1. Momo be dahaka e karamu edia hesiai ḡaukara Iehova enai bae habadaia totona?

 INA tanobada oromana dokona e kahirakahiramu dainai eda ḡaukara na e bada e laomu. (Mat. 24:14; Luka 10:2; 1 Pet. 5:2) Ita iboudai na ta uramu dala idauidau ai Iehova baita hesiai henia. Momo na edia haroro ḡaukara e habadaiamu. Haida be e uramu bae painia. Ma haida be e uramu Betele eiava konstraksen ḡaukarana bae karaia. Bona tadikaka momo edia tahua ḡauna na e ḡaukara goadamu ministerial servant eiava elda ai baela. (1 Tim. 3:1, 8) Iehova na e moalemu badina e itaiamu ena taunimanima na mai edia ura ida ia e hesiai heniamu!​—Sal. 110:3; Isa. 6:8.

2. Bema Iehova ena hesiai ḡaukara ai eda tahua ḡaudia haida asita haḡuḡurumu, dahaka be varamu?

² Bema laḡani daudau muridiai Iehova ena hesiai ḡaukara ai eda tahua ḡaudia haida asita haḡuḡurumu, readia baita lalohisihisimu. Eiava ita na buburuka o badi haida daidiai Iehova ena orea lalonai ḡaukara haida na basita kara dibamu neganai, baita lalohisihisimu. (Her. 13:12) Taihu ta ladana Melissa danu unu e hemami toma. * Ia na e ura Betele ai baine ḡaukara eiava Basileia Evanelia Skuli bainela, to ia na e gwa: “Egu mauri laḡani na bada dainai lau na dia heḡereḡere. Nega haida na lalomanokamu.”

3. Haida be dahaka bae kara diba unu amo bae heḡereḡere Iehova ena hesiai ḡaukara lalonai maduna bae hua diba?

³ Ena be haida na eregabe bona ḡaukara haida na bae kara  diba, to namona na kara haida bae kara, unu amo bae heḡereḡere maduna ma haida bae hua. Idia na reana mai aonegadia, abi hidi e kara haraḡamu, bona e ura badamu bae ḡaukara. To namona na haheauka, ḡaukara bae kara namonamo dalana, bona ma haida imatauraidia karana bae manadalaia. Bema unu kara bo hahedinaraimu, tadikaka ese maduna ta be henimu dibamu. Mani Nick ena haheitalai aita laloa, ia laḡanina 20 neganai ministerial servant madunana se henia dainai ia na e lalohisihisi. Ia na e gwa: “Na lalo readia lau na mai egu kerere.” To Nick na se hesiku, ia na e hekwarahi kongrigeisin madunadia bona haroro ḡaukarana baine karadia namonamo. Hari, ia na Brens Komiti memba ta.

4. Ina atikol ai dahaka baita herevalaimu?

⁴ Oi be Iehova ena hesiai ḡaukara lalonai tahua ḡauna ta do so haḡuḡurua dainai o lalohisihisimu, a? Bema oibe, Iehova ba ḡuriḡuri henia bona emu hemami ba gwaurai hedinarai. (Sal. 37:5-7) Danu, ekspiriens tadikakadia ba noidia edena dalai emu hesiai ḡaukara Dirava enai ba hanamoa. Bema unu bo kara tomamu, oi na maduna ta bo huaiamu eiava tahua ḡauna ta bo haḡuḡurua dibamu. To Melisa heḡereḡerena, reana hari oi na dia heḡereḡere emu tahua ḡauna ta ba haḡuḡurua. Dahaka ba kara diba? Edena dalai dounu ba moale? Una henanadai baita haerelaia totona, ina atikol ai ḡau toi baita herevalaimu. (1) Dahaka ese be hamoalemumu? (2) edena dalai emu moale ba habadaia? bona (3) dounu ba moale totona ededia tahua ḡaudia bavato?

5. Baita moale totona dahaka baita laloa na ḡau badana? (Kohelete 6:9)

⁵ Kohelete 6:9 ese e hahedinaraia dahaka ese baine duruda diba baita moale totona. (Ba duahia.) Ina hereva, ta na ‘matana ese e itamu ḡaudia e moalelaimu,’ anina na hari ia baine kara diba ḡaudia mo e lalo badamu. To ‘basine abi dibamu ḡaudia e tahu goadagoadamu’ tauna na basine moalemu. Una ese dahaka e hadibadamu? Baita moale totona, namona na baita kara diba ḡaudia baita lalo bona baita haḡuḡuru diba tahua ḡaudia baita ato.

6. Edena parabole baita herevalaiamu, bona una parabole amo dahaka baita dibamu?

⁶ Hari o karamu ḡaudia ba moalelai diba, a? Momo na be gwaumu, lasi, badina ita na ta uramu ḡau matamatadia ikaradia daladia baita diba. Una na dia momokani, badina hari ta karamu ḡaudia na baita moalelai diba. Edena dalai? Una baita diba totona, mani Mataio 25:14-30 ai Iesu ese e herevalaia talent parabolena aita herevalaia. Baita itaiamu edena dalai baita moale bona hari baita kara diba ḡaudiai eda moale baita habadaia.

7. Iesu ena talent parabolena ba herevalaia.

⁷ Iesu ena parabole ai, tau ta na gabu daudau bainela eto. Do sela neganai ena hesiai taudia e boiridia bena talent e henidia unu amo ena bisnes bae habadaia. * Una tau na ena hesiai taudia edia diba bona goada na mai dibana dainai, hesiai tauna ginigunana be talent 5 e henia, iharuana be rua e henia, bona ihatoina be tamona e henia. Hesiai taudia ginigunadia raruosi na e abi talent amo biagudia ena bisnes e habadaia. To hesiai tauna ihatoina na ḡau ta se karaia dainai biaguna ese e lulua.

8. Dahaka dainai parabole ai e herevalaia hesiai tauna ginigunana na e moale?

 ⁸ Hesiai tauna ginigunana na e moale dikadika badina biaguna ese talent 5 e henia. Biaguna ese e abidadama heniava dainai moni badana e henia. To hesiai tauna iharuana be ede bamona? Ia na reana bema lalohisihisi badina e abia monina na dia hesiai tauna ginigunana ese e abia monina heḡereḡerena. To ia be dahaka e kara?

9. Iesu ese hesiai tauna iharuana e herevalaia neganai dahaka se gwa? (Mataio 25:22, 23)

⁹ Mataio 25:22, 23 ba duahi. Iesu na se gwa hesiai tauna iharuana na e badu badina talent rua hona e abi. Bona Iesu na se gwa hesiai tauna na e maumau bona eto, ‘Dahaka dainai biagugu ese talent rua hona eme henigu? Lau danu na ḡaukara goadamu una talent 5 e abia tauna heḡereḡerena. Bema biagugu ese egu ḡaukara se laloa badamu, reana ini talent rua na tano ai baina guridia bona sibogu egu ura ḡaudia baina kara.’

10. Hesiai tauna iharuana ese ena talent be ede e ḡaukaralai toma?

¹⁰ Hesiai tauna ginigunana heḡereḡerena, hesiai tauna iharuana na biaguna ese e henia ḡaukarana e laloa bada bona e ḡaukara goada biaguna isiaina baine lao heni. Una dainai biaguna ese e henia talent rua na e habadaia. Una hesiai tauna na ena ḡaukara goadagoada dainai biaguna na e moale, bona ia ese hesiai tauna na maduna o ḡaukara ma haida e henia.

11. Edena dalai eda moale baita habadaia?

¹¹ Una heḡereḡerena, eda nega bona goada baita ḡaukaralai Iehova ena hesiai ḡaukara idauidau baita kara, unu amo eda  moale baita habadaia. Heḡereḡere haroro ḡaukara baita karaia ‘goadagoada,’ bona kongrigeisin ena ḡaukara idauidau baita karadia namonamo. (Apos. 18:5; Heb. 10:24, 25) Hebou ta laomu neganai baita heḡaeḡae namonamo unu amo eda haere ese ma haida bae hagoadadia diba. Midweek heboudia ai o abimu stiuden asainmen na ba lalodia bada. Bema e noimumu kongrigeisin ai ḡaukara ta ba durua, namona na baola haraḡa bona ba hahedinaraia oi na o ura badamu una ḡaukara ba karaia. E henimumu ḡaukaradia na ba karadia namonamo. Bona ba hekwarahi o karaiamu ḡaukaranai emu diba ba habadaia. (Her. 22:29) Iehova dainai bo ḡaukara goadamu neganai, emu hetura karana ia ida na be goadamu bona bo moalemu. (Gal. 6:4) Danu o uramu madunana na ta ese be abiamu neganai, basio lalohisihisimu to ia dainai bo moalemu.​—Roma 12:15; Gal. 5:26.

12. Dahaka ese Melissa bona Nick e durudia edia moale e habadaia?

¹² Paragraf 2 ai tame herevalaia taihu Melissa na e ura Betele ai baine ḡaukara eiava Basileia Evanelia Skuli bainela. Ena be ia ese unu tahua ḡaudia na basine haḡuḡuru dibamu, to ia na e gwa: “Launa na ḡaukara goadamu painia ḡaukara baina karaia namonamo bona haroro daladia idauidau baina toho. Una ese lau na e hamoalegu badamu.” Bona Nick na ministerial servant ai sela neganai, ia be dahaka ese e durua baine haheauka? Ia na e gwa: “Lau na baina kara diba ḡaudia na lalo badava. Heḡereḡere na harorova bona kongrigeisin heboudiai haere na heniva. Danu aplikeisin na atoa Betele ai baina ḡaukara bona laḡani ta murinai e boirigu.”

13. Bema hari o karaiamu asainmen na bo karaia namonamomu, dahaka be varamu? (Kohelete 2:24)

¹³ Bema hari o karaiamu asainmen bo karaia namonamomu, vaira negai maduna ma haida bo abimu, eiava? Una na baine vara diba, Nick enai e vara heḡereḡerena. To bema lasi, Melissa heḡereḡerena oi na dounu emu moale na bo habadaia dibamu, bona Iehova dainai o karamu ḡaukaradia na mai moalemu ida bo karamu. (Kohelete 2:24 ba duahia.) Danu, bo moalemu badina ita Biaguda, Iesu Keriso ese emu hekwarahi na e laloa badamu.

14. Iehova ena hesiai ḡaukara ai tahua ḡaudia ta atomu neganai, dahaka baita laloatao na namo?

¹⁴ Hari ta karamu asainmen baita lalodia bada anina be eda hesiai ḡaukara da basita habadaia, a? Lasi, baita habadaia diba. Namona na tahua ḡaudia baita ato unu amo haroro bona hahediba taudia namodia ai baitala, bona eda tadikaka taihu baita durudia. Unu tahua ḡaudia na baita haḡuḡuru dibamu bema haida idurudia karana baita laloa badamu.​—Her. 11:2; Apos. 20:35.

15. Ededia tahua ḡaudia haida bavato emu moale ba habadaia totona?

¹⁵ Ededia tahua ḡaudia haida bavato diba? Iehova ba noia baine durumu ba haḡuḡuru diba tahua ḡaudia bavato. (Her. 16:3; Iak. 1:5)  Paragraf 1 ai tame herevalai tahua ḡaudia bavato diba. Heḡereḡere heduru eiava regula painia ḡaukarana ba karaia, Betele ai ba ḡaukara, eiava konstraksen ḡaukaradiai ba heduru. Emu haroro ḡaukara ba habadaia totona, gado ma ta ba dibaia eiava tano ma ta ai sivarai namona ba harorolaia. Unu tahua ḡaudia ba haḡuḡuru totona Organized to Do Jehovah’s Will bukana ena karoa 10 ba duahia bona emu kongrigeisin ai elda taudia ba hereva  henidia. * Bema bo hekwarahimu unu tahua ḡaudia bo haḡuḡurumu, haida ese be itamumu oi na o goadamu bona emu hesiai ḡaukara na bo moalelaiamu.

16. Bema emu tahua ḡauna ta na so haḡuḡurua dahaka ba kara diba?

¹⁶ Bema hari oi na dia heḡereḡere tame herevalai tahua ḡauna ta ba haḡuḡurua, dahaka ba kara diba? Ḡau badana na ba haḡuḡurua diba tahua ḡauna ma ta bavatoa. Mani unu tahua ḡaudia haida aita herevalai.

17. 1 Timoteo 4:13, 15 heḡereḡerena, tadikaka ta be edena dalai hahediba tauna namona ai bainela?

¹⁷ 1 Timoteo 4:13, 15 ba duahi. Bema oi na bapatiso tadikakana ta, namona na emu hahediba dalana ba hanamoa. Dahaka dainai? Badina bema mai lalomu idoinai ida emu duahiduahi, hereva dalana, bona hahediba dalana bo hanamoamu, kamonai taudia na bo durudiamu. Namona na Duahiduahi Bona Hahediba Ba Goadalai buklet ai unu kaha ta ta ba stadilai bona ba badina. Rumai unu kaha ta ta ba tohodia loulou, bona emu tok o henimu neganai o diba ḡaudia ba badinadia. Auxiliary counselor bona “haroro bona hahediba” ai mai edia ekspiriens elda taudia edia heduru ba noi. * (1 Tim. 5:17) Dia una buklet ai e tore lesen ibadinana dalana mo ba laloa, to kamonai taudia ba durudia edia abidadama bae hagoadaia bona e dibamu ḡaudia na edia mauri lalodiai bae badina. Unu bo kara tomamu neganai, oi bona ma haida na bo moalemu.

18. Dahaka ese be durudamu haroro ḡaukara ai tahua ḡaudia baita haḡuḡuru totona?

 ¹⁸ Ita iboudai eda maduna na baita haroro bona taunimanima na hahediba ai baita halaodia. (Mat. 28:19, 20; Roma 10:14) Oi o uramu ina mai anina bada ḡaukaranai emu haroro bona hahediba dalana ba hanamoa, a? Hahediba buklet ba stadilaia bona tahua ḡaudia bavato, unu amo o diba ḡaudia ba badina. Danu, Eda Kristen Mauri Bona Hesiai Ḡaukara​—Hebou Pepana bona midweek heboudia ai, e halasimu haroro daladia vidiodia amo heduru bavabi diba. Dala idauidau ba tohodia. Unu heduru daladia bo badinamu neganai, hahediba tauna namona ai bo laomu bona bo moalemu.​—2 Tim. 4:5.

19. Edena dalai kara namodia baita hahedinarai?

¹⁹ Ta uramu baita haḡuḡurua tahua ḡauna badana ta na ina, Dirava ese e moalelaimu kara namodia baita hahedinarai. (Gal. 5:22, 23; Kol. 3:12; 2 Pet. 1:5-8) Una ba haḡuḡurua totona oi be dahaka ba kara? Heḡereḡere, reana oi na o uramu emu abidadama ba hagoadaia. Eda abidadama baita hagoadaia daladia e herevalaimu pablikeisin ba duahi diba. Danu JW Broadcasting^® bo itaiamu karana ese be durumumu, badina bo itaiamu tadikaka be edena dalai hahetoho negadiai abidadama e hahedinaraia. Bena emu mauri ai edia abidadama ba tohotohoa diba daladia ba lalodia.

20. Edena dalai eda moale baita habadaia bona basita lalohisihisi?

²⁰ Hari ina negai ita iboudai na ta uramu Iehova ena hesiai ḡaukara baita habadaia, to reana ita haida edai na dia heḡereḡere. To Dirava ena tanobada matamatanai, una na baita karaia dibamu. Una nega ta nariamu lalonai, namona na hari baita kara diba ḡaudia baita lalo, unu amo basita lalohisihisimu to baita moalemu bona mai anina bada ḡauna na eda “moale Diravana,” Iehova baita hanamoamu. (1 Tim. 1:11, NWT) Una dainai, namona na Iehova dainai ta karamu ḡaudia baita moalelai!