1. Ia duwen me tohto ar kin songosong en kalaudehla arail papah Siohwa?

 MIE doadoahk tohto me kitail anahne wia ni koasoandi wet eh pahn kereniongehr imwisekla. (Mad. 24:14; Luk 10:2; 1 Pit. 5:2) Kitail koaros kin men papah Siohwa ni uwen me kitail kak koaros. Me tohto kin kalaudehla arail doadoahk en kalohk. Ekei kin men wiahla pioneer. Ekei kin men papah nan Pedel de iang kauwada wasahn kaudok kan nan sapwellimen Siohwa pwihn. Oh brother tohto kin nantihong en alehdi pwukoahn sounsawas men de elder men. (1 Tim. 3:1, 8) Siohwa kin uhdahn ketin kupwurperenkihda ni eh ketin mahsanihada sapwellime aramas akan ar kin men papah ih.​—Mel. 110:3; Ais. 6:8.

2. Ia pahn atail pepehm ma kitail sohte lel ekei atail mehn akadei en papah Siohwa?

² Ahpw kitail kakete mworusala ma kitail sohte lel ekei atail mehn akadei kan nan sapwellimen Koht doadoahk mwurin sounpar tohto. De kitail kakete mworusala pwehki kitail sohte kak wia ekei soahng kan nan sapwellimen Siohwa pwihn pwehki kitail mahla de pwehki soangen kahrepe teikan. (Lep. Pad. 13:12) Ih met me wiawihong Melissa. * E men iang papah nan Pedel de iang Sukuhl ong Sounkalohki Wehio kan, ahpw e koasoia: “I daulihala sounpar en ale pwukoa pwukat. Eri ong ngehi, pwais pwukat wiahte ouraman kei. Ekei pak, I kin mworusala.”

3. Kahk dah kan me ekei anahne kapwaiada pwehn kak warohng ale pwais teikan?

³ Ekei me pwulopwul oh ahneki roson mwahu ele anahne koahiekla oh kasalehda soangen irair kei mwohn arail pahn kak ale pwais teikan. Karasepe, ele ekei irail loalokong, kin mwadang en wiahda pilipil kan, oh kin men doadoahk; ahpw  re anahne esehla en kanengamah, wia arail pwukoa kan ni keneinei, de en kin wauneki meteikan. Ma ke kin nantihong en kakairada soangen irair kan me anahn, brother kan ele pahn kihong uhk pwukoa ni ahnsou me ke sohte kasik. Medewehla dahme wiawihong Nick. Ni ahnsou me e sounpar 20, e uhdahn mworuskihla pwehki e sohte idihdida nin duwen sounsawas men. E koasoia, “I pehm me mie mehkot sapwung rehi.” Ahpw Nick sohte uhdi. E wia uwen eh kak nan mwomwohdiso oh nan doadoahk en kalohk. Rahnwet, e kin iang wia kisehn Pwihn me Kin Apwalih Ohpis en Sounkadehdehn Siohwa kan.

4. Dahme kitail pahn koasoiapene nan iren onop wet?

⁴ Ia duwe, ke mworusala pwehki ke saikinte alehdi soangen pwukoa ehu nan sapwellimen Siohwa doadoahk? Ma ei, kapakapkihong Siohwa duwen met, oh padahkihong ih duwen omw pepehm. (Mel. 37:5-7) Ke pil kak peki kaweid sang riomw Kristian koahiek kan ong ia duwen omw kak kamwahwihala omw papah Koht, oh eri wia uwen omw kak en kapwaiada arail kaweid kan. Ma ke wia met, ke kakete alehdi pwais kaselelo, de lel mehn akadeio. Ahpw duwehte Melissa, me kitail koasoia mwoweo, ele ke sohte kak wia dahme ke men wia ong Siohwa. Ahpw ia duwen omw kak ahnekihte peren? Pwehn sapengala peideko, iren onop wet pahn koasoia (1) dahme kak kihong uhk peren, (2) ia duwen omw kak kalaudehla omw peren, oh (3) mehn akadei dah kan me ke kak wiahda pwehn kalaudehla omw peren.

5. Pwehn ahneki peren, dahme kitail en medewehte? (Eklesiasdes 6:9)

⁵ Eklesiasdes 6:9 kawehwehda dahme kak sewese kitail en ahneki peren. (Wadek.) Emen me kin ‘itarki dahme ah’ nan irair me e mi loale kin kalahnganki dahme e ahneki. Ahpw emen me kin noanoahroke dahme e sohte kak ahneki kin sohte itarki dahme ah. Eri ia mehn kasukuhl ong kitail? Pwehn ahneki peren, kitail anahne medewehte dahme kitail ahnekier, ah kaidehn soahng kan me kitail sohte kak ahneki.

6. Karasaras dahieu me kitail pahn koasoiapene met, oh dahme kitail pahn sukuhlkihsang met?

⁶ Kitail kak itarkihte dahme kitail ahnekier? Aramas tohto medewe me met sohte kak wiawi pwehki kitail kin men doulahte sukuhlki wia soahng kapw kan. Ahpw ni mehlel, met kak wiawi. Kitail kak uhdahn perenki dahme kitail ahneki ahnsou wet. Ia duwen atail kak wia met? Pwehn ese ia duwen, kitail pahn koasoiapene sapwellimen Sises karasaras en dalend ko me kileldi nan Madiu 25:14-30. Kitail pahn sukuhlki ia duwen atail kak ahneki peren oh kalaudehla atail peren nan atail irair en ahnsou wet.

7. Menlau kawehwehda ni mwotomwot sapwellimen Sises karasaras en dalend ko.

⁷ Nan karasaraso, ohl emen pahn seiloak. Mwohn eh pahn seiloak, e ekerpene nah ladu ko oh kihong emenemen irail dalend kei pwehn wia pesines. * Ohlo ese me ahn nah ladu ko koahiek wekpeseng, kahrehda e kihong keieun laduwo dalend limau, keriaun laduwo dalend riau, oh kesiluhn laduwo dalend ehu. Ladu keieuo oh keriauo kin doadoahk laud pwehn kalaudehla nein ara soumaso nah mwohni ko. Ahpw ladu kesilimeno sohte wiahiong mehkot mwohni me e alehdio, eri eh soumaso kihsang ih nan doadoahko.

8. Dahme kahrehda keieun laduwo nan karasaraso uhdahn perenda?

 ⁸ Keieun laduwo uhdahn perenkihda ni eh soumaso kihong ih dalend limau. Mwohni laud ehu mwo, oh met kasalehda me eh soumaso uhdahn likih ih! Ahpw ia duwen keriaun laduwo? E kakete mworuskihla eh sohte alehdi uwen dalend me keieun laduwo alehdi. Ahpw dahme e wia?

9. Dahme Sises sohte ketin kasalehda duwen keriaun laduwo? (Madiu 25:22, 23)

⁹ Wadek Madiu 25:22, 23. Sises sohte mahsanih me keriaun laduwo lingeringerkihda eh alehdihte dalend riau. Sises pil sohte ketin kasalehda me laduwo kaulim oh nda: ‘Ihte me me I pahn ale? I kin doadoahk laud duwehte ladu me alehdi dalend limauo! Ma ei soumaso medewe me I sohte kin doadoahk mwahu, eri mwahu I en kohla ekihla nah mwohnio nanpwel oh doadoahk ong pein ngehi a kaidehn ong ih.’

10. Dahme keriaun laduwo wiahiong nah dalend ko?

¹⁰ Duwehte keieun laduwo, keriaun laduwo ese me pwukoa me eh soumaso kihong ih uhdahn kesempwal, oh e kin doadoahk laud pwehn papah eh soumaso. Imwilahn met, e kalaudehla uwen dalend riauo ong dalend pahieu. Eh soumaso kihong ih keting laud pwehki eh doadoahk laud. Soumaso sohte perenkihdahte ahpw e pil kihong ih pwukoa teikan!

11. Ia duwen atail kak kalaudehla atail peren?

¹¹ Duwehte met, kitail kak kalaudehla atail peren sang ni atail kin poadidiong wia pwukoa sohte lipilipil me kitail ahneki nan sapwellimen Siohwa doadoahk. Ken “soupisengkihla” doadoahk en kalohko, oh doadoahk laud nan mwomwohdiso. (Wiewia 18:5; Ipru 10:24, 25)  Kaunopada mwahu ong mihting kan pwe ken kak kihda pasapeng kangoang kan. Kesempwalki omw pwukoahn padahk de kamwomwada nan mihting en wihk kan. Ma brother kan peki omw sawas en wia pwukoa ehu nan mwomwohdiso, ken mwadangala oh kasalehda me irail kak likih iuk. Dehr medewe me pwukoa ehu me ke ahneki sohte kesempwal oh me ke sohte anahne wiahda ahnsou ong. Nantihong ken koahiekla nan omw doadoahko. (Lep. Pad. 22:29) Ma ke uhdahn doadoahk laud ong Siohwa, ke pahn wiahla kompoakepah mwahu men oh ke pil pahn uhdahn peren. (Kal. 6:4) E pil pahn mengei ong uhk en iang perenda ni meteikan ar alehdi pwukoa ehu me ke men alehdi.​—Rom 12:15; Kal. 5:26.

12. Dahme sewese Melissa oh Nick en kalaudehla ara peren?

¹² Tamanda Melissa, sistero me kasalehda me e men papah nan Pedel de iang Sukuhl ong Sounkalohki Wehio kan? Mendahki e sohte kak wia soahng pwukat, e koasoia: “I kin wia uwen ei kak nan ei doadoahk en pioneer oh pil song en wia wiepen kalohk koaros. Met wadohng ie peren laud.” Oh ia duwen Nick eh powehdi eh mworuskihla eh sohte idihdida nin duwen sounsawas men? Nick nda: “I kin kilangwohngete pwais kaselel kan me I kak wia, duwehte iang kalohk oh kihda pasapeng kangoang kan nan mihting kan. I pil audehda doaropwehn iang papah nan Pedel, oh sounparohte mwuri I alehdi pwukoa wet.”

13. Dahme pahn wiawi ma ke kin poadidiong wia pwukoa me ke ahneki ahnsou wet? (Eklesiasdes 2:24)

¹³ Ma ke kin uhdahn poadidiong wia pwukoa me ke ahneki ahnsou wet, e seu pahn elehieng uhk pwais kaselel teikan mwuhr? Met kak wiawi, duwehte me wiawihong Nick. Ma soh, duwehte Melissa, omw peren pahn laudlahte oh ke pahn uhdahn perenki soahng kan me ke wiewia ong Siohwa. (Wadek Eklesiasdes 2:24.) Ke pil pahn ahneki peren laud pwehki ke ese me ke kin kaperenda atail Soumaso, Sises Krais.

14. Dahme kitail en ahnsou koaros tamataman ni atail kin medewe atail mehn akadei kan nan sapwellimen Siohwa doadoahk?

¹⁴ Ma kitail kin wia uwen atail kak nan sapwellimen Siohwa doadoahk ahnsou wet, met wehwehki me kitail sohte anahne pousehlahte songosong en kalaudehla atail doadoahk ong ih? Uhdahn soh! Kitail anahne wiahda mehn akadei kan me pahn sewese kitail en kamwahwihala atail kalohk oh padahk oh pil sewese riatail Kristian kan. Kitail pahn lel mehn akadei pwukat ma kitail kin ni erpit oh aktikitik medemedewe atail en sewese meteikan a kaidehn pein kitail.​—Lep. Pad. 11:2; Wiewia 20:35.

15. Ia ekei mehn akadei kan me kak seweseiuk en kalaudehla omw peren?

¹⁵ Mehn akadei dah kan me ke kak wiahda ong pein kowe? Peki rehn Siohwa en ketin seweseiuk esehda mehn akadei dah kan me ke kak kapwaiada. (Lep. Pad. 16:3; Seims 1:5) Ia duwe, ke kak song en wia ehu mehn akadei ko me  keieun parakrap kasalehda nan iren onop wet, duwehte wiahla sawasepen pioneer de pioneer, papah nan Pedel, de iang kauwada wasahn kaudok kan? De ele ke kak sukuhlki ehu lokaia tohrohr de kohla kalohk ong aramas akan nan ehu wasa. Ke kak kalaudehla omw esehla ekei mehn akadei pwukat sang ni omw wadek irelaud 10 nan pwuhko Organized to Do Jehovah’s Will, de sang ni omw koasoiong elder kan nan mwomwohdiso. * Ni omw wia uwen omw kak en lel mehn akadei pwukat,  meteikan pahn kak kilang omw nannanti en kekeirda oh omw peren pil pahn laudla.

16. Dahme ke kak wia ma ahnsou wet ke sohte kak lel mehn akadei ehu?

¹⁶ Ahpw ia duwen ma ahnsou wet ke sohte kak lel mehn akadei pwukat? Song en wiahda ehu mehn akadei me ke kak lel. Tehk duwen ekei soahng kan me ke kak wia.

17. Nin duwen me 1 Timoty 4:13, 15 mahsanih, dahme brother men kak wia pwehn wiahla sounpadahk mwahu men?

¹⁷ Wadek 1 Timoty 4:13, 15. Ma kowe brother men me papidaislahr, ke kak song en kamwahwihala omw kin koasoi oh padahk. Dahme kahrehda? Pwehki ma ke kin “poadidiong” omw wadawad, koasoi, oh padahk, irail kan me kin rong uhk pahn kak paiekihda. Song en wiahda mehn akadei en onopki oh doadoahngki ehuehu kaweid en wia padahk me mi nan kisin pwuhko Nantihong Omw Pwukoahn Wadawad oh Padahk. Onopki ehu kaweid ni ehu ahnsou, nantihong praktiski ni imwomwo, oh nantihong doadoahngki dahme ke sukuhlki ni omw wia padahk. Peki kaweid sang sounsawas ong sounapwalih en sukuhl de elder teikan me kin “doadoahk laud ni arail kin koasoia oh padahngki mahsen en Koht.” * (1 Tim. 5:17) Dehr medewehte mwomwen omw pahn doadoahngki kaweido nan kisin pwuhko, ahpw pil medewe ia duwen omw kak sewese sounrongorong kan en kakehlakahda arail pwoson de kamwakid irail en doadoahngki dahme re sukuhlki. Ni omw wia met, ke pahn kalaudehla omw peren oh pil arail peren.

18. Dahme kak sewese kitail en lel mehn akadei kan nan atail doadoahk en kalohk?

¹⁸ Kitail koaros ahneki pwukoa en kalohk  oh katohnpadahk. (Mad. 28:19, 20; Rom 10:14) Ke men kamwahwihala omw koahiek nan doadoahk uhdahn kesempwal wet? Wiahda mehn akadei kan ni omw onopki oh doadoahngki dahme ke sukuhlki nan kisin pwuhko Padahk. Ke kak pil ale kaweid mwahu teikan sang nan neitail Atail Mour en Kristian oh Kalohk​—Doaropwehn Kasukuhl, oh pil wiepen koasoi kan me kin kasansalda nan kisin kasdo kan nan atail mihting en wihk. Song soangsoangen wiepe pwukat pwe ken diarada mehnia me ke keieu kakohng. Sang ni omw doadoahngki kaweid pwukat, ke pahn wiahla sounpadahk mwahu men, oh met pahn uhdahn kalaudehla omw peren.​—2 Tim. 4:5.

19. Ia duwen omw kak kakairada irair kan me kin kaperenda Koht?

¹⁹ Dehr manokehla me ehu mehn akadei me keieu kesempwal me ke kak wiahda ong pein kowe iei en kakairada irair kan me kin kaperenda Koht. (Kal. 5:22, 23; Kol. 3:12; 2 Pit. 1:5-8) Dahme ke kak wia pwehn lel mehn akadei wet? Karasepe, mwein ke men kakehlailihala omw pwoson. Ele ke kak wadek neitail sawasepen Paipel kan me kin kihda kaweid mwahu kan duwen en kakehlaka omw pwoson. Ke pil pahn paiekihda omw kilang prokram en JW Broadcasting^® me kin kasalehda koasoipen riatail Kristian kan me ahneki pwoson laud ni arail lelohng soangsoangen kahpwal kan. Eri medewehla ia duwen omw kak alasang arail pwoson nan omw mour.

20. Ia duwen atail kak kalaudehla atail peren oh katikala atail pepehm en mworus?

²⁰ Kitail koaros kin uhdahn men wia laudsang dahme kitail kin wiewia ahnsou wet ong Siohwa. Nan sapwellimen Koht sampah kapwo, kitail pahn kak papah ih ni unsek. Ahpw lao lel ahnsowo, ma kitail kin wia uwen atail kak nan pwukoa sohte lipilipil me kitail kak wia ni ahnsou wet, kitail kak kalaudehla atail peren oh katikala pepehm en mworus koaros. Kesempwal sang met, kitail pahn wahdo kaping oh wahu ong atail “Koht me peren,” Siohwa. (1 Tim. 1:11) Eri, kitail en diar peren nan atail pwais kan!