1. ¿Tlen kichiuaj miakej tokniuan para okachi kitekichiuiliskej Jehová?

 AYAKMO miak poliui uan yitlamis nochi tlen amo kuali (Mat. 24:14, TNM; Luc. 10:2; 1 Ped. 5:2). Tinochtin tiknekij okachi tiktekichiuiliskej Jehová. Miakej ijkon kichiuaj. Sekimej yomokuayejyekojkej mochiuaskej precursores. Oksekimej kineki tlapaleuitiuij Betel noso kinekij tlapaleuiskej kanin kinchijchiuaj kalmej kanin kiueyichiuaskej Jehová. Uan miakej mochijchikauaj porque kinekij yetoskej siervos ministeriales uan tlayekankej (1 Tim. 3:1, 8). Jehová yolpaki porque kita itekipanojkauan kitekichiuiliaj ika nochi inyolo (Sal. 110:3; Is. 6:8).

2. ¿Ken timomachiliaj tla amo ueli tikchiuaj tlen otimokuayejyekojkej para okachi tiktekichiuiliskej Jehová?

² Xamo timoyolkokouaj porque youejka uan ayamo ueli tikchiuaj tlen otimokuayejyekojkej. Noso xamo yitikpiaj miak xiuitl noso techpanoua okseki tlamantli, ik non, amo tiuelij okachi titlapaleuiaj itech ialtepe Jehová (Prov. 13:12). Ijkon okipanouaya se tokni tlen itoka Melissa, * ye okinekiaya tlapaleuiti Betel noso yas kanin kinmachtiaj para ma tetlapouikan iTekiuajkayo toTajtsin Dios. Ye okijto: “Ne yinikpia miak xiuitl, ik non, ayakmo uelis ompa nias uan ualeua nimoyolkokoua”.

3. ¿Tlen moneki kichiuaskej sekimej para okachi kitekichiuiliskej Jehová?

³ Sekimej amo kipiaj miak xiuitl uan chikauakej pero para uelis tlapaleuiskej itech ialtepe Jehová achto moneki okachi chikauak kipiaskej intlaneltokilis uan kipiaskej innemilis ijkon ken Jehová kineki. Xamo ixtlamatkej,  noijki san niman kichiuaj tlen moneki uan yolpakij pero xamo moneki kimatiskej mochiaskej, moneki kuali kichiuaskej tlen kinmiluiaj noso moneki tetlakaitaskej. Tla mochijchikauaj kipiaskej kuali innemilis, xamo kinmiluiskej okachi ma tlapaleuikan itech tlanechikol. Ma tikitakan tlen okipanok Nick. Ijkuak okipiaya 20 xiuitl omoyolkoko porque amo okiluijkej ma tlapaleui ken siervo ministerial, ye okijto: “Onimokuayejyeko itlaj amo kuali onikchijtoka”. Pero amo omosotla, otlapaleui kanin omonechikouaya uan kuali otetlapouiaya. Axkan tlapaleuia iuan tokniuan tlen tlayekanaj itech se kali Betel.

4. ¿Tlen timomachtiskej?

⁴ ¿Timoyolkokouaj porque ayamo ueli okachi tiktekichiuiliaj Jehová ijkon ken otimokuayejyekouayaj? Tla ijkon techpanotok, ma tikiluikan Jehová ken timomachiliaj (Sal. 37:5-7). Ma timotlapouikan iuan tokniuan tlen kipiaj chikauak intlaneltokilis para ma techiluikan tlen uelis okachi kuali tikchiuaskej uan ijkon ma tikchiuakan. Tla ijkon tikchiuaj, xamo uelis okachi tiktekichiuiliskej Jehová ijkon ken otimokuayejyekojkej. Pero ¿tla amo tiueliskej porque techpanotok ijkon ken Melissa? ¿Ken uelis tiyolpakiskej? Nin tlamachtil kijtoua eyi tlamantli tlen techpaleuis. Tikitaskej (1) ¿Tlen techpaleuis ma tiyolpakikan? (2) ¿Tlen uelis tikchiuaskej uan ijkon okachi tiyolpakiskej? uan (3) ma timokuayejyekokan tlen tikchiuaskej para okachi tiyolpakiskej.

5. ¿Tlen moneki timokuayejyekoskej tla tiknekij tiyolpakiskej? (Eclesiastés 6:9).

⁵ Tla tiknekij tiyolpakiskej moneki tikchiuaskej tlen kijtoua Eclesiastés 6:9 (xiktlajtolti). Akin kipatioita ‘tlen kipiaʼ yolpaki san ika tlen kipia. Pero akin ‘kitemojtinemi tlen kinekiʼ nochipa san kinektos tlen amo uelis kipias. Non techmachtia tla tiknekij tiyolpakiskej, ma timokuayejyekokan tlen tikpiaj uan tlen uelis tikchiuaskej uan amo tlen amo uelis tikpiaskej nion tlen amo uelis tikchiuaskej.

6. ¿Tlen tikitaskej uan tlen timomachtiskej?

⁶ Tinochtin techpaktia tikchiuaskej itlaj tlen amo keman otikchijtokaj pero ¿uelis tiyolpakiskej ika tlen yitikpiaj? Kema uelis tiyolpakiskej. Para tikmatiskej ken uelis tikchiuaskej, timomachtiskej tlen Jesús okijto itech Mateo 25:14-30. Tikitaskej tlen uelis tikchiuaskej para tiyolpakiskej uan noijki ijkuak titlajyouiaj.

7. Xikijto tlen okijto Jesús.

⁷ Jesús okijto se tlakatl uejka yaskia. Pero ijkuak ayamo oyaya okinnotski itlakeualuan uan sejse okinmakak talentos para ika ma tekipanokan. Tlakatl okimatiaya sekimej uelis okachi kichiuaskiaj uan oksekimej amo, ik non, se itlakeual okimakak makuili talentos, okse okimakak ome uan okse okimakak se. Tlen achto ome itlakeualuan sapanoua otekipanojkej uan okachi okimiaktilijkej tomin tlen okinmakak inteko. Pero tlen okse itlakeual amitlaj okichi ika se talento tlen okimakak, ik non, ye okilui ayakmo yetoskia itlakeual.

8. ¿Tleka uelis yolpakiskia tlen achto itlakeual tlakatl?

⁸ Tlen achto tlakeuali tlen okimakakej  makuili talentos xamo sapanoua oyolpakik. Miak tomin okimakakej uan non okiteititi iteko okineltokaya non tlakeuali kuali tekipanoskia. Tlen okse itlakeual uelis moyolkokoskia porque amo okimakakej miak talentos. Pero ¿tlen okichi?

9. ¿Tlen amo okijto Jesús itech okse tlakeuali? (Mateo 25:22, 23).

⁹ (Xiktlajtolti Mateo 25:22, 23). Jesús amo okijto tlen okse tlakeuali okualanki porque iteko san okimakak ome talentos. Ye amo okijto non tlakeuali omokuayejyeko: “¿Tleka noteko amo onechmakak miak? Ne noijki nikmati nitekipanos ijkon ken akin okimakak makuili talentos. Tla noteko mokuayejyekoua amo nikmati nitekipanos, niktlatis ome talentos tlen onechmakak uan nikchiuas noteki”.

10. ¿Tlen okichi okse itlakeual tlakatl tlen okimakak talentos?

¹⁰ Tlen okse itlakeual tlakatl okichi ken okse itlakeual, kuali otekipano ijkon ken okilui iteko. Uan okitlanki ome talentos. Iteko sapanoua oyolpakik, ik non, okimakak okachi tekitl.

11. ¿Tlen uelis tikchiuaskej uan ijkon okachi tiyolpakiskej?

¹¹ Tejuan noijki uelis tiyolpakiskej tla timochijchikauaj okachi tiktekichiuiliskej Jehová. Okachi ma titetlapouikan uan nochipa ma tikueyichiuakan Jehová iuan tokniuan tlen inmiuan timonechikouaj (Hech. 18:5; Heb. 10:24, 25). Kuali ma timoyektlalikan uan ijkon ijkuak timonechikoskej kuali titlanankiliskej uan tikinyolchikauaskej tokniuan. Tla techiluiaj  tlajko semana titlamachtiskej kuali ma timoyektlalikan. Noijki tla techiluiaj ma titlapaleuikan itech tlanechikol, ma tiajsiti hora tlen otimokajkej uan ma tikchiuakan tlen techiluiaj. Amo ma timokuayejyekokan tlen tikchiuaskej itech tlanechikol amo ipati uan amo moneki timochijchikauaskej. Okachi kuali ma tikchiuakan ken moneki (Proverbios 22:29). Tla timochijchikauaj tiktekichiuiliskej Jehová okachi kuali iuan timouikaskej uan tiyolpakiskej (Gál. 6:4). Noijki tiyolpakiskej iuan oksekimej tokniuan ijkuak tikinmitaskej tlapaleuijtokej ijkon ken tejuan tiknekiskiaj (Rom. 12:15; Gál. 5:26).

12. ¿Tlen okichijkej Melissa uan Nick para okachi yolpakiskej?

¹² Melissa tlen itech yotimotlapouijkej itech párrafo 2, ye okinekiaya tlapaleuiti Betel noso yas kanin kinmachtiaj para ma tetlapouikan iTekiuajkayo toTajtsin Dios. Maski amo ueli ijkon okichi, ye okijto: “Nimochijchikaua nitetlapouis, niyetos precursora uan tlatlamantli nitetlapouia, non yonechpaleui ma niyolpaki”. ¿Tlen okichi Nick tlen itech yotimotlapouijkej itech párrafo 3 ijkuak amo okiluijkej ma tlapaleui ken siervo ministerial? Ye okijto: “Onimokuayejyeko tlen kema uelis nikchiuaskia, nitetlapouis, nitlanankilis ijkuak timonechikouaj. Noijki oniktemiti se solicitud para nitlapaleuiti Betel, opanok se xiuitl uan onechyolejkej”.

13. ¿Tlen panos tla timochijchikauaj okachi titlapaleuiskej? (Eclesiastés 2:24).

¹³ Tla timochijchikauaj, ¿kijtosneki satepan techiluiskej okachi ma titlapaleuikan? Xamo kema. Uelis techpanos ijkon ken Nick. Pero tla techpanoua ken Melissa, noijki tiyolpakiskej porque tiktekichiuilijtokej Jehová (xiktlajtolti Eclesiastés 2:24). Noijki tiyolpakiskej porque tikmatij nochi tlen tikchijtokej kiyolpaktia Toteko, Jesucristo.

14. ¿Tlen moneki tikilnamiktoskej tla tiknekij okachi tiktekichiuiliskej Jehová?

¹⁴ Tla timochijchikajtokej tiktekichiuilijtokej Jehová, ¿kijtosneki ayakmo uelis okachi tiktekichiuiliskej? Amo. Moneki timokuayejyekoskej tlen okseki tlamantli uelis tikchiuaskej para okachi kuali titetlapouiskej, titlamachtiskej uan tikinpaleuiskej tokniuan. Uelis ijkon tikchiuaskej tla timochijchikauaj tikinpaleuiskej oksekimej (Prov. 11:2; Hech. 20:35).

15. ¿Tlen uelis timokuayejyekoskej tikchiuaskej para okachi tiyolpakiskej?

¹⁵ ¿Tlen uelis timokuayejyekoskej tikchiuaskej para okachi tiktekichiuiliskej Jehová? Ma tikiluikan Jehová ma techpaleui ma tikitakan tlen uelis tikchiuaskej (Prov. 16:3; Sant. 1:5). ¿Uelis timokuayejyekoskej tikchiuaskej tlen otimomachtijkej itech  párrafo 1? ¿Uelis timochiuaskej precursores auxiliares noso regulares? ¿Uelis titlapaleuitiuij Betel noso kanin kinchijchiuaj kalmej para timonechikoskej? ¿Uelis timomachtiskej se tlajtoli para tikintlapouiskej oksekimej? ¿Uelis tiaskej kanin moneki ma motetlapoui? Tla tiknekij tikmatiskej ken uelis tikchiuaskej non, ma tikitakan capítulo 10 itech amochtli Organizados para hacer la voluntad de Jehová uan ma timotlapouikan  iuan tlayekankej. * Ijkuak tikchiuaskej tlen otimokuayejyekojkej, okachi tiyolpakiskej uan oksekimej kitaskej ken timochijchikauaj okachi tiktechiuiliaj Jehová.

16. ¿Tlen uelis tikchiuaskej tla axkan amo tiuelij okachi tiktekichiuiliaj Jehová?

¹⁶ ¿Tla axkan amo tiuelij okachi tiktekichiuiliaj Jehová? Ma timokuayejyekokan tlen kema uelis tikchiuaskej. Ma timokuayejyekokan tikchiuaskej tlen nikan ijkuilitok.

17. Ijkon ken kijtoua 1 Timoteo 4:13, 15, ¿tlen uelis kichiuas se tokni para okachi kuali tlamachtis?

¹⁷ (Xiktlajtolti 1 Timoteo 4:13, 15). Tla tejuatsin yotimoapolakti, uelis okachi kuali titlamachtis ijkuak timonechikoua iuan tokniuan. Porque tla okachi kuali titlamachtia teixpan uan kuali tiktlajtoltia revista Akin Tetlapouijtok, okachi tikinpaleuis tokniuan. Okachi ximomachti uan xikchiua tlen kijtoua amatlajkuilol Ximoyektlali uan okachi kuali titlamachtis. Ximomachti sejse tlamachtil, achto kuali ximoyektlali mokalijtik uan ijkuak teixpan titlamachtis xikchiua tlen otimomachti itech non amatlajkuilol. Xikilui consejero auxiliar * ma mitspaleui noso oksekimej tlayekankej tlen “kitematiltiah iwa kitemachtiah itlajtol Dios” (1 Tim. 5:17). Amo san xikchiua tlen kijtoua amatlajkuilol, noijki xikinpaleui tokniuan okachi ma tlaneltokakan itech Jehová uan xikinpaleui ma kichiuakan  tlen momachtiaj. Ijkon okachi tiyolpakis ijkuak titlamachtis, uan tokniuan tlen inmiuan timonechikouaj noijki yolpakiskej.

18. ¿Tlen techpaleuis okachi kuali ma titetlapouikan uan ma titlamachtikan?

¹⁸ Nochtin akinmej tikchiuaj ken Cristo moneki titetlapouiskej uan tikinpaleuiskej oksekimej ma mochiuakan imachtijkauan (Mat. 28:19, 20, TNM; Rom. 10:14). ¿Techpaktiskia okachi kuali tikchiuaskej non tekitl? Tla ijkon tiknekij tikchiuaskej, ma timomachtikan amatlajkuilol Kuali titlamachtis uan ma timokuayejyekokan ken uelis tikchiuaskej tlen ompa kijtoua. Noijki techpaleuis tlen kijtoua Toteki akinmej tikchiuaj ken Cristo uan videos tlen mopanoltiaj tlajko semana tlen techmachtiaj ken uelis tikchiuaskej kanin titetlapouiaj. Noijki ma tikchiuakan tlen ompa tikitaj uan ma tikitakan tlen techpaleuis okachi kuali ma titetlapouikan uan ma titlamachtikan. Tla ijkon tikchiuaj tiyolpakiskej (2 Tim. 4:5).

19. ¿Tlen techpaleuis ma tikpiakan tonemilis ijkon ken Jehová kineki?

¹⁹ Ma tikilnamikikan noijki moneki tikpiaskej tonemilis ijkon ken Jehová kineki (Gál. 5:22, 23; Col. 3:12; 2 Ped. 1:5-8). ¿Ken uelis tikchiuaskej? Ma tikijtokan okachi tiknekij titlaneltokaskej itech Jehová, ik non, moneki tikintlajtoltiskej amatlajkuilolmej tlen itech non techtlapouiaj. Noijki uelis tikitaskej JW Broadcasting^® kanin kiteititia ken sekimej tokniuan okachi otlaneltokakej itech Jehová ijkuak okachi otlajyouijkej uan ma timokuayejyekokan ken uelis tikchiuaskej ijkon ken yejuan.

20. ¿Tlen uelis tikchiuaskej para okachi tiyolpakiskej uan amo timoyolkokoskej?

²⁰ Tinochtin techpaktiskia okachi tiktekichiuiliskej Jehová. Ijkuak tiyetoskej itech xochitlali, ijkuakon okachi uelis tiktekichiuiliskej. Pero tla axkan tikitaj uelis okachi tiktekichiuiliskej tiyolpakiskej uan amo timoyolkokoskej. Uan okachi miak ipati: tikueyichiuaskej Jehová akin nochipa yolpaki (1 Tim. 1:11, TNM). Ik non, ma tiyolpakikan ika tlen uelis tikchiuaskej para tiktekichiuiliskej Jehová.