1. Bu mɛ sīdee na gbɛnɛ-edo nɛɛ gaa yɛgɛ wa tam yereloo bu esiatam Jehova a?

 I ƐRƐ gbɛnɛ-edo tam esi sɔ̄ kuma lo nyɔuwe ama aa tɔɔ̄ waɛloo kɛ̄ a. (Mat 24:14; Luk 10:2; 1 Pit 5:2) Dɛ̄dɛɛ̄ ii gbī esitam nɛ Jɛhova dookɛ̄ i ekpo toora doo. Gbɛnɛ-edo nɛɛ gaa yɛgɛ wa tam zue ue yereloo. Pio aba aa nɔɔ lo esɛmdee. Pio nɛɛ aa nɔɔ lo esitam Bɛtɛl ale lo esitam wu pya tɔ i aa su daānu bu taāŋabah Bari. E gbɛnɛ-edo pya i wuga nɛɛdam aa nyim tura lo esitam doodoo nɛɛ yerebahtam ale nɛɛ kanɛɛ. (1 Tim 3:1, 8) Naa ɛp dua ɛɛbu Jɛhova e’ɛrɛ lo emuɛ kɛ̄ pya ye nɛɛ ɛrɛ taɛ bu ye tam doo a!—Yɔɔ 110:3; Ais 6:8.

2. Etɔɔ̄ i loo doodoo wa lo ii dap doo pya nu i bee seeasī bu esiatam Jɛhova?

² Kɛādoo, loo i dap bɔātɛ̄ e’ɔ lo sɔ̄ etɛ̄na sa i sii dapge doo nu i bee seeasī bu tam Jɛhova. I dapnage ɛrɛ e’ɔaloo lo pio dee esiatam naa kpaā i nɛ nyɔɔbee i e’ana ale nyɔɔ pya dɔɔ̄na kɛ̄tɔɔ̄. (Kam 13:12) Nu a bee sira loo Melissa lo. * A bee gbī esitam Bɛtɛl ale si Tɔkpa Pya Zue Ue Buɛ̄-mɛnɛ, mɛ a bee kɔ: “M eyera zua pya a wee si. Sɔ̄ m kɛɛrɛbu loo anyaawo, m muɛ kɔ mm le edapna doo. Lo ama wee mɛ ɔɛloo pio sɔ̄.”

3. E na pio nɛɛ ɛrɛ edoo lokwa ba nyim tura pio dɔtam bu bɔŋanaloo Jɛhova a?

³ Lu ebɛɛ̄ kɔ pio pya a le zege sa le bu nwanaloo a dasī nyim tura sa ɛrɛ pio elap a bɔloo lɛɛ ba gae ɛrɛ pio dee esiatam. Lu kaka kɔ ba dap suā kpa kaāna, para biaɛ nu fii, sa ɛrɛ taɛ lo esitam, mɛ alunage ebɛɛ̄  kɔ ba a nɔ lo e’ɛrɛ egerebu, kuūdɛɛ̄kɛ̄ bu wa esiatam, sa nwadɛɛ̄ pya dɔɔ̄na. Lo o piiga lo e’ɛrɛ pya elap alu ebɛɛ̄ ama, dee esiatam ekpaā a nɛ sɔ̄ oo bee ɛmadɛɛ̄. Naa ɛp nu a bee siraloo Nick. Bu ye bee biira gbɛnɛ nyɔɔbee eluae 20 zua e a sii luge etubo ye baloo nua nɛɛ yerebahtam. A bee kɔ: “Bee mɛ tɔɔ̄loo kɔ a ɛrɛ pya nu mm aa doo leere.” Kerewo Nick naa bee ɔɛloo ye. A bee kiisī lo esi pya dɔɔ̄na tam alu enɛ ye bu bɔŋanaloo leere sa agɛrɛbah zue ue. E nii’ee, Nick le yɛɛ Kɔmitii A Kuūdɛɛ̄loo Tɔ-naatam.

4. E na i gaa le nɔ bu ekobee ue ama a?

⁴ Ekɔ a ɔɛ a loo kɔ o sii dabe doo pio nu o bee seeasī kɔ o dooe bu bɔŋanaloo Bari ni? Lo a le wo, kɔ kɛ̄ a a tɔɔ̄loo doo nɛ Jɛhova bu kara. (Yɔɔ 37:5-7) Gbaāloo wo, bip pya wuga a nyim tura kɔ ba a doba pio nu alu ebɛɛ̄ kɔ o doo lo enyimɛ o esiatam nɛ Bari yereloo, lɛɛ o piiga lo edoo pya nu ba a kɔ nɛ. Lo o doo pya nu alu ekɔ ama, dee esiatam dap a kpaā nɛ e o dap doo nu o bee seeasī. Mɛ dookɛ̄ a bee sira loo Melissa i bee kɔ nu akiiloo tua sɔ̄ a doo, o dap muɛ kɔ o sii nyim etura ziī dɔtam bu bɔŋanaloo anyaawo. E na o doo lo a le doo wo a? E na o doo lokwa o kiisī lo e’ɛrɛ ɛɛbu a? Lo e’agara lo ebip, ekobee ue ama ekɔ ue nyɔɔ (1) kɛ̄ o dap gbī ɛɛbu aā, (2) kɛ̄ o dap nyimɛ o ɛɛbu yereloo doo, le (3) pya nu seeasī a dap yere o ɛɛbu loo.

5. Lokwa i ɛrɛ ɛɛbu, e na i sere ekɛɛrɛ nyɔɔ a? (Eklisiastis 6:9)

⁵ Dookɛ̄ alu e’ɛm bu kpa Eklisiastis 6:9 doo, i dap ɛrɛ ɛɛbu lo i gbī ye aā taɛ kɛ̄ a bɔloo. (Buū.) Nɛɛ a ɛrɛ ɛɛbu loo “nu baɛ dɛɛ̄ muɛ” wee tɔgɛ nia loo nu a ɛrɛ, doodoo kɛ̄tɔɔ̄ a le bu taɛ lo sɔ̄. Mɛ bu kiiya sī, nu naale egbɔɛ̄loo nɛɛ a kiaŋa loo taɛ nu. Nyɔɔwo, e na i nɔ aāloo a? Lokwa i ɛrɛ ɛɛbu, i ɛrɛ esere ekɛɛrɛ nyɔɔ nu i ɛrɛ le nu i suā leere kɔ i dabe ɛrɛ.

6. Amunu edoba na i kɔ ue nyɔɔ anyaawo a, e e na i sere ekɛɛrɛ nyɔɔ a?

⁶ Waɛge kɔ nu o ɛrɛ a gbɔɛ̄ a loo ni? Bu kaka, sɔ̄ sɔ̄ gaa tɛɛ̄, i wee ɛrɛ pya aā nu finiabah. Nyɔɔwo, a dap waɛ doo wo. Bu kaka, i dap ɛrɛ ekpeloo bu pya nu i ɛrɛ anyaawo, e a naale aadee sere ekɛɛrɛ nyɔɔ nu i “dɛɛ̄ muɛ.” Bu mɛ sīdee na i doo wo a? Lo esuā, i naa kɛɛrɛbu edoba Jizɔs akiiloo kpugi talɛnt a le bu kpa Matiu 25:14-30. I sere ekɛɛrɛ nyɔɔ nu a i tɔgɛ akiiloo kɛ̄ i dap gbī sa nyimɛnage ɛɛbu bu ɛrɛgeba kɛ̄tɔɔ̄ i le anyaawo doo.

7. Bu ekpuru bah, naa baatɛ̄ kam Jizɔs akiiloo talɛnt.

⁷ Bu lo kam, ziī gbara aa bee gbī esi kiā. Lɛɛ a gae aa, a bee kue pya ye zooro sa wa nɛ pio talɛnt kɔ ba a uā du. * Susuā nu ziī ziī aba dap doo, lo gbara nɛ o’oo talɛnt ziī aba, a nɛ baɛ aba lo dɔɔ̄na, sa a nɛ ziī talɛnt lo eree taa zooro a. Lo tua le lo eree baɛ zooro bee su nu wa tɛtɔ bee wa nɛ daānu leere. Kerewo, lo eree taa zooro naa bee su kpugi a bee lu enɛ ye daā lɔgɔ nu, nyɔɔwo ye tɛtɔ bee ye kpo lɛɛ loo tam.

8. E na a bee dap nɛ ɛɛbu lo tua zooro a?

⁸ Bu lo tua zooro a bee ɛɛ kɔ ye tɛtɔ  bee ye nɛe o’oo talɛnt. A bee le kaāna gbɛnɛkpo kpugi, e a tɔgɛ dua kɛ̄ ye tɛtɔ ye dɛrɛ nyiɛ nyɔɔ doo! E lo eree baɛ zooro ni a? Loo ye ebee dap ɔ nyɔnɛbee a naa bee lu enɛ ye gbɛnɛkpo talɛnt dookɛ̄ a bee lu enɛ lo tuatua zooro a doo. Mɛ e na a bee doo a?

9. E na Jizɔs naa kɔ lo eree baɛ zooro bee doo a? (Matiu 25:22, 23)

⁹ Buū Matiu 25:22, 23. Jizɔs naa bee kɔ lo eree baɛ zooro bee ɛrɛ saŋ nyɔɔbee a bee lu enɛ ye aba baɛ talɛnt. E Jizɔs naa bee kɔ lo zooro bee nɛ kpɛa kɔ: ‘Kuma nu o mɛ nɛ na ama? Mda nyimnage tura doodoo lo zooro alu enɛ o’oo talɛnt a a! Lo na tɛtɔ naa ɛp mɛ nua nɛɛ a dap nɛ o’oo talɛnt, m aadee li baɛ talɛnt ama sa m si mdaa tam.’

10. E na lo eree baɛ zooro bee doo loo talɛnt a bee lu enɛ ye a?

¹⁰ Lo eree baɛ zooro a bee su tam a bee lu enɛ ye nua nu a ye kuī loo sa piiga lo esitam nɛ ye tɛtɔ dookɛ̄ lo tua zooro a bee doo. E a bee sira kɔ, a bee su talɛnt ye tɛtɔ bee ye nɛ daā gbora sa doo kɔ a bug yiiloo lu nia aba. Lo tɛtɔ bee nɛ ekpɛanu lo zooro loo ye epiaga tam. Naale aba kɔ bu lo tɛtɔ bee ye ɛɛ loo mɛ a bee ye biaɛ nua zooro a bɔ ture nyiɛ loo sa ye nɛ dɔɔ̄na tam!

11. Bu mɛ sīdee na i dap nyimɛ i ɛɛbu a?

¹¹ Bu aba lo sīdee, i dap nyimɛ i ɛɛbu tɛ̄maloo epiiga kaāna bu ɛrɛgeba nu alu enɛ i kɔ i doo bu esiatam Jɛhova. ‘Piiga kaāna’ bu esiatam zue ue sa ɛrɛ bah bu ɛrɛgeba tam a le bu bɔŋanaloo.  (Doonu 18:5; Hib 10:24, 25) Kpɛ̄naloo kaāna loo nu elu enɔ bie enɔānu lokwa o dap agara ebip eyere mɛm loo pya nɛɛ. Ɛp nu edoo alu enɛ a bie enɔānu taɛyɛɛ kaɛ nua nu a a kuī loo. Lo alu ekɔ o yerebah lo esi ziī tam bu bɔŋanaloo, doo nyɔɔ sɔ̄ sa lu nɛɛ a dap lu edɛrɛ nyiɛ nyɔɔ. O aa kɛɛrɛ kɔ tam alu enɛ a kiikɛ̄ sa ɛp kɔ a naa lu ebɛɛ̄ kɔ o pee o sɔ̄ lo esi lo tam. Piiga lo enyimɛ o kari bu esiatam. (Kam 22:29) Kumakɛ̄ o piiga lo esu loo nɛ esiatam Jɛhova doo, kɛ̄ o nwaanagebah nyim kiisī sa ɛrɛ kaāna ɛɛbu doolo. (Gal 6:4) E waɛnage a bah enyɔɔnɛ pya dɔɔ̄na ɛrɛ ɛɛbu sɔ̄ alu enɛ wa ziī dɔtam a gaa bee a taɛ e’ɛrɛ.—Rom 12:15; Gal 5:26.

12. E na a bee yerebah nɛ Melissa le Nick kɔ ba a nyimɛ wa ɛɛbu yereloo a?

¹² O nyɛŋiage bu Melissa, wuga nɛɛwa a bee ɛrɛ taɛ lo esitam Bɛtɛl ale si Tɔkpa Pya Zue Ue Buɛ̄-mɛnɛ ani? Kere a naa bee dap doo pya nu a bee gbī edoo ama, a bee kɔ: “M bee kiisī lo esitam sɛmdee sa piiga lo ezue ue bu keekee sīdee. Lo ama edora kɔ m ɛrɛ kaāna ɛɛbu.” E na Nick bee doo sɔ̄ a naa bee lu etubo ye baloo nua nɛɛ yerebahtam sɔ̄ a bee ɛmadɛɛ̄ ani? A kɔ: “M bee sere ekɛɛrɛ nyɔɔ pya dee a bee mɛ kpaā nɛ lo sɔ̄ doodoo si tam zue ue le agara ebip bie enɔānu. M bee yere bee lo esitam Bɛtɛl sa a bee lu esu mɛ lo zua a nyɔɔnɛ.”

13. E na esira aabu lo o piiga kumakɛ̄ o dap doo bu o esiatam anyaawo a? (Eklisiastis 2:24)

¹³ Lo o piiga kumakɛ̄ o dap doo bu o esiatam anyaawo, o ɛrɛge pya dɔɔ̄na tam li deesī ni? Lo ama dap sira dookɛ̄ a bee sira loo Nick doo. Mɛ lo oo ɛrɛ dookɛ̄ Melissa naa bee ɛrɛ doo, o kiisī lo e’ɛrɛ ɛɛbu, e o ɛrɛ iīnaloo sa suā kɔ o edorae nu o dap doo. (Buū Eklisiastis 2:24.) Gbaāloo wo, bu a e’ɛɛ lo esuā kɔ i Tɛtɔ Jizɔs Kraist tɔgɛ nia loo o epiaga.

14. E na i kɛɛrɛbu sɔ̄ i gaa seea nu bu edɔɔ̄ sī a?

¹⁴ Dodoo kumakɛ̄ i dap doo bu i esiatam anyaawo kurage kɔ i ɔbɛ egbī pya dɔɔ̄na sīdee i dap nyimɛ i esiatam yereloo ni? Eeye doo pippip! I dap su nu bu edɔɔ̄ seeasī lo eyerebah i nɛ kɔ i para zue ue le tɔgɛnu sa doonage kɔ i dap yerebah nɛ pya i wuga nɛɛdam le nɛɛwa. I kiisī leere lo i su suānu le kumalookɛ̄ yeābah nɛ pya dɔɔ̄na e a naale aba ilii loo.—Kam 11:2; Doonu 20:35.

15. Pya amunu nu seeasī na edap a yerebah nɛ kɔ o nyimɛ o ɛɛbu a?

¹⁵ Pya e na o dap seeasī a? Bara Jɛhova kɔ a yerebah a nɛ lo esuā pya nu seeasī o dap doo. (Kam 16:3; Jem 1:5) O dapge doo ziī yɛɛ pya nu seeasī a le  tua barakpaɛ̄ loo ekobee ue ama, lo a le sɛmdee bu nwīkere sɔ̄ ale dɛ̄dɛɛ̄ sɔ̄, si tam Bɛtɛl, ale wuwu pya i tɔ etɔɔ̄ taāŋabah Bari ni? Ale o dap nɔ aā muɛ̄ ue lokwa o dap zue le yereue ale kii uwe zue ue dɔɔ̄na barasī. O dap nɔ nu akiiloo pya lo nu seeasī tɛ̄maloo ebuū 10 ekobee ue bu kpa a kura Organized to Do Jehovah’s Will le tɛ̄maloo enyɔɔnɛ pya kanɛɛ a le bu o bɔŋanaloo kɔnia. * Kuma sɔ̄ o piiga lo edoo pya o nu seeasī ama, pya dɔɔ̄na emuɛ̄ kɔ o gaa nyim kiisī leere, e o ɛɛbu eyiinage loo.

16. E na o doo lo o sii dap doo ziī nu o bee seeasī a?

 ¹⁶ E lo a le o sii dap doo ziī yɛɛ pya nu seeasī elua ekɔ nu kumaloo ama ni ā? Lo a le wo, piiga lo egbī dɔɔ̄na nu seeasī lo edap a waɛloo edoo. Naa ɛp pya nu o dap doo ama.

17. Dookɛ̄ 1 Timɔti 4:13, 15 kɔ doo, e na ziī wuga nɛɛdam edoo lokwa a para tɔgɛnu a?

¹⁷ Buū 1 Timɔti 4:13, 15. Lo o lu wuga nɛɛdam eliamaā, lu ebɛɛ̄ kɔ o nyimɛ o kari bu nɛ ekɔaue le tɔgɛnu. E na anua a? Nyɔnɛbee lo o piiga lo e “su oloo nɛ” buū kpa, nɛ ekɔaue, le tɔgɛnu, o yerebah nɛ pya a a gbaɛ̄tɔ̄. Piiga lo enɔ sa su pya nu alu ekɔ o si tam nyɔɔ a le bu nwīekpo kpa a kura Su Oloo Nɛ Buū Kpa Le Tɔgɛnu nua nu o seeasī lo edoo. Nɔ aba ziī ye nuenɔ ziī ziī sɔ̄, doo pya nu alu ekɔ bu lo kpa aā be, sa piiga lo eyere pya nu o bee nɔ a bu o ekɔaue. Bara kɔ eree baɛ nɛɛ nɛ zuurabahtɔ̄ ale dɔɔ̄na pya kanɛɛ lo ba gaa “si tam bu muɛ̄ ue le bu tɔgɛ” a yerebah a nɛ. * (1 Tim 5:17) O aa sere ekɛɛrɛ nyɔɔ aba edābeeloo sa su pya ue a le bu nwīekpo kpa ama yere bu dogo, mɛ lo esu yeābah nɛ pya a gaa a gbaɛ̄tɔ̄ lokwa a dap agɛrɛtɛ̄ wa yira ale a zū wa kɔ ba a su nu ba nɔ yere bu dogo. Dodoo wo enyimɛ o ɛɛbu le lo alaba.

18. E na edap i yerebah nɛ kɔ i doo pya nu i seeasī bu tam zue ue a?

¹⁸ Alu tam a le nɛ dɛ̄dɛɛ̄ ii lo ezue ue sa doo kɔ pya nɛɛ a nyɔɔnɛ dumɛ Jizɔs. (Mat 28:19, 20; Rom 10:14) Eniage a enyimɛ o kari bu tam a kuī eera ama ni?  Nɔ kpa a kura Tɔgɛnu sa o nɔɔ pya nu seeasī edap a yerebah nɛ kɔ o su pya nu o nɔ aābu lo kpa yere bu dogo. O dapnage ɛrɛ pya nu eyerebah a nɛ aābu Kpa Enɔānu—I Tɔɔ̄dum Pya Nɛɛ Kraist Le I Tam Zue Ue le pya vidio a tɔgɛ edoba esu zuema ue a wee lu etɔgɛ bie enɔānu taɛyɛɛ kaɛ. Piiga lo edo-ɛp keekee nu alu ekɔ ama sa o ɛp lo ewaɛ a loo esu daānu leere. Tɛ̄maloo enyɔɔnɛ pya lɛra ekɛɛrɛ ama, o lu Nɛɛ Kraist a ɛrɛ kari sa para zue ue le tɔgɛnu.—2 Tim 4:5.

19. Bu mɛ sīdee na o dap nyimɛ pya elap dogo a nia Bari a?

¹⁹ Sɔ̄ o waa kɛɛrɛ pya nu o seeasī, ziī nu aa a ibere eyere yɛɛ na lo enyimɛ pya elap dogo a nia Bari, nyɔnɛbee alu nu a kuī. (Gal 5:22, 23; Kɔl 3:12; 2 Pit 1:5-8) E na o doo lokwa o dap doo nu o seeasī ama a? Bu edoba, naa su kɔ o gbī e’agɛrɛtɛ̄ o yira. O dap buū pya ekobee ue a le bu pya i kpa lo a kɔ pya nu o dap doo lo e’agɛrɛtɛ̄ o yira. O dapnage ɛrɛ biī aāloo esi ee JW Broadcasting^® a baatɛ̄ kɛ̄ pya i wuga nɛɛdam le nɛɛwa tɔgɛ wa yira sɔ̄ ba gaa kpesī keekee taāŋa doo. Lɛɛ o ɛp pya sīdee o dap nɔ wa yira.

20. Bu mɛ sīdee na i dap nyimɛ i ɛɛbu yereloo sa ii kɛɛrɛ kɔ alu elɔgara i a?

²⁰ Bu kaka, dɛ̄dɛɛ̄ ii gbī enyimɛ i esiatam nɛ Jɛhova ee kɛ̄ i gaa doo anyaawo. Bu aā nyɔuwe Bari, i si tam ye nɛ bu mmɛɛ sīdee. Sɔ̄ i gaa tɔɔ̄ge baɛ lo sɔ̄ a, doraa i su ɛrɛgeba dee a i kpaā nɛ anyaawo daanu leere, lokwa i dap nyimɛ i ɛɛbu yereloo sa ii le e’ɛrɛ ekɛɛrɛ kɔ alu elɔgara i. E lo a kuī eera na bee i su ka le leera nua loo Jɛhova, i “Bari ɛɛbu.” (1 Tim 1:11 NWT) Nyɔɔwo, doraa i ɛrɛ ɛɛbu bu tam i gaa si nɛ Jɛhova!