1. Hadia manö nifaluada enaʼö tola tadouʼö wangai halöwö ba wamati?

 OYA sibai halöwö sinangea tafalua börö me no ahatö gamozua götö danö andre. (Mat. 24:14; Luk. 10:2; 1 Fe. 5:2) Börö daʼö, omasi ita tafalua wondrege zi sökhi ba wamosumange Yehowa. So ösa zomasi mangai halöwö tobali perintis, so göi zomasi mangai halöwö ba Mbetieli mazui ba halöwö famazökhi tomosa. Ato göi ndra talifusöda ira matua samorege enaʼö sinangea ira ba wangai halöwö tobali enoni mazui satua sokubaloi. (1 Ti. 3:1, 8) Tatu omuso sibai dödö Yehowa me iʼila wa terou sibai dödö nono mbanuania ba wangai halöwö khönia!​—Si. 110:3; Yes. 6:8.

2. Hadia nirasoida na so ösa gohitö dödöda ba wamati si tebai takhamö?

² Na lö takhamö gohitö dödöda ba wamati hewaʼae na no ara taforege wogamö yaʼia, tola manö afatö dödöda. Mazui, te göi ide-ide dödöda na so halöwö si tohude si lö tebeʼe khöda börö waʼalawa ndröfida mazui tanö böʼönia. (Amd. 13:12) Daʼö zalua khö Melissa. * Omasi sibai ia wangai halöwö ba Mbetieli mazui ba wefao ba Sekolah bagi Penginjil Kerajaan. Hizaʼi, imane Melissa, ”Börö me no alawa ndröfigu, lö tebeʼe khögu halöwö daʼö. Lua-luania, itaria urasoi waʼide-ide dödö.”

3. Hadia zinangea tafalua enaʼö tola tebeʼe khöda halöwö si tohude?

³ Fatua lö tebeʼe halöwö si tohude khö ndra talifusöda si bohou ebua ba sabölö, so ösa mbua-bua si sökhi sinangea laʼokhögö. Duma-dumania, te so ösa ba gotaluara zonekhe, salio-lio ba wangasiwai halöwö, ba sowölö-ölö. Hizaʼi, tola manö moguna nasa lafahaʼö ira ba wangoromaʼö faʼebolo dödö, ba wangosisiʼö halöwöra, hegöi ba wamosumange niha böʼö. Na  öforege ba wangokhögö bua-bua sinangea mudouʼö, tola manö tebeʼe khöu halöwö si tohude ba ginötö si lö ödöna-döna. Nehegö atö zi no irai alua khö Nick. Me 20 fakhe ndröfinia, afatö sibai dödönia börö me lö lafataro ia tobali enoni. Imane Nick, ”Urasoi wa so nasa zoʼamböta khögu.” Hewaʼae simanö, lö awuwu ia. Ifalua wondrege zi sökhi ba mbanua niha Keriso hegöi ba halöwö fanuriaigö. Iadaʼa, mangai halöwö ia tobali Panitia Cabang.

4. Hadia nitutunöda ba artikel daʼa?

⁴ Hadia ide-ide dödöu börö me so gohitö dödö ba wamati si lö nikhamöu nasa? Na daʼö nirasoimö, tutunö khö Yehowa nösi dödöu ba wangandrö. (Si. 37:5-7) Tola göi öʼandrö mene-mene khö ndra talifusöda saro ba wamati enaʼö öʼila hewisa lala ba wondrouʼö halöwöu khö Lowalangi, aefa daʼö forege ba woloʼö mene-mene nibeʼera. Na öfalua daʼö, tola ökhamö gohitö dödömö andrö. Hizaʼi simane Melissa si no mututunö moroi yawa, tola manö tebai ökhamö iadaʼa gohitö dödöu ba wamati. Na simanö, hewisa enaʼö lö tebulö örasoi waʼomuso dödö? Enaʼö tola ösöndra wanema linia, tatutunö dania ba artikel daʼa (1) hadia zangaʼasogö khöu faʼomuso dödö, (2) hewisa enaʼö itugu monönö waʼomuso dödöu, ba (3) hadia gohitö dödö si tola ötatugöi sangaʼasogö khöu faʼomuso dödö.

5. Enaʼö tarasoi waʼomuso dödö, hezo zinangeania taʼosambuaʼö dödöda? (Sangombakha 6:9)

⁵ Itutunö khöda Sangombakha 6:9 hadia zangaʼasogö khöda faʼomuso dödö. (Baso.) Niha sangosambuaʼö tödönia ba ”zi no so föna duduma hörönia”, omuso dödönia ba ngawalö zi no iʼokhögö hegöi si tola ifalua iadaʼa. Hizaʼi, niha solohi isö-isö dödönia samösa, lö isöndra waʼomuso dödö börö me itötöna ngawalö zi tebai iʼokhögö. Na simanö, hadia wamahaʼö si tola tahalö? Enaʼö tarasoi waʼomuso dödö, moguna taʼosambuaʼö dödöda ba ngawalö zi no taʼokhögö hegöi ohitö dödö ba wamati si tola takhamö.

6. Hadia duma-duma nitutunöda iadaʼa, ba hadia wamahaʼö nihalöda moroi ba daʼö?

⁶ Si toʼölönia, omasi ita tatandraigö wamahaʼö yaʼita ba wamalua halöwö si bohou. Na simanö, hadia sindruhu-ndruhu tola omuso dödöda ba halöwö si no taʼokhögö iadaʼa? Tatu manö. Tola taʼomusoiʼö dödöda ba ngawalö ’zi no so föna duduma höröda’. Hewisa wamaluada daʼö? Enaʼö tola tasöndra wanema linia, datatutunö duma-duma nibeʼe Yesu sanandrösa ba talenta si no tesura ba Mataiʼo 25:14-30. Tafahaʼö ita hewisa lala ba wangokhögö hegöi ba wondrouʼö faʼomuso dödöda, gofu hewisa zalua khöda iadaʼa.

7. Adogoiʼö wanutunö duma-duma nibeʼe Yesu sanandrösa ba talenta.

⁷ Ba duma-duma nibeʼe Yesu, so samösa ndra matua sedöna möi ba danö saröu. Fatua lö mofanö ia, ikaoni ndra sawuyunia ba ibeʼe khöra talenta enaʼö laʼogunaʼö daʼö ba waniaga. * Aboto ba dödö ndra matua andrö wa faböʼö-böʼö zi tola lafalua ira sawuyunia. Börö daʼö, ibeʼe lima talenta khö zawuyunia si oföna, dombua talenta khö zawuyunia si samösa, ba ibeʼe sambua talenta khö zawuyunia safuria. Owölö-ölö sibai zawuyu sanema lima talenta hegöi sanema dua talenta ba wamohare talenta andrö. Hizaʼi, lö ifalua hadia ia sawuyu sanema sambua talenta. Börö daʼö, ifofanö ia sokhö yaʼia.

8. Hadia mbörö wa omuso dödö zawuyu si oföna?

 ⁸ Tatu omuso sibai dödö zawuyu si oföna börö me tebeʼe khönia lima talenta. Oya sibai gefe nifaduhusi tödö khönia andrö. Daʼö zangoromaʼö wa ifaduhusi tödö sibai ia sokhö yaʼia! Hizaʼi, hewisa göi zawuyu sanema dombua talenta? Sindruhunia, tola manö ide-ide dödönia menaʼö börö me ha dombua talenta nifaduhusi tödö khönia, tenga simane awönia sawuyu sanema lima talenta. Hizaʼi, hadia nifaluania?

9. Hadia zi lö iwaʼö Yesu sanandrösa khö zawuyu si dua? (Mataiʼo 25:22, 23)

⁹ Baso Mataiʼo 25:22, 23. Lö iwaʼö Yesu wa abao dödö zawuyu si dua mazui mofönu ia börö me ha dombua talenta nitemania. Ba lö göi iwaʼö Yesu wa mukökö-kökö ia ba imane, ’Hadia ha daʼa nibeʼe khögu? Hana wa simanö? Fagölö-gölö waʼowölö-ölöma zawuyu sanema lima talenta! Na lö iʼameʼegö tödö ndraʼo sokhö yaʼo, te abölö sökhi na ukoʼo manö talenta nibeʼenia andre ba ulau mohalöwö ba wangalui haregu samösa.’

10. Hadia nifalua zawuyu sanema dombua talenta?

¹⁰ Simane sawuyu si oföna, aboto ba dödö zawuyu sanema dombua talenta wa tohude sibai halöwö nibeʼe khönia andrö. Börö daʼö, iʼodödögö wamalua halöwö nibeʼe khönia. Buania, tola ifohare dombua talenta tö khö zokhö yaʼia. Tenga zaya-zaya gölö waʼerege dödönia andrö. Omuso dödö zokhö yaʼia ba ibeʼe khönia noro dödö sabölö oya!

11. Hewisa enaʼö itugu monönö waʼomuso dödöda?

¹¹ Simanö göi, tola itugu monönö waʼomuso dödöda na tafalua wondrege zi sökhi ba halöwö nibeʼe khöda. Moguna ’öʼoyaʼö wameʼe inötöu’  ba wanuriaigö, ba öforege wotuhini halöwö nifalua ba mbanua niha Keriso. (Hal. 18:5; Heb. 10:24, 25) Moguna göi öfaʼanö ndraʼugö fatua lö öʼondrasi gangowuloa enaʼö tola öfaʼema mbua gera-era samarou tödö ndra talifusöda. Odödögö wamalua halöwö nibeʼe khöu ba gangowuloa barö migu. Na so noro dödö nibeʼe khöu ba mbanua niha Keriso, asiwai ia ba ginötö si no mutatugöi ba foromaʼö wa tola mufaduhusi tödö ndraʼugö. Böi aohasi ba dödö halöwö nibeʼe khöu mazui öwaʼö tödöu wa zaya-zaya gölö na öʼogunaʼö ginötöu ba wamalua yaʼia. Forege enaʼö itugu onekhe ndraʼugö ba wamalua halöwö nibeʼe khöu. (Amd. 22:29) Na itugu öforege wangai halöwö khö Yehowa, itugu aro wahuwusau khönia ba itugu monönö waʼomuso dödöu. (Gal. 6:4) Baero daʼö, lö tebulö waʼomuso dödöu na so dalifusöda sanema halöwö si tohude somasiʼö öʼokhögö.​—Rom. 12:15; Gal. 5:26.

12. Hadia zanolo Melissa hegöi Nick enaʼö tola itugu monönö waʼomuso dödöra?

¹² Hadia lö olifu ndraʼugö dalifusöda Melissa si no mututunö ba ngenoli si dua, somasi mangai halöwö ba Mbetieli mazui ba wefao ba Sekolah bagi Penginjil Kerajaan? Hewaʼae na tebai ikhamö gohitö dödönia andrö, imane, ”Ufalua wondrege zi sökhi ba halöwögu tobali perintis ba utandraigö wamalua ngawalö lala wanuriaigö si bohou. Daʼö zangaʼasogö khögu faʼomuso dödö.” Hewisa göi wanaögö Nick faʼafatö dödö börö me lö lafataro ia tobali enoni? Imane, ”Uʼosambuaʼö dödögu ba halöwö si tola ufalua, yaʼia daʼö ba wefao ba halöwö fanuriaigö hegöi ba wameʼe bua gera-era ba gangowuloa samarou tödö ndra talifusöda. Ufoʼösi göi formulir ba wangai halöwö ba Mbetieli ba latema ndraʼo döfi aefa daʼö.”

13. Hadia mbua nitemamö na öʼodödögö wamalua halöwö si no tebeʼe khöu iadaʼa? (Sangombakha 2:24)

¹³ Na öʼodödögö wamalua halöwö si no tebeʼe khöu iadaʼa, hadia tola ötema noro dödö sabölö oya ba zi so miföna? Tola manö. Daʼö zalua khö Nick. Hizaʼi, tola manö göi löʼö, simane salua khö Melissa. Hewaʼae simanö, tola itugu monönö waʼomuso dödöu ba owua-wua dödöu wamalua halöwö si no tebeʼe khöu iadaʼa. (Baso Zangombakha 2:24.) Baero daʼö, fahöna göi waʼomuso dödö nirasoimö börö me öʼila wa no öʼomusoiʼö dödö Zoʼaya yaʼita, Yesu Keriso.

14. Hadia zinangea tatörö tödöda sanandrösa ba gohitö dödö ba wamati?

¹⁴ Na tafalua wondrege zi sökhi ba wangai halöwö khö Yehowa iadaʼa, hadia daʼö geluahania wa lö saʼae moguna tadouʼö wamalua halöwö ba wamati? Tatu manö löʼö! Moguna tatatugöi gohitö dödö sanolo yaʼita tobali sanuriaigö ba samahaʼö sabölö sökhi ba si tola möi fanolo khö ndra talifusöda. Tola takhamö gohitö dödöda andrö na taʼosambuaʼö dödöda ba wanolo niha böʼö moroi ba zoguna khöda samösa.​—Amd. 11:2; Hal. 20:35.

15. Hadia manö gohitö dödö si tola mondrouʼö faʼomuso dödöu?

¹⁵ Hadia gohitö dödö somasiʼö ökhamö? Andrö wanolo moroi khö Yehowa enaʼö öʼila hadia gohitö dödö si tola ökhamö. (Amd. 16:3; Yak. 1:5) Hadia tola ökhamö fazambua gohitö dödö si no mutötöi ba  ngenoli si sara, yaʼia daʼö ba wangai halöwö tobali perintis ekstra mazui perintis biasa, ba wangai halöwö ba Mbetieli, mazui ba wefao ba halöwö famazökhi tomosa? Hadia tola öfahaʼö ndraʼugö ba li si bohou mazui möiʼö manuriaigö ba mbanua si lö ato sanuriaigö? Tola itugu aboto ba dödöu sanandrösa ba gohitö dödö andrö na öbaso faza 10 moroi ba mbuku Diorganisasi untuk Melakukan Kehendak Yehuwa hegöi na  fahuhuo ndraʼugö khö ndra satua sokubaloi ba mbanua niha Keriso. * Na öforege wogamö ohitö dödömö andrö, tola laʼila ira talifusöda tanö böʼö wa itugu tedou ndraʼugö ba wamati ba hasambalö itugu monönö waʼomuso dödöu.

16. Hewisa na tebai ökhamö iadaʼa gohitö dödöu ba wamati?

¹⁶ Hizaʼi, hewisa na tebai ökhamö iadaʼa gohitö dödö si no tatutunö mege ba artikel daʼa? Tandraigö tatugöi gohitö dödö tanö böʼö si tola ökhamö. Hadia manö daʼö? Datatutunö.

17. Moloʼö 1 Timoteo 4:13, 15, hadia zinangea ifalua si samösa talifusöda ira matua enaʼö onekhe ia mamahaʼö?

¹⁷ Baso 1 Timoteo 4:13, 15. Yaʼami talifusöma ira matua si no tebayagö idanö, miforege enaʼö itugu onekhe ami fahuhuo hegöi ba wamahaʼö. Hadia mbörö? Börö me tola itugu mofozu ndraʼugö ba wanolo niha böʼö na ’öʼodödögö’ ba wondrouʼö faʼonekheu ba wombaso, ba wamaʼema huhuo, hegöi ba wamahaʼö. Forege ba wamalua fanuturu lala nitutunö ba brosur Odödögö Wombaso hegöi ba Wamahaʼö. Zara-zara wamahaʼö yaʼugö, aseseʼö fadumaisi wamalua yaʼia ba nomo, ba falua zi no öfahaʼö yaʼugö na öfaʼema huhuo. Andrö mene-mene khö penasihat ekstra mazui khö ndra satua sokubaloi tanö böʼö ’serege tödö ba wangombakha hegöi ba wamahaʼö taromali Lowalangi’. * (1 Ti. 5:17) Böi osambuaʼö dödöu ha ba woloʼö fanuturu lala si so ba brosur daʼö. Hizaʼi, angeragö hewisa lala ba wangaʼaroʼö famati niha samondrondrongo yaʼugö mazui ba wamarou tödöra  ba wamalua hadia nifaʼemau khöra. Na öfalua daʼö, tola itugu monönö waʼomuso dödöu hegöi niha böʼö.

18. Hadia zanolo yaʼita ba wogamö ohitö dödöda ba halöwö fanuriaigö?

¹⁸ Fefu ita no tebeʼe khöda halöwö ba wanuriaigö hegöi ba wombaliʼö nifahaʼö. (Mat. 28:19, 20; Rom. 10:14) Hadia omasiʼö ödouʼö waʼonekheu ba wamalua halöwö si tohude andre? Fahaʼö ndraʼugö ba brosur Ba Wamahaʼö ba falua hadia zi no öfahaʼö yaʼugö. Tola göi ösöndra wanuturu lala tanö böʼö ba Waʼauri Niha Keriso ba Fanuriaigö​—Waö-Waö Halöwö ba Gangowuloa hegöi ba video duma-duma wahuhuosa nifuta ba gangowuloa barö migu. Tandraigö falua ngawalö wanuturu lala enaʼö tola öʼila hezo zabölö mofozu ba mbanua si so yaʼugö. Na öfalua daʼö, hasambalö örasoi waʼomuso dödö börö me itugu onekhe ndraʼugö ba wanuriaigö hegöi ba wamahaʼö.​—2 Ti. 4:5.

19. Hadia lala sinangea öfalua ba wondrouʼö mbua-bua sangomusoiʼö tödö Lowalangi?

¹⁹ Böi olifu ndraʼugö wa sambua gohitö dödö sabölö tohude si tola ökhamö yaʼia daʼö ba wangokhögö bua-bua sangomusoiʼö tödö Lowalangi. (Gal. 5:22, 23; Kol. 3:12; 2 Fe. 1:5-8) Hadia zi tola öfalua ba wogamö ohitö dödöu andrö? Duma-dumania, na so gohitö dödöu ba wangaʼaroʼö famatimö, tola öbaso artikel si so ba publikasida sanolo yaʼugö ba wangaʼaroʼö famatiu. Tola göi öfaigi video JW Broadcasting^® sanandrösa khö ndra talifusöda sangoromaʼö famati saro hewaʼae na alua khöra ngawalö wanandraigö. Aefa daʼö, nehegö hewisa woloʼöu famati niforomaʼöra andrö ba waʼauriu sero maʼökhö.

20. Hewisa enaʼö itugu monönö waʼomuso dödöda ba tola talawa waʼide-ide dödö?

²⁰ Tatu omasi ita tafalua nasa zabölö sökhi ba wangai halöwö khö Yehowa moroi ba zi tola tafalua iadaʼa. Ba gulidanö si bohou, tola moʼahonoa wamaluada halöwö khö Lowalangi. Gasa-gasa daʼö, na taforege wamalua fondrege zi sökhi iadaʼa, tola itugu monönö waʼomuso dödöda ba tola talawa waʼide-ide dödö. Sabölö tohude, tola tafolakhömi ba tasuno Yehowa, ’Lowalangida somuso tödö’. (1 Ti. 1:11) Börö daʼö, dataʼomusoiʼö dödöda gofu hadia halöwö niʼokhögöda!