1. Yɛɛ wanaa bɔɔbɔɔ cho yɛ tosaa le halikpeŋ ma tosa o nda tiuba wo o wali Chɛhowaa niŋ?

 MƐƐ chieeŋndo hoo sɔɔŋguu fau o mɛɛlulaŋ, lende koni wallo wa tau le tosaa ni. (Maa. 24:​14; Luku 10:​2; 1 Pitɛ 5:​2) Naa kpou yeema miŋ piɛi Chɛhowa mɛɛ naŋ tiuba yɛ. Le hei, mi apum yɔŋguŋ le tosaa tau o wali pollo niŋ. Apum nɔ pɛŋ yeemɛi le kɔɔfaleŋ tosaa, wallo o Bɛtɛɛl ɔɔ le yɔŋgɔŋndo le chiɛila kɔɔnaa taŋgullo. O faŋaŋndɔ okoŋ kɔɔli, puaapiliaa bɔɔbɔɔ cho kindiŋndo kpoke le ma suliŋ le waa buɛiyaa malalaŋnda ɔɔ bɛnduaa kundaa. (1 Timo. 3:​1, 8) Mi Chɛhowa naŋ kɔl tau te o che pɛ wanaa nduaa yɔŋgɔŋndo le walta yɛ yɛlaŋ ndaŋ tosaa!—Sam 110:​3; Aisaya 6:​8.

2. Vɛɛ naŋ sinaŋ yɛ te ŋ nɔla lɛ waltaŋ lapum tosaa o Chɛhowa piɛiyo niŋ te?

² Miŋ kandu tiŋ kɔllo tambei te ŋ chua pɛ teleŋ vilɛi miŋ komallɔ kpeleŋnda naŋ kɛsi o Chɛhowa piɛiyo niŋndaŋ te. Ɔɔ lepum miŋ tambu kɔl le mɛɛ yuuwɛi ɔɔ bahawɛila cheleŋ la cho naa paaliaŋndo ŋ nɔla lɛ waltaŋ lapum tosaa o Chɛhowa piɛiyo niŋ te yɛ. (Pulɔ. 13:​12) Nyɛ waa naa yɔŋnuŋ ndepilɛnɔ pilɛ ni diolaŋ Mɛlisa. * Mi che bɛɛ o nɔ yeemɛi le wallo o Bɛtɛɛl ɔɔ le kɔlaŋ o Sukuuwo le Wanaa Dimi Yooŋgu Kɛndɛ leMasaa wa, kɛ mbo dimi aa: “Mbɔ lɔmasɔlaŋ koni hei cho niŋ le ya ni kanifuule, I cho niŋ bɔɔ o yuwɛi. Le hei, lepum mi tambu kɔl tau.”

3. Yɛɛ waŋnda apum nɔ yɛ wɔ ma tosa le halikpeŋ ma suliŋ le kalaŋndaŋ chɔɔloo sɔlaa?

³ Mi che bɛɛ feleŋguaa apum nɔ kɛndiaa kɛndɔɔ, kɛ a nɔ wɔ ma simnuŋ kaasoŋnda o Mɛlɛka piɛiyo niŋ nduyɛ ma kindiŋ le suliŋnda lapum nɔɔ, le halikpeŋ ma suliŋ le kalaŋndaŋ chɔɔloo sɔlaa. Le tamaseliiyo, mi che bɛɛ apum nɔ taasioo, ma tosa  kɛɛsiaala kɛndɛlaŋ, nduyɛ ma yɔŋguŋ wulee le waltaŋ tosaa, kɛ a nɔ wɔ ma pɛɛku le kaa biuwaŋndo nɔɔ, le wallo tosaa nyɛkɛndɛi a le acheleŋnda bɛɛleŋ kioo. Te o yɔŋ pɛ ma tosa wallo kalaŋ le suliŋndaŋ ndaŋ nɔɔ, keŋ cho num mala ma chɔɔlu kalaŋndaŋ sɔla. Tofawɔ suɛi yɔŋnaŋii puaapilɛnɔ pilɛ diolaŋ Nik. Mɛɛ o fuuluu wɔsilaŋ 20, mbo tambu kɔl tau le mɛɛ nda yulu ndu iso le waa buɛi malalaŋndo le yɛ. Mbo dimi aa: “O kpeekpei niŋ, mi yiyaŋ maa I nɔ bahawɛiyo.” Kɛ Nik vi ŋdial te. Mbo hiau lachi a tosaa tau o kundaa niŋ a o wali pollo niŋ. Suŋ suŋ niŋ, o cho waŋndo opilɛ o Kunda Cho Lɛuve Chilaŋndo choo.

4. Yɛɛ naŋ cho yɛ yaasiaa o buŋgɛi hei niŋ?

⁴ Baa a cho pa a kɔl tambɛiyo le mɛɛ ŋ komallɔ kpeleŋ ŋ kɛsi o Mɛlɛka piɛiyo niŋndo yɛ le? Te lende i cho ni, mɛɛ chɔm Chɛhowa mɛɛ ŋ cho sinaŋndo yɛ. (Sam 37:​5-7) Le handɔɔ lechoo, nyuna puaapiliaa kendu o Mɛlɛka piɛiyo niŋnda le ma chɔm num nyɛ mala num le hiouwɔɔ lachioo tosaa o Mɛlɛka piɛiyo niŋndo. Nduyɛ, kindiŋ ma dɔu sila nda cho num ke wo o wali niŋ. Keŋ tosaa cho num mala ma komal kpeleŋ koŋ, ɔɔ ma sɔla dikeŋnaŋ ŋ yeema koŋ ndo. Kɛ a mɛɛ i yɔŋnuŋ Mɛlisa naŋ laŋga soo a ndu okɔɔ wo yɛ, naapum a tiuba ma sɔla dikeŋnaŋ ŋ yeema wo suŋ suŋ te. Kɛ yɛɛ mala yɛ num ma hiou lachi a waa a kɔl kɛndɛ? Le nyuna koŋ mulioo, buŋgɛi hei cho naa mala miŋ sina (1) nyɛ tosa miŋ wa a kɔl kɛndɛ wo, (2) nyɛ tosa miŋ chɔɔlu wa a kɔl kɛndɛ wo, nduyɛ (3) kpeleŋnda naŋ nɔ miŋ kɛsi le miŋ chɔɔlu wa a kɔl kɛndɛ laŋ.

5. Le miŋ wa a kɔl kɛndɛ, o yɛɛ choo naŋ nɔ yɛ miŋ handu kɔllo? (Ikilisiaatii 6:​9)

⁵ Ikilisiaatii 6:​9 tɛɛsial naa nyɛ mala naa miŋ wa a kɔl kɛndɛ wo. (Nuawɔ.) Te o yɔŋ pɛ mi waŋndo handu kɔllo o ‘nyɛ o che niŋ nduyɛ mbo wa ndu o ba wo’ choo, keŋ mala ndu mbo hini kɔl a nyɛ o nɔ wo vɛlɛ a mɛɛ o cho yɛ. Kɛ o baa pilɔɔ choo, wana handu kɔllo o yeemaŋ ndɔŋ choo wo yeema mbo sɔla nyɛ o sina maa o nɔla sɔla le wo. Mɛɛ yɛɛ hei pɛɛku yɛ naa? Le miŋ wa a kɔl kɛndɛ, ŋ nɔ miŋ handu kɔllo o nyɛ naŋ nɔ wo choo a o kpeleŋnda naŋ tiuba miŋ komal taŋ choo.

6. Tale kuɛɛ naŋ cho yɛ hunɔɔ yaasiaa, nduyɛ yɛɛ o cho yɛ naa mala miŋ che?

⁶ Baa ŋ nɔla pa kpeekpei miŋ naŋ kɔl a nyɛ naŋ nɔ wo? Wanaa bɔɔbɔɔ yiyaŋ maa keŋ nɔla mii yɔŋnuŋ te. Kanifuule naa waŋnda chieeya, ŋ yeema miŋ wa sɔɔŋ sɛnɛi cheleŋ tosaa mɛɛ teleŋndo hiau fau. Kɛ o kpeekpei niŋ, ŋ nɔla miŋ wa a kɔl kɛndɛ. Ŋ nɔla miŋ tuei sɔɔŋ naŋ cho tosaa suŋ suŋndoŋ yeela. Vɛɛ hei yɔŋnuŋ yɛ? Le mulioo sɔlaa, ŋ yaasiaŋndɔ tale Chiisu dimi a talɛŋndoŋ okɔɔ, mbo wa o Maatiu 25:​14-30 wo niŋ. Taloo hoo cho naa mala miŋ che mɛɛ naŋ looku miŋ sɔla kɔl kɛndɔɔ suŋ suŋ o walta naŋ cho tosaa laŋ niŋ yɛ, a mɛɛ naŋ chɔɔlu wa a kɔl kɛndɛ yɛ.

7. Tɛɛsiaawɔ tale Chiisu dimi a talɛŋndoŋ okɔɔ wo.

⁷ O tale Chiisu dimi a kaniŋ talɛŋndoŋ okɔɔ wo niŋ, mi po pilɛ kɛɛsiaa le kɔlaŋ kelaa o lɛŋnde cheleŋ niŋ. Kɛ tuupa mbo kua, mbo veelu buɛiyaa nduaa nduyɛ mbo ke o kɛ kɛ talɛŋndoŋ le ma tosa yulaleŋ a muŋ. * Po koŋ ndoo sina mɛɛ buɛiyaa nduaa o kɛ kɛ nɔla wallo yɛ. Le hei, mbo ke buɛi tasoo talɛŋndoŋ ŋuɛɛnu, o diiŋ ndɔɔ ŋmuuŋ, nduyɛ o yaa ndɔɔ ipilɛ. Mi buɛi tasoo a o diiŋ ndɔɔ tosa wallo kalaŋ le kanioŋ chɔɔloo sɔlaa o kaniŋ masanɔ ndaa ke nda woŋ choo. Kɛ buɛi yaa ndɔɔ ndu tosa nyɛ o nyɛ a kanii nda ke ndu ve le. Le hei, mi masanɔ ndɔɔ soli ndu o wali ndɔɔ niŋ.

8. O taloo hoo niŋ, le yɛɛ buɛi tasoo ndoo nɔ yɛ mbo wa a kɔl kɛndɛ?

 ⁸ Kɛlɛŋgaa mi buɛi tasoo naŋ kɔl tau le mɛɛ masanɔ ndɔɔ ke ndu talɛŋndoŋ ŋ ŋuɛɛnu yɛ. Kaniei tau ndoo sɔla keŋ masanɔ ndɔɔ o ba ni. Nduyɛ hei chɔm maa masanɔ ndɔɔ ndoo laalaŋ a ndu. Kɛ ɔɔ niŋ buɛi diiŋ ndɔɔ? Ndoo nɔla mbo tambu kɔl le mɛɛ nda ke buɛi tasoo talɛŋndoŋ mbo hiau ndu yɛ. Kɛ yɛɛ o tosa yɛ?

9. Yɛɛ Chiisu dimi yɛ a buɛi diiŋ ndɔɔ okɔɔ le? (Maatiu 25:​22, 23)

⁹ Nuawɔ Maatiu 25:​22, 23. O taloo hoo niŋ, Chiisu dimi naa maa mi buɛi diiŋ ndɔɔ tambu kɔl le mɛɛ o sɔla talɛŋndoŋ ŋmuuŋ kinɛi yɛ le. Nduyɛ Chiisu dimi naa maa mi buɛiyo hoo kandu ŋɔɔchiaŋndo okoŋ mbo dimi aa: ‘Le yɛɛ masanɔ nuu ke yɛ ndu kanioŋ mbo hiau ya le? Naa ndu kpeŋkpeŋ naŋ tosa wallo ni. Te masanɔ nuu nɔ balika melaa le ya le, ya bɛɛ I cho kaniŋ ndɔŋ vioŋɔɔ okoŋ mi hiounuŋ o makola nilaŋ niŋ.’

10. Yɛɛ buɛi diiŋ ndɔɔ ndoo tosa yɛ a kaniŋ o sɔla woŋ?

¹⁰ Maa buɛi tasoo, mi buɛi diiŋ ndɔɔ bɛɛ cha maa wali masanɔ ndɔɔ ke ndu wo cho o sɔvɛ. Le hei, mi buɛiyo hoo tosa wallo kalaŋ le ndu. Fulamakɔɔlioo wa ni, mbo tosa mi kaniŋ masanɔ ndɔɔ chɔɔluŋ lechoo bɛmbɔɔ lediiŋ. Nduyɛ, mi masanɔ ndɔɔ fanda ndu le taasi ndɔɔ a wali kala kala o tosa koŋ ndo. Masanɔ ndɔɔ mel ndu ko balikaa le nyɛ o tosa koŋ ndo le, kɛ mbo chɔɔlu ndu pɛŋ ke walta cheleŋ le tosaa.

11. Yɛɛ naŋ nɔ yɛ miŋ tosa le miŋ chɔɔlu wa a kɔl kɛndɛ?

¹¹ O nɛi pilɛ koŋ choo, naa bɛɛ tiuba miŋ wa a kɔl kɛndɛ te ŋ yɔŋguŋ pɛ a kɔllo kpou le tosaa mɛɛ naŋ tiuba yɛ o wali Chɛhowaa niŋ. ‘Chua teleŋndo tau’ o wali dimiaa yooŋgu kɛndɔɔ niŋ, nduyɛ ma yɔŋguŋ le walta cheleŋ  tosaa o kundaa niŋ. (Walta. 18:​5; Hibu. 10:​24, 25) Bɛɛndiaŋ nyɛkɛndɛi le bɔŋaŋndaŋ, le halikpeŋ ma yɔŋgu mulila dɛɛniaa acheleŋnda kɔllo laŋ. Te o yɔŋ pɛ ma ke num wallo le tosaa o sukuuwo le bɔŋaŋnda naŋ bii o lɔɔ tɛɛŋndo, chua ndu o sɔvɛ nduyɛ ma tosa ndu a kɔllo kpou. Te a ke num pɛ wallo opum le tosaa o kundaa niŋ, kindiŋ ma wa loŋ a teleŋndo nduyɛ ma tosa ndu nyɛkɛndɛi. O yɔŋ bɛɛ ma ke num wali taaniŋndo le tosaa o kundaa niŋ, pɛɛsa ndu le. Kɛ tosa ndu a kɔllo kpou. Nduyɛ, kindiŋ le hiouwɔɔ lachioo tosaa o walta ŋ tosalaŋ niŋ. (Pulɔ. 22:​29) Mɛɛ ŋ yɔŋguŋ fau le walta iMɛlɛkayalaŋ tosaa, keŋ cho num mala ma tosa hiouwɔɔ lachioo chɔ chɔ nduyɛ ma chɔɔlu wa a kɔl kɛndɛ. (Kalee. 6:​4) Hei cho vɛlɛ tosa ma che ndi tɛtɛlɛ le dɔɔnɔŋndo nyaale a wanaa sɔla dilakeŋnaŋnda num oo yeema sɔlaa laŋ.—Luomaŋ. 12:​15; Kalee. 5:​26.

12. Yɛɛ mala yɛ Mɛlisa nda Nik le chɔɔloo waa a kɔl kɛndɛ?

¹² A loonuŋ pa Mɛlisa, ndepilɛnɔ ndoo nɔ yeemɛi le wallo o Bɛtɛɛl ɔɔ le kɔlaŋ o Sukuuwo le Wanaa Dimi Yooŋgu Kɛndɛ leMasaa Wa? Mi che bɛɛ ndepilɛnɔɔ hoo tiuba sɔɔŋ muŋ tosaa le, kɛ mbo dimi aa: “Mi yɔŋguŋ tau le kɔɔfaleŋ tosaa mɛɛ ya tiuba yɛ. Nduyɛ mi kindiŋ le nɛila yɛ yɛlaŋ soliŋndo kpeku o yooŋgu kɛndɔɔ dimioo niŋ. Hei tosaa chuu ya niŋ bɔɔ nyaaloo.” Nduyɛ, yɛɛ mala yɛ Nik mbo tiu kɔl tambɛiyo ba le mɛɛ nda yulu ndu iso le waa buɛi malalaŋndo le yɛ? Mbo dimi aa: “Mi handu kɔllo o dilakeŋnaŋnda yaa nɔ laŋ choo, mɛɛ yooŋgu kɛndɔɔ dimioo a mulila kɔl dɛɛniaalaŋ yɔŋgoo o bɔŋaŋndaŋ cho naa yɛ. Mi poonyiaa vɛlɛ yauwo le wallo o Bɛtɛɛl, nduyɛ wɔsioo opilɔɔ ma chɛlla le mi kuɛ o Bɛtɛɛl.”

13. Fulamakɔɔli kuɛɛ ŋ cho yɛ sɔla te a yɔŋguŋ pɛ a kɔllo kpou le tosaa walta ŋ cho tosaa suŋ suŋndaŋ? (Ikilisiaatii 2:​24)

¹³ Te a yɔŋguŋ pɛ suŋ suŋ le walta nda ke num ndaŋ tosaa a kɔllo kpou, baa a cho pa chɔɔlu walta cheleŋ sɔla o chilaŋ niŋ? Maa Nik, num bɛɛ cho chɔɔlu walta cheleŋ sɔla. Kɛ te o yɔŋ pɛ maa a sɔla lɛ niŋ walta cheleŋ te, a tiuba ma chɔɔlu wa a kɔl kɛndɛ maa Mɛlisa. Nduyɛ, a cho nɔ kɔl hiniaa le sinaa maa a cho tosaa o ŋ tiuba wo o wali Chɛhowaa niŋ. (Nuawɔ Ikilisiaatii 2:​24.) Le handɔɔ lechoo, a cho chɔɔlu kɔl kɛndɔɔ sɔla le mɛɛ ŋ sina maa a cho Masanɔ naa Chiisu Kiliti kɔllo nɛŋioo yɛ.

14. Te o hiŋ pɛ a kpeleŋnda iMɛlɛkayalaŋ okɔɔ, yɛɛ naŋ nɔ yɛ miŋ kɛsiŋ o kɔl?

¹⁴ Baa kɔllo handɔɔ o walta naŋ cho tosaa suŋ suŋndaŋ choo sim ni maa ŋ nɔ lɛ miŋ kindiŋ le chɔɔloo tosaa o wali Chɛhowaa niŋ te? Sako! Ŋ nɔ miŋ kɛsi kpeleŋnda mala naa le hiouwɔɔ lachioo tosaa o yooŋgu kɛndɔɔ dimioo niŋ a o waŋnda pɛɛkoo niŋndaŋ. Ŋ nɔ vɛlɛ miŋ kɛsi kpeleŋndo le waa puaapiliaa a ndepiliaa naa malaa. Nduyɛ ŋ nɔ miŋ kɛsiŋ o kɔl maa, ŋ nɔla miŋ komal kpeleŋndaŋ ndaŋ te o yɔŋ pɛ miŋ tusiŋ okoŋ miŋ handu kɔllo o acheleŋnda choo, kɛ o cho o naapila choo suee le.—Pulɔ. 11:​2; Walta. 20:​35.

15. Kpeleŋnda kuɛɛ la mala yɛ num ma chɔɔlu wa a kɔl kɛndɛ?

¹⁵ Kpeleŋnda kuɛɛ ŋ nɔla yɛ ma kɛsi? Nyuna Chɛhowa le mbo mala num ma sina kpeleŋnda ŋ tiuba ma kɛsi nduyɛ ma komal taŋ. (Pulɔ. 16:​3; Chemi. 1:​5) A nɔla pa ma komal kpeleŋndo opilɛ o kpeleŋnda naŋ soo suŋ a laŋ okɔɔ o  pɛl tasoo o buŋgɛi hei niŋndo? Laŋ la cho ni, kɔɔfale malalaŋndeŋ, kɔɔfale lɔɔlɔɔ leŋ, wallo o Bɛtɛɛl, a yɔŋgɔŋndo le chiɛila kɔɔnaa taŋgullo. Naapum a pɛɛku vɛlɛ suɛi maŋgalɛi sɛnɛiye le yooŋgu kɛndɔɔ dimioo ɔɔ ma kuɛ o tanda nda dimi suɛi maŋgalɛi cheleŋnde wo niŋ. A tiuba ma chɔɔlu sina a kpeleŋndaŋ ndaŋ okɔɔ o buŋgɛi 10 o yauwo hoo niŋ, “Organized to Do Jehovah’s Will,” ɔɔ a dimul bɛnduaa  kundaa o kunda numndo niŋ le ma mala num. * Te o yɔŋ pɛ ma kindiŋ le kpeleŋndaŋ ndaŋ komallo, acheleŋnda cho chɔ maa a cho hiouwɔɔ lachioo tosaa, nduyɛ mi keŋ chɔɔlu num nyaaloo ke.

16. Yɛɛ ŋ nɔ yɛ ma tosa te a tiuba ma komal kpeleŋndo opum suŋ suŋ te?

¹⁶ Kɛ te o yɔŋ yɛ maa a tiuba ma komal suŋ suŋ kpeleŋnda naŋ soo o buŋgɛi hei niŋndaŋ o kɛ kɛ le? Mɛɛ kindiŋ ma kɛsi kpeleŋ cheleŋ o ŋ sina maa a tiuba ma komallo. Tofawɔ kpeleŋndaŋ lapum la ŋ tiuba ma kɛsi nduyɛ ma komal taŋ.

17. A mɛɛ Timoti Tasoo 4:​13, 15 dimi yɛ, yɛɛ puaapilɛnɔɔ nɔ yɛ mbo tosa le mbo simnuŋ wana pɛɛkaa kɛndɛ?

¹⁷ Nuawɔ Timoti Tasoo 4:​13, 15. Te puaapilɛnɔ yiŋndo ŋ cho ni, a kɛsi kpeleŋndo le suɛi chaa yɔŋgoo a waŋnda pɛɛkoo. Le yɛɛ? Kanifuule, le mi wanaa cho num nilaŋ yaŋɔɔ wa sɔla tɔnɔɔ, a nɔ ma “yɔŋguŋ” le halikpeŋ ma chaa diomndaŋ veeloo, suɛi yɔŋgoo, nduyɛ ma simnuŋ wana pɛɛkaa kɛndɛ. Kɛsi kpeleŋndo le pɛɛkoo buŋgɛi walii kɛ kɛ cho o yauwo hoo niŋ, Wou Sɛmbɔɔ le Diomndaŋ Veeloo a Waŋnda Pɛɛkoo, nduyɛ ma kindiŋ le nyɛ ŋ cho pɛɛku wo dɔwɔɔ o wali niŋ. Le hei tosaa, a chua wɔ buŋgɛi walle ipilɛ okoŋ ma pɛɛku ndi nyɛkɛndɛi. Kindiŋ le ndi dɔwɔɔ o wali niŋ te a wa pɛ suɛi yɔŋgoo o bɔŋaŋndaŋ. A nyuna vɛlɛ bɛndu kunda nda yulu iso le wanaa yɔŋgu sɔɔŋ o kundaa niŋnda silaa wo le mbo chɔm num kɛɛsiaalaŋ lapum ɔɔ bɛnduaa kundaa cheleŋ, “a cho wallo tosaa o kala kala le suɛi Mɛlɛkɛi dimioo a waŋnda pɛɛkoo wa.” (1 Timo. 5:​17) O cho ko o sɔɔŋ ŋ pɛɛku o yau koŋ niŋndo choo le ŋ nɔ ma kɛsi kɔllo le, kɛ a nɔ vɛlɛ ma kɛsi kɔllo le wanaa cho num nilaŋ yaŋɔɔ wa malaa mi tiindaŋ ndaa kendu ɔɔ ma dɛɛniaa nda le nyɛ nda cho  pɛɛkoo wo dɔwɔɔ o wali niŋ. Te a tosa keŋ pɛ, nya ndaa kpou cho chɔɔlu wa a kɔl kɛndɛ.

18. Yɛɛ mala yɛ naa miŋ chaa yooŋgu kɛndɔɔ dimioo nyɛkɛndɛi?

¹⁸ Naa kpou sɔla wallo le waŋnda yooŋgu kɛndɔɔ dimullo a nda siiŋguuwo buɛiyaa Chiisuaa. (Maa. 28:​19, 20; Luomaŋ. 10:​14) Baa a yeema pa ma chaa wali sɔvɛ sɔviɔɔ hoo tosaa nyɛkɛndɛi? Mɛɛ chua teleŋndo le ma pɛɛku yauwo hoo Waŋnda Pɛɛkoo, okoŋ ma kɛsi kpeleŋnda mala num le nyɛ ŋ cho pɛɛku wo dɔwɔɔ o wali niŋ. A nɔla vɛlɛ ma saaluŋ kɛɛsiaala mala numndaŋ o Yoomu Naa leKilisiɔŋndo a Wali Pollo—Yau Wali Bɔŋaŋndo niŋ, a o vidueila naŋ tofa o bɔŋaŋnda naŋ bii o lɔɔ tɛɛŋndo. Kindiŋ le kɛɛsiaala yɛ yɛlaŋ soliŋndo kpeku, okoŋ ma hɛli o hiou bɛnda o tanda nyaa niŋndo. Te a dɔu pɛ kɛɛsiaalaŋ ndaŋ o wali niŋ, keŋ cho num mala ma chaa yooŋgu kɛndɔɔ dimioo nyɛkɛndɛi, nduyɛ mi keŋ chuu num nyaaloo tau.—2 Timo. 4:​5.

19. Yɛɛ mala yɛ num ma nɔ suliŋnda leKilisiɔŋndaŋ?

¹⁹ A nɔ ma sina maa, kpeleŋ sɔvɛ sɔvɛ ŋ nɔ ma kɛsi le num malaa ma chaa yooŋgu kɛndɔɔ dimioo wo cho kindiŋndo le suliŋnda leKilisiɔŋndaŋ nɔɔ ni. (Kalee. 5:​22, 23; Kolo. 3:​12; 2 Pitɛ 1:​5-8) Yɛɛ mala yɛ num le kpeleŋ koŋ komallo? Le tamaseliiyo, ŋ dimi wɔ maa a yeema mi laalaŋ numndo chɔɔlu kalu poŋ. Naapum a veelu diomndaŋ o buŋgaŋ ŋpum o yaula naalaŋ niŋ, ŋ nɔ kɛɛsiaala mala num le laalaŋ numndo kindioo laŋ. A nɔla vɛlɛ ma sɔla tɔnɔɔ tau, te a wa pɛ buŋgaŋ biŋgi wa o pɛl Tɛlivisiɔŋ Seiyaa Chɛhowaa fula ipaŋgu o ipaŋgu wo niŋndo tofaa. Buŋgaŋ muŋ chɔm mɛɛ puaapiliaa a ndepiliaa naa cho laalaŋ kala kalaa chɔmndo yɛ, mi che bɛɛ mi simulta yɛ yɛlaŋ la komal nda. Chua teleŋndo le yiyaŋndo mɛɛ tamaseliila ndalaŋ la mala num le laalaŋ kala kalaa nɔɔ yɛ.

20. Yɛɛ tosa yɛ miŋ chɔɔlu wa a kɔl kɛndɛ nduyɛ ŋ kil iso le?

²⁰ I cho tonya maa, naa kpou nɔ yeemɛi le tosaa tau o wali Chɛhowaa niŋ mbo hiou bɛɛ mɛɛ naŋ cho tosaa suŋ suŋ yɛ. O chieeŋ sɛnɛiyo niŋ, ŋ tiu niŋ ba miŋ tosa tau o wali Mɛlɛkaa niŋ. Kɛ haaa mi teleŋ koŋ fuuluu, te ŋ tosa pɛ o naŋ tiuba wo o wali ndɔɔ niŋ, keŋ cho tosa miŋ chɔɔlu wa a kɔl kɛndɛ nduyɛ ŋ kil iso le. I hiou kpou ve, keŋ cho tosa miŋ saŋgala Chɛhowa ‘Mɛlɛka naa kɔl kɛndɔɔ,’ nduyɛ mbo sɔla bɛɛleŋ tau. (1 Timo. 1:​11) Lelaŋ, maa ŋ waŋnuŋ a kɔl kɛndɛ le dilakeŋnaŋnda naŋ nɔ suŋ suŋndaŋ!