1. Marhẹ imizu buebun e ru kerabọ owian Uvie na?

 ỌWAN i vwo owian buebun ra na wian rẹ akpọ ọnana o riẹ oba ne na. (Matt. 24:14; Luke 10:2; 1 Pet. 5:2) Ọwan ephian i guọlọ ga i Jehova vuọnvuọn. Imizu buebun e kerabọ owian Uvie na. Ezẹko a ga ẹrhẹ ekobaro. Awọrọ a ga uvuẹn Oghọn Ukoko yanghene vwobọrhọ ebanbọn ekete re ruẹ ogame. Imizu erọrọ buebun a wian kpahen ọrẹ aye ina ga ẹrhẹ odibo owian yanghene ekpako ukoko. (1 Tim. 3:1, 8) Oma ọ merhen i Jehova ọke rọ mẹrẹn ihworho yi ri vwo ẹhẹn aye ina ga ye!—Ps. 110:3; Isa. 6:8.

2. Marhẹ oma o ruẹ ọwan orhianẹ a sabu nyamwu ẹkẹ ezẹko uvuẹn ogame i Jehova-a?

² Ẹhẹn ọwan ọnọ sabu seriotọre, orhianẹ ọke jijiri ọ vrẹn ne, ọrẹn a ji sabu nyamwu ẹkẹ ezẹko re bruru uvuẹn ogame i Jehova-a. Yanghene orhianẹ fọkiẹ ẹgbukpe ọwan yanghene erhirhiẹ erọrọ, uphẹn ẹga ezẹko i sabu te ọwan obọ-ọ. (Prov. 13:12) Ọrana ye oborẹ ọ phia rẹn Melissa. * Ọ guọlọ ga uvuẹn Oghọn Ukoko yanghene riẹ Isukuru Ighwoghwẹmro Uvie na, ọrẹn nọ tare: “Mi vrẹn ẹgbukpe na ne. Vwana ha mẹ, uphẹn ẹga erana oborẹ mie gi roro kpahan. Ọkezẹko, ẹhẹn mẹ o seriotọre.”

3. Idjaghwẹ ezẹko ego ya na kpare na sabu mwuovwan uphẹn ẹga ezẹko?

³ Imizu ezẹko ri rhiẹ iphuphẹn ri ji vwo omọkpokpọ, ina do te edje vwẹre jeghwai dje iruemru ezẹko phia, nẹ aye i ki  mwuovwan uphẹn ẹga erọrọ. Ọkezẹko, aye ina sabu vwo irherhe, rhe oborẹ e brorhiẹn, vwo oruru; ọrẹn ọnọ sabu rhirhiẹ taghene o fori nẹ aye i vwo erhionrin, gbẹro rhotọre yanghene dje ọghọ phia. Wu rha tẹnrovi iruemru ra guọlọre wu djephia, uphẹn ẹga ọnọ sabu te obọ ọke wu vwe fiẹrorhọ. Roro kpahen oborẹ ọ phia rẹn Nick. Ọke rọ ha ẹgbukpe 20, ẹhẹn yen o seriotọre omamọ fọkime a haye mwu ẹrhẹ odibo owia-an. Nọ tare, “Ni mie roro taghene emru ọsọre oma mẹ.” Ọrẹn, Nick o fiobọrhotọre-e. No fiomarhọ uphẹn ẹga ro vwori. Inyenana, ọye ọ ga uvuẹn Umẹ Rọ Hẹrote Oghọn Ukoko.

4. Me ye ne yono kpahen uvuẹn urhomu-ẹmro ọnana?

⁴ Ẹhọn o seriotọre fọkime wa ji sabu nyamwu ẹkẹ wu bru te oma uvuẹn ogame i Jehova-a? Orhiomaran, nẹrhomo vwe i Jehova kpahiẹn. (Ps. 37:5-7) Habaye, nekpẹn userhumu mie imizu ri te edje ne kpahen oborẹ wu ne ru ru riarorhọ uvuẹn ogame wa harẹn Jehova, ne wu ji damoma ha urhebro aye ruiruo. Wu rhe ruẹ omaran, wu na sabu vwo uphẹn ẹga wu guọlọre yanghene nyamwu ẹkẹ wu bruru na. Ọrẹn, jerẹ i Melissa, ra hunute vrẹn ne, ọnọ sabu rhirhiẹ taghene wu vwo uphẹn ẹga wu guọlọre vwana-a. Ni me wu ne ruo? Marhẹ wu ne ru sẹrorẹ aghọghọ ọnọ? Na kpahenrhọ onọ ọrana, urhomu-ẹmro ọnana, ọnọ ta kpahen (1) ekete wu na guọlọ aghọghọ, (2) oborẹ aghọghọ ọnọ ono ru bunrhọ, (3) ẹkẹ wu bruru ri na sabu toroba aghọghọ ọnọ.

5. Na sabu vwo aghọghọ, me yo fori na tẹnrovi? (Ecclesiastes 6:9)

⁵ Jerẹ oborẹ a ya rhẹ Ecclesiastes 6:9, ana sabu mẹrẹn aghọghọ, orhianẹ a guọleriẹ uvuẹn ekete ro serhọ. (Seyi.) Ohworho rọ riamerhen “oborẹ ikẹro na a mẹrẹn,” o dje ọdaremẹro phia kpahen oborẹ o vwori, jerẹ erhirhiẹ rọ havwọ vwana. Ọrẹn, ohworho ro beghe lele ojemẹ enẹyen ọ guọlọ oborẹ ọnọ jọ sabu vwo. Me yẹ ọwan i yonorin? Na sabu mẹrẹn aghọghọ, o fori na tẹnrovi oborẹ e vwori ọrhẹ ẹkẹ ra na sabu nyamwu.

6. Udje ọgo ye ne yono kpahen vwana, me ya na tẹnrovi?

⁶ Ana ghini sabu vwo evwẹnvuọn nẹ oborẹ e vwori? Ihworho buebun e roro taghene ọ sabu phia-a, fọkime ituakpọ i vwo ẹhẹn aye ine yono ekwakwa ekpokpọ. Ọrẹn ana sabu vwo yi. Ana ghini sabu riamerhen ekwakwa re vwori vwana. Marhẹ ene ru ruie? Na mẹrẹn ẹkpahenrhọ na, jene yono kpahen udje i Jesu kpahen italẹnti na, rọ ha Matthew 25:14-30. Ana tẹnrovi oborẹ ọnọ sabu yono ọwan kpahen oborẹ ene ru vwo aghọghọ, ji ruie bunrhọ uvuẹn uphẹn ẹga re vwori vwana.

7. Zẹ udje i Jesu kpahen italẹnti na koko.

⁷ Uvuẹn udje na, ọhworhare owu ọ guọlọ riẹ onya. Bọmọke ọ ki nyarhẹn no se evrẹn yen, ji yẹ owuowu italẹnti nẹ aye i haye sueyi. * Fọkime o rheri taghene omẹgbanhon aye i vẹnẹren, ọhworhare na nọ yẹ ọvrẹn owu italẹnti isionrin, nọ ha eva rẹn ọreva ye, jeghwai ha owu rẹn ọresa ye. Ọvrẹn ọrukaro ọrhẹ ọreva na, i dabu gbẹro rhotọre ha italẹnti aye sueyi. Ọrẹn, ọresa na, ọ ha igho ra yẹriẹ na ruẹ emru owuorowu-u, omarana onini na no lerie nẹ iruo yi.

8. Mesoriẹ oma ọnọ sabu merhen ọvrẹn ọrukaro uvuẹn udje na?

⁸ Oma ọ ghini merhen ọvrẹn ọrukaro na  taghene oninie ọ yẹriẹ italẹnti isionrin. Ọrana igho obuebun omamọ, o ji djephia taghene onini na ọ hẹrosuiẹ omamọ! Ọrẹn, nọ ọvrẹn ọreva na vwo? Manẹ ẹhẹn yen ọ sabu seriotọre fọkime a yẹ ye uchunu igho ọrukaro na o vwori-i. Ọrẹn, me yo ruru?

9. Me yi Jesu ọ vwọ ta kpahen ọvrẹn ọreva na? (Matthew 25:22, 23)

⁹ Se Matthew 25:22, 23. Jesu ọ ta taghene evwan o biomu ọvrẹn ọreva na, ji sẹrorẹ eghrẹn fọkime italẹnti eva ọvo ya yẹriẹ-ẹ. Jesu ọ ji ta taghene ọvrẹn na no brenu-u, rọ ta: ‘Ọnana ọvo ya yẹre mẹ? Mia ji wian gbanhan jerẹ ọvrẹn ra yẹre italẹnti isionrin na! Orhianẹ onini mẹ o vwo ọdaremẹro kpahen owian mẹ-ẹ, mi na ya tọn italẹnti eva na rhotọre, ji hẹrote edamẹ mẹ.’

10. Me yẹ ọvrẹn ọreva na ọ ha italẹnti ra yẹriẹ ru?

¹⁰ Jerẹ ọvrẹn ọrukaro na, ọvrẹn ọreva na nọ ji dabu gbẹro rhotọre wian owian ra yẹriẹ, ji wian gbanhon rẹn onini na. Omarana, italẹnti eva na no rhiẹ ẹne. Onini na no jiri ọvrẹn na fọkime ọ wian gbanhon. Oma ọ merhen onini na kpahiẹn, nọ ji ta taghene o mwuovwan rọ nọ wian ewian erọrọ!

11. Marhẹ aghọghọ ọwan ono ru bunrhọ?

¹¹ Omaran ọ ji havwọ, ana sabu vwo aghọghọ rhọ, nyoma re ne fiomarhọ kemru kemru ra yẹre ọwan na wian uvuẹn ogame i Jehova. “Dabu fiomarhọ” owian aghwoghwo na ọrhẹ ewian erọrọ uvuẹn ukoko na. (Acts 18:5; Heb. 10:24, 25) Dabu mwuegbe rhẹ ekete re ne yono, ne wu kpahenrhọ enọ ra bọn awan gbanhan uvuẹn uyono ukoko.  Ha ukẹro ọghoghanren ni owian ra yẹruọ ephian uvuẹn uyono erhẹrhẹ ọkprughwre na. Orhianẹ a ta wẹn ne wu wian owian owu uvuẹn ukoko na, rhe rhẹ ọke, ji rhiẹ ohworho ra hẹrosua. Wu vwe roro taghene owian ra yẹruọ ọ ghanren te wu ne kpọke rhọ-ọ. Damoma ruẹ ena enọ rhomurhọ. (Prov. 22:29) Ọke we rhe fiomarhọ ewian i Jehova, onyerẹnkugbe are nọ nọ kpẹnkpẹnrhọ, aghọghọ ọnọ no no ji bunrhọ. (Gal. 6:4) Nọ nọ phẹrẹ wẹn wu ne lele awọrọ ghọghọ, ọke aye i rhe vwo uphẹn ẹga re wu guọlọ ji vwo.—Rom. 12:15; Gal. 5:26.

12. Idjaghwẹ ego yẹ imizu awanva i kparare nẹ aye i sabu vwo aghọghọ bunrhọ?

¹² Wu ji karorhọ i Melissa, ro rhiẹ omizu ọmase ro vwo ẹhẹn rọ nọ ga uvuẹn Oghọn Ukoko yanghene riẹ Isukuru Ighwoghwẹmro Uvie na? Dedevwo ọ sabu nyamwu ẹkẹ erana-a, nọ tare: “Ne mia damoma fiomarhọ owian ọkobaro na, ji vwobọrhọ aruẹ ena aghwoghwo sansan. Ọnana ọ ghini yẹ mẹ aghọghọ ọduado.” Marhẹ Nick o ru fiẹ ẹhẹn ro seriotọre kparobọ ọke ra vwa haye mwu ẹrhẹ odibo owian? Nọ tare, “Ne mi tẹnrovi uphẹn ẹga ri havwiẹ mẹ—ọrẹ mi ne vwobọrhọ owian aghwoghwo na, ji kpahenrhọ enọ uvuẹn uyono. Ne mi fiobọrhọ ọbe mi ne riẹ Oghọn Ukoko, na ha use mẹ uvuẹn ẹgbukpe rọ ha kpahiẹn.”

13. Me yọ nọ phia wu rhe fiomarhọ owian wu vwori vwana? (Ecclesiastes 2:24)

¹³ Wu rha dabu fiomarhọ owian wu vwori vwana, wu na sabu vwo ewian erọrọ uvuẹn obaro na? Ọrana ọnọ sabu phia, jerẹ oborẹ ọ phia rẹn Nick. Ọrẹn, ọrhọ phia-a, jerẹ udje i Melissa, aghọghọ ọnọ ọnọ ji sabu bunrhọ fọkiẹ oborẹ wa wian rẹn Jehova. (Se Ecclesiastes 2:24.) Habaye, wu ne vwo obọdẹn aghọghọ fọkime wu rheri taghene omẹdamu ọnọ ọ merhen Onini ọwan Jesu Kristi oma.

14. Sekpahen ẹkẹ re bruru uvuẹn ogame i Jehova, me yo fori na karorhọ?

¹⁴ Orhianẹ wa tẹnrovi owian wu vwori vwana uvuẹn ogame i Jehova, ọrana no mevirhọ taghene wu rha guọlọ izede wu na wian bunrhọ-ọ? Ẹjo! O fori ne bru ẹkẹ ri na ha userhumu rẹn ọwan ru rhomurhọ uvuẹn owian aghwoghwo na, ọrhẹ ọrẹ ana ha userhumu rẹn imizu ukoko na. Ana sabu nyamwu ẹkẹ enana ọke arha ha ẹghwanren ọrhẹ uruemru dẹndẹn, ha userhumu rẹn awọrọ ukperẹ ana tẹnrovi oma ọwan.—Prov. 11:2; Acts 20:35.

15. Ẹkẹ ezẹko ego yi na sabu ha userhumu wẹn vwo aghọghọ rhọ?

¹⁵ Ẹkẹ ego wu na sabu bru rẹn oma? Nẹrhomo vwe i Jehova nọ ha userhumu wẹn vwẹruọ ẹkẹ wu na sabu nyamwu. (Prov. 16:3; Jas. 1:5) Wu na sabu hatua owu usuẹn ẹkẹ ra hunute uvuẹn  udjoghwẹ ọrukaro uvuẹn urhomu-ẹmro ọnana—ọrẹ wu ne rhiẹ ọkobaro ibiọke yanghene ọkobaro ọke ephian, wu na ga uvuẹn Oghọn Ukoko, yanghene vwobọrhọ ebanbọn ekete re ruẹ ogame? Ọkezẹko, wu na sabu yono edjadjẹ ọkpokpọ ne wu sabu kerabọ aghwoghwo iyẹnrẹn esiri na, yanghene tobọ ye ghwoghwo uvuẹn ẹkwotọre ọrọrọ. Wu na sabu yono kpahen oborẹ ọnana o surhobọmwu nyoma wu ne se urhomu-ẹmro 10 ọrẹ ọbe na Organized to Do Jehovah’s Will, ji ta kpahiẹn rẹn ekpako ri ha ukoko wu havwọ. * Ọke wa rha nyamwu ẹkẹ  erana, awọrọ ni na mẹrẹn eru riaro ọnọ, aghọghọ ọnọ no no ji bunrhọ.

16. Me wu na sabu ru orhianẹ vwana wu sabu nyamwu aruẹ ẹkẹ owu-u?

¹⁶ Ọrẹn, orhianẹ vwana wu sabu nyamwu owu usuẹn ẹkẹ ra hunute vrẹn ne na vwo-o? Damoma bru ẹkẹ ọrọrọ wu na sabu nyamwu. Roro kpahen erhirhiẹ ezẹko.

17. Lele oborẹ ọ 1 Timothy 4:13, 15, marhẹ omizu ọhworhare ono ru rhiẹ omamọ oyono?

¹⁷ Se 1 Timothy 4:13, 15. Orhianẹ wẹwẹ omizu ọhworhare ro bromarhame ne, wu na sabu wian kpahen ọrẹ wu ne ru rhomurhọ ọrẹ ona ẹmro ẹhaphia ọrhẹ uyono. Mesoriẹ? Fọkime wu rha dabu “fiomarhọ” isese, ẹmro ẹta, ọrhẹ uyono, ne wu na sabu ha userhumu rẹn era kerhọ. Damoma bru ẹkẹ wu ne yono kpahen, jeghwai ha uyono owuowu ra ta kpahen uvuẹn ibroshọ na Fiomarhọ Isese Ọrhẹ Uyono ruiruo. Dabu yono kpahen uyono owuowu uvuẹn oghwa, ne wu damoma haye ruiruo ọke wa rha ha ẹmro phia. Nekpẹn irorẹdjẹ mie obrurhe ibiọke yanghene ekpako erọrọ ra “wian gbanhan ọrẹ ẹmro ọrhẹ uyono.” * (1 Tim. 5:17) Tẹnrovi ọrẹ wu ne vwẹruọ uyono na, ji ha userhumu rẹn imizu ra kerhọ ruẹ esegburhomẹmro aye gbanhonrhọ yanghene lẹrhẹ aye vwo omwemẹ aye ina ha oborẹ aye i yonorin ruiruo. Nyoma ọnana, aghọghọ ọnọ ọrhẹ ọrẹ aye no no bunrhọ.

18. Me yọ nọ ha userhumu rẹn ọwan nyamwu ẹkẹ ọwan uvuẹn owian aghwoghwo na?

¹⁸ Ọwan ephian i vwo owian re ne ghwoghwo jeghwai ruẹ idibo. (Matt. 28:19, 20; Rom. 10:14) Wu guọlọ ruẹ ena enọ uvuẹn owian ọghoghanren ọnana rhomurhọ? Bru  ẹkẹ kirighwo te oma ọke we yono, ji ha oborẹ wu yono nẹ ibroshọ na Fiomarhọ Isese Ọrhẹ Uyono ruiruo. Wu na sabu mẹrẹn irorẹdjẹ eghoghanren erọrọ nẹ Ọbe-Owian Uyono Akpenyerẹn Ọrhẹ Iruo Uvie Na ọrhẹ ividio idje ẹhaphia re djephia uvuẹn uyono ọkprughwre na. Damu irorẹdjẹ na sansan, ne wu mẹrẹn ọrẹ ọlọhọ ha wẹn. Wa rha nyalele irorẹdjẹ enana, wu ne rhiẹromẹrẹn obọdẹn aghọghọ rọ havwiẹ ọke erhe rhiẹ Olele Kristi rọ tẹn ona.—2 Tim. 4:5.

19. Marhẹ wu ne ru vwo iruemru Olele Kristi?

¹⁹ We rhe roro kpahen ẹkẹ wu na sabu bru, wu vwa kpariroro vrẹn ẹkẹ owu usuẹn eri mai ghanren na-a—ọrẹ wu ne vwo iruemru Olele Kristi. (Gal. 5:22, 23; Col. 3:12; 2 Pet. 1:5-8) Marhẹ wu ne ruie lele? Jerẹ udje, orhianẹ wu guọlọ vwo esegburhomẹmro ọgbogbanhon. Wu na sabu se irhomu-ẹmro sansan uvuẹn ẹbe ukoko na ri ha irorẹdjẹ phia kpahen ọrẹ ene ruẹ esegburhomẹmro ọwan gbanhonrhọ. Wu na ji mẹrẹn erere nẹ eghọn sansan uvuẹn JW Broadcasting^® ri ta kpahen oborẹ imizu ukoko na, i ru dje obọdẹn esegburhomẹmro phia ọke aye a dẹrughwaroghwu edamuni sansan. Orho ru, roro kpahen izede wu ne ru hẹrokele esegburhomẹmro aye.

20. Marhẹ ene ru toroba aghọghọ ọwan ne je vwo ẹhẹn ro seriotọre phan?

²⁰ O vwo ẹfro-o, ọwan ephian i vwo ẹhẹn ra na wian rhọ rẹn Jehova vrẹn oborẹ e ruẹ vwana. Uvuẹn akpọ ọkpokpọ na, ana sabu ga i Jehova vuọnvuọn. Ọrẹn vwana, arha ha uphẹn re vwori ephian ruiruo, ana sabu toroba aghọghọ ọwan, rọ nọ lẹrhẹ ẹhẹn ọwan je seriotọre phan. Ọrọ mai ghanren, ana họghọ ọrhẹ ujiri vwe i Jehova, ro rhiẹ “Osolobrugwẹ oma ọ merhan.” (1 Tim. 1:11) Omarana, jene vwo aghọghọ uvuẹn uphẹn ẹga re vwori!