1. Antu amavulu anakufwila ñahi kuzata nankashi mumudimu waYehova?

 TUKWETI nyidimu yayivulu yakuzata chitunakuswina kwakwihi nakukuma kwanshakaminu yamakonu. (Mat. 24:14; Luka 10:2; 1 Pet. 5:2) Wejima wetu tunakukeña kumukalakela Yehova hanakumini ñovu jetu. Antu amavulu anakuzata nankashi mumudimu wakushimwina. Amakwawu akeñaña kuzata wupayiniya. Amakwawu akeñaña kukalakela haBeteli hela kutuña maluña amaneni akupompela, matala aWanta, tusanji twanyitayi hela tusanji twakubalumwina. Nawa amanakwetu amavulu anakuzata nañovu kulonda ashikihu kwikala ankoñi akuzatila hela akulumpi muchipompelu. (1 Tim. 3:1, 8) Yehova wazañalalaña nankashi hakumona antu jindi chinakudihanawu chamuchidiwu!—Mas. 110:3; Isa. 6:8.

2. Tunateli kutiya ñahi neyi chakwila akutwinka wanyi nyidimu yitwakeñaña mumudimu waYehova?

² Hela chochu, tunateli kuneña neyi chakwila hanahiti mpinji, chakwila mudimu wutwafwilaña mumudimu waYehova anatwinkiwu wanyi. Neyi akutwinka wanyi nyidimu yikwawu mukuloñesha kwaYehova muloña wakukula hela muloña wayuma yikwawu, tunateli kuzeya. (Yish. 13:12) Dichuma chamumwekeneni nimuhela Melissa. * Wakeñeleña kuya nakukalakela haBeteli hela kuya kuShikola yawakwaKushimwina aWanta, ilaña wahosheli nindi: “Nahiti dehi muyaaka yakeñekaña hakwila nawu nizatiku iyi nyidimu. Mpinji yikwawu naneñaña.”

3. Yumanyi yatela kwilawu antu amakwawu hakwila ashikihu kuzata nyidimu yikwawu?

³ Amakwawu achidi atwansi nawa akola kumujimba atela kwikala nayilwilu yimu henohu kanda ayinki nyidimu yikwawu mumudimu waYehova. Chakutalilahu, amakwawu anateli kwikala ababala, afuukulaña swayi nawa adi namuchima wakukeña  kuzata ilaña atela kwikala adiwunjika nankashi, atela kuzata nyidimu yawu chiwahi nawa atela kwikala nakalemesha. Neyi muzataña nañovu kulonda mwikali naniyi yilwilu yakeñekaña, anateli kuyinka nyidimu yimunakufwila hampinji yimunabuli kukuhwelela. Toñojokenu chuma chamumwekeneni Nick. Waneñeli nankashi chabuliliwu kumutonda kwikala nkoñi wakuzatila hadiñayi nayaaka 20. Wahosheli nindi: “Namweni nami hadaha kudi chuma chinabulaña kwila chiwahi.” Ilaña Nick hazeyeliku. Watwalekelihu kuzata nañovu muchipompelu nimumudimu wakushimwina. Ichi himembala wamuKometi yaMutayi.

4. Tukuhanjekadi muchinu chibaaba?

⁴ Komana mwaneñaña muloña wakwila kanda mutachiki kuzata mudimu wumwafwilaña mumudimu waYehova? Neyi mwaneñaña, mulejenumu Yehova chimunakutiya. (Mas. 37:5-7) Kubombelahu, ihulenu amanakwetu apama kulonda ayikwashi chimwatela kuzata mumudimu waNzambi nawa esekenu kwila munayilejiwu. Neyi mwila mwenimu, mwakazata mudimu wumwafwilaña. Kufwana Melissa, hadaha himunateli kuzata mudimu wumwafwilaña kumuzatila Yehova hanoyu mpinjiku. Chumanyi chimukwila? Munateli kutwalekahu ñahi kwikala namuzañalu? Hakwila nawu twakuli ilu lwihu, achinu chibaaba chikushimuna (1) yuma yatuletelaña muzañalu, 2) chitunateli kwikala namuzañalu chikupu (3) niyuma yitwatela kwila hakwila tusweji kwikala namuzañalu.

5. Yumanyi yitwatela kutoñojokaña hakwila twikaleña namuzañalu? (Mukwakutañisha 6:9)

⁵ Mukwakutañisha 6:9, yinalumbululi yuma yinateli kutuletela muzañalu. (Tañenu.) Muntu washaña maana hayuma ‘yinakumonayi namesu’ watiyaña kuwaha nayuma yikwetiyi, chidi neyi chihandilu chindi chichidi hanoyu mpinji. Kwambukaku, muntu wafwilaña yuma yeñi nayeñi wafwilaña yuma yikabula kwikalayi nayu. Tunakudizilaku chumanyi? Hakwila twikali namuzañalu twatela kushaña maana hayuma yitukweti bayi hayuma yitwafwilaña netu tukekali nayuku.

6. Chishimwinyi chitukuhanjekahu, nawa tukudizilaku chumanyi?

⁶ Komana chekala chaswayi kuzañalala nayuma yimukweti? Antu amavulu atoñojokaña nawu chaswayi wanyi muloña twakeñaña kudizilaku yuma yayiha ifuku nifuku. Ilaña chekala chaswayi. Tunateli kuzañalala nayuma ‘yamonaña mesu’ etu. Tunateli kwila ñahi mwenimu? Hakwila tuwani ñakwilu, lekenu tuhanjekenu hachishimu chaYesu chantalenta chekala haMatewu 25:14-30. Tukudiza chitunateli kwikala namuzañalu nichitunateli kuzañalala namudimu wutunakuzata.

7. Lumbululenu muwihi chishimu chaYesu chantalenta.

⁷ Munichi chishimu iwu iyala wadiña halwendu. Henohu kanda yanyamuki, wayitambikili anduñu jindi nawa wayinkeli ntalenta kulonda aselujoleña. * Dichi wayinkeli hamuntu-hamuntu kwesekeja nahakumina ñovu jawu. Wumu wamwinkeli ntalenta jitanu, mukwawu jiyedi nawa wamuchisatu yimu. Anduñu ayedi azatili nañovu kulonda awaninihu mali ahewulu ankaka yawu. Ilaña nduñu wamuchisatu, kwosi yuma yeliliyi namali amwinkeliwu nawa amuhañili mudimu kudi nkaka yindi.

8. Muloñadi nduñu watachi wamuchishimu chazañaleliyi?

⁸ Nduñu watachi watiyili kuwaha hakumwinka ntalenta jitanu kudi nkaka yindi.  Awa adiña mali amavulu, nawa chumichi chamwekesheleña nawu nkaka yindi wamukuhweleleli chikupu. Indi nduñu wamuchiyedi? Wadi kuneña muloña amwinkeli wanyi ntalenta jajivulu neyi jamwinkeliwu nduñu watachi. Hanu welili ñahi?

9. Chumanyi chabulili kuhoshayi Yesu hadi nduñu wamuchiyedi munichi chishimu? (Matewu 25:22, 23)

⁹ Tañenu Matewu 25:22, 23. Yesu wahosheli wanyi nindi nduñu wamuchiyedi wahilili hela kuneña muloña wakwila watambwili hohu ntalenta jiyedi. Nawa Yesu wahoshelihu wanyi nindi iwu nduñu watobeleña nindi: ‘Munanyinkelidi twanti? Ninami nazataña nañovu neyi iwu nduñu imunenki jintalenta jitanu. Neyi nkaka yami nakutoñojoka nindi nidi nduñu wamuwahi wanyi, nikupunda heseki nakuswekahu mali kulonda nidikalakeleña ami aweni bayi yenaku.’

10. Nduñu wamuchiyedi welili ñahi nantalenta jamwinkeliwu?

¹⁰ Kufwana nduñu watachi nduñu wamuchiyedi walemesheli mudimu wamwinkeliwu nawa wamuzatilili nkaka yindi nañovu. Chafuminimu, wavulishili ntalenta jiyedi nakwikala ntalenta jiwana. Nkaka yindi wamufweteli iwu nduñu chazatiliyi nañovu. Nkaka yindi wamuhamekeli nawa wamwinkelelihu nyidimu yikwawu.

11. Munateli kwikala ñahi namuzañalu chikupu?

¹¹ Munjila yoyimu, tunateli kwikala namuzañalu chikupu neyi tudikitaña mumudimu  wejima wutukweti mumudimu waYehova. Shenuña “muchima chikupu hamudimu wakushimwina” nawa zatilenuña hamu nachipompelu. (Yilw. 18:5; Heb. 10:24, 25) Yenuña kukupompa iku munaloñeshi kulonda muhaneña ñakwilu jikukolesha antu. Monenuña mpanji yawatudizi yamukachi kamulungu nenu yalema. Neyi anayinki mudimu muchipompelu, wuzatenu mukunyakashana. Bayi mutoñojokaña nenu mudimu wunayinkiwu wamukunkulwayiku nawa nenu kwila mumanishilahu mpinji nehi. Zatenuña nañovu kulonda muwahishiku nzatilu yenu. (Yish. 22:29) Neyi muzataña nañovu mumudimu waYehova, mukwikala ibwambu dindi nawa mukwikala namuzañalu chikupu. (Ñal. 6:4) Mukutiyaña wanyi kutama neyi akwenu ayinka mudimu wumwafwilaña.—Rom. 12:15; Ñal. 5:26.

12. Yumanyi yeliliwu amuhela Melissa nimanakwetu Nick yayikwashili kwikala namuzañalu chikupu?

¹² Anukenu muhela Melissa, wafwilileña kukalakela haBeteli nikuya kuShikola yawakwaKushimwina aWanta. Hela chakwila wazatili wanyi nyidimu yafwilileñayi, wahosheli nindi: “Nazataña nañovu mumudimu wami wawupayiniya nawa nazatishaña njila jashiyashana mumudimu wakushimwina. Chumichi chinanleteli muzañalu chikupu.” Chumanyi chamukwashili Nick kumanisha chineñi hampinji yabuliliwu kumutonda kwikala nkoñi wakuzatila? Wahosheli nindi: “Nashili maana hanyidimu yinadiña nakuzata, nikuzata nañovu mumudimu wakushimwina nawa nahanineña ñakwilu jakukolesha hakupompa. Nasonekeli fomu yakuya kuBeteli nawa añakwili chaaka chalondelelihu.”

13. Chumanyi chikufumamu neyi mudikitaña chikupu mumudimu wumunakuzata chayinu mpinji? (Mukwakutañisha 2:24)

¹³ Neyi muzataña nañovu munyidimu yimukweti chayinu mpinji, komana akayinka nyidimu yikwawu kumbidi? Chinateli kumwekana neyi chamumwekeneni Nick. Kufwana Melissa, muzañalu wenu wukuswejelaku nawa mukuzañalalaña nanyidimu yimunakumuzatila Yehova. (Tañenu Mukwakutañisha 2:24.) Kubombelahu mukuzañalalaña chikupu hakwiluka nenu munakumuzañalesha Mwanta wetu Yesu Kristu chimunakuzata nañovu.

14. Yumanyi yitwatela kwanukaña mpinji yejima neyi tutoñojoka hayikonkwanyi yitukweti mumudimu waYehova?

¹⁴ Komana kusha maana hanyidimu yitukweti kunatalishi mukwila nawu twatela kuleka kuzata nañovu kulonda tukazatiku nyidimu yikwawu mumudimu waYehova? Inehi. Twatela kwimika yikonkwanyi yinateli kutukwasha kwikala antañishi amawahi mumudimu wakushimwina nawa yinateli kukwasha amanakwetu niahela. Tunateli kushikija iyi yikonkwanyi neyi tusha muchima hakukalakela akwetu.—Yish. 11:2; Yilw. 20:35.

15. Yikonkwanyinyi yinateli kuyikwasha kwikala namuzañalu chikupu?

¹⁵ Yikonkwanyinyi yimwatela kudimikila enu aweni? Mulombenu Yehova yayikwashi kwiluka yikonkwanyi yimunateli kwimika nawa yimunateli kuzata. (Yish. 16:3; Yak. 1:5) Kwila mweseka kuzataku mudimu wumu hanyidimu yitwashimuna  muparagilafu yatachi muchinu chibaaba nehi, chidi neyi kuzata wupayiniya wakukwasha hela wampinji yejima, kutuña matala aWanta, matala amaneni akupompela, tusanji twanyitayi nitusanji twakubalumwina. Hela hadaha munakukeña kudizaku idimi dacheñi kulonda mushimwineña nsañu yayiwahi indi kwiji kushimwina mwiluña mwahoshañawu idimi dacheñi. Munateli kwilukilahu yuma yayivulu neyi mutaña kapetulu 10 kamukanda waAbateyanishiwa ku Kucita Ukufwaya  kwa kwa Yehova, hela kuhanjeka nawakulumpi muchipompelu chenu. * Chimukuzataña nañovu kulonda mushikiji yikonkwanyi, mukuyilañaku hambidi nawa mukusweja kwikala namuzañalu.

16. Munateli kwila ñahi neyi chayinu mpinji himukutwesha kuzata nyidimu yikwawuku?

¹⁶ Indi neyi chayinu mpinji himukutwesha kushikija iyi yikonkwanyi yitunashimunihuku? Mwatela kwimika chikonkwanyi chimukutwesha kuzata. Talenu yuma yinateli kuyikwasha.

17. Kwesekeja na 1 Timotewu 4:13, 15, yumanyi yatela kwilayi manakwetu hakwila yekali ntañishi wamuwahi?

¹⁷ Tañenu 1 Timotewu 4:13, 15. Neyi mudi amanakwetu apapatishewa, mwatela kuzata nañovu kulonda mwikali anhoshi amawahi nawa antañishi amawahi. Muloñadi? Muloña neyi ‘mudinkamu’ mukutaña, mukuhosha nimukutañisha mukukwasha antu anakuyitiyilila. Imikenu chikokwanyi chakudiza nawa zatishenuña nsañu yejima yashimunawu mubroshuwa yaShenu Muchima Kukutaña Nikukutañisha. Dizenuña kudiza kumu hampinji yimu, hitulukenuñamu hampinji yimudi hetala nawa hampinji yimunakuhana mpanji zatishenuña yuma yimwadiza. Ihulenu mukwakufumba wahambadi hela akulumpi amakwawu “adikita nankashi mukuhosha nimukutañisha.” * (1 Tim. 5:17) Bayi mushaña hohu muchima hakuzatisha yuma yimwadiza mubuloshuwaku, ilaña yikwashenuña cheñi antiyilili jenu kukolesha chikuhwelelu chawu hela kuyisañumuna kulonda azatisheña yuma yinakudizawu.  Neyi mwilaña mwenimu, wejima wenu mukwikala namuzañalu.

18. Chumanyi chikutukwasha kushikija yikonkwanyi yetu mumudimu wakushimwina?

¹⁸ Wejima wetu tukweti mudimu wakushimwina nikwilisha atumbanji. (Mat. 28:19, 20; Rom. 10:14) Komana mukukeña kuwahishaku nzatilu yenu muniwu mudimu walema? Tañenuña broshuwa yaKutañisha nawa ikalenu nayikonkwanyi yikuyikwasha kuzatisha yuma yimunadizi. Nsañu yikwawu yinateli kuyikwasha munateli kuyiwana muChihandilu niMudimu Wanetu AkwaKristu Mukanda Wakupompa nimavidiyo achakuhanjeka nawantu amwekeshañawu hakupompa kwamukachi kamulungu. Esekenu kuzatisha njila jashiyashana kulonda mwiluki njila yikuzatika chiwahi. Neyi muzatisha iji njila, mukwikala antañishi amawahi nawa mukwikala namuzañalu.—2 Tim. 4:5.

19. Munateli kwila ñahi hakwila mwikali nayilwilu yamuzañaleshaña Nzambi?

¹⁹ Bayi muvulamena nenu chikonkwanyi chalema chimwatela kwikala nachu, hikwikala nayilwilu yamuzañaleshaña Nzambi. (Ñal. 5:22, 23; Kol. 3:12; 2 Pet. 1:5-8) Chumanyi chimwatela kwila hakwila mushikiji ichi chikokwanyi? Chakutalilahu, twili netu munakukeña kwikala nachikuhwelelu chakola. Munateli kutaña yibaaba yidi munyikanda yetu yashimunaña njila jinateli kuyikwasha kukolesha chikuhwelelu chenu. Neyi mutalaña mavidiyo a JW Broadcasting^® anakumwekesha amanakwetu niahela chinakumwekeshawu chikuhwelelu chawu hampinji yinakumonawu kukala kwamboka-mboka, chikuhwelelu chenu chikukola. Dichi monenuhu njila yimu mumunateli kuyimbujola hakwila mukoleshi chikuhwelelu chenu.

20. Yumanyi yitwatela kwila hakwila twikali namuzañalu chikupu nawa tubuleña kuneña?

²⁰ Chakadi nikujina, wejima wetu twakeñaña kumukalakela Yehova chikupu kubadika chitunakumukalakela chayinu mpinji. Mwituña dadiha daNzambi, tukamukalakelaña hakumina ñovu jetu. Dichi neyi tuzataña nañovu mumudimu wutukweti chayinu mpinji, tukwikala namuzañalu nawa tukuneñaña wanyi. Nawa chuma chasweja kulema, tukuleta mpuhu nikalemesha hadi Yehova, Nzambi yetu “wamuzañalu.” (1 Tim. 1:11) Dichi tuzañalaleña nanyidimu yitunakuzata chayinu mpinji!