1. Vandumbwetu vavavulu vali nakusolola ngachilihi ngwavo vali nakufwila kuzachila Yehova?

 TULI namilimo yayivulu yakuzata omu tuli nakupandama kukukuma chakano kaye. (Mateu 24:14; Luka 10:2; Petu. 1, 5:2) Tuvosena tuli nakufwila kuzachila Yehova noho hakumina ngolo jetu. Vandumbwetu vavavulu vali nakuzata chikuma mulimo wakwambulula. Vamwe vafwila kuzata upayiniya. Veka vasaka kuzachila haMbetele chipwe kutunga vihela vyakulemesela Kalunga. Kaha vandumbwetu vamalunga vafwila kuzata nangolo mangana vatengamo kupwa vaka-kuzachila chipwe tulama. (Chimo. 1, 3:1, 8) Yehova eji kwivwanga kuwaha hakumona vangamba jenyi vali nakulisuula kumuzachila.—Samu 110:3; Isa. 6:8.

2. Tunahase kwivwa ngachilihi nge natuhona kutesamo milimo yimwe yakushipilitu twalitomena kuzata?

² Tunahase kuhomba nge namuhita tando yayisuku chakuzeneka kutesamo vyuma vyakushipilitu tunalitomena kulinga. Kaha nawa tunahase kuhomba kachi nge natuhona kuzata milimo yimwe muliuka mwomwo yamyaka yakusemuka tuli nayo chipwe ukalu weka. (Vishi. 13:12) Omu mukiko chapwile kuli ndumbwetu wapwevo Melissa. * Azangile kuya nakuzachila haMbetele chipwe kuya kuShikola yaVaka-kwambulula Wangana, oloze ahanjikile ngwenyi: “Ngunazomboka lyehi myaka yize vetavisa. Ngocho kangweshi kuhasa kuzachila haMbetele chipwe kuya kushikolako. Echi cheji kungulingisanga nguhombe shimbu jimwe.”

3. Vyuma muka vatela kulinga vandumbwetu vamwe numba vatengamo kuzata milimo yimwe muchikungulwilo?

³ Vandumbwetu vavakweze vatela kufwila kupwa nauhashi umwe uze nauvalingisa vatengamo kuzata milimo yimwe yamuchikungulwilo. Chakutalilaho, vanahase kupwa namangana,  nakushinganyeka washi washi, namuchima wakufwila kuzata milimo, oloze vatela kupwa namuchima wakutalilila chikoki, nakuzata kanawa milimo navavahana nakuvumbika nawa vakwavo. Nge namuzata nangolo mangana mupwenga navilinga vyamwaza, kaha vandumbwetu vanahase kumihana milimo halwola luze kamwafweIelele ngwenu navamihana milimo kanako. Tutalenu hachakutalilaho chandumbwetu Nick. Omu apwile namyaka yakusemuka 20, evwile kupihya chikuma mwomwo vahonenene kumutongola kupwa muka-kuzachila. Ambile ngwenyi, “Ngwashinganyekele ngwami pamo kuli vyuma vimwe vize ngunakulimbenjanga.” Oloze Nick kazeyeleko, azachilenga kanawa muchikungulwilo nakuzata natwima mulimo wakwambulula. Oholyapwa ndumbwetu Nick atwama jino muKomiti yaMutango.

4. Vyuma muka natushimutwila muchihande chino?

⁴ Kutala muli nakwivwa kupihya mwomwo kanda mutesemo milimo yimwe yakushipilitu mwalitomena kuzata tahi? Nge mukiko, kaha lwezenu Yehova ukalu wenu. (Samu 37:5-7) Kaha nawa hulisenu vandumbwenu vakulindunuka vamilweze vyuma mwatela kulinga mangana muzovoloke kushipilitu, kufumaho lingenu vyuma navamilweza. Nge namulinga ngocho, kaha vanahase kumihana mulimo muchikungulwilo chipwe kutesamo vyuma munalitomena. Oloze ngana muze chapwile kuli ndumbwetu Melissa uze twavulukanga hakavanga, lwola lumwe kamweshi kuhasa kuzata milimo yimwe yamuliuka muli nakufwila kuzatako. Nge chili ngocho, kaha vyuma muka navimikafwa mutwaleho lika kupwa vakuwahilila? Hakusaka kukumbulula chihula kana, muchihande chino natushimutwila havyuma vitatu, (1) chuma nachitukafwa tupwenga vakuwahilila, (2) vyuma navitukafwa tutwaleho lika kupwa vakuwahilila, kaha (3) vyuma twatela kulitomena vize navatukafwa tutwaleho lika kupwa vakuwahilila.

5. Twatela kushinganyeka havyuma muka numba tupwenga vakuwahilila? (Muka-kwambulula 6:9)

⁵ Mukanda waMuka-kwambulula 6:9, watulweza chuma nachitukafwa tupwenga vakuwahilila. (Tangenu.) Mutu uze eji kulivwisanga kuwaha “vyuma namono nameso enyi” eji kuwahililanga navyuma ali navyo. Oloze mutu uze eji kufwilanga vyuma vize kamweneko kasuulukako. Chishina muka natulinangulako? Hakusaka tupwenga vakuwahilila, twatela kaha kushinganyeka havyuma vize tuli navyo navyuma vize tunahase kulitomena.

6. Chifwanyisa muka natushimutwila, kaha vyuma muka natulinangulako?

⁶ Uno chinahase kupwa chachashi mutu kusuuluka navyuma vize ali navyo lyehi tahi? Vatu vavavulu vashinganyeka ngwavo kachapwa chachashiko mwomwo twasaka kulinangula mwakuzachila milimo yeka yayihya. Oloze chapwa chachashi, mwomwo tunahase kulivwisa kuwaha vyuma vize tuli navyo. Chuma muka nachitukafwa tupwenga vakuwahilila. Tutalenu hachifwanyisa ahanjikile Yesu chajitalende chize chatwama hali Mateu 25:14-30. Chifwanyisa kana nachitukafwa tumone omwo tunahase kupwa vakuwahilila nomwo tunahase kutwalaho lika kupwa vakuwahilila kweseka nomu chili chiyoyelo chetu.

7. Lumbununenu mukavatu chifwanyisa chajitalende ahanjikile Yesu.

⁷ Muchifwanyisa kana, vavulukamo mutu uze apwile nakuya ungeji. Shimbu kanda akatuke, asanyikile vandungo jenyi nakuvahana jitalende mangana vasekasane. * Hakuwana nge ou lunga atachikijile uhashi wavandungo jenyi, ngocho ahanyine jitalende jitanu kuli ndungo umwe,  kaha jivali kuli ndungo mukwavo, kaha talende yimwe kuli ndungo wamuchitatu. Vandungo vavali vasekasanyine najize jitalende nakuwanyinaho jikwavo, oloze ndungo wamuchitatu kasekasanyine nayize talende vamuhanyineko, ngocho mwata wenyi amuhangile milimo.

8. Mwomwo ika natwambila ngwetu uze ndungo vahanyine jitalende jitanu awahililile chikuma?

⁸ Chasoloka nge ndungo uze vahanyine jitalende jitanu awahililile chikuma. Hakuwana nge jize jitalende jitanu vamuhanyine japwile jimbongo jajivulu chikuma, ngocho chasolwele nge mwata wenyi amufwelelele chikuma. Jino ndungo uze vahanyine jitalende jivali evwile ngachilihi? Pamo kachi ahombele chikuma hakuwana nge mukwavo vamuhanyine jitalende jajivulu. Oloze chuma muka alingile?

9. Mazu muka aze Yesu kahanjikile hali ndungo wamuchivaliko? (Mateu 25:22, 23)

⁹ Tangenu Mateu 25:22, 23. Yesu kahanjikile ngwenyi uze ndungo wamuchivali apihililile mwomwo vamuhanyine kaha jitalende jivaliko. Kaha nawa kahanjikile ngwenyi uze ndungo ayayavalile nakwamba ngwenyi: ‘Mwomwo ika mwata wami nanguhanyina jitalende jajindende okunyi nayami ngweji kuzatanga nangolo ngana mwamukwetu uze vanahane jitalende jitanu? Chipwe kwamba ngwenyi kachi nge mwata wami atachikiza ngwenyi kangwazata nangoloko, kaha nangujivumbika mangana ngulizachile milimo yami.’

10. Vyuma muka alingile ndungo wamuchivali najize jitalende vamuhanyine?

¹⁰ Ngana mwandungo watete, nandungo wamuchivali akilikichile hakusekasana najize jitalende jivali vamuhanyine kuli mwata wenyi. Hakukilikita  chenyi, awanyinyineho jitalende jeka jivali. Ngocho uze mwata wenyi amuhanyine fweto mwomwo yakukilikita chenyi, kaha nawa amusangejekele nakumuhana milimo yayivulu.

11. Vyuma muka twatela kulinga mangana tutwaleho lika kupwa vakuwahilila?

¹¹ Nayetu nawa twatela kutwalaho lika kuwahilila nge natuzata milimo yaYehova kweseka noho hakumina ngolo jetu. ‘Hundanganenunga’ mumulimo wakwambulula nakuzata nangolo jenu josena milimo yamuchikungulwilo. (Vili. 18:5; Hepe. 10:24, 25) Liwahisenunga kanawa shimbu kanda muyenga kukukunguluka mangana mukakumbulule kanawa vishina vize navikakolezeza vandumbwenu. Nge vanamihane chihande mushikola, kaha mwatela kuliwahisa kanawa. Kachi nge vanamihane mulimo muchikungulwilo, kaha mwatela kuheta washi kukukunguluka. Kamwatela kumona mulimo vanamihane kupwa wamokomokoko nakushinganyeka ngwenyi kamwatela kuwenyekela lwola lwenuko. Fwilenunga kuhotola uhashi wenu. (Vishi. 22:29) Nge namuzata chikuma milimo yaYehova, kaha namuzovoloka nakupwa vakuwahilila. (Ngale. 6:4) Echi nawa nachimilingisa muwahilile nge ndumbwenu vanamuhane mulimo uze mwasaka kuzata.—Loma 12:15; Ngale. 5:26.

12. Vyuma muka vyakafwile ndumbwetu Melissa naNick vapwenga lika vakuwahilila?

¹² Kutala muli nakwanuka ndumbwetu wapwevo Melissa uze asakile kuzachila haMbetele, chipwe kuya kuShikola yaVaka-Kwambulula Wangana tahi? Numba tuhu vyuma afwililile kavyateselemoko, oloze ambile ngwenyi: “Ngweji kuzatanga upayiniya nakuzachisa jijila jakwambulwilamo jakulisezaseza. Kahechi chinangulingisa nguwahilile chikuma.” Kaha chuma muka chakafwile ndumbwetu Nick omu vahonene kumutongola kupwa muka-kuzachila? Ambile ngwenyi: “Ngwazachilenga nangolo milimo yize ngwahashilenga yakufwana nge kwambulula nakukumbulula hakukunguluka. Kaha nawa ngwalisonekesele kuya nakuzachila haMbetele, kahomu mwahichile mwaka umwe vangusanyikile kuMbetele.”

13. Vyuma muka navifumamo kachi nge namuzata nangolo mumulimo wenu? (Muka-kwambulula 2:24)

¹³ Kachi nge namuzata kweseka noho hakumina ngolo jenu milimo muli nayo, kutala vanahase kukamihana milimo yikwavo kulutwe tahi? Chinahase kupwa vene ngocho mwomwo omu mukiko chapwile nakuli ndumbwetu Nick. Oloze nge kacheshi kupwa ngochoko, kaha munahase kutwalaho lika kupwa vakuwahilila hakuzata milimo yenu ngana muze chapwile kuli ndumbwetu Melissa. (Tangenu Muka-kwambulula 2:24.) Kaha nawa, namuwahilila chikuma hakutachikiza ngwenu muli nakwivwisa kuwaha Mwata wetu, Yesu Kulishitu.

14. Vyuma muka twatela kwanuka nge tuli nakulitomena milimo yakushipilitu?

¹⁴ Kachi nge oholyapwa tuli nakuzachila Yehova noho hakumina ngolo jetu, uno chili nakulumbununa nge katwatela kuwanako jijila jeka jakutohweselamo mulimo wetuko tahi? Nduma. Twatela kulitomena milimo yakushipilitu yize nayitukafwa tuzate kanawa mumulimo wakwambulula nawakunangula, nakukafwa vandumbwetu. Natutesamo vyuma tuli nakufwila nge natulinyisa nakukafwa vakwetu muchishishisa chakulinganyalisa etu vavene.—Vishi. 11:2; Vili. 20:35.

15. Milimo yimwe muka mwatela kulitomena yize nayimikafwa mupwenga vakuwahilila?

¹⁵ Vyuma muka vyakushipilitu munahase kulitomena? Lombenu kuli Yehova amikafwe mutachikize vyuma vyakushipilitu vize namulitomena munahase kutesamo. (Vishi. 16:3; Yako. 1:5) Kutala munahase kufwila kuzata milimo twavulukanga  mupalangalafu yatete yakufwana nge, kuzata upayiniya wakukafwa nawashimbu yosena, nakuzachila haMbetele chipwe kwazana mumulimo wakutungatunga wamuliuka tahi? Chipwe munahase kulinangula lilimi lyeka mangana mwambulule mujimbu mulilimi kana chipwe  kuya nakwambulwila kungalila yeka. Hakusaka mutachikize vyuma vyasakiwa hakuzata milimo kana, tangenu kapetulu 10 mumukanda waValongesa Valinge Mwaya Muchima waYehova nakuhulisa tulama vamuchikungulwilo chenu vamilweze vyakulinga. * Omu namutesamo vyuma kanevi namulitomena, vandumbwenu navamona kuzovoloka chenu, kaha nawa namupwa vakuwahilila.

16. Namulinga ngachilihi nge muli nakuhona kutesamo vyuma mwalitomena kulinga?

¹⁶ Jino namulinga ngachilihi nge kamweshi kuhasa kuzata milimo kaneyi tunavuluka muchihande chinoko? Kaha litomenenu milimo yeka yize munahase kutesamo. Tushimutwilenu hamilimo kana.

17. Kweseka naWaChimoteu 1, 4:13, 15, vyuma muka atela kulinga ndumbwetu walunga mangana apwenga muka-kunangula wamwenemwene?

¹⁷ Tangenu WaChimoteu 1, 4:13, 15. Nge wapwa undumbwetu walunga wakumbapachisa, kaha unahase kufwila kuhotolako uhashi wove wakuhanjika nakunangula. Mwomwo ika? Mwomwo nge nauzata nangolo mangana upwenga umuka-kutanga, nakunangula, nakuhanjika, kaha munganyalisa vaze navakwivwilila. Litomene kulinangula vilongesa vyosena vyamumbuloshuwa yaLihakeho Kutanganga Nakulinangula nakufwila kuvizachisa. Linangule chilongesa chimwe numba unungulukile kuchikwavo nakulihitulwisamo kanawa. Kaha fwila zachisa vyuma unalinangula hakuhanjika chihande navakuhana. Hulisa muka-kwolola vakulwane navaka-kuzachila chipwe vakulwane veka vaze “veji kuzatanga chikuma milimo yakuhanjika nakunangula” mangana vakukafwe. * (Chimo. 1, 5:17) Kanda kufwila kaha kukavangiza jindongi jamwakuhanjikilako,  oloze fwila kukafwa vatu vali nakukwivwilila vazamise lufwelelo lwavo nakukavangiza vyuma navalinangula. Echi nachikulingisa uwahilile nakulingisa nawa vaze vali nakukwivwilila vawahilile.

18. Vyuma muka navitukafwa mangana tuzate kanawa mulimo wakwambulula?

¹⁸ Tuvosena twatwama namulimo wakwambulula nou wakunangula vatu vapwenga tumbaji. (Mateu 28:19, 20; Loma 10:14) Munahase kuhotola ngachilihi uhashi wenu wakuzata ou mulimo waulemu? Tangenu mbuloshuwa yaKunangulanga nakulitomena vyuma muli nakufwila kutesamo nakufwila kuvikavangiza. Vyuma vikwavo navimikafwa shina vize vyatwama muMukanda waKukunguluka chaChiyoyelo naMulimo waVaka-Kulishitu, najivindiyo jakusolola jijila jakushimutwilanga navatu jize veji kutalisanga hakukunguluka chamukachi kachalumingo. Esekenu kuzachisa jijila jakulisezaseza mangana muwane jila yamwaza. Kachi nge namukavangiza jijila kaneji, kaha namupwa muvaka-kwambulula navaka-kunangula vamwenemwene, nakupwa nawa vakuwahilila.—Chimo. 2, 4:5.

19. Munahase kupwa ngachilihi navilinga vize navivwisa kuwaha Yehova?

¹⁹ Tachikizenu ngwenu omu namulitomena vyakulinga, mwatela kulitomena nawa kupwa navilinga vize navivwisa kuwaha Kalunga. (Ngale. 5:22, 23; Kolo. 3:12; Petu. 2, 1:5-8) Vyuma muka mwatela kulinga mangana mupwenga navilinga kana? Chakutalilaho, pamo muli nakufwila kupwa nalufwelelo lwakukola. Kaha munahase kutanga vihande vyatwama mumikanda yetu vize vinahase kumikafwa mwakupwila nalufwelelo lwakukola. Munahase nawa kunganyala hakutala jivindiyo ha JW Broadcasting^® jize jeji kuhanjikanga hali vandumbwetu vaze vanasololanga lufwelelo lwakukola chamokomoko nakuhita muukalu. Kaha esekenu kushinganyeka omwo munahase kulondezeza lufwelelo lwavo mukuyoya chenu.

20. Vyuma muka twatela kulinga mangana tupwenga vakuwahilila nakukehesako kuhomba?

²⁰ Twatachikiza ngwetu tuvosena twasaka kuzachila chikuma Yehova kuhambakanomu tuli nakumuzachila oholyapwa. Omu natukapwa mukaye kakahya, natukazachilanga Yehova noho hakumina ngolo jetu. Ngocho, omu tuli nakuvandamina lwola kana, kachi nge natuzata noho hakumina ngolo jetu, kaha tunahase kupwa vakuwahilila nakukehesako kuhomba. Chachinenenyi natwivwisa kuwaha Yehova ou apwa “Kalunga wakuwahilila.” (Chimo. 1, 1:11) Shikaho, tutwalenuho lika kuwahilila hakuzachila Yehova.