1. Бирӕтӕ Йегъовӕйы хъуыддаджы цӕмӕ тырнынц?

 АЦЫ дунейӕн йӕ кӕрон хӕстӕгӕй-хӕстӕгдӕр кӕны, ӕмӕ нын ис бирӕ куыст (Матф. 24:14; Лук. 10:2; 1 Пет. 5:2). Не ’ппӕты дӕр фӕнды Йегъовӕйӕн лӕггад кӕнгӕйӕ, нӕ бон цы у, уый аразын. Бирӕтӕ сфӕнд кӕнынц хъусын кӕныны хъуыддаджы фылдӕр аразын. Кӕйдӕрты фӕнды пионертӕй лӕггад кӕнын. Кӕйдӕрты та фӕнды Вефилы лӕггад кӕнын кӕнӕ нӕ организацийы агъуыстытӕ аразынӕн ӕххуыс кӕнын. Бирӕ ӕфсымӕртӕ та фӕтырнынц, цӕмӕй кӕстӕриуӕггӕнӕг ӕфсымӕртӕ кӕнӕ хистӕр нӕлгоймӕгтӕ суой (1 Тим. 3:1, 8). Ӕмӕ Йегъовӕ куы фӕуыны, йӕ адӕм куыд зӕрдиагӕй лӕггад кӕнынц, уӕд ын тынг ӕхсызгон вӕййы! (Пс. 110:3; Ис. 6:8).

2. Нӕ нысӕнттӕй кӕцыдӕртӕ нӕ къухы куы нӕ бафтынц, уӕд ныл уый куыд фӕзыны?

² Нӕ нысӕнттӕй кӕцыдӕртӕ, рӕстӕг куы рацӕуы, уӕд дӕр нӕ къухы куы нӕ бафтынц, уӕд, чи зоны, нӕ ныфс асӕтты. Йе та нӕ кармӕ гӕсгӕ кӕнӕ ӕндӕр цӕйдӕр тыххӕй уый гӕнӕн куы нӕ уа, цӕмӕй Йегъовӕйы организацийы цавӕрдӕр хӕстӕ ӕххӕст кӕнӕм кӕнӕ цавӕрдӕр нысан нӕ къухы бафта, уӕд уый тыххӕй дӕр, гӕнӕн ис, ӕнкъард кӕнӕм (Ӕмб. 13:12). Мелиссӕйӕн дӕр йӕ хабар афтӕ у *. Уый бӕргӕ фӕнды Вефилы лӕггад кӕнын кӕнӕ Хуыцауы Паддзахад хъусынгӕнджыты скъолайы ахуыр кӕнын. Фӕлӕ афтӕ зӕгъы: «Мӕ кармӕ гӕсгӕ мӕ бон нӕу нӕдӕр Вефилы лӕггад кӕнын, нӕдӕр уыцы скъолайы ахуыр кӕнын. Уыдон ныр ӕрмӕст мӕ бӕллиц сты. Ӕмӕ хатт ӕрӕнкъард вӕййын».

3. Фылдӕр хӕстӕ ӕххӕст кӕнын кӕй фӕнды, уымӕн йӕ бон цы у саразын?

³ Ӕрыгӕттӕ вӕййынц фидар ӕмӕ хъаруджын. Фӕлӕ сын цӕмӕй сӕ бӕрны фылдӕр хӕстӕ бакӕной, уый тыххӕй хъуамӕ сӕ  удыхъӕды чырыстон миниуджытӕ фидар кӕной ӕмӕ фӕлтӕрдджындӕр суой. Гӕнӕн ис, бирӕ зоной, уой ныфсхаст ӕмӕ сӕ удӕй арт уадзой. Фӕлӕ хъуамӕ сахуыр уой фӕразондзинадыл, стӕй алцыдӕр бӕстон аразын ӕмӕ иннӕтӕн кад кӕнын. Уӕдӕ ды дӕр хъӕугӕ миниуджытыл куы бакусай, уӕд дын, гӕнӕн ис, дӕ бӕрны фылдӕр хӕстӕ бакӕной, уый ӕнхъӕл куы нӕ уай, растдӕр гъеуӕд. Ӕркӕсӕм Никы хабармӕ. 20 азы йыл куы цыди, уӕд ӕй тынг фӕндыд кӕстӕриуӕггӕнӕг ӕфсымӕрӕй лӕггад кӕнын. Фӕлӕ уыцы нысан йӕ къухы кӕй не ’фтыд, уый тыххӕй йӕ ныфс асаст. Ник зӕгъы: «Афтӕ хъуыды кодтон, ӕмӕ цыдӕр раст нӕ аразын». Фӕлӕ йӕ къухтӕ не ’руагъта. Уый ӕмбырды хъуыддӕгты зӕрдиагӕй архайдта, стӕй зынгзӕрдӕйӕ хъусын кодта. Ӕмӕ абон лӕггад кӕны филиалы комитеты.

4. Ацы статьяйы цӕуыл аныхас кӕндзыстӕм?

⁴ Кӕд дӕ нысӕнттӕй кӕцыдӕр дӕ къухы нӕма бафтыд, уӕд уый тыххӕй, мыййаг, дӕ ныфс асаст? Кӕд о, уӕд Йегъовӕмӕ кув (Пс. 37:5–7). Дӕ бон ма у фӕлтӕрдджын ӕфсымӕрты бафӕрсын, дӕ лӕггады дӕ бон фӕхуыздӕр кӕнын цы у, уымӕй. Ӕмӕ-иу уый фӕстӕ сӕ уынаффӕтӕм гӕсгӕ архай. Афтӕ куы кӕнай, уӕд, цӕмӕ бӕллыс, уый иу бон дӕ къухы бафтдзӕн. Фӕлӕ, Мелиссӕйӕн йӕ хабар куыд у, афтӕ, чи зоны, ныртӕккӕ нӕй гӕнӕн, цӕмӕй дӕ бӕллиц сӕххӕст уа. Уӕд дӕ бон цы у саразын, цӕмӕй дӕ циндзинад ма ’рмынӕг уа? Цӕмӕй ацы фарстайӕн дзуапп базонӕм, уый тыххӕй ацы статьяйы аныхас кӕндзыстӕм ахӕм фарстатыл: 1) Адӕймагӕн циндзинад цы хӕссы? 2) Цы дын баххуыс кӕндзӕн, цӕмӕй цингӕнгӕйӕ лӕггад кӕнай? 3) Дӕ бон цавӕр нысӕнттӕ у дӕ разы сӕвӕрын, цӕмӕй дӕ циныл цин бафта?

5. Цӕмӕй цин кӕнӕм, уый тыххӕй фылдӕр цӕуыл хъуамӕ хъуыды кӕнӕм? (Екклесиаст 6:9).

⁵ Екклесиаст 6:9 стихӕй бӕрӕг у, циндзинад цӕмӕй кӕнгӕ у, уый. (Бакӕс ӕй.) «Ныртӕккӕ цы ис», уый чи уыны, уыцы адӕймаг райгонд вӕййы, цы йын ис, уымӕй, зӕгъӕм, ныртӕккӕ йӕ бон аразын цы у, уымӕй. Фӕлӕ адӕймаг, йӕ къухы цы нӕ бафтдзӕн, уыдӕттӕм куы бӕлла, уӕд райгонд никуы ницӕмӕй уыдзӕн. Уый нын цӕуыл дзурӕг у? Цӕмӕй цин кӕнӕм, уый тыххӕй хъуамӕ фылдӕр хъуыды кӕнӕм, цы нын ис, ууыл ӕмӕ нӕ разы ӕвӕрӕм, нӕ къухы чи бафтдзӕн, ахӕм нысӕнттӕ.

6. Цавӕр фӕсномыг ныхасмӕ ’ркӕсдзыстӕм ӕмӕ цы базондзыстӕм?

⁶ Бирӕты хъуыдымӕ гӕсгӕ, уый гӕнӕн нӕй, ӕмӕ адӕймаг райгонд уа, цы йын ис, ӕрмӕст уымӕй ӕмӕ йӕ ӕндӕр мацыуал хъӕуа. Адӕймаджы, дам, фӕфӕнды, цӕмӕй ног цыдӕртӕ базона, цӕмӕдӕрты фӕтырны. Фӕлӕ уымӕн гӕнӕн ис. Нӕ бон у, ныртӕккӕ нын цы ис кӕнӕ ныртӕккӕ цы аразӕм, ууыл цин кӕнын. Мах ӕркӕсдзыстӕм, Йесо талантты тыххӕй цы фӕсномыг ныхас радзырдта, уымӕ. Фыст ис Матфейы 25:14–30 стихты. Уыцы фӕсномыг ныхасӕй базондзыстӕм, цы нын баххуыс кӕндзӕн, цӕмӕй, ныртӕккӕ цы арфӕдзинӕдтӕй стӕм хайджын, уыдоныл цин кӕнӕм ӕмӕ ма цӕмӕй нӕ циныл ноджыдӕр бафта.

7. Йесо талантты тыххӕй цы фӕсномыг ныхас радзырдта, уый цыбыртӕй радзур.

⁷ Уыцы фӕсномыг ныхасы цы нӕлгоймаджы кой ис, уый сфӕнд кодта балцы ацӕуын. Ӕмӕ йӕ цагъартӕм фӕдзырдта ӕмӕ дзы алкӕмӕн дӕр таланттӕ радта, цӕмӕй сӕ фылдӕр ӕхца бакуыстаиккой *. Уый зыдта, цагъартӕй алкӕмӕн дӕр йӕ бон цы у ӕмӕ цы нӕу. Ӕмӕ дзы иуӕн радта 5 таланты, иннӕмӕн – 2 таланты, ӕртыккагӕн та – 1 талант. Фыццаг дыууӕ цагъары тынг бафыдӕбон кодтой, цӕмӕй фылдӕр ӕхца бакуыстаиккой. Фӕлӕ ӕртыккаг цагъар ӕппындӕр ницы бакуыста, ӕмӕ йӕ йӕ хицау атардта.

8. Фыццаг цагъар цӕуыл цин кодтаид?

 ⁸ Фыццаг цагъар куыннӕ цин кодтаид, йӕ хицау ын 5 таланты кӕй радта, ууыл. Уыйбӕрц ӕхца йӕм кӕй радта, уый ууыл дзурӕг уыд, ӕмӕ йыл тынг ӕууӕндыд. Фӕлӕ дыккаг цагъарӕй та цы ис зӕгъӕн? Хицау ын йӕ бар уыйбӕрц ӕхца кӕй нӕ бакодта, уый тыххӕй, мыййаг, йӕ ныфс асаст?

9. Йесо фӕсномыг ныхасы дыккаг цагъары тыххӕй цы нӕ загъта? (Матфейы 25:22, 23).

⁹ Бакӕс Матфейы 25:22, 23. Йесо афтӕ нӕ загъта, ӕмӕ дыккаг цагъар смӕсты, йӕ хицау ын 2 таланты йеддӕмӕ кӕй нӕ радта, уый тыххӕй. Хъаст дӕр нӕ кодта: «Хицау мын къаддӕр ӕхца цӕмӕн радта? Фондз таланты кӕмӕн радта, уыцы цагъарӕй къаддӕр нӕ фыдӕбон кодтон. Кӕд мын мӕ фыдӕбонӕн нӕ аргъ кӕны, уӕд ацы 2 таланты баныгӕндзынӕн ӕмӕ мӕхи хабӕрттӕ кӕндзынӕн».

10. Дыккаг цагъар йӕ таланттӕй куыд спайда кодта?

¹⁰ Фыццаг цагъарау дыккаг цагъар дӕр ӕмбӕрста, хицау ын цы хъуыддаг бахӕс кодта, уый ахсджиаг кӕй уыд, ӕмӕ зӕрдиагӕй бафыдӕбон кодта. Ӕмӕ ма йӕ хицауӕн ноджыдӕр 2 таланты бакуыста. Йӕ хицау ууыл тынг цин кодта ӕмӕ йын йӕ бар фылдӕр хӕстӕ бакодта.

11. Цы нын баххуыс кӕндзӕн, цӕмӕй нӕ циныл цин ӕфта?

¹¹ Йегъовӕйы хъуыддаджы нын цыфӕнды ма бахӕс кӕной,– зӕрдиагӕй йӕ куы аразӕм, уӕд махӕн дӕр нӕ циныл цин ӕфтдзӕн. Дӕ хъарутӕ хъусын кӕныны хъуыддагмӕ сараз ӕмӕ ӕмбырды хъуыддӕгты дӕр зӕрдиагӕй архай (Хъуыд. 18:5; Дзут. 10:24, 25). Ӕмбырдтӕм-иу дӕхи бацӕттӕ кӕн, цӕмӕй-иу дӕ дзуаппытӕй хотӕ ӕмӕ ’фсымӕрты бафидар кӕнай. «Нӕ чырыстон цард ӕмӕ нӕ лӕггад» чи хуыйны, уыцы фембӕлды-иу дын цавӕрфӕнды хӕслӕвӕрд  ма уа,– дзӕбӕх-иу ӕй бацӕттӕ кӕн. Ӕмбырды дын исты хъуыддаг куы бахӕс кӕной, уӕд-иу ӕй афоныл сараз ӕмӕ-иу равдис, ӕууӕнчы аккаг кӕй дӕ. Афтӕ макуы хъуыды кӕн, ӕмӕ дын цы хӕслӕвӕрдтӕ раттынц, уыдон цӕттӕ кӕнгӕйӕ дӕ рӕстӕг дзӕгъӕлы сафыс. Фӕлӕ архай, цӕмӕй арӕхстджындӕр кӕнай (Ӕмб. 22:29). Йегъовӕйы хъуыддаджы ӕппӕт хъарутӕй куы архайай, уӕд ӕм ноджы ӕввахсдӕр кӕндзынӕ ӕмӕ дӕ циныл цин ӕфтдзӕн (Гал. 6:4). Стӕй-иу, ды кӕмӕ тырныс, ахӕм хӕстӕ ӕндӕр искӕй бар куы бакӕной, уӕд-иу дын уый ӕхсызгон уыдзӕн (Ром. 12:15; Гал. 5:26).

12. Мелиссӕ ӕмӕ Ник цы сарӕзтой, цӕмӕй сын сӕ лӕггад циндзинад хастаид?

¹² Мелиссӕ, 2-аг абзацы кӕй кой уыд, уыцы хо, ӕмбары, ныртӕккӕ йӕ бӕллицтӕ кӕй нӕ сӕххӕст уыдзысты. Фӕлӕ афтӕ зӕгъы: «Ӕз лӕггад кӕнын пионерӕй ӕмӕ архайын, цӕмӕй, мӕ бон цы у, уый аразон. Стӕй ма архайын, цӕмӕй хъусын кӕнон алыхуызон мадзӕлтты фӕрцы. Ӕмӕ мын мӕ лӕггад стыр циндзинад хӕссы». Никӕн та цы баххуыс кодта, цӕмӕй йӕ къухтӕ ма ӕруагътаид, кӕстӕриуӕггӕнӕг ӕфсымӕрӕй йӕ куы не снысан кодтой, уӕд? Уый загъта: «Мӕ бон цы уыд, уый арӕзтон. Хъусын кӕныны хъуыддаджы ӕппӕт зӕрдӕйӕ архайдтон, стӕй-иу, хотӕ ӕмӕ ’фсымӕрты чи бафидар кодтаид, ахӕм дзуаппытӕ лӕвӕрдтон. Стӕй ма Вефилы лӕггад кӕныны тыххӕй курдиат дӕр байдзаг кодтон, ӕмӕ мӕ иннӕ аз фӕхуыдтой».

13. Ныртӕккӕ дӕ бар цы хӕстӕ ис, уыдон зӕрдиагӕй куы ӕххӕст кӕнай, уӕд цы ’нкъардзынӕ? (Екклесиаст 2:24).

¹³ Ныртӕккӕ дӕ бар цы хӕстӕ ис, уыдон зӕрдиагӕй куы ӕххӕст кӕнай, уӕд дын цымӕ дӕ бӕрны фылдӕр хӕстӕ бакӕндзысты? Гӕнӕн ис. Уый бӕрӕг у Никы хабарӕй. Фӕлӕ афтӕ куы нӕ уа, уӕддӕр дӕ бон уыдзӕн Мелиссӕйау цин кӕнын, цы дын ӕнтысы, ууыл ӕмӕ райгонд уыдзынӕ. (Бакӕс Екклесиаст 2:24.) Уымӕй уӕлдай ма дын стыр цины хос уыдзӕн, дӕ фыдӕбонӕй нӕ Хицауы, Йесо Чырыстийы, зӕрдӕ кӕй рухс кӕныс, уый дӕр.

14. Кӕд, нӕ бон цыдӕриддӕр у, уый аразӕм, уӕддӕр нӕ зӕрдыл цы хъуамӕ дарӕм?

¹⁴ Кӕд Йегъовӕйы хъуыддаджы, нӕ бон цыдӕриддӕр у, уый аразӕм, уӕд цымӕ уый ууыл дзурӕг у, ӕмӕ хъуамӕ фылдӕр аразынмӕ ма тырнӕм? Кӕй зӕгъын ӕй хъӕуы, нӕ. Хъуамӕ-иу нӕ разы нысӕнттӕ сӕвӕрӕм, цӕмӕй хорз хабар хъусын кӕнынмӕ ӕмӕ иннӕты ахуыр кӕнынмӕ ноджы хуыздӕр арӕхсӕм, стӕй нӕ хотӕ ӕмӕ не ’фсымӕртӕн ӕххуыс кӕнӕм. Ӕмбаргӕ ӕмӕ бонзонгӕ куы уӕм ӕмӕ фылдӕр нӕхиуыл нӕ, фӕлӕ иннӕтӕн лӕггад кӕныныл куы хъуыды кӕнӕм, уӕд уыцы нысӕнттӕ нӕ къухы бафтдзысты (Ӕмб. 11:2; Хъуыд. 20:35).

15. Дӕ бон дӕ разы цавӕр нысӕнттӕ у сӕвӕрын?

¹⁵ Дӕ бон дӕ разы цавӕр нысӕнттӕ у сӕвӕрын? Цӕмӕй уый бамбарай, уый тыххӕй Йегъовӕмӕ кув (Ӕмб. 16:3; Иак. 1:5). Дӕ бон у,  1-аг абзацы цы нысӕнтты кой уыд, уыдонӕй дӕ разы искӕцы сӕвӕрын, зӕгъӕм, ӕххуысгӕнӕг кӕнӕ ӕххӕстрӕстӕг пионерӕй лӕггад кӕнын, Вефилы лӕггад кӕнын кӕнӕ нӕ организацийы агъуыстытӕ аразынӕн ӕххуыс кӕнын. Йе та, чи зоны, дӕ бон у ӕндӕр ӕвзаг сахуыр кӕнын, цӕмӕй хорз хабар хъусын кӕнай, уыцы ’взагыл чи дзуры, уыцы адӕмӕн кӕнӕ, уыцы ’взагыл кӕм дзурынц, ахӕм ранмӕ ацӕуай. Уый фӕдыл фылдӕр ӕрмӕг ссарӕн ис чиныджы «Йегъовӕйы фӕндон чи ӕххӕст кӕны, уыцы организаци», 10-ӕм сӕры. Дӕ бон ма у де ’мбырды хистӕр нӕлгоймӕгтимӕ аныхас кӕнын *. Куы архайай, цӕмӕй уыцы нысӕнттӕ дӕ къухы бафтой, уӕд дын иннӕтӕ дӕр де ’нтыстдзинад уындзысты ӕмӕ дӕ циныл дӕр цин ӕфтдзӕн.

16. Кӕд ныртӕккӕ дӕ уавӕртӕ нӕ амонынц, цӕмӕй дӕ разы цавӕрдӕр нысан сӕвӕрай, уӕд дӕ бон цы у саразын?

 ¹⁶ Кӕд ныртӕккӕ дӕ уавӕртӕ нӕ амонынц, цӕмӕй, цы нысӕнтты кой кодтам, уыдонӕй искӕцы дӕ разы сӕвӕрай, уӕд дӕ бон цы у саразын? Дӕ разы сӕвӕр ӕндӕр нысан, дӕ къухы чи бафтдзӕн, ахӕм. Ӕркӕсӕм, цавӕр нысӕнттӕ ма у дӕ бон дӕ разы сӕвӕрын.

17. 1 Тимофеймӕ 4:13, 15 стихтӕм гӕсгӕ, ӕфсымӕртӕн сӕ бон цы у аразын, цӕмӕй иннӕты ахуыр кӕнынмӕ хуыздӕр арӕхсой?

¹⁷ Бакӕс 1 Тимофеймӕ 4:13, 15. Кӕд донаргъуыд ӕфсымӕр дӕ, уӕд архай, цӕмӕй иннӕты ахуыр кӕнынмӕ хуыздӕр арӕхсай. «Дӕ хъарутӕ иууылдӕр» уымӕ сараз. Уӕд, цы кӕсыс, цы дзурыс ӕмӕ иннӕты цӕуыл ахуыр кӕныс, уый сӕ зӕрдӕтӕм ноджы тынгдӕр хъардзӕн. Дӕ разы ахӕм нысан сӕвӕр: брошюрӕйы «Хуыздӕр кӕс ӕмӕ иннӕты арӕхстджынӕй ахуыр кӕн» цы уроктӕ ис, уыдонӕй алкӕцыйыл дӕр бӕстон бакусын. Иу хаттӕн бакус иу урокыл. Ӕмӕ дын ӕмбырды раныхас кӕнӕ ӕндӕр хӕслӕвӕрд куы уа, уӕд-иу, урочы цы уынаффӕтӕ ис, уыдонӕй спайда кӕн. Куыд дзурдзынӕ, уый-иу хӕдзары афӕлвар. Дӕ бон ма у уынаффӕ ракурын уынаффӕдӕттӕг ӕфсымӕрӕй кӕнӕ иннӕ хистӕр нӕлгоймӕгтӕй – «Хуыцауы ныхас дзурын ӕмӕ амоныны хъуыддаджы чи фыдӕбон кӕны», уыдонӕй (1 Тим. 5:17) *. Дӕ нысан ӕрмӕст уый ма уӕд, цӕмӕй дзырдарӕхст суай. Уымӕй уӕлдай ма архай, цӕмӕй, чи дӕм хъусы, уыдонӕн ӕххуыс кӕнай, цӕмӕй сӕ уырнындзинад фидардӕр кӕна ӕмӕ сӕ фӕнда, цы базонынц, уымӕ гӕсгӕ архайын. Ӕмӕ уӕд дӕхӕдӕг дӕр цин кӕндзынӕ ӕмӕ дӕм чи хъусы, уыдон дӕр цин кӕндзысты.

18. Цы нын баххуыс кӕндзӕн, цӕмӕй, хъусын кӕныны хъуыддаджы нӕ разы цы нысӕнттӕ ӕвӕрӕм, уыдон нӕ къухы бафтой?

 ¹⁸ Алкӕуыл дӕр нӕ ис хӕс – хорз хабар хъусын кӕнын ӕмӕ ахуыргӕнинӕгтӕ цӕттӕ кӕнын (Матф. 28:19, 20; Ром. 10:14). Нӕ дӕ фӕндид, цӕмӕй уыцы ахсджиаг хъуыддаджы арӕхстджындӕр суай? Брошюрӕйы «Ахуыр кӕн» цы уроктӕ ис, уыдоныл бакус ӕмӕ-иу дӕ разы сӕвӕр, уыцы уынаффӕтӕм гӕсгӕ архайынӕн дын чи баххуыс кӕндзӕн, ахӕм нысӕнттӕ. Дӕ бон ма у ӕндӕр уынаффӕтӕ ссарын «Кусӕн тетрад»-ы, стӕй, адӕмимӕ ныхас райдайӕн куыд ис, уый фӕдыл ӕмбырды цы видеороликтӕ вӕййы, уым. Алыхуызон мадзӕлттӕ бафӕлвар, цӕмӕй бамбарай, уӕ территорийы дзы хуыздӕр кӕцы уыдзӕн. Уыцы уынаффӕтӕм гӕсгӕ куы архайай, уӕд иннӕты ахуыр кӕнынмӕ хуыздӕр арӕхсдзынӕ ӕмӕ дын уый стыр циндзинад хӕсдзӕн (2 Тим. 4:5).

19. Дӕ бон куыд у, Хуыцауы зӕрдӕмӕ чи цӕуы, ахӕм миниуджытӕ дӕ удыхъӕды фидар кӕнын?

¹⁹ Дӕ разы цавӕр нысӕнттӕ сӕвӕрдзынӕ, ууыл куы хъуыды кӕнай, уӕд-иу дӕ сӕйраг хъуыддаг ма ферох уӕд – Хуыцауы зӕрдӕмӕ чи цӕуы, ахӕм миниуджытӕ дӕ удыхъӕды фидар кӕнын (Гал. 5:22, 23; Кол. 3:12; 2 Пет. 1:5–8). Уый дын цӕй фӕрцы бантысдзӕн? Зӕгъӕм, фӕнды дӕ, цӕмӕй дӕ уырнындзинад фидардӕр уа. Уӕд дӕ бон у бакӕсын, уыцы хъуыддаджы дын чи баххуыс кӕндзӕн, ахӕм статьятӕ. Стыр пайда ма дын фӕуыдзысты, JW Broadcasting^®-ы цы видеороликтӕ вӕййы, уыдон дӕр. Уыдонӕй базонӕн вӕййы, нӕ хотӕ ӕмӕ не ’фсымӕртӕ алыхуызон зындзинӕдты фидар уырнындзинад куыд равдисынц, уый. Ӕмӕ-иу уый фӕстӕ ахъуыды кӕн, дӕ бон сӕ бафӕзмын куыд у, ууыл.

20. Цы нын баххуыс кӕндзӕн, цӕмӕй нын нӕ лӕггад циндзинад хӕсса ӕмӕ-иу нӕ ныфс мацӕй тыххӕй асӕтта?

²⁰ Кӕй зӕгъын ӕй хъӕуы, махӕй алкӕй дӕр фӕнды Йегъовӕйӕн фылдӕр лӕггад кӕнын. Ног дунейы Йегъовӕйӕн, цас нӕ фӕнды, уыйбӕрц лӕггад кӕндзыстӕм. Фӕлӕ уал уӕдмӕ, нӕ бон цыдӕриддӕр у, уый аразӕм. Афтӕ куы кӕнӕм, уӕд нын нӕ лӕггад циндзинад хӕсдзӕн. Ӕмӕ нын цыдӕр куы не ’нтыса, уӕд-иу нӕ ныфс нӕ асӕтдзӕн. Фӕлӕ уымӕй ахсджиагдӕр та уый у, ӕмӕ уӕд нӕ «амондджын Хуыцау» Йегъовӕйы кадджын кӕндзыстӕм (1 Тим. 1:11). Цӕй уӕдӕ, ныртӕккӕ цы аразӕм, ууыл цин кӕнӕм!