1. Kapandi kaka va na ku lihakela vamuanetu vavengi ku tuala ha ku ambulula?

 KULI YETU Vakua Kilistu, omo ku Kotoka ca mavu ciya na ku suena mu hiehi, vipanga navio viya na ku livuezelela. (Mat. 24:14; Luka 10:2; 1 Pet. 5:2) Tu vose tua tonda ku pangela Yehova na ndzili yetu yose. Vavengi vali na ku vueza ku cipanga cavo ca ku ambulula. Vamo va lavelela ku pua vapioneiro. Vakuavo va tonda ku ka pangela ha Mbetele ni ku kuasa ku vipanga via ku tunga vindzivo via lukungulukilo. Vamuanetu vavengi va li na ku lihakela kapandi ka ku pua vakua ku kuasa vipanga na vakuluntu. (1 Tim. 3:1, 8) Mua vusunga Yehova ue ku ivua ndzolela ya kama, mue ku mona eci cimbembesi ca ku lihana ci ve ku muesa vantu veni!—Visa. 110:3; Isaya 6:8.

2. Vati tu hasa ku livua ku mutima nga ka tua puisilemo vimo vizango vietu via mu lutsilielo?

² Vunoni nga mu nima ya ntsimbu ya kama, vimo vizango vietu via mu lutsilielo kasi ku lipuisamo kuahi, tu hasa ku uila mu vusiua. Ni tu hasa ku ivua vusiua nga miaka cipue visoti vikuavo vili na ku tu honouesa ku tambula vimo viteli. (Visi. 13:12) Eci cikeco citanga ca ndumbuetu Melissa. * Ua tonda ku ka pangela ha Mbetele ni ku hita mu sikola ya Vakua ku Ambulula Vuangana, vunoni miaka yeni ya tuvakana. Ivene ngueni: “Kuli yange, vivezikiso viaco via salela lika honi mu visinganieka. Eci ce ku nji vuisa vusiua vintsimbu vimo.”

3. Vinanga vika va na pande ku puisamo vamo linga va tambule vimo viteli?

³ Vamo vamuanetu va vakuendze kaha vakua cihindu ca cili, va hasa ku tondeka ku hia mu lutsilielo na ku muesa vimo vifua vikuavo linga va hase ku puisamo ku tambula vimo viteli. Ca ku muenako, vamo va kala na mitue ya ku sokoloka kaha va pua mpundu vakua ku lihana, vunoni halumo ve ku tondeka ku pangela  ha vifua ngeci mua lukakatela, ku pua vakua ku puisamo vuino viuma na ku muesa kasingimiko. Ngeci mukemuo, nga mu tuala mana ku ku pangela ha vifua via mu lutsilielo via tondeka, viteli vi ka mi uana ha ntsimbu ka mua vi lavelelele. Halakanenu muzimbu ua Nick. Mua puisile miaka 20, ua vuile vusiua vua kama omo lia ku hona ku mu hangula ku pua mukua ku kuasa vipanga. Ivene ngueni: “Nja livuile nguange kuli vimo vili na ku nji imika.” Vunoni muanetu Nick, ka likelele ku lihakela kapandi. Ngeci ua lihakelele kapandi ka ku tualelelaho ku puisamo vuino viteli via kele navio. Lelo lino, ua pua umo ua vakuluntu va Mbetele.

4. Vika tu simutuila mu cilongesa cino?

⁴ Vuno muli mu vusiua muomu ka mua puisilemo cimo cizango ca mu lutsilielo ni? Nga mukemuo, lekenuko Yehova visoti vienu. (Visa. 37:5-7) Cikuavo naua, vundilenu vinguli kuli vamuanetu va ku-hia linga va mi kuase ku vueza ku cipanga cenu kuli Yehova, kaha lihakelenu kapandi ka ku kava vimamuna viavo. Nga mu lingamo, citava halumo mu ka hasa vene ku kala na citeli ci mua lavelela ni ku puisamo cizango cenu ca mu lutsilielo. Vunoni ngeci mua ndumbuetu Melissa u tu na tumbuile, halumo citeli ni cizango ci mua tonda ku puisamo mu lutsilielo, ka citava. Vati mua pande ku linga? Vati mu hasa ku niunga ndzolela yenu? Mu ku kumbulula evi vihula, cilongesa cino, ci handeka ha viuma vitatu. (1) Kuiko mua pande ku tondela ndzolela? (2) Vati mu hasa ku vueza ku ndzolela yenu? (3) Vizango via cifua cika mu hasa ku lihakela mu ku vueza ku ndzolela yenu?

5. Linga tu kale na ndzolela, tua pande ku tuala mana ku vika? (Ekelesiaste 6:9)

⁵ Ngue muya muesa Ekelesiaste 6:9, tu hasa ku uana ndzolela nga tu i tondela ku cihela kuya kala mpundu. (Tandenu.) Mukua ku tuala mana ku ‘vize vie ku mona na meso,’ ue ku viukilila na vize via ali navio. Vunoni muntu ue ku sunguiya vizango vieni, ue ku liveyela vize ka hasa ku kala navio. Vika tu lilongesaho? Linga tu yoye mu ndzolela, tua pande ku tuala mana kuli vize vi tuli navio ni vize vi tu hasa ku puisamo.

6. Cisimo cika tu hilula, kaha tu tuala mana ku vika?

⁶ Vuno citava mpundu ku viukilila na vize vi tua kala laza navio ni? Tu nehula ngoco, muomu via laza vie ku futula. Kaha muntu uose ue ku tondako via viha. Cikumbululo nguetu, citava. Tu hasa ku viukilila na vize vie ‘ku mona meso’ etu. Vati tu hasa lingamo? Tu hilulenu cisimo ca vitalentu, ca tele Yesu ku Mateo 25:14-30. Tu tuala mana ku vika cisimo caco ci tu longesa ku tuala ha ku uana ndzolela, kaha vene na ku viukilila cikuma na vize vi tuli navio.

7. Tenu cisimo ca vitalentu mu vuihi.

⁷ Mu cisimo caco, umo yala ua tondele kuya vungendzi. vunoni ntsimbu kanda a katuke, ua sanene vangamba veni na ku va sezela vimbongo via talentu linga va lingise mingoso. * Mu ku linga ua tantekeyele ha lengela mana a nkala ngamba yeni, umo ua mu hanene vitalentu vitanu, mukuavo vivali, kaha ua mu citatu, imo. Vangamba vavali va katete, va lihakelele kapandi kose mu ku linga mingoso yaco. Vunoni ngamba ua mu citatu nevi via lingile viahi, ua tumbikile ngoco vimbongo via mbala. Ngeci ivene mua hilukile, ua mu tundisile ha vipanga.

8. Omo lia vika ngamba ua katete ua hasele ku ivua ndzolela?

⁸ Ngamba ua katete, halumo ua vuile ndzolela omo lia civezikiso ca ku mu hana vitalentu vitanu kuli sukulueni. Muomu via puile vimbongo via vingi, kaha via muesele ngecize  sukulueni ua mu kulahelele cikuma! Amba co ngamba ua mu civali? Vuno ua vuile vusiua muomu ka tambuile vimbongo via vingi mu ku puisa hamo na ngamba ua katete ni?

9. Vika ka handekele Yesu ku tuala hali ngamba ua mu civali? (Mateo 25:22, 23)

⁹ Tandenu Mateo 25:22, 23. Yesu ka muesele ngecize ngamba ua mu civali, ua vuile vusiua na nkulundundu, muomu ua tambuile vitalentu vivali lika. Kaha ka muesele naua ngecize ngamba uaco ua liniengele ngueni: ‘Ange otu lika vene? Muli yange, muli mukuetu ua ku livanga, tu vose ndzili yetu imo! Ou muata nkuma ka nji hakele seho, ca cili nji ka sitike vimbongo vieni, na ku sekasiana viange.’

10. Vati ngamba ua mu civali ua lingile na vitalentu via tambuile?

¹⁰ Ngeci mua ngamba ua katete, ngamba ua mu civali neni ua lihakelele kapandi ka kama mu ku puisamo cipanga ca mu sikile sukulueni. Omo lia kapandi keni ua hasele ku vuezela vitalentu vivali hali vize vivali via tambuile. Ngeci ku fuitangana ceni va ci lunguisile cikuma. Sukulueni ka vuile lika ndzolela, vunoni ua kulahesele naua ku mu vueza viteli vikuavo.

11. Vati tu hasa ku vueza ku ndzolela yetu?

¹¹ Na vuno vene, tu hasa ku vueza ku ndzolela yetu mu ku lihaka na ndzili yose mu nkala cipanga ci va tu kundika mu vipanga via Yehova. Kalenu na “ntuima” mu cipanga ca ku ambulula kaha na mu vipanga via mu cikungulukilo. (Vili. 18:5; VaHe. 10:24, 25) Puenu na ku lihakela kapandi ka ku livuahesela vikumbululo vize vi kaniamesa, ku viuano. Tualenu mana ku nkala mitamba ya vandongesi i mue ku tambula mu viuano via mu kati ka simano. Nga va na  mi vundila ku ka kuasa ku vimo viuma vitondeka mu cikungulukilo, kati mu kotokele kaha vi lingenu vuino. Kati mu mone na umo mutamba uahi u mue ku tambula ku pua ua seho ya indende. Lihakelenu kapandi ka ku vueza ku vutongue vuenu. (Visi. 22:29) Omo mu vueza ku ku fuitangana cenu mu vipanga via Yehova, mu ka kola vuasi mu lutsilielo kaha na ndzolela yenu i ka livuezelela cikuma. (Ngal. 6:4) Cikuavo naua, ci ka mi puila ca casi ku viukilila na vakuenu nga va tambula citeli ci mua tondele nenu.—Loma 12:15; Ngal. 5:26.

12. Vinanga vika va puisilemo vamo Vakaleho vavali linga va vueze ku ndzolela yavo?

¹² Kasi mu ci vuluka ndumbuetu Melissa, uze ua tondele ku ka pangela ku Mbetele ni ku hita ku Sikola ya Vakua ku Ambulula Vuangana ni? Vutuhu ka puisilemo evi vizango vieni, vunoni ivene ngueni: “Nje ku lihakela kapandi ka ku linga cose mu vipanga via vu vupioneiro na ku seteka ku ambulula mu vifua viose. Evi via nji nehela ndzolela ya kama.” Mu vuluka naua muanetu Nick, uze ua vuile vusiua, muomu ka va mu hanguile mu ku pua mukua ku kuasa vipanga ni? Vati ua lingile? Ivene ngueni: “Nja lihakelele kapandi ka ku tuala mana ku vivezikiso vi nja kele laza navio, ngeci mua ku ambulula na ku hana vikumbululo via cili ku viuano. Kaha nja lisonekesele ku ka pangela ku Mbetele, ngeci va nji tavele ku muaka ua hateleko vene.”

13. Vika vi hasa ku izamo nga mu tuala mana ku vipanga vi muli navio mu ntsimbu ino? (Ekelesiaste 2:24)

¹³ Vuno nga mu tuala mana ku cipanga ci muli naco mu ntsimbu ino, citava mu ka tambule viteli vikuavo ku lutue ni? Eyo citava, vikevio via solokelele muanetu Nick. Vunoni ambe nga ka via lipuisilemo, kasi ndzolela yenu i ka livuezelela omo lia ku tuala mana ku vize vi mu hasa ku puisamo, ngeci mua ndumbuetu Melissa. (Tandenu Ekelesiaste 2:24.) Cikuavo naua, mu kevua ndzolela ya kama, mu ku tantekeya ngecize kapandi ka mue ku lihakela ke kuya Sukuluenu Yesu Kilistu ku mutima.

14. Ku tuala ha vizango vietu mu lutsilielo, vika tua pande ku vuluka ntsimbu yose?

¹⁴ Vuno ku tuala mana ku vipanga vi tuli navio mu ntsimbu ino, ca lomboloka ngecize ka tua pandele ku tonda vinjila vieka via ku vuezelamo vipanga vietu kuli Yehova ni? Na limo litangua liahi. Vunoni tua pande ku lihakela vizango via mu lutsilielo vize vi tu kuasa ku tualelelaho kuya ku lutue mu ku vueza ku vipanga via ku ambulula na ku kuasa vamuanetu. Vizango vietu via mu lutsilielo vie ku lipuisamo nga tu tuala mana ku ku pangela vakuetu, kati etu vavene.—Visi. 11:2; Vili. 20:35.

15. Vizango vika via mu lutsilielo vi hasa ku mi kuasa ku vueza ku ndzolela yenu?

¹⁵ Vizango vika mu hasa ku lihakela? Vundilenu kuli Yehova a mi kuase ku nongonona vizango vize vi mu hasa ku puisamo kuliya na vuhasi vuenu. (Visi. 16:3; Tia. 1:5) Setekenu ku lihakela vizango vi va na tumbula mu  cinanga ca katete ca cino cilongesa, ngeci mua ku pua pioneiro ua ku kuasa, pioneiro ua ntsimbu yose, ku ka pangela ku Mbetele, ni mu vipanga via ku tunga. Ni mu hasa ku lihakela kapandi ka ku lilongesa lilimi lieka linga mu vueze ku cipanga cenu ca ku ambulula ni vene ku ka ambulula ku cihela ca lilimi lieka. Mu hasa ku tantekeya mizimbu ikuavo ku tuala hali evi vizango mu kapitulu 10 ka livulu Organizados, ni mu ku handeka na vakuluntu va mu cikungulukilo cenu. * Omo mu lihakela kapandi ka ku puisamo evi vizango, ku kola cenu mu  lutsilielo ci ka lisolola kuli vakuenu, kaha na ndzolela yenu i ka livuezelela.

16. Nga kuli cimo cizango ka muesi na ku hasa ku puisamo, vati mu hasa ku linga?

¹⁶ Vati co nga ka muesi na ku hasa ku puisamo vimo vizango vi tu na tumbula helu? Lihungu, lia kala ha ku tonda cizango ceka cize ci mu hasa ku puisamo kuliya na vuhasi vuenu. Tu hilulenu ha vimueso vi na hatako.

17. Kuliya na 1 Timoteo 4:13, 15, vati umo muanetu a hasa ku lihakela kapandi ka ku pua mulongisi ua cili?

¹⁷ Tandenu 1 Timoteo 4:13, 15. Nga mua pua muanetu ua ku mbatiza, mu hasa ku lihakela kapandi ka ku vueza ku vutongue vuenu vua ku handeka na ku longesa. Omo lia vika? Muomu ku lihaka mu vutuntu vuenu ku ku tanda, ku handeka na ku longesa, ci ka kuasa cikuma vaze va mi halakana. Setekenu ku lihakela kapandi ka ku longesa na ku pangesa vilongesa viose vi va tumbula mu mukanda Vuezenu ku Vutongue vua ku Tanda na ku Longesa. Puenu na ku pangela ha nkala cilongesa ca mu mukanda uaco, cimo ku cimo. Lihakelenu kapandi ka ku hitulukamo vuino ku ndzivo, kaha na ka ku pangesa vi va longesa mu cilongesa caco nga muli na mutamba. Vundilenu vukuasi vua mukuluntu mukua ku mamuna ni nkala vakuluntu veka vaze ve ku lihakela kapandi “mu ku longesa.” * (1 Tim. 5:17) Kaha kati mu tuale lika mana ku ku puisamo cilongesa ci va tumbula mu mukanda, vunoni na ku kuasa vakua ku mi halakana va kaniamese lutsilielo luavo, ni va kale na cizango ca ku lingako mumo. Nga mu lingamo, mu ka vueza ku ndzolela yenu na ku ndzolela yavo.

18. Vika vi hasa ku tu kuasa ku puisamo vizango vietu mu lihia?

¹⁸ Tu vose tua kala na cipanga ca ku ambulula  na ku puisa vantu vandongesi. (Mat. 28:19, 20; Loma 10:14) Vuno mu tonda ku vueza ku vutongue vuenu mu cipanga eci ca seho ya kama ni? Omo mu lihakela kapandi ka ku lilongesa na ku puisamo vilongesa via kala mu mukanda ku longesa, lihakelenu vizango mpundu vi mu tonda ku puisamo. Mu hasa ku uana vukuasi vukuavo mu ku kava vimamuna vie ku tuhuka mu Muono Uetu Vakua Kilistu na Vipanga Vietu—Mukanda ua Viuano, kaha na vivideo via vimueso vi ve ku lekesa ku viuano via mu kati ka simano. Setekenu vinjila via ku liseza-seza linga mu uaneho ize i mi kuasa vuino. Nga mu lihakela kapandi ka ku kava evi vimamuna, mu ka pua Mukua Kilistu ua kala na vutongue mu ku ambulula na mu ku longesa, kaha eci ci ka mi vuisa ndzolela ya kama.—2 Tim. 4:5.

19. Vati mu hasa ku pangela ha vifua via Vukua Kilistu?

¹⁹ Omo mu hilula ha vizango vi mu tonda ku lihakela, kati mu suveho cimo ca vizango via seho ya kama, ni nguetu ku pangela ha vifua via Vukua Kilistu. (Ngal. 5:22, 23; Kolo. 3:12; 2 Pet. 1:5-8) Vati mu hasa ku lingamo? Ca ku muenako, aci singaniekenu nga mu tonda ku pangela ha cimo cifua ca lutsilielo. Mu hasa ku tanda vimpande vie ku tuhuka mu mikanda yetu, via muesa vati mua ku kaniamesela lutsilielo. Cikuavo naua, ku tala mitamba ya mu JW Broadcasting^® ize ya muesa vati vamuanetu na vandumbuetu ve ku lihakela kapandi ka ku muesa lutsilielo, nga vali na ku hita mu vieseko, ci hasa ku mi kuasa. Kaha hilulenu mu vinjila vika mu hasa ku tambuluisa lutsilielo luavo.

20. Vati tu hasa ku vueza ku ndzolela yetu na ku tepulula ku vusiua?

²⁰ Mua vusunga, tu vose tue ku ivua cizango ca ku linga via vingi mu vipanga via Yehova ku tuvakana vi tuli na ku panga mu ntsimbu ino. Mu mavu a aha tu ka hasa ku pangela Yehova na ndzili yetu yose. Vunoni mu ntsimbu ino, tu lihakelenu kapandi ka ku pangesa vuino nkala vukovelelo vu tu solokela mu vipanga via Yehova linga tu vueze ku ndzolela yetu na ku tepulula ku ivua vusiua mu ku singanieka ha viuma ka tue ku hasa ku puisamo. Kaha helu lia viose evi, tu ka hana vumpahu na ku sangaziala kuli Yehova ‘Njambi yetu ua ndzolela.’ (1 Tim. 1:11) Ngeci mukemuo tu puenu na ku uana ndzolela mu vivezikiso vi tua kala laza navio!