1. Ngano bantu babingi bwe basaka mu sala bwabwingi mu tisalu tia Yehova?

 TISALU tiatingi tie neto tia sala mu nza yi ye penepene na nsuka’andi. (Mat. 24:14; Like 10:2; 1 Pi. 5:2) Beto bansoni tuzololo tasarila Yehova mu ngolo zeto zazansoni. Babingi bakurisa tisalu tiawu tia samuna. Bakaka mbo badingaka mu bâ mipasuri-nzila. Bakaka mpe mbo badingaka mu sala ku Betele peleko mu tisalu tia ntungulu ya Nzo za Nsambululu. Mpe mpangi zazingi zita sarila ngolo mu kwizi bâ bibakisi mu tisalu peleko bakuluntu. (1 Tim. 3:1, 8) Yehova nsayi yayingi yibâka nandi bu kamonaka luzolo lwe na kanda diandi mu mu sarila!​—Mik. 110:3; Iza. 6:8.

2. Ngano ntia mabanza malendi bâ neto tala ti ka twena na lenda ko dia lungisa makani makaka?

² Tulendi batika mu nôka tala ti ntangu ya yita kwe yôke mpe ka tuta lungisa makani makaka ko mu tisalu tia Yehova. Peleko tulendi batika mu nôka tala ti mvula zeto yikama zita kwe yikame, peleko mu bungu dia misamu miakaka misaka ti ka tubândi na lenda dia nata madema ma tuzololo. (Bin. 13:12) Musamu ni wo weri na Melissa. * Mbo keri zoloko mu sala ku Betele peleko mu sa Lukolo lwa bisamuni bia Timfumu, kâ têle ti: “Mvula zani ka zikunganaka bweso ko bwa nata madema mo. Ntangu zakaka mbo ninôkaka.”

3. Bantu bakaka nti balendi sa ngatu babâ na lenda dia nata madema makaka?

³ Ntwenia zakaka ze na tikolela tia mbote, zifweti kurisa bifu bia bibote, ntete babâ na lenda dia nata madema makaka. Mu  tifwani balendi bâ na mayela, balendi kulu bongaka nzengolo peleko balendi zolo mu sala; kâ balendi bâ na nsatu ya longoka mu bâ na luvivululu, mu bâ ba yela peleko mu bâ na buzitu. Tala ti tûriri mabanza maku mu bifu bifwanakane, bweso bwa nata dema di ta kekolo mbo bukwiza mu ntangu yi ta lembo kêla. Tabongeno tifwani tia Nick, bu kabâ na mvula 20, watomo nionga mu bungu ti ka bamunoma tibakisi mu tisalu ko. Têle ti: “Nayizi mona ti musamu weri kô wu ndieri lembo yirikaka bubote.” Kâ Nick ka bika ko. Wasarila ngolo zandi zazansoni mu timvuka na mu tisalu tia samuna. Lumbu ti mu komite ya filiale kena.

4. Nti tuzonzela mu timoko ti?

⁴ Ngano wa nôka wena mu bungu ti ka weka’eti lungisa kani dia timpeve ko? Tala ti ni bo, sambila Yehova mu bungu dia musamu wo mpe mu têla ka bwe ta mona. (Mik. 37:5-7) Lendi lomba mpe malongi kwe mpangi za yela, matariri mpila za tomesena tisalu ti salaka mu bungu dia Nzambi mpe sarila ngolo mu landa malongi mawu. Wamana sila bo, lendi kwizi baka dema dio, peleko lendi lungisa kani dio. Kâ ntiana Melissa, wu tutokolo zonzelaka, lendi bâ na kani di lendi lembo lungisa bwawu bu. Ngano bwe sa? Ngano bwe lendi tatamana mu bâ mu nsayi? Mu hanina biyuvu bio mvutu, mu timoko ti mbo tuzonzela 1) kwe lendi bakila nsayi, 2) bwe lendi kurisila nsayi’aku, mpe 3) ntia makani lendi bâ na mo, ngatu nsayi’aku yayikama.

5. Mu bâ na nsayi, mu nti tufweti tûla mabanza meto? (Ekleziaste 6:9)

⁵ Ntiana bu tâka wo Ekleziaste 6:9, tulendi baka nsayi tala ti tudingiri yo ku mbuka ya mbote. (Tanga.) Muntu wuyangalalaka “mu bima bi monaka meso” mbo wuzoloko bima bie nandi lumbu ti. Kâ, muntu wukwe landi nsatu zandi mbo katatamanaka mu kwe dingi bima bi kalendi lembo baka. Buna ntia malongi tuta baka? Mu baka nsayi, tufweti tûla mabanza meto mu bima bie neto mpe mu makani ma twe na mo lenda mu lungisa.

6. Ntia tifwani tutaluzula bwawu bu, mpe nti tulongoka mu tifwani tio?

⁶ Ngano, tulendi bâ na nsayi mu bima bie neto? Bantu babingi babanzaka ti ka tulenda ko mu bungu ti, tufweti tatamana mu longoka bima bia môna. Kâ tulendi lenda. Tulendi yangalala mpe tulendi zolo “bima bi monaka meso meto.” Bwe tulendi wa sila? Mu baka mvutu, tataluzuleno tifwani tia hana Yezu tia talent tie mu Matie 25:14-30. Mbo tutaluzula misamu mi tulendi longoka mitariri mpila yi tulendi bakila nsayi, mpe yi tulendi yikila nsayi’eto mu tusakumunu twe neto lumbu ti.

7. Zonzela tifwani tia talents tia hana Yezu mu bukufi.

⁷ Mu tifwani tio, bakala dimosi dieri kwendaka ku nzietolo. Ntete kenda, watâ ngamba zandi mbila mpe wabahana talents zi baketi têla nkari. * Bu kataluzula lenda dia muna ngamba, bakala dio wahana talents tanu kwe ngamba ya ntete, mpe zole kwe ngamba ya nzole, wahana mpe talent mosi kwe ngamba ya ntatu. Ngamba ya ntete na ya nzole, bakipa mbongo zo na bunsungu bwabwansoni. Kâ ngamba ya ntatu ka sa na kani tima ko mu bungu dia mbongo zi bamuhana, mpe mfumu wamukatula ku tisalu.

8. Mu bungu dia nti ngamba ya ntete ya tifwani tia Yezu yaketi bêla na nsayi?

⁸ Kampe ngamba ya ntete wamona ti bweso bweri ti mfumu’andi kamuhana talents tanu.  Mbongo zazingi zeri mpe tidimbu tieri, tieri songelaka ti lukwikulu lweri nandi mu yandi! Kâ bwe tulendi tâ mu bungu dia ngamba ya nzole? Mbo kaketi bâ wa nôka mu bungu ti, ka baka talents mpila mosi na ngamba ya ntete ko. Kâ bwe kasa?

9. Ngano Yezu ntia misamu kalembo tâ mitariri ngamba ya nzole? (Matie 25:22, 23)

⁹ Tanga Matie 25:22, 23. Yezu ka tâ ko ti ngamba ya nzole yayizi fwema peleko yayizi bâ mu nkesi mu bungu ti talents zole kwa kabaka. Mpe Yezu ka tâ ko ti ngamba yo mbo keri niongaka mu mpila eyi: ‘Ngano ni zi kwa mbakiri? Meno mpe lenda die nani ntiana ngamba yibakiri talents tanu! Tala ti mfumu’ani ka kunzololo’â ko, bubote bu nzikiri talents zi za zole mpe bu ndiele sala tisalu tia me beni.’

10. Ngano ngamba ya nzole nti kasa na talents zandi?

¹⁰ Ntiana ngamba ya ntete, ngamba ya nzole watomo kipa na bunsungu bwabwansoni dema di bamuhana mpe na ngolo zazansoni wasarila mfumu’andi. Buna, wayizi funisa talents zi bamuhana mpe zayizi bâ ziyà. Ngamba yo wabaka musendo mu bungu dia bunsungu na lenda diandi. Mfumu’andi ka yangalala kwa mu yandi ko, kâ wamona ti ngamba yo wafwanakana mpe kabaka madema makaka!

11. Bwe tulendi kurisila nsayi’etoy?

¹¹ Mpila mosi mpe, tulendi kurisa nsayi’eto bu tusala ngolo mu tisalu ni tisalu ti batuhana mu organizasio ya Yehova. Bâ na “tisalu tiatingi” tia sala mu tisalu tia samuna na mu timvuka. (Bis. 18:5; Ebr. 10:24, 25) Tomo kubamaka mu bungu dia tukutakanu, ngatu wahana mvutu zitindisaka.  Bongelaka devware zazansoni zi bakuhanaka na bunsungu bwabwansoni. Bamana ku lomba mu hana lubakusu mu timvuka, hana lo mu ntangu yifwanakane, mpe sa ti bakusikirila. Kubongelakandi madema ma bakuhanaka ntiana’eti ma fioti mena mu bungu dia nge. Sarila ngolo mu tomesa misamu mi we na mio lenda. (Bin. 22:29) Bu kwe sariri ngolo mu bisalu biaku bia timpeve na madema maku, mbo kulu kwizi sa nsobolo mpe nsayi’aku mbo yivutu kula. (Nga. 6:4) Mbo kwizi mona mpe ti, ka wena musamu wa mpasi ko mu yangalala na bampwana’aku tala ti babakiri madema ma dingaka mu lungisa.​—Rom. 12:15; Nga. 5:26.

12. Ngano nti biabakisa mpangi zole mu kurisa nsayi’awu?

¹² Ngano Melissa, wu tuzonzeleke ku mbatukulu, weri zoloko mu sala ku Betele peleko mu sa Lukolo lwa bisamuni bia Timfumu yandi luta bambukila? Ni bu sa ti kena na lenda ko dia lungisa makani mo, têle ti: “Mbo nisarilaka ngolo mu tisalu tiani tia mupasuri-nzila mpe mbo nisarilaka mpila zazansoni za samunina. Musamu wo wakunatina nsayi yayingi.” Ngano Nick bwe kasa mu katula maniongo mandi mu ntangu yi balembo mu noma tibakisi mu tisalu? Têle ti: “Mbo ndieri tûlaka mabanza mani mu bima bi ndieri na bio lenda mu sa​—ntiana sala tisalu tia samuna mpe hana mvutu za zibote ku tukutakanu. Nafulusa mpe formilere ya sala ku Betele mpe muvu walanda bakuntâ mbila.”

13. Ngano ntia ndandu yimoneka tala ti sariri ngolo mu dema die naku lumbu ti? (Ekleziaste 2:24)

¹³ Tala ti sariri ngolo mu dema die naku lumbu ti, ngano mbo baka madema makaka ma manene mu bilumbu bita kwiza? Bu lendi bâ ntiana Nick. Kâ tala ti kâni ntiana Melissa, nsayi’aku mbo yitatamana mu kula mpe mbo bâ na nsayi ya sala mu bungu dia Yehova. (Tanga Ekleziaste 2:24.) Kâ ntembe kâni, mbo bâ na nsayi mu bungu ti zebi ti, ngolo zaku Mfumu’eto Yezu Kristo zita tâ nsayi.

14. Mu musamu wutariri makani meto ma timpeve, ntia mabanza mafweti bâka neto?

¹⁴ Ngano tamana tûla mabanza meto mu madema me neto lumbu ti, wuzololo tâ ti ka tufweti’â tadinga mu kurisa tisalu tieto ko mu bungu dia Yehova? Ka wuta zolo tâ bo ko! Tulendi mpe tufweti bâka na makani ma timpeve matubakisa mu tatamana mu kwenda ku matu mu ngolo zi tusarilaka mu tisalu tia samuna na mu bakisa mpangi zeto. Mbo tulendaka mu ntangu yi tusarilaka ndwenga mpe yi tubâka ba kuluka mu sarila bantu bakaka, kani tatûla kwa mabanza meto mu beto beni.​—Bin. 11:2; Bis 20:35.

15. Ngano ntia makani makaka malendi ku bakisa mu kurisa nsayi’aku?

¹⁵ Ngano ntia makani lendi bâ na mo? Lomba kwe Yehova kakubakisa mu bakula ka ntia kani dia delakana lendi lungisa. (Bin. 16:3; Zaki 1:5) Ngano lendi bâ na makani ma tuzonzele mu  paragrafe ya ntete ya timoko ti​—ntiana bâ mupasuri-nzila wa ntangu fioti peleko wa ntangu zazansoni, sala ku Betele peleko mu tisalu tia ntungulu ya Nzo za Nsambululu? Kampe lenda die naku dia longoka zu dia môna ngatu wasamuna nsangu za mbote peleko mu samuna mu teritware ya nzenza. Lendi longoka ka nti fweti sa bu tala timoko tia 10 tia buku dia Organisés pour faire la volonté de Jéhovah mpe bu zonza na bakuluntu ba timvuka tiaku. * Bu kwe sariri ngolo  mu lungisa makani mo, bantu bakaka mbo bamona nsobolo zi ta sa mu timpeve mpe nsayi’aku mbo yikula.

16. Ngano nti lendi sa tala ti bwawu bu ka wena na lenda ko dia lungisa kani dimosi?

¹⁶ Ngano nti lendi sa tala ti ka wena na lenda ko dia lungisa na kani kani dimosi mu makani ma tuzonzele? Tima ti lendi sa ni mu dinga kani diakaka di lendi lungisa. Tataluzuleno misamu mita landa.

17. Tintwari na 1 Timote 4:13, 15, ngano mpangi ya yibakala nti yilendi sa mu kwizi bâ mulongi wa nguria wa mbote?

¹⁷ Tanga 1 Timote 4:13, 15. Tala ti nge mpangi ya bakala yena, lendi sala mu tomesa lenda diaku dia longesa na dia zonza. Mu bungu dia nti? Mu bungu ti wamana sarila ngolo mu bâ titangi tia mbote, nzonzi ya mbote peleko mulongi wa mbote, mbo bakisa bantu bakuwâ. Yêla mu bâ na kani dia longoka mpe dia sarila malongi mamansoni ma bahana mu mukanda wa Applique-toi à la lecture et à l’enseignement. Yenda longoke mutu-diambu wumosi wumosi, mpe na manzangu mamansoni, sarilaka mo ku nzo, mpe sarilaka malongi mo bu bâka na binzonzi. Lombaka malongi kwe tisungiki tia milongi (conseiller adjoint) peleko kwe bakuluntu bakaka bê banzonzi na milongi mia mbote. * (1 Tim. 5:17) Kudingandi kwa mu bakula mpila yi lendi sarila malongi ma baheni, kâ dinga mu bakula mpe mpila yi lendi bakisila bantu bata ku wâ mu yika timinu tiawu ngolo peleko mu ba tuma basarila misamu mi bata longoka. Bu sila bo, mbo kurisa nsayi ya nge beni na ya bawu.

18. Ngano nti bilendi tu bakisa mu lungisa makani matariri tisalu tieto tia samuna?

¹⁸ Beto bansoni dema die neto dia samuna  na dia kubika milongoki. (Mat. 28:19, 20; Rom. 10:14) Ngano zololo wavutu tomesa mpila’aku ya sala tisalu tio tia mfunu? Bâ na makani ma zabakana bu longokaka na bu sarilaka malongi ma bakaka mu mukanda wa Enseignement. Lendi mpe baka mabanza makaka mabakisaka mu Cahier vie chrétienne et ministère, na mu video zituhanaka tifwani ku tukutakanu. Yêla mu sarila mabanza mamingi mu zaba ka ntia mabanza mata tomo simba. Bu sarila mabanza mo, mbo bâ na nsayi yayingi ya bâ tisamuni tia tibote.​—2 Tim. 4:5.

19. Bwe lendi kwizi bêla na bifu bitâka Yehova nsayi?

¹⁹ Kufweti’â wazimbakana ko ti kani diyôkele mfunu, ni kani dia bâ na bifu bitâka Nzambi nsayi. (Nga. 5:22, 23; Kol. 3:12; 2 Pi. 1:5-8) Bwe lendi sa mu lungisa kani dio? Tabongeno tifwani, kampe we naku wabâ na timinu tia ngolo. Buna, lendi tanga bimoko mu mabuku meto bihanaka mabanza ma lendi sarila mu kwizi bâ na timinu tia ngolo. Kampe lendi kwe tari bibuku bia video za JW Télédiffusion zisongelaka bwe mpangi zeto za zikento na za zibakala zabâ na timinu tia nzitukulu mu ntangu yi beri mu misamu mia mpila na mpila. Ha manima, tala ka bwe lendi landila tifwani tiawu mu luzingu lwaku.

20. Ngano bwe tulendi kurisila nsayi’eto, mpe bwe tulendi diminina maniongo meto?

²⁰ Ntembe kâni, beto bansoni tuzololo tasarila miamiansoni mi tulenda mu sala tisalu tiatingi mu bungu dia Yehova bwawu bu. Mu nza ya môna, mbo tubâ na lenda dia sarila Nzambi buna bu tuzololo. Kâ, tala ti tusariri ngolo mu misamu mi tulendi yirika lumbu ti, tulendi kurisa nsayi’eto mpe tulendi dimina maniongo meto mamansoni. Mpe musamu wuyôkele mfunu, mbo tukembesa Yehova, Nzambi’eto ya nsayi. (1 Tim. 1:11) Buna, tabêno na nsayi mu madema me neto!