1. ¿Imatataj maychicaj hermanucuna rurarcaycan Diosta sirvir masraj yanapacunanpaj?

 CAY munduga ushacänanpäna caycan, pero imaycaraj caycan Diosta sirvir caycänapaj (Mat. 24:14; Luc. 10:2; 1 Ped. 5:2). Diosninchipäga mastarämi calpachacuyta munanchi. Waquincunaga nipäcun ‘precursorman ticrayta munä’ o ‘Betelman aywayta munä’ o ‘localcunata sharcachiycho yanapacuyta munä’ nir. O waquincunapis siervo ministerialno o ancianunopis congregaciuncho yanapacuyta munan (1 Tim. 3:1, 8). Mayraj Taytalanchi Jehová cushicun sirvejnincuna chayno yanapacuyta munaptenga (Sal. 110:3; Is. 6:8).

2. ¿Imatataj rurashwan yarpashganchino imapis mana ruracaptin?

² Yarpashganchino imapis mana ruracashga carga, ¿laquicurchuraj nishun ‘imapänataj calpachacuycäshaj’ nir? Jina öraga laquicuycashwan edäninchiraycur o juc problemacunaraycur munashganchino mana yanapacuycarga (Prov. 13:12). Chaynomi ricacurgan Melissa * jutiyoj paninchi, payga Betelmanpis o Diospita yachachicojcunapaj escuelamanpis aywaytami munargan. Paymi cayno nin: “Edänïraycur, munarpis mana aywashänachu. Caycunaga öraga laquichimanmi”.

3. ¿Imacunacho calpachacurtaj waquincunaga ima cargutapis chasquipäcunman?

³ Jovincuna ali saludyoj y calpayoj caycarpis, Diosta sirvir  cargucunata chasquinanpäga ali cristianumanraj ticranan. Imatapis jucla rurayta munar o imalachopis yachaj caycarga, ichanga pacienciacoj, ali aroj y respetuoso cananpäga pishiycanmanraj. Ali cristiano cananpaj calpachacäriptenga mana yarpashgan hora ima cargulatapis chasquipäcunmanmi. Nick jutiyoj hermanupita parlarcushun. 20 watayoj caycaptinshi siervo ministerial carguta mana chasquishganraycur alapa laquicurgan. Paymi cayno nin: “Yarpargä, ichanga mana alicunata ruraycashgäta”. Chayno laquicuycarlaga manami cacurganchu, congregaciuncho y predicaciuncho yanapacunanpämi calpachacurgan. Cananga Sucursalta ricaj carguwanmi arun.

4. ¿Imapitataj canan yachacurculäshun?

⁴ ¿Laquishgalachu caycanchi yarpashganchino imacunapis mana ruracashganraycur? Chayno captenga imano caycashganchita Jehovata wilapäshun (Sal. 37:5-7). Pogushga cristianucunatapis nishwanmi ‘imachotaj aliyarcöman, imataj pishiycäman’ nir, y nircur wilamashganchinola rurashwan. Chay lapanta rurarga, Diosta sirviycashganchicho mastarämi rurashwan. Y Melissa paninopis ima yarpaycashganchicuna mana camacaptenga, ¿Diosta sirvir cushi cushila caycäshunchuraj? Cay tapucuypita yachacunapäga cay quimsa cajcunata ricärishun: juc, ¿imacunaraycurtaj cushicushwan?; ishcay, ¿imacunata rurartaj más cushishgala caycäshun?; quimsa, Diospaj arunapaj ¿ima mastataj rurashwan cushishgala caycänapaj?

5. ¿Imata rurartaj cushi cushila cawacushwan? (Eclesiastés 6:9).

⁵ Cushi cushila caycänapäga Eclesiastés 6:9 (leiriy) textumi yanapämäshun. Charashganlawan cushi cushila cawaj runaga, imapa pasarpis mana yarpachacuypami alila goyacun. ‘Cayta wacta charäman’ nir cawacoj runa ichanga charashganpitapis mastaraj munan. ¿Imatataj caypita yachacunchi? Cushishgala cawacunapäga manami ima aycata ashishganchipitachu canga, cushishgalaga cawacunchi charashganchilawan ali goyacurmi.

6. ¿Jesús ima wilacamushganpitataj yachacushun?

⁶ Öraga charashganchipitapis mastarämi munanchi, ‘chayta tarir-rämi cushi cushila cawacushaj’ nir. Pero rasunpa cajchoga charashganchilawanpis cushi cushila cawacushwanmi. Cayta maslata tantiarcunapaj Mateo 25:14-30 textucho talento guellaypita Jesús yachachicushganpita parlarcushun. Yachacushun imacunapa pasarpis imano cushi cushila caycänapaj.

7. Parlacaramuy talento guellaypa Jesús wilacamushganpita.

⁷ Carupa aywacoj juc runapami Jesús parlamurgan wilacushgancho. Manaraj aywacurshi cay runaga ashmaynincunata gayaycur jucnin jucninta talento guellayta goycurgan, chaywan negociuta rurapäcunanpaj. * Jucnin caj esclavuntash goycurgan pichga talento guellayta, jucnin cajta ishcay talento guellayta, y jucnincajtana juclaylata. Pichga cajta y ishcay cajta chasquejcunaga ganas ganaslashi patrunninpaj arur guellayninta mirachipäcurgan. Jucnin cajna guella runa cashpan patrunninpa guellayninta aruchirganchu, chayraycur naupanpita gargurirgan.

8. ¿Imaraycur-raj cushicuycurgan pichga talento guellayta chasquej esclavuga?

 ⁸ Chauras chay pichga talento chasquej esclavuga alapachi cushicuycurgan patrunnin payman yaracushganpita. Aumi, patrunninpitaga achca guellaytami chasquergan. Y ishcaylata chasquej esclavuga, ¿laquicurganchuraj o imatataj rurargan?

9. ¿Imatataj yarparganchu ishcaj talento guellayta chasquej esclavo? (Mateo 25:22, 23).

⁹ (Leiriy Mateo 25:22, 23). Jesusga manami nirganchu ishcay talento guellaylata chasquishganraycur chay esclavo piñacushganta. Cay esclavuga manami nirganchu ‘caylatachi gomanqui, nogatapis maslata gomanquiman cargan ali aroj runa caycaptëga’. Jina nirganchu ‘patrunnëga nogaman yaracamanchu, cay ishcay talento guellayninta pampaycushaj y munashgaläta ruracushaj’.

10. ¿Imatataj rurargan cay esclavo chasquishgan ishcay talento guellaywan?

¹⁰ Chauras ishcay talentulata chasquishga carpis, cay esclavuga juc caj esclavunopis mana yamacaypami patrunninpaj arurgan. Chayno arushganpitaga ishcay talento masta ganargan. Patrunnin chayaycamurna cushicushpan más cargucunata goycurgan.

11. ¿Imata rurartaj más cushi cushilana caycäshun?

¹¹ Chaynolami jucninchi jucninchipis cushicurculäshun Diosta sirvir alapa calpachacushganchipita y imalachopis yanapacushganchipita. Tiempulanchita camacächishun ali calpachacur predicaciuncho y congregaciuncho yanapacunapaj (Hech. 18:5; Heb. 10:24, 25). Reuniunninchipaj ali  preparacurga, chaycho caycarna waquincunatapis shacyächishunmi. Reuniuncho imalachopis yachachicunapaj nimaptinchega, alichi canman puntalapitana shumaj preparacuptinchi. Nimashganchicunata mana gongaypa rurarga waquincunapis yaracamäshunmi. Lapan mandamashganchicunataga mana ajayaypa ganas ganasla tiempulancho ruranapaj calpachacushwan. Ali aroj runa cashganchiga ricacämunmanmi (Prov. 22:29). Diosta sirvir lapan calpanchiwan yanapacurga ali cristianumanmi ticrashun y cushi cushilami cawacushun (Gál. 6:4). Chayno cashpanga mananami chiquipaycäshunnachu pilapis munashganchi carguta chasquircuptin (Rom. 12:15; Gál. 5:26).

12. ¿Imatataj rurapäcurgan Melissawan Nick cushi cushila capäcunanpaj?

¹² Melissa paninchipita yapay parlarcushun. Payga Betelman y Diospita yachachicojcunapaj escuelaman aywayta munargan. Yarpashganno mana ruracashga carpis, payga caynomi nin: “Ali precursora canäpaj calpachacö y Diospa ali wilacuyninpita yachachicunäpaj imaycata rurä. Cay lapanta rurarga cushicurculämi”. Nick jutiyoj cristianupitapis yapay parlarcushun, payga siervo ministerial carguta chasquirganchu. Chaypa pasar ima rurashganpita cayno wilacun: “Ruranäpaj cajcunamanmi yarpachacurgä, imano Diospita yachachicunäpaj y reuniunchopis ali comentamunäpaj. Nircurpis Betelpa solicitudnëta apachicurgä y watanlacho invitapäcamargan”.

13. ¿Imanoraj caycäshun Diosta sirvir canan alapa calpachacurga? (Eclesiastés 2:24).

¹³ Chauras canan Diosta sirvir alapa calpachacuycarga, ¿tiempo pasarcuptin juc cargucunata chasquircushunchuraj? Ichanga Nickwan pasashgannopis chaynomi canga. Chayno mana cashpanga Melissa paninchiman yarparcushun cushi cushila Diosta sirvir caycänapaj (leiriy Eclesiastés 2:24). Nircurpis cushi cushilami caycäshun pushamajninchi Jesuspaj arushganchiraycur.

14. ¿Imatataj yarpänanchi Diosta sirvinapaj calpachacuptinchi?

¹⁴ Pipis ninman ‘nogaga unaypitanami Diosta sirvinäpaj calpachacuycä’, ¿chauras maslata ruranapaj manana calpachacushwannachu? Manami. Calpachacushwanmi ali yachachicoj cashpanchi predicaciuncho yanapacunapaj, jina cristiano masinchicunatapis yanapänapaj. Chauras Diospaj aruycarga mastaraj rurashun yachaj y humilde cashpanchimi, y noganchilaman yarparänapaj trucanga waquincunatapis yanapanapämi yarpachacushwan (Prov. 11:2; Hech. 20:35).

15. ¿Imacunata rurartaj más cushi cushila goyacushun?

¹⁵ ¿Ima mastataj rurashwan? Alichi canman Taytalanchi Jehovata mañacuptinchi maslata aruyta munashganchi ali camacänanpaj (Prov. 16:3; Sant. 1:5).  Galanancho nishganchinopis alapa ali canga precursor auxiliarno o regularno yanapacunapaj cajman yarpachacurga, o Betelmanpis o localcunata sharcachiycho yanapacunapäpis. ¿Marcanchicunacho parlashgan rimayta yachacunquimanchuraj y shacamunquimanchuraj masla yanapacunayquipaj? Imata ruranayquipaj cajta musyayta munarga Organizados para hacer la voluntad de Jehová nishgan librupa chunca caj capitulunchomi taririnqui, y ancianuyquicunawanpis  parlapacurinquimanmi. * Chauras Diosta sirvinapaj imaycanopapis calpachacurga cushi cushilami goyacushun y waquincunapis ‘alitami ruraycanqui’ niycalämäshun.

16. ¿Imatataj rurashwan imacunapis munashganchino mana ruracaptenga?

¹⁶ Y munashganchicuna yarpashganchino mana ruracaptenga o mana camäpacurga ruranapaj cajcunaga cangapämi. Chayta ruranapaj calpachacushwan, chaymi caycunaman yarpachacushwan.

17. 1 Timoteo 4:13, 15 texto wilacushganno, ¿imata rurartaj maygan hermanupis ali yachachicojman ticranga?

¹⁷ (Leiriy 1 Timoteo 4:13, 15). Bautizacushgana hermano captiquega alichi canman ali yachachicoj canayquipaj calpachacuptiqui. Chayta rurashpayquega wiyaycajcunaga espiritual cajcho ali micushga jina cushi cushila carcaycanga. Seamos mejores lectores y maestros nishgan folletuchoga imayca caycan yachacunayquipaj, jucnin jucninta shumaj ricarcuy. Mana gonganayquipaj yachacushgayquinola wasiyquilacho preparacuy y yargunayquipaj junaj chayaramuptenga alimi parlacaramunqui. Jina yachachicojcunata yanapaj ancianuta * o waquin ancianucunatapis ninquiman yanapäshunayquipaj, paycunaga wiyacoj y yachachicoj cajcunami capäcun (1 Tim. 5:17). Folletunchiga yanapämäshunmi ali yachachicoj canapaj; pero mana chaylachu, alimi canga wiyaycajcunapa yarpachacuptiqui, imano Bibliawan paycunata yanapänayquipaj.  Chayta rurarga quiquiquipis cushishgami taricunqui y wiyaycajcunapis.

18. ¿Imacunata rurartaj más ali yachachicoj cashun?

¹⁸ Lapanchicunatami Dios mañamanchi paypita yachachicunapaj y discipulucunata ruranapäpis (Mat. 28:19, 20; Rom. 10:14). ¿Aliyarcushwanchuraj más ali yachachicoj canapaj? Aumi. Chaypäga folleto Maestros yanapämäshun, yachacuptinchega alimi pushamäshun y yachachicushganchicunaga más shumajraj canga. ¿Ima mastaj yanapämashwan? Imano yachacunapaj: Ali Cawanapaj y Yachachicunapaj nishgan publicaciunninchi y chaycho yargamoj imano predicanapaj videucunapis. Jucnin jucninpita yachacurga quiquiquimi acrarcunqui marcayquicho maygan yanapäshunayquipaj. Chay lapanta ruraptinchega más ali yachachicoj cashun (2 Tim. 4:5).

19. ¿Imacuna rurartaj más ali cristiano cashun?

¹⁹ Cayta ama gongashunchu: calpachacunanchimi ali cristianuman ticranapaj (Gál. 5:22, 23; Col. 3:12; 2 Ped. 1:5-8). ¿Imanotaj chayga canman? Ali yaracoj runa canapäga publicaciunninchicunachomi escribiraycan y chaycunami yanapämäshun. JW Broadcasting^® programachopis achca hermanucuna parlacaramun, imaycacunapa pasarpis imano Diosman yaracushganpita. Paycunanola yaracunapaj calpachacuptinchega yanapämäshunmi.

20. ¿Imatataj rurashwan mana laquicushpanchi cushi cushila caycänapaj?

²⁰ Taytalanchi Jehovapäga canan sirviycashganchipitapis mastarämi rurayta munanchi. Mushoj munduchoga Diosta sirvinanchilapänachi cawacushun. Chay tiempo manaraj chayamushgancama calpachacuycäshun imaycata rurar cushi cushila Diosninchita sirvinapaj. Imapitapis masga munaycunchi Taytalanchi Jehová alabashga canantami, payga “cushishga cawacoj Diosmi” (1 Tim. 1:11, TNM). Chauras cushi cushila imaypis caycäshun Diosta sirvir calpachacushganchipita.