1. Avyani vino awantu awavule wakulonda ukucita mu mulimo wa kwe Yehova?

  PANO insilo ya kwe yo-o insi ikuya ikupalamila tuli ni milimo imivule iyakuwomba. (Mat. 24:14; Luk. 10:2; 1 Pet. 5:2) Swensinye tukulonda ukuwombela Yehova ukufika pano pangapelela amaka yitu. Ku cakulolelako, awavule wakuwombesya pa kuti walundulule umulimo wa kuwizya. Wamwi wakulonda ukuwombako wupainiya. Ne wanji wakuwombesya pa kuti wize wawombeleko pa Bethel nanti mu wuzengo. Awanawitu awavule nawo wakuwombesya pa kuti wafikepo ukuwa awawomvi wano wakatumicila nanti waeluda. (1 Tim. 3:1, 8) E Yehova akakwivwa icete nkaninye nga walola awawomvi wakwe wakuyikundila ukumuwombela!—Amalu. 110:3; Ayize. 6:8.

2. Uzye tungayivwa wuli nga ca kuti tutafisilepo ukuwomba imilimo yimwi yino tukalonda mwi wungwe lya kwe Yehova?

² Tungayivwa uwuwi nkaninye nga ca kuti twawombesya pa myaka imivule, lelo wasakutupa imilimo yino tukalonda ukuwomba mwi wungwe lya kwe Yehova. Ne manda yamwi tungayivwa uwuwi nga ca kuti watatupile imilimo yino tukalonda pamulandu wa myaka nanti ivintuvye vinji. (Imilu. 13:12) Wonye avino calinji na kwe Melissa. * Walondanga sana ukuwombelako pa Bethel nanti ukuya kwi Sukulu lya Kawizya wa Wufumu. Lelo walanzile ukuti: “Inkosile ntanga inkumanisye ukuwomba yo-o imilimo. Lelo manda yamwi nkakwivwa uwuwi.”

3. Avyani vino wumwi azipizile ukucita pa kuti afikepo ukuwomba imilimo yimwi mwi wungwe lya kwe Yehova?

³ Awacitici wamwi swinya wano wawa nu wumi uwuzima, wangavwambisya  ukuwombako imilimo yimwi mwi wungwe lya kwe Yehova. Lelo wangalondekwa ukukula mu mano nu kuwa ni miwele yino yingalenga wafikepo ukuwomba yoyo imilimo. Ku cakulolelako, wamwi wangalanga wacenjela mwe vimwi, wamanya ivyakupingula zuwa pa vintu swinya wawa nu mwezo wakuyikundila ukuwomba. Lelo wangalondekwa ukuwa ni miwele ndi vino ukutekanya, umucinzi, nga nu kuwikako amano pano wakuwomba imilimo yino wawapa. Nga ca kuti twawombesya ukufika pano pangapelela amaka yitu ukuwa ni miwele yino yikulondekwa, awanawitu wangatupa imilimo yino tukulonda ukuwomba pa mpindi pano tutakwenecela nu kwenecela. Lolani cino cacitisile kwe Nick. Pano walinji ni myaka 20 wayivwile uwuwi nkaninye pano watamusonsile ukuwa amuwomvi wino akatumicila. Walanzile ukuti: “Nayivwile ukuti pafwile pawa cimwi cino nsiwomba icete.” Lelo nanti ciwe wo-o, watwalilizile ukuzifyako imiwele yakwe nga nu kuwombesya mwi wungwe na mu mulimo wa kuwizya. Pe yo-o impindi wawa mwe Komiti ya Musambo.

4. Avyani vino twandi tusambilile mwe co-o icipande?

⁴ Uzye mukakwivwa uwuwi pamulandu wakukana ficilisya vino mwapanzile ukucita mu mulimo wa kwe Yehova? Nga avino cawa, mwapepa kwe Yehova nu kumunena vino mukuyivwa. (Amalu. 37:5-7) Swinya mungakolowozya wasongo mu vya kwe Leza ukuti wamyavwe muno muzipizile ukuzifyako pa kuti muwawomba icete, nu kwelezya na maka ukukonka vino waminena. Nga mwacita wo-o, mungafikapo ukuwomba imilimo yino mukalonda ukuwomba mwi wungwe lya kwe Yehova. Lelo ndi wulyanye vino calinji kwe Melissa wino tulanzilepo kali, ncepamwi mutanga muwe nu longo lwa kuwomba imilimo yimwi. Nga cawa wo-o mungacita wuli pakuti mutwalilile ukuwa ni nsansa? Pakwasuka lyo-o iwuzyo co-o icipande candi cilande pa vintu vitatu. (1) cino cingalenga muwe ni nsansa. (2) ivya kucita pa kutwalilila ukuwa ni nsansa. (3) ukupanga ivya kucita vino vingalenga muwe ni nsansa.

5. Ukulingana ne Ekawizya 6:9, avyani vino tuzipizile ukuwikako sana amano pa kuti tuwe ni nsansa?

⁵ Iwaliko lya kwe Ekawizya 6:9, lyalondolola cino cingalenga tuwe ni nsansa. (Wazyani.) Lyalanda ukuti “cazipa ukutima navino uli navyo.” Umuntu wino akatima, akasalifya pe vino ali navyo na pe vino angakumanisya ukuwomba pe yoyo impindi swinya akasecelela sana. Lelo umuntu wino akalonda ukuwa na co-o naco cino atanga akumanisye ukuwa naco asitima. Uzye co-o cikutusambilizya cani? Tuzipizile ukuwika amano ku vintu vino tuli navyo asa ku vintu vino tutanga tukumanisye ukuwa navyo.

6. Amulumbe ci wuno twandi tulandepo, swinya avyani vino twandi tusambilileko?

⁶ Uzye kweni cingacitika ukutima na vino uli navyo? Awantu awavule wakakwelenganya ukuti asacipepuke, amuno ivintu vikapiluka cila mpindi. Lelo icisinka aca kuti tungatima. Swinya tungasecelela mu vintu vino tuli navyo pe yoyo impindi. Nomba tungacita wuli wo-o? Pakuzana icasuko, lekani tulande pa mulumbe wa kwe Yesu uwa matalanti wuno wukazanwa pe Mateyu 25:14-30. Twandi tulole vino wo-o umulumbe wungatwavwa ukuwa ni nsansa nu kutwalilila ukusecelela pano tukuwomba umulimo uwuli wonsinye wuno tuli nawo.

7. Mukufupizya, londololani icilanjililo ca kwe Yesu ica matalanti.

⁷ Mwe wo-o umulumbe, e yisikulu wa wazya watatu walinji nu kufumapo. Pano atani apite wisile awazya wakwe nu kuwapa cila muntu amatalanti yano walinji nu kusyala akupanga uwukazi. * E yisikulu wamanyile ukuti wa-a awazya watalingine amaka ya kuwomba ivintu. Acino wapile umuzya wenga amatalanti 5, nu muye yawili, nu wakulecelezya wamupile lyonga. Wa-a awazya wakutalicilako wawili wawombesizye nkaninye pa  kuti walundulule indalama zyakwe yisikulu. Lelo umuzya waciti tatu atawomvile nanti cimwinye ku ndalama yino wamupile. Swinya e yisikulu walile wanyoka wamuwinzile incito.

8. Acani cino calinji nu kulenga umuzya wakutalicila ukusecelela sana?

⁸ Umuzya wakutalicila afwile wasecelezile nkaninye pa kumupa amatalanti 5 kwe yisikulu. Amuno yo-o yalinji andalama iyikulu nkaninye. Swinya calanjizizye apatiswenye ukuti e yisikulu wamusuwizile nkaninye. Uzye uwaciti wili weni walinji nu kuyivwa wuli? Nga wayivwile uwuwi nkaninye. Amuno indalama zino wamupile zitalingine na zino wapile uwakutalicila. Nomba uzye wacisile wuli?

9. Ukulingana ne Mateyu 25:22, 23, avyani vino e Yesu asitela alandepo ukuti avino muzya wa citi wili wacisile?

⁹ Wazyani Mateyu 25:22, 23. E Yesu atalanzile ukuti umuzya waciti wili wafuzilwe pa mulandu wa kuti wamupile amatalanti yawili. Cinji aca kuti e Yesu asitela alandepo ukuti we-e umuzya watalisile ukuyilizyanya, nu kulanda ukuti: ‘Uzye zyonye zyo-o azili indalama zino angampa? Acani cino calenga ampe zitici? Nga vyo nanenenye nkawombesya ngati awenye we-e wino tewapa amatalanti 5? Nga ca kuti e tatakulu akalola ngati asa ne muwomvi umuzima, ncepamwi cingazipavye ukuti nzicile indalama zyakwe nu kutalika ukuyiwombela palwane ukucila ukumuwombela.’

10. Uzye umuzya waciti wili wacisile wuli na matalanti yawili yano wamupile?

¹⁰ Umuzya waciti wili nawe waweni ukuti umulimo wuno e yisikulu wamupile walinji awucindame nkaninye. Acino nawenye wawombesizye wulyanye vino umuzya wakutalicila wacisile. Ica kuti pe yawili yano wamupile walundizilepo na yanji yawili. E yisikulu walambuzile we-e umuzya pakuwombesya kwakwe. Swinya atapelezilevye pa kumusalifya, lelo wamupezilepo imilimo na yinji.

11. Uzye tungacita wuli pa kuti tutwalilile ukuwa ni nsansa?

 ¹¹ Nasweswenye tungatwalilila ukuwa ni nsansa nga ca kuti tukuwombesya ukufika pano papelezile amaka yitu mu mulimo uwuli wonsinye wuno twakwata mwi wungwe lya kwe Yehova. Muzipizile “ukulemasya” mu mulimo wa kuwizya nu kuwombela ponga ni wungwe. (Imili. 18:5; Hebe. 10:24, 25) Muwapekanya ukulongana pa kuti ivyasuko vino mukwasuka viwawomelezya wanji. Mwacindamika sana uluwali ululi lonsinye luno wamipa mukulongana kwa Imikaliile nu Mulimo Wuno Tukawomba. Nga ca kuti wamipa uluwali ululi lonsinye mwi wungwe muwaficilisya swinya mutacelwa. Mutalola umulimo uwuli wonsinye wuno wamipa ukuti wutacindime, swinya mukusumbavye impindi yinu ukuya mukuwuwomba. Muwakwelezya na maka ukuzifyako imiwombele yinu. (Imilu. 22:29) Nga mukuwombesya na maka mu mulimo wa kwe Yehova, muliwomya wuciwuza winu na weliwe swinya muliwa ni nsansa nkaninye. (Gal. 6:4) Cinji aca kuti ciliwamipepucila nkaninye ukusecelela ponga na wano wapa imilimo yino mwalondanga ukuti wamipe.—Roma. 12:15; Gal. 5:26.

12. Acani cino cavwizye e Melissa ne Nick ukuwa ni nsansa?

¹² Uzye mukumwizuka e Melissa wino tetulanzilepo mu paragrafu 2 wino walondesyanga nkaninye ukuwombelako pa Bethel nanti ukuya kwi Sukulu lya Kawizya wa Wufumu? Nanti aca kuti atakweti ulongo ulwakuficilisya vyo-o vino walondanga ukucita, walanzile ukuti: “Nkakwelezya na maka ukuwombesya mwe wo-o umulimo wa wupainiya, swinya nkawomvya inzila izilekane lekane pa kuti imbizizyeko wanji. Co-o calenga imbe sana ni nsansa.” Nge Nick weni acani cino camwavwizye ukutwalilila ukuwombesya pano watamusonsile ukuwa amuwomvi wino akatumicila? Walanzile ukuti: “Nawisile sana amano ku milimo yino nalinji nayo mwi wungwe. Ndi vino umulimo wa kuwizya nu kwasukapo pa kulongana pa kuti ndawomelezya wanji. Swinya nasayinile ukuti njize mbombeleko pa Bethel. Umwaka wuno wakonsilepo wanjisile.”

13. Ukulingana ne Ekawizya 2:24, avyani vino vingafumamo nga ca kuti mukuwombesya ku milimo yino muli nayo pe yonye impindi?

¹³ Uzye nga ca kuti mukuwombesya mu mulimo wuno mwawa nawo pe yo-o impindi, lyo cikusula ukuti mulipocelela imilimo na yinji mwi wungwe lya kwe Yehova? Ncepamwi cingacitika ndi vino calinji kwe Nick. Lelo nga cawa ndi vino calinji kwe Melissa naponya tungatwalilila ukuwa ni nsansa pano tukuwombela Yehova. (Wazyani Ekawizya 2:24.) Nicikulu nkani cino cililenga muwe ni nsansa aca kuti mulimanya kuno mukusecelesya e Tatakulu e Yesu Klistu.

14. Avyani vino tuzipizile ukupanga ukucita mu mulimo wa kwe Yehova?

¹⁴ Nga ca kuti tukuwombesya mu mulimo wuno twawa nawo peyonye impindi, uzye lyo cikusula mukuti tuzipizile ukuleka ukupanga ivya kucita mu mulimo wa kwe Yehova? Awe nakalya! Tuzipizile nu kupanga ukucita vino vingatwavwa ukuwa wakawizya swinya wakasambilizya awazima. Nukulenga vino twapanga vyakwavwa awanawitu na wankazi. Cinji aca kuti tutazipizile twawikavye amano kwe vino vingatuzipila swe weneco, lelo na kwe vino vingazipila wanji. Nga twacita wo-o tulificilisya vino tukapanga ukucita mu mulimo wa kwe Yehova.—Imilu. 11:2; Imili. 20:35

15. Avyani vino mungapanga ukucita vino vingalenga muwe ni nsansa sana?

¹⁵ Avyani vimwi vino mungapanga ukucita mu wumi? Muzipizile ukulenga kwe Yehova ukuti amyavwe ukumanya vino mungapanga ukucita vino mungiza muficilisye. (Imilu. 16:3; Jemu. 1:5) Uzye  namwemwe mutanga mutemwe ukuwombako wupainiya wa kwavwilizya, uwampindi zyonsi, ukuwombelako pa Bethel nanti mu wuzengo? Uzye mutanga mukunde ukusambililako ululimi lunji pa kuti mulundulule umulimo wa kuwizya nanti ukuya mukuwombelako kucifulo cinji? Mungamanyilapo na vinji pe vyo-o vino twalandapo nga mwawazya icipandwa 10 mwi buku lya  kuti Abateyanishiwa Ukucita Ukufwaya kwa kwa Yehova. Nanti mungalanzyanya na waeluda awa mwi wungwe linu. * Nga mukwelezya na maka ukuficilisya vino mwapanga, na wanjinye waliwalola ukuti mukulunduluka swinya muliwa ni nsansa nkaninye.

16. Mungacita wuli nga ca kuti mutanga muwe nu longo lwa kuwombako umulimo uwuli wonsinye pe yo-o yino twalandapo?

¹⁶ Nomba mungacita wuli nga ca kuti mutanga muwe nu longa lwa kuwomba umulimo uwuli wonsinye pe yo-o yino twalandapo? Nga avino cawa, muzipizile ukwelezya ukupanga ivya kucita vinji vino mungakumanisya ukuwomba. Lolani vimwi vino mungacita.

17. Ukulingana ne 1 Timoti 4:13, 15, avyani vino umwanawitu angacita pa kuti awe wekasambilizya muzima?

¹⁷ Wazyani 1 Timoti 4:13, 15. Nga mwe wanawitu awabatizwe mungawombesya pa kuti muzifyeko mwe vino mukalanda amalyasi ni misambilizizye yenu. Amulandu ci? Amuno nga mwawombesya ukucita wo-o, muliwakwavwa sana wano wakumivwa. Tantikani ukuwazya nu kuwomvya cila lisambililo lino lyawa mwe broshuwa ya kuti Twalililani Ukuwika Amano ku Kuwazya nu Kusambilizya. Mwakwelezya ukuwomvya isambililo lyonga na lyonga nu kupitulukamo pano muli ku ng’anda. Swinya nga wamipa uluwali ululi lonsinye pa kulongana, mwawomvya vino musambilizile. Mungakolowozya e kasunda waciti wili nanti waeluda “wano wakawombesya mbali nu kuwizya nu kusambilizya” ukuti wamyavwe ukumanya mumwi muno muzipizile ukuzifya.” * (1 Tim. 5:17) Pano mukuwizya nu kusambilizya, mutawikavye amano kwe vino vili mwe yo-o e broshuwa. Lelo mwakwavwa na wano  wakwivwa ukuwomya isuwilo lyawo nu kuwomvya vino wakusambilila. Nga mukucita wo-o muliwa sana ni nsansa swinya muliwalenga na wanji ukusecelela.

18. Avyani vino vingatwavya ukuficilisya vino twapanga ukucita pa kuti twawomba icete mu mulimo wa kuwizya?

¹⁸ Swensinye twawa nu mulimo wa kuwizya nu kupanga awasambi. (Mat. 28:19, 20; Roma. 10:14) Uzye mungakunda ukuzifyako imiwombele yinu mwe wo-o umulimo uwucidame? Tantikani ivya kucita pano mukuwazya nu kuwomvya vino mukusambilila mwe broshuwa ya kuti Twalililani Ukuwika Amano ku Kuwazya nu Kusambilizya. Vinji vino vingamyavwa mungavizana mu Akalibuku ka Imikaliile ya Wina Klistu nu Mulimo Wuno Tukawomba. Na mavidyo yano tukatamba pekonye ko-o ukulongana kwa mikaliile. Yelezyani ukuwomvya inzila indekane lekane pa kuti mulole zino zingawomba icete mu cifulo cino mukawizizyamo. Nga mwawomvya vyo-o vino twaladapo muliwa mwe wakawizya swinya wakasambilizya awazima. Na co-o cililenga mwawa sana ni nsansa.—2 Tim. 4:5.

19. Mungacita wuli pa kuti muwe ni miwele yino yikasecelesya Leza?

¹⁹ Pano mukupanga ivya kucita mu wumi muzipizile mwakwizuka nu kuti icicindame sana cino mungapanga ukucita akuwa ni miwele yino yikasecelesya Leza. (Gal. 5:22, 23; Kolo. 3:12; 2 Pet. 1:5-8) Ku cakulolelako, tuti mukulonda ukuwa ni suwilo, acani cimwi cino cingamyavwa? Mungawazya ivipande mu mabuku yitu vino vikalanda pe vino mungacita pa kuwomya isuwilo linu. Cinji aca kuti, mungatamba na mavidyo yano yakawa mwe JW Broadcasting^® yano yakalanjizya vino awanawitu na wankazi wakatwalilila ukulanjizya isuwilo asamulandu nu kupita mu ntazi izilekane lekane. Apano mulole vino mungakolanya isuwilo lyawo mu mikaliile yinu.

20. Tungacita wuli pa kuti tutwalilile ukuwa ni nsansa nu kukana sakamikwa?

²⁰ Ukwasowa nu kuvwilika swensinye tukalonda ukuwombesya mu mulimo wa kwe Yehova ukucila na pe vino tukawomba. Mu nsi mpya yino Leza watulaya, tuliwawomba ukufika pano sweweneco tukulondela. Acino pe yo-o impindi lekani tutwalilile ukuwombesya mu mulimo uwuli wonsinye wuno twakwata. Nga twacita wo-o, tuliwawa sana ni nsansa swinya tutaliwayivwa uwuwi. Ni cicindamisye aca kuti, tulilenga ilumbo nu mucinzi ukuya kwe Yehova ‘e Leza witu uwa nsansa.’ (1 Tim. 1:11) Acino lekani tutwalilile ukusecelela mu mulimo uwuli wonsinye wuno tukawomba!