NKHANI YOPHUNZILA N.° 33
Mukosangalala na utumiki wanu
“Kuwona na menso kuli bwino kusiyana na kukumbwila na ntima.”—MLAL. 6:9.
NYIMBO N.° 111 Tili na vifukwa vinyinji vonkhalila okondwela
VATIKUTI TIPHUNZILE *
1. Kansi ŵanthu anyinji oyeja-yeja kuchita chinji potumikila Yehova?
MAPETO a ichi chalo pali pafupi, tili na ntchito ikulu yakuti tiikate. (Mt. 24:14; Lk. 10:2; 1 Pet. 5:2) Tonse tufunishisha kutumikila Yehova mulimonse mwatingakwanishile. Anyinji oyangijila utumiki wawo. Ayakine ofuna kuchita upainiya ndipo ayakinesoti ofuna kutumikila pa Beteli olo kuchita utumiki wa zomanga-manga. Komasoti abale anyinji oyeja-yeja kuti akotumikila monga atumiki othandiza olo akulu. (1 Tim. 3:1, 8) Yehova osangalala pakuwona kuyeja-yeja kwakuchita atumiki ŵake pomutumikila!—Sal. 110:3; Yes. 6:8.
2. Kansi tingamvwe tyani chifukwa chowona kuti volinga vasu viyakine vukwanilishikalini?
2 Payakine tingakhumudwe keno tawona kuti papita nthawe itali tikaliyekwanilisha volinga vasu vauzimu komasoti payakine tingafoke powona kuti tingakwanishelini kuchita mautumiki ayakine chifukwa cha nsinkhu wasu olosoti mwavilili vinthu pa moyo wasu. (Miy. 13:12) Vamene ivi niye vichitikila Melissa. * Yove enzefuna kutumikila pa Beteli olo kuloŵa Sikulu ya Akhilisitu Olalikila za Ufumu, koma yove enena kuti: “Palipano vamene ivi vingakwanishikelini chifukwa cha nsinkhu wangu, mwakuti nthawe ziyakine nukhumudwa.”
3. Kansi ni vinthu votyani vakufunikila kuchita ayakine kuti ayenelele kupasiwa mautumiki osiyana-siyana?
3 Ayakine angankhale achilumbwana komasoti athanzi, komalomba kuti apasiwe maudindo ayakine oyangijilika ofunika kukulisha komasoti kuwonesha minkhalidwe iyakine yofunika. Ove payakine angankhale na nzelu, osimikija ntima komasoti ofunishisha kuchita vinthu, komalomba ankhafunike kuphunzila kunkhala oleza ntima, adongosolo komasoti aulemu. Keno muchita khama kukulisha minkhalidwe yofunika yamene iyi, mungakwanishe kupasiwa mwayi wa utumiki uyakine pa nthawe yamusayembekezela. Ganizilani vichitikila Nick. Yove penze na vyaka 20, ekhumudwa ngako chifukwa chowona kuti aliyeikiwe kunkhala ntumiki wothandiza. Yove enena kuti: “Nenzewona monga pali vinthu viyakine vanuphoniyesha.” Komalomba, Nick aliyetaye ntima. Mmalomwake, yove echita khama kukata ntchito ziyakine za mpingo komasoti kulalikila. Pano patunena, Nick otumikila m’Komiti ya Nthambi.
4. Kansi mu nkhani ino tikambilane mfundo zotyani?
4 Kansi mwewo nimwe wokhumudwa chifukwa chakuti mukwanilishalini cholinga chiyakine chauzimu? Keno n’tetyo, mukomufotokozela Yehova m’pemphelo mwamumvwila. (Sal. 37:5-7) Komasoti, mukosenga abale amene ni otang’a mwauzimu kuti akupaseni malangizo amene angakuyavyeni kuti mukochita luweme vinthu potumikila Mulungu ndipo mukoyeja-yeja kuŵakatishila ntchito malangizo amene awo amwapasiwa. Mukochita vamene ivi, mungapasiwe utumiki wamufuna olo kukwanilisha cholinga chanu. Koma molingana na Melissa, wala watatomola poyambilila, vingachitike kuti palipano mungakwanishelini kuchita utumiki wamufuna. Kansi vamene ivi vikachitika, mungachite tyani kuti mupitilije kunkhala wosangalala? Kuti tiyankhe konsho yamene iyi, mu nkhani ino tikambilane (1) vingatiyavye kuti tinkhale osangalala, (2) vatingachite kuti tikosangalala ngako komasoti (3) volinga vatingankhale navo vamene vingatiyavye kuyangijila chisangalalo chasu.
VINGATIYAVYE KUNKHALA OSANGALALA
5. Kansi tufunika kuganizila ngako chinji kuti tinkhale osangalala? (Mlaliki 6:9)
5 Lemba ya Mlaliki 6:9, yufotokoza vingatiyavye kunkhala osangalala. (Ŵelengani.) Munthu wamene osangalala na vinthu ‘vawona na menso ŵake,’ otembeja vinthu valinavo ndipo onkhala wokhutila na mwavilili vinthu pa moyo wake. Koma mosiyana na vamene ivi, munthu wamene okumbwila na ntima wake, ofunishisha kunkhala na vinthu vamene angakwanishelini kuvifwana. Lomba, kansi tuphunzilapo chinji pamene apa? Kuti tikosangalala, tufunika kuganizila ngako vatili navo komasoti tikonkhala na volinga vatingakwanilishe.
6. Kansi lomba tikambilane fanizo yotyani, ndipo tiphunzile chinji mu fanizo yamene iyi?
6 Mwachibadwa, sewo taŵanthu tufuna kuchita vinthu viyakine vanyowani. Lomba kansi n’vokwanishika kunkhala okhutila na vinthu vatili navo? Eye, n’vokwanishika. Tingakwanishe kunkhala osangalala na vinthu vatili navo lomba teti, vinthu ‘vatuwona na menso’ ŵasu. Kansi tingachite tyani vamene ivi? Kuti tifwane yankho tiyeni tiwone vechinena Yesu mu fanizo yake ya matalente, yemene ili pa Mateyu 25:14-30. Tikambilane ngako mwaingatiyavyile fanizo yamene iyi kuti tikonkhala osangalala ngako komasoti vatingachite kuti tiyangijile chisangalalo chasu chamene icho mokatijana na mwavilili vinthu pa moyo wasu.
VATINGACHITE KUTI TIKOSANGALALA NGAKO
7. Fotokozani mwachidule fanizo ya Yesu yunena za matalente.
7 Mu fanizo iyakine, Yesu etomola za munthu wamene enzefuna kuluta ku chalo chiyakine. Akaliyenyamuka, yove eita antchito ŵake noŵapasa matalente kuti achite nawo malonda. * Poganizila vangakwanishe kuchita wantchito aliyense, munthu wamene uyo epeleka matalente 5 kuli wantchito woyamba, matalente aŵili kuli wantchito wachiŵili ndipo wachitatu emupasa talente imozi. Antchito aŵili oyamba, eŵakatishila ntchito luweme matalente ŵechipasiwa, koma wala wantchito wachitatu, aliyechite chilichonse na talente yechipasiwa, ndipo bwana wake emuchosa ntchito.
8. Kansi n’chinji chichitisha kuti wala wantchito woyamba asangalale?
8 Wala wantchito woyamba, owoneka kuti yove esangalala ngako kuwona abwana ŵake omupasa matalente 5. Iyi yenze ndalama ikulu ndipo vamene ivi vuwonesha kuti abwana ŵake enzemudalila ngako! Lomba tyani ponena za wala wantchito wachiŵili? Yove sembe ekhumudwa chifukwa chakuti eliyelondele matalente anyinji monga ni wala wantchito woyamba. Lomba kansi yove echita chinji?
Kansi tingaphunzile vinthu votyani kuli wantchito wachiŵili otomolewa mu fanizo ya Yesu? (1) Yove epasiwa matalente aŵili na abwana ŵake. (2) Echita khama kuti apakishe ndalama za abwana ŵake. (3) Eyangijila matalente ayakine aŵili pa matalente ŵa abwana ŵake (Onani ndime 9-11)
9. Kansi Yesu aliyenene chinji chokhuza wantchito wachiŵili? (Mateyu 25:22, 23)
9 Ŵelengani Mateyu 25:22, 23. Yesu aliyenene kuti wala wantchito wachiŵili ekhumudwa olo kukalipa chifukwa chakuti epasiwa tyala matalente aŵili. Yove aliyenene kuti wantchito wamene uyo eyamba kudandaula nonena kuti: ‘Nangopasiwa tyala zamene izi mphela? Newo nane nukata ntchito mwakhama molingana na wala wantchito woyamba wapasiwa matalente 5! Keno abwana ŵangu otembejalini vanuchita, vingankhale luweme kuti newo nane nikangoŵafuchila aŵa matalente noyamba kuchita vofuna vangu.’
10. Kansi wantchito wachiŵili echita nawo tyani matalente ŵechipasiwa?
10 Molingana na wala wantchito woyamba, naye wantchito wachiŵili ewona kuti wapasiwa udindo wofunika ngako ndipo echita khama kutumikila abwana ŵake. Yove eyangijila matalente ayakine aŵili pa matalente ŵechimupasa abwana ŵake. Wantchito wamene uyu epasiwa mphoto chifukwa cha khama yake komasoti luso yake. Kuyangijila pa kusangalala na vechichita, abwana ŵake emuyangijilasoti vochita viyakine!
11. Kansi tingachite tyani kuti tikosangalala ngako?
11 Molingana na vamene ivi, sewo nase tingasangalale ngako keno tingankhale akhama pa chilichonse chatuchita potumikila Yehova. Nthawe zonse tufunika ‘tikotangwanika ngako’ na ntchito yolalikila ndipo tikolipeleka na ntima wonse pokata ntchito za mumpingo. (Mac. 18:5; Ahe. 10:24, 25) Mukokonzekela luweme misonkhano na cholinga chakuti mukopeleka ndemanga zolimbikisa. Mukokonzekelasoti luweme mukapasiwa nkhani za musikulu pamisonkhano ya nkati mwa sondo. Mukasengewa kuti mukate ntchito iyakine mumpingo, mukosunga nthawe komasoti mukonkhala wodalilika. Osawona kuti vinthu vamwasengewa n’vosafunika olo payakine kuwona kuti n’kungotaya tyala nthawe. Mukoyeja-yeja kuyangijila luso yanu. (Miy. 22:29) Mukalipeleka ngako pa utumiki wanu, niye pamupitasoti pasogolo ngako mokulumija ndipo musangalala. (Aga. 6:4) Vamene ivi vingakuyavyenisoti kuti mukosangalala keno ayanu apasiwa utumiki wamukumbwila mwewo.—Aro. 12:15; Aga. 5:26.
12. Kansi n’chinji chiyavya Melissa na Nick kuti ayangijile chisangalalo chawo?
12 Kansi mwamukumbukila Melissa, mulongo wamene enzekumbwila kuyatumikila pa Beteli olo kuloŵa Sikulu ya Akhilisitu Olalikila za Ufumu? Olo kuti viliyekwanishike kuti achite mautumiki amene aŵa, yove enena kuti: “Nuyeja-yeja kuchita vonse vaningakwanishe pa utumiki wangu wa upainiya komasoti kukatishila ntchito njila zosiyana-siyana zolalikilila. Vamene ivi vaniyavya kuti nikonkhala wosangalala ngako.” Lomba kansi n’chinji chiyavya Nick kuti osati apitilije kunkhala wokhumudwa pa nthawe yenzeyembekezela kuti aikiwe kunkhala ntumiki wothandiza? Yove enena kuti: “Nenzeganizila ngako mautumiki ŵaningakwanishe kuchita—monga kulalikila komasoti kupeleka ndemanga zokata ntima pamisonkhano. Nilembasoti fomu yosenga utumiki wa pa Beteli ndipo chaka chokonkhapo eniita.”
13. Kansi n’chinji chingachitike keno tingapitilije kuchita khama pa utumiki watuchita palipano? (Mlaliki 2:24)
13 Keno mwewo mungachite khama pa utumiki wamuchita palipano, kansi mungazapasiwa maudindo akulu-akulu kusogolo? Eye, n’vokwanishika monga ni mwevichitikila na Nick. Koma keno vingakwanishikelini monga ni mwevichitikila na Melissa, mungapitilije mphela kunkhala wosangalala na vinthu vamukwanisha kuchita potumikila Yehova. (Ŵelengani Mlaliki 2:24.) Kuyangijila pamene apo, paliye kukaikila kulikonse kuti mungapitilije mphela kunkhala wosangalala poziŵa kuti vinthu vamuchita vukondwelesha Ambuya ŵasu Yesu Khilisitu.
VOLINGA VAMENE VINGAKUYAVYENI KUYANGIJILA CHISANGALALO CHANU
14. Kansi tufunika kukumbukila chinji tikoliikila volinga vatufuna kukwanilisha?
14 Kansi kunkhala wokhutila na utumiki watuchita palipano, kutanthauza kuti tufunikalini kuganizila njila ziyakine zoyangijilila utumiki wasu kwa Yehova? Yayi, n’tetyolini! Tingakwanishe kuchita vinyinji ndipo tingaliikilesoti volinga vamene vingatiyavye kuti tikolalikila na luso komasoti kuti tikoyavya abale na alongo ŵasu. Tingakwanilishe volinga vamene ivi tikochita vinthu mwazelu komasoti molichefya poyavya ayasu mmalo mwa kungoganizila tyala vofuna vasu.—Miy. 11:2; Mac. 20:35.
15. Kansi ni volinga votyani vingakuyavyeni kuyangijila chisangalalo chanu?
15 Kansi ni volinga votyani vamungaliikile? Mukosenga Yehova kuti akuyavyeni kuziŵa volinga vamungakwanilishe. (Miy. 16:3; Yak. 1:5) Kansi n’vokwanishika kuti munkhale na volinga vatomolewa mu ndime yoyamba ya nkhani ino—monga kuchita upainiya wothandiza olo wonkhazikika, kutumikila pa Beteli, olosoti kuchitako utumiki wa zomanga-manga? Mungaphunzilesoti chilaŵilo chiyakine na cholinga chakuti mukolalikila uthenga uweme mu gawo yachulaŵiliwa chilaŵilo chamene icho. Mungaziŵe vinyinji poŵelenga mutu 10 m’buku yakuti, Gulu Lochita Chifuniro cha Yehova komasoti polaŵila na akulu a mumpingo wanu. * Keno muyeja-yeja kukwanilisha volinga vanu, kupita kwanu pasogolo kuwonekele ndipo muyangijile chisangalalo chanu.
16. Kansi mungachite tyani keno palipano vingakwanishikelini kuti mukwanilishe cholinga chiyakine?
16 Lomba tyani keno vingakwanishikelini kuti mukwanilishe volinga vamene vatomolewa mu nkhani ino? Mungachite luweme kuliikila cholinga chiyakine chamene mungachikwanilishe. Ganizilani volinga ivi vokonkhapo.
Kansi ni volinga viyakine votyani vamungakwanilishe? (Onani ndime 17) *
17. Mokatijana na lemba ya 1 Timoteyo 4:13, 15, kansi m’bale angachite tyani kuti akophunzisa na luso?
17 Ŵelengani 1 Timoteyo 4:13, 15. Keno nimwe m’bale wobatiziwa, mungochita khama kuti muyangijile luso yanu yolaŵila nkhani komasoti kuphunzisa. Ndaŵa yanji? Chifukwa ‘kulipeleka’ kwanu pa kuŵelenga, luso yolaŵila komasoti kuphunzisa kungaŵayavye ngako ŵanthu okumvwishilani. Mungaliikilesoti cholinga chakuti mukophunzila komasoti kukatishila ntchito mfundo za muphunzilo iliyonse mu kabuku kakuti, Chitani khama pa kuŵelenga na kuphunzisa. Mukoyeja kuphunzila luso imozi, noiyeselela mukali kung’anda, komasoti kukatishila ntchito mfundo za muphunzilo yamene iyo polaŵila nkhani. Mukosengasoti malangizo kuli mulangizi wothandiza olo kuli akulu “amene ochita khama pa kulaŵila na kuphunzisa.” * (1 Tim. 5:17) Mukokulisha luso yamwaphunzila mu phunzilo iyakine, mukoyavyasoti omvwishila ŵanu kutang’isha chikhulupililo chawo komasoti kuŵalimbikisa kuti akokatishila ntchito vinthu vaphunzila. Mukochita vamene ivi, muyangijile chisangalalo chanu komasoti chawo.
Kansi ni volinga viyakine votyani vamungakwanilishe? (Onani ndime 18) *
18. Kansi n’chinji chingatiyavye kuti tikwanilishe cholinga chasu pa ntchito yolalikila?
18 Tonse tipasiwa ntchito yolalikila komasoti kuphunzisa. (Mt. 28:19, 20; Aro. 10:14) Kansi mufuna kuyangijila luso yanu pa ntchito yofunika ngako yamene iyi? Mukophunzila mfundo za mu kabuku ka Kuphunzisa, mukoliikila volinga vakuti mukatishile ntchito vinthu vamene ivo vamwaphunzila. Mungafwanesoti malangizo ayakine othandiza mu kabuku ka Utumiki komasoti moyo wasu wa chikhilisitu—Kabuku kamisonkhano, komasoti mavidiyo a visanzo va ulaliki amene owoneshewa pamisonkhano ya nkati mwa sondo. Mukoyeselela njila zosiyana-siyana nowona njila yamene ni iweme ngako kuli mwewo. Keno mungakonkheje malangizo amene aŵa, munkhale mphunzisi waluso ndipo vamene ivi vikuyavyeni kuti mukosangalala ngako.—2 Tim. 4:5.
Kansi ni volinga viyakine votyani vamungakwanilishe? (Onani ndime 19) *
19. Kansi n’chinji chingakuyavyeni kuti mukokulisha minkhalidwe yakusangalala nayo Mulungu?
19 Pamuganizila volinga vamufuna kunkhala navo, osanyalanyaza chinthu chofunika ngako—chamene ni kukulisha minkhalidwe yakusangalala nayo Mulungu. (Aga. 5:22, 23; Akol. 3:12; 2 Pet. 1:5-8) Kansi mungachite tyani kuti munkhale na minkhalidwe yamene iyi? Mwachisanzo, tiyelekezele kuti mufuna kunkhala na chikhulupililo chotang’a. Mufunika kuŵelenga m’mabuku ŵasu nkhani zamene zili na malangizo amene angakuyavyeni kutang’isha chikhulupililo chanu. Mungapindulesoti ngako na mavidiyo a JW Broadcasting® onena za abale na alongo ayakine amene ewonesha chikhulupililo polimbana na mayeselo osiyana-siyana ŵechikumana nawo. Pavuli pake, mukoganizila njila zamungakatishile ntchito kuti mukonkheje chikhulupililo chawo pa moyo wanu.
20. Kansi tingachite tyani kuti tiyangijile chisangalalo chasu komasoti kuti osati tikokhumudwa ngako?
20 Mosakaikila tonse tufuna kuchita vinyinji potumikila Yehova. M’chalo chanyowani cha Mulungu, tizankhale na mwayi ukulu womutumikila mwatingakwanishile. Koma palipano keno tingokatishila ntchito mwayi uliwonse wapezeka, tingakwanishe kuyangijila chisangalalo chasu ndipo tingadandaulelini olo patontho. Tikochita vamene ivi, tilemekeze komasoti kutamanda Yehova, ‘Mulungu wasu wachisangalalo.’ (1 Tim. 1:11) Tetyo, tiyeni tikosangalala na vatukwanisha kuchita potumikila Yehova palipano!
NYIMBO N.° 84 Tulipeleka mwakhama
^ ndime 5 Tumukonda ngako Yehova ndipo tufuna kuchita vonse vatingakwanishe pomutumikila. Chifukwa cha vamene ivi tingafune kuyangijila utumiki wasu olo kuyeja-yeja kuti tikomutumikila m’maudindo ayakine mumpingo. Komalomba tyani keno tayeja-yeja, koma takangiwa kukwanilisha volinga vatili navo? Kansi tingachite tyani kuti tipitilije kuchita vinyinji potumikila Yehova, koma nopitilija mphela kunkhala osangalala? Yankho ya konsho yamene iyi tuifwana mu fanizo ya Yesu ya matalente.
^ ndime 2 Mazina ayakine achinjiwa.
^ ndime 7 KUMVWIKISHA LUWEME: Talete imozi yenze yolingana na ndalama zenzelondela munthu akakata ntchito kwa vyaka pafupi-fupi 20.
^ ndime 15 Abale obatiziwa olimbikisiwa kuti akochita khama kuti ayenelele kunkhala atumiki othandiza komasoti akulu. Kuti muziŵe vamungachite kuti muyenelele, onani mutu 5 na 6 m’buku yakuti, Gulu Lochita Chifuniro cha Yehova.
^ ndime 17 KUMVWIKISHA LUWEME: Mulangizi wothandiza ni nkulu wamene opasiwa udindo wopeleka malangizo kuli akulu na atumiki othandiza amene olaŵila nkhani mumpingo.
^ ndime 64 MAWU OFOTOKOZA CHITHUNZI: Pofuna kukwanilisha cholinga chake chakuti akophunzisa na luso, m’bale osakila-sakila malangizo othandiza m’mabuku ŵasu.
^ ndime 66 MAWU OFOTOKOZA CHITHUNZI: Pavuli poliikila cholinga chakuti akolalikila mwamwayi, mulongo opeleka kakhadi koziŵisha ŵanthu za webisaiti yasu kuli mwanakazi opelekela vakulya mu lesitalanti.
^ ndime 68 MAWU OFOTOKOZA CHITHUNZI: Chifukwa chofunishisha kuwonesha minkhalidwe yakusangalala nayo Mulungu, mulongo opeleka mphaso kuli Nkhilisitu muyake.
