1. N’nga atu anjinji tanovilimbi-eda irananani volabela Yohova?

 NITOKAANA basa injinji ira nililabe komoni wa ilamboi. (Mat. 24:14; Luka 10:2; 1 Pe. 5:2) I-yo othene ninofwanela labela Yohova ninga mwemo munoodela i-yo. Atu anjinji tanowenjedela urumiiwa. Enago tanofunechecha tangairile upayinia thitho enango tanofuna laba va Beteli venango ira urumiwi unango wa vyomangamanga. Mbwenye enango anovilimbi-eda ira talabe ninga arumiwi okami-a venango andimuwa avapingoni. (1 Timo. 3:1, 8) Yohova anosangalala voona arumiwe vinovilimbi-eda aliwa vomlabela!—Sal. 110:3; Esaya 6:8.

2. N’nga ninavwivwe a-vi naona ira vifunelo vi-u vinango kavinokwakwanela?

² Venango ninooda sukwala naona ira vatovira hora injinji na-ana kwakwaneli-e vifunelo vi-u vyauzimu. Ninooda fooka voona ira kaninaode irana maurumiwi enango mwasa wa tunga li-u venango vyongo muli aliwa vaingumi i-yu. (Sang. 13:12) Vyevi pivyevyo vyamuiirele melissa. * Liye anofuna angalabile va Beteli venango mafunja xikola yamakristau olaleela vyaumwene liye aongile ira: “Vaee-ni vyevi kavinaodeye na mwasa watungalanga, voi hora dinango ndinosukwala.”

3. N’nga pivyongo viivi vyevyo atu enango vinofwanela aliwa ira ira tafwanelele vai-wa maurumiwi oi-yana i-yana?

³ Enango mbaazombwe atutu lapama. Mbwenye ira kava-iwe vizo vinango vyowenjedheleya tanofwanela ulukuli-a thitho woni-a makalelo ofuneya. Aliwa anodha kala azelu, osikimizeli thitho ofunechecha irana vyongo, mbwenye tanofwea kala oleva rima, amasasa-edo thitho alemezo. Mwaira thindi voulukuli-a makalelo ofuneya, munooda vai-wa ngari ya urumiwi  unango wenuwo a-wadedi-edela nyoo. Katuulelani vyevyo vyamuirele Nick. Angana vwawa 20, liye atoosukwala vinjinji namwasa oona ira ka-eliwile kala rumiwi okami-a. Liye atoonga ira: “Ndatoona ira vatookala vinango vyadawi-a miyo.” Mbwenye Nick katatilile rima. M’malo mwa vyevyo, liye anookaana thindi volaba mabasa enango avapingoni thitho laleela. Va ee-ni Nick unolaba wu Komite ya Tambi.

4. N’nga ninofuna nitapanye vyofuka viivi mu yofunjedha yei?

⁴ N’nga nyo muli okumbanya na mwasa o-okwakaneli-edha ifunelwinyu yauzimu? Akala ti e-no mum’mwandele Yohova dhela mu lobelo mwemo munovwelanyo. (Sal. 37:5-7) Mbwenye muvepenga abali olimba mwauzimu ira tauva-eni malangi-o anaukami-eni ira mwiirenga vyongo vyapama vomlabela Nlungu, thitho mudhilimbi-edhenga i-ndi-edha basa pama malangi-o anauva-ani aliwa. Mwairanga vyevi munooda va-iwa urumiwi wenuo unofunanyo venango kwakwaneli-edha ifunelwinyu. Mbwenye mofwanafwana na Melissa, wenuo um’mongile i-yo ndulimu pyovweya ira va ee-ni kavinoodeya irana urumiwi wenuo unofunanyo. N’nga vyaira ee-no munaire a-vi ira mukalengave osangalala, ira niwakule yofukayi muyofunjedha yen’na ninotapanya vyofuka ninga vi: 1) Vyevyo vinanikami-e kala osangalala, 2) vyevyo vinaire i-yo ira nisangalalenga vinjinji thitho 3) vifunelo vyevyo vinakaena i-yo vyevyo vinanikami-e wenjedhela iroromelo yi-u.

5. N’nga ninofwanela thuulelangan’ni ira nikalenga osangalala? (Namalaleya 6:9)

⁵ Lemba la Namalaleya 6:9, linoonga vyevyo vinanikami-e kala osangalala. (Muleri.) Mutu wenuo unosangalala na vyevyo “vioni liye na methwee” unosimba vyevyo vina liye thitho unokala okwakwanana vyevyo vina liye vaingumiyee. Mbwenye mo-iyana na vyevi mutu wenuo unosangalala na rimee, unofunechecha vyongo vyevyo vya-ana liye. N’nga veva ninofunjedhavon’ni? Ira nikalenga osangalala nithuulelenga vyevyo vina i-yo thitho nikaengana vifunelo vyevyo vinaode i-yo vikwakwaneli-edha.

6. N’nga va ee-ni ninofuna nitapanye ifwanafwani-o iivi, n’nga ninafunjedhevon’ni va ifwanafwani-o yen’na?

⁶ Mwaibaliwelo i-yo nifuneela vyongo vyachineneeva. N’nga pyoodeya kwakwanana vyongo vina i-yo? Ee pyoodeya. Ninooda sangalala na vyongo vina i-yo malamboano na vyevyo “vinoona i-yo na methwi-u.” N’nga ninaire a-vi vyevi? Ira nifwanye yowakula dhoweni nione vyaongile Yesu mwiifwanafwani-o ya matalenti lelo Lili va Mateu 25:14-30. Ninotapanya mwemo ifwanafwani-o yen’na munanikami-edhele aliwa ira nisangalalenga thitho mwemo munairele i-yo ira niwenjedhele imwerumweru yi-u movwelana na mwemo vyongo mukalele aliwa vaingumi yi-u.

7. Ongani mogwandela ifwanafwani-o ya Yesu yoonga matalenti.

⁷ Mu ifwanafwani-o inango, Yesu atom’monga mutu wen’ne afuna dhowa ilambo inango. A-anavenyathi ulendweo liye atoitana anamalaba enango noava-a matalenti ira taode irana malonda. * Vothuulela mwemo anamalaba uliwethene mwafuna liye odela mutuo atovelela matalenti 5 wa anamalaba oroma matalenti 2 wa namalaba wanambili thitho waneraru atomva-a talenti limbo-i. Anamabala ambilao tato-indi-edha basa matalenti enao tava-iwile  aliwa mbwenye namalaba mbo-i kaairilena yongo talenti lelo lava-iwile liye thitho mbwiyee atomkumi-a basa.

8. N’nga chini yammwiri-idhe namalaba oroma kala osangalala?

⁸ Namalaba oromuo vinooneya ira atosangalala vinjinji namwasa oi mbwiyee atomva-a matalenti 5. Yen’na yali kobiri injinji thitho vyevi vinooni-a ira mbwiyee anomroromela vinjinji! N’nga namalaba wanambili? Liye angaodile sukwala namwasa oi kawachele matalenti anjinji ninga namalaba oromuo. N’nga liye airilen’ni?

9. N’nga Yesu aongilen’ni vya namalaba wanambili? (Mateu 25:22, 23)

⁹ Muleri Mateu 25:22, 23. Yesu kaongile ira namalaba wanambili atosukawla venango nyanyuwa namwasa oi awachela matalenti meli baa-i. Liye kaongile ira namalabula atoroma dungunya noonga ira: Ndiva-iwile vyevi baa-i? Miyo thitho ndito-inda basa mwathindhi ninga namalaba oroma uwachele matalenti 5. Akala ira mbwiyanga kanasimba vyongo vina miyo vili pama ira miyo thitho ndimaire vu-elela matalentala thitho mairanga vinofuna miyo.

10. N’nga namalaba wanembili airilen’ni na matalete ava-iwile liye?

¹⁰ Mofwanafwana na namalaba oroma, namalaba wanambili atoona ira utova-iwa izo ilukulu thitho atokaana thindhi vomlabela mbwiyee liye atowenjedhelavo va matalete meli amva-idhe mbwiyee. Namalabula atovaiwa yotuva namwasa wathindhi thitho dodoliso lee. Vowenjedhela kala osangalala na vyevyo vyairile liye mbwiyee atomwenjedhela vyoira vinango.

11. N’nga ninaire a-vi ira nisangalalenga vinjinji?

¹¹ Mofwanafwana na vyevi i-yo thitho ninokala  osangalala vinjinji nakala athidhi va iliyothene inoira i-yo vomlabela Yohova. Hora dothene nikalenga opingeya vinjinji na mwasa olaleela thitho vivelela vamwasa olaba mubasa la pingo. (Mayir. 18:5; Aeb. 10:24, 25) Mukozeelenga pama migumano na ifunelo yoi mwawakulenga makundo olimbi-a. Mukozelenga pama mwava-iwa mwasa ofunjedha wa vari va sumana mwavepiwa ira mu-inde basa inangwee pingoni mulokotenga hora thitho mukalenga onyindeleya. Kamuonenga ira vyevyo viva-iwile nyoovyo pyo-ofuneya venango munaatatila hora. Mudhilimbi-edhenga wenjedhela dodoliso linyu. (Sang. 22:29) Mwadhivelelanga vinjinji vaurumiwinyu pavevo thitho vanodhowanyo vasongolo mobaranya thitho mosangalala. (Agal. 6:4) Vyevi vinoukami-ani ira mukalenga osangalala na enango kava-iwa urumiwi wenuo wafuna nyoo.—Aroma 12:15; Agal. 5:26.

12. N’nga chini a Mboni abilala vyairile aliwa ira tawechedhele imwerumweru iwa?

¹² N’nga munothuulela Melissa rongola wenuo afunechecha angalabile vabeteli venango funjedha xikola lamakristau olaleela vya Umwene? Angalive kaviodeile irana maurumiwi enala liye unoonga ira: “Ndinodhilimbi-wedha vyotheene ira vile vinaode miyo vaurumiwi wanga waupainiya thitho i-ndi-edha basa ndhila ndo-iyana i-yana volaleela. Vyevi vitondikami-a ira disangalalenga vinjinji.” N’nga chini yakami-idhe Nick ira a-adhowenave kala osukwala vahora yeniyo ya-a-eliwile liye kala rumiwi okami-a? “Liye unoonga ira dathuulela vinjinji maurumiwi enao ndaode miyo irana thitho wakula mo-inda rima vamigumanoni. Ndatovepa urumiwi wavabeteli thitho yawa yo-arela ndatoitaniwa.”

13. N’nga chini inaireye akala ninokaana thindhi vaurumiwi unoira i-yo va ee-ni? (Namalaleya 2:24)

¹³ Mwakaana thindhi vaurumiwi wenuo unaira nyo va ee-ni, munodha va-iwa vizo vilukulu sogolo? Ee vinoodeya ninga mwemo vyakelele na Nick. Mbwenye akala kavinaodeya ninga mwemo mwakalele aliwa na Melissa, munooda kalave osangalala na vinooda nyo vomlabela Yohova. (Muleri Namalaleya 2:24.) Wenjedhela vevo pyo-okaekela ira munooda kala osangalala idhiwa ira vyevyo vinaira nyo vinomsangalali-a bwii-u, Yesu Kristu.

14. N’nga ninofwanela thuulela n’ni na-elanga vifunelo vyevyo vinafuna i-yo kwakwaneli-edha?

¹⁴ N’nga kala okwakwana na urumiwi unoira nyo va ee-ni unothapulela ira kamunofwanela thuulela ndhila dhinango ira dhowenjedhela urumi winyu wa Yohova? E-i kai ee-no. Ninooda irana vinjinji thitho ninooda vi-elela vifunelo vyevyo vinanikami-e ira nilaleele mwadodoliso thitho kami-anga abali na arongoli-u. Ninooda kwakwaneli-edha vyofuna vyevi naira vyongo mwazelu thitho modhievi-a mokami-a enango malo mothuulelanga vyofuna vi-u.—Sang. 11:2; Mayir. 20:35.

15. N’nga ndi vifunelo vinango viivi vyevyo vinaukami-eni wenjedhela imwerumweru inyu?

¹⁵ N’nga pivifunelo viivi vyevyo vinakaeena nyo? Muvepenga Yohova ira aukami-eni idhiwa vifunelo vyevyo vinakwakwaneli-edhe nyo. (Sang. 16:3; Yobo 1:5) N’nga pyoodeya ira mukaeena vifunelo vyevyo viongiwile  mundima yoroma mu yofunjedha yei ninga ira upainiya okami-a, venango okaatheya, laba vabeteli venango iranao urumiwi wa vyomangamanga? Munooda funjedha iongelo inago naifunelo yoi mulaleele milanyu yapama tatamo yeniyo inoongiwa iyongelwiyo. Munoidhiwa vinjinji voleri muru 10 buku  loi Gulu Lochita Chifuniro cha Yehova thitho votapanya na andimuwa avapingoni vinyu. * Mwadhilimbi-edhanga kwakwaneli-edha vifunelo vinyu, dhowa winyu vasongolo unodha wenjedhela imwerumweru yinyu.

16. N’nga munaire a-vi akala va-eni kamunaode kwakwaneli-edha vifunelo vinango?

¹⁶ N’nga akala pyo-oodeya kwakwaneli-edha vifunelo vyevyo viongiwile muyofunjedha yei? Tipama zindiyela vifunelo vyevyo vinaode i-yo vikwakwaneli-edha. Kathuulelani vifunelo vyo-arelavi.

17. Movwelana na lemba la 1 Timoteo 4:13, 15 n’nga bali unaire a-vi ira afunji-enga mwadodoliso?

¹⁷ Muleri 1 Timoteo 4:13, 15. Akala muli abali obadiziwa, munooda kaana thidhi ira muwenjedhele dodoliso linyu loonga myasa thitho lofunji-a. Mwasiwa ngwan’ni? Mwasiwa ngoi vivelela winyu voleri mwathitho thitho dodoliso loonga nofunji-a linokami-a vinjinji atu ouvuruwanani. Munooda vi-elela ifunelo yoi mufunjedhenga i-ndi-edha basa makundo a yofunjedha ili yothene inofwanyeya mubukhu loi dhilimbi-edheni voleri na funji-a mwadodoliso. Mudhilimbi-edhenga funjedha dodoliso limbo-i noliwesedha mwakala vandhe thitho i-ndi-edha basa makundwao mwaonganga mwasa. Muvepenga malangi-o waanamalangi-a okami-a venango enao “anokaana thidhi voonga nofunji-a.” * (1 Timo. 5:17) Mwaulukuli-anga dodoliso lifunjedhile nyo muyofunjedha inango, munongokami-a alimbo uvuruwanani limbi-a iroromelo yiwa venango alimbia ira ta-indi-edhenga basa vyevyo vifunjedhile aliwa. Mwairanga vyevyi  munodha wenjedhela imwerumweru yinyu thitho yiwa.

18. N’nga chini jinanikami-e ira nikwakwaneli-edhe vifunelo vi-u vabasa lolaleela?

¹⁸ I-yo othene nitova-iwa basa lolaleela thitho funji-a. (Mat. 28:19, 20; Aroma 10:14) N’nga munofuna wenjedhela dodoliso linyu vabasa lofuneya vinjinji li? Mwafunjedha makundo amubukhu loi dhilimbi-edheni voleri no funji-a mwadodoliso zindiyelani vifunelo vyoi muvi-indi-edhenga basa vyevyo vifunjedhile nyo. Munooda fwanya malangi-o enango okami-a mu ixibukhu ya migumano thitho ingumi yi-u yau Kristau na Urumiwi—namavidiyo aifwanafwani-o yolaleelana enao anooni-iwa vamigumano yavairi vasumana. Mudhilimbi-edhanga mundhila dho-iyana-iyana noona yeniyo ili yapama wanyo. Mwa-arelanga malangi-o enala, munodha kala namafunji-a wa dodoliso thitho vyevyi vinodha ukami-ani ira mukalenga osangalala vinjinji.—2 Timo. 4:5.

19. N’nga chini inaukami-eni ira muulukuli-enga makalelo enao anodhiveliwana Nlungu?

¹⁹ Mwathuulelanga vifunelo vyevyo vinofuna nyo kaana, kamupwazenga yongo yofuneya vinjinji yeniyo ili—ulukuli-a makalelo anodhiveliwana Nlungu. (Agal. 5:22, 23; Akol. 3:12; 2 Pe. 1:5-8) N’nga munaire a-vi ira mukaena makalelo enala? Mwaifwanafwani-o, nifwanafwani-e ira munofuna mwangana iroromelo yolimba. Monofwanela leri mabukhwi-u, thitho myasa dhedho dhiina malangi-o enao anaukami-eni limbi-a iroromelo yinyu. Munooda ganyali vinjinji namavidiyo ava JW Broadcasting^® oonga vyaabali naarongola enango enao taoni-idhe iroromelo volimbanana vyowesedha vyo-iyana-iyana vyevyo vyagumanena aliwa. Ee-no muthuulelenga ndhila yeniyo inaodele nyo sazi-edha iroromelo yiwa vaingumi yinyu.

20. N’nga ninaire a-vi ira niwenjedhele imwerumweru yi-u thitho ira na-asukwalenga vinjinji?

²⁰ Mo-okaikela, i-yo othene ninofuna ira vinjinji vomlabela Yohova. Muilambo ipya, ninodha kaana ngari ilukulu vomlabela ninga mwemo munaodele i-yo. Mbwenye va-eni, na-indi-edhanga basa ngari iliyothene inokaana i-yo, ninooda wenjedhela imwerumweru yi-u thitho kaninandungunyenga. Nairangana vyevi, ninooda lemeza thitho mtitimi-a Yohova Nlungwi-u waimwerumweru. (1 Timo. 1:11) Ee-no dhoweni nisangalalenga na vyevyo vinooda i-yo irana vomlabela Yohova.