1. Bavula babena kuba byepi pa kuba’mba bengileko pakatampe mwingilo wa Lesa?

 TUJI na mingilo yavula bingi ino ntanda byo ibena kunangijila ku mpelo. (Mat. 24:14; Luka 10:2; 1 Pe. 5:2) Atweba bonse tukeba kwingijila Yehoba papelela bulume bwetu. Bavula babena kwingilako pakatampe mwingilo wa kusapwila. Bamo babena kukeba kutendeka bupainiya. Bakwabo babena kukeba kuya na kwingijila pa Betele nangwa kwingilako mwingilo wa kushimika Mazubo a Kubuñenamo, Mazubo a Bufumu, maofweshi a musampi, ne Maofweshi a Bantuntuluzhi. Kabiji balongo bavula babena kukanamina bunkwasho ne bukulumpe mu kipwilo. (1 Timo. 3:1, 8) Yehoba umvwa bingi bulongo pa kumona bantu banji byo babena kukebesha kumwingijila.—Sala. 110:3; Isa. 6:8.

2. Twakonsha kumvwa byepi inge twakankalwa kufikizha kikonkwanyi kimo kyo twibikijile mu mwingilo wa Lesa?

² Twakonsha kutendeka kumvwa bibi ku muchima inge kya kuba papita kimye kyabaya kwa kubula kutambula mingilo imo yo tubena kukanamina. Nangwa twakonsha kulefulwa inge kya kuba na mambo a kukoma nangwa bintutu bikwabo twakankalwa kwingila mingilo imo mu jibumba ja Lesa. (Maana 13:12) Byo byo kiji kwi ba Melissa. * Bakeba kwingijila pa Betele nangwa kutanwa ku Sukulu wa Basapwishi ba Bufumu, bino baambile’mba: “Napitaila pa myaka ikebewa, kechi nakonsha kwingila ino mingilo ne. Bimye bimo kino kindengela kumvwa bibi ku muchima.”

3. Ñanyi bintu byaubile bamo pa kuba’mba bafikilemo kwingila mingilo imo mu kipwilo?

³ Bamo banyike kabiji baji na butuntulu bwa mubiji bwawama, bino bafwainwa kukikomako mu maana ne kwikala na byubilo bimo  pa kuba’mba bafikilemo kwingila mingilo ikwabo mu kipwilo. Bamo bakonsha kujimuka bingi mu kuba bintu, bafuukula bintu bulongo, kabiji bakebesha bingi kwingila, bino patanshi bafwainwa kufunda kutekanya, kuteshako muchima pa kwingila mingilo, nangwa kwikala na mushingi. Inge mwata muchima pa kuwamisha byubilo byenu, bakemupa mingilo mu kipwilo pa kimye kyo mubena kubula ne kuketekela. Langulukai pa kyamwekele kwi ba Nick. Byo bajinga na myaka ya kusemwa 20, baumvwine bingi bibi ku muchima byo babujile kwibatongola kwikala nkwasho mu kipwilo. Baambile’mba: “Nalangulukilenga’mba kuji bintu bimo byalubankana kwi amiwa.” Bino ba Nick batwajijile kwibikako kwikala na byubilo bikebewa. Batwajijile kwingila na ngovu mingilo yo bajinga nayo mu kipwilo ne mwingilo wa kusapwila. Lelo jino baji mu Kavoto ka Musampi.

4. Ñanyi bintu byo tusa kufunda mu uno mutwe?

⁴ Abya mubena kumvwa bibi ku muchima na mambo a kuba’mba kechi mwafikizha kikonkwanyi kimo kyo mwibikijile mu mwingilo wa Lesa nenyi? Umvwe byo byo kiji, lombai kwi Yehoba ne kumubuula byo mubena kumvwa. (Sala. 37:5-7) Kabiji mwakonsha ne kwipuzhako balongo babanda mu bukine kwimubuulako byo mwakonsha kuwamishako ñingijilo yenu mu mwingilo wa Lesa, kabiji mwafwainwa kwibikako kulondela byo bemubuula. Inge mwauba bino, bakemupa mwingilo ye mubena kukanamina nangwa kufikizha kikonkwanyi kyo mwibikila. Bino byonkatu byo kyajinga kwi ba Melissa bo twaambapo kala, mingilo imo yo musaka kechi mwakonsha kufikilamo kwiingila ne. Inge kyaikala bino, mwafwainwa kuba byepi? Mwakonsha kuba byepi pa kuba’mba mutwajijile kwikala na lusekelo? Pa kuba’mba tukumbule buno bwipuzho, uno mutwe usa kwamba (1) kintu kyakonsha kwimuletela lusekelo, (2) byo mwakonsha kubayisha lusekelo lwenu, ne (3) bikonkwanyi byo mwakonsha kwibikila byakonsha kwimuletela lusekelo.

5. Pa kuba’mba twikale na lusekelo, twafwainwa kuta muchima pa ka? (Musapwishi 6:9)

⁵ Musapwishi 6:9 walumbulula byo twakonsha kuba pa kuba’mba twikale na lusekelo. (Tangai.) Muntu usangalela ‘mu bintu byo abena kumona’ utondwa na bintu byo aji nabyo, nabiji mingilo yo abena kwingila pa kyo kyo kimye. Pakuba muntu ukeba bintu byo ukabula kwikala nabyo utwajijilatu na kutonga bintu byo akonsha kubula kwikala nabyo. Kino kibena kwitufunjishapo ka? Pa kuba’mba twikale na lusekelo, twafwainwa kuta muchima pa bintu byo tuji nabyo ne byo twakonsha kwikala nabyo.

6. Ñanyi kishimpi kyo tusa kwisambapo, kabiji tusa kuta muchima pa ka?

⁶ Nanchi kine kyakonsheka kutondwa na bintu byonka byo muji nabyo nyi? Bantu bavula bakana amba kechi kyakonsheka ne, mambo muntu yense mu kuya kwa kimye ukeba kuba bintu bya katataka. Nangwa byonkabyo, kyakonsheka kwiyowa bintu byonka byo tuji nabyo. Twakonsha kuba byepi kino? Pa kuba’mba tutaane mukumbu, twayai twisambe pa kishimpi kya kwa Yesu kya matalenta, kyanembwa pa Mateo 25:14-30. Tusa kuta muchima pa byo twakonsha kufunjilako bya kwikala na lusekelo lwa kine ne kwiyowa bintu byo tuji nabyo.

7. Chibawizhai biji kishimpi kya kwa Yesu kya matalenta.

⁷ Mu kishimpi, mwanamulume winengezhezhenga kuya ku mpunzha kwalepa. Saka akyangye kuya, waichile bakalume banji ne kwibapa matalenta kuba’mba bakobenga busulu. * Uno muntu wayukile bulongo byajinga bakalume banji, onkao mambo, kalume umo wamupele matalenta atanu, mukwabo abiji, kabiji wa busatu wamupele talenta umo. Bakalume batanshi babiji baingijile na ngovu kuba busulu ne kumwenamo nsubu.  Bino kalume wa busatu aye kafwako kyo aubilepo na mali o bamupele ne, kabiji bamupangile nkito ku mwine mwina mali.

8. Mambo ka kalume mutanshi wa mu kishimpi o asangalejile?

⁸ Kalume mutanshi wafwainwa wasangalele bingi nkambo yanji byo amupele matalenta atanu. Ano mali avujile bingi, kabiji kyamwesheshenga kuba’mba nkambo yanji wamuketejile bingi. Nga kalume wa bubiji? Wakonsheshe kumvwa bibi ku muchima na mambo a kubula kutambula matalenta avula byonka byo bapele kalume mutanshi. Nanchi byo byo aumvwine ku muchima nyi?

9. Ñanyi bintu Yesu byo abujile kwambapo pa kalume wa bubiji? (Mateo 25:22, 23)

⁹ Tangai Mateo 25:22, 23. Yesu kechi waambilepo’mba kalume wa bubiji wazhingijile na mambo a kuba’mba watambwiletu matalenta abiji ne. Kabiji Yesu kechi wamwesheshepo’mba uno kalume wijizhenye ne kwamba’mba: ‘To tumatalenta tonkatwe to bampa? Ne amiwa ñingila na ngovu byonkatu bingila kalume ye bapa matalenta atanu. Inge kya kuba nkambo yami kechi wannemeka ne, ne amiwa nsakuzhiika ano matalenta abiji ne kuta muchima pa bintu byami.’ Abino kechi byo byo aubile ne.

10. Kalume wa bubiji waubile byepi na matalenta o bamupele?

¹⁰ Byonka byaubile kalume mutanshi, kalume wa bubiji naye wayukile’mba mwingilo ye bamupele wanemene bingi, kabiji waingijile na ngovu mwingilo wa nkambo yanji. Kyafuminemo, wamwenejilemo matalenta akwabo abiji. Uno kalume bamufwetele na mambo a kwingila na ngovu. Nkambo yanji wasangalele bingi kabiji wamupele mingilo yavula.

11. Twafwainwa kuba byepi pa kuba’mba twikalenga na lusekelo?

¹¹ Ne atweba twakonsha kwikala na lusekelo inge ke twingile na ngovu mwingilo yense ye betupa  mu jibumba ja Yehoba. Mwafwainwa “kuteshako bingi muchima” ku mwingilo wa kusapwila ne kwingila na muchima yense mingilo ya pa kipwilo. (Byu. 18:5; Hebe. 10:24, 25) Nengezhainga kupwila pa kuba’mba mukumbulengapo mikumbu itundaikañana. Monainga majashi o bemupa mu kupwila kwa mukachi ka mulungu amba mwingilo wanema bingi. Inge bemupapo mwingilo umo mu kipwilo, mwafwainwa kumona kuba’mba mubena kufika bukiji ne kutako muchima pa kuba’mba bemuketekele. Kange mumonenga mwingilo ye bemupa nobe mwingilo wabula kunema ye mwafwainwa kubula kutayilapo kimye ne. Ibikaiko kuwamishako ñingijilo yenu. (Maana 22:29) Umvwe ke mwingile na ngovu mingilo ya Yehoba, mukakosesha bulunda bwenu ne aye, kabiji mukekala na lusekelo lukatampe. (Nga. 6:4) Kabiji kino kikemukwasha kusangalala inge bakwenu bebapa mwingilo ye mwakebelenga.—Loma 12:15; Nga. 5:26.

12. Bakamonyi babiji baubile byepi pa kuba’mba batwajijile kwikala na lusekelo?

¹² Abya mubena kwibavuluka ba Melissa, bakebeshe kwingijila pa Betele nangwa kutanwa ku Sukulu wa Basapwishi ba Bufumu nyi? Nangwa kya kuba kechi bafikilamo kwingila ino mingilo ne, baambile’mba: “Ñingila na ngovu mwingilo wa bupainiya ne kwingijisha mashinda apusana pusana pa kwingila mwingilo wa kusapwila. Kino kyandetela lusekelo lukatampe.” Kabiji ba Nick baubile byepi byo babujile kwibatongola kwikala bankwasho mu kipwilo? Baambile’mba: “Natele muchima pa kwingila mingilo yonka yo naingilanga nabiji kusapwila ne kukumbulapo pa kupwila. Kabiji nanembele pepala wa kwipwizhapo mwingilo wa pa Betele, kabiji bangichile kuya na kwingijila pa Betele mwaka walondejilepo.”

13. Ki ka kikafumamo inge mwateshako muchima kwingila mwingilo yenka ye mubena kwingila pa kino kimye? (Musapwishi 2:24)

¹³ Umvwe mwateshako muchima kwingila mwingilo yenka ye muji nanji pa kino kimye, nanchi bakemupa ne mingilo ikwabo kulutwe nyi? Kino kyakonsha kumweka, byonka byo kyajinga kwi ba Nick. Bino inge kechi kyakonsheka ne, byonka byo kyajinga kwi ba Melissa, mwakonsha kutwajijila kwikala na lusekelo ne kutondwa na byonka byo mubena kuba mu mwingilo wa Lesa. (Tangai Musapwishi 2:24.) Kabiji mukekala na lusekelo lukatampe inge mwayuka kuba’mba byo mubena kuba bibena kusangajika muchima wa Nkambo yetu, Yesu Kilishitu.

14. Ñanyi kintu kyo twafwainwa kuvulukanga kimye kyonse inge twalanguluka pa bikonkwanyi byo twibikila mu mwingilo wa Lesa?

¹⁴ Nanchi kuteshako muchima kwingila mwingilo ye tuji nanji luno kubena kulumbulula’mba kechi twafwainwa kumonapo mashinda a kwingijilamo pakatampe mwingilo wa Yehoba nenyi? Ine. Twafwainwa kwibikilanga bikonkwanyi mu mwingilo wa Lesa byakonsha kwitukwasha kwikala basapwishi ne bafunjishi bawama ne kukwasha balongo ne banyenga. Tukafikizha bino bikonkwanyi inge twipelula ne kuta muchima pa kukwasha bakwetu kechi kutatu muchima pa byo tukeba ne.—Maana 11:2; Byu. 20:35.

15. Ñanyi bikonkwanyi bimo byakonsha kwimukwasha kwikala na lusekelo lukatampe?

¹⁵ Ñanyi bikonkwanyi byo mwakonsha kwibikila? Lombai Yehoba kwimukwasha kuyuka bikonkwanyi byo mwakonsha kufikizha. (Maana 16:3; Yako. 1:5) Abya mwakonsha kwibikilapo kikonkwanyi kimo pa bikonkwanyi byatongolwa mu  jifuka jitanshi ja uno mutwe, nabiji kwikala painiya wa kukwasha, painiya wa kimye kyonse, kwingijila pa Betele, nangwa kwingilako mwingilo wa buntungi nyi? Nangwa mwakonsha kufunda mulaka mukwabo pa kuba’mba musapwilenga bulongo mambo awama, nangwa kuya na kusapwila mu nyaunda ya mulaka ungi. Mwakonsha kufunda byavula pa bino bikonkwanyi inge mwatanga kitango 10 mu buku wa Bakwatankana Kuba Kyaswa Muchima wa Yehoba ne kwisamba na  bakulumpe mu kipwilo kyenu. * Inge mwibikako kufikizha bino bikonkwanyi, bakwenu bakamona kuba’mba mubena kukomenako ku mupashi kabiji lusekelo lwenu lukabayilako.

16. Mwakonsha kuba byepi inge kya kuba kechi mwakonsha kufikizha kikonkwanyi kyo mwibikila ne?

¹⁶ Pano ibyepi inge kya kuba’mba kechi mwakonsha kufikizhapo nangwa kikonkwanyi kimo pa bikonkwanyi byo twaambapo ne? Kintu kyo mwakonsha kuba ke kwibikila kikonkwanyi kikwabo kyo mwakonsha kufikizha. Langulukai pa bino byalondelapo.

17. Kwesakana na byaamba 1 Timoti 4:13, 15, mulongo wakonsha kuba byepi pa kuba’mba ekale mufunjishi wawama?

¹⁷ Tangai 1 Timoti 4:13, 15. Inge mwi balongo babatizhiwa, mwakonsha kwingijila pa kuwamishako busendwe bwenu bwa kwamba majashi ne kufunjisha. Mambo ka? Mambo “kuteshako bingi muchima” kutanga, kwamba majashi, ne kufunjisha kukwasha bingi banteleki benu. Ibikilai kikonkwanyi kya kufunda ne kwingijisha mafunjisho onse aji mu buloshuwa wa kuba’mba Teshaiko Muchima ku Kutanga ne Kufunjisha. Fundainga lufunjisho lumo lumo, kupitulukamo bingi, ne kwibikako kwingijisha lolo lufunjisho pa kwamba jashi jenu. Ipuzhaiko wa kufundañanako wa kibiji nangwa bakulumpe mu kipwilo bakwabo “aba bengila na ngovu mu kwamba ne mu kufunjisha” kuba’mba bemubuuleko bya kuba. * (1 Timo. 5:17) Kechi mwafwainwa kutatu muchima pa kwingijisha lufunjisho luji mu buloshuwa ne, bino mwafwainwa ne kuta muchima pa kukwasha banteleki benu kukosesha lwitabilo lwabo, nangwa kwibatundaika kwingijisha byo babena kufunda. Umvwe ke mube bino, mukabayishako lusekelo lwenu ne lwa banteleki benu.

18. Ki ka kyakonsha kwitukwasha kufikizha bikonkwanyi byetu mu mwingilo wa kusapwila?

 ¹⁸ Atweba bonse tuji na mwingilo wa kusapwila ne kufunjisha bantu kwikala ke baana ba bwanga. (Mat. 28:19, 20; Loma 10:14) Abya mubena kukeba kuwamishako busendwe bwenu mu uno mwingilo wanema bingi nyi? Ibikilai bikonkwanyi bya kufunda ne kwingijisha mafunjisho aji mu buloshuwa wa Kufunjisha. Mwakonsha kutaana bishinka bikwabo mu Mutanchi wa Kupwila kwa Bwikalo ne Mwingilo Wetu wa Bwina Kilishitu ne mu mavidyo amwesha bya kwisamba na bantu o batambisha pa kupwila kwa mukachi ka mulungu. Esekai mashinda apusana pusana pa kuba’mba muyuke engila bulongo. Inge mwalondela ano mafunde, mukekala bafunjishi bawama kabiji kino kikemuletelanga lusekelo lukatampe.—2 Timo. 4:5.

19. Mwakonsha kuba byepi pa kuba’mba mwikale na byubilo bitokesha Lesa ku muchima?

¹⁹ Kimye kyo mubena kulanguluka pa bikonkwanyi byo mwakonsha kwibikila, kechi mwafwainwa kulubako kikonkwanyi kyakilamo kunema kya kwikala na byubilo bitokesha Lesa ku muchima ne. (Nga. 5:22, 23; Kolo. 3:12; 2 Pe. 1:5-8) Mwakonsha kuba byepi pa kuba’mba mufikizhe kino kikonkwanyi? Twambe’mba mubena kukeba kwikala na lwitabilo lwakosa. Mwakonsha kutanga bibaaba mu mabuku etu byaamba pa byo mwafwainwa kuba pa kuba’mba mukoseshe lwitabilo lwenu. Kabiji mwakonsha kumwenamo bingi mu kutamba bipungu bya pa JW Broadcasting^® bimwesha balongo ne banyenga byo bamwesha lwitabilo lwakosa kimye kyo bapita mu meseko apusana pusana. Apa bino mwalangulukapo pa byo mwakonsha kulondela lwitabilo lwabo mu bwikalo bwenu.

20. Twakonsha kuba byepi pa kuba’mba twikalenga na lusekelo ne kukepeshako kumvwa bibi ku muchima?

²⁰ Kwambatu kine, atweba bonse tukeba kuba byavula mu mwingilo wa Yehoba kukila pa byo tubena kuba pa kino kimye. Mu ntanda ipya, tukamwingijilanga monse mo tukebela. Pa kino kimye, inge twateshako muchima kwingila mingilo yonka yo tuji nayo, tukekala na lusekelo lukatampe kabiji kechi tukomvwanga bibi ku muchima na mambo a kubula kwingilako mingilo imo ne. Ne kyakilamo kunema, tukaletanga munema ne lutotelo kwi Yehoba, “Lesa wa lusekelo.” (1 Timo. 1:11) Onkao mambo, twayai tumwenenga lusekelo mu mingilo yonka yo tuji nayo.