1. Mɔkanɔ mɛ azi gba ndo kpã ti nɛngɔ ya ani li kwa gba hɛ̃ Yehova nɛ?

 E NA kwa gba ti lingɔ na ndangba bi mɛ e da. (Mat. 24:14; Lk. 10:2; 1 Pet. 5:2) Wa e ye lingɔ zu mɛ elengbi ti lingɔ na ya kwa tɛ Yehova. Azi gba ndo li ya, kwa mɛ ala ndo li amai. Ambanga ni ndo ye lingɔ kwa mabere awa sungɔ lége. Ambanga ni ndo ye lingɔ kwa ka Bɛtɛlɛ, bere ka ndo ti kĩngɔ ada ti Lo-lengɔ Gbia. Ayata gba ndo li zu ti nɛngɔ ya, ani kokisa masengami wa ani ti awa zangɔ na kwa bere abiazi. (1 Tim. 3:1, 8) Yehova ndo sepala mawoma na ngoi mɛ lo ndo hũ azi gba ndo ye lingɔ kwa hɛ̃ lo!​—Nz. 110:3; Yis. 6:8.

2. Elengbi ti mangɔ tɛrɛ e ngasia, se du ya, ta e kokisa mɔkanɔ kɔi na ya kwa mɛ e ndo li hɛ̃ Yehova ma nɛ?

² Kanda elengbi ti nzɛ̃ngɔ du se ya, na pɛ ngoi ta e ndo lua kumba mɛ e kpã mɔkanɔ na lo ni ma. Elengbi nga ti nzɛ̃ngɔ se du ya, bulu mɛ e na ni bere akpale ti ya dungɔ lɛ ngɛ̃ tɛ e, ta azi lége hɛ̃ e ya, e lua kumba kɔi ngaso ma. (Mas. 13:12) E mu lɛlo tɛ Melissa. * Lo ndó na gwɛ̃ ti lingɔ kwa ka Bɛtɛlɛ, bere lingɔ Kalasi tɛ awa fangɔ tɛnɛ ti Lo-lengɔ Gbia, kanda lo tɛnɛ ya: “Bulu tɛ mbi aɔ bulu mɛndó akpã na lo tɛ azi mɛ alengbi ti lingɔ ni. Na olo ko, mɔkanɔ niko ati bo mabere suma gɛgɛrɛ ge tɛ mbi. Na ya ngoi niko ko, mbi mandó nzɛ̃ngɔ.”

3. Ye mɛ ayɔ ya, azi mɛndɛ̃ ali uzu ti nɛngɔ ya, ala lua kumba kɔi ngaso na ya kwa tɛ Yehova nɛ?

³ Ambage ni adu apalanga, ala nga na sãte ti nzɔ̃ni, kanda ayɔ ya, ala mai na nyingɔ wa ala ti nga aseliye ti nzɔ̃ni uzu ti nɛngɔ ya, ala lua kumba kɔi ngaso mɛ. Na ndakisa ambɛge ni gba ando du awa kɔdɛ, ala ndo mu ekateli iɔ, ala ndo linga kwa mɛ ando hɛ̃ la, kanda ayɔ ya, ala manda dungɔ na yɔngɔrɔ bɛ, lingɔ  kwa na seni bere tɔndɔngɔ azi mɛndɛ̃. Se ala li ge ge ge ti nɛngɔ ya, ala ti na aseliye ni ko, zangangɔ kitɛ ala na luangɔ kumba na ngoi mɛ ta ala ndo da na bɛ la ma. E ba kpale mɛndó asi na Nick. Ngoi mɛndó lo na bulu 20 ko, lo tindó na nzɛ̃ngɔ na lo mɛ ya, ta pɔnandó lo ya, lo ti wa zangɔ na kwa ma. Lo tɛnɛ ya, “Mbi hũndó ya, ta kpale ti ya dungɔ lɛ ngɛ̃́ tɛ mbi ndo ɔ na seni ma.” Kanda ta Nick zɛ̃ndó ma. Lo kpãndó lɛ lo na ndo kwa mɛ lo lengbi ti lingɔ hɛ̃ Yehova. Ndɛ lo mɛ ko, lo ndo li kwa ka Kɔmite ti filialɛ.

4. Aye mɛ ndɛ e na mandangɔ nɛ?

⁴ Mɔ ti na nzɛ̃ngɔ na lo mɛ ya, ta mɔ kokisa ambanga mikano tɛ mɔ ti lingɔ kwa hɛ̃ Yehova ma? Se du ngaso ko, li sambela hɛ̃ Yehova na lo ni, kambisa hɛ̃ lo se mɛ mɔ ndo ma na tɛrɛ mɔ. (Nz. 37:5-7) Hãngɔ ni zingɔ, hũnda ayata mɛ ala kpengbani na ya nyingɔ ya, ala za mɔ ya, mɔ hĩnga se mɛ mɔ lengbi ti lɛkɛngɔ na kwa tɛ mɔ, wa li nga kpengbani ya, mɔ salela awangɔ tɛ la. Se mɔ li niko, ni na zangɔ mɔ ya, mɔ lua kumba ge ya bombi, mɔ nga na kokisangɔ mɔkanɔ tɛ mɔ. Kanda nga ma tɛ Melissa, ngoi mɛndɛ̃ ta mɔ lengbi ti kokisangɔ mikanɔ mɛndɛ̃ mɛ mɔ na ni na olo ma. Se adu ngaso, ngasia la mɔ lengbi ti batangɔ dengɔ bɛ tɛ mɔ nɛ? Ti nɛngɔ ya, e hɛ̃ gbinya na ndo hũnda niko, e na bangɔ ndɛ akpale mɛ: ti (1) ndo mɛ mɔ lengbi ti luangɔ na dengɔ bɛ, ti (2) se mɛ mɔ lengbi ti lingɔ ya, dengɔ bɛ tɛ mɔ ati gba, wa ti (3) mikanɔ mɛ ndo li ya, dengɔ bɛ tɛ e ati gba.

5. Na bangɔ Mosakoli 6:9, ti nɛngɔ ya, e du na dengɔ bɛ, ye mɛ elengbi ti kpãngɔ lɛ e na ndo ni nɛ?

⁵ Nga ma se mɛ Mosakoli 6:9, atɛnɛ na ni, elengbi ti luangɔ dengɔ bɛ se du ya, e gi ni ka ndo mɛ nzɔ̃ni. (Di.) Zo ko la ndo sepala na “aye mɛ lɛ [lo] ndo hũ” ko, bɛ lo ndo de na aye mɛ lo na ni, na bangɔ kpale ti ya dungɔ lɛ ngɛ̃́ tɛ lo ti na olo. Na ɔngbingɔ, zo ko la ndo nɔ nɔ ndali aye mɛ lo na gwɛ̃ ni ko, lo na ngbãngɔ bo lá kwɛ kũngɔ aye mɛ ta lo na luangɔ ni ma. Wangɔ mɛ elengbi ti luangɔ nɛ? Elengbi ti luangɔ dengɔ bɛ se du ya, e ndo kpã bo bɛ e na ndo aye mɛ e na ni, nga na ndo mɔkanɔ mɛ elengbi ti kokisangɔ ni.

6. Tɛnɛ tɛ Yezo mɛ e na mandangɔ ni nɛ, wa wangɔ mɛ e na luangɔ na ndoni nɛ?

⁶ Alengbi ti dungɔ biani ya, zo sepala bo na aye mɛ lo na ni? Azi gba ndo da bɛ la ya, ta alengbi ti lingɔ tɛrɛ lo ma, na lo mɛ ya e ndo e du na gwɛ̃ ti hĩngangɔ nga na lingɔ aye ti fãnani. Kanda ni lengbi ti lingɔ tɛrɛ lo. Elengbi ti luangɔ dengɔ bɛ na ye mɛ “lɛ [e] ndo hũ” kanda ta bo yengɔ aye mɛ e na ni ma. Elengbi ti lingɔ ngasia? Zia e ba ndakisa ti talata mɛ Yezo tɛnɛ tɛnɛ ni kaya Matie 25:14-30. Ni na hangɔ e ndenge mɛ elengbi ti sepalangɔ na aye ti nzɔ̃ni mɛ e ndo li na ya kwa tɛ Yehova nga na se mɛ e li ti nɛngɔ ya, e ti na dengɔ bɛ gba.

7. Kambisa na ndunu ndakisa ti talata mɛndó Yezo hɛ̃.

⁷ So ya ndakisa mɛ, kɔli kɔi aga gwe fãna. Uzu ti lo gwengɔ ko, lo ili awa kwa tɛ lo, lo hɛ̃ zo na zo talata ti nɛngɔ ya, lo dɛ na buze. * Lo hɛ̃ zo na zo na bangɔ makoki tɛ lo, lo hɛ̃ zo ti uzu talata kũ, zo ti sɛ talata sɛ, wa zo ti taa talata kɔi. Awa kwa sɛ ti uzu ali kwa kpengbani ti nɛngɔ ya, ala lua falanga gba na lo tɛ gbia tɛ la. Kanda ta lo ko ti taa alindó ye kɔi na falanga mɛ a hɛ̃ lo ma. Wa gbia tɛ lo hãndó lo ka lɛ kwa ni.

8. Nda mɛ wa kwa ti uzu mɛ kaya ndakisa tɛ Yezo, alengbindó ti dungɔ na dengɔ bɛ nɛ?

⁸ Wa kwa ti uzu a mandó dengɔ bɛ nvɛ̃ni na  lo mɛ ya, gbia tɛ lo a hɛ̃ndó lo talata kũ. Ni dundó kota falanga nvɛ̃ni, ni fandó ya, gbia tɛ lo ndo kpãndó bɛ lo na ndo lo gba. Wa wa kwa ti sɛ amandó tɛrɛ lo ngasia? Lo lengbindó ti nzɛ̃ngɔ na lo mɛ ya, ta lo luandó talata gba nga ma tɛ lo ko ti uzu ma. Kanda ye mɛndó lo li nɛ?

9. Na bangɔ Matie 25:22, 23, ye mɛ ta Yezo tɛnɛ ya wa kwa ti sɛ alindó ma nɛ?

⁹ Di Matie 25:22, 23. Ta Yezo tɛnɛndó ya, wa kwa ti sɛ a mandó ngɔnzɔ̃ na lo mɛ ya, lo luandó talata sɛ ma. Ta Yezo tɛnɛ ngandó ya, lo dɛmandó tɛrɛ lo wa lo tɛnɛ ya: ‘Nda mɛ lo hɛ̃ mbi yakere ngaso nɛ? Mbi nga na ngunu mabere wa kwa ko la alua talata kũ! Se ta gbia tɛ mbi ndo hũ ya, mbi du nzɔ̃ wa kwa ma ko, ngoi mɛndɛ̃ na dungɔ nzɔ̃ni ya, mbi gɛ̃ du, mbi hɔ na falanga tɛ lo, wa mbi li kwa tɛ mbi nvɛ̃ni.’

10. Ye mɛ wa kwa ti sɛ ali na talata mɛndó a hɛ̃ lo nɛ?

¹⁰ Nga ma wa kwa ko ti uzu, ta wa kwa ti sɛ amundó kwa tɛ lo na wele ma, lo lindó kwa kpengbani hɛ̃ gbia tɛ lo. Ni la, lo bakisandó talata mɛndɛ̃ sɛ na ndo talata mɛndó gbia tɛ lo hɛ̃ lo. Gbia tɛ lo hɛ̃ndó lo mbana gɛrɛ na lo ti kpengba kwa mɛndó lo li. Ta gbia tɛ lo sepala bondó na lo ma, lo hũ ngandó ya, lo du nzɔ̃ wa kwa mɛ lo lengbi ti luangɔ akumba gba!

11. Ye mɛ elengbi ti lingɔ ti nɛngɔ ya, e ti na dengɔ bɛ gba nɛ?

¹¹ Ni nga ngaso na lo tɛ e, elengbi ti dungɔ na dengɔ bɛ gba se du ya, e kpã bɛ e na ndo kwa zu mɛ a hɛ̃ e ya e li hɛ̃ Yehova, abɛse kwa ni adu ngasia. Mu “ngoi [gba]” mɔ li na kwa ti fangɔ tɛnɛ, wa ndo hɛ̃ nga ti mɔ na ya kwa ti ya bombi. (Aw. 18:5; Aeb. 10:24, 25) Bongisa bombi nzɔ̃ni ti nɛngɔ ya, mɔ hɛ̃ agbinya mɛ alengbi  ti sangɔ ngunu bɛ ayata. Se a hɛ̃ mɔ devoir kaya bombi ko, lɛkɛ ni nzɔ̃ni nvɛ̃ni. Se a hɛ̃ nga mɔ kumba kɔi kaya bombi ko, li ni iɔ na landangɔ ngoi mɛ a hɛ̃ mɔ, fa nga ya, mɔ du zo mɛ alengbi ti kpãngɔ bɛ na ndo lo. Ta mɔ tɛnɛ ya, kwa mɛ a hɛ̃ mɔ, ta ni na valɛrɛ gba ma, wa ta tina ti mɔ hongɔ tɛrɛ mɔ na lo ni da ma. Li kpengbani ya, mɔ li kwa zu mɛ ahɛ̃ mɔ na seni. (Mas. 22:29) Se mɔ hɛ̃ tɛrɛ mɔ gba na ya kwa ti nyingɔ nga na kumba mɛ ando hɛ̃ mɔ ko, mɔ na maingɔ iɔ, wa mɔ nga na tingɔ na dengɔ bɛ gba. (Gal. 6:4) Na dungɔ woni ya, mɔ sepala ndoni kɔi na zo mɛndɛ̃ mɛ a lua kumba mɛ mɔ ndo du na gwɛ̃ ti lingɔ ni.​—Rom. 12:15; Gal. 5:26.

12. Ye mɛndó aza Melissa ná Nick ya, ala du na dengɔ bɛ gba nɛ?

¹² Mɔ ndo da bɛ mɔ na nyita wali Melissa mɛndó lo na gwɛ̃ ti lingɔ kwa ka Bɛtɛlɛ bere gwengɔ Kalasi tɛ awa fangɔ tɛnɛ ti Lo-lengɔ Gbia? Abɛse ta lo lengbindó ti kokisangɔ mikano niko ma ko, lo tɛnɛ ya: “Mbi hɛ̃ndó tɛrɛ mbi zu na ya kwa tɛ mbi ti wa sungɔ lége, wa mbi salela ngandó se ti fangɔ tɛnɛ ndɛ̃ ndɛ̃ ndɛ̃. Ni hɛ̃ndó mbi dengɔ bɛ gba.” Wa ye mɛndó Nick li ti nɛngɔ ya lo nwɔ nzɛ̃ngɔ mɛndó lo na ni na lo mɛ ya, ta lo tindó wa zangɔ na kwa iɔ ma nɛ? Lo tɛnɛ ya, “Mbi kpã bondó lɛ mbi na ndo aye mɛ mbi lengbi ti lingɔ mabere fangɔ tɛnɛ nga na hɛ̃ngɔ agbinya ti nzɔ̃ni ka bombi. Mbi tondisa ngandó fɔrmilɛrɛ ti lingɔ kwa ka Bɛtɛlɛ, bulu kɔi so pɛ ni, a ilindó mbi.”

13. Na bangɔ Mosakoli 2:24 ye mɛ na lingɔ tɛrɛ lo se du ya, e ndo hɛ̃ tɛrɛ e zu na ndo kumba mɛ e na ni na olo nɛ?

¹³ Se du ya, e ndo hɛ̃ tɛrɛ e zu na ndo kumba mɛ e na ni na olo ko, afa ya, e na luangɔ bo akumba gba na bi mɛ na gangɔ? Ee, elengbi ti luangɔ. Ye mɛndó asi na Nick la. Wa se ta adu ngaso ma ko, mabere Melissa e na dungɔ na dengɔ bɛ gba na lo ti aye mɛ e ndo li hɛ̃ Yehova. (Di Mosakoli 2:24.) Mɔ nga na luangɔ dengɔ bɛ gba na lo mɛ ya, mɔ hĩnga ya, ge ge ge tɛ mɔ ando hɛ̃ Gbia tɛ e Yezo Kristo dengɔ bɛ.

14. Nda mɛ ta elengbi ti ziangɔ kpãngɔ mikanɔ ti nyingɔ ma nɛ?

¹⁴ Nga ma se mɛ e lo ti mandangɔ na ni, ayɔ ya, e kpã lɛ e na ndo kumba mɛ e na ni na olo. Ni fa ya, ta elengbi ti kpãngɔ mikanɔ mɛndɛ̃ na ya kwa tɛ Yehova ma? Ta seni la ma, elengbi ti kpãngɔ mikanɔ mɛ alengbi ti zangɔ e ya, e du kpengbani na ya kwa ti fangɔ tɛnɛ, wa e ti nga na songo gba na lo tɛ ayata kɔli na ayata wali. E na kokisangɔ mikanɔ tɛ e se du ya, na zungɔ na tɛrɛ nga na ndara zu, e kpã lɛ e na ndo lingɔ kwa hɛ̃ azi mɛndɛ̃, kanda ta bo na ndo gwɛ̃ tɛ nvɛ̃ni ma.​—Mas. 11:2; Aw. 20:35.

15. Mikanɔ mɛ alengbi ti hɛ̃ngɔ mɔ dengɔ bɛ nɛ?

¹⁵ Mikanɔ ti nyingɔ mɛ mɔ lengbi ti kpãngɔ nɛ? Yɔ ka ti Yehova ya, lo za mɔ, mɔ hĩnga mikanɔ mɛ mɔ lengbi ti kokisangɔ ni. (Mas. 16:3; Zk. 1:5) Mɔ lengbi ti kpãngɔ mɔkanɔ kɔi ka popo tɛ mikanɔ mɛ e tɛnɛ tɛnɛ ni kaya  paragrafɛ ti kɔi, mabere lingɔ kwa tɛ wa sungɔ lége ti ndunu ngoi bere ti ngoi zu, lingɔ kwa ka Bɛtɛlɛ, bere lingɔ kwa ti kĩngɔ da ti Lo-lengɔ Gbia? Bere mɔ lengbi ti mandangɔ yanga ti fãnani ti nɛngɔ ya, mɔ pa na nzɔ̃ pa hɛ̃ azi ti teritwarɛ tɛ mɔ bere ti kɔdɔrɔ mɛndɛ̃? Mɔ lengbi ti mandangɔ akpale gba mɛ aba ambanga mikanɔ na lége ti buku, Tobongisami mpo na kosala mɔkanɔ ya Yehova shapitrɛ ti 10, wa solola na abiazi ti ya bombi tɛ mɔ. * Se du ya, mɔ ndo landa bo mikanɔ tɛ mɔ ko, azi mɛndɛ̃ na hũngɔ ya, mɔ ndo mai na ya nyingɔ, wa mɔ nga na tingɔ na dengɔ bɛ gba.

16. Ye mɛ mɔ lengbi ti lingɔ se du ya, ta mɔ lengbi ti lingɔ akwa mɛ e tɛnɛ tɛnɛ ni so ya tɛnɛ mɛ ma nɛ?

 ¹⁶ Ye mɛ mɔ lengbi ti lingɔ se du ya, ta mɔ lengbi ti lingɔ akwa mɛ e tɛnɛ tɛnɛ ni so ya tɛnɛ mɛ ma nɛ? Sekele ni du ya, kpã mɔkanɔ mɛndɛ̃ mɛ mɔ lengbi ti kokisangɔ ni. Zia e ba ambanga mikanɔ ni.

17. Na bangɔ 1 Timɔte 4:13, 15, ye mɛ nyita kɔli kɔi lengbi ti lingɔ ti nɛngɔ ya, lo ti wa hangɔ tɛnɛ ti nzɔ̃ni nɛ?

¹⁷ Di 1 Timɔte 4:13, 15. Se mɔ du nyita kɔli mɛ mu batisimɔ ko, mɔ lengbi ti kpãngɔ mɔkanɔ ti tingɔ nzɔ̃ wa lingɔ diskur nga na nzɔ̃ wa hangɔ tɛnɛ. Nda mɛ ni du ngbondoni nɛ? Se mɔ “hɛ̃ tɛrɛ mɔ” na dingɔ mbeti, tɛnɛngɔ nga na hangɔ tɛnɛ nzɔ̃ni ko, mɔ na zangɔ azi mɛ ndo ma mɔ. Ni na dungɔ nzɔ̃ni ya, mɔ manda awangɔ mɛ kaya buku: Bongisá ndenge na yo ya kotánga mpe ya koteya. Manda wangɔ kɔi na mombimba, wa ndo tara lingɔ ni kaya da, kpã nga awangɔ ni na kwa na ngoi mɛ mɔ ndo li adevoir bere adiskur mɛ ahɛ̃ mɔ. Hũnda nga wa hɛ̃ngɔ wangɔ ti sɛ bere biazo kɔi mɛ “ndohɛ̃ tɛrɛ [lo] so lingɔ kwa ti pangɔ Nzɔ̃ Pa, nga ti hangɔ tɛnɛ” ya, lo za mɔ. * (1 Tim. 5:17) Ta mɔ du bo na mɔkanɔ ti hĩngangɔ nzɔ̃ni awangɔ ti ya buku niko ma, kanda du na mɔkanɔ ti sangɔ ngunu bɛ azi mɛ ndo ma mɔ ya, loyengɔ tɛ la ati kpengbani, wa ato nga la ya, akpã aye mɛ ala ndo ma na kwa. Ni na hɛ̃ngɔ mɔ dengɔ bɛ, wa ala na dungɔ nga na dengɔ bɛ ti mangɔ mɔ.

18. Ye mɛ elengbi ti lingɔ ti nɛngɔ ya, e ti azi mɛ ahĩnga kwa ti fangɔ tɛnɛ nzɔ̃ni nɛ?

¹⁸ E zu e lua kwa ti pangɔ nzɔ̃ pa nga na lingɔ ya, azi ti ava Yezo. (Mat. 28:19, 20; Rom. 10:14) Mɔ na yengɔ lingɔ zu ti nɛngɔ ya, mɔ ti na makoki gba na ya kwa niko ti ngbondoni? Na  lo ni ko, manda wa kpã nga na kwa aye mɛ kaya nyi buku Koteya. Mɔ nga na luangɔ ambanga akpale mɛndɛ̃ kaya Mokanda ya likita bomoi mpe mosala ya bakristo nga kaya avideo mɛ ndo fa se ti bandangɔ na tɛnɛ na azi kaya kwa ti fangɔ tɛnɛ. Tara akɔdɛ ndɛ̃ ndɛ̃ ndɛ̃ wa ba omɛ mɔ hũ ya ni nzɔ̃ni. Se mɔ kpã akɔdɛ ndɛ̃ ndɛ̃ ndɛ̃ mɛ ando si kaya ambeti tɛ e na kwa ko, mɔ na hĩngangɔ lingɔ kwa ti fangɔ tɛnɛ nzɔ̃ni, ni na hɛ̃ngɔ mɔ dengɔ bɛ gba.​—2 Tim. 4:5.

19. Ye mɛ mɔ lengbi ti lingɔ ti nɛngɔ ya, mɔ ti na seliye tɛ awakristo nɛ?

¹⁹ Ta bɛ mɔ a li na ni ma ya, mɔkanɔ kɔi mɛ adu ngbondoni sĩ mɛ mɔ lengbi ti kpãngɔ ni adu gingɔ tingɔ na aseliye mɛ ando de na bɛ Nzapa. (Gal. 5:22, 23; Kɔl. 3:12; 2 Pet. 1:5-8) Ye mɛ mɔ lengbi ti lingɔ ti nɛngɔ ya, mɔ kokisa mɔkanɔ niko nɛ? E mu ya, mɔ ye tingɔ na loyengɔ ti kpengbani. Mɔ lengbi ti dingɔ ambeti tɛ e mɛ ando kambisa akpale mɛ alengbi ti zangɔ mɔ ya loyengɔ tɛ mɔ ati kpengbani. Mɔ lengbi nga ti bangɔ aemisiɔ̃ ti TV JW mɛ ando afa se mɛ ayata kɔli ná ayata wali afandó loyengɔ ti kpengbani na ngoi mɛndó ala tengbi na tara. Wa binga li mɔ na ndo se mɛ mɔ lengbi ti landangɔ na se lɛlo ti loyengɔ tɛ la.

20. Ye mɛ elengbi ti lingɔ ti nɛngɔ ya, e du na dengɔ bɛ gba, wa ta e ti na nzɛ̃ngɔ ma nɛ?

²⁰ Ta kitɛ da ma, ndɛ lo mɛ ko, e zu, e ndo ye lingɔ zu na lo tɛ Yehova. Kaya gigi ti fãnani, e zu e na lingɔ kwa gba hɛ̃ lo. Uzu ti nɛngɔ ya ngoi niko alengbi ko, zia ya, e hɛ̃ tɛrɛ e na lingɔ kwa zu mɛ e na luangɔ abɛse ni du ngasia, ni na lingɔ ya, e du na dengɔ bɛ gba, wa ta e ti na seliye ti nzɛ̃ngɔ ma. O mɛ adu ngbondoni gba, adu ya, e ndo hɛ̃ Yehova “Nzapa ti dengɔ bɛ” gonda. (1 Tim. 1:11) Na lo ni ko, zia ya, e du na dengɔ bɛ na ya kwa mɛ e ndo li hɛ̃ Yehova!