1. Jiihóvah bá naʼaʼaʼgi haitʼéego ląʼí yee ádaa nitsídaakees?

 NIHODOOGÁÁŁ bichʼįʼ nihídayééłkááł, áko nihinaanish ląʼí dahólǫ́. (Matt. 24:14; Luke 10:2; 1 Pet. 5:2) Tʼáá áníiltso wołí bee Jiihóvah bá nideilʼaʼ doo daniidzin. Ląʼí éí nahaneʼgi ląʼígóó binaanish ánáádeidleʼ. Łaʼ éí pioneer deeshłeeł áádóó Béthelgi doodaiiʼ Jiihóvah bá kin ádaalneʼgo bidaʼínííshgóó naashnish doo danízin. Brothers ląʼí éí ministerial servant doodaiiʼ elder deeshłeeł danízin. (1 Tim. 3:1, 8) Kótʼéego nitsídaakeesii Jiihóvah ayóó yaa bił hózhǫ́!—Ps. 110:3; Isa. 6:8.

2. Jiihóvah bá naʼaʼaʼgi ląʼígóó biniyé ádaazhditʼáahgo doo há ánééhgóó bikʼee haajítʼée łeh?

² Jiihóvah bá naʼaʼaʼgi ląʼígóó bá ánáánáshtʼı̨́į doo hwiinidzingo doo há ánééhgóó hodinaah, áko biniinaa aa nááhákaʼ yileeh. Doodaiiʼ nihinááhaigi índa nihił hazʼą́ągi biniinaa ałʼąą ádaatʼéégóó Jiihóvah bá naʼaʼaʼgi doo nihá bohónéedzą́ą da. (Prov. 13:12) Melissa * wolyéego éí Béthelgi naashnish doo, éí doodaiiʼ School for Kingdom Evangelizersgóó deeshááł jinízingo nitsíjíkees, ndi ájíní: “Kótʼéégóó Jiihóvah bá nideeshʼaałgi bilááhgóó shinááhai, áko łahda tʼóó bikʼee shaa nááhákaʼ.”

3. Jiihóvah bá naʼaʼaʼgi łahgóó naanish ádaatʼéii haitʼéego bee há ahóótʼiʼ doo?

³ Ániid ndaakaii ayóó dabiinéí éí łahgóó naanish łaʼ  ánáádaatʼéii haa didootʼáałgo éí ájítʼéiigi bee ádaa ákózhnídzin doo. Łaʼ shı̨́ı̨́ hojíyą́ągo hoł ééhózin, índa tsı̨́įłgo decisions ajíłʼı̨́, áádóó naashnish doo jinízin. Ndi haʼahóní, naanish hazhóʼó álʼı̨́įgi áádóó diné hoł nílı̨́į dooleełgi áłtsé bíhwiizhdoołʼááł. Díí bee ádijoolnishgo naalnish doo nijólíi da yę́ę brothersda łaʼ haa deididooʼááł. Nick kótʼéego baa haneʼ. Éí 20 honááhaigo ministerial servant tʼáadoo áhoʼdiilyaa dago biniinaa bikʼee haa nahókaad. Éí ájíní: “Haalá nishtʼé niizı̨́įʼgo ádaa tsídékééz.” Ákótʼée ndi, Nick éí congregationgi áádóó nahaneʼgi boʼoonishígíí tʼáá bizhdiilkaal. Kʼad éí dííshjı̨́įdi Branch Committeejí atah dah jizdá.

4. Haʼátʼíí baa nídadíitʼįįł?

⁴ Jiihóvah bá naʼaʼaʼgi łahgóó bee ádaa díínítʼą́ągo doo ná behanééhgóó biniinaásh naa nahakaʼ? Ákótʼéé ládą́ą́ʼ Jiihóvah bichʼįʼ bee sodílzin. (Ps. 37:5-7) Índa brother łaʼ hóyánígíí éí Diyin bá naʼaʼaʼgi yáʼátʼéehgo áʼdeeshłíiłgi bee shíká anilyeed bididííniił áádóó nidííniidígíí beʼdíílííł. Áko beʼíinilaago éí bee ádá nahóʼáhígíí ná bohodoonííł. Melissa baa chʼíhootʼánę́ęgi átʼéego, haʼátʼíí shı̨́ı̨́ Jiihóvah bá ádeeshłííł nínízingi kʼad shı̨́ı̨́ doo ná bohónéedzą́ą da. Áko haitʼéego éí tʼáá nił hózhǫ́ǫ doo? Díí naʼídíkid bééhodoozįįłgo díí tááʼ ałkééʼ níʼą́ągo baa nídadíitʼįįł: (1) Háadi ił hózhǫ́ bikʼídiidááł? (2) Haʼátʼíí ałdóʼ ił hóshǫ́ǫ doo? (3) Bee ádá nahatʼáii bee ił hózhǫ́.

5. Haʼátʼíí bee ił hóshǫ́? (Ecclesiastes 6:9)

⁵ Ecclesiastes 6:9 éí haʼátʼíí bee nihił hózhǫ́ǫ dooleeł níigo hazhóʼó chʼíiníʼą́. (Yíníłtaʼ.) Kʼad hwee hólóonii jooʼínígíí baa hózhǫ́. Ndi doo bízhneelʼáanii bidázhnoolníigo éí doo ił hóshǫ́ǫ da. Áko díí haʼátʼíí bitsʼą́ą́dóó bíhooʼaah? Tʼáádoo bíniilʼáanii tʼáadoo baa nitsíikeesígo éí nihee hólóonii tʼéí bee ił hóshǫ́.

6. Haʼátʼíí haneʼ binahjįʼ bee naʼnitinii baa nídadíitʼįįł, áádóó haitʼéego bitsʼą́ą́dóó ídahwiidiilʼááł?

⁶ Tʼáá íídą́ą́ʼ nee hólóonii, éísh nił hóshǫ́ǫ doogo átʼé? Ląʼí éí ndagaʼ danízin. Háálá náánáłahgóó tʼáadoo leʼé bínááhodínóotah hwiindzin łeh. Ndi, tʼáá bohónéedzą́ągo átʼé. Kʼad nihee hólóonii bee ił hóshǫ́ǫgo átʼé. Éí haitʼéego ákótʼée doo? Matthew 25:14-30 góneʼ Jesus yaa chʼíhoníʼánę́ę dadíníilʼįįłgo yee nihił ííshjání íidoolííł. Haitʼéego ił hózhǫ́ bikʼídiidááł áádóó yéigo ił nááhózhǫ́ǫ dooleełgi baa nídadíitʼįįł.

7. Jesus éí tálent yaa chʼíhoníʼánę́ę áłtsʼísígo baa chʼíhoníʼaah.

⁷ Hastiin léiʼ chʼaadeeyáago baa haneʼ. Tʼah doo dah diighááhgóó éí bá ndaalʼaʼí hágo yidííniidgo béeso tálent bee naanish łaʼ ádazhdoolííł yóʼníigo bitaazdeezʼą́. * Éí tʼáadoo leʼé yídaneelʼą́ągi bił bééhózin, áko éí bikʼehgo łaʼ 5 tálents yeinínil, łaʼ éí 2, áádóó łaʼ éí 1. Áłtsé naakigóóígíí éí yéigo naashnishgo yíhółníihii bibéeso yá ląʼí ánáyiidlaa. Tááʼ góneʼígíí éí tálent beítʼánę́ę tʼáadoo haitʼéegoda yináyiitʼą́ą da, áko biniinaa hatsʼą́ą́ʼ nídiitʼą́ągo náánáłahjįʼ beítʼą́.

8. Naalʼaʼí áłtséhígíí éí 5 tálents baíʼnilgo haʼátʼíí biniyé ayóó baa bił hóózhǫǫd?

⁸ Naalʼaʼí áłtséhígíí éí 5 tálents baíʼnilgo  shı̨́ı̨́ ayóó baa hoł hóózhǫǫd. Díí éí ląʼí béeso átʼé, áko éí bee bééhózingo ląʼí béeso bee haʼahósdliʼ. Naaki góneʼígíishąʼ? Éí tʼáá aʼohígo haíʼnil, áko biniinaa bikʼee doo ákójítʼée da doo ńtʼééʼ. Ndi, haajiidzaa?

9. Jesus éí naaki góneʼ naalʼaʼí haʼátʼíí tʼáadoo yidííniid da? (Matthew 25:22, 23)

⁹ Matthew 25:22, 23 yíníłtaʼ. Jesus éí naaki góneʼ naalʼaʼí tʼáá aʼohígo tálent baíʼnilgi tʼáadoo yikʼee báhóóchįįd da, doo níi da. Éí saad hółǫ́ǫgo haadzííʼ, doo yiłníigo yá haadzíiʼ da: ‘Tʼáásh díí tʼéiyá sháínínil? 5go báínínilígíí, tʼáá hó ájítʼéhígi átʼéego naashnish! Shinanitʼaʼí doo shaa ahééh jinízingóogo éí díí béeso tʼóó łeeh deeshniłgo tʼáá shí ádá naashnish doo, hó éí dooda.’

10. Naaki góneʼ naalʼaʼí éí tálents baíʼnil yę́ę haitʼéego choyoosʼįįd?

¹⁰ Áłtsé naalʼaʼí átʼéhígi átʼéego, naaki góneʼ naalʼaʼí éí naanish hąąh niilyáhígíí ílíinii átʼé jinízin, áko hananitʼaʼí yéigo bá nijishnish. Tálent naaki haíʼnil yę́ę naakidi há bínániideeʼgo hananitʼaʼí éí nitsaago yee hakʼihasdliʼ. Honanitʼaʼí yéigo bił hózhǫǫd áádóó naanish łaʼ haa náádeetʼą́!

11. Haitʼéego ayóó nihił hózhǫ́ǫ doo?

¹¹ Tʼáá ákótʼé, Jiihóvah bá naʼaʼaʼgi yéigo bidiilkaalgo ayóó yee ił hóshǫ́. Éí nahaneʼgi ‘tʼáadoo áhodiilzéhí’ doo, áádóó congregationgi naanish ádaatʼéii yéigo łahdóó bee áká anéiilwoʼ doo. (Acts 18:5; Heb. 10:24, 25) Áłah néidleehgóó baa ídahwiilʼaahígíí biiʼdóó  éí saad bee haʼahóní dooleełii łaʼ bee comment áʼdiilníiłgo biniyé hashtʼéédiitʼįįh. Midweek áłah néidleehígíí íhooʼaah biniyé łaʼ naa nídítʼáhígíí ílı̨́įgo baa nitsíníkees. Congregationgi naanish łaʼ bee naʼahoosdlíiʼgo tsı̨́įłgo ádíílííł. Naanish áníłʼínígíí tʼáadoo biniyéhí da, tʼáadoo níníziní. Naanish álʼı̨́įgi yiichįįhgo áʼdílnééh. (Prov. 22:29) Jiihóvah bá naʼaʼaʼgi yéigo bidiilkaalgo éí Jiihóvah bikʼis ídlı̨́įgi bidziilgo nihił hózhǫ́ǫ doo. (Gal. 6:4) Áádóó naanish nínízin yę́ę łahjída łaʼ baa deetʼą́ągo éí tʼóó bá baa nihił hózhǫ́ǫgo doo.—Rom. 12:15; Gal. 5:26.

12. Melissa dóó Nick haʼátʼíí ádzaago bił hóshǫ́ǫgo ábiilaa?

¹² Melissa éí Béthelgóó doodaiiʼ School for Kingdom Evangelizers bá óltaʼgóó deeshááł nínę́ę́sh béénílniih? Éí azhą́ doo há bohónéedzą́ą da ndi, kójíní: “Pioneer éʼéshʼı̨́įgi yéigo bidiishkaal áádóó ałʼąą ádaatʼéégóó nahaneʼgi choidooʼįįłígíí nabíníshtaah. Kótʼéego ayóó shił hóshǫ́.” Áádóó Nick éí ministerial servant jidooleeł yę́ęgi tʼóó łahjída baa nídítʼáahgo haitʼéego tʼóó haʼjólníí ńtʼééʼ? Ájíní: “Bíneeshʼáanii tʼéiyá baa naashá, éí nahaneʼgi índa áłah néidleehgi saad bee haʼahóníii bee comment áʼdeeshłíłígíí tʼéiyá baa nitséskees. Béthelgóó ałdóʼ biniyé haʼdiishłaa áádóó éí nááhaidóó bikʼijįʼ lą shidóʼniid.”

13. Ninaanish yéigo bidinilkaalgo haitʼéego nihíká adoolwoł? (Ecclesiastes 2:24)

¹³ Kʼad ninaanish áníłʼínígíí yéigo bidinilkaalgo, éísh naanish łaʼ naa náádidootʼááł? Nick ábiʼdilyaaígi átʼéego ákódooníiłgo átʼé. Ndi, Melissa éí tʼáadoo da, éí tʼóó hoł hózhǫ́ǫgo Jiihóvah bá joolnishgo bizhdiilkaalgo áʼjiilaa. (Ecclesiastes 2:24 yíníłtaʼ.) Áádóó naanish bidiilkaalgo bee nihiNaatʼáanii Jesus Christ bił honishǫ́ǫgo átʼéegi éí bee nił hózhǫ́.

14. Jiihóvah bá neiilʼaʼgi haʼátʼíí bénéiilniih doo?

¹⁴ Azhą́ kʼad éí Jiihóvah bá neiilʼaʼgi yéigo bidiilkaal ndi, éísh ląʼígóó bá ánááneitʼı̨́į dooleełgi tʼáá biʼohígo bee íitʼı̨́į doo? Nda shı̨́ı̨́! Nahaneʼgi índa naʼnitingi yéigo yiichįįh dooleełgo bee ádá nahwiitʼáa doo, áádóó brothers dóó sisters bíká anéiilwoʼ doo. Áko baa honiidzą́ągo náánáłaʼda bíká adiilwołgo nitsíikeesgo díí tʼáá átʼé nihá bohooníił doo.—Prov. 11:2; Acts 20:35.

15. Haʼátʼíí bee ádá nihoyiiʼaahgo bee nił hózhǫ́?

¹⁵ Haʼátʼíí bee ádá nihoyiiʼaah doo? Jiihóvah éí bee ádá nihodiyeeshʼáałii bíneeshʼánígíí łaʼ bee shíká anílyeed bidiníigo bichʼįʼ sodilzin. (Prov. 16:3; Jas. 1:5)  Wóltaʼ 1 góneʼ chʼídaastʼánę́ę łaʼ bínítááh. Éí auxiliary doodaiiʼ regular pioneer, Bétheldi naʼanish, doodaiiʼ Jiihóvah kin bá nidaaʼnilgóó biʼoonishgi bee atah naʼanish. Éí doodaiiʼ náánáłaʼ saad bee yádaatiʼii índa nahaneʼgi ałʼąą ádaatʼéégóó bee nahaneʼ dooleełgi bíhoołʼaah. Díí hazhóʼó shił bééhodoozįįł nínízingo éí naaltsoos Organized to Do Jehovah’s Will wolyéhígíí biiʼdóó nił ííshjání íidoolííł. * Díí nabínítaahgo éí Jiihóvah bá naʼaʼaʼgi yéigo bidinilkaalgo átʼéegi binaadę́ę́ʼ yee hadanisíidgo átʼé. Áádóó nił hózhǫ́ǫgo ánoolííł.

16. Bíhodínóotah dooleełii łaʼ doo ná ánééhgóogo haitʼéego áʼdíílííł?

 ¹⁶ Díí bíhodínóotah dooleełii chʼídaastánígíí łaʼ doo ná ánééhgóoshąʼ? Bíninilʼánígíí bee ádá nihoyiiʼaah. Éí łaʼ kódaatʼéhígíí baa nídadíitʼįįł.

17. Brothers yáʼátʼéehgo naʼnitinii dooleełgi 1 Timothy 4:13, 15 éí haʼátʼíí ní?

¹⁷ 1 Timothy 4:13, 15 yíníłtaʼ. Brother baptize ániʼdiilyaago yáʼátʼéehgo speaker doodaiiʼ naʼnitinii ídlı̨́į dooleełgi bee ádinanilnish. Háálá naaltsoos yíníłtaʼgi, diné bichʼįʼ yáníłtiʼgi, índa naʼnítingi éí daníistsʼą́ąʼii nikʼidaʼdiitįįh doo. Naaltsoos Óltaʼ dóó Naʼnítinígíí Hazhóʼó Binanilnish wolyéhígíí baa íhoołʼaahgo bikʼehgóó íʼíłʼı̨́į dooleełgo baa nitsíníkees. Tʼááłaʼí níʼą́ągo baa íhoołʼaah, tʼáá nighangi nabínítaah, áádóó talk naa nídítʼáahgo bikʼehgóó anáʼiinilʼįįh. Auxiliary counselor doodaiiʼ elderda łaʼ shíká anílyeed nábidiʼniih. Háálá éí ‘haneʼ yáʼátʼéehii yaa dahalneʼgo índa nidaʼnitingo yindaalnish.’ * (1 Tim. 5:17) Bikʼehgo áʼdíílíiłgi tʼáadoo tʼáá éí tʼéí baa nitsíníkeesí, ndi daniistsʼą́ąʼii nikʼidadiʼdootı̨́įłgi doodaiiʼ yikʼeh ádaʼdoolíiłgi ałdóʼ bee bíká adiilwoł. Áko tʼáá ánółtso nihił dahózhǫ́ǫ doo.

18. Nahaneʼgóó haʼátʼíí áká análwoʼgo bee ádá nihodiyiitʼaahii nihá bohooníiłgo áyoolíił doo?

¹⁸ Tʼáá áníiltso éí nahaneʼgi índa íhoołʼaahii ádoolníiłgi nihindaanishgo nihąąh niilyá. (Matt. 28:19, 20; Rom. 10:14) Díí binaʼanishgi tʼáá yédígo yiishchįįh dooleełísh nínízin? Naaltsoos Naʼnitinígíí baa ííníłtaʼ áádóó bitsʼą́ą́dóó íhwiiniłʼą́ʼígíí bikʼeh  áʼdíílíiłgo bee ádá nihodiyiiʼaah. Naaltsoos Jesus Bedaʼiilʼı̨́įgo Dahiniiʼná Dóó Nidaʼniitin–Naaltsoos Bee Íhooʼaah ałdóʼ biiʼdóó níká adoolwoł, éí hazhóʼó diné bił nahaneʼgo ndaalkidgo ádaalyaaígíí ałdóʼ áká adoolwoł. Ałʼąą ádaatʼéégóó nabínítaahgo éí bitsʼą́ą́dóó yáʼátʼéehgo ná ááníłígíí bee áʼíłʼı̨́. Díí bikʼeh áʼíłʼı̨́įgo éí naʼnitinii dóó nahalneʼii yiyiichįįhii nilı̨́įgo nił hózhǫ́ǫgo yínáał doo.—2 Tim. 4:5.

19. Bee éʼétʼéii Diyin bee bił hóshóonii haitʼéego bee ádijoolnish doo?

¹⁹ Bee éʼétʼéii Diyin bee bił hóshóonii bee ádijoolnish dooleełgo éí doo baa hodiyooʼnah da. (Gal. 5:22, 23; Col. 3:12; 2 Pet. 1:5-8) Éí haitʼéego áʼdíílííł? Sheʼoodląʼ bidziilgo ádeeshłííł shı̨́ı̨́ nínízin. Nihipublications łaʼ kódaatʼéégóó yaa halneʼígíí łaʼ baa íídííłtah. Áádóó JW Broadcasting^® biiʼ éí brothers dóó sisters ałʼąą ádaatʼéégóó nabídahonitaah ndi, bedaʼoodląʼ bidziilgo ádayósin ńtʼéeʼgo yee ádaa dahalneʼgo ndaalkidígíí ninááł nidoolkił. Áádóó éí bitsʼą́ą́dóó haitʼéego beʼdíílíiłgi baa tsídííkos.

20. Haʼátʼíí íiʼníiłgo nihił dahózhǫ́ǫgo doo nihąąh nááhwiikaʼ da doo?

²⁰ Tʼáá áníiltso éí wołí bee Jiihóvah bá ádeitʼı̨́į doo daniidzin. Nahasdzáán bikááʼ ániid náhodeesdzáago tʼáá níítʼéiijįʼ Jiihóvah bá ádeitʼı̨́į doo. Ndi kʼad éí tʼáá bídaniilʼáanii bee ádeitʼı̨́, éí nihił dahóshǫ́, áko doo nihąąh nidahwiikaad da. Íiyisíí éí Jiihóvah “Diyin bił hózhóonii” baa dahwiiʼniih. (1 Tim. 1:11, NW) Éí bąą nihee hólóonii bee nihił hózhǫ́ǫgo yiidáał doo!