LONGO DIA 33
Khala nu Gusuanguluga Mukunda nu Inemo Udi Nayo
‘Suanguluga nu ima meso aye adi mumona, ha fundo dia gulandula nzala jiaye.’—Mulo. 6:9.
LUNGIMBO 111 Joyeux grâce à Dieu
NDAGA JIDI MU LONGO EDI *
1. Midimo itshi aphangi avula ana tshigina gukalagala mukunda nu Yehowa?
LUHOLO gisugishilo gia mavu awa giasuena hehi, tudi diago nu mudimo wavula wa gukalagala. (Mat. 24:14; Luka 10:2; 1 Phet. 5:2) Mukut’etu agasue tuana tshigina diago gukalegela Yehowa mudimo muavula. Aphangi avula ana gudihana muavula mu mudimo wa gulongesa. Ako ana tshigina gubua avundji a njila. Ako nji ana tshigina gukalagala mudimo gu Betele nga gudihana mu mudimo wa gutunga Jinzo jia Ufumu, ba salles d’assemblées, ba Betele nga ba antennes de traduction. Aphangi’a mala avula ana kalagala ngolo ha gutagenesa ndaga jiana togewa ha gubua akuateshi a mudimo nga akulu. (1 Tim. 3:1, 8) Yehowa wana suanguluga muavula tangua ana mona akombeledi enji mudihana muavula, ha gumukalegela mudimo!—Ngi. 110:3; Yesh. 6:8.
2. Luholo lutshi tuajiya gudivua gula tushigo mutaganesa mafelela etu a mu nyuma?
2 Tuajiya gusendesa guleba muila gula matangua avula abalega gale, uvi tushigo mutaganesa mafelela etu mu mudimo wa Yehowa. Tuajiya nji guleba muila luholo tushigo muheta inemo iko mu organizasio wa Yehowa handaga tudi athu agukola, nga mukunda nu ndaga jiko. (Ish. 13:12) Phangi Melissa wataganele nji nu ndaga ya luholo elu. * Wakhalele mutshigina gukalagala mudimo gu Betele nga ha gungina gu Khalasa dia Alongeshi a Ufumu. Uvi udi muzuela egi: “Luholo ngudi muthu wa gukola, ngushigo luko nu luholo lua gutagenesa mafelela ene. Matangua ako ndaga yene yakhalele gungulebesa muila.”
3. Ndaga jitshi aphangi ako ajiya gukalagala ha guheta inemo iko mu mudimo wa Yehowa?
3 Aphangi anyi adi mavuala nu adi nu sante yawaha adi naye gukudisa makalegelo ako gutuama egi ahete inemo iko. Ha gufezegesa, aphangi ako ajiya gukhala nu ndunge, ana guzula badesizio muphushi, nu ana gudihana mu mudimo wa Yehowa. Uvi adi naye gukudisa khadilo dia guhuiminyina, dia gukalagala mudimo nu gutema guagasue nu dia gunemesa athu ako. Gula udi mukalagala yagasue ha gukudisa makalegelo aye, wajiya guheta ginemo gimoshi mu tangua dinyi wakhalelego mutangiza. Tuzuelelenu gale gifezegeselo gia phangi Nick. Tangua gataganesele ivo 20, walebele lume muila handaga amutombelego ha gukhala mukuateshi wa mudimo. Udi muzuela egi: “Ngakhalele mutangiza egi gudi naye gukhala nu ndaga imoshi ishigo muyila muabonga.” Uvi phangi Nick gabembelego gukudisa makalegelo enji. Walanduile gudihana muavula mu midimo iko ya mu hungu nu mu mudimo wa gulongesa. Mangino, wana gukalagala mudimo gu Komite ya Filiale imoshi.
4. Itshi tuza muzuelela mu longo edi?
4 Walebele gale muila handaga khenji utageneselego felela dimoshi ngenyi dia mu nyuma ba? Gula idi ngenyi, wambela Yehowa luholo udi gudivua. (Ngi. 37:5-7) Wajiya nji gutoga malongo gudi aphangi a gukula mu nyuma ha gujiya luholo wajiya gudihana mu mudimo wa Nzambi, gungima tshita yagasue ha gukalegela malongo ene. Gula watshita ngenyi, mbawukhala watagana ha guheta ginemo giene nga ha gutagenesa felela diaye. Uvi gifua phangi Melissa tuazuelela gu thunda, yajiya gukhala egi ushigo luko nu luholo lua gukalegela Yehowa mudimo gifua luholo wana tshigina. Na itshi yajiya gugukuatesa ha gubamba gusuanguluga guaye? Longo edi diza gutukuatesa ha guheta mvutu gu muhu owu. Tuza nji muzuelela (1) ndaga jiajiya gugubatela gusuanguluga, (2) luholo wajiya gukhala nu gusunguluga guavula, (3) nu mafelela wajiya gudishila, anyi ajiya gugubatela gusuanguluga.
NDAGA JIAJIYA GUGUBATELA GUSUANGULUGA
5. Tudi naye guhaga matangi’etu mu ndaga itshi hagula tukhale nu gusuanguluga? (Mulongeshi 6:9)
5 Mukanda wa Mulongeshi 6:9 udi gutumonesa ndaga yajiya gutukuatesa ha gukhala nu gusuanguluga. (Tanga.) Muthu udi mutala phamba ‘ima meso enji adi mumona’ wana suanguluga nu ima adi nayo. Uvi muthu yonu udi mulandula gukamba ima yinyi gajiyilego guheta, gajiyilego gukhala nu gusuanguluga nga hazonda. Longo ditshi tuazula? Ha gukhala nu gusuanguluga, tudi naye guhaga matangi’etu phamba mu ima tudi nayo, uvi tushigo naye gukamba ima inyi tuajiyilego guheta.
6. Gifezegeselo gitshi tuza mutadila? Ndaga tshi tuza mumona mu gifezegeselo giene?
6 Tuajiya diago gusuanguluga nu ima tuana khala nayo ba? Athu avula ana tangiza egi tuajiyilego gukhala nu gusuanguluga, handaga tuana tshigina gulandula gulonguga luholo lua gukalagala ndaga jihe-jihe. Uvi idi yadiago egi tuajiya gusuanguluga nu ima tudi nayo. Itshi yajiya gutukuatesa? Tutadilenu gifezegeselo gia Yesu gia talanta gidi mu Matayo 25:14-30. Tuza mumona luholo verse eyi yajiya gutukuatesa ha gusuanguluga nu ima tudi nayo, nu luholo Tuajiya gubamba gusuanguluga guene.
LUHOLO WAJIYA GUKHALA NU GUSUANGULUGA GUAVULA
7. Zuelela gifezegeselo gia Yesu gia talanta mu guhihia.
7 Yala adi muzuelela mu gifezegeselo giene, wakhalele mutshigina guya mu vuayaje. Gutuama dia guya, watamegele enya mudimo enji, waahanele talanta mukut’awo agasue hagula asale mukalagala mudimo. * Yala muene wakhalele mujiya egi enya mudimo wenji ana khala ndo nu ndunge jia gukalagala ndaga luholo lumoshi. Hene, wahanele muenya mudimo wa thomo talanta thano, wahanele muenya mudimo wa mbadi talanta mbadi, muenya mudimo wa thathu wamuhanele talanta imoshi. Muenya mudimo wa thomo nu wa mbadi akalegele yagasue ha guvudisa makuta a fumi’awo. Uvi muenya mudimo wa thathu gakalegelego nga ndaga imoshi nu falanga amuhanele, hene fumi’enji gamukatudile gu mudimo.
8. Mukunda natshi muenya mudimo wa thomo wakhalele nu gusuanguluga guavula?
8 Muenya mudimo wa thomo wakhalele nu gusuanguluga luholo fumi’enji wamuhanele talanta thano. Akhalele makuta avula diago. Yakhalele mumonesa egi fumi’enji wana gumushila diago mutshima! Uvi itshi tuajiya guzuela mukunda nu muenya mudimo wa mbadi? Wakhalele naye guleba muila handaga amuhanelego talanta jiavula gifua luholo ahanele muenya mudimo wa thomo. Uvi itshi muenya mudimo muene wakalegele?
Malongo tshi tuajiya guzula mu ndaga jiakalegele muenya mudimo wa mbadi adi muzuelela mu gifezegeselo gia Yesu? (1) He received two talents from his master. (2) Fumi’enji wamuhanele talanta mbadi. (3) Wahetele talanta jiko mbadi holu dia talanta jinyi amuhanele (Tala paragrafe 9-11)
9. Ndaga itshi Yesu azuelelego mukunda nu muenya mudimo wa mbadi? (Matayo 25:22, 23)
9 Tanga Matayo 25:22, 23. Yesu azuelelego egi muenya mudimo wa mbadi wavuile khabu, handaga amuhanele talanta phamba mbadi. Wazuelelego nji egi muenya mudimo muene wasendesele guboguta egi: ‘Mukunda natshi fumi’ami wanguhana talanta jiazonda? Ame nji ngana kalagala mudimo wakola gifua muenya mudimo munu ahanyi talanta thano! Gula fumi’ami gana suanguluga ndo nu midimo ngana gumukalegela, ngajiya guvumbiga talanta eji mbadi, nguye ngukalagale midimo yami iko.’
10. Luholo lutshi muenya mudimo wa mbadi wakalegele talanta amuhanele?
10 Muenya mudimo wa mbadi wakalegele nji luholo lumoshi nu muenya mudimo wa thomo. Wazudile ginemo giamuhanewe nu ndando yavula nu wakalegele mudimo wakola mukunda nu fumi’enji. Hene, wahetele talanta jiko mbadi holu dia talanta jinyi amuhanele. Fumu washimbigile muenya mudimo owu, handaga wakalegele mudimo wakola. Wamushimanele, wamuhanele nji inemo iko yavula!
11. Itshi yajiya gutukuatesa ha gukhala nu gusuanguluga guavula?
11 Esue nji tujiya gukhala nu gusuanguluga guavula, gula tudi mukalagala yagasue ha gutagenesa inemo tudi nayo mu mudimo wa Yehowa. Khala ‘gudihana muavula’ mu mudimo wa gulongesa nu mu midimo iko ya mu hungu. (Makal. 18:5; Heb. 10:24, 25) Khala gudilondega muabonga mukunda nu gudibungisa, hagula wajiya guhana komantere jiabonga jidi muhana gikhesa. Khala muzula devuare diagasue ana guguhana mu gudibungisa gua mukatshi dia phoso nu ndando. Gula aguhana ginemo gimoshi mukatshi dia hungu, gitagenese mu tangua dia gutogewa nu mutshima umoshi. Ukhadigo mutangiza egi inemo adi guguhana ishigo nu ndando. Utangizago nji egi udi mulaba gubalegesa tangua. Kalagala yagasue ha gutagenesa ginemo giaye muabonga. (Ish. 22:29) Gula udi gudihana muavula mu mudimo wa Yehowa, mbawukolesa ufuta waye n’enji nu mbawukhala nu gusuanguluga guavula. (Gal. 6:4) Mbawukhala nji nu gusuanguluga gula athu ako aheta inemo wakhalele gudifelela.—Lomo 12:15; Gal. 5:26.
12. Itshi yakuatesele phangi Melissa nu phangi Nick ha gukhala nu gusuanguluga guavula?
12 Tuzuelelenu luko phangi Melissa tuazuelela mu paragrafe 2, yonu wakhalele mutshigina guya gu Betele nga gungina Khalasa dia Alongeshi a Ufumu. Phangi muene gataganeselego mafelela enji, uvi udi muzuela egi: “Ngana gudihana muavula mu mudimo wami wa muvundji wa njila nu ngana kalegela bametode agasue a mudimo wa gulongesa. Gutshita ngenyi guana gungubatela diago gusuanguluga guavula.” Luholo lutshi phangi Nick ahetele luko gikhesa tangua atombewego ha gukhala mukuateshi wa mudimo? Udi muzuela egi: “Ngalanduile gudihana muavula mu inemo ngajiya gutagenesa, gifua guya mu mudimo wa gulongesa nu guhana komantere jiabonga mu gudibungisa. Ngazalesele nji formilere ha guya mukalagala mudimo gu Betele. Mu givo gialanduile, angutamegele gu Betele.”
13. Gubonga gutshi mbawuheta gula udi mutagenesa muabonga ginemo giaye? (Mulongeshi 2:24)
13 Gula udi mutagenesa muabonga inemo udi nayo mangino, wajiya nji guheta inemo iko yakoma mu masugu adi muza, gifua luholo luahetele phangi Nick. Uvi gula wahetelego inemo yene, wajiya gukhala nu gusuanguluga guavula gifua phangi Melissa, mukunda nu mudimo wana kalegela Yehowa. (Tanga Mulongeshi 2:24.) Luko, gujiya egi udi mukalagala ngolo ha gusuanguluisa Fumi’etu Yesu Klisto mbagugubatela gusuanguluga guavula.
MAFELELA AJIYA GUTUBATELA GUSUANGULUGA
14. Itshi tushigo naye gujimbila tangua tudi gudihagela mafelela mu mudimo wa Yehowa?
14 Tudi naye gudihana muavula ha gutagenesa inemo tudi naye mangino. Uvi tushigo naye gujimbila egi tudi naye nji gukamba maluholo a gukalagala muavula mudimo wa Yehowa. Tudi naye gudihagela mafelela ajiya gutukuatesa ha gukalagala muabonga mudimo wa gulongesa, nga ha gukhala alongeshi abonga nu ha gukuatesa muavula aphangi’etu a mala nu a akhetu. Mbatutagenesa mafelela awa, gula tudi gudihana muavula ha gukuatesa athu ako, ha fundo dia gukamba phamba gubonga guetu.—Ish. 11:2; Makal. 20:35.
15. Tanga mafelela ajiya gugukuatesa ha gukhala nu gusuanguluga guavula?
15 Mafelela atshi wajiya gudihagela? Toga Yehowa agukuatese ha gujiya mafelela anyi wajiya gutagenesa muabonga. (Ish. 16:3; Yak. 1:5) Wajiya gukamba gutagenesa mafelela tuazuelela mu paragrafe ya thomo, gifua: Gubua muvundji wa njila wa tangua diazonda nga wa tangua diagasue, gukalagala mudimo gu Betele nga gudihana mu mudimo wa gutunga Jinzo jia Ufumu, ba salles d’assemblées, ba Betele nu ba antennes de traduction. Wajiya nji gulonguga zuelelo diko, nga ndo, wajiya guya mulongesa lukuma luabonga mu terituare iko. Ha gujiya luholo lua gutagenesa mafelela awa, wajiya gutanga mukhapho 10 wa mukanda Organisés pour faire la volonté de Jéhovah. Wajiya nji gukamba ukuateshi gudi akulu a mu hungu dienu. * Gula udi mukalagala ngolo ha gutagenesa mafelela awa, aphangi ako mbaamona diago egi udi mukula mu nyuma; ngenyi mbawukhala nu gusuanguluga guavula.
16. Itshi wajiya gukalagala gula wajiyilego gutagenesa mafelela tuazuelela mu longo edi?
16 Itshi wajiya gukalagala gula wajiyilego gutagenesa mafelela tuazuelela mu longo edi? Wajiya gudihagela felela diko dinyi wajiya gutagenesa. Tutadilenu ndaga jiko wajiya gukalagala.
Mafelela tshi wajiya gutagenesa? (Tala paragrafe 17) *
17. Ha gutadila 1 Timote 4:13, 15, itshi phangi wa yala wajiya gutshita ha gubua mulongeshi wabonga?
17 Tanga 1 Timote 4:13, 15. Gula udi phangi wa yala, wajiya gukalagala ngolo ha gubua muzuedi wabonga nu ha gukudisa luholo luaye lua gulongesa. Mukunda natshi? Handaga gula udi ‘mukalagala ngolo ha’ gutanga muabonga, gukhala muzuedi wabonga nu mulongeshi wabonga, mbawukuatesa diago athu adi gugutegelela. Dihagele felela dia gulonguga nu gukalegela longo diagasue dia gamukanda Dihane ha Gutanga nu Gulongesa. Gula watanga longo dimoshi, longuga luholo wajiya gudikalegela, gungima kalegela longo diene tangua udi mukalagala diskur. Toga malongo gudi muhanyi wa malongo nga gudi akulu ako ‘ana kalagala ngolo mu mudimo wa guzuela nu wa gulongesa.’ * (1 Tim. 5:17) Usugigo phamba ha gukalegela ndaga walonguga mu gamukanda gene, uvi kuatesa nji athu adi gugutegelela ha gukolesa gutshigina guawo nga ha gukalegela ndaga adi mutegelela. Gula watshita ngenyi, mbawukhala nu gusuanguluga guavula hamoshi nu athu adi gugutegelela.
Mafelela tshi wajiya gutagenesa? (Tala paragrafe 18) *
18. Itshi yajiya gutukuatesa ha gukalagala muabonga mudimo wetu wa gulongesa?
18 Mukut’etu agasue tuana khala nu ginemo gia gulongesa nu gia gubuisa athu alandudi. (Mat. 28:19, 20; Lomo 10:14) Gula udi mutshigina gudihana muavula mu mudimo owu wa ndando, longuga gamukanda Gulongesa, gungima kalegela ndaga udi mulonguga. Wajiya guheta malongo ako ajiya gugukuatesa mu Mukanda wa Gukalegela mu Gudibungisa gua Lujingu nu Mudimo wa Uklisto nu mu video jiana monesa luholo lua guta maga nu athu tuana tala mu gudibungisa gua mukhatshi dia phoso. Tomba malongo udi mumona egi wajiya guakalegela muabonga mu mudimo wa gulongesa. Gula udi mukalegela malongo ene, mbawubua diago mulongeshi wabonga nu mbawukhala diago nu gusuanguluga guavula.—2 Tim. 4:5.
Mafelela tshi wajiya gutagenesa? (Tala paragrafe 19) *
19. Luholo lutshi wajiya gukudisa makalegelo adi musuanguluisa Nzambi?
19 Ujimbilago egi felela dia gubalega ndando wajiya gudishila didi dia gukudisa makalegelo adi musuanguluisa Nzambi. (Gal. 5:22, 23; Kol. 3:12; 2 Phet. 1:5-8) Luholo lutshi wajiya gutagenesa felela diene? Ha gufezegesa, gula udi mutshigina gukolesa gutshigina guaye, wajiya gutanga mikanda yetu ha guheta malongo avula ajiya gugukuatesa. Wajiya nji guheta malongo ako, gula udi mutala ba emisio a JW Télédiffusion anyi ana monesa luholo aphangi’a mala nu a akhetu ana sala agujinginyina tangua ana tagana nu malamba. Gungima, kamba luholo wajiya gulandula ifezegeselo yawo mu monyo waye.
20. Itshi tuajiya gutshita ha gukhala nu gusuanguluga guavula nu ha gutuna guleba muila?
20 Mukut’etu agasue tuana tshigina gukalegela Yehowa muavula gubalega. Mu mavu ahe-ahe mbatukhala nu luendu lua gukalegela Nzambi mudimo wavula diago. Uvi ha tudi munengena mavu ene, tukalagale yagasue ha gutagenesa inemo tudi nayo, ngenyi tuajiya gukhala nu gusuanguluga nu gutuna ndaga jiagasue jiajiya gutulebesa muila. Ndaga ya gubalega ndando idi egi mbatutumbuisa Yehowa, ‘Nzambi wetu wa gusuanguluga.’ (1 Tim. 1:11) Hene, tusuangulugenu nu inemo tudi nayo!
LUNGIMBO 82 “Que notre lumière brille”
^ par. 5 Tuana kalagala yagasue tuajiya gutshita mu mudimo wa Yehowa, handaga tuana gumuzumba muavula. Gishina giene, athu avula mukatshi dietu ana tshigina gukalagala muavula mu mudimo wa gulongesa nga guheta inemo iko mu hungu. Uvi itshi tuajiya gutshita gula tuahetelego inemo tuakhalele gudifelela ikhale tuakalagala ngolo? Itshi yajiya gutukuatesa ha gudihana muavula mu mudimo wa Yehowa nu ha gubamba gusuanguluga guetu? Ha guheta mvutu gu mihu eyi, tutadilenu gifezegeselo giahanele Yesu gia talanta.
^ par. 2 Mu longo edi, majina ako asombegesewe.
^ par. 7 UKOTELESHI WA MBIMBI: Talanta imoshi yakhalele ndando imoshi nu makuta akhalele muheta muthu gula wakalagala mudimo ivo hehi nu 20.
^ par. 15 Aphangi’a mala anyi abatijiwe gale adi naye gukalagala ngolo ha gutagenesa ndaga jiana togewa ha gubua akuateshi a mudimo nga akulu. Ha gujiya ndaga jiana togewa, tala mikhapho 5 nu 6 ya mukanda Organisés pour faire la volonté de Jéhovah.
^ par. 17 UKOTELESHI WA MBIMBI: Muhanyi wa malongo udi mukulu wana hana malongo atadila luholo lua gulongesa mu hungu gudi akulu nu gudi akuateshi a mudimo mu gisuegi.
^ par. 64 UKOTELESHI WA GIFUANESA: Phangi mumoshi wa yala udi mukalagala ba recherche mu mikanda yetu ha gubua mulongeshi wabonga..
^ par. 66 UKOTELESHI WA GIFUANESA: Phangi mumoshi wadihagela felela dia gulongesa gula waheta okazio udi muhana carte de visite gudi mukhetu mumoshi udi gumuhana ima ya gudia.
^ par. 68 UKOTELESHI WA GIFUANESA: Phangi mumoshi wa mukhetu wabatela phangi muko kado handaga udi mutshigina gumumonesa makalegelo ana suanguluisa Nzambi.
