1. Antoy gagawaen na dakel ya agagi ta labay dan iter so ‘the best’ da ed si Jehova?

 DAKEL so kimey ya ipapagawa nen Jehova ed sikatayo legan ya manasingger so anggaan. (Mat. 24:14; Luc. 10:2; 1 Ped. 5:2) Siempre labay tayon iter ed sikatoy ‘the best’ tayo. Kanian papalaknaben na dakel ya agagi so ministeryo ra. Say arum et manplaplanon manpayunir. Wala ray labay day manlingkor ed Bethel odino manboluntaryo ed construction project na organisasyon tayo. Dakel met ya brother so mansasagpot pian onkualipika ran ministeryal a lingkor odino elder diad kongregasyon. (1 Tim. 3:1, 8) Seguradon naliliketan si Jehova ed saray lingkor to ya mabulbulos ya manpausar ed sikato!—Sal. 110:3; Isa. 6:8.

2. Antoy nayarin nalikna tayo no agniiter ed sikatayo so pribilehyon abayag tayo lan aalagaren odino agtayo lan talaga kualipikado?

² Ompan nadismaya tayo balet no abaybayag tayo lan aalagaren so sakey a pribilehyo pero agnin siansia niiter ed sikatayo. Odino ompan agtayo la kualipikado ed sakey a pribilehyo lapud edad odino situasyon tayod bilay. (Pro. 13:12) Ontan so situasyon nen Melissa. * Labalabay to komoy man-Bethelite odino manaral ed School for Kingdom Evangelizers (SKE), pero oniay imbaga to: “Akulaw ak la parad saratan. Kanian anggano labalabay ko, anggad pangarap labat la. Makapadismaya no maminsan.”

3. Anto ni gawaen na sakey pian magmaliw ya kualipikado ed saray pribilehyo?

³ Saray kabataan et maksil so laman da, pero ompan kaukolan da ni manpatatken ed espiritual tan aralen dan ipanengneng iray maong ya ugali tan kualidad antis iran magmaliw ya  kualipikado parad kaaruman iran pribilehyo. Tua, ompan alisto ra, maples iran manisip, tan matalino ira. Pero ompan kaukolan da nin aralen so mankimey ya pulido, tan magmaliw ya maanos tan marespeto. No pansagpotan mon ipanengneng iratan ya kualidad, nayarin onsabi so pribilehyo diad panaon ya agmo iilaloan. Imanoen so eksperiensya nen Brother Nick. Nen 20 so edad to, adismayan maong ta ag-aturon ministeryal a lingkor. Imbaga to: “Naisip ko laingen ya kulang ni amoy gagawaen ko.” Pero agsinmuko si Nick. Nansiansian maseseg ed kongregasyon tan ed ministeryo. Natan et manlilingkor la bilang membro na Branch Committee.

4. Anto ray pantongtongan tayo ed sayan artikulo?

⁴ Kasin nadidismaya ka ta agmo ni naabot so goal mo? No on, ibagam so naliliknam ed si Jehova. (Sal. 37:5-7) Ontan met, sarag mon tepetan iray maespiritual ya brother no antoy ni-suggest da pian napaaligwas mo ni panaglingkor mo, tan maabig no iyaplikam so suggestion da. No ontan so gawaen mo, baleg so posibilidad ya naabot moy goal mo. Balet ompan say situasyon mo et singa si Melissa ya abitla ed parapo 2. Ompan labalabay moy mandampot na pribilehyo pero agka la kualipikado. Labay to kasin ibaga, agka la magmaliw ya maliket? Pian naebatan itan, pantongtongan tayo ed sayan artikulo (1) no antoy gawaen tayo pian magmaliw tayon maliket, (2) no panon tayon magmaliw a mas maliket, tan (3) no anto ran goal so mangarum na liket.

5. Antoy gawaen tayo pian magmaliw tayon maliket? (Eclesiastes 6:9)

⁵ Walay naaralan tayo ed Eclesiastes 6:9 ya makatulong pian magmaliw tayon maliket. (Basaen.) Say toon ‘panliliketan toy nanenengneng na mata to’ et aapresyaen to no antoy wala lad sikato, antokaman so situasyon to. Pero no say sakey a too et ‘aanapen to ni ray pilalek to’ anggano amta to met ya imposible to lan naala iratan, agbalot naliketan ed bilay to. Antoy punto? Pian magmaliw tayon maliket, dapat manpokus tayo ed no antoy wala lad sikatayo natan tan ed no anton talagay sarag tayon gawaen.

6. Anton ilustrasyon so pantongtongan tayo, tan antoy imanoen tayo ed satan?

⁶ Posible kasi ya magmaliw tayon maliket ed no antoy wala lad sikatayo natan? Iisipen na arum ya imposible itan, ta natural labat kuno ya labay tayoy makaaral na duma tan walay balo ed bilay tayo. Pero diad tua, sarag tayon panliketan no antoy wala lad sikatayo natan. Panon tayon nagawaan itan? Pian naamtaan tayo, pantongtongan tayo so ilustrasyon nen Jesus tungkol ed saray talento ya nabasad Mateo 25:14-30. Imanoen tayo ditan no antoy gawaen tayo pian magmaliw tayon mas maliket ed panlilingkor tayo.

7. Isumaryon antikey so ilustrasyon nen Jesus tungkol ed saray talento.

⁷ Diad samay ilustrasyon nen Jesus, walay laki ya onlad arum a bansa. Pero antis ya inmalis, impatawag to ray aripen to tan inikdan to ray talento pian inegosyo ra. * Amta to ya nandurumay abilidad na saray aripen to, kanian limaran talento so inter tod samay unonan aripen, duara ed samay komadua, tan sakey ed samay komatlo. In-negosyon tampol na unona tan komaduan aripen imay kuartan inter na katawan da. Amay komatlon aripen  balet et inkotkot to labat imay kuartan inter ed sikato kanian asisante.

8. Akin et seguradon malikeliket imay unonan aripen?

⁸ Seguradon malikeliket may unonan aripen ta limaran talento so inter na katawan to. Labay ton ibaga, baleg so tiwala na katawan tod sikato ta balbaleg iman ya kantidad! Amay komaduan aripen balet ey? Adismaya kasi ta mas daiset so naawat to? Anto kasi reaksion to?

9. Diad samay ilustrasyon, antoy agginawa na samay komaduan aripen? (Mateo 25:22, 23)

⁹ Basaen so Mateo 25:22, 23. Anggapoy nabasa ed ilustrasyon ya adismaya tan binmarong imay komaduan aripen ta duaran talento labat so inter ed sikato na katawan to. Anggapo met so nabasa ya nanreklamo tan inisip ton: ‘Akin et aya labat so inter na katawan ko? Anta makuli ak met! Anggapo amoy tiwala tod siak. Ikotkot ko la amo yay kuarta pian anggapo lay nonoten ko.’

10. Antoy ginawa na komaduan aripen ed saray talento ya inter ed sikato?

¹⁰ Singa samay unonan aripen, sineryoso met na komaduan aripen so responsabilidad ya inter ed sikato na katawan to. Makuli ton in-negosyo imay kuarta. Kanian apatelek to, tan duara nin talento so atubo to! Aliketan so katawan to ed inkakuli tan diskarte to. Kanian kinomendaan to iyan aripen tan inikdan to ni ingen na kaaruman ya responsabilidad.

11. Antoy gawaen mo pian magmaliw kan mas maliket?

¹¹ Singa samay komaduan aripen, magmaliw tayo met ya mas maliket ed panlilingkor tayod si Jehova no pasyaen tayo so antokaman  ya kimey o asainmin ya inter ed sikatayo. Singa bilang, mankuli kad panagpulong tan mitulongan kad saray kimey diad kongregasyon. (Gawa 18:5; Heb. 10:24, 25) Manparaan kan maong parad aral pian makapankomento ka tan napaseseg mo ray agagi. Seryosom iray partem diad aral ed midweek tan ipraktis mon maong. No walay ipapagawa dad sika diad kongregasyon, gawam ya tampol tan seguradom ya natumbok mon amin so instruksion. Tandaan mo ya importante so amin ya kimey, anggano simpli labat itan. Insan nengneng mo no anto ni ray kaukolan mon paaligwasen pian magmaliw kan mas marunong. (Pro. 22:29) No mamasya kad antokaman ya kimey o asainmin ed kongregasyon, mas maples so iyaligwas mod espiritual tan magmaliw kan mas maliket. (Gal. 6:4) Mas mainomay mo met so miliket ed saray agagi no bilang ta makaawat iray pribilehyo ya labalabay mo met komon ya naawat.—Roma 12:15; Gal. 5:26.

12. Antoy ginawa nen Sister Melissa tan Brother Nick pian magmaliw iran mas maliket?

¹² Nanonotan yoy Sister Melissa, amay agi ya labay to komoy man-Bethelite odino manaral ed SKE? Anggano agto la iratan nagawaan, imbaga to: “Ginawaan koy anggaay nayarian ko ed pampapayunir ko tan sinalik so nanduruman paraan na panagpulong kanian malikeliket ak.” Si Brother Nick balet ey? Antoy ginawa to pian nalabanan toy impakadismaya to nen ag-aturon ministeryal ya lingkor? Oniay imbaga to: “Nampokus ak ed saray sarag kon gawaen, singa say panagpulong tan pangiparaan na makapaseseg iran komento diad aral. Nan-apply ak met ed Bethel, tan atawag ak kayari sakey taon.”

13. Antoy resulta no mamasya kad asainmin mo natan? (Eclesiastes 2:24)

¹³ No mamasya kad asainmin mo natan, kasin makaawat ka ni kaaruman ya pribilehyo? On posible, ya singa agawad si Nick. Pero anggano agka makaawat na kaaruman ya pribilehyo ya singa ed situasyon nen Melissa, say segurado et magmaliw kan mas maliket ta antam ya iiter moy anggaay nayarian mo parad si Jehova. (Basaen so Eclesiastes 2:24.) Antam met ya napapaliket moy Katawan tayon Jesu-Kristo ed pansasagpot mo.

14. Antoy nepeg ya sankanonot tayo no wala ray labay tayon i-goal?

¹⁴ No mamapasya tayo lad asainmin tayo natan, labay to kasin ibaga et agtayo la mannonot na arum a paraan pian napalaknab tayo ni panlilingkor tayod si Jehova? Andi! Dapat walan walay goal tayo ed espiritual pian napaaligwas tayo ni so panagpulong tan panagbangat tayo tan mas makatulong tayod saray agagi. Nagawaan tayo ray goal tayo no say sankanonot tayo et aliwan say sarili tayo, noag say itulong tayod arum.—Pro. 11:2; Gawa 20:35.

15. Anto ran goal so mangarum na liket?

¹⁵ Anto ray iisipen mon goal? Kerew mod si Jehova ya tulongan to kan makapanpili na goal ya talagan sarag mon gawaen. (Pro. 16:3; Sant. 1:5) Kasin sarag mon gawaen ya goal iramay abitla ed  parapo 1—singa say pan-auxiliary o pan-regular payunir, panlingkor ed Bethel, o pamboluntaryo ed saray construction project na organisasyon tayo? Ompan sarag mo met so manaral na sananey a lenguahe pian napulongan mo ray dayo ed lugar yo odino makatulong ka ni ingen ed lugar ya mas baleg so pankaukolan. Pian naamtaan mo ray kaaruman ya impormasyon tungkol ed sarayan goal, basam so kapitulo 10 na libron Organisadon Manggawa na Linawa nen Jehova tan mitongtong kad saray  elder diad kongregasyon yo. * Legan mon pansasagpotan ya aboten irayan goal, naliketan iray agagi ed iyaaligwas mod espiritual tan maliket ka met.

16. No lapud situasyon mo natan et agmo ni nagawaan so sakey ya goal, antoy gawaen mo?

¹⁶ Panon to balet no lapud situasyon mo natan et agmo ni nagawaan iratan ya goal? Manpokus ka ni ed arum ya goal ya seguradon nagawaan mo. Anto iratan?

17. Base ed 1 Timoteo 4:13, 15, panon ya napaaligwas na sakey ya brother so panagbangat to?

¹⁷ Basaen so 1 Timoteo 4:13, 15. No sakey kan bautismadon brother, marakep no i-goal mon paaligwasen so panagpaliwawam tan panagbangat mo. Akin ey? On ta no “iyulom” tan paaligwasen moy panagbasam, panagpaliwawam, tan panagbangat mo, magmaliw kan bendisyon ed amin ya ondengel ed sika. Aral mo tan iyaplikam so kada leksion ya walad brosyur ya Manseet Ka ed Panagbasa tan Panagbangat. No walay partem ed aral, basam tan aral mon maong so leksion ya akaasain ed sika, manpraktis ka ya maminpiga, tan iyaplikam iray punton abasam ed brosyur. Kerew kay suggestion ed akaasain ya katulongan a managkonseho odino diad arum ni ran elder ya “mansasagpot ed . . . panagbangat.” * (1 Tim. 5:17) Tandaan mo ya say goal mo et aliwa labat ya pian magmaliw kan marunong ya manpaliwawa o manbangat, noagta pian napabiskeg moy pananisia na saray ondedengel ed sika tan napakiwas mo ran iyaplika iray naaralan da. No ontay gawaen mo, aliwan  sika labat so maliket noagta anggan sikara met.

18. Antoy gawaen tayo pian napaaligwas tayoy dunong tayod panagpulong tan panagbangat?

¹⁸ Pribilehyo tayon amin so manpulong tan manbangat. (Mat. 28:19, 20; Roma 10:14) Kasin labay mo nin paaligwasen so abilidad mo ed sayan importantin kimey? Aral mo sirin so brosyur ya Panagbangat, tan nonot mo no panon mon iyaplika iray naaralan mon punto. Makatulong met iray suggestion ed Workbook ed Aral tan saray video na pangaligan a presentasyon ya nababantayan tayod aral ed midweek. Salim irayan nanduruman suggestion, tan nengneng mo no antoy epektibo ed teritorya yo. No gawaen mo iratan, seguradon napaaligwas moy dunong mon manpulong tan manbangat kanian magmaliw kan mas maliket ed ministeryom.—2 Tim. 4:5.

19. Antoy gawaen mo pian mas nipanengneng mo ray ugali tan kualidad ya makapaliket ed Dios?

¹⁹ Bilang Kristiano, sakey met ed saray importantin goal tayo et no panon tayon mas nipanengneng iray ugali tan kualidad ya makapaliket ed Dios. (Gal. 5:22, 23; Col. 3:12; 2 Ped. 1:5-8) Panon mon nagawaan itan? Singa bilang, goal mon pabiskegen so pananisiam. Maabig no manbasa ka na saray artikulod publikasyon tayo tungkol ed satan. Dakel met so nabantayan mon video ed JW Broadcasting^® tungkol ed saray agagi ya asarag day nanduruman subok tan problema ta mabiskeg so pananisia ra. Insan manisip kay situasyon ed bilay mo ya naalig moy pananisia ra.

20. Antoy gawaen tayo pian magmaliw tayon maliket tan agtayo masyadon nadismaya?

²⁰ Seguradon amin tayo et labalabay tayon mas dakel ni komoy nagawaan tayo parad si Jehova. Diad balon mundo, agtayo la nalimitaan ta nagawaan tayo lan amin. Pero no natan ni labat et iiter tayo lay ‘the best’ tayo ed si Jehova, magmaliw tayo lan maliket tan agtayo masyadon nadismaya. Tan seguradon napagalangan tayoy Jehova, say “maliket a Dios” tayo. (1 Tim. 1:11) Kanian komon ta panliketan tayo so antokaman ya pribilehyo tayo natan!