1. Engtin nge unau tam takin Jehova rawngbâwlnaa tam lehzuala thawh an tum?

 KAN za hian he khawvêl tâwpna a hnaih zêl rualin hnathawh tûr tam tak kan nei a. (Mt. 24:14; Lk. 10:2; 1 Pet. 5:2) A tam thei ang bera Jehova rawngbâwl chu kan duh ṭheuh a ni. Unau tam tak chuan an rawngbâwlna an zauh va. Unau ṭhenkhat chuan pioneer nia rawngbâwl an beisei a. Unau dang lehte chuan Bethel-a rawngbâwl emaw, biakna atâna hman in saknaa tel theih emaw an beisei bawk. Unaupa tam tak chuan kohhranho rawngbâwltu emaw, kohhran upa emaw nih theih an tum bawk a ni. (1 Tim. 3:1, 8) Jehova chu a mite zîngah chutiang inpêk duhna rilru put hmang neite a hmuh chuan a va hlim dâwn tak êm!—Sâm 110:3; Is. 6:8.

2. Thlarau lam thiltum ṭhenkhat kan hlen thei lo a nih chuan engtin nge kan awm mai theih?

² Mahse, hun eng emaw chen a liam hnu pawha thlarau lam thiltum ṭhenkhat kan hlen thei lo a nih chuan kan lunghnual ṭan thei a. A nih loh leh, chanvo hlu ṭhenkhat chu kum upatna avâng leh dinhmun dangte avânga kan dawng thei lo a nih chuan kan lunghnual thei bawk. (Thuf. 13:12) Unaunu Melissa-i * chuan chutiang chu a tawng a. Bethel-a rawngbâwl emaw, Lalram Chanchin Ṭha Puangtute School-a kal emaw chu duh hle mah se, ani chuan: “Ka kumin a pêl tawh a. Tûnah chuan, chûng chanvo hlute chu ka tân chuan duhthusâm mai a ni. Chuvângin, a châng chuan ka lunghnual ṭhîn,” tiin a sawi.

3. Unaupate’n chanvo ṭhenkhat an dawn hmaiin eng nge an tih ngai thei?

³ Ṭhalai hrisêl deuhte chuan chanvo hlu dang an neih theih hmain thlarau lama puitlin leh mize ṭhenkhat an neih a ngai  thei a. Entîr nân, unaupa ṭhenkhat chuan finna te, thu tlûkna siam ngamna te, leh ṭhahnemngaihnate chu nei mah se, tûn aia dawhtheihna te, taihmâkna te, leh mi dang zahthiamnate an neih lehzual a ngai thei a ni. Chûng miziate nei tûra hma i lâk chuan, rawngbâwlna chanvo hlute chu i beisei loh hunah i dawng thei a ni. Unau Nick-a thiltawn hi han ngaihtuah teh. Kum 20 mi a nih laiin, kohhranho rawngbâwltua ruat a nih loh avângin a lunghnual hle a. Ani chuan, “Keimahah eng emaw dik lo awm ni hian ka inhria,” tiin a sawi. Mahse, Nick-a chu a beidawng lo. Kohhranah leh thu hrilh rawngbâwlnaah theih tâwp a chhuah a. Tûnah chuan, Branch Committee Member niin rawng a bâwl a ni.

4. He thuziakah hian eng nge kan sawiho vang?

⁴ Thlarau lam thiltum ṭhenkhat i hlen theih loh avângin i lunghual em? Chutianga i awm a nih chuan, i lungkhamnate chu Jehova hnênah hrilh ang che. (Sâm 37:5-7) Chu bâkah, Pathian rawng i bâwlnaa hma i sâwn theih dân tûr chungchângah thlarau lama puitling unaupate hnênah thurâwnte dîl la, chûngte chu theih tâwp chhuahin zâwm ang che. Chutianga i tih chuan, chu chanvo hlu chu i dawng emaw, i thiltum chu i hlen emaw thei ang. Mahse, a chunga kan sawi tâk Unaunu Melissa-i tawn angin, i dawn châk chanvo hlu chu tûnah rih chuan i dawng thei lo pawh a ni thei. Chutiang a nih chuan engtin nge ni ang? Engtin nge hlimna i neih reng theih ang? Chu zawhna chhân nân, he thuziakah hian (1) hlimna min neihtîr theitu te, (2) hlimna i tihpun theih dân te, leh (3) i hlimna belhchhah theitu thiltum ṭhenkhatte sawiho a ni ang.

5. Hlimna nei tûr chuan, eng nge kan ngaihven tlat ang? (Thuhriltu 6:9)

⁵ Thuhriltu 6:9-a chhinchhiah angin, a hmun dik taka kan zawn chuan hlimna kan nei thei a ni. (Chhiar rawh.) “Mita hmuh sa ngei” ngaihven tlattu chuan tûna a thil neihahte lungawina a nei a. Chumi nêna inkalhin, châkna chavai mai mai ngaihventu erawh chuan a neih theih loh tûr thilte chu neih a châk ṭhîn. A nih chuan, kan tâna zir tûr chu eng nge ni? Hlimna nei tûr chuan, kan thil neih sate leh kan neih theih âwm thilte chauh kan ngaihven tlat tûr a ni.

6. Tûnah, eng tehkhin thu nge kan ngaihtuah ang a, eng chungchâng nge kan ngaihven bîk ang?

⁶ Kan thil neih saa lungawina neih chu thil theih a ni em? Mi tam tak chuan thil tharte neih belh zêl kan duh ṭhin avângin chu chu thil theihah an ngai lo. Mahse, a tak takah chuan, chu chu thil theih a ni. Tûna kan thil neih, kan ‘mita hmuh sa ngeite’ avângin kan hlim thei a ni. Chu chu engtin nge a nih theih? Chumi hriat nân, Matthaia 25:14-30-a kan hmuh Isua talent tehkhin thu hi i lo ngaihtuah ang u. Tûna malsâwmna kan dawnte avânga hlimna kan neih theih dân leh hlimna kan tihpun theih dân chungchânga kan zir theihte chu kan hria ang.

7. Isua talent tehkhin thu chu tâwi têin khaikhâwm rawh.

⁷ Tehkhin thu-ah chuan, mi pakhat chu khual zinin a chhuak dâwn a. A kal chhuah hmain, a bâwihte chu kovin, an sum dâwnna tûr talent a pe ṭheuh a ni. * An tih theih chin tâwk ngaihtuahin, pu ber chuan bâwih pakhat chu talent nga a pe a, bâwih dang leh chu talent hnih a pe a, bâwih pathumna chu talent khat a pe a ni. Bâwih hmasa pahnihte chuan an pu sum tipung tûrin theih tâwp an chhuah a. Mahse, bâwih pathumna chuan a pu sum tipung tûra eng mah a tih loh avângin, a pu chuan a bâwih nihna ata a bân a ni.

8. Engvângin nge tehkhin thua bâwih hmasa ber chu a hlim theih?

 ⁸ Bâwih hmasa ber chu a puin talent nga a pêk avângin chanvo hlu dawng niin a inhre ngei ang. Chu chu sum tam tham tak a nih avângin, a puin a rinzia târ lanna a va ni êm! A nih leh, bâwih pahnihna chungchâng hi eng nge ni ve? Ani chu bâwih hmasa zâwk tluka tam talent a dawn loh avângin a lunghnual thei a ni. Mahse, ani chuan engtin nge a chhân lêt?

9. Bâwih pahnihna chungchângah Isua’n eng nge a sawi lan loh? (Matthaia 25:22, 23)

⁹ Matthaia 25:22, 23 chhiar rawh. Isua chuan bâwih pahnihna chu talent hnih chauh a dawn avângin a lunghnualin a thin a rim tih a sawi lo. Chu bâkah, Isua’n chu bâwih chuan: ‘Hei zawng hi maw ka dawn chu? Tihah chuan, kei pawh talent nga dawngtu tlukin ka thawkrim ve tho a lâwm! Ka pu hian min ngaihlu lo a nih chuan, hêng talent hnih hi ṭha takin ka phûm ang a, mahni tân sum ka zawng mai ang,’ tia a phunnawi thu lah a sawi lang hek lo.

10. Bâwih pahnihna chuan a talent chu engtin nge a tih?

¹⁰ Bâwih hmasa ber angin, bâwih a pahnihna pawhin a chanvo dawn chu ngai pawimawh hlein, a pu tân theih tâwp a chhuah a. Chuvângin, a pu kawltîr talent chu a lehhnihin a tipung a ni. Chu bâwih ṭhahnemngaihna leh thiamna chu nasa taka malsâwm a ni a. A pu chuan chu bâwih chungah a lâwm mai ni lovin, a hnênah mawhphurhna tam lehzual a pe a ni.

11. Engtin nge kan hlimnna kan tihpun theih?

¹¹ Chutiang bawkin, keini pawh Jehova rawngbâwlnaa kan chanvo dawn apiangah theih tâwp chhuaha inhmangin kan hlimna kan tipung thei a ni. Thu hrilh rawngbâwlnaah  “nasa takin inhmang” la, kohhran thiltihahte chuan a tam thei ang berin tel ang che. (Tirh. 18:5, NW; Heb. 10:24, 25) Inkhâwma chhânna ṭha tak i pêk theih nân, zir tûr thuziakte chu ṭha takin inbuatsaih ang che. Chawlhkâr inkhâwma i chanvo dawn eng pawh chu ngai hlu hle rawh. Kohhranah chanvo eng emaw ti tûra sâwm i nih chuan, hun vawng dik la, rinchhan tlâk ni ang che. I chanvo dawn eng pawh chu inbuatsaih ngai lo khawpa ho lam angin thlîr ngai suh. I thiamnate chu tihhmasâwn tum ang che. (Thuf. 22:29) Thlarau lam thiltih leh i chanvo neiha i inhman tam poh leh hma i sâwn chak lehzualin, i hlimna pawh a pung lehzual ang. (Gal. 6:4) Chu bâkah, unau dangte’n i chanvo dawn châk tak an dawn hunah anni chu i lâwmpui lehzual bawk ang.—Rom 12:15; Gal. 5:26.

12. Unau pahnihte chuan an hlimna tipung tûrin eng nge an tih?

¹² Bethel-a rawngbâwl, a nih loh leh Chanchin Ṭha Puangtute School-a kal a châkzia sawitu Unaunu Melissa-i kha i la hria em? A duhnate chu tihpuitlin theih ni lo mah se, ani chuan: “Pioneer rawngbâwlnaah leh thu hrilhna pêng hrang hrangah a tam thei ang bera tel ka tum tlat a. Chu chuan hlimna nasa tak min pe a ni,” tiin a sawi. A nih leh, Unau Nick-a chuan kohhranho rawngbâwltua ruat a nih loh khân, engtin nge a lunghnualna chu a hneh? “Tûna chanvo hlu ka dawnte—thlawhhma rawngbâwlnaa tel leh inkhâwma awmze nei taka chhânna pêkte—hi ka ngaihven tlat a. Bethel-ah rawngbâwl tûrin dîlna form ka theh lût a, a kum lehah min pawmsak a ni,” tiin a sawi.

13. Tûna i chanvo neiha i inhmang a nih chuan eng nge a rahchhuah ni ang? (Thuhriltu 2:24)

¹³ Tûna i chanvo neihah a tam thei ang bera i inhmang a nih chuan, nakinah mawhphurhna lian zâwk i dawng ang em? Unau Nick-a chunga a thleng ang bawkin, i dawng pawh a ni thei. Mahse, Unaunu Melissa-i anga i dawng lo a nih pawhin, i hlimna a pung thei thovin, Jehova tâna i thiltihte avângin lungawina nasa tak i nei ang. (Thuhriltu 2:24 chhiar rawh.) Chu bâkah, i thawhrimna chuan kan Pu ber Isua Krista a tilâwm tih i hriat avângin, hlimna nasa tak i nei ngei bawk ang.

14. Kan thlarau lam thiltumte chungchângah eng nge kan hriat reng ang?

¹⁴ Tûna kan chanvo neihte kan ngaihven tlatna chu Jehova tâna rawngbâwlna zauh theih dân kawng zawn a ngai tawh lo tihna a ni em? Ni lo ve! Rawngbâwlnaa hlawhtling tûra theih tâwp chhuah tûr leh kan unaute tâna mi ṭangkai tak ni tûra min ṭanpuitu thlarau lam thiltumte chu kan nei theiin, kan nei tûr a ni a. Mahni tân ni lo va, mi dangte tâna rawngbâwlna kan ngaihven tlat chuan chûng thiltumte chu kan hlen thei a ni.—Thuf. 11:2; Tirh. 20:35.

15. I hlimna tipung tûra ṭanpui theitu thiltum ṭhenkhat chu engte nge ni?

¹⁵ Eng thiltumte nge kan insiam theih? I hlen theih tûr thiltumte hre tûrin Jehova hnênah a ṭanpuina dîlin ṭawngṭai ang che. (Thuf. 16:3; Jak. 1:5) He thuziaka  paragraph hmasa bera târ lan thiltumte, entîr nân, auxiliary pioneer emaw, regular pioneer emaw thawh te, Bethel-a rawngbâwl te, a nih loh leh biakna atâna hman in saknaa telte ang chi thiltum pakhat khat i insiam thei ang em? A nih loh leh, chanchin ṭha theh darh tûr leh ram danga rawngbâwl tûrin ṭawng thar zir thei dinhmunah i awm pawh a ni thei. Chûng thiltum ṭhenkhat chungchâng hriat belh nân, Jehova Duh Zâwng Ti Tûra Kan Inrêlbâwl Dân tih lehkha bu  bung 10-na i ennawn thei a, a nih loh leh kohhran upate i râwn thei a ni. * Chûng thiltumte hlen tûra hma i lâk laiin, i hmasâwnna chu a lo lang chhuak ang a, i hlimna pawh a pung bawk ang.

16. Thiltum eng emaw bîk tak i la hlen thei rih lo a nih chuan eng nge i tih ang?

¹⁶ A nih leh, kan sawi tâk thiltumte zînga pakhat khat i la hlen thei rih lo a nih chuan engtin nge ni ang? Thil pawimawh chu, i hlen theih tûr thiltum dang insiam hi a ni. I hlen theih tûr a hnuaia târ lante hi han ngaihtuah teh.

17. Timothea thawn khat 4:13, 15-a sawi angin, engtin nge unaupa chuan zirtîrtu thiam zâwk ni tûra hma a lâk theih?

¹⁷ Timothea thawn khat 4:13, 15 chhiar rawh. Baptisma chang tawh unaupa i nih chuan, thusawi leh zirtîr thiamna kawngah hma sâwn tûrin ṭan i la thei a ni. Engvângin nge? Lehkha chhiar te, thusawi te, leh zirtîrnatea i ‘inhmanna’ chu unaute tâna malsâwmna a nih theih vâng a ni. Chhiar leh Zirtîr Kawngah Inhmang Rawh tih brochure-a thusawi thiamna chungchânga zirlaite zir leh nunpui chu thiltumah nei ang che. Ṭum khatah zirlai pakhat zêl zirin, inah tichhin la, chumi hnuah, thusawi chanvo i neih hunah a taka hman tum ang che. Auxiliary counselor, a nih loh leh ‘thu hril leh zirtîrnaa thawk rim’ upa dangte hnên aṭangin thurâwnte dîl ang che. * (1 Tim. 5:17) Brochure aṭanga zir tûrte a taka hman dân chauh ni lovin, i thu ngaithlatute rinna tihchak dân leh thilti tûra chêttîr dânte chu ngaihven tlat ang che. Chutianga i tih chuan, i hlimna leh an hlimna i tipung thei ang.

18. Kan rawngbâwlnaa thiltumte hlen tûrin engin nge min ṭanpui thei?

 ¹⁸ Kan za hian thu hrilh leh zirtîr siam tûrin mawhphurhna kan nei ṭheuh va. (Mt. 28:19, 20; Rom 10:14) Hna azawnga hna pawimawh ber, he rawngbâwlnaah i thiamna tihhmasâwn i duh em? Zirtîrna tih brochure chu zir la, i thu zirte nunpui thei tûra ṭanpuitu tûr thiltum bîkte insiam ang che. Chawlhkâr chhûng inkhâwma kan hman Kan Kristian Nun leh Rawngbâwlna Inzirna Lehkhabu leh inbiak dân tûr entîrna video-te aṭangin tih dân ṭhate i hre thei a ni. A ṭha ber tûr hriat nân tih dân hrang hrang hmang chhin ang che. Chûng rawtnate anga i tih chuan, Kristian rawngbâwltu thiam tak i nihna aṭanga lo awm khaikhin rual loh hlimna chu i nei ngei ang.—2 Tim. 4:5.

19. Engtin nge Kristian miziate i neih chhoh theih?

¹⁹ Thiltum i insiamte i ngaihtuah hunah, a pawimawh ber—Kristian miziate neih chhoh—chu ngaihthah suh. (Gal. 5:22, 23; Kol. 3:12; 2 Pet. 1:5-8) Chu chu engtin nge i neih theih? Entîr nân, rinna nghet tak neih i duh angah han inchan teh. Kan thu leh hla chhuaha i rinna tichak tûra fuihna ṭha tak tak târ langtu thuziakte chu i chhiar thei a. Kan unaute’n fiahna chi hrang hrang an hmachhawn laia rinna nghet tak an lantîr dân târ langtu JW Broadcasting^® en chu i hlâwkpui ngei ang. Chumi hnuah, an rinna i entawn theih dân kawngte ngaihtuah ang che.

20. Engtin nge kan hlimna kan tihpun theih a, kan lunghnualna kan tihkiam theih?

²⁰ Kan za hian tûna kan tih theih aia tama Jehova rawngbâwl chu kan duh ṭheuh va. Khawvêl tharah chuan, a tam thei ang berin kan bâwl thei tawh ang. Chumi hun a thlen hmaa tûna kan chanvo neiha theih tâwp chhuahna hmangin kan hlimna kan tipung theiin, kan lunghnualnate chu kan tikiam thei a ni. Chu aia pawimawh zâwk chu, kan [“Pathian hlim,” NW] Jehova kan chawimawi thei a, kan fak thei hi a ni. (1 Tim. 1:10, 11) Chuvângin, kan chanvo hlu neihah hlimna i hmu ṭheuh vang u!