NKHANI YAKUPFUNZA 33
Mbakondwani na Bzinthu Bzomwe Mumbakwanisa Kucitira Yahova
‘Kuli bwino kukomedwa na bzomwe maso yakuwona sikuti na bzomwe mtima ukukhumba.’—MPALIZI 6:9.
NYIMBO 111 Bzomwe Bzimbatikondwesa
BZOMWE TIN’PFUNZA *
1. Kodi n’ciyani comwe abale azinji akucita kuti athimizire utumiki bwawo?
PAKUTI dzikoli lasala pang’ono kumala, ifepano tina basa lizinji lakucita. (Mateu 24:14; Luka 10:2; 1 Pedru 5:2) Tentsenefe tikufuna kucita nyongo ikulu kwene-kwene pa kutumikira Yahova. Azinji akuthimizira utumiki bwawo. Winango akufuna kucita upainiya. Ndipo winango akufuna kutumikira pa Beteli ayai kuthandizira pa basa lakumanga-manga. Ndipombo abale azinji akucita ciri-centse comwe angakwanise kuti athemere kutumikira ninga atumiki wakuthandiza ayai akulu wa gwere. (1 Timotio 3:1, 8) Yahova ambakomedwa kwene-kwene akambawona atumiki wace akucita ciri-centse comwe angakwanise kuti amutumikire!—Psalymo 110:3; Zaiya 6:8.
2. Kodi tingabzibve tani penu tiribe kukwanisa kucita bzomwe tikhafuna pa kutumikira Yahova?
2 Tsono tingagoboke m’mabondo tikasaya kukwanisa kucita bzomwe tikhafuna pa kutumikira Yahova ayai tingasuname tikasaya kucita bzinthu bzinango mu gulu la Yahova thangwe ra kukalamba ayai thangwe ra bzinthu bzinango. (Mimwani 13:12) Bzimwebzi ni bzomwe bzidacitikira Melissa. * Iye akhafuna kutumikira pa Beteli ayai kupita Xikola ya Apalizi wa Umambo. Tsono iye adati: “Ndiribe kukwanisa thangwe rakuti magole yangu yakhadapitirira. Nthawe zinango bzimbandiwawa.”
3. Kodi mpsinthu bziponi bzomwe wanthu winango angacite kuti athemere kupasidwa udindo?
3 Winango omwe ni maswaka ndipo ana manungo yabwino angafunike kukhwima na kulatiza makhalidwe yabwino kuti athemere kupasidwa maudindo yakuthimizirika. Mwa ciratizo, winango angakhale na nzeru kwene-kwene, angambakwanise kucita bzinthu mwakamfulumize, ndipo angakhale wakubzipereka pa basa. Tsono iwo angafunike kupfunza kukhala wakupirira, kucita basa lawo mwakusaya kuthamanga na kupfunza kulemekeza wanthu winango. Imwepo mukacita nyongo yakukhala na makhalidwe yabwino, abale angakupaseni udindo. Onani bzomwe bzidacitika na Nick. Pomwe iye akhana magole 20, adasunama kwene-kwene thangwe rakuti alibe kuikhidwa kukhala mtumiki wakuthandiza. Iye adati: “Inepano ndikhakumbuka kuti pinango pana cinthu cakuphonyeka comwe ndacita.” Tsono Nick alibe kubwerera m’mbuyo. Iye adacita nyongo m’gwere na pa basa lakupalizira. Tsapano iye akutumikira m’Komiti ya Mthambi.
4. Kodi mu nkhani ino tin’cezerana ciyani?
4 Kodi imwepo mudasunama thangwe rakuti mukanati kukwanisa kucita bzomwe mukufuna pa kutumikira Yahova? Penu n’tenepo, muuzeni Yahova momwe mukubvera. (Psalymo 37:5-7) Ndipo cinthu cinango, kumbirani abale wakukhwima kuti akuthandizeni kuwona bzomwe mungacite kuti mucite bzizinji pa kutumikira Yahova. Ndipo yezerani kucita ciri-centse comwe mungakwanise kuti muphatise basa malango yawo. Mukateweza malangoyo, imwepo mun’dzakwanisa kucita bzomwe mukufunabzo. Tsono penu nkhani yanu njakundendemerana na ya Melissa, omwe afotokozedwa kale ule, pinango-pentse bzomwe mukufuna kucita pa kutumikira Yahova bzingakwanisike lini pakali pano. Tsono n’ciyani comwe mungacite kuti mupitirize kukhala wakukondwa? Kuti titawire mbvunzoyu, nkhani ino in’fotokoza (1) comwe cingakuthandizeni kukhala wakukondwa, (2) momwe mungapitirizire kukhala wakukondwa na (3) bzakulinga bzomwe mungacite bzomwe bzingakuthandizeni kupitiriza kukhala wakukondwa.
BZOMWE BZINGATITHANDIZE KUKHALA WAKUKONDWA
5. Kodi mpsiponi bzomwe tin’funika kucita kuti tikhale wakukondwa? (Mpalizi 6:9)
5 Mpalizi 6:9 ambafotokoza bzomwe bzingatithandize kukhala wakukondwa. (Werengani.) Munthu omwe ambakomedwa na ‘bzomwe maso yakuwona’ ambatenda bzomwe anabzo pa nthaweyo. Tsono, munthu omwe ambalinga bzomwe mtima umbakhumba iye ambakhumba cinthu comwe angakwanise lini kukhala naco. Tenepo, kodi tikupfunza ciyani pamwepa? Kuti tikhale wakukondwa, tin’funika kukomedwa na bzomwe tinabzo na kukhumba kukhala na bzinthu bzomwe tingakwanise kukhala nabzo.
6. Kodi tin’cezerana ciratizo ciponi, ndipo tin’pfunza ciyani na ciratizoco?
6 Kodi mungakwanisedi kukhala wakukondwa na bzomwe munabzo kale? Wanthu azinji ambakumbuka kuti mpsakukwanisika lini thangwe timbakomedwa kupitiriza kupfunza momwe tingacitire bzinthu bzipsa. Tsono mpsakukwanisika. Kulewa cadidi ifepano tingakondwe na bzinthu bzomwe tinabzo pa nthawe imweyo. Kodi bzingacitike tani? Kuti tidziwe, bwerani ticezerane ciratizo ca Jezu cakulewa bza matalento, comwe ciri pa Mateu 25:14-30. Tin’pfunza momwe tingakhalire wakukondwa na momwe tingathimizirire kukondwa kwathu na bzinthu bzomwe tikucita.
MOMWE MUNGATHIMIZIRIRE KUKONDWA KWANU
7. Fotokozani mwacigwatho ciratizo ca Jezu cakulewa bza matalento.
7 Ciratizoco cimbalewa bza munthu omwe akhafuna kucita ulendo. Akanati kuyenda ulendobo, iye adacemera akapolo wace aciwapasa matalento kuti acitire malonda. * Munthuyo akhadziwa kuti akapolo wacewo adasiyana maluso, tenepo iye adapasa kapolo wakuyamba matalento maxanu, waciwiri matalento mawiri ndipo wacitatu adam’pasa talento ibodzi. Akapolo awiri adaphata basa na nyongo aciphindula kobiri zizinji kuti akapase mbuya wawo. Tsono, kapolo wacitatu alibe kucita cinthu na kobiri yomwe adapasidwa, ndipo adacosedwa basa.
8. Thangwe ranyi kapolo wakuyamba wa mu ciratizo ca Jezu adakomedwa kwene-kwene?
8 Kapolo wakuyamba adakomedwa kwene-kwene thangwe ra kupasidwa matalento maxanu na mbuya wace. Zimwezi zikhali kobiri zizinji kwene-kwene, ndipo bzimwebzi bzidalatiza kuti mbuyayo akhamukhulupira kwene-kwene kapoloyo! Tsono tani pakulewa bza kapolo waciwiri ule? Iye angadasunama thangwe ra kusaya kutambira matalento mazinji ninga yomwe kapolo wakuyamba ule adatambira. Tsono kodi iye adacita ciyani?
Kodi tingapfunze ciyani na kapolo waciwiri wakufotokozedwa mu ciratizo ca Jezu? (1) Iye adapasidwa na mbuya wace matalento mawiri. (2) Iye adaphata basa na nyongo kuti agumanire mbuya wace kobiri zizinji. (3) Iye adaphindula matalento manango mawiri (Onani ndime 9-11)
9. Kodi Jezu alibe kulewa ciyani bza kapolo waciwiri? (Mateu 25:22, 23)
9 Werengani Mateu 25:22, 23. Jezu alibe kulewa kuti kapolo waciwiri ule adakalipa ayai adasunama thangwe rakuti adatambira matalento mawiri basi. Ndipo Jezu alibe kulewa kuti kapolo ule adadandaula mwakulewa kuti: ‘Mungandipase kobiri zimwezi basi? Inepano ningakwanisembo kucita bzomwe kapolo omwe mwam’pasa matalento maxanuyu angacite! Penu mbuya wangu mukuwona lini bzimwebzi, inepano ningafucire matalento mawiriya ndicikacita vida zangu.’
10. Kodi kapolo waciwiri adacita ciyani na matalento yomwe adapasidwa?
10 Mwakundendemerana na kapolo wakuyamba ule, kapolo waciwiri adabvesesa kuti basa lomwe mbuya wace adamupasa likhali lakufunika, ndipo iye adaphata basa na nyongo kuti atumikire mbuya waceyo. Thangwe ra nyongo yomwe adacitayo, iye adaphindula matalento manango mawiri yacikwana manai. Kapoloyo adasimbidwa na mbuya wace thangwe ra basa lomwe adaphata na nyongo. Mbuyayo alibe kundokomedwa naye, koma adamupasa maudindo manango mazinji!
11. Kodi n’ciyani comwe tingacite kuti tithimizire kukondwa kwathu?
11 Mwakundendemerana na kapolo waciwiri ule, ifepano tingathimizire kukondwa kwathu tikambaphata basa na nyongo pa bzentse bzomwe tingakumbiridwe pa basa la Yahova. Khalani ‘wakutanganidwa kwene-kwene’ pa basa lakupalizira, ndipo mbaphatani mabasa ya pa gwere na nyongo. (Mabasa 18:5; Wahebereu 10:24, 25) Mbakonzekerani bwino mitsonkhano kuti mumbapereke mitawiro yakulimbikisa. Mbakonzekerani bwino mbali ya nyakupfunza yomwe mwapasidwa pa mtsonkhano wa pakati pa mdzinga. Mukakumbiridwa kuti mukathandizire basa linango la gwere, mbafikani na nthawe yabwino ndipo mbakhalani wakukhulupirika. Lekani kumbakumbuka kuti basalo ndakusaya kufunika, ndipo lekanimbo kumbakumbuka kuti mukudzonga nthawe yanu papezi mukakhala mukucita basalo. Citani nyongo kuti mukulise luso lanu pa basalo. (Mimwani 22:29) Mukambatumikira Yahova na nyongo, uxamwali bwanu na iye bun’dzalimba ndipo mun’dzakhala wakukondwa kwene-kwene na bzomwe mukucita. (Wagalata 6:4) Ndipo mun’dzakomedwambo na anzanu akatambira udindo bomwe imwepo mukhabufuna.—Waroma 12:15; Wagalata 5:26.
12. Kodi n’ciyani comwe cidathandiza Melissa na Nick kukhala wakukondwa kwene-kwene?
12 Kodi mukukumbukira bza Melissa, mpfumakazi yomwe ikhafuna kuyenda kukatumikira pa Beteli ayai kupita Xikola ya Apalizi wa Umambo? Napo kuti bzimwebzi bzingadakwanisika lini kuna iye, tsono iye adati: “Ndikupitiriza kucita upainiya ndipo ndikuphatisa basa njira zakusiyana-siyana zakucitira upalizi. Bzimwebzi bzimbandikondwesa kwene-kwene.” Ndipo, kodi Nick adacita ciyani pomwe akhadasunama thangwe ra kusaya kuikhidwa kuti akhale mtumiki wakuthandiza? Iye adati: “Ndidapitiriza kucita bzomwe ningadakwanisa, ninga kupalizira na kupereka mitawiro yakulimbikisa pa mitsonkhano. Ndipo ndidadzaza formulariyo kuti ndikatumikire pa Beteli. Ndipo pomwe padapita gole libodzi ndidacemeredwa.”
13. Kodi n’ciyani cin’dzacitika mukakhala wakutanganidwa pa utumiki bomwe mukubucita? (Mpalizi 2:24)
13 Kodi mun’dzatambira maudindo mazinji kutsogolo mukakhala wakutanganidwa kwene-kwene pa utumiki bwanu? Bzimwebzi bzingacitike, ninga momwe bzidacitikira Nick. Tsono bzikasaya kucitika, ninga Melissa, dziwani kuti imwepo mun’dzathimizira kukondwa kwanu thangwe ra bzomwe mukucita pa kutumikira Yahova. (Werengani Mpalizi 2:24.) Ndipo kuposa bzentse, imwepo mun’dzakondwa kwene-kwene thangwe ra kudziwa kuti Mbuya wathu, Jezu Kristu, akukomedwa na bzomwe mukucita.
BZAKULINGA BZOMWE BZIMBATHIMIZIRA KUKONDWA KWATHU
14. Tikakhala na bzakulinga pa kutumikira Yahova, kodi tin’funika kupitiriza kumbakumbukira ciyani?
14 Penu tikucita kale nyongo pa basa la kutumikira Yahova, kodi bzikufuna kulewa kuti tin’funika lini kucita pomwe bzinthu bzinango? Nee, n’tenepo lini! Tin’funika kukhala na bzakulinga bzomwe bzingatithandize kukhala apalizi na apfunzisi wabwino kuti tithandize abale na mpfumakazi zathu. Tin’dzakwanisa kucita bzimwebzi tikakhala wa nzeru na wakubzicepesa pakuthandiza winango, sikuti kumbabzikumbukira tekha basi.—Mimwani 11:2; Mabasa 20:35.
15. Kodi mpsiponi bzakulinga bzinango bzomwe bzingakuthandizeni kuthimizira kukondwa kwanu?
15 Kodi ni bzakulinga bziponi bzomwe mungakhale nabzo? Mukumbireni Yahova kuti akuthandizeni kuwona bzomwe mungakwanisedi kucita. (Mimwani 16:3; Tiyago 1:5) Kodi imwepo mungakwanirise cibodzi mwa bzakulinga bzomwe bzafotokozedwa mu ndime yakuyamba ya nkhaniyi, ninga kukhala mpainiya wakuthandiza ayai wakukhazikika, kutumikira pa Beteli, ayai kuthandizira basa lakumanga-manga? Pinango imwepo mungapfunze cirewedwe cipsa kuti mukwanise kumwaza bzipsa bzabwino ayai kuti mukapalizire ku mbuto inango. Imwepo mungadziwe bzinthu bzizinji mwa kuwerenga msolo 10 wa bukhu lakuti Gulu Lochita Chifuniro cha Yehova na kucezambo na akulu wanu wa gwere. * Mukacita nyongo yakucita bzimwebzi, abale an’dzawona kuyenda kwanu patsogolo ndipo mun’dzathimizira kukondwa kwanu.
16. Kodi n’ciyani comwe mungacite mukawona kuti mun’kwanisa lini kukwanirisa cakulinga comwe munaco?
16 Tsono tani penu mun’kwanisa lini kucita cibodzi pa bzinthu bzomwe bzafotokozedwa mu nkhani ino? Yezerani kukhala na cakulinga comwe mungakwanise kucikwanirisa. Mbaticezeraneni bzinthu bzinango bzomwe pinango mungakwanise kucita.
Kodi ni bzakulinga bzinango bziponi bzomwe mungabzikwanirise? (Onani ndime 17) *
17. Mwakubverana na 1 Timotio 4:13, 15, kodi m’bale angacite ciyani kuti akhale mpfunzisi wabwino?
17 Werengani 1 Timotio 4:13, 15. Penu imwepo ndimwe m’bale wakubatizidwa, mungacite nyongo yakukulisa luso lanu lakulewalewa na kupfunzisa. Thangwe ranyi? Thangwe rakuti mukacita ‘nyongo’ yakukhala muwerengi wabwino, wakudziwa kulewalewa, na mpfunzisi wabwino mun’dzacita bzizinji kuti muthandize wale omwe akukutetekerani. Yezerani kukhala na cakulinga cakupfunza na kuphatisa basa nfundo zentse zomwe ziri mu broxura lakuti Kulisani Luso Lanu la Kuwerenga na Kupfunzisa. Pfunzani pfunziro libodzi na libodzi palokha, yezerani kuliphatisa basa kumui, ndipo liphatiseni pomwe basa pomwe mukufotokoza nkhani yanu. Kumbirani mthandizi wakupereka malango ayai akulu winango ‘omwe ambaphata basa na nyongo ya kulewalewa na kupfunzisa’ kuti akuthandizeni na malango. * (1 Timotio 5:17) Lekani kundophatisa basa pfunziro lomwe liri m’broxuralo, koma thandizanimbo abveseri wanu kulimbisa cikhulupiro cawo ayai athandizeni kuphatisa basa bzomwe iwo akupfunzabzo. Mukacita bzimwebzi, imwepo pabodzi na iwo mun’dzathimizira kukondwa kwanu.
Kodi ni bzakulinga bzinango bziponi bzomwe mungabzikwanirise? (Onani ndime 18) *
18. Kodi ni bzinthu bziponi bzomwe bzingatithandize kukwanirisa bzakulinga bzathu mu upalizi?
18 Tentsenefe tina udindo bwa kupalizira na kupfunzisa wanthu. (Mateu 28:19, 20; Waroma 10:14) Kodi imwepo mukufuna kukulisa luso lanu pa basa lakufunikali? Pfunzani broxura lakuti Kuwerenga na Kupfunzisa ndipo khalani na bzakulinga bzomwe bzingakuthandizeni kuphatisa basa bzomwe mukupfunzabzo. Imwepo mungagumane pomwe njira zinango zomwe zingakuthandizeni mu Moyo Wathu Wacikristau na Utumiki—Kabukhu ka Mitsonkhano na mavidiyo ya bziratizo bza upalizi zomwe zimbalatizidwa pa mitsonkhano ya pakati pa mdzinga. Yezerani kuphatisa basa njira zakusiyana-siyana kuti mukwanise kuwona yomwe ingakupusireni. Mukaphatisa basa njira zimwezi, mun’dzakhala mpalizi wabwino ndipo mun’dzathimizira kukondwa kwanu.—2 Timotio 4:5.
Kodi ni bzakulinga bzinango bziponi bzomwe mungabzikwanirise? (Onani ndime 19) *
19. Kodi imwepo mungakulise tani makhalidwe yacikristau?
19 Lekani kuyebwa kuti cakulinga cakufunika kwene-kwene comwe mun’funika kukhala naco ni kukulisa makhalidwe yomwe Mulungu ambakomedwa nayo. (Wagalata 5:22, 23; Wakoloso 3:12; 2 Pedru 1:5-8) Kodi mungacite tani bzimwebzi? Mwa ciratizo, tiyezezere kuti imwepo mukufuna kulimbisa cikhulupiro canu. Imwepo mun’funika kuwerenga nkhani za m’mabukhu yathu zomwe zingakuthandizeni kuwona momwe mungalimbisire cikhulupiro canuco. Imwepo mungagumanembo phindu mwakumbawona mavidiyo ya mu JW Broadcasting® yomwe yambalatiza momwe abale na mpfumakazi adalatizira kuti ana cikhulupiro cakulimba pa mabvuto yakusiyana-siyana. Ndipo mukamala onani momwe mungatewezerere cikhulupiro cawo pa moyo wanu.
20. Kodi tingacite ciyani kuti tithimizire kukondwa kwathu na kuleka kukhala wakusunama?
20 Mwakusaya kupenukira, tentsenefe tikufuna kucitira Yahova bzinthu bzizinji kuposa bzomwe tingacite pakali pano. Mu dziko lipsa, ifepano tin’dzamutumikira Mulungu bwino-bwino ndipo palibe cinthu comwe cin’dzatiphingiza. Pomwe nthaweyo ikanati kufika, ifepano tikacita ciri-centse comwe tingakwanise kucita pakali pano, tin’dzathimizira kukondwa kwathu ndipo tin’dzakhala lini wakusunama. Ndipo cinthu cakufunika kwene-kwene, tin’dzalemekezesa na kutumbizisa Yahova, ‘Mulungu [wathu] wakukondwa.’ (1 Timotio 1:11) Tenepo bwerani timbakondwe na utumiki bomwe tinabo!
NYIMBO 82 ‘Onesani Ceza Canu’
^ ndi. 5 Ifepano timbafuna kwene-kwene Yahova, ndipo tikufuna kucita bzomwe tingakwanise pomwe tikumutumikira. Ndipopa azinji wa ifepano tikufuna kucita bzizinji pa basa lakupalizira ayai kucita nyongo kuti tithemere kupasidwa maudindo manango m’gwere. Tsono, tani penu tiribe kukwanisa bzomwe tikhafuna napo kuti tacita nyongo ikulu kwene-kwene? Kodi n’ciyani comwe cingatithandize kupitiriza kuphata basa na nyongo pomwe tikutumikira Yahova ticipitiriza kukhala wakukondwa? Timbagumana mitawiro ya mibvunzoyi mu ciratizo ca Jezu cakulewa bza matalento.
^ ndi. 2 Madzina yanango yacinjidwa.
^ ndi. 7 KAFOTOKOZEDWE KA MAFALA YANANGO: Talento ibodzi zikhali kobiri zomwe nyabasa akhapasidwa akaphata basa magole 20.
^ ndi. 15 Abale wakubatizidwa ambauzidwa kuti acite nyongo kuti athemere kukhala atumiki wakuthandiza na akulu wa gwere. Kuti muwone bzomwe mun’funika kucita kuti muthemere maudindo, onani msolo 5 na 6 m’bukhu lakuti Gulu Lochita Chifuniro cha Yehova.
^ ndi. 17 KAFOTOKOZEDWE KA MAFALA YANANGO: Mthandizi wakupereka malango ni mkulu m’bodzi omwe ambasankhulidwa kuti ambapereke malango kuna akulu wa gwere na atumiki wakuthandiza mwakubverana na momwe ambafotokozera nkhani zawo m’gwere.
^ ndi. 64 BZOMWE BZIKUCITIKA PA CITHUNZI-THUNZI: M’bale omwe akufuna kukwanirisa cakulinga cace cakukhala mpfunzisi wabwino, akufufudza m’mabukhu yathu.
^ ndi. 66 BZOMWE BZIKUCITIKA PA CITHUNZI-THUNZI: Pambuyo pakucita upalizi bwakusaya kulinganizidwa, mpfumakazi ikupereka kartau kuna mkazi omwe ambaperekera bzakudya.
^ ndi. 68 BZOMWE BZIKUCITIKA PA CITHUNZI-THUNZI: Thangwe ra kufuna kulatiza makhalidwe yacikristau, mpfumakazi ikupereka mphaso kuna mpfumakazi inzace yomwe ikhadikhirira lini.
