OSHITOPOLWA SHOKUKONAKONWA 33
Nyanyukilwa shoka to vulu okulongela Jehova
“Okuligamena nomeho oku vule okweendagula kuuhalu.” — OMUUV. 6:9.
EIMBILO 111 Otu na omatompelo gokukala twa nyanyukwa
ELALAKANO LYOSHITOPOLWA *
1. Oyendji otaya ningi shike, opo ya longele Jehova pakuudha?
SHO ehulilo tali ende tali hedha popepi, osho ngaa niilonga yetu tayi ende tayi ningi oyindji. (Mat. 24:14; Luk. 10:2; 1 Pet. 5:2) Atuheni otwa hala okulongela Jehova pakuudha. Oyendji otaya tamununa mo uukalele wawo. Yamwe oya hala okuninga aakokolindjila. Yo yalwe oya hala oku ka longa koBetel nenge miilonga yokutunga. Yo aamwatate oyendji otaya lalakanene okuninga aayakuligongalo nenge aakuluntugongalo. (1 Tim. 3:1, 8) Jehova oku na okukala a nyanyukwa shili sho e wete aalongeli ye ya hala okulonga oshindji miilonga ye. — Eps. 110:3; Jes. 6:8.
2. Otashi vulika tu kale tu uvite ngiini, ngele itatu vulu okulonga iilonga yontumba mehangano lyaJehova?
2 Ngele opwa piti ethimbo ele unene inaatu adha omalalakano ngoka twi itulila po miilonga yaJehova, otashi vulika tu kale twa teka omukumo. Otashi vulika wo tu teke omukumo ngele itatu vulu okulonga iilonga yontumba mehangano lyaJehova, omolwuukokele nenge molwoonkalo dhilwe. (Omayel. 13:12) Shoka osho sha li sha ningilwa omumwameme Melissa. * Okwa kala a hala a ka longele koBetel nenge a ye kOsikola yAauvithi yUukwaniilwa, ihe ota ti: “Molwaashoka omimvo dhandje odha pitilila, itandi vulu okupewa uuthembahenda mboka. Ohandi kala nda teka omukumo omathimbo gamwe omolwoshinima shoka.”
3. Oshike yamwe taya vulu okuninga, opo ya kale ya gwana okupewa iinakugwanithwa ya gwedhwa po?
3 Aagundjuka yamwe oye na uukolele, ihe otashi vulika ya pumbwa natango okukoka nokukokeka omaukwatya ngoka tage ya kwathele ya kale ya gwana okupewa iinakugwanithwa ya gwedhwa po. Pashiholelwa, yamwe otashi vulika ye na uunongo, ye shi okuninga omatokolo noye na ehalo lyokulonga, ihe otashi vulika ya pumbwa natango okwiilonga okukala ye na eidhidhimiko, haya longo nuukeka nohaya simaneke yalwe. Ngele owa longo nuudhiginini wu kokeke omaukwatya ngoka wa pumbwa, oto ki iyadha wa pewa oshinakugwanithwa shontumba inoo shi tegelela. Natu taleni koshimoniwa shomumwatate Nick. Sho a li e na omimvo 20, okwa li u uvu nayi noonkondo sho inaa langekwa po e li omuyakuligongalo. Okwa ti: “Onda li ndu uvite nda fa ndi na epuko lya sha.” Nonando ongawo, Nick ina sholola. Okwa kala ha longo nuudhiginini megongalo nomuukalele. Ngashingeyi oku li oshilyo shOkomitiye yOshitayimbelewa.
4. Oshike tatu ka kundathana moshitopolwa shika?
4 Mbela owa teka omukumo, molwaashoka inoo adha natango elalakano lyontumba miilonga yaJehova? Ngele osho, lombwela Jehova megalikano nkene wu uvite. (Eps. 37:5-7) Pula wo ooitaali mboka ya pyokoka pambepo ye ku pe omayele wu mone mpoka wa pumbwa okuhwepopala, e to kambadhala okutula miilonga omayele gawo. Ngele owe shi ningi, mokweendela ko kwethimbo oto ki iyadha wa pewa oshinakugwanithwa shoka wa kala wa hala nenge wu adhe elalakano lyoye. Ihe ngaashi twe shi mono moshiholelwa shaMelissa ngoka a popiwa metetekelo, otashi vulika pu kale omangambeko ngoka tage ku imbi wu longele Jehova momukalo moka wa kala wa hala. Oshike nduno to vulu okuninga, opo kuu kanithe enyanyu lyoye? Opo tu mone eyamukulo kepulo ndyoka, moshitopolwa shika otatu kundathana (1) shoka tashi vulu oku ku etela enyanyu, (2) shoka to vulu okuninga wu kale wa nyanyukwa shi vulithe nale (3) omalalakano ngoka to vulu okwiitulila po wu kale wa nyanyukwa.
SHOKA TASHI VULU OKU KU ETELA ENYANYU
5. Oshike twa pumbwa okugandja eitulomo kusho, opo tu kale twa nyanyukwa? (Omuuvithi 6:9)
5 Omuuvithi 6:9 okwe tu yelithila kutya oshike tashi vulu oku tu kwathela tu kale twa nyanyukwa. (Lesha.) Enyolo ndyoka olya ti kutya omuntu ngoka e hole “okuligamena nomeho” oha nyanyukilwa shoka e na. Mepingathano naashono, omuntu ngoka he endagulithwa kuuhalu iha gwanenwa kusha. Oohapu ndhika otadhi tu longo shike? Opo tu kale twa nyanyukwa, otwa pumbwa okugandja eitulomo kwaashoka tatu vulu okuninga, pehala lyokulalakanena iinima mbyoka itaatu vulu okuninga.
6. Eyele lini tatu ka tala kulyo, noshike tatu ki ilonga mulyo?
6 Mbela otatu vulu ngaa shili okunyanyukilwa shoka tatu vulu okuninga? Aantu oyendji oyi itaala kutya itashi vulika, oshoka ohatu kala aluhe twa hala okwiilonga iinima iipe. Ihe otatu vulu okukala hatu nyanyukilwa iinima mbyoka tatu vulu okuninga ngashingeyi. Ngiini mbela? Opo tu moneni eyamukulo, natu ka taleni keyele lyaJesus lyiitalenti nenge lyiimaliwa, ndyoka tali adhika muMateus 25:14-30. Otatu ka tala kutya oshike tatu ilongo mo, opo tu kale twa nyanyukwa nonkene tatu vulu okumona enyanyu olindji mwaashoka tatu vulu okuninga ngashingeyi.
NKENE TO VULU OKUKALA WA NYANYUKWA SHI VULITHE NALE
7. Ngonga paufupi eyele lyaJesus lyiimaliwa.
7 Omulumentu gwomeyele lyaJesus okwa li e li pokuya molweendo. Manga inaa ya, okwi ithana aapiya ye, e te ya pe iitalenti nenge iimaliwa yokungeshefa. * Omulumentu ngoka okwa li e shi kutya omupiya kehe oku na uunkulungu wi ili, onkene okwa pe omupiya gwotango iimaliwa omayuvi gatano, omutiyali okwe mu pe omayuvi gaali nomutitatu eyuvi limwe. Omupiya gwotango nomutiyali oya longo nuudhiginini, opo ya likolithe mwene gwawo iimaliwa oyindji. Ihe omupiya omutitatu oshimaliwa shoka a li a thigilwa ine shi longitha sha, onkene mwene gwe sho e ya okwe mu tidha po puye.
8. Omolwashike omupiya gwotango ngoka a popiwa e na okukala a li a nyanyukwa?
8 Omupiya gwotango okwa li e na okukala a nyanyukwa sho mwene gwe e mu inekelele iitalenti itano nenge iimaliwa omayuvi gatano. Mbyoka iimaliwa oyindji noonkondo nosha li tashi ulike nkene mwene gwe e mu inekela lela. Ongiini kombinga yomupiya omutiyali? Okwa li ta vulu okukala a teka omukumo sho inaa pewa iimaliwa oyindji ngaashi mbyoka ya pewa omupiya gwotango. Ihe okwa li a ningi po shike?
Oshike tatu ilongo komupiya omutiyali ngoka a popiwa meyele lyaJesus? (1) Okwa pewa iimaliwa omayuvi gaali kumwene gwe. (2) Okwa longo nuudhiginini a likolithe mwene gwe iimaliwa oyindji. (3) Okwe yi likolitha iimaliwa omayuvi gane. (Tala okatendo 9-11)
9. Oshike shoka omupiya omutiyali inaa ninga? (Mateus 25:22, 23)
9 Lesha Mateus 25:22, 23. Jesus ina tya kutya omupiya omutiyali okwa li u uvu nayi nenge a geya, molwaashoka owala a pewa iimaliwa omayuvi gaali. Jesus ina popya wo kutya omupiya ngoka okwa li ta nyenyeta, ta ti: ‘Omolwashike mwene gwandje a pe ndje owala iimaliwa yi thike mpaka? Nangame ohandi longo owala nuudhiginini nda fa mukwetu. Nani ngele mwene gwandje ina pandula iilonga yandje, otandi ka fumvika iimaliwa mbika a pa ndje e tandi ki ilongela mwene, pehala lyoku mu longela.’
10. Omupiya omutiyali okwa ningi shike niimaliwa mbyoka a li i inekelelwa?
10 Ngaashi owala omupiya gwotango, omupiya omutiyali okwa li a tala ko oshinakugwanithwa shoka i inekelelwa kumwene gwe sha simana, nokwa longo nuudhiginini. Omayovi gaali ngoka a li a pewa okwe ga likolitha iimaliwa omayuvi gane. Mwene gwe okwa li e mu pe ondjambi, omolwiilonga ye yuudhiginini. Mwene gwe ine mu pandula owala, ihe okwe mu pe wo iinakugwanithwa ya gwedhwa po.
11. Oshike to vulu okuninga wu kale wa nyanyukwa shi vulithe nale?
11 Sha faathana, natse otatu vulu okukala twa nyanyukwa noonkondo ngele otwa kala hatu longo nuudhiginini mukehe shoka tatu longele Jehova. Natu kale twi “ipyakidhila ethimbo alihe” miilonga yokuuvitha, e tatu kala hatu longo nuudhiginini megongalo. (Iil. 18:5; Heb. 10:24, 25) Kala ho ilongekidhile nawa okugongala, opo wu ka gandje omayamukulo taga tungu. Kala wa tala ko iipopiwa mbyoka ho pewa pokugongala kwomokati koshiwike ya simana. Ngele owa pulwa wu ninge sha megongalo, kala ho shi ningi pethimbo nokuulika kutya owu shi okwiinekelwa. Ino kala wa dhina iinakugwanithwa mbyoka to pewa e to kala inoo yi ilongekidhila nawa nonethimbo. Kala ho ningi oonkambadhala wu hwepopale moshilonga kehe to pewa. (Omayel. 22:29) Ngele owa kala to gandja eitulomo kiinakugwanithwa mbyoka wu na ngashingeyi, otashi ke ku kwathela wu hume komeho nowu kale wa nyanyukwa shi vulithe nale. (Gal. 6:4) Otashi ka kala wo oshipu kungoye wu kale wa nyanyukwa uuna gumwe a pewa oshinakugwanithwa shoka wa li wa hala. — Rom. 12:15; Gal. 5:26.
12. Melissa naNick oya li ya ningi po shike, opo ya kale ya nyanyukwa shi vulithe nale?
12 Oto dhimbulukwa omumwameme Melissa, ngoka a li a hala oku ka longa koBetel nenge a ye kOsikola yAauvithi yUukwaniilwa? Nonando ita vulu okuya koBetel nenge kosikola ndjoka, okwa ti: “Ohandi kambadhala okulonga nuudhiginini ndi li omukokolindjila nohandi ningi ngaashi tandi vulu ndi uvithe wo momikalo dhilwe. Shoka oshe etela ndje enyanyu olindji noonkondo.” Mbela omumwatate Nick okwa li a ningi po shike sho inaa langekwa po e li omuyakuligongalo ngaashi a li a tegelela? Okwa ti: “Onda kala tandi gandja eitulomo kwaashoka nda li tandi vulu okuninga, ngaashi okuuvitha nokugandja omayamukulo taga tungu pokugongala. Onda tula mo wo eindilo ndi ye koBetel, nomumvo gwa ka landula ko onda taambwa.”
13. Oshizemo otashi ka kala shini ngele owa kala ho longo nuudhiginini miinakugwanithwa mbyoka wu na ngashingeyi? (Omuuvithi 2:24)
13 Ngele nangoye owa longo nuudhiginini miinakugwanithwa mbyoka wu na ngashingeyi, mbela oto ka pewa iinakugwanithwa ya gwedhwa po mokweendela ko kwethimbo? Nangoye otashi vulika wu yi pewe, ngaashi sha li sha ningilwa omumwatate Nick. Ihe nonando owu kale inoo yi pewa, oto vulu okukala wa nyanyukwa shi vulithe nale nokukala wu uvitile ombili shoka to vulu okulongela Jehova, ngaashi omumwameme Melissa. (Lesha Omuuvithi 2:24.) Shimwe ishewe, oto ka kala wa nyanyukwa sho wu shi kutya Omuwa gwetu, Jesus Kristus, okwa pandula oonkambadhala ndhoka to ningi.
OMALALAKANO NGOKA TAGA VULU OKU TU ETELA ENYANYU
14. Oshike tu na okudhimbulukwa ngele tashi ya komalalakano ngoka tatu vulu okwiitulila po miilonga yaJehova?
14 Mbela okukala tatu gandja eitulomo kiinakugwanithwa mbyoka tu na ngashingeyi, osha hala okutya katu na okukala tatu ipula nokulonga oshindji miilonga yaJehova? Hasho! Otatu vulu okwiitulila po omalalakano galwe ngoka taga vulu oku tu kwathela tu kale aauvithi naalongi yonkundana ombwanawa ya pyokoka notu kwathele wo ooitaali ooyakwetu. Omalalakano ngoka otatu vulu oku ga adha ngele otwa kala twi ishonopeka, e tatu gandja eitulomo kokukwathela yalwe pehala yokugandja eitulomo kutse yene. — Omayel. 11:2; Iil. 20:35.
15. Omalalakano geni taga vulu oku ku kwathela wu kale wa nyanyukwa shi vulithe nale?
15 Omalalakano geni to vulu okwiitulila po? Pula Jehova e ku kwathele wu mone kutya omalalakano geni to vulu okwiitulila po ngoka to vulu okwaadha. (Omayel. 16:3; Jak. 1:5) Mbela ito vulu okwiitulila po limwe lyomomalalakano ngoka ga popiwa mokatendo kotango, ngaashi uukwathelikokolindjila, uukokolindjila wondjigilile, oku ka longa koBetel nenge miilonga yokutunga? Otashi vulika wo wi ilonge elaka lilwe, opo wu ku uvithile koshitopolwa hoka ku na ompumbwe. Oto vulu okwiilonga oshindji kombinga yomalalakano ngoka, mokulesha ontopolwa 10 yembo Organized to Do Jehovah’s Will, nosho wo mokupopya naakuluntugongalo yomegongalo lyeni. * Ngele owa longo nuudhiginini wu adhe omalalakano ngoka, ehumokomeho lyoye otali ka kala lyi iwetikile noto ka kala wa nyanyukwa shi vulithe nale.
16. Oshike to vulu okuninga po ngele ito vulu okwaadha elalakano lyontumba?
16 Oshike nduno to vulu okuninga po ngele ito vulu okwaadha omalalakano ngoka ga popiwa metetekelo? Oto vulu okwiitulila po lilwe ndyoka to vulu okwaadha. Natu ka taleni koonkalo dhimwe ndhoka tashi vulika dhi holoke po.
Omalalakano gamwe geni to vulu okwiitulila po?(Tala okatendo 17) *
17. Shi ikolelela kuTimoteus gwotango 4:13, 15, oshike omumwatate ta vulu okuninga, opo a kale omupopi omuwanawa?
17 Lesha 1 Timoteus 4:13, 15. Ngele owu li omumwatate a ninginithwa, oto vulu okulonga nuudhiginini wu hwepopaleke omukalo gwoye gwokugandja iipopiwa nokulonga aantu. Omolwashike wu na oku shi ninga? Oshoka ngele owa kala ho longo ‘wi itula mo’ wu kale omuleshi, omuuvithi nomupopi omuwanawa, otashi ka kwathela mboka taye ku pulakene. Kambadhala okwiitulila po elalakano lyokukonakona nokutula miilonga iitsa mbyoka yi li mokambo Longitha ethimbo lyoye mokulesha nosho wo mokulonga aantu. Kala ho konakona oshitsa shimwe poshikando, to shi idheulile nawa megumbo, e to kambadhala okutula miilonga shoka wi ilonga uuna to gandja iipopiwa. Oto vulu wo okupula omaetopo komugandjimayele omutiyali nenge kaakuluntugongalo yalwe mboka haya longo nuudhiginini “mokuuvitha nomokulonga aantu.” * (1 Tim. 5:17) Ino gandja owala eitulomo kunkene wu na okutula miilonga iitsa mbyoka yi li mokambo, ihe kwathela wo aapulakeni yoye ya koleke eitaalo lyawo noya tule miilonga shoka tayi ilongo. Okuninga ngawo otaku ke ku etela enyanyu, noto ka nyanyudha wo yalwe.
Omalalakano gamwe geni to vulu okwiitulila po?(Tala okatendo 18) *
18. Oshike tashi vulu oku tu kwathela tu hwepopaleke uunkulungu wetu muukalele?
18 Atuheni otu na oshinakugwanithwa shokuuvitha noshokuninga aantu aalongwa. (Mat. 28:19, 20; Rom. 10:14) Mbela ino hala wu hwepopaleke uunkulungu woye wokuuvitha nowokulonga aantu? Oto vulu okwiitulila po elalakano lyokukonakona nokutula miilonga iitsa mbyoka yi li mokambo, Okulesha nosho wo okulonga aantu. Oto vulu wo okumona omaetopo galwe mOkafo kOnkalamwenyo yopaKriste niilonga yetu yokuuvitha nomuuvidio wiiholelwa yoonkundathana mboka hawu ulikwa pokugongala kwomokati koshiwike. Kambadhala okutula miilonga omaetopo ga yoolokathana, opo wu mone ndyoka hali pondola unene. Ngele owa tula miilonga omaetopo ngoka, otashi ke ku kwathela wu kale omulongi nenge omuuvithi onkulungu, naashoka otashi ke ku etela enyanyu olindji. — 2 Tim. 4:5.
Omalalakano gamwe geni to vulu okwiitulila po?(Tala okatendo 19) *
19. Oshike tashi vulu oku ku kwathela wu kokeke omaukwatya gopaKriste?
19 Limwe lyomomalalakano ga simanenena tatu vulu okwiitulila po, okukokeka omaukwatya gopaKriste. (Gal. 5:22, 23; Kol. 3:12; 2 Pet. 1:5-8) Oshike to vulu okuninga wu li adhe? Natu tye ando owa hala okukala wu na eitaalo lya kola. Oto ka ninga po shike? Oto vulu wu leshe iitopolwa miileshomwa yetu mbyoka yi na omaetopo omawanawa gankene tatu vulu okukoleka eitaalo lyetu. Oto vulu wo okutala iitopolwa yopolohalama yotiivii JW® moka hamu kala iiholelwa iiwanawa yaamwatate naamwameme mboka yu ulike eitaalo lya kola sho taya piti moonkalo oondhigu, e to tala kunkene to vulu okuholela eitaalo lyawo.
20. Oshike tatu vulu okuninga, opo tu kale twa nyanyukwa nokaatu kale unene twa teka omukumo?
20 Odhoshili kutya atuheni otwa halelela okulonga oshindji miilonga yaJehova. Muuyuni uupe, otatu ka vula oku mu longela oshindji shi vulithe pwaashoka tatu vulu okuninga ngashingeyi. Ihe manga twa tegelela uuyuni mboka, otwa pumbwa okuninga ngaashi tatu vulu ngashingeyi, shoka tashi ke tu kwathela tu kale twa nyanyukwa nokaatu kale twa teka omukumo unene. Shoka sha simanenena, otatu ka simanekitha nokuhambelela Jehova, ‘Kalunga ketu omunyanyukwi.’ (NW) (1 Tim. 1:11) Onkee ano, natu nyanyukilwe iinakugwanithwa mbyoka tu na ngashingeyi.
EIMBILO 82 “Uuyelele weni nau yele”
^ okat. 5 Otu hole Jehova noonkondo notwa hala okuninga ngaashi tatu vulu tu mu longele. Shoka osho hashi tu inyengitha tu kale aluhe twa hala okulonga oshindji muukalele nenge tu lalakanene iinakugwanithwa ya gwedhwa po megongalo. Ihe mbela oshike tatu vulu okuninga, ngele otwa kala inaatu adha omalalakano ngoka twi itulila po, nonando otwa kala tatu longo nuudhiginini? Oshike tashi vulu oku tu kwathela, opo tu kale twi ipyakidhila miilonga yaJehova notu kale twa nyanyukwa? Eyamukulo otatu ke li mona meyele lyiimaliwa ndyoka Jesus a gandja.
^ okat. 2 Omadhina gamwe oga lundululwa.
^ okat. 7 UUTUMBULILO WA YELITHWA: Oshitalenti shimwe oshi thike piimaliwa mbyoka omuniilonga a li ha futwa muule womimvo 20.
^ okat. 15 Aamwatate mboka ya ninginithwa otaya ladhipikwa ya lalakanene uuyakuligongalo nenge uukuluntugongalo. Opo wu tseye iitegelelwa mbyoka gumwe e na okugwanitha po, opo a kale a gwana okulangekwa po e li omuyakuligongalo nenge omukuluntugongalo, tala ontopolwa 5 no 6 yembo Organized to Do Jehovah’s Will.
^ okat. 17 UUTUMBULILO WA YELITHWA: Omugandjimayele omutiyali oye omukuluntugongalo ngoka a tulwa po, a gandje omayele kaakuluntugongalo nokaayakuligongalo. Ohe ya pe omayele ge na ko nasha niipopiwa mbyoka haya gandja pokugongala.
^ okat. 64 ETHANO: Omumwatate ta ningi omapekapeko miileshomwa yetu, opo a adhe elalakano lye lyokukala omupopi omuwanawa.
^ okat. 66 ETHANO: Konima sho omumwameme i itulile po elalakano lyokukala ha gandja uunzapo wontukuluka, ta gandja okakalata kokufala aantu kepandja lyetu lyokointaneta kwaangoka e mu yakula.
^ okat. 68 ETHANO: Omumwameme ngoka i itulila po elalakano lyokukokeka omaukwatya gopaKriste, ta pe omumwameme gulwe omagano.
