1. Le i bukomo’ka buloñanga banabetu bavule mwanda wa kwingidila Yehova bininge?

 PANO penda pafwena mfulo ya ino ngikadilo ya bintu, tubaikala na mingilo mivule ya kwingila. (Mat. 24:14; Luka 10:2; 1 Pe. 5:2) Batwe bonso tusakanga kwingidila Yehova bininge. Bavule batandabulanga mwingilo wabo. Bamo nabo basakanga kwingila bu bapania. Bakwabo nabo basakanga kwingila ku Betele nansha ku lūbako lwa mobo a mu bulongolodi. Batutu bavule nabo, baloñanga bukomo bwa kubwanya bisakibwa bya kwingila bu mwingidi wa mingilo nansha bu mukulumpe. (1 Tm. 3:1, 8) Bine, Yehova usangalanga bininge pamona uno mushipiditu wa kwipāna mu bengidi bandi!​—Ñim. 110:3; Isa. 6:8.

2. Le tubwanya padi kwiivwana namani shi ketufikīlepo pa bitungo byetu bimo bya ku mushipiditu?

² Inoko, tubwanya kushilula kutyumukwa mutyima, shi tubamone amba tubaije bininge ino kufikila pa bitungo byetu bya ku mushipiditu mpika. Nansha padi tubwanya kutyumukwa mutyima shi kebetupelepo madyese amoamo pa mwanda wa myaka yetu nansha ngikadilo yotudi’mo. (Nki. 13:12) Kino kyo kyatene ne Melissa. * Wadi usaka kukengila ku Betele nansha kukafunda Masomo a Basapudi ba Bulopwe, ino unena’mba: “Myaka yami ke mipite. Pano ano madyese ke kilotwa kondi. Kyaba kimo ntyumukwanga mutyima.”

3. Le i bika padi bisakilwa kulonga bantu bamo pa kupebwa mingilo imoimo mu kipwilo?

 ³ Bankasampe bamo babwanya kwikala bakomo mu ngitu, ino basakilwa padi kutama ne kwikala na ngikadila imoimo kumeso kwa kubwanya bisakibwa bya kupebwa mingilo mikwabo. Padi babwanya kwikala na ñeni, kukwata butyibi bukidibukidi, ne kwikala na kipyupyu kya kwingila. Inoko basakilwa bidi padi kwifunda kwikala na kitūkijetyima, kwingila mwingilo wabo senene ne kulēmeka bakwabo. Shi ute mutyima ku ngikadila yosakilwa kutamija, bakakupa padi madyese mu kitatyi kyokulangilapo. Tulangulukilei bidi pa kimfwa kya Nick. Paadi na myaka 20, watyumukilwe mutyima bininge mwanda kebamutongelepo bu mwingidi wa mingilo. Unena’mba: “Namwene amba kudi bintu kebyendekapo kondi.” Inoko Nick kalekelepo kutamija ngikadila yaadi usakilwa. Watele mutyima bininge ku mingilo yadi ubwanya kwingila mu kipwilo. Dyalelo wingilanga mu Komite wa Musambo.

4. Le i bika byotusa kwisambila’po mu kino kishinte?

⁴ Lelo wi mutyumukwe mutyima mwanda kwafikīle pa bitungo bimobimo bya ku mushipiditu? Shi i amo, nabya lombola Yehova mowiivwanina. (Ñim. 37:5-7) Kadi nena banabetu batame ku mushipiditu bakupe madingi a mwa kwilumbulwila mu mwingilo oingidila Leza, kupwa longa bukomo bwa kwingidija madingi abo. Shi ulonge namino, ubwanya padi kupebwa mingilo yowadi ukimba. Monka mobyaikadile na Melissa otwatelanga kala, padi madyese osaka keabwanyapo kukupebwa pano. Penepa usa kulonga namani? Le ukalama nsangaji yobe namani? Pa kulondolola kino kipangujo, kino kishinte kisa kwisambila (1) pa kwa kutana nsangaji, (2) pa muswelo obwanya kuvudija nsangaji yobe, ne (3) pa bitungo byobwanya kwitungila bikavudija’ko nsangaji yobe.

5. Le i bika byotufwaninwe kuta’ko mutyima pa kwikala na nsangaji? (Musapudi 6:9)

⁵ Mungya Musapudi 6:9, tubwanya kutana nsangaji, shi twiikimba ku kifuko kifwaninwe. (Tanga.) Muntu usangela “kyokya kimwene meso,” usangelanga kyokya kyadi nakyo, kimfwa ngikadilo yadi’mo pano. Ino muntu ‘ulumbakena bya kusakasaka’ byandi, ukimbanga’nka kukimba kyokya kyakabwanyapo kwikala nakyo. Penepa, i ñeni’ka yotuboila’ko? I ya amba pa kwikala na nsangaji, tufwaninwe kuta mutyima ku byobya byotudi nabyo ne ku bitungo byotubwanya kufikila’po.

6. Le i kyelekejo’ka kyotusa kwisambila’po, ne tusa kuta mutyima ku bika?

⁶ Le bine, ubwanya kusangela byobya byodi kala nabyo? Mwanda mungya kipangila, kitatyi pokyenda kipita, tusakilanga’ko bintu bipya. Inoko bibwanika kusangela byobya byotudi nabyo. Tubwanya kusangela bininge kyokya “kimwene meso” etu. Le tubwanya kulonga kino namani? Pa kuyuka mwa kulongela, tulangulukilei bidi pa kyelekejo kya Yesu kya talenta kidi mu Mateo 25:14-30. Tusa kuta mutyima ku bintu byokibwanya kwitufundija pa mwa kwikadila na nsangaji mu mwingilo otwingila pano ne mwa kwiivudijija.

7. Sekununa mu kīpi lukindi lwa Yesu lwa talenta.

⁷ Kino kyelekejo kīsambila pa muntu wādi ukimba kwenda lwendo. Kumeso kwa kutaluka, wāita bapika bandi wēbapa abo bonso talenta ya kusungulula. * Uno muntu wāpele  bano bapika talenta mungya bukomo bwabo, mubajinji wāmupa talenta itano, wa bubidi talenta ibidi, ne wa busatu talenta imo. Bapika babidi babajinji bālonga bukomo bwa kuvudija talenta yabo. Ino umpika wa busatu kālongelepo kintu na lupeto lobāmupele, mfumwandi wāmutalula pa kaji.

8. Mwanda waka umpika mubajinji wa mu kino kyelekejo wāsangele bininge?

⁸ Umpika mubajinji wāsangele bininge pa kumupa kwāmupele mfumwandi talenta itano. Luno lwādi lupeto luvule, kadi kumupa’lo kwādi kulombola’mba mfumwandi umukulupile bininge! Ino le umpika wa bubidi nandi le? Wādi ukokeja kutyumukwa mutyima mwanda kebāmupelepo talenta mivule, na yobāpele umpika mubajinji. Ino le wālongele’po namani?

9. Le Yesu kānenenepo bika pa umpika wa bubidi? (Mateo 25:22, 23)

⁹ Tanga Mateo 25:22, 23. Yesu kānenenepo amba umpika wa bubidi wālobele ne kwikala na kīji pa mwanda wa talenta ibidi yobāmupele. Kadi Yesu kālombwelepo amba umpika wētompwedile amba: ‘Yo yonso’nka ino’i? Mwanda waka mfumwetu wampe talenta mityetye, mwene nami ngidi na bukomo pamo’nka na bwa umpika obapa talenta itano! Shi mfumwami kankulupilepo, i biyampe nkajīke ino talenta ibidi ne kwiingidila byami pa kyaba kya kumwingidila.’

10. Le umpika wa bubidi wālongele bika na talenta yandi?

¹⁰ Pamo’nka bwa umpika mubajinji, umpika wa bubidi nandi wākwete na kusumininwa mwingilo obāmupele ne kwingila bininge  mwingilo wa mfumwandi. Ebiya, wāvudija pabidi talenta ya mfumwandi. Uno umpika bāmwesele bininge pa kwingila kwawāingile bininge. Mfumwandi wāsangele bininge kadi wāmubweja’ko ne mingilo mikwabo!

11. Le i muswelo’ka otubwanya kuvudija nsangaji yetu?

¹¹ Mu muswelo umo onka, tubwanya kuvudija nsangaji yetu na kwielela bininge mu mwingilo o-onso obetupa kwingidila Yehova. ‘Wipāne bininge’ mu mwingilo wa busapudi, kadi ingila bininge mingilo ya kipwilo. (Bil. 18:5; Bah. 10:24, 25) Teakanya biyampe myanda ikefundwa ku kupwila, mwa kuletela malondololo akankamika. Kwata na kusumininwa kipindi kyo-kyonso kyobakupa ku kupwila kwa mu bukata bwa yenga. Shi abakupe mwingilo kapanda wa kwingila mu kipwilo, ingila’o biyampe kadi pa kitatyi. Kokamona mwingilo o-onso obakupa bu keudipo na mvubu ne amba kwiwingila i kwela kyaba bitupu. Longa bukomo bwa kulumbulula bwino bobe. (Nki. 22:29) Shi wielele bininge mu mingilo ya Yehova, bulunda bobe nandi bukatyita kadi nsangaji yobe ikavula bininge. (Ngt. 6:4) Kadi ukapēlelwa kusangala pamo na bakwenu shi abapebwa madyese owadi usaka kupebwa.​—Loma 12:15; Ngt. 5:26.

12. Le i bintu’ka byalongele Batumoni babidi mwanda wa kuvudija nsangaji yabo?

¹² Le ubavuluka Melissa, kaka wadi usaka kukengila ku Betele nansha kukafunda Masomo a Basapudi ba Bulopwe? Nansha byakafikīlepo pa kino kitungo, unena’mba: “Noñanga bukomo bwa kwingila biyampe mwingilo wami wa bupania ne kwingidija manwa meshileshile a kusapula. Kino kindetelanga nsangaji mivule.” Le Nick walongele namani kitatyi kyaatyumukilwe mutyima pokebamutongelepo bu mwingidi wa mingilo? Unena’mba: “Natele mutyima ku madyese onadi nao—kimfwa a kusapula ne kulondolola biyampe ku kupwila. Kadi nadingile fomu wa kukengila ku Betele, ebiya baungita mwaka ulonda’ko.”

13. Le i bika bikalupuka’ko shi wielele bininge mu mwingilo oingila pano? (Musapudi 2:24)

¹³ Shi wielele bininge mu mwingilo oingila pano, le babwanya kukakupa mingilo mivule mu mafuku āya kumeso? Babwanya kukupa’yo enka na mobapedile’yo Nick. Ino nansha shi kebakupele’yopo, pamo bwa Melissa, ukekala na nsangaji mivule, kadi ukasangela bininge mingilo yoingidila Yehova. (Tanga Musapudi 2:24.) Ne kadi kukabulwepo kwikala na nsangaji pa kuyuka’mba bukomo bolonga busangajanga Yesu Kidishitu Mfumwetu.

14. Lelo i bika byotufwaninwe kuvuluka pa mwanda utala bitungo byetu bya ku mushipiditu?

¹⁴ Lelo kuta mutyima ku mingilo yotwingila pano, kushintulula’mba ketufwaninwepo kukimba miswelo ya kutandabula mwingilo otwingidila Yehova? Ke amopo! Tubwanya kadi tufwaninwe kwitungila bitungo bya kwitukwasha twikale basapudi bayampe ne bafundiji bayampe, bantu bakwasha batutu ne bakaka. Tukafikila pa bino bitungo shi tuta mutyima ku kukwasha bakwetu na tunangu ne na butūkanye pa kyaba kya kwita’o batwe bene.​—Nki 11:2; Bil 20:35.

15. Le i bitungo’ka bimobimo bibwanya kukukwasha uvudije nsangaji yobe?

¹⁵ Le i bitungo’ka byokokeja kwitungila? Lomba Yehova akukwashe uyuke bitungo byobwanya kufikila’po. (Nki 16:3; Yak 1:5) Le ubwanya kufikila pa kitungo kimo pa byobya bitelelwe mu  musango mubajinji, kimfwa kya kwikala pania mukwashi nansha wa lonso, kya kwingila ku Betele nansha mu mingilo ya lūbako? Padi ubwanya kwifunda ludimi lweni mwanda wa kusambakanya myanda miyampe  nansha mwanda wa kusapula mu mwaba wa ludimi lweni. Ubwanya kuyukila’ko bitungo bivule na kutanga shapita wa 10 wa dibuku Balongololwe Mwa Kulongela Kiswa-Mutyima kya Yehova, ne na kwisamba na bakulumpe ba mu kyenu kipwilo. * Polonga bukomo bwa kufikila pa bino bitungo, bakwenu bakamona kwendelela kobe kadi nsangaji yobe ikavudila’ko.

16. Le i bika byobwanya kulonga shi pano kubwanyapo kufikila pa kitungo kampanda?

¹⁶ Ino le bikekala namani shi pano kubwanyapo kufikila pa bitungo byotwesambila’po’bi? Kya kulonga i kwitungila kitungo kikwabo kyokokeja kufikila’po. Tulangulukilei bidi pa bino bitungo bikwabo bilonda’ko.

17. Mungya 1 Temote 4:13, 15, le tutu ubwanya kwikala mufundiji muyampe namani?

¹⁷ Tanga 1 Temote 4:13, 15. Shi wi tutu mubatyijibwe, longa bukomo bwa kulumbulula bwino bobe bwa kwisamba ne kufundija. Mwanda waka? Mwanda shi “wielele bininge” mu kutanga, kwisamba ne kufundija, bantu bakwivwana bakamwena’mo. Witungile kitungo kya kwifunda ne kwingidija kifundwa ne kifundwa kīsambilwe’po mu boloshile Wielele’ko Kutanga ne Kufundija. Wifunde kifundwa kimo-kimo, wiibidije’kyo ku njibo, kadi longa bukomo bwa kumwekeja’kyo mu bipindi byopityija ku kupwila. Lomba madingi kudi mudingidi mukwashi nansha ku bakulumpe bakwabo “bengila bininge mu kwisamba ne kufundija.” * (1 Tm. 5:17) Tá mutyima ku kwivwanija disomo, kadi kwasha bemvwaniki bobe baningije lwitabijo lwabo  nansha kwibakankamika bengidije byobefunda. Shi ulonge namino, ukavudija nsangaji yobe ne ya bakwenu.

18. Le i bika bibwanya kwitukwasha tufikile pa bitungo mu mwingilo wetu wa busapudi?

¹⁸ Batwe bonso tudi na mwingilo wa kusapula ne wa kulonga bana ba bwanga. (Mat. 28:19, 20; Loma 10:14) Le usakanga kulumbulula bwino bobe mu uno mwingilo wa kamweno? Kitatyi kyotanga ne kwingidija byowifunda mu boloshile Kutanga ne Kufundija, witungile bitungo bipotoloke. Ubwanya kutana madingi makwabo mayampe mu Kabuku ka ku Kupwila Būmi ne Mwingilo, ne mu mavideo a misapwilo ya kulondela’po atalwanga ku kupwila kwa mu bukata bwa yenga. Tompa madingi meshileshile, umone oa endeka biyampe. Shi ulonde ano madingi, na bubine ukekala mwine Kidishitu wa bwino kadi kino kikakuletela nsangaji mivule bininge.​—2 Tm. 4:5.

19. Le i muswelo’ka obwanya kutamija ngikadila isangaja Leza?

¹⁹ Kitatyi kyowitungila bitungo, kokelwa kitungo kya mvubu mpata—kya kutamija ngikadila isangaja Leza. (Ngt. 5:22, 23; Kol. 3:12; 2 Pe. 1:5-8) Le ubwanya kufikila pa kino kitungo namani? Kimfwa, fwatakanya’po shi usaka kwikala na lwitabijo lukomo. Bikakulomba kutanga bishinte bidi mu mabuku etu, bidi’mo madingi mayampe a mwa kukomejeja lwitabijo lobe. Ubwanya ne kumwena mu kutala tumavideo twa mu Televijo ya JW, tulombola muswelo walombwele batutu ne bakaka lwitabijo lukomo kitatyi kyobadi mu makambakano. Kupwa tala muswelo obwanya kwiula lwitabijo lwabo mu būmi bobe.

20. Le i muswelo’ka otukabweja’ko nsangaji yetu ne kuleka kutyumukwa mutyima bininge?

²⁰ Na bubine, batwe bonso tusakanga kulongela Yehova bintu bivule kutabuka byotumulongela pano. Mu ntanda mipya ya Leza, tukabwanya kumwingidila ne pa mfulo. Pano’ko bidi, shi twielele’ko kwingila mingilo yotudi kala nayo, tukabweja’ko nsangaji yetu kadi ketukatyumukwapo mutyima bininge. Kadi kintu kya mvubu kutabuka i kino, tukatumbija ne kutendela Yehova wetu “Leza wa nsangaji.” (1 Tm. 1:11) Nanshi tusangelei mingilo yotudi nayo!