1. ¿Ti tyam tyuundëp nimayë nmëguˈukˈäjtëm parë niˈigyë dyajmëjwindëkëdë Diosë tyuunk?

 KOM niˈigyë wyingoonˈadëtsnë ja kutëgoˈoyën, pääty nëgooyë nmëdäjtënë kajaaduunk (Mat. 24:14; Luk. 10:2; 1 Peed. 5:2). Niˈamukë nmëdunäˈänëmë Jyobaa nuˈun nmadakëm. Mayë nmëguˈukˈäjtëm diˈib tyam niˈigyë yajmëjwindëjkëbë Diosë tyuunk. Ta nääk diˈibë wyinmäˈäny të tpëjtäˈäktë parë tyunäˈändë prekursoor, Betel o mä yajkojˈyë jëën tëjk mä yaˈˈawdatyë Jyobaa. Ets nan ta nimay diˈib tunandëp ministerial o ansianë (1 Tim. 3:1, 8). Seguurë ko Jyobaa agujk jotkujk nyayjyawëty ko tˈixyë yˈuˈunk yˈënäˈk nyayˈawanëdë parë myëdunäˈänëdë (Sal. 110:3; Is. 6:8).

2. ¿Wiˈix xyajnayjyäˈäwëm ko kyaj mbäät nekytyuˈunëm diˈib të njatuknibëjtakëm?

² Per pën të ja tiempë nyäjxnë ets kyaj të nduˈunëm tijaty të njatuknibëjtakëm, mbäädë net nnayjyäˈäwëm mon tuk. O waˈan mëk njäˈäwëm mët ko të ja xëëw jëmëjt wyimbajnë o të ja jukyˈäjtën tyëgatsy ets kyaj mbäät tijaty nekytyuˈunëm mä Diosë kyäjpn (Prov. 13:12). Duˈun jyajtyë Melissa, * diˈibë nety nëgoo tˈoktsojkënyëˈäjnë tyunäˈäny Betel o nyëjkxäˈäny mä Eskuelë parë pënaty kyäjpxwäˈkxtëbë Diosë Kyutujkën. Yëˈë jyënaˈany: “Tëtsë nxëëw njëmëjt wyimbajnë ets kyajts mbäät duˈun nˈoktuunë. Tyäˈädë yëˈëjëts diˈib näˈäty mon tuk xyajnayjyäˈäwëp”.

3. ¿Ti tsojkëp näägë ënäˈktëjk ttundët parë yajtuunkmoˈoytyët mä Diosë kyäjpn?

³ Taaˈäjtpë ënäˈktëjk diˈib oy mëk yajpattëp, per tsojkëp jawyiin dyajnigëxëˈëktëdë oybyë jäˈäyˈäjtën parë mbäät yajtuunkmoˈoytyë mä Diosë kyäjpn. Waˈanë ënäˈktëjk jyantsy tyunäˈändë, wyijyˈattë  ets pojën tijaty ttundë, per tsojkëp myaˈkxtuktët, wyingutsëˈëgëdët ets tsuj yajxon tijaty ttundët. Pën tyuundëbë mëjääw parë dyajnigëxëˈëktëdë oybyë jäˈäyˈäjtën, mbäädë net yajtuunkmoˈoytyë extëmë nety kyaj ttimˈawix ttimjëjpˈixtë. Min nˈokˈijxëm wiˈix jyajtyë Nick. Ko netyë jyëmëjt 20 axëëk jyantsy nyayjyäˈäwë, yëˈë ko kyaj yajtuunkmooy extëmë ministerial. Yëˈë jyënaˈany: “Nwinmääyëts ko kyajtsë nety ti oy nduny”. Perë Nick duˈunyëm ojts dyajnigëxëˈëgyë oybyë jyaˈayˈäjtën. Ets jamë wyinmäˈäny tpëjtaky mä tijaty mbäät ttuny mä kongregasionk ets mä yˈëwaˈkxy kyäjpxwaˈkxy. Tyam tyuny mä Komitee diˈib Betel.

4. ¿Ti nˈixäˈänëm mä tyäˈädë artikulo?

⁴ ¿Mon tuk nnayjyäˈäwëm mët ko kyaj mbäät nekytyuˈunëm ti të njatuknibëjtakëm? Pën duˈun, nˈoktukmëtmaytyakëmë Jyobaa wiˈixën nnayjyäˈäwëm (Sal. 37:5-7). Nˈokˈyajtëˈëwëmë nmëguˈukˈäjtëm diˈib jeky kujk Dios mëduunëdë parë xytyukˈawäˈänëm mäjaty mbäät nˈaknayaˈoˈoyëm etsë net nduˈunëm extëm xyˈanmäˈäyëm. Mbäät yëˈë xypyudëjkëm parë nduˈunëm diˈib të nduknibëjtakëm. Per pën nduˈun nnayjyäˈäwëm extëmë Melissa ets kyaj mbäät nekytyuˈunëm extëm të njatuknibëjtakëm, ¿ti xypyudëkëyäˈänëm parë duˈunyëm nnayjyäˈäwëm agujk jotkujk? Mä tyääbë artikulo nˈixäˈänëm tëgëk pëky. Myëduˈuk, ¿ti mbäät xymyoˈoyëmë agujkˈäjt jotkujkˈäjtën? Myëmajtsk, ¿ti mbäät nduˈunëm parë niˈigyë nnayjyäˈäwëm agujk jotkujk? Ets myëdëgëëk, ¿tijaty mbäät nduknibëjtakëm parë niˈigyë nnayjyäˈäwëm agujk jotkujk?

5. Pën nnayjyawëyäˈänëm agujk jotkujk, ¿mä mbäät nbëjtakëmë jot winmäˈäny? (Eclesiastés 6:9).

⁵ Pën nnayjyawëyäˈänëm agujk jotkujk, tsojkëp nduˈunëm extëm jyënaˈanyë Eclesiastés 6:9 (käjpx). * Ko “ndukxondakëm diˈibë ndimˈijxëm”, yëˈë yˈandijpy ko jotkujk nnayjyäˈäwëm mä tijaty nmëdäjtëm extëm mä wiˈix nyaˈijx nyajpatëm. Per pën “nëgoo njëdijtëm xitsoo yatsoo parë nˈëxtäˈäyëm ti njatsojkënyëˈäjtëm”, nëgoobë nety nˈëxtäˈäyëm diˈib kyaj mbäät nbatëm. ¿Ti tyäˈädë xytyukniˈˈijxëm? Ko pën nnayjyawëyäˈänëm agujk jotkujk, tsojkëp jamë winmäˈäny nbëjtakëm mä diˈib nmëdäjtëm ets kyaj mä diˈibë tsip nbatëm.

6. ¿Ti ijxpajtën yajnimaytyäˈägäämp, ets ti xytyukniˈˈixëyäˈänëm?

⁶ ¿Per mbäädëdaa yëˈëyë ndukxondakëm tijaty nmëdäjtëm? Mayë jäˈäy wyinmaytyë ko kyaj, mët ko xëmë ndunäˈänëm diˈib kyajnëm ndimtuˈunëm. Per mbäät ndukxondakëm tijaty tyam nmëdäjtëm. ¿Wiˈix mbäät nduˈunëm? Parë nnijäˈäwëm, min nˈokˈijxëm ja ijxpajtën diˈibë Jesus pyëjtakë mä ja talentë diˈib yajpatp mä Matewʉ 25:14-30. Jap nnijawëyäˈänëm wiˈix mbäät nnayjyäˈäwëm agujk jotkujk ets ti mbäät nduˈunëm parë niˈigyë nnayjyäˈäwëm jotkujk oy tyëgatsëdë jukyˈäjtën.

7. Oknimaytyäˈäk ja ijxpajtënë diˈibë Jesus myaytyak mä ja talentë.

⁷ Mä ja ijxpajtën diˈibë Jesus myaytyak, yëˈë mä tuˈugë yetyëjk diˈib tsoˈon. Per mä kyatsoonyëm, ta dyaxmujky niˈamukë ja tyuumbëtëjk ets tmooytyë ja talentë parë dyajganarattët. * Tuˈugë tyuumbë ja tmooy mëgoxkë talentë, jatuˈuk majtsk, ets jatuˈuk, ja jeˈeyë tmooy tuˈuk, duˈun yajmooytyë extëmë nety niduˈuk niduˈuk tmëdattë wijyˈäjtën. Ja myëduˈukpë tuumbë ets ja myëmajtskpë, mëk tyuundë parë niˈigyë tmooytyë meeny ja wyintsën. Per ja myëdëgëëkpë, kyaj dyajganaräjty ja meeny ets pääty ja wyintsën ojts yˈëxkajxënë.

8. ¿Tidaa ko ja tim jawyiimbë mëduumbë diˈibë Jesus myaytyak jantsy agujk jotkujk nyayjyäˈäwë?

⁸ Waˈan jantsy agujk jotkujk nyayjyäˈäwë ja tim  jawyiimbë tuumbë diˈib yajmooy mëgoxkë talentë. Kajaa meenyën diˈib yajtukmënikakë, tyäˈädë yëˈë xytyukˈijxëm ko tukjotkujkˈäjtëbë nety ja wyintsën. ¿Ets wiˈixëdaa nyayjyäˈäwë ja myëmajtskpë mëduumbë? Mbäätxyëp ojts axëëk jyanayjyawëty ko kyaj yajmooy ja talentë extëm ja tim jawyiimbë myëguˈuk. Per ¿ti tyuun?

9. ¿Wiˈixë Jesus jyënany mä ja myëmajtskpë mëduumbë? (Matewʉ 25:22, 23).

⁹ (Käjpxë Matewʉ 25:22, 23). Jesus kyaj jyënany ko ojts jyotˈambëky o ko ojts dyajpoky ja myëmajtskpë mëduumbë ko jeˈeyë yajmooy majtsk ja talentë. Ets nan kyaj dyajjaygyukëyanë ko ja tuumbë jyënany extëm: “¿Ti yëˈëyëtsënë tyäˈädë xytyim moˈoyanëp? ¡Pën nenduˈunëts tijaty njaty nnijawë extëm diˈib të yajmoˈoy mëgoxkë talentë! Pën ja nwintsënëts kyaj dyajtsobääty tijatyëts nduumpy, nik oyëts ndimnitäjëdë tyäˈädë majtskpë talentë etsëts nˈixëdë nduunk nˈayoˈon”.

10. ¿Ti tyuun ja myëmajtskpë mëduumbë ko yajmooy ja talentë?

¹⁰ Ja myëmajtskpë mëduumbë, jyaygyujkë ko jëjpˈamë nety ja tuunk diˈib të tyuknipëkyëty ja wyintsën, pääty mëk jyantsy tyuuny. ¿Wiˈix wyimbëtsëëmy? Ta yˈakˈyajmooy ja majtskë talentë. Jantsy agujk jotkujk nyayjyäˈäwë ja wyintsën ets aktuknipëjkë mas niˈigyë tuunk.

11. ¿Ti mbäät nduˈunëm parë mas jotkujk nnayjyäˈäwëm?

¹¹ Nenduˈuntsën jyaty mët ëtsäjtëm, mbäät mas agujk jotkujk nnayjyäˈäwëm, pën nbëjtakëm ja jot mëjääw ets nduˈunëm tijaty yajtuknipëjkëm mä Diosë tyuunk. Nˈokjotmoˈoyëm niˈigyë mä nˈëwäˈkx ngäjpxwäˈkxëm ets nˈoktuˈunëm tijaty yajtuknipëjkëm mä kongregasionk (Apos. 18:5; Eb. 10:24, 25). Nˈokˈëxpëjkëm yajxon tijaty  ngomentaratäˈänëm reunyonk parë mbäät nmëjääwmoˈoyëm ja nmëguˈukˈäjtëm. Pën jam ti nyajtuknipëjkëm parë nyajnäjxëm mä reunyonk diˈib sëmäängujky, oy ko nmëjˈijx nmëjpëjtakëm. Ets pën yaˈˈanmäˈäyëm parë jap ti tuunk nduˈunëm mä kongregasionk, oy ko tsojk njäjtkojëm ets nduˈunëm extëm mbäät nyajtukjotkujkˈäjtëm. Kyaj nwinmäˈäyëm ko kyaj tyim jëjpˈamëty diˈib të nyajtuknipëjkëm ets ko kyaj tsyokyëty jamë xëëw tiempë nyajtuˈunëm. Nik oy ko nduˈunëmë mëjääw parë yajxon nduˈunëm tijaty yajtuknipëjkëm (Prov. 22:29). Ko niˈigyë tijaty ndukmëduˈunëmë Jyobaa, ta niˈigyë mëët nnaymyaaybyëkäˈänëm ets mas agujk jotkujk nnayjyawëyäˈänëm (Gal. 6:4). Nëjkxëp nenduˈun ndukxondakëm ko ja nmëguˈukˈäjtëm yajmoˈoyët ja tuunk diˈibë nety njatunäˈänëm (Rom. 12:15; Gal. 5:26).

12. ¿Ti tyuunë Melissa etsë Nick parë mas agujk jotkujk nyayjyäˈäwëdë?

¹² ¿Njamyajtsëmë Melissa diˈib të yˈokˈyajmaytyakpë mä parrafo 2 diˈibë nety jantsy nëjkxäämp Betel o mä Eskuelë parë pënaty kyäjpxwäˈkxtëbë Diosë Kyutujkën? Oyë Melissa tkatuuny diˈibë nety të ttukniwinmayë, yëˈë jyënaˈany: “Njantsy jyotmoobyëts kots nbrekursoorˈaty ets nduundaabyëts wixaty të yajtuknibëjtäägë nˈëwäˈkx ngäjpxwäˈkxëm. Kots duˈun nduny, yëˈëts diˈib jyantsy yajnayjyäˈäwëp agujk jotkujk”. ¿Ets ti tyuunë Nick, diˈib të yajmaytyaˈaky mä parrafo 3 parë kyaj axëëk nyayjyäˈäwë ko kyayajtuunkmooy ministerial? Yëˈë jyënaˈany: “Jamëts ja njot nwinmäˈäny nbëjtaky mä diˈibëts mbäät nduny extëmëts nˈëwäˈkx ngäjpxwäˈkxët etsëts ngomentaratët reunyonk extëm mbäädë nmëguˈukˈäjtëm pyudëkëdë. Nan nyajtuktujkëts tuˈugë solisitud parëts ndunäˈäny Betel ets kyum jëmëjt, tats nyajwooy”.

13. ¿Wiˈix nnayjyawëyäˈänëm pën njantsy jyotmoˈoyëm ja tuunk tijaty tyam nikëjxmˈäjtëm? (Eclesiastés 2:24).

¹³ Per ¿waˈandaa niˈigyë nyajtuunkmoˈoyëm pën tyam njantsy jyotmoˈoyëm tijaty nikëjxmˈäjtëm? Waˈan. Duˈun extëm jyajtyë Nick, per mbäät kyaj extëm jyajtyë Melissa. Ko duˈun njäjtëm, oy ko duˈunyëm nnayjyäˈäwëm agujk jotkujk ets ndukxondakëm tijaty tyam mbäät nduˈunëm (käjpxë Eclesiastés 2:24). * Nan niˈigyë ndukxondäˈägäˈänëm mët ko nnijäˈäwëm ko tyukjotkëdakypy ja nWintsënˈäjtëmë Jesukristë tijaty nduˈunëm.

14. ¿Ti mbäät nmëdäjtëm winmäˈänyoty pën nduknibëjtakëm nmëdunäˈänëm niˈigyë Jyobaa?

¹⁴ Pën njotmoˈoyëm tyamë Diosë tyuunk, ¿yëˈëdaa yˈandijpy ko kyaj mbäät nekymyëmäˈäy nekymyëdäjëm wiˈix nyajmëjwindëjkëm? Kyaj. Pes tsojkëp niˈigyë nbëjtakëmë jot winmäˈäny parë mas oy nˈëwäˈkx ngäjpxwäˈkxëm etsë jäˈäy nyaˈëxpëjkëm, net mbäät nbudëjkëm niˈigyë ja nmëguˈukˈäjtëm. Per net mbäät duˈun nduˈunëm, pën ijtëm yujy tudaˈaky ets pën jamë jot winmäˈäny nbëjtakëm parë nbudëjkëm ja nmëguˈukˈäjtëm ets kyaj ëtsäjtëm jeˈeyë nnaymyëmäˈäy nnaymyëdäjëm (Prov. 11:2; Apos. 20:35).

15. ¿Tijaty mbäät nduknibëjtakëm diˈib mas agujk jotkujk xyajnayjyawëyäˈänëm?

¹⁵ ¿Tijaty mbäät nduknibëjtakëm nduˈunëm? Nˈokˈanmäˈäyëmë Jyobaa parë xypyudëjkëm ets nˈijxëm tijaty mbäät nmëmadakëm nduˈunëm (Prov. 16:3; Sant. 1:5). Extëm të yajnigajpxy mä  parrafo 1, ¿mbäädëdaa nbëjtakëmë winmäˈäny ets nduˈunëm extëm prekursoor ausilyaar, regulaar, nëjkxëm Betel o mä yajkojˈyë jëën tëjk? ¿Mbäät njäjtëmë wiink ayuk parë niˈigyë nˈëwäˈkx ngäjpxwäˈkxëm o nëjkxëm mä tuˈugë lugäär mä tyëgoyˈatyë naybyudëkë? Pën nˈaknijawëyäˈänëm tijaty mbäät nduˈunëm, nˈokkäjpxëmë liibrë Organizados para hacer la voluntad de Jehová kapitulo 10, ets nˈoktukmëtmaytyakëm ja mëjjäˈäytyëjk diˈib mä kongregasionk. * Ko nety nduˈunëm tijaty të nduknibëjtakëm, ta mas agujk jotkujk nnayjyawëyäˈänëm ets ja nmëguˈukˈäjtëm pyëkandëbë kuentë wiˈix niˈigyë nyajmëjwindëjkëmë Diosë tyuunk.

16. Pën tyam nituˈuk mbäät ngatuˈunëm diˈib të njatukniwinmäˈäyëm, ¿ti mbäät nduˈunëm?

 ¹⁶ ¿Ets pën nituˈuk mbäät ngatuˈunëm diˈib të yajnigajpxy mä tyäˈädë artikulo? Nˈokpëjtakëmë winmäˈäny mä tijaty tyam mbäät nduˈunëm. Min nˈokˈijxëm tuk pëky majtsk pëky.

17. Extëm jyënaˈanyë 1 Timoteo 4:13, 15, ¿tijaty mbäät ttuny tuˈugë nmëguˈukˈäjtëm parë mas oy yaˈëxpëkët?

¹⁷ (Käjpxë 1 Timotee 4:13, 15). Pën mijts të mnëbajnë, mbäät xytyunyë mëjääw parë oy mdiskursaratët ets myaˈëxpëkët. ¿Tiko? Yëˈko pën mjotmoopy mä mletrëkajpxy, xyajnaxy oyë mdiskursë ets myaˈëxpëky, mbäät mëjwiin kajaa pyudëkëdë pënaty myëdoowˈijttëp. Pëjtäˈägë mwinmäˈäny parë mˈëxpëkët ets kuytyun extëm yajnigajpxy mä foyetë Jat wiˈix mas oy mletrëkäjpxët ets wiˈix myaˈëxpëkët. Ëxpëk tuˈugatyë, tuundäˈäk mä mdëjkën ets tunë mëjääw parë net duˈun xytyunët mä ja mdiskursë xyajnaxy. Anëëmë parë mbudëkëdët ja nmëguˈukˈäjtëm diˈib tuump extëm ja myëmajtskpë käjpxwijpë * o ja wiinkpë mëjjäˈäytyëjk diˈib waanë niˈigyë ‘ja Diosë yˈääw yˈayuk kyäjpxwäˈkxtëbën ets yaˈëxpëjktëbën’ (1 Tim. 5:17, TY). Per kyaj jeˈeyë duˈun xytyunët extëm jap yajnigajpxy mä foyetë, nan tsojkëbën xypyudëkëdët pënaty myëdoowˈijttëp parë dyajkëktëkëdët ja myëbëjkën ets tkuytyundët tijaty mdukniˈˈijxëp. ¿Wiˈix wyimbëtsëmäˈäny? Ta jantsy agujk jotkujk mnayjyawëyaˈanyëty  ets nenduˈun pënaty myëdoowˈijttëp.

18. ¿Ti xypyudëkëyäˈänëm parë nduˈunëm tijaty të nduknibëjtakëm?

¹⁸ Niˈamukë Dios mëduumbë nikëjxmˈäjtëm parë nˈëwäˈkx ngäjpxwäˈkxëm etsë jäˈäy nyaˈëxpëjkëm (Mat. 28:19, 20; Rom. 10:14). ¿Njatäˈänëm mas oyë jäˈäy nmëtmaytyakëm ets nyaˈëxpëjkëm? Diˈib mbäät xypyudëjkëm, yëˈë foyetë Wiˈix myaˈëxpëkët, oy ko nˈëxpëjkëm ets nduˈunëm extëm jap xytyukniˈˈijxëm. Nan mbäät xypyudëjkëm Wiˈix njukyˈäjtëm ets nDiosmëduˈunëm tijaty yaˈëxpëkäämp ets yajtukjayëyäämp ets ko nˈijxëmë bideo wiˈixë jäˈäy nmëtmaytyaktsondakëm diˈib näjxp reunyonk sëmäängujky. Nˈokˈyajtëgäjtsëm wiˈixë jäˈäy nmëtmaytyakëm parë nˈijxëm diˈibë yˈoymyëdowëp mä ngäjpxwäˈkxëm. Ko duˈun nduˈunëm, ta mas jotkujk nnayjyawëyäˈänëm mä jäˈäy nyaˈëxpëjkëm (2 Tim. 4:5).

19. ¿Ti xypyudëkëyäˈänëm parë nyajmëjwindëjkëmë jäˈäyˈäjtën diˈibë Dios tyukjotkëdakypy?

¹⁹ Diˈibë mas jëjpˈam mbäät nduknibëjtakëm, yëˈë ko nyajmëjwindëjkëmë jäˈäyˈäjtën diˈibë Dios tyukjotkëdakypy (Gal. 5:22, 23; Kol. 3:12; 2 Peed. 1:5-8). Extëm nˈokpëjtakëm, pën nyajkëktëkëyäˈänëm niˈigyë mëbëjkën. Mbäät ngäjpxëmë artikulo diˈib miimp mä ëxpëjkpajn mä yajmaytyaˈaky niˈigyë mëbëjkën. Nan mbäät xypyudëjkëm mëjwiin kajaa ko nˈijxëmë JW Broadcasting^® mä yajmaytyäˈäktë nmëguˈukˈäjtëm diˈib mëkë myëbëjken myëdäjttë oy mëjwiin kajaa tpattë amay jotmay. Ta net nwinmäˈäyëm, wiˈix mbäät nyaˈijxëmë mëbëjkën extëm yëˈëjëty.

20. ¿Ti mbäät nduˈunëm parë mas agujk jotkujk nnayjyäˈäwëm?

²⁰ Seguurë ko tyam niˈigyë tijatyë Jyobaa njatukmëdunäˈänëm, per mä jembyë jukyˈäjtën diˈib të twandaˈaky, mbäät jam mas niˈigyë tijaty ndukmëduˈunëm. Mientrës jyaˈtyë taabë tiempë, nˈoktuˈunëm ja tuunk diˈibaty tyam xynyigakëm. Ko duˈun nduˈunëm, ta mas agujk jotkujk nnayjyawëyäˈänëm. Ets diˈib mas jëjpˈam, yëˈë ko nyajmëjpëtsëmäˈänëm ets nmëjkumayäˈänëmë Jyobaa, ja “Diosë jotkujkpë” (1 Tim. 1:11, TNM). Pääty, nˈoktukxondakëm tijaty tyam mbäät ndukmëduˈunëmë Jyobaa.