1. ¿Jas tajin kkibʼan e kʼi qachalal rech kkinimarisaj ri kichak che upatanexik ri Jehová?

 RI KʼISBʼAL re ri itzelal naqaj chi kʼo wi y sibʼalaj kʼi chak rajawaxik kqabʼano (Mat. 24:14; Luc. 10:2; 1 Ped. 5:2). Qonojel kqaj kqapatanij más ri Jehová. E kʼi chke ri qachalal tajin kkinimarisaj ri kichak che ri Jehová, y e jujun kkaj keʼux precursores, nikʼaj chik kkaj kepatanin pa Betel o kebʼe che uwokik kʼolbʼal ri kyaʼ wi uqʼij ri Jehová. Xuqujeʼ e kʼi qachalal tajin kkikoj kichuqʼabʼ rech keʼux tobʼanelabʼ o e kʼamal bʼe pa ri congregación (1 Tim. 3:1, 8). Qastzij wi che ri Jehová sibʼalaj kkikotik are chiʼ ri e qachalal kkikoj ronojel kichuqʼabʼ che upatanexik (Sal. 110:3; Is. 6:8).

2. ¿Jas weneʼ kqanaʼo we kojkun ta che ubʼanik ri kqaj kqabʼano?

² Are kʼu, we tajin kqʼax ri tiempo y majaʼ kojkunik kqabʼan ri kqaj kqabʼano, weneʼ kubʼan kebʼ qakʼuʼx. O weneʼ kuyaʼ bʼis chqe rumal che nim chi qajunabʼ o ri kojriqitaj wi kuyaʼ ta bʼe chqe che kqabʼan kʼi jastaq pa ri utinamit ri Jehová (Prov. 13:12). Are laʼ ri tajin kukʼulmaj ri al Melissa, * rumal che kraj kpatanin pa Betel o kbʼe pa ri Tijobʼal chke ri kkiya ubʼixik ri Ajawbʼal. Kubʼij: «Sibʼalaj nim chi ri nujunabʼ. Kinchomaj che kinkun ta che ubʼanik ri kwaj. Rumal laʼ jujun taq mul kubʼan kebʼ nukʼuʼx».

3. ¿Jas rajawaxik kkibʼan na e jujun rech kyaʼ jun eqelen chke?

³ E kʼo jujun chke ri qachalal kʼa e alabʼom alitomabʼ na y utz kiwach, are kʼu rech kyaʼ jun eqelen chke rajawaxik kkʼojiʼ na utz taq kibʼantajik y ktzʼaqat ri kichomanik.  Weneʼ kʼo ketaʼmabʼal, kkixeʼj ta kibʼ kkibʼan jun jastaq y kkibʼan rukʼ ronojel kanimaʼ ri chak kyaʼ chke, are kʼu rajawaxik kkʼojiʼ kikochʼonik, qas kkil na ri kkibʼano o nim kekil wi ri e nikʼaj chik. We kkikoj kichuqʼabʼ rech utz ri kibʼantajik, weneʼ xaq kʼateʼ kyaʼ jun eqelen chke. Chqilaʼ ri xukʼulmaj ri a Nick. Are chiʼ ko 20 ujunabʼ xubʼan kebʼ ukʼuʼx rumal che xkoj ta che tobʼanel. Ri areʼ kubʼij: «Xinchomaj che xa kʼo utz ta tajin kinbʼano». Are kʼu xaq ta xreyej, xaneʼ xrilo jas ri kkunik kubʼan pa ri congregación y che ri utzijoxik utzij ri Dios. Kimik ri a Nick jun chke ri e kʼo pa ri Comité re jun Sucursal.

4. ¿Jas kqil na pa wajun kʼutunem riʼ?

⁴ ¿La ubʼanom kebʼ qakʼuʼx rumal che oj kunaq taj qabʼanom ri kqaj kqabʼano? We jeriʼ, chqabʼij che ri Jehová ronojel ri kqanaʼo (Sal. 37:5-7). Chqataʼ qanojibʼal chke ri e qachalal kʼo nim ketaʼmabʼal y chqabʼanaʼ ri kkibʼij chqe. We kqabʼan wariʼ, weneʼ kojkun che ubʼanik ri qachomam ubʼanik. Are kʼu we kqariq ta na ri kqaj, junam rukʼ ri al Melissa ¿jas kojkunik kqabʼano rech amaqʼel kojkikotik? Rech kqetaʼmaj ri rajawaxik kqabʼano, wajun kʼutunem kchʼaw chrij oxibʼ jastaq che kojutoʼ. Nabʼe, ¿jas kyaʼow kikotemal chqe? Ukabʼ, ¿jas kqabʼano rech sibʼalaj kojkikotik? Y urox, ¿jas más kqabʼan che upatanexik ri Jehová rech amaqʼel kojkikotik?

5. We kqaj kojkikotik, ¿jas chrij rajawaxik kojchoman wi? (Eclesiastés 6:9).

⁵ We kqaj kojkikotik, rajawaxik kqabʼan ri kubʼij pa Eclesiastés 6:9 (chasikʼij uwach). Ri winaq che «kkikot rukʼ ri kʼo chuwach» nim kril wi ri kʼo rukʼ, jun kʼutbʼal, ri jastaq che kkun che ubʼanik kimik. Are kʼu ri winaq ri xaq kuchomaj che kʼo jastaq rukʼ, xaq xiw kurayij ri man kkun ta che ubʼanik. ¿Jas kqetaʼmaj chrij wariʼ? We kqaj kojkikotik, rajawaxik are kqil ri jastaq kʼo qukʼ y ri kojkun che ubʼanik kimik, y are ta ri xaq kqarayij uwach.

6. ¿Jas kʼambʼal noʼj kqanikʼoj na y jas kqetaʼmaj na chrij?

⁶ Qonojel kʼo kqaj kqabʼano. Rumal laʼ, ¿la kojkunik kojkikot rukʼ ri kʼo chi qukʼ? Kojkunik. ¿Jas rajawaxik kqabʼano? Rech kqetaʼmaj, chqanikʼoj ri kʼambʼal noʼj re ri talentos che xukʼut ri Jesús ri kriqitaj pa Mateo 25:14-30. Kqetaʼmaj na jas kqabʼano rech amaqʼel kojkikotik apastaneʼ ri kojriqitaj wi.

7. Chayaʼ ubʼixik rukʼ kebʼ oxibʼ tzij ri kʼambʼal noʼj xukʼut ri Jesús.

⁷ Pa ri kʼambʼal noʼj che xukʼut ri Jesús xchʼaw chrij jun achi che xbʼe pa jun viaje. Ri achi xuya kan jujun talentos chke taq ri e rajchak rech kechakun chrij. * Jobʼ talentos xuya kan che jun ajchak, kebʼ xuya kan che jun chik y jun xuya kan che ri urox ajchak, are kʼu xril ri kekun che ubʼanik. Ri e nabʼe taq kebʼ ajchakibʼ sibʼalaj xechakunik y xkichʼak más pwaq chrij ri urajil ri kajaw. Are kʼu ri urox ajchak, kʼo ta xubʼan rukʼ ri talento che xyaʼ kan che. Rumal laʼ xesax bʼi che ri uchak rumal ri rajaw.

8. ¿Jasche kqabʼij che xkikot ri nabʼe ajchak re ri kʼambʼal noʼj?

⁸ Kojkunik kqabʼij che ri nabʼe ajchak xkikotik rumal che xya kan jobʼ talentos che rumal ri rajaw. Nimalaj pwaq xya che,  wariʼ xukʼutu che kukubʼsaj ukʼuʼx ri rajaw chrij. Y ¿jas kqabʼij chrij ri ukabʼ ajchak? ¿La xubʼan kebʼ ukʼuʼx rumal che are más nim pwaq xya che ri nabʼe ajchak chuwach areʼ? Chqilampeʼ jas xubʼano.

9. ¿Jas xubʼij ta ri Jesús chrij ri ukabʼ ajchak? (Mateo 25:22, 23).

⁹ (Chasikʼij uwach Mateo 25:22, 23). Ri Jesús xubʼij taj che ri ukabʼ ajchak xpe royowal rumal che xa kebʼ talentos xya kan che. Y xubʼij taj che ri ajchak xuchomaj wariʼ: «¿La xaq xiw wariʼ kya chwe? ¡Xaq ya in junam rukʼ ri nabʼe ajchak che xya jobʼ talentos che! We nim ta kinril ri wajaw, kinmuq waʼ we kebʼ talentos riʼ y are kwilij ri jastaq we».

10. ¿Jas xubʼan ri ukabʼ ajchak rukʼ ri talentos xya che?

¹⁰ Ri ukabʼ ajchak junam ri uchomanik rukʼ ri nabʼe ajchak, rumal che xchakun chrij ri pwaq che xya kan che rumal ri rajaw. Rumal ri xubʼano, xuchʼak chi kebʼ talentos. Ri rajaw sibʼalaj xkikotik y xuya chi más chak che.

11. ¿Jas kojkunik kqabʼano rech sibʼalaj kojkikotik?

¹¹ Xuqujeʼ oj kojkunik sibʼalaj kojkikotik we kqakoj qachuqʼabʼ rech kqabʼan apachike chak che upatanixik ri Jehová. Chqakojoʼ ronojel qatiempo che utzijoxik ri utzij ri Dios y che ubʼanik nikʼaj chi chak pa ri congregación (Hech. 18:5; Heb. 10:24, 25). Chqatijoj qibʼ rech kqaya comentarios che kuya kichuqʼabʼ ri e qachalal. Nim chqilaʼ wi ri asignación che kyaʼ chqe pa ri e riqbʼal ibʼ che kbʼan chuxoʼl semana. We kajawax ri qatobʼanik che ubʼanik jun chak pa ri congregación,  chojopan pa ri hora che qabʼim y utz chqabʼanaʼ che ri qachak. Maqachomaj che kʼo jun chak nim ta ubʼanik y taqal taj kqaya más tiempo che. Xaneʼ chqakojoʼ qachuqʼabʼ rech utz kqabʼan che ronojel uwach chak (Prov. 22:29). Are chiʼ kqakoj ri qatiempo che ubʼanik chak pa ri congregación, kkʼiy más ri qakojonik y kqanaʼ más kikotemal (Gál. 6:4). Y sibʼalaj kojkikot riʼ are chiʼ kya jun eqelen che jun qachalal, ri kqaj oj kya chqe (Rom. 12:15; Gál. 5:26).

12. ¿Jas xkibʼan ri al Melissa y ri a Nick rech xekikot más?

¹² ¿La kul chqe ri qachalal Melissa, che xojchʼaw chrij pa ri párrafo 2 che kraj kbʼe pa Betel o pa ri Tijobʼal chke ri kkiya ubʼixik ri Ajawbʼal? Paneʼ kkun ta che uriqik wariʼ, ri areʼ kubʼij: «Kinbʼan ri nuprecursorado rukʼ ronojel wanimaʼ, rumal laʼ jalajoj kinbʼan che utzijoxik ri utzij ri Dios. Wariʼ uyaʼom kikotemal chwe». Y ¿jas xubʼan ri qachalal Nick rech xubʼan ta kebʼ ukʼuʼx are chiʼ xux ta tobʼanel? Ri areʼ kubʼij: «Xinchoman chrij ri kinkunik kinbʼano: kinkoj nuchuqʼabʼ rech kintzijoj ri utzij ri Dios y kinya utz taq comentarios pa ri e riqbʼal ibʼ. Xuqujeʼ xinnojisaj ri solicitud rech Betel y are chiʼ xqʼax jun junabʼ xinsikʼix loq».

13. ¿Jas kkʼulmatajik we kqakoj qachuqʼabʼ rech utz kqabʼan che ri eqeleʼn kʼo qukʼ kimik? (Eclesiastés 2:24).

¹³ Tekʼuriʼ, we kqakoj qachuqʼabʼ pa ronojel ri kqabʼano, ¿la kraj kubʼij che kya más eqeleʼn chqe? Weneʼ jeriʼ, junam rukʼ xukʼulmaj ri a Nick. Are kʼu, paneʼ kya taj kojkunik kqanaʼ ri kikotemal ri xunaʼ ri al Melissa (chasikʼij uwach Eclesiastés 2:24). Xuqujeʼ, paneʼ kojkun taj keqariq jujun taq eqelen, amaqʼel kojkikotik rumal che ronojel ri chuqʼabʼ kqakojo kqaj chuwach ri qajaw Jesucristo.

14. ¿Jas más rajawaxik kqabʼano?

¹⁴ We tajin kqakoj chi ronojel qachuqʼabʼ che upatanexik ri Jehová, ¿la kraj kubʼij che kʼo ta chi rajawaxik kqabʼano? Je taj. Rajawaxik che kqil ri kqabʼano rech kojux utz taq ajtijabʼ y utz kqabʼan che utzijoxik utzij ri Dios rech keqatoʼ ri e nikʼaj chi qachalal. Kojkun che ubʼanik wariʼ we kqakoj utz chomanik, kqachʼobʼo che kʼo kojkun ta che ubʼanik y are kojchoman chrij kitoʼik ri e nikʼaj chik (Prov. 11:2; Hech. 20:35).

15. ¿Jas jujun taq jastaq kojkunik kqabʼano che kuya nimalaj kikotemal chqe?

¹⁵ ¿Jas kqaj kqabʼano? Chqataʼ ri utobʼanik ri Jehová rech kqilo jas kojkunik kqabʼano (Prov. 16:3; Sant. 1:5). Kojkun riʼ kojchoman chrij jujun taq jastaq ri xqabʼij pa ri  nabʼe párrafo re wajun kʼutunem riʼ, junam rukʼ ri precursorado auxiliar o regular, ri bʼenam pa Betel o che uwokik Ja rech Ajawbʼal. Xuqujeʼ kojkunik kqetaʼmaj jun chi chʼabʼal rech kqatzijoj ri utzij ri Dios chke e kʼi winaq o kojbʼe pa jun chi tinamit ri rajawaxik wi más tobʼanik. We kqaj kqetaʼmaj más chrij waʼ taq jastaq, kojkunik kqasikʼij uwach ri capítulo 10 re ri wuj Organizados para hacer la voluntad de Jehová y kojtzijon kukʼ ri e kʼamal bʼe re ri congregación. * Are chiʼ kojkun che ubʼanik ri xqachomaj ubʼanik, sibʼalaj kojkikotik  y ri e nikʼaj chik kkilo che tajin kkʼiy más ri qakojonik.

16. ¿Jas kojkunik kqabʼan kimik we kʼo jujun jastaq kojkun ta na kqabʼano?

¹⁶ ¿E kʼu we kimik oj kunaq ta che ubʼanik ri jastaq che oj chʼawinaq chi chrij? Chojchoman chrij ri e jastaq che kojkunik kqabʼano. Jujun chke ri e jastaq are wariʼ.

17. Junam rukʼ ri kubʼij 1 Timoteo 4:13, 15, ¿jas rajawaxik kubʼan jun qachalal rech kkunik kux utz ajtij?

¹⁷ (Chasikʼij uwach 1 Timoteo 4:13, 15). We abʼanom chi aqasanjaʼ, katkun riʼ katchoman chrij jas rajawaxik kabʼano rech más utz kabʼan che uyaʼik chʼabʼal. ¿Jasche? Rumal che we katijoj awibʼ che usikʼixik ri wuj, uqʼalajisaxik jun kʼutunem, kuya nim tobʼanik chke konojel ri kattatabʼenik. Utz we katchoman chrij unikʼoxik y ubʼanik pa akʼaslemal ronojel ri kawetaʼmaj pa ri e kʼutunem re ri wuj Chojux utz taq sikʼil uwach wuj xuqujeʼ ajtijabʼ. Cheʼanikʼoj ri kʼutunem chkijujunal y chatijoj awibʼ pa ri awachoch, tekʼuriʼ chabʼanaʼ ri xawetaʼmaj are chiʼ kaya jun chʼabʼal. Chataʼ jujun pixabʼ che ri consejero auxiliar * o chke nikʼaj chi kʼamal bʼe «ri kkitzijoj ri utzij ri Dios xuqujeʼ ri ketijonik» (1 Tim. 5:17). Xaq xiw ta katchoman chrij jas kabʼan che ukojik jun kʼutunem re ri folleto, xaneʼ chayaʼ kichuqʼabʼ konojel ri tajin kattatabʼenik rech kkowir ri kikojonik y kkibʼan pa kikʼaslemal ri kketaʼmaj. We je kabʼano, ri at xuqujeʼ ri kattatabʼenik sibʼalaj kixkikotik.

18. ¿Jas kojtowik rech utz kqabʼan che utzijoxik ri utzij ri Dios?

¹⁸ Qonojel ri oj cristianos yaʼom ri eqeleʼn  chqe che kqatzijoj ri utzij ri Dios y keqatoʼ ri winaq rech keʼux testigos (Mat. 28:19, 20; Rom. 10:14). ¿La kqaj kojux utz taq ajtijabʼ pa wajun chak riʼ? Rech kojux utz taq ajtijabʼ, kojkunik kqakoj ri folleto Ajtijabʼ y kojchoman chrij jas kqabʼan che ukojik ri kqetaʼmaj. Xuqujeʼ kojkunik kqariq utz taq chomanik pa ri Qachak xuqujeʼ Qakʼaslemal ri oj Cristianos: Wuj re chak y pa taq ri videos che kkoj pa taq ri e riqbʼal ibʼ che kbʼan chuxoʼl semana. Chqakojoʼ jalajoj taq chomanik rech kqilo jas ri más utz kkitaʼ ri winaq. We kqabʼan wariʼ, sibʼalaj kojkikot riʼ rumal che kojux utz taq ajtijabʼ (2 Tim. 4:5).

19. ¿Jas kojtoʼwik rech kkʼojiʼ utz taq qabʼantajik?

¹⁹ Masach chqe che ri más nim ubʼanik are che kkʼojiʼ utz taq qabʼantajik (Gál. 5:22, 23; Col. 3:12; 2 Ped. 1:5-8). ¿Jas kqabʼan che uriqik wariʼ? Jun kʼutbʼal, we kqaj kkowir ri qakojonik. Kojkunik kqatzukuj ri kʼutunem che kechʼaw chrij ri kojonik. Xuqujeʼ kojkunik kqil jujun taq chʼaqap re ri JW Broadcasting^® che kchʼaw chrij ri kikʼaslemal ri qachalal che kiriqom kʼax are kʼu kiyaʼom ta kan upatanexik ri Jehová. Tekʼuriʼ chojchoman chrij jas kqabʼan che resaxik uwach ri kikojonik.

20. ¿Jas kojkunik kqabʼano rech sibʼalaj kojkikotik?

²⁰ Qastzij che qonojel kqaj kqapatanij ri Jehová rukʼ ronojel qanimaʼ y are kojchoman chrij ri kojkun che ubʼanik kimik. Pa ri kʼakʼ uwach Ulew utzujum ri Dios chqe, kojkunik kqabʼan ronojel che upatanexik. Rech kojeyeʼn che ri qʼij che kbʼan kotzʼiʼj che ri uwach Ulew, chqabʼanaʼ ronojel ri kojkun che ubʼanik kimik, jeriʼ sibʼalaj kojkikotik. Y ri más nim ubʼanik are che kqaqʼijilaj na ri qaDios che sibʼalaj kkikotik (1 Tim. 1:11). Rumal laʼ chojkikot rukʼ ri kqabʼan kimik che upatanexik ri Jehová.