EKICWEKA EKY’OKWEGA 33
Yesiimire omu Bujunaanizibwa Obu Oine
“Okushemerererwa ebi orikureeba nikikira okuguma noozengyereza omutima aha bi orikwetenga.”—MUB. 6:9.
EKYESHONGORO 111 Ebirikutureetera Kushemererwa
EBIRAAGAMBWEHO *
1. Baingi batwarize bata ahabw’ekyetengo ekiriho omu buheereza?
TWINE bingi by’okukora obu emperu y’ensi egi eri haihi kuhika. (Mat. 24:14; Luk. 10:2; 1 Pet. 5:2) Twena nitwenda kuheereza Yehova nk’oku turikubaasa. Baingi bariyo nibongyera aha buheereza bwabo. Abamwe nibenda kuba baapayoniya. Abandi nibenda kuheereza aha Beseeli nari kuhwera omu kwombeka ebyombeko by’Obukama. Kandi ab’eishe-emwe baingi nibakununkirira kuhikiiriza ebirikwetengyesa kubaasa kuba abaheereza nari abareeberezi. (1 Tim. 3:1, 8) Ka nikishemeza Yehova kureeba abantu be baine omutima gw’okuheereza beekundiire!—Zab. 110:3; Isa. 6:8.
2. Nitubaasa kwehurira tuta twaba tutahikiriize ebigyendererwa byaitu ebimwe eby’omwoyo?
2 Kwonka nitubaasa kutandika kwerarikirira, haahinguraho obwire buraingwa tutakahikire aha bigyendererwa byaitu eby’omwoyo. Nari nitubaasa kwetamwa twaba tutatugire obujunaanizibwa obumwe ahabwa bukuru nari ahabw’enshonga ezindi. (Enf. 13:12) Eki nikyo kyahikire ahari Melissa. * Akaabaire naayenda kuheereza aha Beseeli nari kuza omu Ishomero ry’Ababuurizi b’Obukama, kwonka naagira ati: “Ndeengize emyaka. Hati ahariinye, obuheereza obwo n’ekirooto burooto. Obumwe, ninyehurira kubi.”
3. Abamwe nikibaasa kubeetengyesa kubanza kukora ki kubaasa kuheebwa obujunaanizibwa obumwe?
3 Eminyeeto abamwe kandi abaine amagara marungi nibaba baine kutegyerezaho kugira emitwarize erikwetengyesa kubaasa kwongyerwa obujunaanizibwa. Nibabaasa kuba baine obwengye, barikurahuka kucwamu kandi beeteekateekire, kwonka nibaba baine kwongyera kuba abagumisiriza, kukora gye emirimo n’obwegyendesereza n’okuha abandi ekitiinisa. Waafayo kugira emitwarize erikwetengyesa, noobaasa kuheebwa obujunaanizibwa omu bwire obu obaire otarikuteekateeka kubutunga. Teekateeka aha ky’okureeberaho kya Nick. Obu yaabaire aine emyaka 20, akeehurira kubi munonga ahabw’okutatooranwa kuba omuheereza omu kibiina. Naagira ati: “Nkeehurira nk’oine ekirikumburaho.” Kwonka Nick tarahanikire akabirugaho. Akagumizamu naahikiiriza buri bujunaanizibwa bwona obu arikuheebwa. Hati naaheereza aha Kakiiko k’Eitaagi.
4. Nituza kushwijuma ki omu kicweka eki?
4 Mbwenu shi nooyehurira kubi ahabw’okugira ngu tokahikire aha kigyendererwa kyawe eky’omwoyo? Kyaba nikwo kiri, kigambire Yehova omu kushaba. (Zab. 37:5-7) Kandi, buuza ab’eishe-emwe abakuzire omu by’omwoyo kukugambira ahu oine kuboneza omu kuheereza Ruhanga, kandi teeraho kugyendera aha buhabuzi bwabo. Waakikora, noija kuheebwa obujunaanizibwa obwo nari kuhika aha kigyendererwa kyawe. Kwonka nka Melissa owaaba yaagambireho, obujunaanizibwa obumwe noobaasa kutabuheebwa hati. Mbwenu noija kukora ki? Noobaasa kuguma ota oine okushemererwa? Ekicweka eki nikiza kutuhwera kugarukamu ekibuuzo ekyo, kirikworeka (1) ahu orikubaasa kwiha okushemererwa, (2) oku orikubaasa kukwongyeraho, (3) n’ebigyendererwa ebi orikubaasa kutaho kwongyera aha kushemererwa kwawe.
AHU ORIKUBAASA KWIHA OKUSHEMERERWA
5. Kubaasa kushemererwa, twine kuta omutima ahari ki? (Omubuurizi 6:9)
5 Nk’oku kiri omu Omubuurizi 6:9, nitutunga okushemererwa twakusherura omu mwanya oguhikire. (Kishome.) Omuntu orikushemerererwa omu ‘bi arikureeba’ naasiima ebi aine, nk’embeera ezi arikuba arimu. Okutaana n’ekyo, omuntu orikuzengyereza omutima aha bi arikwetenga naaguma naayegomba ekintu eki atarikubaasa kutunga. Eki nitukyegyeraho ki? Kubaasa kutunga okushemererwa, twine kuta omutima aha ki twine, kandi eki turikumanya ngu nikibaasika kukitunga.
6. Hati nituza kushwijuma nfumu ki, kandi omutima nituza kuguta ahari ki?
6 Nikibaasika buzima kumarwa n’ebi oine? Ahakuba omu buhangwa, obwire bwahinguraho, nituba nitwenda kwega kukora ebintu bisya. Eego, buzima nikibaasika. Nitubaasa kushemererwa beitu kutari kuhamiza amaisho gaitu aha bi turikureeba byonka. Ekyo nitubaasa kukikora tuta? Ka tushwijume enfumu ya Yesu ey’etalanta eri omuri Matayo 25:14-30. Nituza kwetegyereza oku enfumu egyo erikutwegyesa aha kutunga okushemererwa, n’oku turikubaasa kukwongyeraho ahabw’emigisha ei twine hati.
OKU ORIKUBAASA KWONGYERA AHA KUSHEMERERWA KWAWE
7. Gamba omu bugufu ebiri omu nfumu ya Yesu.
7 Omu nfumu egyo, omushaija akaba ari haihi kuza omu rugyendo. Atakagyenzire, akeeta abahuuku be buri omwe yaamuha etalanta kuzishuubuza. * Omushaija ogu ahabw’okumanya okubaasa kw’abahuuku be, omwe akamuha etalanta itaano, ondiijo yaamuha ibiri, n’ondiijo yaamuha emwe. Omuhuuku ow’okubanza n’owa kabiri bakakoresa gye etalanta ezi baahairwe. Kwonka owa kashatu, tarashuubwize esente ezi yaahairwe, mukama we akamubiga omu buheereza bwe.
8. Niki ekyabaire nikiija kureetera omuhuuku ow’okubanza kushemererwa?
8 Omuhuuku ow’okubanza naabaasa kuba yaareebire ngu n’omugisha gw’amaani mukama we kumuha etalanta itaano. Ezo zikaba ziri esente nyingi munonga, kandi kikooreka ngu mukama we naamwesiga! Kandi shi omuhuuku owa kabiri? Akaba naabaasa kwehurira kubi ahakuba tarahairwe etalanta nyingi nk’omuhuuku ow’okubanza. Kwonka shi akatwaza ata?
Nitubaasa kwegyera ki aha muhuuku owa kabiri omu nfumu ya Yesu? (1) Mukama we akamutsigira etalanta ibiri. (2) Akakora munonga kutungira mukama we amagoba. (3) Etalanta ezi mukama we yaamuhaire akagobesamu kabiri (Reeba akacweka 9-11)
9. Niki eki Yesu ataragambire aha muhuuku owa kabiri? (Matayo 25:22, 23)
9 Shoma Matayo 25:22, 23. Yesu taragizire ngu omuhuuku owa kabiri akaguubwa kubi nari kugira enziika ahabw’okuheebwa etalanta ebiri zonka. Kandi Yesu taragizire ngu omuhuuku ogwo akeetomboita ati: ‘Ezi nizo nyine kutunga zonka? Ahakuba naanye nyine okubaasa nk’omuhuuku owaaheebwa etalanta itaano! Mukama wangye ku araabe atarikusiima ebi ndikukora, naanye naaza kuziika etalanta ezo nze kukora ebyangye.’
10. Omuhuuku owa kabiri akakoresa ata etalanta ezi yaahairwe?
10 Nk’omuhuuku ow’okubanza, owa kabiri akatwara obujunaanizibwa obu yaahairwe nka bukuru, reero yaakora n’amaani kuheereza mukama we. N’ekyarugiremu, akagobesamu kabiri etalanta ezi mukama we yaamuhaire. Ahabw’okukora n’obweziriki akatunga emigisha. Mukama we taramusiimire kyonka kureka akamwongyera n’obujunaanizibwa obundi!
11. Nitubaasa kwongyera tuta aha kushemererwa kwaitu?
11 Nikyo kimwe, nitubaasa kwongyera aha kushemererwa kwaitu turikwejumbira kimwe omu kukora kyona eki turikuheebwa omu buheereza bwa Yehova. Ba oyeteekateekire kwemarira aha murimo gw’okubuurira n’omu buheereza bw’ekibiina obundi. (Byak. 18:5; Heb. 10:24, 25) Za omu nteerane otebeekaniise eby’okugarukamu ebirikwombeka ebirikuhikaana n’ebi muriyo nimwega. Waaheebwa ekicweka omu nteerane z’aha gati ya saabiiti kitware nka kikuru. Waashabwa kugira eki waakora omu kibiina, ba oriho kukikora kandi okikore omu bwire. Kyona eki orikushabwa kukora kitware nka kikuru kandi eki oine kumariraho obwire bwawe. Yongyera kuboneza emyoga yaawe. (Enf. 22:29) Waayemarira aha by’omwoyo n’obujunaanizibwa obu orikuheebwa, noija kurahuka kutunguuka n’okugira okushemererwa kwingi. (Gal. 6:4) Kandi nikiija kukworobera kushemererwa n’abandi baaheebwa obujunaanizibwa obu orikwenda kutunga.—Rom. 12:15; Gal. 5:26.
12. Abajurizi ba Yehova babiri bakakora ki kwongyera aha kushemererwa kwabo?
12 Ijuka munyaanyazi-itwe Melissa owaabaire naayenda kuza kuheereza aha Beseeli, nari omu ishomero ry’Ababuurizi b’Obukama? N’obu ekyo kitarabaasikire, naagira ati: “Niinteeraho kwejumbira kimwe omu bwapayoniya bwangye na byona ebirikutwarirwa omu kuba payoniya. Eki kindeeteire okushemererwa kwingi.” Kandi Nick akasingura ata okwehurira kubi ahabw’okutatooranwa kuba omuheereza? “Nkata omutima aha bujunaanizibwa obu naabaire nyine, nk’okwejumba omu kubuurira n’okugarukamu omu nteerane ebirikwombeka. Kandi nkaijuza foomu kuza aha Beseeli, kandi nketwa kuzayo omwaka ogwakuratsireho.”
13. Nihaija kubaho ki waayemarira aha buheereza obu oine hati? (Omubuurizi 2:24)
13 Waayemarira aha bujunaanizibwa obu oine hati, noija kuheebwa obujunaanizibwa oburikukiraho omu biro by’omumaisho? Ekyo nikibaasa kubaho nk’oku kyahikire ahari Nick. Kwonka kyaba kitabaire kityo, nabwo noija kwongyera kushemererwa nka Melissa, kandi noija n’okugira okumarwa abw’ebi orikubaasa kukora. (Shoma Omubuurizi 2:24.) Kandi hatariho kubangaanisa, noija kushemererwa ahabw’okumanya ngu okuteeraho kwawe nikushemeza Mukama waitu Yesu Kristo.
EBIGYENDERERWA EBIRIKWONGYERA AHA KUSHEMERERWA
14. Aha bikwatiraine n’ebigyendererwa by’omwoyo, twine kuguma nitwijuka ki?
14 Mbwenu shi okuta omutima aha buheereza obu twine hati, nikimanyisa ngu titwine kusherura oburyo bw’okwongyera aha buheereza bwaitu? Ngaaha buzima! Twine kutaho ebigyendererwa by’omwoyo ebirikutuhwera kwongyera kukununkirira kutunga ebirungi omu buheereza, kandi ebirikugasira ab’eishe-emwe na banyaanyazi-itwe. Nituba abasinguzi twacwamu omu muringo gw’obwengye kandi ogw’obucureezi turikuta omutima aha kuheereza abandi omu mwanya gw’okwebembeza ebyaitu.—Enf. 11:2; Byak. 20:35.
15. Ni bigyendererwa ki ebimwe ebirikubaasa kukuhwera kwongyera aha kushemererwa kwawe?
15 Noobaasa kweteeraho bigyendererwa ki? Shaba Yehova kukuhwera kumanya ebigyendererwa biringaniire ebi orikubaasa kuhikiiriza. (Enf. 16:3; Yak. 1:5) Noobaasa kutaho nk’ebigyendererwa ebyagambwaho omu kutandika kw’ekicweka eki, nk’okuba payoniya omuhwezi, payoniya ow’obutwire, okuheereza aha Beseeli, nari okwombeka ebyombeko by’obukama? Nari noobaasa kwega orurimi rusya kubaasa kubuzya amakuru marungi nari kubuurira omu ihanga erindi. Noobaasa kumanya ebirikutwarirwamu orikushoma ebiri omu shuura 10 ey’akatabo Organized to Do Jehovah’s Will, kandi ogaaniireho n’abareeberezi b’ekibiina kyawe. * Ku orikuguma nooteeraho kuhika aha bigyendererwa nk’ebyo, okutunguuka kwawe nikwija kureebwa butunu, n’okushemererwa kwawe nikwija kweyongyera.
16. Noobaasa kukora ki hati waaba otarikubaasa kuhika aha kigyendererwa nanka?
16 Kwonka shi hati ku waakuba otarikubaasa kuhika ahari kimwe aha bigyendererwa ebyagambwaho? Ekikuru n’okutaho ekigyendererwa kiringaniire eki orikubaasa kuhikiiriza. Teekateeka ahari bimwe ebiri ahaifo.
Ni bigyendererwa ki ebimwe ebi orikubaasa kutaho? (Reeba akacweka 17) *
17. Kurugiirira ahari 1 Timoseo 4:13, 15, ow’eishe-emwe naabaasa kukora ki kuba omwegyesa murungi?
17 Shoma 1 Timoseo 4:13, 15. Ku oraabe ori ow’eishe-emwe obatiziibwe, noobaasa kukora n’amaani kwongyera kuba omugambi murungi n’omwegyesa murungi. Ahabw’enki? Ahakuba waata omutima aha kushoma, okugamba, n’okwegyesa noija kugasira abarikukuhurikiza. Teeraho kutaho ekigyendererwa ky’okushoma n’okugyendera aha buri ishomo eriri omu katabo Ba Omweziriki omu Kushoma N’omu Kwegyesa. Yega buri ishomo, yegyezemu munonga waaba okiri omuka, kandi teeraho kugyendera aha ishomo eryo omu mbazo zaawe. Shaba obuhwezi orikuhwera omu kuha obuhabuzi nari abareeberezi abandi “abarikukora omurimo gw’okubuurira n’okwegyesa.” * (1 Tim. 5:17) Otata omutima aha kumanya obukoryo kyonka, beitu gute n’aha kuhwera abahurikize kuhamya okwikiriza kwabo, nari kubahiga kugira ebi baagyenderaho. Waakora otyo, noija kwongyera aha kushemererwa kwawe n’okwabo.
Ni bigyendererwa ki ebimwe ebi orikubaasa kutaho? (Reeba akacweka 18) *
18. Niki ekirikubaasa kutuhwera kuhika aha bigyendererwa byaitu omu buheereza?
18 Twena twine obujunaanizibwa bw’okubuurira n’okuhindura abantu abeegi. (Mat. 28:19, 20; Rom. 10:14) Nooyenda kwongyera kuboneza obukoryo bwawe omu murimo mukuru ogu? Taho ekigyendererwa waaba nooyeyegyesa kandi ote omu nkora obuhabuzi oburi omu katabo Okwegyesa. Noobaasa n’okutunga obuhabuzi obundi omu katabo Obuheereza Bwaitu n’Oku Turikutwaza na vidiyo z’ebi turikubaasa kugaaniiraho ezirikworekwa omu nteerane z’aha gati ya saabiiti. Teeraho kukoresa emiringo etari emwe n’emwe kumanya ogurikubaasa kukukorera gye. Waakuratira obuhabuzi obwo, noija kutunga okushemererwa okurikuruga omu kuba Omukristaayo oine omwoga gw’okwegyesa.—2 Tim. 4:5.
Ni bigyendererwa ki ebimwe ebi orikubaasa kutaho? (Reeba akacweka 19) *
19. Noobaasa kugira ota emitwarize y’Ekikristaayo?
19 Waaba nooteekateeka aha bigyendererwa, otakaayebwa ekigyendererwa kikuru, okugira emitwarize y’Ekikristaayo. (Gal. 5:22, 23; Kol. 3:12; 2 Pet. 1:5-8) Ekyo noobaasa kukikora ota? Ka tugire ngu nooyenda kwongyera kuhamya okwikiriza kwawe. Noobaasa kushoma ebicweka ebirikwizira omu bitabo byaitu ebirikworeka ebi orikubaasa kukora kuhamya okwikiriza kwawe. Buzima noija kugasirwa waareeba ebiri aha JW Broadcasting® ebirikworeka oku ab’eishe-emwe na banyaanyazi-itwe baagumire baine okwikiriza kw’amaani omu okugyezibwa kutari kumwe na kumwe. Reero oteekateekye aha ku orikubaasa kubatooreza okagira okwikiriza nk’okwabo.
20. Nitubaasa kwongyera tuta aha kushemererwa kwaitu, reero tukatuubya aha kwehurira kubi?
20 Hatariho kubangaanisa twena nitubaasa kwongyera kukora bingi omu kuheereza Yehova kukira aha bi turikukora hati. Omu nsi ensya, nitwija kubaasa kuheereza Ruhanga omu bwijwire. Obwire obwo butakahikire, ka tukorese buri mugisha gwona ogu twine kwongyera aha kushemererwa kwaitu, n’okutuubya aha kwehurira kubi oku turikubaasa kuba twine. Kandi ekikuru munonga, nitwija kuhaisa ekitiinisa Yehova Ruhanga waitu orikushemererwa kandi tumuhimbise. (1 Tim. 1:11) N’ahabw’ekyo, ka tutungye okushemererwa omu bujunaanizibwa obu twine hati!
EKYESHONGORO 82 ‘Jwisa Omushana Gwawe’
^ kacw. 5 Nitukundira kimwe Yehova, kandi nitwenda kumuheereza nk’oku turikubaasa. N’ahabw’ekyo, nitubaasa kugira ekihika ky’okwongyera aha buheereza bwaitu ahabw’okwenda kuheebwa obujunaanizibwa obundi omu kibiina. Kwonka shi ku twakuteeraho nk’oku kirikubaasika, tukaremwa kuhikiiriza ebigyendererwa ebimwe? Nitubaasa kukora ki kuguma nituheereza twine okushemererwa? Eky’okugarukamu kiri omu ky’okureeberaho kya Yesu eky’etalanta.
^ kacw. 2 Amaziina agamwe gahindwirwe.
^ kacw. 7 EBISHOBOOROIRWE: Etalanta ekaba neingana n’esente ezi omukozi owa butoosha yaabaire naabaasa kukorera emyaka 20.
^ kacw. 15 Ab’eishe-emwe ababatiziibwe nibahigwa kuteeraho kuba abaheereza nari abareeberezi. Okumanya ebirikwetengyesa, reeba eshuura 5 na 6 ey’akatabo Organized to Do Jehovah’s Will.
^ kacw. 17 EBISHOBOOROIRWE: Orikuhwera omu kuha obuhabuzi n’omureeberezi otoorainwe kuha abareeberezi n’abaheereza obuhabuzi omu mubonano aha bikwatiraine n’ebicweka ebi barikwebembera omu kibiina.
^ kacw. 64 ENSHOBOORORA Y’EKISHUSHANI: Ow’eishe-emwe kubaasa kuhika aha kigyendererwa kye ky’okuba omwegyesa murungi, naacondooza omu bitabo.
^ kacw. 66 ENSHOBOORORA Y’EKISHUSHANI: Munyaanyazi-itwe bwanyima y’okutaho ekigyendererwa ky’okubuurira kitaraariire, naaha omugabuzi kaada ya jw.org.
^ kacw. 68 ENSHOBOORORA Y’EKISHUSHANI: Ahabw’okuhigwa emitwarize y’Ekikristaayo, yaaha Omukristaayo mugyenzi we ekiconco.
