1. Bõe la neb wʋsg maand n na n paam n tʋm wʋsg a Zeova tũudmã pʋgẽ?

 DŨNI-KÃNGÃ saab sẽn ta n sa wã, d tara tʋʋm wʋsg n segd n tʋme. (Mat. 24:14; Luk 10:2; 1 Pɩy. 5:2) D fãa ratame n maand d sẽn tõe fãa a Zeova siglgã pʋgẽ. Neb wʋsg modgame n moond koɛɛgã sõma n paasdẽ. Kẽer rat n wa lebga so-pakdba, t’a taab rat n wa tʋmd Betɛllẽ wã, bɩ n tɩ naag sull ning sẽn gilgd n met siglgã rotã. Saam-biis wʋsg me modgdame, n na n wa lebg kãsemb-sõngdb wall kãsem-dãmba. (1 Tɩm. 3:1, 8) A Zeova sũur tog n nooma wʋsgo, a sẽn ne a nin-buiidã sẽn modgd n tũud-a ne b sũy fãa wã.—Yɩɩn. 110:3; Eza. 6:8.

2. D sã n pa paam tʋʋmd d sẽn da rat a Zeova siglgã pʋgẽ, d manesem tõe n yɩɩ wãna?

² La sã n wa kaoose, tɩ d ket n nan pa paam tʋʋmd ning d sẽn dat n tʋm a Zeova tũudmã pʋgẽ wã, d sũur tõe n sãamame. D sẽn pa tõe n paam n tʋm tʋʋm kẽer a Zeova siglgã pʋgẽ d yʋʋmã sẽn vẽsg wall yɛl a taab yĩngã, tõe n sãamda d sũuri. (Yel. 13:12) Yaa woto ne a Melisa. * A rata ne a sũur fãa n tɩ tʋmd Betɛllẽ wã, bɩ n kẽng Rĩungã koe-moondb lekolle. La ad a sẽn yeele: “Mam yʋʋmã loogame, la m pa tar a tɩɩm ye. Wakat ninga m sũur sãamdame.”

3. Bõe la neb kẽer segd n maane, n yaool n wa tõog n paam tʋʋm kẽer a Zeova siglgã pʋgẽ?

³ Kom-bɩɩs sãnda sẽn tar keelem segd n deng n bɩɩsa zʋg-sõma, n yaool n wa paam tʋʋm kẽer a Zeova siglgã pʋgẽ.  Kom-bɩɩs kẽer zutã vɩɩme, b tõe n yãka yam tao-tao yell ning taoore, la b tʋll me n tʋm ne b sũy fãa. La rẽnda b bɩɩs sũ-mare, n tʋmd ne gũusgu, la b waoogd neb a taabã. Y sã n modg n bɩɩs zʋg-sõma-kãensã, y wat n paamame tɩ b kõ-y tʋʋmd wakat ning y sẽn pa tẽede. D gom saam-biig a Nik yelle. A sẽn wa n tar yʋʋm 20, a sũur sãama wʋsgo, b sẽn da nan pa yãk-a t’a lebg kãsemb-sõngdã yĩnga. A yeelame: “Mam da tagsdame tɩ m sẽn maand yɛlã to-to wã pa tolg n yaa sõma zãng ye.” La a Nik pa koms raood n bas ye. A ra ket n maanda a sẽn tõe fãa tigingã pʋgẽ la koɛɛgã mooneg pʋgẽ. Rũndã-rũndã, a lebga filiyall taoor lʋɩtb sull neda.

4. Bõe yell la d na n gom sõs-kãngã pʋgẽ?

⁴ Yãmb sũur sãamame, y sẽn nan pa paam tʋʋmd ning y sẽn dat a Zeova siglgã pʋgẽ wã yĩng bɩ? Sã n yaa woto, bɩ y pʋʋs a Zeova n togs-a yellã sẽn namsd-y to-to wã. (Yɩɩn. 37:5-7) Sẽn paase, kos-y sagls saam-biis tẽeb sẽn bɩ nengẽ, n bãng y sẽn tõe n maan to-to n tũ Wẽnnaam sõma, la y maan y sẽn tõe fãa n tũ b saglsã. Y sã n maan woto, y na n wa paama tʋʋmd ning y sẽn datã. Wa a Melisa, tõe tɩ yãmb me pa le tõe n paam n tʋm tʋʋmd ning y sẽn da rat a Zeova siglgã pʋgẽ wã ye. Sã n yaa woto, bõe la y tõe n maan n kell n tall y sũ-noogã? Sẽn na yɩl n paam sok-kãngã leoore, sõs-kãngã na n sõng-y lame tɩ y bãng 1) bũmb ning sẽn tõe n kõ-y sũ-noogo, 2) y sẽn tõe n maan tɩ y sũ-noogã paase, la 3) bũmb nins y sẽn tõe n yãk yam n wa maane, tɩ paas y sũ-noogã.

5. D sã n dat n paam sũ-noogo, bõe yell la d segd n tagsdẽ? (Koɛɛg soab 6:9)

⁵ Koɛɛg soab 6:9 wã wilgda d sẽn tõe n maan to-to n paam sũ-noogo. (Karm-y.) Ned sã n maand sũ-noog ne a “sẽn tar bũmb ningã,” la ne a sẽn tõe n maan bũmb ning masã meng tɩ zems ne a yɛlã sẽn yaa to-to wã, a paamda sũ-noog wʋsgo. La ned sã n nong n tagsd bũmb a sẽn dat n paam yelle, t’a sẽn baood bũmb ningã yɩɩd a pãnga, a pa tol n tõe n paam sũ-noog ye. Woto wilgda tõnd bõe? D sã n dat n paam sũ-noogo, d segd n tagsda bũmb nins d sẽn zoe n tarẽ wã yelle, la pa bũmb nins d sẽn pa tõe n paamã yell ye.

6. Yel-bũn-bʋg yell la d na n gom masã, la na n sõnga tõnd tɩ d bãng bõe?

⁶ Rẽ yĩnga, y sɩd tõe n maana sũ-noog ne bũmb nins y sẽn zoe n tarẽ wã bɩ? Neb wʋsg tagsdame tɩ woto pa tõe, bala ninsaalbã nong n dat n zãmsa bõn-paal maanego. La yaool n tõeeme. D tõe n sɩd maana sũ-noog ne bũmb nins d sẽn ‘zoe n tarẽ wã.’ Wãn to? Sẽn na yɩl n bãng rẽ, bɩ d ges a Zeezi yel-bũnd ning sẽn be Matiye 25:14-30 wã sẽn gomd talã-rãmbã yellã. D na n yãa d sẽn tõe n maan n paam sũ-noog tʋʋmd ning d sẽn zoe n tʋmdẽ wã pʋgẽ, hal tɩ d sũ-noogã paase.

7. Kʋms-y a Zeezi yel-bũnd ning sẽn gomd talã-rãmbã yellã.

⁷ A Zeezi yel-bũndã pʋga, rao n da segend a meng n na n tog sore. Nand t’a looge, a boola a tʋm-tʋmdb a tãab n kõ b ned kam fãa talã, * n yeel-b tɩ b tall n maan leebgo. A gesa b ned kam fãa yɛl sẽn yaa to-to wã, n kõ pipi soabã talã a nu, yiib-n-soabã talã a yiibu, la tãab-n-soabã talã a yembre. Pipi soabã ne yiib-n-soabã rɩka ligdã b sẽn deegã n tʋm ne b sũy fãa, tɩ b zu-soabã paam yõodo. La tʋm-tʋmd a  tãab-n-soabã pa maan baa fʋɩ ne ligdã b sẽn kõ-a wã ye. Rẽ n so t’a zu-soabã rig-a tʋʋma.

8. A Zeezi yel-bũndã pʋgẽ, bõe n kɩt tɩ pipi tʋm-tʋmdã ra tõe n maan sũ-noogo?

⁸ Pipi tʋm-tʋmdã sũur yɩɩ noog wʋsgo, a zu-soabã sẽn kõ-a talã a nu wã. Ra yaa ligd wʋsgo. Leb n da wilgdame t’a zu-soabã ra kɩs-a-la sɩd zãng-zãnga. La tʋm-tʋmd a yiib-n-soabã yẽ? A sũur da tõe n sãamame, b sẽn pa kõ-a talã wʋsg wa pipi tʋm-tʋmdã yĩnga. La a manesem yɩɩ wãna?

9. Yel-bũndã pʋgẽ, bõe la a Zeezi pa yeel tʋm-tʋmd a yiib-n-soabã zugu? (Matiye 25:22, 23)

⁹ Karm-y Matiye 25:22, 23. A Zeezi pa yeel tɩ tʋm-tʋmd a yiib-n-soabã sũur sãamame, bɩ t’a maana sũ-kẽka, b sẽn kõ-a talã a yiib balã yĩng ye. A Zeezi pa wilg yel-bũndã pʋgẽ tɩ tʋm-tʋmdã yẽgmame n yeel yaa: ‘Woto tɛk la b kõ maam? Ma-me tõe n tʋma wa tʋm-tʋmd ning b sẽn kõ talã a nu wã wɛ. Mam zu-soabã sã n getame tɩ m pa tʋm-tʋmd-sõngo, mam na n tɩ busa ligdã la m tɩ tʋm m meng tʋʋma.’

10. Tʋm-tʋmd a yiib-n-soabã maana bõe ne a talã-rãmbã?

¹⁰ Wa pipi tʋm-tʋmdã, tʋm-tʋmd a yiib-n-soabã me gesame tɩ tʋʋmd ning b sẽn kõ-a wã tara yõod wʋsgo, t’a tʋm ne a sũur fãa a zu-soabã yĩnga. A tʋma ne talã a yiibã n paam talã a yiib yõod n paase. A zu-soabã keo-a-la a sẽn tʋm sõma wã yĩnga. A sũur pa yɩ noog ne-a bal ye. A pʋd n pẽg-a lame, n kõ-a tʋʋm n paase.

11. Bõe la d tõe n maan tɩ d sũ-noogã paase?

¹¹ Tõnd me tõe n paama sũ-noog wʋsgo, d sã n wɩsg d meng n tʋmd tʋʋm nins fãa d  sẽn tar a Zeova siglgã pʋgẽ wã. Tʋmd-y koe-moonegã tʋʋmd wʋsgo, la y kẽesd y mens sõma tigingã tʋʋmã pʋsẽ. (Tʋʋ. 18:5; Ebre. 10:24, 25) Segend-y y mens sõma tigissã yĩnga, la y kõt leoor sẽn kengd raoodo. B sã n kõ-y sõsg Kiris-nebã vɩɩm la b tʋʋma tigsg sasa, bɩ y ges rẽ wa bũmb sẽn tar yõod wʋsgo. B sã n wa kos-y tɩ y sõng ne tʋʋmd ning tigingã pʋgẽ, bɩ y wilg tɩ y yaa ned sẽn maand bũmb fãa a wakate, la ned b sẽn tõe n teege. Ra tags-y tɩ tʋʋmd ning b sẽn kõ yãmbã yõod pa waooge, la tɩ pa baood tɩ y rɩk sẽk wʋsg n tʋm ye. Modg-y tɩ y minimã paase. (Yel. 22:29) Y sã n tʋmd a Zeova tʋʋmdã ne y sũur fãa, zood ning y sẽn tar ne-a wã pãng na n paasdame, tɩ y sũ-noogã me paasdẽ. (Gal. 6:4) Sẽn paase, na n yɩɩ nana ne-y tɩ y maan sũ-noog ne neb a taabã, b sã n wa kõ-b tʋʋmd yãmb sẽn da rat tɩ b kõ-yã.—Rom. 12:15; Gal. 5:26.

12. Bõe la a Melisa ne a Nik maan-yã, tɩ paas b sũ-noogã?

¹² D le gom a Melisa yelle, saam-bi-poak ning sẽn da rat ne a sũur fãa n tɩ tʋmd Betɛllẽ wã, bɩ n kẽng Rĩungã koe-moondb lekollã. Baa ne a sẽn pa le tõe n maan rẽ wã, a yeelame: “M maanda m sẽn tõe fãa n tʋmd m so-pakrã tʋʋmd sõma. M modgdame me n tũnugd ne manesem buud toor-toor n taasd nebã koɛɛgã. Woto kõt-m-la sũ-noog wʋsgo.” A Nik sũur sẽn da sãame, b sẽn da nan pa yãk-a t’a lebg kãsemb-sõngdã yĩngã, a maana wãna? Ad a sẽn yeele: “M da modgdame n maand bũmb nins fãa m sẽn tõe n maanã ne yẽesem. Wala makre, m da kẽesda m meng sõma koɛɛgã mooneg pʋgẽ, la m kõt leoor sẽn kengd raood tigissã sasa. M kosame me n na n tɩ tʋmd Betɛllẽ wã. La vẽk-n-yʋʋmdã bala, b boola maam.”

13. Y sã n tʋmd tʋʋmd ning y sẽn zoe n tarẽ wã ne y sũur fãa, na n baasa wãna? (Koɛɛg soaba 2:24)

¹³ Y sã n tʋmd tʋʋmd ning y sẽn zoe n tarẽ wã ne y sũur fãa, b na n wa kõ-y-la tʋʋm a taab n paas bɩ? B tõe n wa kõ-y-la tʋʋm a taaba, wa sẽn yɩ to-to ne a Nikã. La wa a Melisa, baa b pa kõ-yã, y sũ-noogã na n ket n paasdame. La y sũur na n maneg n yɩɩ noog ne tʋʋmd ning y sẽn tʋmd a Zeova tũudmã pʋgẽ wã. (Karm-y Koɛɛg soab 2:24.) Sẽn paase, sãmbg kae tɩ y sũur na n yɩ noog wʋsgo, y sẽn mi tɩ d Zu-soab a Zeezi Kirist sũur nooma ne modgr nins y sẽn maandã.

14. D sã n wa rat n yãk yam n maan bũmb a Zeova tũudmã pʋgẽ, bõe la d pa segd n yĩmi?

¹⁴ D sã n zoe n maanda d sẽn tõe fãa a Zeova tũudmã pʋgẽ, rat n yeelame tɩ d pa segd n le maan modgr n paas bɩ? A bada. D tõe n yãka yam n modg n wa lebg koe-moond wall karen-saamb sẽn tar minim, la d sõngd d tẽed-n-taasã. D na n wa tõog n maana woto, d sã n tall yam, n sikd d mens n sõngd d taabã, la d pa lʋɩɩsd d mensã raab taoor ye.—Yel. 11:2; Tʋʋ. 20:35.

15. Bõe la y tõe n yãk yam n maan tɩ paas y sũ-noogã?

¹⁵ Bõe la y tõe n yãk yam n maan a Zeova tũudmã pʋgẽ? Kos-y-yã a Zeova t’a sõng-y tɩ y bãng y sẽn tõe n maan tɩ zems ne y pãngã. (Yel. 16:3; Zak 1:5) Y tõe n modgame n wa tʋm tʋʋm nins yell d sẽn gom  pipi sullã pʋgẽ wã a yembre. Wala makre, n lebg sõngr so-pakd wall wakat fãa so-pakda, n tɩ tʋmd Betɛllẽ wã, bɩ n tɩ naag sull sẽn gilgd n met siglgã roto. Y tõeeme me n zãms buud-gomd a to sẽn na yɩl n moon koɛɛgã n paase, wall n yik n tɩ moon tẽng a to. Y sã n ges  Organisés pour faire la volonté de Jéhovah sebrã sak 10 pʋgẽ, la y gom ne y tigingã kãsem-dãmbã, y na n bãnga rẽ sẽn baood tɩ y maan bũmb ninga. * Y sã n modgd n na n wa tõog n maan woto, neb a taabã na n yãame tɩ y tẽebã bɩtame, la y sũ-noogã na n paasdame.

16. Y sã n nan pa tõe n tʋm tʋʋmd y sẽn yãk yam n dat n tʋme, bõe la y tõe n maane?

¹⁶ La y sã n nan pa tõe n maan bũmb nins yell d sẽn gomã baa a yembre, y maanda wãna? Y tõe n baoo bũmb a to sẽn zems y nugu, n maane. Ad bũmb kẽer y sẽn tõe n maane.

17. Sẽn zems ne 1 Tɩmote 4:13, 15 wã, bõe la saam-biig tõe n maane, n lebg karen-saamb sẽn tar minim?

¹⁷ Karm-y 1 Tɩmote 4:13, 15. Y sã n yaa saam-biig sẽn deeg lisgu, y tõe n modgame n paas y minimã koɛɛgã mooneg la nebã zãmsgã pʋgẽ. Bõe yĩnga? Bala y sã n modg n bãng kareng sõma, n mi goama, n tõe n zãms neb sõma, tõe n nafa y kɛlgdbã. Modg-y n paas-y y minimã karengã la nebã zãmsg wɛɛngẽ sebrã pʋgẽ, b sõdga bũmb toor-toor y sẽn tõe n maan n paas y minimã nebã zãmsgã wɛɛngẽ. Modg-y n karem-y rẽ fãa la y tũ b sẽn yeelã. Y sã n zãms a yembr fãa n sa, bɩ y reng n mak rẽ zakẽ n gese, la y modg n tũ b sẽn yeel bũmb ningã, y sã n wa wɛgsd sõsga. Kos-y sagls sagend a to wã * nengẽ, wall kãsem-dãmb a taab “sẽn tʋmd wʋsg koɛɛgã mooneg pʋgẽ, la nebã zãmsg pʋgẽ”  nengẽ. (1 Tɩm. 5:17) Ra bao-y n na n tũ b sẽn yeel sebrã pʋgẽ tɩ y maanã bal ye. Ges-y y sẽn tõe n maan n sõng y kɛlgdbã tɩ b tẽebã paase, wall y sẽn tõe n sõng-b to-to tɩ b tũ b sẽn bãng bũmb ningã. Y sã n maand woto, yãmb ne bãmb fãa sũ-noogã na n paasdame.

18. Bõe n tõe n sõng-d tɩ d tõog n maan bũmb kẽer koɛɛgã mooneg wɛɛngẽ?

¹⁸ Tõnd fãa segd n moona koɛɛgã la d sõng nebã tɩ b lebg a Zeezi karen-biisi. (Mat. 28:19, 20; Rom. 10:14) Yãmb datame n paam minim n paas tʋʋm-kãngã sẽn tar yõod wʋsgã pʋgẽ bɩ? Zãms-y Karengã la nebã zãmsgã sebrã, tɩ rẽ poor bɩ y tũ y sẽn bãngã. Y tõe n paama sagls a taab Kiris-nebã vɩɩm la b tʋʋma tigissã na-kẽndr sebrã pʋgẽ, la sõsg tɩʋʋsg video-rãmbã b sẽn wilgd tigs-kãng sasa wã pʋgẽ. Mak-y saglsã fãa n gese bʋg n womd biis sõma. Y sã n tũ sagl-kãensã fãa, y na n paama minim wʋsg koɛɛgã mooneg pʋgẽ, tɩ kõ-y sũ-noog wʋsgo.—2 Tɩm. 4:5.

19. Bõe la y tõe n maan n bɩɩs zʋg-sõma?

¹⁹ Y pa segd n yĩm tɩ bũmb me y sẽn tõe n maan tɩ tar yõod wʋsgo, yaa y sẽn na n bɩɩs zʋg-sõma. (Gal. 5:22, 23; Kol. 3:12; 2 Pɩy. 1:5-8) Wãn to la y tõe n maan rẽ? Y sã n dat tɩ y tẽebã pãng paase, y tõe n karma sõss sẽn be siglgã sɛbã pʋsẽ n paam sagls sẽn tõe n sõng-y rẽ wɛɛngẽ. Y sã n ges JW Teledifiziyõ wã sõss sẽn gomd d tẽed-n taas sẽn kell n tall b tẽebã kãn-kãe baa ne b sẽn da maood ne zu-loeesã, na n naf-y lame. Rẽ poor bɩ y ges yɛl kẽer pʋsẽ y sẽn tõe n tall b tẽebã buudu.

20. Bõe la d tõe n maan tɩ paas d sũ-noogã, la boog d sũ-sãamsã?

²⁰ Yaa vẽeneg tɩ d fãa tʋllame n tʋm wʋsg a Zeova yĩnga, tɩ yɩɩg d sẽn zoe n tʋmdẽ wã. Dũni-paalgã pʋgẽ, d na n tõog n tũu Wẽnnaam wa d sẽn date. La d sã n maand d sẽn tõe fãa masã menga, d sũ-noogã na n paasame, tɩ d sũ-sãamsã booge. La sẽn yɩɩd fãa, na n kɩtame t’a Zeova sẽn yaa “Wẽnnaam sẽn yaa sũ-noog soabã” paam pẽgr la waoogre. (1 Tɩm. 1:11) Rẽ wã, bɩ d maan sũ-noog ne tʋʋm nins d sẽn zoe n tarã.