1. Yinki mutindu bantu mingi kena kumeka kusala mingi na kisalu ya Yehova?

 BETO kele na mambu mingi ya kusala na yinza yayi mekuma na nsuka. (Mat. 24:14; Luka 10:2; 1 Pi. 5:2) Beto nionso beto kesepelaka kusadila Yehova na makoki na beto. Bantu mingi kena kukipesa samu na kusala diaka mingi na kisalu ya Yehova. Bayankaka kele na lukanu ya kusala lokola bampasudi nzila. Bayankaka kele na lukanu ya kusala na Betele to na kisalu ya kutunga bayinzo ya teokrasi. Mpe bampangi mingi ya babakala kena kusala nionso samu na kundimama lokola bansadisi na kisalu to bankulutu. (1 Tm. 3:1, 8) Yehova kesepelaka mingi ntangu yandi kemonaka mutindu bisadi na yandi kena kusala nionso samu na kusadila yandi!—Nk. 110:3; Yez. 6:8.

2. Yinki mutindu beto lenda kukimona kana beto kena kukokisa ve balukanu na beto yankaka na kisalu ya Yehova?

² Kasi beto lenda banda kulemba nzutu kana beto kena kukokisa ve balukanu na beto na kisalu ya Yehova na manima ya kuvingila mingi. To beto lenda lemba nzutu samu beto kena kubaka ve biyekua yankaka na nkubukulu ya Yehova samu beto mepusana na bamvula to samu na diambu yankaka. (Bin. 13:12) Yau nde diambu kuminaka Melissa. * Yandi vuandaka na nsatu ya kusala na Betele to kukota na Kalasi ya Bamuangisi ya Nsangu ya Kimfumu, kasi yandi metuba: “Munu melutisa bamvula yina kelombamaka samu na yau. Bubu yayi, maluaku yango mekuma kaka lokola bandozi samu na munu. Bantangu yankaka, munu kelembaka nzutu.”

3. Yinki mambu bampangi yankaka fueti sala samu bandimama na kubaka biyekua?

³ Bampangi yankaka yina kele bantuenia mpe na mavimpi ya mbote fueti kula na kimpeve mpe kukudisa bikadulu yankaka tekila  babaka biyekua yankaka. Na kifuani, balenda vuanda mayele, bantu yina kebakaka banzengolo na nsualu, mpe bakevuandaka pene ya kusala; kasi bafueti longuka kuvuanda na ntima yinda, kusala kisalu na kukenga, to kuzitisa bantu yankaka. Kana nge mesala ngolo samu na kukudisa bikadulu yango, bampangi lenda pesa nge biyekua. Beto tadila kifuani ya Nick. Ntangu yandi vuandaka na bamvula 20, yandi lembaka nzutu samu bavuandaka pona yandi ve lokola nsadisi na kisalu. Yandi metuba, “Munu kukimonaka lokola kaka yakele na diambu mosi yina kena kutambula mbote ve na luzingu na munu.” Kasi Nick lembaka ve kukudisa bikadulu yina mebonga na yandi. Yandi salaka nionso yina yandi lendaka sala na kimvuka mpe na kisalu ya kusamuna. Bubu yayi, yandi kele mosi ya bampangi ya Komite ya filiale.

4. Yinki beto ketadila na disolo yayi?

⁴ Nge kele ya kulemba nzutu samu nge kokisa ntete ve mosi ya balukanu na nge ya kimpeve? Kana yakele mutindu yina, tubila Yehova banguilu na nge. (Nk. 37:5-7) Katula yau, lomba makanisi na bampangi yina kele ya kukula na kimpeve samu bazabisa nge mutindu nge lenda kudisa kisalu na nge samu na Nzambi, mpe na manima sala nionso yina nge lenda samu na kusadila malongi na bau. Kana nge mesala plina, nge lenda baka diluaku yango to kukokisa lukanu yango. Kasi lokola Melissa, yina beto tubilaka na ebandeli, mbala yankaka dikoki kele ve samu na nge na ntangu yayi samu na kusala yina nge kena kusepela kusala samu na Yehova. Yinki nge kesala? Yinki mutindu nge lenda tanina kiese na nge? Samu na kupesa mvutu na kiuvu yango, disolo yayi ketubila (1) yinki lenda pesa nge kiese, (2) yinki mutindu nge lenda buela diaka kiese na nge, mpe (3) balukanu ya yinki mutindu nge lenda kukitudila samu na kubuela kiese na nge.

5. Samu na kuvuanda na kiese, na yinki beto fueti tula makanisi na beto? (Longi 6:9)

⁵ Mutindu Longi 6:9 memonisa yau, beto lenda mona kiese kana beto mesosa yau na kisika ya mbote. (Tanga.) Muntu yina kena kusepela na ‘bima yina meso kena kumona’ yandi kesepelaka na yina kele na yandi, na kifuani, luzingu yina yandi kele na yau. Kasi, muntu yina kena kusosa bima yina yandi kele na makoki ya kubaka ve, yandi kevuanda ve na kiese. Na yau, yinki dilongi beto mebaka? Samu na kuvuanda na kiese, beto fueti tula makanisi na yina beto kele na yau mpe na balukanu yina beto kele na dikoki ya kukokisa.

6. Yinki kifuani beto ketadila mpe na yinki beto ketula dikebi na beto?

⁶ Yalenda salama ti muntu vuanda na kiese na bima yina yandi kele na yau? Bantu mingi kekanisaka ti yalenda salama ve, samu beto kesepelaka kutatamana kulonguka kusala mambu ya yimpa. Kasi, yalenda salama. Beto lenda sepela na yina beto kele na yau. Yinki mutindu beto lenda sala yau? Samu na kundima yau, beto tadila kifuani ya Yesu ya batalanta, yina kele na Matayo 25:14-30. Beto ketula dikebi na dilongi yina beto lenda baka na diambu metadila mutindu ya kuvuanda na kiese mpe kubuela kiese na beto na kutadila yina beto kele na yau bubu yayi.

7. Tubila na nkufi kifuani ya Yesu ya batalanta.

⁷ Kifuani yango ketubilaka bakala mosi yina vuandaka kuenda na vuayaje. Tekila yandi kuenda, yandi bokilaka bananga na yandi mpe yandi pesaka mosi mosi na bau batalanta samu na kusala mumbongo. * Na kutadilaka makoki na bau, bakala yango pesaka batalanta tanu na nanga mosi, batalanta zole na nanga yankaka, mpe  talanta mosi na nanga yina yankaka. Bananga zole ya ntete salaka bangolo mingi samu na kubuela diaka batalanta yankaka na mumbongo na bau. Kasi nanga yina ya tatu salaka ata kima mosi ve samu na batalanta yina bapesaka yandi, mpe mfumu katulaka yandi na kisalu.

8. Na kifuani ya batalanta, samu na yinki nanga ya ntete lendaka vuanda na kiese?

⁸ Nanga ya ntete monaka ti yavuandaka diluaku ya mbote samu na yandi na mutindu mfumu pesaka yandi batalanta tanu. Yavuandaka mbongo mingi, mpe yakena kumonana ti mfumu vuandaka tudila yandi mpenza ntima! Kasi bosi nanga ya zole? Yandi lendaka lemba nzutu mutindu yandi bakaka ve batalanta mutindu mosi na nanga yina ya ntete. Kasi yinki yandi salaka?

9. Yinki Yesu tubaka ve samu na nanga ya zole? (Matayo 25:22, 23)

⁹ Tanga Matayo 25:22, 23. Yesu tubaka ve ti nanga ya zole kumaka kukitungisa mpe na makanisi ya yimbi samu yandi bakaka kaka batalanta zole. Mpe Yesu tubaka ve ti nanga yango vuandaka nionga samu na diambu yango na bampova yayi: ‘Yau kaka munu mebaka? Samu na yinki, munu diaka munu kele na makoki mutindu mosi na nanga yina mebaka batalanta tanu! Kana mfumu na munu sepela na munu ve, yalenda vuanda mbote munu zika batalanta yango zole mpe kusala mambu na munu mosi.’

10. Yinki nanga ya zole salaka na batalanta na yandi?

¹⁰ Mutindu mosi na nanga ya ntete, nanga ya zole bakaka ve na diseki kiyekua yina bapesaka yandi mpe yandi salaka kisalu ya ngolo samu na mfumu na yandi. Mpe yau salaka ti yandi bimisa diaka na zulu na yau batalanta zole samu na mfumu na yandi. Nanga yango bakaka lusakumunu samu na mayele mpe kisalu na yandi ya ngolo. Yandi sukaka kaka ve na kupesa mfumu  na yandi kiese kasi mfumu na yandi kumisaka yandi mpe yandi pesaka yandi diaka biyekua mingi!

11. Yinki mutindu beto lenda buela kiese na beto?

¹¹ Mutindu mosi mpe, beto lenda buela kiese na beto na kukipesaka na yina bapesaka beto beto sala na kisalu ya Yehova. ‘Kukipesa mingi’ na kisalu ya kusamuna, mpe sala kisalu ya ngolo na kimvuka. (Bis. 18:5; Ebr 10:24, 25) Bongisaka mbote balukutakanu samu nge pesa bakomantere yina kekindisa bantu yankaka. Baka na mfunu badevuare yina bakepesaka nge na lukutakanu ya katikati ya sabala. Kana bamelomba nge nge pesa lusadusu na kisalu mosi na kati ya kimvuka, kokisa yau na ntangu mefuana mpe na mutindu ya mbote. Kukanisa ve ti kisalu bamepesa nge kele na mfunu ve mpe ti yabonga ve nge lutisa ntangu na nge na yau. Sala nionso samu na kukudisa makoki na nge. (Bin. 22:29) Ntangu nge kena kusala bangolo na kisalu ya Yehova, kinkundi na nge na yandi kekuma ngolo mpe nge kekuma na kiese mingi. (Bag. 6:4) Yakevuanda diaka pete samu na nge nge monisa kiese ntangu bayankaka kena kubaka biyekua yina nge kesosaka kubaka.—Bar. 12:15; Bag. 5:26.

12. Yinki sadisaka Nick na Melissa samu bakumisa kiese na bau ngolo?

¹² Nge kena kuzaba diaka Melissa, mpangi ya nketo yina vuandaka na nsatu ya kusala na Betele to kukota na Kalasi ya Bamuangisi ya Nsangu ya Kimfumu? Atako yandi vuandaka ve na makoki ya kukokisa bansatu na yandi, yandi metuba: “Munu kemekaka kukipesa mpenza na kisalu na munu ya mpasudi nzila mpe munu kemekaka kusadila mitindu nionso ya kisalu ya kusamuna. Yanatinaka munu kiese mingi.” Mpe yinki mutindu Nick nungaka kulemba nzutu na yandi ntangu bavuandaka pona yandi ve lokola nsadisi na kisalu? “Muvuandaka tula makanisi na munu na maluaku yina muvuandaka baka—kupesa maboko na kisalu ya kusamuna mpe kupesa bakomantere ya lukindusu na balukutakanu. Mufulusaka diaka formilere samu na kusala na Betele mpe mvula yina landaka babokilaka munu samu mukuenda sala na Betele.”

13. Yinki kesalama kana nge mekukipesa na kiyekua yina nge kele na yau bubu yayi? (Longi 2:24)

¹³ Kana nge mekukipesa mpenza na kiyekua yina nge kele na yau bubu yayi, nge kebaka biyekua ya nene na bilumbu kena kuiza? Yalenda salama, mutindu yasalamaka samu na Nick. Kasi kana yasalama mutindu yina ve, mutindu mosi na Melissa, kiese na nge kebuelama kaka, mpe nge kevuanda na kiese mingi samu na yina nge kena kusala samu na Yehova. (Tanga Longi 2:24.) Diaka, nge kevuanda na kiese mingi samu nge mezaba ti nge kena kusepedisa Mfumu na beto, Yesu Klisto.

14. Yinki beto fueti zimbakanaka ve ntangu beto kena kukanisa balukanu na beto ya kimpeve?

¹⁴ Kutula makanisi na beto na biyekua yina beto kele na yau bubu yayi zola monisa ti beto fueti meka ve kusala diaka mingi na kisalu ya Yehova? Ve! Beto lenda mpe beto fueti kukitudila balukanu ya kimpeve yina kesadisa beto beto kuma bansamuni mpe banlongisi ya makoki mpe beto sadisa bampangi na beto. Beto kekokisa balukanu yango kana beto kena kutula makanisi na beto na kusadisa bantu yankaka na nduenga mpe na kumikitisa na kisika ya kutula makanisi na mambu ya beto mosi.—Bin. 11:2; Bis. 20:35.

15. Yinki kele ndambu ya balukanu yina lenda buela kiese na nge?

¹⁵ Yinki balukanu nge fueti kukitudila? Lomba Yehova sadisa nge samu nge zaba balukanu yina nge kevuanda na dikoki ya kukokisa. (Bin. 16:3; Yak. 1:5) Nge lenda meka kukokisa mosi ya balukanu yina bametubila na  paragrafe ya ntete ya disolo yayi—kukuma mpasudi nzila ya ntangu fioti to ya ngonda na ngonda, kusala na Betele, to kupesa maboko na kisalu ya kutunga? To nge lenda longuka ndinga yankaka samu na kumuangisa nsangu ya mbote to kukuenda  samuna na terituare ya buala yankaka. Nge lenda longuka mambu mingi yina metadila balukanu yango na kikapu 10 ya mukanda Tobongisami mpo na kosala mokano ya Yehova mpe solola na bankulutu ya kimvuka na beno. * Kana nge kena kusala nionso samu na kukokisa balukanu yango, bantu nionso kevuanda na dikoki ya kumona ti nge kena kukuenda na ntuala mpe kiese na nge kebuelama.

16. Yinki nge lenda sala kana nge kele ve na dikoki ya kukokisa lukanu mosi

¹⁶ Kasi yinki nge kesala kana nge kele ve na dikoki ya kukokisa mosi ya balukanu beto metubila? Sekele kele ya kusosa lukanu yankaka, yina nge kevuanda na dikoki ya kukokisa. Tadila mambu yayi melanda.

17. Na kutadila 1 Timoteo 4:13, 15, yinki mpangi ya bakala lenda sala samu na kukuma nlongisi?

¹⁷ Tanga 1 Timoteo 4:13, 15. Kana nge kele mpangi ya bakala yina mebakaka mbotama, nge lenda sala bangolo samu na kukudisa makoki na nge ya kutuba mpe kulonga. Samu na yinki? Samu ‘kukipesa na’ nge na kutanga, kutuba mpe kulonga kesala ti nge vuanda na dikoki ya kusadisa bantu yina kena kuwa nge. Meka kukitudila balukanu ya kulonguka mpe kusadila konso dilongi yina kele na mua mukanda Bongisá ndenge na yo ya kotánga mpe ya koteya. Baka ntangu ya kulonguka konso dilongi, sala bangalasisi na yinzo, mpe sadila yau ntangu nge kena kusala kimpovi. Lomba mabanza yankaka na nsadisi samu na kupesa malongi to bankulutu yankaka ‘yina kesalaka ngolo na kutuba mpe na kulonga.’ * (1Tm. 5:17) Kutula makanisi kaka ve na  mutindu ya kusadila dilongi ya mukanda yango, kasi sosa diaka kusadisa bantu yina kena kuwa nge bakindisa kiminu na bau to basadila mambu bakena kulonguka. Na kusalaka plina, nge kebuela kiese na nge kintuadi na bau.

18. Yinki lenda sadisa beto beto kokisa balukanu na kisalu na beto?

¹⁸ Beto nionso beto kele na kiyekua ya kulonga mpe kukumisa bantu banlonguki. (Mat. 28:19, 20; Bar. 10:14) Nge kesepela kusadila makoki na nge samu na kisala yango ya mfunu? Kukitudila balukanu ntangu nge kena kulonguka to kusadila mambu yina nge kena kulonguka na mua mukanda Koteya. Nge lenda baka mabanza yankaka na mua mukanda Mokanda ya likita Bomoi mpe mosala ya bakristo mpe na bavideo ya nkufi yina bakemonisaka na balukutakanu ya katikati ya sabala. Meka makanisi ya mutindu na mutindu samu na kuzaba yina lendaka simba. Na kusadilaka mabanza yango, kondua ntembe, nge kekuma nsamuni mpe nlongisi ya makoki mpe yakepesa nge kiese mingi.—2Tm. 4:5.

19. Yinki mutindu nge lenda kudisa bikadulu ya Buklisto?

¹⁹ Kuzimbakana ve ti mosi na kati ya balukanu yango ya mfunu yina nge kekukitudila kele samu na kukudisa bikadulu yina kesepedisaka Nzambi. (Bag. 5:22, 23; Kol. 3:12; 2Pi. 1:5-8) Yinki mutindu nge kesala yau? Kanisa ntete na kifuani, nge kele na nsatu ya kukuma na kiminu ya ngolo. Nge lenda tanga masolo yina ketubilaka mutindu ya kukumisa kiminu ngolo na mikanda na beto. Nge lenda tala diaka masolo ya TV JW yina kemonisaka kifuani ya kiminu yina bampangi monisaka ntangu bakutanaka na mambu ya mpasi. Na manima, tadila mutindu yina yalenda sadisa nge nge landa kifuani na bau na luzingu na nge.

20. Yinki mutindu beto lenda buela kiese na beto mpe kukitisa banguilu ya kulemba nzutu?

²⁰ Kondua ntembe, beto nionso beto kesepelaka kusala mingi samu na Yehova kuluta yina beto kena kusala bubu yayi. Na yinza ya yimpa ya Nzambi, beto kevuanda na dikoki ya kusadila yandi mingi kuluta. Tekila ntangu yango koka, kana beto mesala nionso yina beto lenda sala bubu yayi, beto lenda buela kiese na beto mpe beto kekitisa banguilu ya kulemba nzutu. Yina meluta mfunu, beto kepesa lokumu mpe nkembo na Yehova ‘Nzambi na beto ya kiese.’ (1Tm. 1:11) Na yau, beto sepela na maluaku yina beto kele na yau!