1. Bandolome na bandokazi babangi banalyakela bilengo muka?

 TULI na bipangi byabingi muno mu matangwa a kukotoka. (Mateo 24:14; Luka 10:2; 1 Petu 5:2) Tubaboshe tushaka kulinga mwoshe mutwasela mangana tupange byabingi mu munga ya Yehova. Bandolome na bandokazi babangi bali na kushaka kupanga byabingi mu munga ya Yehova. Bamo banalyakela cilengo ca kulinga bupainiya. Bakwabo bashaka kukapangela ha Mbetele nambe kukakwasa mu cipangi ca kutunga mitungo ya kulemesela. Co bandolome babangi bali na kupanga na nzili mangana babangule kupwa baka-kupangela nambe bakulunu mu cikungulukilo. (1 Tima 3:1, 8) Yehova akabwahelela manene mwakamono banu bendi balyana mangana balinge ebi bipangi.—Myaso 110:3; Isaya 6:8.

2. Tunasa kuliziba bati nga twonowa kushulisilila cilengo ca ku sipilitu citunalyakela?

² Tunasa kuzeya nga kwita simbu yailaha, oloni bilengo bitunalyakela kubilishulisilila. Co lalo, tunasa kuzeya nga kutwasa kulinga byuma bimo mu munga ya Yehova mwafwa ya bukulukazi nambe byuma byeka. (Visi 13:12) Obu bukebwo bukalu bwali na kuliwana nabwo ndokazi Melissa. * Washakele kukapangela ha Mbetele nambe kukobela Sikola ya Baka-kwambulula bya Bumwene. Oloni wendekele ngwendi: “Myaka yange kuinjitabesa kulinga ebi bipangi. Ngeci bisimbu bimo njikazeye.”

3. Bandolome na bandokazi bamo banapande kulinga bika mangana babane bipangi bikwabo mu munga ya Yehova?

 ³ Bandolome na bandokazi ba banike baje banalikangula, banapande tahi kukola ku mubila na ku sipilitu asina babane bipangi byabingi mu cikungulukilo. Cakumwenako, bamo banasa kukala na ceke ca kulinga byuma bimo, kwangula bwasi bya kulinga na kukala na mbunge ya kulyana. Oloni hamo banapande kulilongesa kukala na mbunge ya kubandamena, kupanga mwamubwa bipangi na kusingimika bakwabo. Nga mwaka manene mbunge ku kukala na bifwa bitondeka, co banasa kumyana bipangi ha simbu ije kumwasinganyekele. Tusimutwiyeni hali ndolome Nick. Mwakele na myaka 20, kubamwangwile kupwa muka-kupangela, co wazeyele manene. Wendekele ngwendi: “Njalizibile ngwange hamo kuli byuma bimo bije kunjesi na kulinga mwamubwa.” Oloni Nick watwaleleleho kupanga na nzili mangana akale na bifwa bya ku sipilitu bitondeka. Watwaleleleho kupanga na nzili mu cikungulukilo na mu cipangi ca kwambulula. Co ha simbu ino ali mu Komiti ya Munango.

4. Bika bitusimutwiya muno mu cilongesa?

⁴ Kuma munazeye mwafwa ya kwonowa kushulisilila cilengo cimo ca ku sipilitu ndi? Nga mukemwo, lekeni Yehova mumuli na kulizibila. (Myaso 37:5-7) Kutundaho, mwasa kwihula ndolome nambe ndokazi wa kuhya ku sipilitu amikwase kuzibuka bimunapande kulinga, co lingeni mwoshe mumwasela kupangesa cinangulo cendi. Nga mulinga ngoco, co mwasa kushulisilila cilengo ceni, co lalo banasa kumyana bipangi bimushaka. Oloni ngwe mwa Melissa, hamo kuli byuma bimo binasa kumyonowesa kupanga bipangi bimushaka. Co bika bimikwasa mutwaleleleho kupwa ba kubwahelela? Tukumbulula eci cihula muno mu cilongesa omwo tusimutwiya (1) byuma bitulingisa tupwe ba kubwahelela, (2) bitunapande kulinga mangana tubwahelele manene na (3) bilengo bitunapande kulyakela bije bitulingisa tupwe ba kubwahelela.

5. Nga tushaka tupwe ba kubwahelela, tunapande kwaka mbunge ku byuma muka? (Muka-kwambulula 6:9)

⁵ Mukanda wa Muka-kwambulula 6:9 utukwasa kuzibuka bitunapande kulinga mangana tupwe ba kubwahelela. (Tandeni.) Munu uje akajauka na byuma ‘byali nabyo’ akapu wa kushubuluka. Oloni munu uje ashakezeka byuma bije kasa kuwana, kapu wa kushubuluka. Eci cisoneka citulongesa bika? Nga tushaka kupwa ba kubwahelela, tunapande kwaka mbunge ku byuma bituli nabyo na bilengo bitwasa kushulisilila.

6. Tusimutwiya ha cisimo muka, co bika bitulilongesako?

⁶ Kuma twasa kujauka na byuma bituli nabyo ndi? Banu babangi bakasinganyeka ngwabo kutwasa kulinga ngoco mwafwa tukashaka kulilongesa byuma byabiha simbu yoshe. Oloni twasa kushubuluka na byuma ‘bituli nabyo.’ Twasa kulinga bati ngoco? Tusimutwiyeni ha cisimo ca Yesu ca mantalenti cije cili ku mukanda wa Mateo 25:14-30 mangana tuwane cikumbululo. Tulilongesako mutwasa kujaukila na byuma bitwasa kulinga nebi bitunapande kulinga mangana tubwahelele manene omwo tulinga obyo byuma.

7. Lumbununeni cisimo ca Yesu ca matalenti mu bwihi.

⁷ Munalume ibanendeka mu cisimo, wakele na bungenzi. Oloni simbu kanda aye, wasanene bangamba bendi boshe na kwana umo na umo wabo matalenti mangana alinge mingoso. * Ou munalume wazibukile ngwendi bangamba bendi bali na cashu ca kuliseza-seza. Ngeci, wanene matalenti atanu kuli ngamba wa kulibanga, co wa mu cibali wamwanene matalenti abali. Wa mu citatu co wamwanene talenti imo. Bangamba babali ba kulibanga bapangele na nzili mangana bawanene shukulu yabo nganyo. Oloni  ngamba wa mu citatu kapangesele bimbongo bibamwanene, co shukulu yendi wamushekele.

8. Mwafwa bika ngamba wa kulibanga wabwahelelele?

⁸ Ngamba wa kulibanga wabwahelelele manene omwo shukulu yendi wamwanene matalenti atanu. Bije byapwile bimbongo byabingi manene, co byamwesele ngwabyo shukulu yendi wamukulahelele manene. Ngamba wa mu cibali walizibile bati? Wasele kuzeya mwafwa ya kujeneka kumwana matalenti a kupwa hamo na aje abanene ngamba wa kulibanga. Oloni bika byalingile uje ngamba?

9. Yesu kendekele bika hali ngamba wa mu cibali? (Mateo 25:22, 23)

⁹ Tandeni Mateo 25:22, 23. Yesu kendekele ngwendi ngamba wa mu cibali walubalele omwo bamwanene lika matalenti abali. Co lalo Yesu kamwesele ngwendi ou ngamba wayayabalele ngwendi: ‘Mwafwa bika shukulu nanjana lika tumatalenti tubali? Nange njili na kupanga na nzili ngwe mwali na kupangela uje ngamba yanana matalenti atanu. Cisholoka ngwe shukulu ali na kumona ngwendi kunjesi na kupanga na nzili. Ngeci, nange njishitika ebi bimbongo na kukalipangela byange, kutubakana kubiisila simbu yange ku bipangi byendi.’

10. Ngamba wa mu cibali wapangesele bati matalenti abamwanene?

¹⁰ Ngwe mwa ngamba wa kulibanga, ngamba wa mu cibali nendi wamwene cipangi camwanene shukulu yendi kupwa ca seho, co wacikwatele na maboko abali. Ngeci wabwezelelele matalenti abali ha matalenti amwanene shukulu yendi. Shukulu yendi wabwahelelele, co wamwanene cikandelela mwafwa ya kupanga na nzili. Wamushangalele na kumwana bipangi bikwabo.

11. Bika bitunapande kulinga mangana tubwahelele manene?

¹¹ Mu ngila imolika, tubwahelela manene nga  tupanga na nzili cipangi coshe-coshe cibatwana mu munga ya Yehova. Ngeci, ‘lyaneni’ kupanga na nzili cipangi ca kwambulula na bipangi byoshe bibamyana mu cikungulukilo. (Vili 18:5; Heve 10:24, 25) Libwaheseleni mwamubwa biwano mangana mukakumbulule mu ngila ije itakamesa bakweni. Moneni ñanda ya mu sikola yoshe-yoshe ibamyana kupwa ya seho. Nga banamyana cipangi cimo mu cikungulukilo, cilingeni bwasi, co bamikulahela. Keti musinganyeke ngweni cipangi cibanamyana keti ca seho, co kumwapandele kubiisilaho simbu yeni. Esekeni mumwasela mwoshe kulinga bipangi bibanamyana mu butongwe. (Visi 22:29) Nga mupanga na nzili bipangi bya ku sipilitu, busamba bweni na Yehova bukanyama manene, co lalo mupwa ba kubwahelela. (Ngala 6:4) Kutundaho, kumipwila kwakwasi kubwahelela nga bakweni babana bipangi bimunatondele.—Loma 12:15; Ngala 5:26.

12. Bika byakwasele Melissa na Nick babwahelele manene?

¹² Ngwe mutunendeka mu palagilafu ya mu cibali, ndokazi Melissa washakele kukapangela ha Mbetele nambe kukobela Sikola ya Baka-kwambulula bya Bumwene. Oloni Melissa kasa kulinga ebi byuma. Nameme ngoco, wendekele ngwendi: “Njikapanga na nzili cipangi ca bupainiya. Co lalo, njikeseka mwoshe munjasela kupangesa bingila bya kuliseza-seza bya kwambulwilamo. Kulinga ngoco, kunanjikwasa njibwahelele manene.” Nick walingile bika omwo kubamwangwile kupwa muka-kupangela? Wendekele ngwendi: “Njakele mbunge ku byuma bije binjasele kulinga. Cakumwenako, njakele na kupanga na nzili cipangi ca kwambulula na kulibwahesela mwamubwa biwano mangana njikakumbulule mu ngila ije itakamesa bakwetu. Co lalo, njalombele kukapangela ha Mbetele, co banjitambwile mwaka wateleko.”

13. Bika bitundamo nga mwaka manene mbunge ku bipangi bimuli nabyo ha simbu ino? (Muka-kwambulula 2:24)

¹³ Kuma nga mupanga na nzili bipangi bibanamyana ha simbu ino, co mweka mwahi kubanga bamyane bipangi byabingi kulutwe ndi? Banasa kumyana bipangi byabingi ngwe mubalingile kuli Nick. Oloni nameme kubamyana bipangi byabingi ngwe Melissa, mwasa kutwalelelaho kupwa ba kubwahelela na kujauka na bipangi bimuli nabyo ha simbu ino. (Tandeni Muka-kwambulula 2:24.) Co lalo, mubwahelela manene omwo muzibuka ngweni kulifwita kweni kuli na kuzibisa Mwene yetu Yesu Kilistu kubwaha ku mbunge.

14. Bika bitunapande kwanuka omwo tulyakela bilengo bya ku sipilitu?

¹⁴ Kuma kwaka mbunge ku bipangi bituli na kulinga mu munga ya Yehova ha simbu ino kulumbununa ngwabo kutwapandele kulyakela bilengo byeka ndi? Embwe. Tunapande kulyakela bilengo bije bitukwasa tupwe baka-kwambulula bababwa na balongesi bababwa na bije bitulingisa tukwase manene bandolome na bandokazi betu. Twasa kushulisilila bilengo byetu nga twaka manene mbunge ku kukwasa bakwetu keti ku kulinga lika byuma bije bituzibisa kubwaha.—Visi 11:2; Vili 20:35.

15. Bilengo muka byasa kumilingisa mubwahelele manene?

¹⁵ Bilengo muka bimwasa kulyakela? Lombeni Yehova amikwase kunanguka bilengo bimwasa kushulisilila. (Visi 16:3; Yako 1:5) Mwasa kulyakela bilengo bitunasimutwiya mu  palagilafu ya kulibanga bya kufwa ngwe kupwa painiya wa kukwasa nambe painiya wa simbu yoshe, kukapangela ha Mbetele nambe kukwasa mu cipangi ca kutunga mitungo ya kulemesela. Indi hamo mwasa kulilongesa ndaka yeka mangana mukambulwile ku mutambela kubakendeka  oyo ndaka. Mwasa kuzibuka byalibungila mu kushulisilila ebi bilengo nga mutanda capita 10 ya libulu lya Moluswalisanezi Kueza Tato ya Jehova nambe kwihula bakulunu mu cikungulukilo ceni. * Omwo mushulisilila ebi bilengo, bandolome na bandokazi bananguka ngwabo muli na kukola ku sipilitu, co mubwahelela manene.

16. Bika bimwasa kulinga nga kuli bimo bimyonowesa kushulisilila cilengo cimo?

¹⁶ Oloni mwasa kulinga bati nga kuli bimo bimyonowesa kushulisilila bilengo bitunasimutwiya? Lyakeleni cilengo ceka cimwasa kushulisilila. Tusimutwiyeniko ha bilengo bimo bimwasa kulyakela.

17. Kwesekesa na mukanda wa 1 Timateo 4:13, 15, bika byanapande kulinga ndolome mangana apwe mulongesi wamubwa?

¹⁷ Tandeni 1 Timateo 4:13, 15. Nga mwapwa ndolome wa kumbwitika, mwasa kulyakela cilengo ca kubwezelela ku butongwe bweni bwa kulongesa. Mwafwa bika? Mwafwa nga mwaka mbunge ku kutanda na kulongesa, co mukwasa manene baka-kumitolilila. Lyakeleni cilengo ca kulilongesa bilongesa byoshe bili mu broshuwa ya Aka Mana ku Kutanda na Kulongesa na kubipangesa. Lilongeseni cilongesa cimo na cimo na kwitulukamo ku njibo, co pangeseni bimunalilongesa omwo mwendeka ñanda. Lombeni bukwasi kuli muka-kukwasa kunangula nambe ku bakulunu beka baje “bali na kuundangana mu kwambulula na kulongesa.” * (1 Tima 5:17) Keti mwake mbunge ku kulilongesa bingila bya kwendekelamo, oloni lilongeseni mwakukwasela baje bamitolilila bakanyamese likulahelo lyabo na kutengululako bimo mu kuyoya. Nga mulinga  ngoco, mubakwasa babwahelele manene, co neni mubwahelela manene.

18. Bika bitukwasa tupange mwamubwa cipangi ca kwambulula?

¹⁸ Tubaboshe tunapande kupanga cipangi ca kwambulula na kupwisa banu bandongesi. (Mateo 28:19, 20; Loma 10:14) Kuma mushaka kubwezelela ku butongwe bweni bwa kwambulula na kulongesa ndi? Lilongeseni broshuwa ya Kulongesa, co lyakeleni bilengo bije bimikwasa mupangese bimuli na kulilongesa. Mwasa kuwana bisimpi bimikwasa muzibuke mwakupangesela ebi bilongesa mu Mukanda wa Biwano wa Buyoye na Cipangi Cetu na mavidio aje akamwesa bingila bya kwendekelamo atukakenge ku biwano bya mukati ka calumingo. Esekeni kupangesa bingila bya kuliseza-seza bya kwambulwilamo mangana muwane ngila ije ipanga mwamubwa mu citingitingi ceni. Nga mupangesa bitunasimutwiya, co mupwa balongesi bababwa, co lalo mubwahelela manene.—2 Tima 4:5.

19. Bika bimikwasa mukale na bifwa bya ku sipilitu?

¹⁹ Omwo mulyakela bilengo, keti mwibale kulyakela cilengo ca seho manene ca kukala na bifwa bya ku sipilitu. (Ngala 5:22, 23; Kolo 3:12; 2 Petu 1:5-8) Bika bimunapande kulinga mangana mushulisilile eci cilengo? Cakumwenako, nga mushaka kukala na likulahelo lya kukanyama, mwasa kutanda biñanda bya mu mabulu etu bije bimwesa bimunapande kulinga mangana mukanyamese likulahelo lyeni. Co lalo, mwasa kukenga mavidio aha JW Broadcasting^® aje amwesa bandolome na bandokazi baje banatwalelelaho kukala na likulahelo lya kukanyama nameme banaliwana na byeseko bya kuliseza-seza. Kutundaho, waneni bingila mumwasa kubatembwinina.

20. Tunapande kulinga bika mangana keti tuzeye?

²⁰ Tubaboshe tushaka kulinga byabingi mu munga ya Yehova. Mu kaye kakaha, byahi bikatwonowesa kupangela Njambi mutushakela. Oloni ha simbu ino tunapande kulingako bitwasa. Nga tulinga ngoco, co tupwa ba kubwahelela. Co lalo, kutuzeye. Kutundaho, tunena bumpau na kasingimiko kuli Yehova uje wapwa ‘Njambi wa kubwahelela.’ (1 Tima 1:11) Ngeci, tutwaleleleniho kubwahelela mwafwa ya bipangi bitwasa kulinga mu munga ya Yehova.