1. Aw bɔku pipul dɛn de tray fɔ du mɔ na Jiova in savis?

 WI GƐT bɔku wok fɔ du as di tɛm fɔ mek dis wɔl dɔn de kam nia. (Mat. 24:14; Lyuk 10:2; 1 Pit. 5:2) Wi ɔl want fɔ sav Jiova di bɛst we aw wi ebul. Bɔku dɔn disayd fɔ du mɔ na dɛn prichin wok. Sɔm de op fɔ bi payɔnia. Ɔda wan dɛn de op fɔ wok na Bɛtɛl ɔ ɛp fɔ bil Kiŋdɔm Ɔl, Asɛmbli Ɔl, Rimot Transleshɔn Ɔfis, ɔ Branch Ɔfis. Ɛn bɔku brɔda dɛn de wok tranga wan fɔ kwalifay fɔ bi ministerial savant ɔ ɛlda. (1 Tim. 3:1, 8) Jiova rili gladi we i de si wetin in pipul dɛn rili rɛdi fɔ du fɔ sav am.—Sam 110:3; Ayz. 6:8.

2. Aw wi kin fil if wi nɔ ebul fɔ rich sɔm pan wi gol dɛn na Jiova in savis?

² Bɔt, sɔntɛm wi at go pwɛl if wi nɔ ebul fɔ rich sɔm pan wi gol dɛn na Jiova in savis afta lɔng tɛm we wi dɔn de tray. Ɔ sɔntɛm wi at go pwɛl if wi nɔ ebul du patikyula tin dɛn na Jiova in ɔganayzeshɔn bikɔs wi dɔn ol ɔ bikɔs ɔf ɔda rizin dɛn. (Prɔv. 13:12) Fɔ ɛgzampul, wan sista we nem Mɛlisa * go lɛk fɔ wok na Bɛtɛl ɔ fɔ go na di Skul fɔ Pipul dɛn We De Prich bɔt Gɔd in Kiŋdɔm, bɔt i se: “A dɔn pas di ej fɔ kwalifay fɔ dɛn asaynmɛnt dɛn de. Sɔntɛnde, mi at kin pwɛl.”

3. Wetin sɔm go nid fɔ du fɔ kwalifay fɔ gɛt ɔda wok dɛn na Jiova in savis?

³ Sɔm yɔŋ wan dɛn we gɛt wɛlbɔdi go nid fɔ gɛt sɔm patikyula kwaliti dɛn bifo dɛn go kwalifay fɔ du ɔda wok dɛn. Fɔ ɛgzampul, sɔntɛm sɔm go gɛt sɛns, dɛn ebul fɔ disayd fɔ du sɔntin kwik kwik wan, ɛn  dɛn rɛdi fɔ wok. Bɔt sɔntɛm dɛn nid fɔ lan fɔ de peshɛnt mɔ, fɔ tek tɛm du dɛn wok, ɛn fɔ sho mɔ rɛspɛkt fɔ ɔda pipul dɛn. If yu tray tranga wan fɔ gɛt di kwaliti dɛn we yu nid, i pɔsibul fɔ mek di brɔda dɛn gi yu mɔ wok ivin bifo di tɛm we yu de ɛkspɛkt am. Lɛ wi tɔk bɔt wan brɔda we nem Nik in ɛkspiriɛns. We i bin ol 20 ia, in at bin rili pwɛl fɔ we dɛn nɔ apɔynt am as ministerial savant. I se, “A bin fil se sɔntin rɔŋ wit mi.” Bɔt Nik nɔ giv-ɔp. I bin du in bɛst na di kɔngrigeshɔn ɛn na di prichin wok. Tide, i de sav as mɛmba na wan Branch Kɔmiti.

4. Wetin wi go tɔk bɔt insay dis atikul?

⁴ Yu at pwɛl bikɔs yu nɔ ebul rich wan patikyula gol na Jiova in savis? If na so i bi, pre to Jiova bɔt dat ɛn tɛl am aw yu de fil. (Sam 37:5-7) Dɔn bak, aks machɔ brɔda dɛn fɔ gi yu advays bɔt aw yu go ebul du mɔ na Jiova in savis, ɛn tray yu bɛst fɔ du wetin dɛn tɛl yu. If yu du dat, sɔntɛm yu go ebul fɔ rich yu gol. Bɔt lɛk Mɛlisa we wi bin dɔn tɔk bɔt, sɔntɛm i nɔ go pɔsibul naw fɔ mek yu du wetin yu want fɔ du fɔ Jiova. So aw yu go kɔntinyu fɔ stil gɛt gladi-at? Fɔ ansa da kwɛstyɔn de, dis atikul go tɔk bɔt (1) wetin go mek yu gɛt gladi-at, (2) aw yu go gɛt mɔ gladi-at, ɛn (3) uskayn gol dɛn yu fɔ sɛt we go mek yu gladi mɔ.

5. Fɔ gɛt gladi-at, wetin wi fɔ pe atɛnshɔn pan? (Ɛkliziastis 6:9, NWT)

⁵ Ɛkliziastis 6:9 (NWT) ɛksplen wetin go ɛp wi fɔ gɛt gladi-at. (Rid.) Pɔsin we de ɛnjɔy ‘wetin in yay de si’ na pɔsin we gladi fɔ wetin i gɛt, lɛk di tin dɛn we i ebul fɔ du naw. Bɔt pɔsin we ‘want sɔntin we i nɔ go ebul fɔ gɛt’ nɔ go ɛva satisfay. So wetin na di lɛsin fɔ wi? Fɔ gɛt gladi-at, wi fɔ pe atɛnshɔn pan wetin wi gɛt ɛn pan di gol dɛn we wi go ebul fɔ rich.

6. Us parebul wi de kam tɔk bɔt, ɛn wetin wi go lan frɔm am?

⁶ I rili pɔsibul fɔ mek yu satisfay wit wetin yu ɔlrɛdi gɛt? Bɔku pipul dɛn tink se i nɔ pɔsibul, bikɔs wi lɛk fɔ kɔntinyu fɔ lan aw fɔ du nyu tin dɛn. Bɔt fɔ tru, i pɔsibul. Wi go ebul ɛnjɔy di tin dɛn we wi gɛt naw. Aw wi go du dat? Fɔ si aw dat pɔsibul, lɛ wi tɔk bɔt Jizɔs in parebul bɔt di talɛnt, we de na Matyu 25:14-30. Wi go lan bɔt aw fɔ gɛt gladi-at ɛn ivin gɛt mɔ gladi-at frɔm wetin wi ebul fɔ du naw.

7. Tɔk smɔl bɔt Jizɔs in parebul bɔt di talɛnt.

⁷ Insay di parebul, wan man bin want fɔ go patrol. Bɔt bifo i go, i kɔl in slev dɛn ɛn gi dɛn ɔl talɛnt fɔ mek dɛn go du biznɛs. * Di man bin no se in slev dɛn nɔ ebul fɔ du di sem tin dɛn, so i gi fayv talɛnt to wan slev, tu talɛnt to di ɔda slev, ɛn wan talɛnt to di tɔd slev. Di fɔs tu slev dɛn wok tranga wan fɔ mek mɔ mɔni fɔ dɛn masta. Bɔt di tɔd slev nɔ bin du natin wit di mɔni we dɛn gi am, so in masta bin sak am.

8. Wetin go dɔn mek di fɔs slev na di parebul rili gladi?

⁸ I go mɔs bi se di fɔs slev bin rili gladi we di masta gi am fayv talɛnt.  Dat na bin bɔku bɔku mɔni, ɛn i sho se di masta rili trɔst am. Bɔt wetin yu tink bɔt di sɛkɔn slev? In at bin fɔ dɔn pwɛl bikɔs di masta nɔ gi am bɔku talɛnt lɛk di fɔs slev. Bɔt wetin i du?

9. Wetin Jizɔs nɔ bin tɔk bɔt di sɛkɔn slev? (Matyu 25:22, 23)

⁹ Rid Matyu 25:22, 23. Jizɔs nɔ bin tɔk se di sɛkɔn slev in at bin pwɛl ɔ i jɛlɔs fɔ we in masta jɔs gi am tu talɛnt. Ɛn Jizɔs nɔ bin se di slev kɔmplen ɛn tɔk se: ‘Wetin mek mi masta gi mi smɔl talɛnt? A de wok tranga wan jɔs lɛk di slev we i gi fayv talɛnt. If mi masta nɔ tink se mi na gud wokman, sɔntɛm a fɔ jɔs bɛr in mɔni ɛn wok fɔ misɛf; a nɔ go wok fɔ am.’

10. Wetin di sɛkɔn slev bin du wit in talɛnt?

¹⁰ Jɔs lɛk di fɔs slev, di sɛkɔn slev ɔndastand se di wok we in masta gi am impɔtant, ɛn i bin wok tranga wan fɔ sav in masta. So dat bin mek i ebul fɔ dɔbul di masta in talɛnt. Di masta bin gi di slev gud pe bikɔs i wok tranga wan. Di masta bin gladi ɛn gi am mɔ wok.

11. Aw wi go gɛt mɔ gladi-at?

¹¹ Semweso, wi go ebul fɔ gɛt mɔ gladi-at we wi wok tranga wan pan ɛni wok we dɛn gi wi fɔ du na Jiova in savis. Tray fɔ ‘yuz ɔl yu tɛm’ na di prichin wok, ɛn wok tranga wan wit di kɔngrigeshɔn. (Akt 18:5; Ibru. 10:24, 25) Pripia yu kɔmɛnt dɛn fayn we yu de go di mitin dɛn so dat yu go  ɛnkɔrej ɔda pipul dɛn. Si ɛni studɛnt asaynmɛnt we yu gɛt na di mitin insay di wik se i rili impɔtant. If dɛn aks yu fɔ du wan patikyula wok na di kɔngrigeshɔn, na fɔ go kwik ɛn mek dɛn abop pan yu. Nɔ tink se di wok we dɛn gi yu nɔ impɔtant, ɛn yu nɔ nid fɔ spɛn tɛm fɔ du am. Tray tranga wan fɔ sabi du yu wok gud gud wan. (Prɔv. 22:29) Di mɔ we yu de tray tranga wan fɔ wok fɔ Jiova, na di mɔ yu padi biznɛs wit am go tayt ɛn na di mɔ yu go gɛt gladi-at. (Gal. 6:4) Yu go si bak se i izi fɔ mek yu gladi wit ɔda pipul dɛn we dɛn gɛt wok we yu bin want fɔ du.—Rom. 12:15; Gal. 5:26.

12. Wetin bin ɛp Mɛlisa ɛn Nik fɔ gɛt mɔ gladi-at?

¹² Yu mɛmba Mɛlisa we wi bin tɔk bɔt na paregraf 2, we bin want fɔ go na Bɛtɛl ɔ di Skul fɔ Pipul dɛn We De Prich bɔt Gɔd in Kiŋdɔm? Pan ɔl we i nɔ bin ebul fɔ rich in gol dɛn, i se: “A de tray fɔ du mi bɛst we a de payɔnia, ɛn a de tray fɔ yuz di difrɛn we dɛn fɔ prich. Dis dɔn mek a rili gladi.” Ɛn aw Nik bin ebul fɔ bia we dɛn nɔ apɔynt am as ministerial savant? I se: “A bin pe atɛnshɔn pan wetin a ebul fɔ du, lɛk fɔ du di prichin wok ɛn fɔ gi kɔmɛnt dɛn we de ɛnkɔrej ɔda pipul dɛn. Dɔn bak, a aplay fɔ wok na Bɛtɛl ɛn dɛn bin kɔl mi di nɛks ia.”

13. Wetin go apin if yu pe atɛnshɔn pan di wok we yu ebul fɔ du naw? (Ɛkliziastis 2:24)

¹³ If yu rili pe atɛnshɔn pan wetin yu ebul fɔ du naw, yu tink se yu go gɛt mɔ wok dɛn fɔ du tumara bambay? I pɔsibul fɔ lɛ dat apin, jɔs lɛk aw i bin apin fɔ Nik. Bɔt if i nɔ apin, jɔs lɛk Mɛlisa, yu go stil gɛt mɔ gladi-at, ɛn yu go rili gladi fɔ wetin yu de du fɔ Jiova. (Rid Ɛkliziastis 2:24.) Dɔn bak, yu go rili gladi bikɔs yu no se yu de mek wi Masta, we na Jizɔs Krays, gladi.

14. Wetin wi fɔ mɛmba ɔltɛm we wi de tink bɔt wi gol dɛn we wi de sav Jiova?

¹⁴ If wi de du wi bɛst na Jiova in savis naw, fɔ se dat min se wi nɔ fɔ kɔntinyu fɔ tray fɔ du mɔ fɔ am? Nɔ. Wi fɔ sɛt gol dɛn we go ɛp wi fɔ sabi prich ɛn tich fayn fayn wan ɛn fɔ ɛp wi brɔda ɛn sista dɛn. Wi go ebul fɔ rich wi gol dɛn if wi pe atɛnshɔn fɔ du tin dɛn we go ɛp ɔda pipul dɛn ɛn nɔ pe atɛnshɔn fɔ du tin dɛn we go bɛnifit wisɛf.—Prɔv. 11:2; Akt 20:35.

15. Wetin na sɔm gol dɛn we go ɛp yu fɔ gɛt mɔ gladi-at?

¹⁵ Us gol dɛn we sɔntɛm yu kin sɛt fɔ yusɛf? Beg Jiova fɔ ɛp yu fɔ no us gol dɛn yu go ebul fɔ rich. (Prɔv. 16:3; Jems 1:5) Yu tink se yu go ebul rich wan pan di gol dɛn we wi bin tɔk bɔt na di  fɔs paregraf na dis atikul, lɛk fɔ bi ɔgzilari ɔ rɛgyula payɔnia, fɔ wok na Bɛtɛl, ɔ fɔ ɛp fɔ bil Kiŋdɔm Ɔl, Asɛmbli Ɔl, Rimot Transleshɔn Ɔfis, ɔ Branch Ɔfis? Ɔ sɔntɛm yu go ebul lan ɔda langwej ɔ go prich to pipul dɛn ɔdasay. Yu go ebul fɔ lan mɔ bɔt sɔm pan dɛn gol dɛn ya we yu rid chapta 10 na di buk we nem Organized to Do Jehovah’s Will ɛn bay we yu tɔk to di ɛlda dɛn na yu  kɔngrigeshɔn. * We yu tray fɔ rich dɛn gol dɛn ya, ɔda pipul dɛn go ebul fɔ si se yu de go bifo, ɛn yu go gɛt mɔ gladi-at.

16. Wetin yu go du if yu nɔ ebul fɔ rich wan patikyula gol naw?

¹⁶ Bɔt wetin yu go du if naw yu nɔ ebul fɔ rich di gol dɛn we wi dɔn tɔk bɔt na dis atikul? Na fɔ tray fɔ sɛt ɔda gol we yu go ebul fɔ rich. Lɛ wi tɔk bɔt sɔm pan dɛn gol dɛn de.

17. Akɔdin to 1 Timoti 4:13, 15, wetin brɔda go du fɔ sabi tich gud gud wan?

¹⁷ Rid 1 Timoti 4:13, 15. If yu na brɔda we dɔn baptayz, yu kin wok tranga wan fɔ sabi tɔk ɛn tich fayn fayn wan. Wetin mek? Na bikɔs if yu “put ɔl yu at” fɔ sabi rid, tɔk, ɛn tich gud gud wan, yu go ebul fɔ ɛp di wan dɛn we de lisin to yu. Tray fɔ sɛt di gol fɔ stɔdi ɛn aplay di spich kwaliti dɛn we dɛn tɔk bɔt na di brosho we nem Kɔntinyu fɔ De Rid ɛn Tich. Stɔdi dɛn wan bay wan, tek tɛm praktis am na os, ɛn du wetin yu dɔn lan we yu de gi tɔk. Aks fɔ advays frɔm di ɔgzilari kanselɔ ɔ ɔda ɛlda dɛn “we de wok tranga wan we i kam pan di we aw dɛn de tɔk ɛn tich.” * (1 Tim. 5:17) Nɔ jɔs pe atɛnshɔn fɔ ɔndastand aw fɔ aplay di lɛsin dɛn na di brosho, bɔt pe atɛnshɔn bak fɔ ɛp di wan dɛn we de lisin to yu fɔ gɛt mɔ fet ɔ fɔ ɛnkɔrej dɛn fɔ du wetin dɛn de lan. We yu  du dat, yu ɛn di wan dɛn we de lisin to yu go gɛt mɔ gladi-at.

18. Wetin go ɛp wi fɔ rich gol dɛn na wi prichin wok?

¹⁸ Wi ɔl gɛt di wok fɔ prich ɛn mek disaypul dɛn. (Mat. 28:19, 20; Rom. 10:14) Yu go lɛk fɔ sabi du dis impɔtant wok gud gud wan? Stɔdi di Rid ɛn Tich brosho, dɔn sɛt sɔm patikyula gol dɛn we go ɛp yu fɔ du wetin yu de lan. Yu go ebul fɔ gɛt mɔ aydia dɛn we go ɛp yu frɔm Wi Kristian Layf ɛn Prichin Wok Mitin Buk ɛn di vidio dɛn we gɛt di taytul, Wetin Wi Go Se we Wi De Prich, we dɛn kin sho na di mitin dɛn we wi kin gɛt insay di wik. Tray difrɛn we dɛn fɔ no uswan go wok fayn fɔ yu tɛritri. We yu fala dɛn we dɛn ya, i go ɛp yu fɔ sabi tich gud gud wan, ɛn dat go mek yu gɛt mɔ gladi-at.—2 Tim. 4:5.

19. Aw yu go gɛt Kristian kwaliti dɛn?

¹⁹ Nɔ fɔgɛt se wan pan di gol dɛn we rili impɔtant we yu kin sɛt fɔ yusɛf, na fɔ gɛt kwaliti dɛn we de mek Gɔd gladi. (Gal. 5:22, 23; Kol. 3:12; 2 Pit. 1:5-8) Wetin yu go du fɔ rich da gol de? Fɔ ɛgzampul, sɔntɛm yu want fɔ gɛt mɔ fet. Yu kin rid atikul dɛn na wi pɔblikeshɔn dɛn we de tɔk bɔt difrɛn tin dɛn we de ɛp wi fɔ gɛt mɔ fet. Yu go bɛnifit we yu wach pat dɛn na di JW Brɔdkastin program dɛn we kin kɔmɔt ɛni mɔnt, we de ɛp wi fɔ si aw brɔda ɛn sista dɛn dɔn sho aw dɛn rili gɛt strɔng fet we dɛn gɛt difrɛn prɔblɛm dɛn. Dɔn, tink bɔt we dɛn we yu go falamakata dɛn fet.

20. Wetin go ɛp wi fɔ gɛt mɔ gladi-at ɛn mek wi at nɔ pwɛl tumɔs fɔ wetin wi nɔ ebul du?

²⁰ Fɔ tru, wi ɔl want fɔ du mɔ fɔ Jiova pas wetin wi de du naw. Insay Gɔd in nyu wɔl, wi go ebul fɔ sav am di we aw wi want. Te da tɛm de, if wi du wi bɛst pan ɛni wok we wi ebul fɔ du naw, wi go gɛt mɔ gladi-at, ɛn wi at nɔ go pwɛl tumɔs fɔ wetin wi nɔ ebul fɔ du. Ɛn wetin impɔtant mɔ na dat wi go ebul ɔnɔ ɛn prez Jiova, we na wi “Gɔd we gladi.” (1 Tim. 1:11) So lɛ wi gɛt gladi-at wit di wok we wi ebul fɔ du naw.