1. Adieyi mpangi zayingi bevanganga muna wokesa e salu kiau kia umbangi?

EKOLO e nza yayi ya Satana ifinamanga ku mfoko, salu kiayingi tuna kiau. (Mat. 24:14; Luka 10:2; 1 Pet. 5:2) Yeto awonso tuzolele vanga mawonso tulenda muna salu kia Yave. Mpangi zayingi mu wokesa bena e salu kiau kia umbangi. Akaka bazolele sala se aviti a nzila. Vo i akaka, bazolele kwenda sadila kuna Betele yovo muna salu kia tunga e fulu ya nsambila. Mpangi zayingi mpe zamakala besianga e ngolo muna kuyifwanisa se selo ya salu yovo akuluntu. (1 Tim. 3:1, 8) Yave oyangalalanga mona o luzolo bena lwau e selo yandi lwa kunsadila.—Nku. 110:3; Yes. 6:8.

2. Aweyi tulenda mona avo ke tulendele lungisa makani meto ko muna salu kia Yave?

² Kansi, ezak’e ntangwa ke tulendanga lungisa makani meto ko vana vau, nze una tuzolele. Muna kuma kiaki, tulenda kendalala. Tulenda mpe kendalala avo ke tulendele lungisa e kani dieto ko mu kuma kia ntela tuna yau yovo mambu mankaka. (Nga. 13:12) I diau diavangama kwa mpangi ankento Melissa. * Wakala ye kani dia sadila kuna Betele yovo kota Sikola ya Ateleki a Kintinu. Kansi wavova vo: “Owau kina diaka mu ntela ko ya kuyifwanisa muna salu yayi. Kuna kwa mono, o malau mama se ndozi ankatu. Ezak’e ntangwa, e diambu diadi ditoma kunkendelekanga.”

3. Nkia mambu mpangi zankaka bafwete lungisa muna tambula e kiyekwa?

 ³ Kuna kwa aleke akaka bena yo vimpi wambote, divavanga vo bazikuka muna mwanda yo yima e fu yambote ina ikubafwanisa mu tambula e kiyekwa. Kasikil’owu, aleke akaka bena ye ngangu, bazeye baka e nzengo mu nzaki ye bazola sala. Kansi, nanga bafwete yima fu kia luzindalalu, kala ye ndekwa za vangila mambu yo songa luzitu. Avo ovangidi e ngolo za yima e fu yambote, olenda tambula e kiyekwa muna ntangwa kwayindulanga ko. Tala dina diavangama kwa mpangi Nick. Vava kakala ye kimbuta kia mvu 20, watoma kendalala wau kalembi tumbikwa se selo kia salu. Wavova vo: “Yayindulanga vo diambu diambi yavanganga.” Kansi, mpangi Nick kadimbula vuvu ko. Wakwamanana toma lungisa yiyekwa kakala yau. O unu, osalanga se mosi muna Afidi a Vula.

4. Nkia mambu tulongoka mu longi diadi?

⁴ Nga wakendalala wina wau vo yamu wau kwalungisi makani maku ko muna salu kia Yave? Avo i wau, samba kwa Yave yo kunzayisa una omonanga. (Nku. 37:5-7) Vana ntandu, lomba luludiku kwa mpangi zazikuka, kimana basonga dina olenda vanga muna wokesa e salu kiaku kia umbangi. Sia mpe ngolo muna sadila tuludiku bekuvana. Muna mpila yayi, olenda tambula kiyekwa muna nkutakani yo lungisa e kani diaku. Kansi, nze dina diavangama kwa mpangi Melissa ona tuyikidi kala, nanga owau, ke dilendakana diaka ko mu lungisa e kani diaku. Avo i wau, aweyi olenda kwamanena kadila ye kiese? Muna baka e mvutu za kiuvu kiaki, muna longi diadi, tulongoka (1) dina dilenda kututwasila e kiese, (2) una tulenda wokesela e kiese kieto ye (3) makani tulenda kuyisila muna wokesa kiese kieto.

5. Muna kala ye kiese, nkia diambu tufwete siang’e sungididi? (Kimpovi 6:9)

⁵ E sono kia Kimpovi 6:9, kisonganga dina dilenda kututwasila e kiese. (Tanga.) O muntu ona oyangalelanga “ina imonanga o meso” ozolanga ina kena yau, i sia vo, oyangalelanga e zingu kena kiau owau. Kansi, ndiona olandanga e zolela, i sia vo, ovingilanga e lekwa kina kalendi kala kiau ko, ke kalanga ye kiese ko. Adieyi tulongokele muna sono kiaki? Muna kala ye kiese, tufwete yangalelanga ina tuna yau yo kuyisila makani mana tulenda lungisa.

6. Nkia kingana kia Yesu tufimpa? Adieyi tulongoka muna kingana kiaki?

⁶ Nga dilendakana kikilu kwa muntu mu yangalela ina kena yau? Ndonga beyindulanga vo ke dilendakana ko, kadi o wantu bavangwa ye tima dia longoka mambu mampa muna zingu. Kansi, dilendakana kikilu mu yangalela ina tuna yau. Nze una tumwene, tulenda kweto yangalela “ina imonanga o meso,” i sia vo, e lekwa tuna yau owau. Aweyi tulenda wo vangila? Muna baka e mvutu za kiuvu kiaki, yambula twafimpa kingana kia talanta kina Yesu katá, kiasonama muna Matai 25:14-30. E kingana kiaki mpe kikutulonga una tulenda kadila ye kiese yo wokesa e kiese kieto muna lekwa tuna yau owau.

7. Muna lukufi, yika kingana kia talanta kina Yesu katá.

⁷ Muna kingana kia talanta, Yesu wayika muntu mosi wazola kwenda mu nkangalu. Vitila kenda, obokele ntaudi zandi yo kubavana talanta kimana bavangila zo e kinkita. * Wazaya wo vo konso ntaudi ndekwa  zaswaswana kakala zau. Ekiaki i kuma kavanina talanta tanu kwa ntaudi mosi, talanta zole kwa ntaudi ankaka ye talanta mosi kwa ntaudi antatu. E ntaudi zole batoma kitila e nzimbu batambula yo vua nluta. Kansi, o ntaudi antatu, kavanga diambu ko muna nzimbu katambula. Muna kuma kiaki, o mfumu andi wankatula mu salu.

8. Ekuma o ntaudi antete muna kingana kakadila ye kiese?

⁸ O ntaudi antete wakala ye kiese wau katambula talanta tanu muna kitila. Nzimbu zayingi kikilu katambula, ediadi diasonga vo o mfumu andi vuvu kambundanga. Kansi, adieyi tuvova mu kuma kia ntaudi anzole? Nanga wadi kendalala wau kalembi tambula talanta tanu nze ntaudi antete. Kansi, aweyi kamona muna ntima?

9. Nkia diambu Yesu kavova ko mu kuma kia ntaudi anzole? (Matai 25:22, 23)

⁹ Tanga Matai 25:22, 23. Yesu kavova ko vo, o ntaudi anzole wafunga makasi wau katambula kaka talanta zole yo yindula vo: ‘Ekuma o mfumu ame kampanini kaka talanta zole? Mono mpe i nsadi ambote nze ntaudi ona otambwidi talanta tanu! Avo mfumu ame oyindulanga vo kinsadi ambote ko, yambula yazika e talanta zole zazi yo vanga kinkita kia mono kibeni.’

10. Adieyi kavanga o ntaudi anzole muna talanta katambula?

¹⁰ Nze una kavanga o ntaudi antete, o ntaudi anzole mpe watoma lungisa e kiyekwa kiandi yo funtuka mu kuma kia mfumu andi. Muna kuma kiaki, wabaka diaka e nluta mia talanta zole. O mfumu andi wansenda mu  kuma kia fululu kiandi muna salu. O mfumu andi kayangalela kaka e salu kiandi ko, kansi wamvana mpe yiyekwa yankaka.

11. Aweyi olenda wokesela e kiese kiaku?

¹¹ Diau dimosi mpe, avo tusadidi ye fululu kiawonso muna salu kia Yave, e kiese kieto kiwokela. ‘Uyivana emvimba’ muna salu kia umbangi ye muna salu ya nkutakani. (Mav. 18:5; Ayib. 10:24, 25) Toma kubikanga malongi ma tukutakanu kimana wavana e mvutu zitoma kasakesa ampangi. Avo kiyekwa otambwidi muna lukutakanu lwa kati kwa lumingu, toma kubama. Avo akuluntu bavene e salu muna nkutakani, lungisa kio muna ntangwa yasikidiswa yo songa vo wafwana bundwa e vuvu. Kuyindula ko vo e salu kina oveno ke kina mfunu ko ye ntangw’a nkatu ofwasa muna kio lungisa. Muna kuma kiaki, sadila e lau diadi muna tomesa e ndekwa zaku za salu. (Nga. 22:29) Avo uyifuntwini muna salu kia Yave, e kikundi kiaku yo yandi kiwokela, e kiese kiaku mpe kiwokela. (Ngal. 6:4) Muna mpila yayi, kukendalala ko avo mpangi zankaka batambwidi e kiyekwa kina ozolele.—Roma 12:15; Ngal. 5:26.

12. Adieyi mpangi Melissa yo Nick bavanga muna wokesa e kiese kiau?

¹² Nga osungamene mpangi Melissa ona wazola kwenda sadila kuna Betele yovo kota Sikola ya Ateleki a Kintinu? Kana una vo kalenda lungisa makani mama ko, tala dina kavova: “Ikuyivananga emvimba muna salu kiame kia kimviti a nzila yo sia e ngolo za sadila e mpila zawonso za sila umbangi. Ediadi kiese kiayingi dikuntwasilanga.” Adieyi mpangi Nick kavanga wau kalembi tumbikwa se selo kia salu? Wavova vo: “Yatoma sadilanga malau yakala mau, i sia vo, samuna e nsangu zambote yo vana mvutu zambote muna tukutakanu. Yasoneka mpe e ndomba ya kwenda sadila kuna Betele yo bokeleswa muna mvu walanda.”

13. Nkia nluta ovua avo ukivene emvimba muna lungisa e kiyekwa una kiau owau? (Kimpovi 2:24)

¹³ Avo ukivene emvimba muna toma lungisa kiyekwa una kiau owau, nga kuna sentu olenda tambula diaka yiyekwa yankaka? Nanga olenda tambula, nze una diavangama kwa mpangi Nick. Kansi, avo kutambwidi yo ko nze una diavangama kwa mpangi Melissa, olenda kala ye kiese muna vanga mana olenda muna salu kia Yave. (Tanga Kimpovi 2:24.) E kiese kiaku kiwokela mu zaya vo, Yesu Kristu wa Mfumu eto otoma yangalelanga e ngolo ovanganga.

14. Nga diambi mu sia e ngolo muna lungisa makani meto ma mwanda? Sasila.

¹⁴ Avo tuvanganga mawonso tulenda muna salu kia Yave owau, nga disongele vo ke tulendi vanga diaka ngolo ko muna wokesa e salu kieto? Ve. Tulenda kweto ye tufwete kwamanana kuyisila makani ma mwanda. Kadi mekutusadisanga mu kala ateleki ye alongi ambote yo toma sadila mpangi zeto. Kansi, muna lungisa makani mama, tufwete kala ye ngangu yo zayanga tezo kieto. Tufwete sianga mpe sungididi muna sadila mpangi zeto vana fulu kia sia sungididi kwa yeto kibeni.—Nga. 11:2; Mav. 20:35.

15. Nkia makani ma mwanda malenda wokesa e kiese kieto?

¹⁵ Nkia makani olenda kuyisila? Samba kwa Yave kimana kasadisa mu zaya makani olenda lungisa. (Nga. 16:3; Yak. 1:5) Nga olenda kuyisila e kani dia sala se mviti a nzil’ansadisi yovo mviti a nzila a ngonde ke ngonde, kwenda sadila kuna Betele yovo muna salu kia tunga e fulu ya nsambila? Nga olenda wokesa  e salu kiaku kia umbangi muna longoka e ndinga ankaka yovo kwenda sadila ku zunga kiankaka? Muna zaya diaka mambu mankaka mevavuanga muna lungisa makani mama, tanga kapu kia 10 kia nkanda Organizados para Fazer a Vontade de Jeová yovo mokena ye akuluntu a nkutakani aku. * Ekolo ovanganga e ngolo za lungisa makani maku, mpangi zawonso bemona o lunungunuku lwaku. Ediadi kiese kiayingi dikutwasila.

16. Adieyi olenda vanga avo kulendele lungisa e kani diaku ko owau?

¹⁶ Kansi, adieyi olenda vanga avo kulendele lungisa kana dimosi ko muna makani tuyikidi mu longi diadi? E diambu diamfunu olenda vanga, i kuyisila makani mankaka mana olenda lungisa. Tala mana olenda vanga.

17. Landila e sono kia 1 Timoteo 4:13, 15, adieyi mpangi ayakala kafwete vanga muna kituka nlongi ambote?

¹⁷ Tanga 1 Timoteo 4:13, 15. Avo u mpangi ayakala, una vo wavubwa, olenda tomesa e mpil’aku yafidila malongi yo longa. Ekuma? Kadi avo ovangidi e ngolo mu kituka ntangi, mpovi ye nlongi ambote, otoma sadisa awana bekuwanga. Kala ye kani dia longoka yo sadila malongi mawonso mena muna finkanda, Tomesa e Mpil’aku ya Tangila yo Longa. Longoka longi dimosi-dimosi yo vanga e nsongesela ngeye kibeni kuna nzo. I bosi, sadila malongi mama vava ofila e longi muna nkutakani. Lomba tuludiku kwa nludiki yovo kwa akuluntu akaka “ana befuntukanga muna vova e diambu dia Nzambi yo longa.” * (1 Tim. 5:17) E kani diaku ke bakula kaka ko malongi ma finkanda  Tomesa e Mpil’aku ya Tangila yo Longa, kansi i sadisa awana bekuwanga mu kumika o lukwikilu lwau yo sadila mana okubalonganga. Ovanga wo, diwokesa e kiese kiaku ye kia awana olonganga.

18. Nki kilenda kutusadisa mu tomesa ndekwa zeto muna salu kia umbangi?

¹⁸ Yeto awonso tuna ye mbebe ya longa wantu yo kubakitula se alongoki a Kristu. (Mat. 28:19, 20; Roma 10:14) Nga ozolele tomesa ndekwa zaku muna salu kiaki kiamfunu? Ozevo, longoka yo sadila malongi mena muna finkanda, Tomesa e Mpil’aku ya Tangila yo Longa. Olenda mpe solola tuludiku twamfunu muna Nkand’a Malongi—Zingu ye Salu Kieto kia Kikristu ye muna video za nsunzula zisongwanga muna tukutakanu twa kati kwa lumingu. Teza sadila tuludiku twatu yo zaya tuna tutwasa e nluta muna zunga kieno. Muna sadilanga tuludiku twatu, okituka se nlongi ambote ye okala ye kiese kiayingi.—2 Tim. 4:5.

19. Aweyi olenda yimina e fu iyangidikanga Yave?

¹⁹ Sungamenanga dio vo, e kani disundidi o mfunu ofwete kuyisila i yima e fu iyangidikanga Yave. (Ngal. 5:22, 23; Kol. 3:12; 2 Pet. 1:5-8) Aweyi olenda lungisila e kani diadi? Kasikil’owu, yindula vo lukwikilu lwaku ozolele kumika. Ozevo, diambote mu tanga malongi mevaikiswanga muna nkanda mieto mevovelanga una olenda kumikina lukwikilu lwaku. Muna TV ya Mbangi za Yave musongwang’e video zivovelanga lusansu lwa mpangi ana besonganga lukwikilu lwasikila vava benuananga ye mambu mampasi. Otala e video zazi yo tanginina e mbandu ya mpangi zazi dilenda kumika lukwikilu lwaku.

20. Adieyi tulenda vanga muna wokesa e kiese kieto yo lembi kendalala?

²⁰ Kieleka, yeto awonso tuzolele vanga mayingi muna salu kia Yave. Muna nz’ampa, tusadila Nzambi mu mpila yalunga. Ekolo tuvingilanga e nz’ampa, tuzolele sadila malau tuna mau owau. Muna mpila yayi, tuwokesa e kiese kieto yo lembi kendalala. Edi disundidi o mfunu, tuvana o nkembo kwa Yave wa “Nzambi a kiese.” (1 Tim. 1:11) Muna kuma kiaki, yambula twayangalelanga malau tuna mau.