OMWATSI W’ERIGHA 33
Ubane obutseme busana n’omubírí owo ukakolera Yehova
“Erilangira omo meso lilabire eriganga-ganga ly’engumbu.”—OMUG. 6:9.
OLWIMBO 111 Ebikaleka itwatsema
EBIKENDIKANIBWAKO *
1. Abandu bangyi banemuyikasa erikolaki batoke erikola bingyi omo mubírí wa Yehova?
TUWITE Omubírí munene w’erikola embere omwisyo ahike. (Mat. 24:14; Luka 10:2; 1 Pet. 5:2) Itwe bosi twanzire erikola ebyosi ebyo twangatoka omo mubírí wa Yehova. Abangyi b’okwitwe banemukolera Yehova yo kutsibu omo mubírí wiwe. Abaghuma b’okwitwe banzire erisyabya bapainia. Abandi banzire erisyayakolera oko Beteli n’abandi banzire erikola oko mibírí mbiriri-mbiriri y’obuhimbe. N’abaghala betu bangyi banemuyikasa erikulya emibere eyikasabawa okwitolera eribya baghombe bawatikya kutse basyakulu omo ndeko. (1 Tim. 3:1, 8) Yehova akatsema akalangira abandu bakayikasa erimukolera erilua oko mutima!—Esy. 110:3; Isa. 6:8.
2. Twanganayowa tuti tutetahikira ebyo twanzire erikola omo mubírí wa Yehova?
2 Aliwe twanganabunika mutima twamabya itwabiribugha mughulu muli isitwetahikira ebyo twanzire erikola omo mubírí wa Yehova. Kandi twanganabunika mutima twamabibya isitwangasyahikira eyindi mibírí omo ndondeko ya Yehova busana n’emyaka yetu kutse eyindi myatsi. (Emi. 13:12) Ekyo kyo kyahikira mwali wetu Melissa. * Abya inyanzire eriyakolera oko Beteli kutse eriyasoma oko Kalasi k’Abatuliri b’oBwami. Neryo akabugha ati: “Busana n’emyaka yaghe sikyangasyatokekana. Ebyo nabya ngalandamirira erikola ni nzoli buyira. Kikananyihikira inakwa obulighe.”
3. Abandu balebe banganatolera ibakolaki batoke erikulya emibere eyisabirwe okw’ihabwa ebindi by’erikola omo mubírí wa Yehova?
3 Abandu balebe abakine balwana kandi abawite omubiri owakalire, batolere ibatsuka bakulya emibere milebe embere sy’erihabwa eyindi mibírí omo ndondeko ya Yehova. Eky’erileberyako, abaghuma ba kubo banganabya ibawite obwenge, isibalitselewisaya emyatsi, kandi ibananzire erikola omubírí n’omuhwa. Aliwe lyanganatolera ibatsuka erigha eribya n’omutima w’erilindirira, erikola omubírí wabo wo ndeke-ndeke, n’erigha erisikya abandi. Wamabiyikasa erikulya emibere eyisabirwe, abaghala betu banganakuha omubírí mulebe omo ndondeko oko mughulu utalindirire erihabwagho. Tukanaye oko ky’erileberyako kya mughala wetu Nick. Omughulu ayira emyaka 20, mwayowa ng’amahemuka kundi mwatahabwa olusunzo olw’eribya mughombe muwatikya. Akabugha ati: “Munalengekania nyiti hanganabya omwatsi mulebe owalyaleka inyitahabwa olusunzo olo.” Aliwe ekyo mukitamukakirya erikulya emibere eyisabirwe. Mwayikasa erikola ebyosi ebyangatoka erikola omo ndeko n’omo mubírí w’eritulira. Lino akakolera omo Katunga k’eBeteli.
4. Tukendikania okuki omo mwatsi ono?
4 Naghu unabunikire mutima kundi siwuliwahikira ekyo ukalandamirira erikola omo mubírí wa Yehova? Byamabya bitya, usabe Yehova busana n’omwatsi oyo kandi umubwire ngoko ukayowa. (Esy. 37:5-7) N’ekindi, ukanaye n’abaghala n’abali betu abakulire omo bwikirirya bakuwatikaye eriminya ngoko wangakola omubírí owo ukakolera Yehova wo ndeke, neryo naghu uyikase erikolesya amahano wabo. Wamakola utya, iwanganatoka erihikira ekyo ukalandamirira. Nga mwali wetu Melissa, kwa muhwa kyanganabya isikikitokekene erikola ekyo wabya ukalandamirira omo mubírí wa Yehova. Ekyangakuwatikya eritendiherya obutseme bwaghu niki? Erisubirya oko ribulyo eryo, omwatsi ono akendikania oko mabulyo asatu (1) wangabana obutseme bo hayi, (2) obutseme bwaghu bwangakanya buti, ne (3) ebyo wangayihiriraho mo eby’angaleka eby’angalekaf obutseme bwaghu ibwa kanya ni byahi?
WANGABANA OBUTSEME BO HAYI?
5. Litolere itwalengekania oko myatsi yahi tutoke eribana obutseme? (Omugambuli 6:9)
5 Omugambuli 6:9 (Soma) akatukanganaya ekyangatuwatikya eribana obutseme. Omundu oyukatsemera ebyo “meso wiwe akalangira” akatsemera eby’awiteko, syaliheraya obutseme bwiwe nomo angabya omo mibere yiri yiti. Aliwe omundu “oyukaganga-gangaya esyongumbu” kutse oyo wanzire eribana bingyi, syalitsemera ebyo awite. Ekyo kyamatwighisyaki? Eribana obutseme ritolere itwabya tukalengekania oko ebyo tuwite, kutse ebyo tunasi ngoko twanganabana.
6. Tukendikania oko musyo wahi, kandi omusyo oyo akenditwighisyaki?
6 Kwenene-kwenene kinatokekene eritsemera ebyo tuwite? Abandu bangyi bakalengekanaya bati sikitokekene kundi tukanza erigha erikola emyatsi mihya-mihya. Aliwe oko kwenene kinatokekene eritsemera ebyo tuwite. Twanganatsemera “ebyo meso akalangira.” Twangakola ekyo kyo tuti? Eribana ekisubiryo, tukanaye oko musyo wa Yesu w’esyotalanta owali omo Matayo 25:14-30. Tukendigha ngoko twangabana obutseme kandi nibya ngoko twangakanyiabo omo miyisa eyo tuli nayo oko mughulu ono.
OBUTSEME BWAGHU BWANGAKANYA BUTI
7. Kanaya omo kikuhi oko musyo wa Yesu w’esyotalanta.
7 Omo musyo oyo muli omulume oyowasonda eriya oko lughendo. Embere sy’eritsuka olughendo mwabirikira abaghombe biwe n’eriha obuli mughuma wa kubo y’esyotalanta atoke eritundyasyo. * Omulume oyo, abya inyanasi ngoko abaghombe abo bawite obutoki obusighene. Kyaleka inyaha owundi y’esyotanta itano, n’owundi esibiri, n’owakasatu enguma. Ababiri mubakola omubírí n’omuhwa batoke erikanyia esyofranga sy’omukama wabo. Ow’akasatu, mwatakola kindu kyosi-kyosi atoke erikanyia esyofranga esyalyahabawa. Neryo omukama wiwe mwamutibitako.
8. Ekyangalekire omughombe w’erimbere oyukanibweko omo musyo inyatsema kutsibu niki?
8 Alinga omughombe w’erimbere mwatsema omukama wiwe akamuha esyotalanta itano. Esyo syabya franga nyingyi, neryo ekyo mukyakangania ngoko omukama wiwe ayiketere iye! Tubughe tutiki oko mughombe w’akabiri? Anganabunikire mutima kundi syetahabwa esyotalanta nyingyi ng’ow’erimbere. Aliwe mwayira ati?
Ni somo yahi eyo twamabana erilua oko mughombe w’akabiri ow’omo musyo wa Yesu? (Lebaya enungu 9-11)
9. Yesu mwatabugha atiki oko mughombe w’akabiri? (Matayo 25:22, 23)
9 Soma Matayo 25:22, 23. Yesu mwatabugha ati ow’akabiri mwahangya-hangya n’erihitana kundi mwakahabawa esyotalanta ibiri nyisa. Kandi Yesu mwatabugha ati omughombe oyo mwayilungumula n’eribugha ati: ‘Busanaki omukama waghe amamba esyofranga nyike? Nayi ninawite obutoki bw’erikola ng’oyulyahabawa esyotalanta itano! Omukama waghe amabya inyakalengekanaya ati si niri mukoli mubuya, nanganatabira esyofranga siwe neryo inakola ebyaghe.’
10. Omughombe w’akabiri mwakolesya esyotalanta siwe sy’ati?
10 Ng’omughombe w’erimbere, omughombe w’akabiri mwalangira ngoko omubírí owo mukama wiwe alyamuha ni w’omughaso neryo mwakolagho n’omuhwa munene, mwakanyia esyotalanta sy’omukama wiwe neryo syamabya ini. Omukama wiwe mwamuhemba busana n’omubírí munene owo alyakola. Kandi omukama wiwe mwatamutsemera lisa, aliwe mwalangira ngoko anatolere eritasyahabwa nibya n’eyindi mibírí!
11. Twangakanyia obutseme bwetu bo tuti?
11 Netu kutya, twanganakanyia obutseme bwetu omwikola n’omuhwa omubírí wosi-wosi owo bangatuha omo ndondeko ya Yehova. “Usibe mughulu wosi” omw’itulira kandi ubye ukakola kutsibu oko mibírí y’endeko. (Emib. 18:5; Ebr. 10:24, 25) Ubye ukateghekania ndeke emihindano utoke erileta ebisubiryo ebikahimba. Ulangire ebitswe ebyo ukahabawa oko mihindano y’omo kati-kati k’eyenga mo by’omughaso munene. Bamakusaba eriwatikya oko mubírí mulebe omo ndeko, ubye ukahika oko ndambi kandi ubye mundu oyo abandi bakayiketera. (Emi. 22:29) Isiwalengekanaya uti alinga omubírí owo wamahabwa si w’omughaso kandi uti siwangahererya kuwo kw’endambi yaghu. Uyikase erikola omubírí waghu wo ndeke. (Emi. 22:29) Omughulu ukayikasa erikolera Yehova yo kutsibu, obwira bwaghu naye bukuwana kutsibu, n’obutseme bwaghu bukendikanya. (Gal. 6:4) Kandi ikikendyoloba okwiwe eribana obutseme omughulu abandi bamahabwa olusunzo lw’erikola omubírí owo wabya wanzire erikola.—Rom. 12:15; Gal. 5:26.
12. Ebyawatikaya mwali wetu Melissa na mughala wetu Nick erikanyia obutseme bwabo niki?
12 Ukinibukire mwali wetu Melissa oyo tulyakanayako omo nungu y’akabiri oyo wabya anzire eriyakolera oko Beteli kutse eriyakwama Akalasi k’Abatuliri b’oBwami? Nomo byanabya isibikitokekene okwiye, akabugha ati: “Ngayikasa erikola ebyosi ebyo nangatoka omo mubírí waghe w’obupainia, kandi ngayikasa erikolesya esyonzira mbiriri-mbiriri sy’omo mubírí w’eritulira. Ekyo kikanyiletera obutseme.” Na mughala wetu Nick mwakolaki omughulu abunika mutima kundi mwatahabya olusunzo lw’eribya mughombe muwatikya? Akabugha ati: “Munalengekania oko lusunzo olo niwite olw’erisangira oko mubírí w’eritulira, n’erileta ebisubiryo ebikahimba omo mihindano. Kandi munusulya efomu ey’eriyakolera oko Beteli. Mubasubirya kuyo ko luba neryo omo mwaka owakwama mubanibirikira.”
13. Twangabanaki twamabiyitsinga erikola omubírí owo tukakola lino n’omuhwa? (Omugambuli 2:24)
13 Wamabikola omubírí owo ukakola omo ndeko lino n’omuhwa, iwunemwendisyabana eyindi mibírí minene omo biro ebikasa. Ekyo kyanganabya ng’ekyahikira Nick. Nga Melissa, utetahikira ebyo wabya ukalandamirira erikola omo mubírí wa Yehova, wanganabana obutseme bungyi omo ebyo ukakola omo mubírí wa Yehova. (Soma Omugambuli 2:24.) Kandi iwukendibana obutseme bungyi kundi iwunasi ngoko ebyo ukakola bikatsemesaya oMukama wetu Yesu Kristo.
EBYO WANGAYIHIRIRAHO EBYANGAKANYIA OBUTSEME BWAGHU
14. Tutolere itwabya tukalengekania oko myatsi yahi omughulu tukayihiriraho ebyo twanzire erikola omo mubírí wa Yehova?
14 Twamabya itunemuyikasa erikolera Yehova lino ngoko twangatoka, ekyo nibughambu si twangasyasondekania ehyanya ehy’erimukoleramo kutsibu okwaho? Iyehe, kobite bitya! Litolere itwayihiriraho eby’erikola ebyangatuwatikya tutoke eribya batuliri babuya, bakangirirya babuya n’eriwatikya kutsibu abaghala n’abali betu. Twanganahikira erikola ebyo twabiriyihiriraho twamabya tukahira amalengekania wetu wosi okwiwatikya abandi butsira eriyilengekaniako kwilaba lulengo.—Emi. 11:2; Emib. 20:35.
15. Ni byahi ebyo wangayihiriraho ebyo wanzire erikola ebyangakanyia obutseme bwaghu?
15 Ni myatsi yahi eyo wanganayihiriraho erikola? Usabe Yehova akuwatikaye uminye nga ni myatsi yahi eyo ulandamirire eyo wangatoka erikola. (Emi. 16:3; Yak. 1:5) Omo nungu y’erimbere y’omwatsi ono, mune ebyo bandu bakalandamirira erikola. Wanganasombola mubyo mw’ebyo wangatoka erikola; ng’eribya mupainia muwatikya kutse w’omughulu wosi, eriyakolera oko Beteli kutse erisangira oko mibírí y’eKiteokrasi y’obuhimbe. Kutse wanganigha owundi mubughe utoke erikola bingyi omo mubírí w’eritulira kutse eriyatulira omo kindi kiharo. Wanganigha bingyi oko eby’eriyihiriraho eby’erikola wamasoma esura ye 10 omo kitabu Tengenezo Yenye Kufanya Mapenzi ya Yehova, kutse iwakania n’abasyakulu b’endeko. * Omughulu ukayikasa erihikira ebyo wanzire erikola, abandi bakendilangira ngoko unemukula omo bwikirirya kandi n’obutseme bwaghu bukendikanya.
16. Wangakolaki lino wamabya isiwangasyahikira ebyo wabya wanzire erikola?
16 Nikwa tubughe tutiki wamabya isiwangasyatoka erihikira ebyo twamabikaniako omo mwatsi ono? Uyihirireho ekindi ekyo wangatoka erikola. Terilengekania oko bikwamire hano.
Ni by’erikola byahi ebyo wangahikira? (Ulebaye esyonungu 17) *
17. Ngoko kisakire omo 1 Timoteo 4:13, 15, mughala wetu angakolaki atoke eribya mukangirirya mubuya?
17 Soma 1 Timoteo 4:13, 15. Wamabya iwuli mughala wetu oyubatisibwe, wanganuwania enzira yaghu y’erilabya emikania n’erikangirirya. Busanaki tukabugha tutya? Kusangwa wamabiyikasa eribya musomi mubuya, mubuyi mubuya, kutse mukangirirya mubuya iwukendibya n’obutoki bw’eriwatikya abakakuhulikirira. Wanganasoma n’erikolesya obuli somo eyiri omo katabu Uyihire Okwisoma N’erikangirirya. Wighe esomo nguma, ukolesyayeyo eka kandi uyikase erikolesyayo ukalabya emikania. Usabe amahano w’omusyakulu w’endeko oyukaha abandi basyakulu n’abaghombe bawatikya b’amahano babilabya ebitswe by’omo ndeko kutse n’oko bandi basyakulu abakalabaya emikania yo ndeke n’erikangirirya ndeke.” * (1 Tim. 5:17) Ukakolesya esyosomo esiri omo katabu ako uwatikaye abahulikiriri baghu bawataye obwikirirya bwabo n’eribahiramo omuhwa w’erikola. Wamakola utya obutseme bwaghu bukendikanya n’obwabo kutya.
Ni by’erikola byahi ebyo wangahikira? (Ulebaye esyonungu 18) *
18. Ekyangatuwatikya erihikira ebyo twabiriyihiriraho erikola omo mubírí w’eritulira niki?
18 Itwe bosi tuwite olusunzo lw’eritulira n’eriyira abigha. (Mat. 28:19, 20; Rom. 10:14) Unanzire eryuwania esyonzira syaghu sy’eritulira omo mubírí w’omughaso oyu? Wanganabya ukakolesya ebyo ulyigha omo katabu Uyihire Okwisoma n’Erikangirirya. Wanganabana awandi mahano omo katabu Buku la Mukutano Utumishi na Maisha ya Mukristo, n’esyovideo esyo tukalebeya oko mihindano y’omo kati-kati k’eyenga esikatukanganaya ngoko twangatsukisya emikania. Ukolesaye amalengekania mbiriri-mbiriri awali omo katabu k’omuhindano n’omo syovideo owo wangakolesya. Wamabikolesya amahano ayo iwukendibya mukangirirya mubuya kandi ukendibana obutseme bungyi.—2 Tim. 4:5.
Ni by’erikola byahi ebyo wangahikira? (Ulebaye esyonungu 19) *
19. Wangakulya uti emibere y’eKikristo?
19 Omughulu ukayihiriraho eby’erikola, isiwibirirawa ngoko ekindi ky’omughaso munene ry’erikulya emibere eyikatsemesaya oMungu. (Gal. 5:22, 23; Kol. 3:12; 2 Pet. 1:5-8) Wangakola utya uti? Eky’erileberyako, wamabya iwanzire eribya n’obwikirirya obuwatire ikikendikusaba erisoma amahano awali omo bitsapo byetu awakakanganaya ngoko wangawatya obwikirirya. Kandi wanganabana endundi eribya ukalebya ebitswe byetu bye JW Teledifizio ebikakanganaya ngoko baghala n’abali betu bakanganaya obwikirirya bakalaba omo maligho mbiriri-mbiriri. Neryo ulebaye ngoko wangigha erikwama obwikirirya bwabo omo ngebe yaghu.
20. Twangayira tuti tutoke erikanyia obutseme bwetu n’erikehya oko byangatuluhya omo mutima?
20 Oko kwenene, itwe bosi twanzire erikolera Yehova yo bingyi kulenga ebyo tukakola lino. Omo kihugho kihya-kihya tukendisyakolera oMungu y’omughulu wosi. Omughulu tukalindirira endaghane eyo, twanganabana endundi tukakolesya ehyanya ehyamabanika, n’ekyo ikikendituwatikya erikanyia obutseme bwetu n’erikehya oko malengekania awangatuluhya omo mutima. N’eky’omughaso munene kutsibu tukaletera Yehova, “oMungu w’obutseme” y’erisikya n’olukengerwa (1 Tim. 1:11) Busana n’ekyo tuyitsinge eribana obutseme omo mubírí owo tukakolera Yehova lino!
OLWIMBO 82 “Muleke ekyakala kyenu kikoleraye”
^ par. 5 Twanzire Yehova yo kutsibu, kandi twanzire erikola ebyosi ebyo twangatoka omo mubírí wiwe. Busana nekyo abangyi b’okwitwe banzire erikola bingyi omo mubírí w’eritulira kutse eriberererya ebikasabawa okw’itolera erikola bingyi omo ndeko. Nikwa twangayira tuti twamabya isitwangatoka erihikira ebyo twanzire erikola nibya itunemuyikasa erikola ebyosi ebyo twangatoka? Ekyangatuwatikya eribya n’ebingyi by’erikola omo mubírí wa Yehova itune n’obutseme niki? Tukabana ekisubiryo ky’omo musyo wa Yesu ow’esyotalanta.
^ par. 2 Amena malebe mwakabindulawa.
^ par. 7 ERIKANIA OKO KINYWA: Etalanta nguma yabya iyilingene n’esyofranga esyo mukoli abya akalihwa abikola oko myaka 20.
^ par. 15 Abaghala betu ababiribatisibwa, basabirwe erikulya emibere eyitolere batoke eribya baghombe bawatikya kutse basyakulu omo ndeko. Eriminya emibere eyisabirwe okw’itolera erikola bingyi omo ndeko ulebaye esura 5 ne 6 ey’ekitabu Tengenezo Yenye Kufanya Mapenzi ya Yehova.
^ par. 17 ERIKANIA OKO PITSA: Mughala wetu anemukwesa-kwesa omo bitsapo byetu atoke eribya mukangirirya mubuya. Mwali wetu oyo wabiriyisogha eribya akatulira kitsumbukirania, amaha oyukabimuha akalyo enimero yiwe. Mwali wetu oyo wanzire erigha emibere y’eKikristo amaletera owundi mwali wetu y’ekihembo ekyo atalue ayilindirireko.
