paife ita dulu okuhanga omalalakano oo, okwa ti: “Ohandi longo noudiinini eshi handi kokola ondjila nohandi kendabala okulongifa eenghedi di lili noku lili dokuudifa. Osho osha etela nge ehafo linene.” Oshike sha li sha kwafela Nick, oo a li a teka omukumo, eshi ina nangekwa po e li omuyakuliongalo? Okwa ti: “Onda li handi yandje elitulemo koufembanghenda oo nda li ndi na, ngaashi okukufa ombinga moilonga yokuudifa nokuyandja omatyekosha taa ti sha pokwoongala. Onda li nda tula mo eindilo lokuya kObetel, nonda li nda tambulwa momudo wa ka shikula ko.”

13. Mbela ouwa ulipi to ka mona, ngeenge owa kala ho yandje elitulemo koshinakuwanifwa osho u na paife? (Omuudifi 2:24)

¹³ Mbela oto ka pewa oinakuwanifwa ya wedwa po mokweendela ko kwefimbo, ngeenge oshinakuwanifwa osho u na paife oho shi longo noudiinini? Heeno otashi dulika, ngaashi ashike sha ningilwa Nick. Ashike ngeenge ino pewa oshinakuwanifwa sha wedwa po ngaashi Melissa, oto dulu okuhapupalifa ehafo loye nokukala wa wanenwa, eshi to longele Jehova noudiinini. (Lesha Omuudifi 2:24.) Shikwao vali, oto ka kala wa hafa neenghono, ngeenge ou shii kutya eenghendabala doye otadi hafifa Omwene wetu, Jesus Kristus.

14. Oshike tu na okukaleka momadiladilo, ngeenge hatu diladila komalalakano opamhepo oo twa hala okulitulila po?

¹⁴ Mbela okuyandja elitulemo koinakuwanifwa oyo tu na paife osha hala kutya inatu pumbwa vali okutamununa mo oukalele wetu? Ahowe! Ohatu dulu okulitulila po omalalakano opamhepo, oo tae tu kwafele tu kale ovaudifi novahongi hava pondola moukalele nokukala hatu kwafele ovamwatate novamwameme. Ohatu ka pondola, ngeenge otwa kala tu na eendunge nondjele, eshi hatu kwafele ovanhu vakwetu, ponhele yokulalakanena ashike ouwa wetu vene. — Omayel. 11:2; Oil. 20:35.

15. Omalalakano amwe opamhepo elipi taa dulu oku tu kwafela tu wede ko kehafo letu?

¹⁵ Omalalakano opamhepo elipi to dulu okulitulila po? Pula Jehova e ku kwafele u mone kutya omalalakano elipi to dulu okuhanga. (Omayel. 16:3; Jak. 1:5) Mbela ito dulu okulitulila po omalalakano oo a tumbulwa  mokatendo kotete koshitukulwa eshi, ngaashi okukufa oukwafelikokolindjila, okuninga omukokolindjila wondjikilile, oku ka longa kObetel, ile okukufa ombinga moilonga yokutunga nokuwapekulula omatungo ehangano? Ile oto dulu okulitulila po elalakano lokulihonga elaka limwe, opo u dule okuudifa onghundana iwa, ile u ye koshitukulwa oko ku na ovapopi velaka olo. Opo u mone ouyelele muhapu u na sha naasho, tala etukulwa 10 lembo Nghee twa unganekwa tu longe ehalo laJehova nokupopya  novakulunhuongalo vomeongalo leni. * Eshi to longo noudiinini opo u hange omalalakano oo, ovanhu otava ka mona kutya oto ningi exumokomesho, naasho otashi ka weda ko kehafo loye.

16. Oshike to dulu okuninga po, ngeenge ito dulu okuhanga elalakano lonhumba lokondadalunde paife?

¹⁶ Oshike to dulu okuninga po, ngeenge paife ito dulu okuhanga elalakano limwe lomomalalakano, oo a kundafanwa moshitukulwa eshi? Kendabala okulitulila po elalakano olo to dulu okuhanga. Natu ka kundafaneni oitwa tai shikula.

17. Metwokumwe na 1 Timoteus 4:13, 15, oshike omumwatate a pumbwa okuninga, opo a kale omuhongi a pyokoka?

¹⁷ Lesha 1 Timoteus 4:13, 15. Ngeenge ou li omumwatate a ninginifwa, xwepopaleka onghedi yoye yokupopya nosho yo yokuhonga. Omolwashike mbela? Omolwaashi ngeenge owa kala ho longo “noudiinini,” opo u kale omupopi nomuleshi muwa, otashi ka kala enangeko noupuna kovapwilikini voye. Kendabala okulitulila po elalakano lokukonakona nokutula moilonga oitwa oyo ya kundafanwa mokambo Diinina oku va leshela noku va honga. Kendabala okukonakona oshitwa shimwe poshikando, ndele to shi lideula nawa keumbo noku shi tula moilonga eshi to yandje oipopiwa. Pula omaetepo komuyandjimayele omutivali, * ile kovakulunhuongalo vakwao, “ovo hava longo noudiinini mokupopya nomokuhonga.” (1 Tim. 5:17) Elalakano loye inali kala ashike okuuda ko okambo oko, ndele kendabala okukwafela ovapwilikini va pameke eitavelo lavo, ile va katuke onghatu. Ngeenge owa ningi ngaho, oto ka hapupalifa ehafo loye nosho yo lavo.

18. Oshike tashi ke tu kwafela tu hange omalalakano etu e na sha noukalele?

 ¹⁸ Atusheni otu na oshinakuwanifwa shokuudifa nokuninga ovanhu ovahongwa. (Mat. 28:19, 20; Rom. 10:14) Mbela owa hala okukala onghulungu moilonga oyo ya fimana? Litulila po omalalakano okondadalunde eshi to konakona nokutula moilonga osho we lihonga mokambo Okuhonga. Ope na vali omaetepo amwe a wedwa po, taa hangwa mokafo Onghalamwenyo yopaKriste noilonga yokuudifa — okafo kokulongifwa pokwoongala nosho yo ouvidio ve na sha noihopaenenwa yomatwalemo, ovo hava ulikwa pokwoongala kwomokati koshivike. Kendabala okutala kutya oitwa ilipi tai dulu oku ku kwafela. Ngeenge owa tula moilonga omaetepo oo, oto ka kala omuudifi nomuhongi a pyokoka. Osho otashi ka weda ko kehafo loye. — 2 Tim. 4:5.

19. Ongahelipi to dulu okukulika omaukwatya opaKriste?

¹⁹ Ino dimbwa kutya limwe lomomalalakano a fimanenena, olo to dulu okulitulila po, okukulika omaukwatya opaKriste. (Gal. 5:22, 23; Kol. 3:12; 2 Pet. 1:5-8) Ongahelipi to dulu okuhanga elalakano olo? Natu tye nee ngeno pashihopaenenwa, owa hala okukala u na eitavelo la kola. Oto dulu okulesha oitukulwa moishangomwa yetu, oyo i na omaetepo taa longo e na sha nanghee to dulu okupameka eitavelo loye. Oto dulu yo okumona ouwa mokutala oitukulwa yo JW Broadcasting^®, oyo ya popya kombinga yovamwatate novamwameme, ovo va li va ulika eitavelo monghedi ya tongomana, eshi va li tava ungaunga nomashongo e lili noku lili. Opo nee to tale eenghedi omo to dulu okuhopaenena eitavelo lavo mokukalamwenyo kwoye.

20. Ongahelipi hatu dulu okuweda ko kehafo letu nokuninipika etekomukumo?

²⁰ Oshoshili kutya atusheni otwa hala okulongela Jehova ngaashi hatu dulu shi dulife pwaasho hatu mu longele paife. Ohatu ka dula okuninga ngaho pauyadi mounyuni mupe waKalunga. Ngeenge otwa kala hatu longo noudiinini mwaasho hatu dulu okuninga paife, ofimbo twa teelela ounyuni mupe, ohatu ka weda ko kehafo letu nokuninipika etekomukumo. Naasho sha fimanenena, ohatu ka fimanekifa nokutumbalekifa Jehova, “oo ha kala alushe a hafa.” (1 Tim. 1:11) Onghee hano, natu hafeleni oinakuwanifwa oyo tu na.