1. Hao nao pipol blo Jehovah showimaot olketa laek for duim staka samting for hem?

 END lo disfala nogud world hem klosap, so iumi garem staka waka for duim. (Matt. 24:14; Luke 10:2; 1 Pet. 5:2) Iumi laek for waka hard for Jehovah, so samfala duim moa samting lo ministry, samfala laek for kamap pioneer, and samfala laek for waka lo Bethel or lo construction. And staka brata waka hard for kamap fit for ministerial servant or elder. (1 Tim. 3:1, 8) Masbi Jehovah hapi for lukim pipol blo hem willing for duim staka samting for hem!​—Ps. 110:3, NW; Aesaea 6:8.

2. Hao nao iumi feel sapos iumi no kasem samfala spiritual goal blo iumi?

² Maet samfala feel sorre from olketa no kasem yet samfala spiritual goal wea olketa markem. Samfala savve sorre tu from olketa no fit for kasem samfala privilege lo organization blo Jehovah bikos lo age blo olketa or nara reason. (Prov. 13:12, NW) Datwan nao happen lo Melissa. * Nomata hem laekem tumas for waka lo Bethel or for attendim Skul for Olketa Kingdom Evangelizer, hem sei: “Mi winim age wea olketa markem for olketa privilege hia, so datwan mekem mi sorre.”

3. Wanem nao maet samfala young wan need for duim mekem olketa fit for kasem privilege?

³ Samfala wea young and healthy maet need for kamap mature lo spiritual wei mekem olketa fit for kasem nara  privilege. Olsem example, nomata olketa young wan kleva, savve mekem gudfala disison, and waka hard, maet olketa need for lane for patient, duim gud waka, and showimaot respect lo olketa narawan. Sapos olketa waka hard for garem olketa wei hia, gogo maet olketa kasem privilege wea olketa laekem. Tingim experience blo Nick. Taem hem 20 years, hem sorre from hem no kasem appointment for ministerial servant. Hem sei: “Mi feel olsem olketa elder maet tingse mi no fit for duim datfala waka.” Bat Nick no givap, and hem gohed for waka hard lo kongregeson and lo ministry tu. Distaem Nick hem member blo Branch Komiti.

4. Wanem nao disfala study bae storyim?

⁴ Waswe, iumi feel sorre bikos iumi no kasem yet privilege wea iumi laekem? Sapos olsem, storyim datwan lo Jehovah. (Sams 37:5-7) Nara samting, hem gud for askem olketa mature brata for samfala idea lo hao for kamap gud lo samfala samting, then traem best for followim datwan. Sapos iumi duim olsem, maet bae iumi kasem datfala privilege. Bat olsem Melissa wea iumi storyim finis, maet hem hard for kasem privilege wea iumi laekem. Sapos olsem, hao nao iumi savve gohed hapi? For ansarem kwestin hia, disfala study bae storyim (1) wanem savve mekem iumi hapi, (2) hao iumi savve barava hapi, and (3) olketa goal iumi savve markem.

5. Wanem nao savve mekem iumi hapi? (Eklesiastes 6:9)

⁵ Lo Eklesiastes 6:9 hem storyim wanem savve mekem iumi for hapi. (Readim.) Man savve hapi sapos hem “no traehad fo garem narafala samting” wea hem no fit for garem, bat hem need for “hapi long olketa samting” wea hem garem finis. So wanem nao iumi lanem? Iumi savve hapi sapos iumi satisfae lo wanem iumi duim, and sapos iumi markem goal wea iumi fit for kasem.

6. Wanem tokpiksa nao bae iumi storyim, and wanem nao bae iumi lanem from datwan?

⁶ Samfala maet sei, hao nao iumi savve satisfae lo wanem iumi duim distaem bikos hem normal for laek traem olketa difren samting? Bat iumi savve satisfae lo wanem iumi duim. Hao nao olsem? For savve lo ansa, bae iumi storyim tokpiksa blo Jesus lo Matthew 25:14-30 abaotem olketa wakaman wea kasem silver selen. Main samting wea bae iumi lanem hem hao for hapi lo olketa privilege and blessing iumi garem distaem.

7. Storyim tokpiksa blo Jesus abaotem olketa wakaman wea kasem silver selen.

⁷ Lo datfala tokpiksa wanfala boss hem redi for go lo nara kantri. Bifor hem go, hem kolem kam olketa wakaman blo hem and givim lo each wan silver selen for duim bisnis witim. * From hem tingim wanem each wan fit for duim, hem givim first wakaman faevfala silver selen, nara wakaman tufala, and mek-thri wakaman wanfala. Tufala wakaman mek profit for boss blo tufala. Bat mek-thri wakaman hem no duim bisnis witim selen hem kasem, so boss sakem hem.

8. Why nao datfala first wakaman mas hapi?

 ⁸ Masbi datfala first wakaman tinghae lo privilege for kasem faevfala silver selen. Datwan hem big selen, so hem showimaot boss trustim wakaman hia! Bat hao nao feeling blo mek-tu wakaman from hem kasem nomoa tufala silver selen? Maet hem sorre from hem no kasem big selen olsem first wan, bat waswe, hem feel olsem?

9. Wanem nao maet mek-tu wakaman talem sapos hem feel nogud? (Matthew 25:22, 23)

⁹ Readim Matthew 25:22, 23. Jesus no storyim feeling blo datfala mek-tu wakaman taem hem kasem tufala silver selen. Bat sapos datfala wakaman feel nogud maet hem komplen and sei: ‘Hao, hem nomoa iu givim? Mi waka hard olsem wakaman wea kasem faevfala silver selen tu ia! Sapos boss no tinghae lo mi, bae mi digim hol and putim selen insaed and go duim waka blo miseleva.’ Bat wakaman hia no talem datwan.

10. Wanem nao mek-tu wakaman duim witim tufala silver selen?

¹⁰ Olsem datfala first wakaman, luk olsem datfala mek-tu wakaman tinghae lo privilege hem kasem. Hem willing for waka hard for boss blo hem, and from hem duim bisnis witim datfala selen hem kasem nara tufala silver selen moa, so boss hem hapi. From datwan boss praisem hem and givim hem samfala waka moa.

11. Wanem nao savve mekem iumi for barava hapi?

¹¹ Datfala tokpiksa helpem iumi for  luksavve hem important for waka hard and duim gud eni waka iumi duim for Jehovah, and datwan nao bae mekem iumi barava hapi. So hem gud for “barava busy” lo preaching waka and lo kongregeson. (Acts 18:5; Heb. 10:24, 25) Iumi laek for prepare gud for olketa meeting mekem iumi savve givim koment wea strongim narawan, and duim gud eni student assignment wea iumi kasem lo midol week meeting. Sapos olketa askem iumi for duim eni waka lo Kingdom Hall, kam lo taem wea olketa markem and duim gud datfala waka. Tinghae and waka hard for kamap gud lo eni assignment iumi kasem. (Provebs 22:29) Taem iumi waka hard and duim gud eni waka iumi kasem, bae iumi barava hapi. (Gal. 6:4) And tu, bae iumi hapi nomata narawan kasem wanfala privilege wea iumi laekem.—Rome 12:15; Gal. 5:26.

12. Wanem nao helpem Melissa and Nick for hapi?

¹² Tingim Melissa, sista wea iumi storyim finis, wea laek for waka lo Bethel or attendim Skul for Olketa Kingdom Evangelizer. Nomata hem no savve duim olketa samting hia, hem sei: “Mi duim best blo mi lo pioneer waka and mi traem evri difren wei for preach lo pipol. Datwan mekem mi barava hapi.” And wanem nao Nick duim nomata hem no kamap ministerial servant lo taem wea hem laekem? Hem sei: “Mi duim wanem mi fit for duim, olsem mi busy lo ministry, and traem best for givim olketa koment wea bae encouragem narawan. And tu, mi apply for waka lo Bethel, then wanfala year bihaen mi kasem assignment lo Bethel.”

13. Why nao hem gud for waka hard lo assignment iumi garem distaem? (Eklesiastes 2:24)

¹³ Sapos iumi waka hard lo assignment wea iumi garem finis, waswe, datwan minim bae iumi kasem nara privilege? Maet olsem. Hem nao wanem happen lo Nick. Bat sapos iumi no fit for kasem wanfala goal, iumi laek for olsem Melissa and barava hapi and satisfae lo wanem iumi duim distaem. (Readim Eklesiastes 2:24.) And tu, bae iumi hapi from iumi luksavve wanem iumi duim mekem Jesus Christ, hed blo kongregeson, for barava hapi.

14. Wanem kaen spiritual goal nao iumi evriwan fit for kasem?

¹⁴ Sapos iumi garem samfala privilege finis, datwan no minim iumi no savve markem olketa nara spiritual goal for helpem iumi kamap gud lo ministry, or for helpem olketa brata and sista. Bae iumi fit for kasem kaen goal olsem bikos iumi duim samting for olketa narawan, and no tingim iumiseleva.—Provebs 11:2; Acts 20:35.

15. Wanem nao samfala goal wea iu fit for kasem?

¹⁵ Olketa wanem goal nao maet iuseleva markem? Prea lo Jehovah for helpem iu luksavve wanem kaen goal nao iu fit for kasem. (Provebs 16:3; Jas. 1:5) Maet iu fit for kasem wanfala lo olketa goal wea iumi storyim lo  first paragraf blo disfala study, olsem for auxiliary or regular pioneer, waka lo Bethel, or waka lo construction. Or maet iu fit for lanem nara languis, mekem iu savve preach lo pipol wea story datfala languis. Sapos iu laek savve hao for kasem olketa goal hia, readim chapter 10 blo buk Organized to  Do Jehovah’s Will, or story witim olketa elder lo kongregeson blo iu. * Taem iu traem best for kasem olketa goal hia, bae olketa narawan luksavve lo datwan and bae iu barava hapi.

16. Wanem nao iu savve duim sapos iu no fit for kasem wanfala goal?

¹⁶ Bat waswe sapos iu no fit for kasem eni goal hia? Sapos olsem, hem gud for markem difren goal wea iu fit for kasem. Tingim samfala idea hia.

17. Olsem 1 Timothy 4:13, 15 storyim, hao nao wanfala brata savve kamap gudfala speaker?

¹⁷ Readim 1 Timothy 4:13, 15. Sapos iu wanfala brata, maet iu markem goal for kamap gud lo reading and teaching. Why nao datwan hem gudfala goal? Bikos hem bae helpem iu for kamap gudfala speaker, and datwan bae barava helpem olketa wea lisin lo iu. Markem goal for studyim and followim evri point lo Gohed Waka Hard for Read and Teach Gud brochure. Waka hard for kamap gud lo wanfala point, practicem datfala point lo haos, waka lo datfala point lo eni tok wea iu duim, then go lo next point. Askem elder wea duim gud olketa tok or askem mek-tu brata wea givim kaonsel for samfala idea lo wanem iu savve waka lo hem. * (1 Tim. 5:17) Nara samting for waka lo hem taem iu duim tok, hem for strongim faith blo audience and helpem olketa for followim wanem  olketa herem. Datwan bae mekem olketa, and iu tu, for enjoyim tok blo iu.

18. Wanem nao savve helpem iumi for kamap gud lo ministry?

¹⁸ Iumi evriwan preach lo pipol and helpem olketa for kamap disaepol. (Matt. 28:19, 20; Rome 10:14) Datfala Teach Gud brochure savve helpem iumi for kamap gud lo disfala important waka tu. So markem goal for studyim and followim wanem iumi lanem from datfala brochure. Nara samting wea savve helpem iumi hem olketa idea lo Christian Laef and Ministry Bilong Iumi​—Meeting Buk and olketa video abaotem idea for ministry. Taem iumi preach, traem olketa idea hia for luksavve which wan nao waka gud lo territory blo iumi. Datwan bae helpem iumi kamap gud lo ministry and barava enjoyim preaching waka.​—2 Tim. 4:5.

19. Wanem nao savve helpem iumi for waka lo olketa wei blo iumi?

¹⁹ Hem barava important tu for gohed waka lo olketa wei blo iumi. (Gal. 5:22, 23; Col. 3:12; 2 Pet. 1:5-8) Hao nao bae iumi duim datwan? Olsem example, sapos iumi laek for strongim faith blo iumi, readim article lo olketa pablikeson wea storyim hao for strongim faith blo iumi. And tu, bae iu kasem gud samting from olketa story lo JW Broadcasting^®. Lukluk lo samfala video blo olketa brata and sista wea showimaot faith taem olketa deal witim olketa hard samting. Then tingim hao iumi savve followim example blo olketa.

20. Wanem nao savve mekem iumi for hapi and satisfae?

²⁰ Olsem iumi storyim lo disfala study, iumi laek for duim staka samting for Jehovah. Iumi luk forward lo niu world wea iumi bae duim staka samting for Jehovah. Bat distaem iumi duim best blo iumi lo eni waka wea iumi duim for Jehovah, and datwan bae mekem iumi for barava hapi and bae iumi no warim olketa samting wea iumi no fit for duim. Taem iumi duim olsem, datwan bae mekhae lo Jehovah and mekem hem hapi. (1 Tim. 1:11) So iumi laek for hapi lo olketa privilege wea iumi garem distaem!