1. Yinki mingi na kati ya beto ke na sosá kusala samu na Yehova?

BIMA ya kusala ke lutila kukuma kaka mingi yina yinza yayi ke na kwendá na nsuka ya yawu. (Mat. 24:14; Luke 10:2; 1 Pi. 5:2) Beto nyonso ke zolá kusala mingi samu na Yehova. Na kati ya kimvuka ya Yehova, ya ke na ba yina ke na nsatu ya kukuma bapionye, kukwenda na Betel, to kutula diboko samu na kutunga bayinzo ya organizasion. Dyaka, bampangi ya bakala mingi ke na salá bangolo samu na kukuma bisadisi (assistant) to bakuluntu. (1 Tim. 3:1, 8) Yehova ke na kilengi ya kutala nsatu ya bisadi ya yandi ya kusala mingi samu na yandi.—Nku. 110:3; Iza. 6:8.

2. Yinki ya lenda sala beto si beto ke na lendá ve kulungisa dikanisi ya beto ya kusala mingi samu na Yehova?

² Kasi, si ntangu mingi me luta mpe beto me lungisa ve yina beto kanisá kusala samu Yehova, ya lenda lembisa beto. Beto lenda vanda mpe ya kulemba si aje to bima ya nkaka ke na kangá beto nzila ya kusala yina beto ke na sosá kusala samu na Yehova. (Bin. 13:12) Ni mambu ya faso yayi kuminá Melissa. * Yandi vandá na nsatu ya kukwenda na Betel to kusala École pour évangelisateurs du Royaume. Yandi me zonza: “Mu me luta aje yina ba ke lombá samu na kusala bima yayi. Na yawu, bantangu ya nkaka, ya ke lembisá munu na kutala ti mu ke lenda ve kulungisa dikanisi ya munu.”

3. Yinki ba ya nkaka lenda vanda na nsatu ya kusala samu ba pesa bawu bisalu na kati ya kimvuka?

 ³ Bampangi ya nkaka yina ke jeune mpe na sante ya mbote, lenda vanda na nsatu ya kukula ntete na kimpeve, samu ba pesa bawu bisalu ya nkaka na kati ya kimvuka. Na kifwani, ba lenda vanda na mayela, na ngolo ya kusala bamambu na mbangu mpe na nsatu ya kusala mingi. Kasi ba zolá longoka kuvanda na ntima ya yinda, kusala bamambu na faso ya kulunga mpe kulakisa buzitu na bampangi. Si nge sala bangolo ya nge samu na kukulisa bifu ya mbote yayi, ba lenda pesa nge baresponsabilite, ntangu ya nkaka, na ntangu yina nge vandá vingila dyaka ve yawu. Beto zonzila mambu yina kuminá Nick. Ntangu yandi vandá na bamvula 20, yandi vandá vingila kukuma kisadisi. Kasi samu ba pesá ve yandi responsabilite yayi, yandi nyongá mingi. Yandi zonzá: “Mu banda kanisa ti mu vandá sala ve bamambu na faso ya mbote.” Kasi Nick lembá ve, yandi kontinyeke kukulisa bifu ya mbote. Yandi vandá sala bangolo ya yandi nyonso na kati ya kimvuka, mpe na kisalu ya predikasion. Bubu yayi, yandi ke mosi ya bampangi ya komite ya filiale.

4. Yinki beto ke zonzila na artikle yayi?

⁴ Nge ke kwandi ya kulemba samu nge ke na lendá ve kusala kima yina nge me kanisa kusala samu na Yehova? Si ni faso yina, zonzila mambu ya nge na Yehova. (Nku. 37:5-7) Nge lenda lomba mpe na bampangi yina zaba mingi na kimpeve, ba sadisa nge na kubongisa faso ya nge ya kusala bamambu. Sala bangolo ya nge nyonso samu na kusadila mambu yina ba ke zonzila nge. Si nge sala yawu, nge ke lenda kulungisa dikanisi ya nge. Kasi faso Melissa yina beto me zonzila, nzila ya kusala yina beto me kanisa kusala, lenda vanda ya kukangama. Na yawu, yinki nge lenda sala samu na kubumba kilengi ya nge? Samu na kupesa reponse na kesion yayi beto ke zonzila 1) bima yina lenda pesa nge kilengi, 2) faso ya kukulisa kilengi ya nge, mpe 3) bamambu yina nge lenda kanisa kusala samu kilengi ya nge kula dyaka.

5. Na kuvanda na kilengi beto zolá tula meso na yinki? (Longi 6:9)

⁵ Longi 6:9 ke lakisá beto yinki ya kusala samu na kuvanda na kilengi. (Tanga.) Muntu yina ke ‘sepelá na bima yina meso ya yandi ke talá’ ke vandá na kilengi na yina ke na yandi. Kasi, muntu yina ke kwendá tulá meso na bima yina ke ve na yandi, ke vanda ata fioti ve na kilengi. Yinki mambu yayi ke na longá beto? Samu na kuvanda na kilengi, beto zolá tula meso na bima yina ke na beto to yina beto ke na ngolo ya kuzwa.

6. Wapi disolo beto mase zonzila, mpe yinki ya ke longa beto?

⁶ Beto bantu, beto ke zolá ntangu nyonso kusala bima ya malu-malu. Na yawu, beto lenda vanda kwandi na kilengi kaka na yina beto ke na salá bubu yayi? Ee, ya lenda salama. Bima yina ‘meso ya beto ke talá’ lenda pesa beto kilengi. Na wa’ faso? Na kuzaba yawu, beto zonzila disolo ya Yesu ya batalanta to maboke ya nene ya mbongo, yina ke na Matayi 25:14-30. Na disolo yayi, beto ke longoka yinki ya kusala samu na kuzwa kilengi mpe kukulisa kilengi ya beto na yina ke deja na beto.

7. Zonzila na bunkufi disolo ya Yesu ya batalanta.

⁷ Na disolo ya yandi, Yesu zonzá ti ya vandá na bakala mosi yina vandá kwenda na bwala ya ntama. Avan yandi kwenda, yandi bokilá bisadi ya yandi, mpe pesá na mosi na mosi ya bawu batalanta samu ba sala komerse. * Bakala  yina zabá ti bisadi ya yandi vandá ve na ngolo mpe mayela ya faso mosi. Na yawu, yandi pesá kisadi ya ntete, batalanta tanu (5), ya zole batalanta zole, mpe na kisadi ya tatu, talanta mosi. Kisadi ya ntete na ya zole salá bangolo ya bawu samu mbongo ya mfumu ya bawu kuma mingi. Kasi kisadi ya tatu salá ata kima na mbongo yina ba pesak’ yandi. Ni na yina, mfumu bingisak’ yandi.

8. Ntangu ya nkaka yinki vandá sala ti kisadi ya ntete ya disolo ya Yesu vanda na kilengi?

⁸ Kisadi ya ntete vandá na kilengi mingi ntangu mfumu ya yandi pesak’ yandi batalanta tanu. Ya vandá mbongo ya mingi. Ya vandá lakisa ti mfumu vandá sala yandi konfianse. Kasi yinki beto lenda zonza samu na kisadi ya zole? Ata yandi kuzwá kaka batalanta zole, yandi nyongá ve. Beto tala yinki yandi salá.

9. Yinki Yesu zonzá ve samu na kisadi ya zole? (Matayi 25:22, 23)

⁹ Tanga Matayi 25:22, 23. Yesu zonzá ve ti kisadi ya zole dasuká to nyongá samu ba pesak’ yandi kaka batalanta zole. Mpe Yesu lakisá ve ti kisadi yango zonzá: ‘Kaka ni yayi ba me pesa munu? Mpangi ya munu yina ba me pesa batalanta tanu, yandi me lutila munu na yinki? Si mfumu ke na talá ti mu zaba ve kisalu, samu na yinki mu ke kufwa nzutu samu mbongo ya yandi kuma mingi? Mu lenda sala kima samu na munu mosi!’

10. Yinki kisadi ya zole salá na batalanta yina ba pesak’ yandi?

¹⁰ Samu na kisadi ya zole, kisalu yina mfumu pesak’ yandi vandá ve kima ya fioti. Ni na yawu yandi tulá ntima ya yandi nyonso na kisalu yango. Yandi salá nyonso samu na kunatina  mfumu ya yandi batalanta zole na zulu ya yina ba pesak’ yandi. Bangolo ya yandi vandá ve ya mpamba. Mfumu sepelá na kisalu yina yandi salá mpe bwelá yandi baresponsabilite ya nkaka.

11. Wa’ faso beto lenda kulisa kilengi ya beto?

¹¹ Faso mosi mpe, beto lenda kulisa kilengi ya beto si beto tula bangolo nyonso na bisalu yina ba ke pesá beto. ‘Lutisa ntangu mingi’ na kisalu ya predikasion mpe na bisalu ya nkaka na kati ya kimvuka. (Bis. 18:5; Ebr. 10:24, 25) Bongisa bakomentere yina nge ke pesá na balukutakanu samu ya pesa bampangi ngolo. Sala na faso ya mbote badevware yina ba ke pesá nge na balukutakanu. Si ba me lomba na nge na kusala kisalu mosi na kati ya kimvuka, kwiza na heure mpe sala yawu na faso ya kulunga. Kisalu ni kisalu yina ba ke pesa nge, ata ya ke na talaná fioti, kubakila ve yawu faso kima ya mpamba. Fioti-fioti, sosa kubongisa faso ya nge ya kusala bamambu. (Bin. 22:29) Si nge sala bangolo nyonso yayi samu na Yehova, kikamarade ya nge na yandi ke kula, kilengi ya nge mpe ke kula. (Gal. 6:4) Ya ke sala mpe ti ya vanda ve mpasi na nge na kusepela na bampangi yina me kuzwa baresponsabilite yina nge ke na vingilá.—Rom. 12:15; Gal. 5:26.

12. Yinki Melissa na Nick salá samu na kukulisa kilengi ya bawu?

¹² Beto zonzila dyaka Melissa, mpangi ya beto ya kento yina vandá na nsatu ya kukwenda na Betel to ya kusala École pour évangelisateurs du Royaume. Ata yandi lendá ve kulungisa dikanisi ya yandi, yandi me zonza: “Mu ke salá mingi na kisalu ya munu ya pionye mpe mu ke meká bafaso ya nkaka ya kupreche. Kusala nyonso yayi me natina munu kilengi mingi.” Beto zonzila mpe Nick, mpangi ya bakala yina nyongá ntangu yandi kumá ve kisadisi. Yandi me zonza: “Mu tulá bangolo ya munu nyonso na yina mu lenda sala. Na kifwani, mu vandá sala mingi na kisalu ya predikasion, mpe na balukutakanu, mu vandá sosa kupesa bakomentere ya mbote. Mu soniká na Betel samu ba bokila munu kuna, mpe mvula yina landá, ba ndimá munu.”

13. Yinki nge ke kuzwa si nge tula bangolo ya nge na yina nge lenda sala bubu yayi? (Longi 2:24)

¹³ Ya zola zonza kwandi ti si nge sala na faso ya kulunga bisalu yina ba ke pesá nge, ba ke bwela nge bima ya nkaka ya kusala? Bantangu ya nkaka faso Nick, nge lenda kuzwa yawu. Kasi, ata faso Melissa nge lungisa ve dikanisi ya nge, nge lenda kulisa kilengi ya nge mpe kusepela na yina nge ke na salá samu na Yehova. (Tanga Longi 2:24.) Kilengi ya beto ke lutilá dyaka yina beto me zaba ti, kisalu ya beto ke na sepelisá Mfumu ya beto Yesu.

14. Yinki beto zolá sosa kusala?

¹⁴ Kusala na faso ya mbote bisalu yina ke deja na beto zola zonza kwandi ti beto lenda sosa ve kusala bima ya nkaka samu na Yehova? Ve! Beto zolá sosa kusala bima yina ke sadisa beto na kubongisa faso ya beto ya kupreche, ya kulonga bantu mpe ya kusadisa dyaka ya kulutila bampangi. Beto ke lenda kusala yawu si beto kanisa ntete na bampangi, kasi na beto mosi ve.—Bin. 11:2; Bis. 20:35.

15. Wapi bima nge lenda sosa kusala samu na kukulisa kilengi ya nge?

¹⁵ Wapi bima nge lenda kanisa kusala? Sambila Yehova sadisa nge na kuzaba yinki nge ke na ngolo ya kusala. (Bin. 16:3; Zaki 1:5) Nge lenda kanisa kwandi kukuma pionye ya ntangu fioti to ya ntangu nyonso, kukwenda na Betel to kutula diboko na kisalu ya kutunga bayinzo ya organizasion? Nge lenda longoka kwandi ndinga ya nkaka samu na kupreche na bantu mingi to samu na kukwenda preche na  teritware yina ke ntama? Na kuzaba faso ya kusala bamambu nyonso yayi, tanga chapitre 10 ya buku Organisés pour faire la volonté de Jéhovah mpe solola na bakuluntu ya kimvuka ya nge. * Si nge sosa kusala bamambu yayi beto me zonzila, bampangi ke tala ti nge ke na kulá na kimpeve mpe kilengi ya nge mosi ke kula.

16. Yinki nge lenda sala bubu yayi si nge ke na lendá ve kusala bima yina nge me kanisa kusala samu na Yehova?

¹⁶ Kasi yinki beto lenda sala si bubu yayi beto ke na lendá ve kusala bamambu yina beto me zonzila na paragrafe yina me luta? Sosa kusala bima yina me lunga na bangolo ya nge. Beto zonzila bima yango.

17. Faso ke zonzak’ yawu 1 Timote 4:13, 15, wa’ faso mpangi ya bakala lenda bongisa faso ya yandi ya kulonga?

¹⁷ Tanga 1 Timote 4:13, 15. Si nge ke mpangi ya bakala yina ke na bateme, nge lenda sosa kubongisa faso ya nge ya kutanga mpe ya kulonga. Samu na yinki? Samu ti si nge sala yawu, nge lenda sadisa ba yina ke kuwa nge. Sosa kulongoka mosi na mosi ya bileso ya mukanda Applique-​toi à la lecture et à l’enseignement. Kusosa ve kulongoka nyonso na mbala mosi. Longoka ntete mbote-mbote mosi, mpe na manima, sadila yawu ntangu nge ke sala badiskur. Lomba konseye na mulongi ya zole to bakuluntu ya nkaka “yina ke salá kisalu ya kuzabisa Mambu ya Nzambi mpe kulongisa bampangi.” * (1 Tim. 5:17) Susi ya nge zolá vanda ve kaka ya kusadila bileso yina nge me longoka. Kasi sosa mpe kukulisa kiminu ya ba yina ke na wá nge, mpe kunata bawu na kusadila  bamambu yina nge ke na zonzá. Si nge sala yawu, nge ke kulisa kilengi ya nge mosi na ya bampangi.

18. Wa’ faso beto lenda bongisa faso ya beto ya kupreche?

¹⁸ Yehova pesá na beto nyonso kisalu ya kupreche mpe ya kulonga bantu. (Mat. 28:19, 20; Rom. 10:14) Yinki nge lenda sala samu na kubongisa faso ya nge ya kusala kisalu yayi? Longoka mukanda Applique-​toi à la lecture et à l’enseignement mpe sosa bima yina nge ke sadila. Nge lenda kuzwa bima ya nkaka na kati ya Cahier pour la réunion vie Chrétienne et ministère mpe na bavideo ya predikasion yina beto ke talá na balukutakanu. Sosa kusadila bametode nyonso yina ba ke pesá samu na kuzaba yina ke simba na teritware ya beno. Kusadila bamambu yayi, ke sadisa nge na kukulisa mayela ya nge na predikasion, mpe kilengi ya nge ke kula.—2 Tim. 4:5.

19. Wa’ faso nge lenda kulisa bifu yina ke sepelisa Nzambi?

¹⁹ Mosi ya bima yina beto lenda kanisa kusala, ni kukulisa bifu ya mbote na bantima ya beto. (Gal. 5:22, 23; Kol. 3:12; 2 Pi. 1:5-8) Wa’ faso nge lenda sala yawu? Na kifwani, si nge na nsatu ti kiminu ya nge kula, nge zolá tanga mikanda ya beto yina ke lakisá faso ya kukulisa kiminu. Na JW Télédiffusion nge lenda kuzwa ba-ekzample ya bampangi ya kento na ya bakala yina lakisá kiminu ya ngolo na mantwala ya bampasi ya bafaso nyonso. Na manima, tala faso nge lenda landa kifwani ya bawu na luzingu ya nge.

20. Yinki beto lenda sala samu na kunyonga ve kasi na kubumba kilengi ya beto?

²⁰ Beto nyonso ke na nsatu ya kusala mingi samu na Yehova kulutila yina beto ke na salá bubu yayi. Na yinza ya malu-malu, beto nyonso ke sala ya kulutila samu na Yehova. Avan ntangu yina kuma, beto tula bangolo ya beto nyonso na kisalu ni kisalu yina lenda vanda na beto bubu yayi. Si beto sala yawu, beto ke nyonga ve na yina beto lenda sala ve. Kasi beto ke bumba kilengi ya beto. Ya kulutila, beto ke pesa nkembo na Yehova ‘Nzambi ya beto ya kilengi.’ (1 Tim. 1:11) Na yawu, beto sepela na bisalu nyonso yina beto ke na salá!