1. ¿Imapaqmi kay tukukuy p’unchaykunapi askha hermanonchiskuna kallpachakushanku?

NOQANCHISQA tukukuy p’unchaykunapiñan kausashanchis, chaymi Diospa llaqtanpiqa imaymana ruwanakuna kashan (Mat. 24:14; Luc. 10:2; 1 Ped. 5:2). Chayraykun wakin iñiqmasinchiskunaqa astawanraq kallpachakushanku precursor kanankupaq, Betelpi yanapakunankupaq, juñunakuna wasi jatarichiypi yanapakunankupaq ima. Qhari hermanonchiskunapas kallpachakushankun iñiq t’aqapi yanapakuq kamachi otaq umalliq kanankupaq (1 Tim. 3:1, 8). Chhayna kallpachakusqankuta rikuspaqa maytachá Jehová Diosqa kusikun (Sal. 110:3; Isa. 6:8).

2. ¿Iman pasawasunman Diospa llaqtanpi munasqanchis llank’ayta mana chaskiqtinchis?

² Wakin hermanonchiskunaqa maytan munashanku Diospa llaqtanpi ima munasqanku llank’aytapas chaskikuyta. Ichaqa yaqapaschá kuraqña kapusqankurayku otaq onqopusqankuraykupas manaña ima munasqanku llank’aypipas yanapakuyta atinkuñachu. Chhaynapi tarikuspaqa yaqapaschá pisikallpayankuman (Prov. 13:12). Chaymi pasaran hermananchis Melisawanpas. * Payqa maytas munanman Diospa llaqtanpi astawan yanapakuyta. Chaymi nin: “Maytan munayman Betelman riyta otaq Diospa gobiernonmanta willaqkunapaq escuelaman riytapas. Ichaqa kuraqñan kapuni, chaypi piensaspan mayninpiqa pisikallpayani”, nispa.

3. ¿Imayna kanankupaqmi wayna-sipaskuna kallpachakunanku Diospa llaqtanpi ima llank’aytapas chaskinankupaq?

 ³ Wakin wayna-sipas iñiqmasinchiskunaqa yaqapaschá allinta imatapas ruwayta yachankuman. Ichaqa Diospa llaqtanpi ima llank’aytapas chaskinankupaqqa kallpachakunankun munakuq, pacienciakuq, juch’uyaykukuq, allin llank’aq ima kanankupaq. Sichus kallpachakunqaku chhayna kanankupaq chayqa tiempollanpin ima llank’aytapas chaskinqaku. Yachasun Nico hermanonchismanta, payqa iñiq t’aqapi yanapakuq kamachis kayta munasqa, ichaqa 20 watanpi kashaqtinsi nisqaku aschatawanraq suyarikunanpaq. Paymi nin: “Chayta niwaqtinkun nirani: ‘Imatapaschá malta ruwashani’, nispa”. Hermanonchis Nicoqa manas chaywanqa pisikallpayasqachu, aswanpas kallpachakusqas astawan runakunaman Diosmanta willamunanpaq, iñiq t’aqapipas tukuy atisqanta yanapakunanpaq. Kunanqa sucursalkunata qhawariqkunamanta juj kaq encargakuqmi.

4. ¿Imakunamantan kay yachachikuypi yachasunchis?

⁴ Mayninpiqa yaqapaschá pisikallpayasunman Diospa llaqtanpi ima llank’aytapas mana usqhayllachu chaskikusqanchisrayku, chhaynapi tarikuspaqa Jehová Diospa yanapaynintan mañakunanchis (Sal. 37:5-7). Chaymantapas allin experienciayoq hermanonchiskunatan tapurikusunman imakunapis kallpachakunanchisraq kashan chayta niwananchispaq. Chay qhepamanqa niwasqanchisman jinan imatapas ruwananchis. Chaykunata ruwasunchis chayqa yaqapaschá tiempowanqa Diospa llaqtanpi ima llank’aytapas chaskikusunman. Ichaqa yaqapaschá wakinninchisqa hermananchis Melisa jina kuraqña kasqanchisrayku otaq onqosqapas kasqanchisrayku manaña munasqanchis llank’ayta chaskikuyta atisunmanñachu. Chaywanpas atisunmanmi Jehová Diospa llaqtanpi astawan yanapakuytaqa. Chaymi yanapawasun kusisqa kananchispaq. Kay yachachikuypin yachasunchis imakunata ruwaspas kusisqa kasunman chayta, imakunatawansi ruwananchis aswan kusisqa kananchispaq chaytapas. Yachallasuntaqmi imakunata ruwananchispaqmi kallpachakunanchis aswan kusisqa kananchispaq chaytapas.

5. Eclesiastés 6:9 nisqan jina, ¿imatan ruwananchis kusisqa kananchispaq?

⁵ Kusisqa kananchispaqqa Eclesiastés 6:9 textoq nisqantan kasukunanchis (leey Eclesiastés 6:9). Chay textoq nisqan jina “aswan allinmi ñawiwan rikuyqa yuyayllapi munapakuymantaqa”. Chayraykun kallpachakunanchis imachus ruway atisqanchisman jina Jehová Diosta servinanchispaq. Manataqmi mana ruway atisqanchistaqa nishuta munapayananchischu. Chayqa ‘wayrata jap’iykuy jinallan’ yanqa  kanman, jinaspapas pisikallpayasunmanmi. Chhaynaqa, kusisqan kananchis imachus ruway atisqallanchiswan.

6. ¿Imamantan kunan yachasunchis?

⁶ Llapanchismi Diospa llaqtanpiqa atisqanchisman jina yanapakuyta atinchis. Chayta ruwaspaqa kusisqan Jehová Diosta servisunchis. Kunanmi yachasunchis Jesuspa willasqan qolqe bolsa chaskiq kamachikunamanta. Chaymi willakushan Mateo 25:14-30 textokunapi. Chaykunamanta yachaymi yanapawasun imakunatas ruwananchis aswan kusisqa kananchispaq chayta, imakunatawansi ruwasunman Jehová Diosta astawan servinanchispaq chaytapas.

7. ¿Imamantan Jesús willaran?

⁷ Jesusmi willaran juj runamanta. Chay runaqa karu llaqtaman ripunanpaqsi kamachinkunata wajachimusqa paykunaman kaqninkunata saqenanpaq. Jinan juj kaq kamachinman qosqa pisqa bolsa qolqeta, juj kaqmantaq iskay  bolsa qolqeta, jujninmantaq juj bolsa qolqeta. * Chaytaqa ruway atisqankuman jinan qosqa. Ñaupaq kaq kamachiqa pisqa bolsa qolqeta chaskispa jinas chaskisqan qolqewan negociota ruwasqa, iskay bolsa qolqeta chaskiqpas iskay bolsatawansi ganasqa. Juj bolsa qolqeta chaskiqmi ichaqa mana imatapas ruwasqachu. Chaymi patronninqa chay qella kamachinta qarqopuran.

8. ¿Imaraykun pisqa bolsa qolqeta chaskiq kamachi kusikunman karan?

⁸ Pisqa bolsa qolqeta chaskiq kamachiqa anchatachá kusikuran patronnin paypi confiasqanmanta. Ichaqa, ¿imatan chayta rikuspa iskay qolqe bolsata chaskiq kamachi ruwaran? ¿Phiñakuranchu? Manan.

9. Mateo 25:22, 23 nisqan jina, ¿phiñakuranchu iskay kaq kamachi iskay bolsa qolqellata chaskisqanmanta?

⁹ (Leey Mateo 25:22, 23). Iskay qolqe bolsata chaskiq kamachiqa manan phiñakuranchu pisitaña patronninmanta chaskiran chaypas. Nitaqmi niranchu: “¿Kay iskay qolqe bolsallatachu patronniy qowanqa? ¡Noqapas allin llank’aqmá kani riki!”, nispaqa. Sichus iskay bolsa qolqellata chaskisqanmanta phiñakunman karan chayqa, yaqapaschá juj bolsata chaskiq kamachi jina chaskisqan bolsakunata p’amparapunman karan.

10. ¿Imatan iskay bolsa qolqeta chaskiq kamachi ruwaran?

¹⁰ Iskay bolsa qolqeta chaskiq runaqa, qolqeta chaskispa jinas tukuy atisqanta llank’amusqa, chaysi iskay qolqe bolsatawan patronninman apasqa. Chayta rikuspan patronninqa anchatapuni  kusikusqa, jinaspa juj llank’aykunatawan qosqa.

11. ¿Imakunatawanmi ruwananchis aswan kusisqa kananchispaq?

¹¹ Noqanchispas chay iskay allin kamachikuna jinan tukuy atisqanchista kallpachakunanchis Diosmanta runakunaman willamunanchispaq, iñiq t’aqapipas astawan yanapakunanchispaq. Chaykunata ruwasunchis chayqa aswan kusisqan kasunchis (Hech. 18:5; Heb. 10:24, 25). Chaymantapas allintan preparakunanchis juñunakuykunapi tapuykunaman kutichinanchispaq, chayta ruwaspaqa hermanonchiskunatan kallpachasunchis. Chaupi semanapi “Allin yachachiq kasun” nisqa juñunakuypi yanapakunanchispaqpas allintan preparakunanchis. Diospa llaqtanpi ima llank’aytapas chaskispaqa manan pisipaqchu qhawarinanchis, aswanpas tukuy atisqanchistan ruwananchis chay llank’ayta junt’ananchispaq (Prov. 22:29). Chayta ruwaspaqa aswan kusisqan kasunchis, iñiyninchispipas astawanmi wiñarisunchis (Gál. 6:4). Jinaspapas mayqen hermanonchispas Diospa llaqtanpi ima llank’aytapas chaskiqtinqa paykunamantan kusikusunchis, manataqmi envidiakusunchu (Rom. 12:15; Gál. 5:26).

12. ¿Iman hermananchis Melisatapas hermanonchis Nicotapas yanaparan kusisqa Jehová Diosta servinankupaq?

¹² ¿Iman hermananchis Melisata yanaparan kusisqalla Jehová Diosta servinanpaq? Payqa tukuy atisqantan kallpachakusqa astawan Diosmanta runakunaman willananpaq. Paymi nin: “Noqaqa manañan atiymanñachu Betelmanpas Diospa gobiernonmanta willaqkunapaq escuelaman riytapas. Chaywanpas kallpachakunin tukuy atisqayta Diosmanta runakunaman willamunaypaq, chaykunata ruwaspan kusisqa kani”, nispa. ¿Iman hermanonchis Nicotapas yanaparan kusisqa Jehová Diosta servinanpaq? Paymi nin: “Manaña iñiq t’aqapi yanapakuq kamachi kayta atiranichu chaypas kallpachakuranin Diosmanta runakunaman astawan willamunaypaq, juñunakuykunapipas tapuykunaman kutichinaypaq. Chaymantaqa Betelpaqmi juj solicitudta junt’arani, juj wata qhepamantaq Betelman invitawaranku. Chaymi ancha kusisqapuni kashani”, nispa.

13. Eclesiastés 2:24 nisqan jina, ¿imaraykun tukuy atisqanchista Diospa llaqtanpi yanapakunanchis?

¹³ Sichus Diospa llaqtanpi tukuy atisqanchista yanapakusunchis chayqa, yaqapaschá tiempowanqa hermanonchis Nico jina ima llank’aytapas chaskikusun. Ichaqa Diospa llaqtanpi ima llank’aytapas mana chaskispaqa manan pisikallpayananchischu. Aswanpas Melisa hermananchis jinan kallpachakunanchis tukuy atisqanchista Diospa llaqtanpi yanapakunanchispaq. Chaykunata ruwasunchis chayqa aswan kusisqan kasunchis (leey Eclesiastés 2:24). Jehová Diospas Jesuspas kusikunqakun kallpachakusqanchista rikuspa.

14. ¿Imakunata ruwaspan Diospa llaqtanpi astawan yanapakusunman?

¹⁴ Tukuy atisqanchistaña Jehová Diosta servishasunman chaypas, atisunmanmi astawanraq Diospa llaqtanpi yanapakuytaqa. Chaypaqqa kallpachakunanchismi Diosmanta runakunaman willamunanchispaq, allin yachachiq kananchispaq, hermanonchiskunatapas yanapananchispaq. Chaypaqmi ichaqa juch’uyaykukuq kananchis, manataqmi noqallanchispichu piensananchis (Prov. 11:2; Hech. 20:35).

15. ¿Imakunapin Diospa llaqtanpi yanapakusunman aswan kusisqa kananchispaq?

¹⁵ Jehová Diospa llaqtanpi astawan yanapakunanchispaqqa Diospa yanapaynintan mañakunanchis. Jinaspapas atisqanchisman jinan yanapakunanchis (Prov. 16:3; Sant. 1:5). Wakinninchisqa yaqapaschá kallpachakusunman  precursor regular precursor auxiliar kananchispaq, otaq Betelpipas juñunakuna wasikuna jatarichiypipas yanapakunanchispaq. Chaymantapas astakusunmanmi Diosmanta willanapaq necesitakusqan llaqtakunaman. Chaykunamanta astawan yachayta munaspaqa umalliqkunawanmi rimasunman. * Chaymantapas Organizados para hacer la voluntad de Jehová nisqa librotan 10 capituloq nisqanta leesunman. Sichus tukuy atisqanchista kallpachakusunchis Diospa llaqtanpi yanapakunanchispaq chayqa aswan kusisqan kasunchis, iñiqmasinchiskunapas reparanqakun iñiyninchispi allinta wiñarisqanchista.

16. ¿Imatan ruwasunman Diospa llaqtanpi manaraq astawan yanapakuyta atishanchisraqchu chayqa?

¹⁶ Wakinninchisqa manapaschá Jehová Diospa llaqtanpi astawan yanapakuyta atishanchisraqchu imaymana sasachakuykunapi tarikusqanchisrayku otaq waynallaraq kasqanchisrayku. Chhaynaña kaqtinpas atisqanchisman jina Jehová Diosta servinanchispaqmi kallpachakunanchis. ¿Imakunan chaypaq yanapawasunman? Chaymantan kunan astawan yacharisunchis.

17. 1 Timoteo 4:13, 15 nisqan jina, ¿imatan iñiq t’aqapi hermanokuna ruwananku allin yachachiq kanankupaq?

¹⁷ (Leey 1 Timoteo 4:13, 15). ¿Imatan bautizasqa qharikuna ruwankuman Jehová Diosta astawan servinankupaq? Kallpachakunankun iñiq t’aqapi aswan allinta yachachinankupaq, chayta ruwaspan iñiq t’aqapi hermanokunata kallpachanqaku. Chaypaqqa Bibliatan leenanku, allinta preparakuspataq askha kutita practicananku. Chaymantapas Allin leeq allin yachachiq kasun nisqa folletotan estudiananku, chaypi yachasqankuman jinataq practicananku. Chaymantapas iñiq t’aqapi yuyaychaq umalliqtan  tapurikunkuman imakunapis kallpachakunankuraq kashan chayta yachanankupaq. * Tapurikullankumantaqmi iñiq t’aqapi ‘allin yachachiq’ hermanokunatapas (1 Tim. 5:17). Juñunakuypi yachachishaspaqa hermanokunata iñiyninkupi yanaparinankupaq jinan yachachinanku. Chaykunata ruwaspaqa aswan kusisqan Diospa llaqtanpi yanapakunqaku, hermanokunapas kusisqan kanqaku.

18. ¿Iman yanapawasunchis aswan allin yachachiq kananchispaq?

¹⁸ Llapanchismi kallpachakunanchis Diosmanta runakunaman willamunanchispaq yachachimunanchispaqpas (Mat. 28:19, 20; Rom. 10:14). Ichaqa, ¿iman yanapawasunman runakunaman aswan allinta yachachinanchispaq? Chaypaqqa Allin leeq allin yachachiq kasun nisqa folletota estudiaymi yanapawasunchis. Chaymantapas Diospaq kausasunchis nisqa juñunakuypi yachasqanchismi yanapawasunchis, chaypin kashan allinta runakunaman yachachinanchispaq videokuna. Chaykunapi yachasqanchisman jina yachachisunchis chayqa aswan allintan runakunata yanapasunchis, kusisqataqmi Jehová Diostapas servisunchis (2 Tim. 4:5).

19. ¿Iman yanapawasunchis allin iñiyniyoq kananchispaq?

¹⁹ Kusisqa Jehová Diosta servinanchispaqqa kallpachakunanchismi allin iñiyniyoq kananchispaq (Gál. 5:22, 23; Col. 3:12; 2 Ped. 1:5-8). Chaypaqqa iñiymanta rimaq qelqanchiskunatan estudiasunman. Chaymantapas JW Canal programapin qhawasunman imaynatas wakin hermanonchiskuna imaymana sasachakuykunata atiparanku chayta. Chaykunata qhawaymi yanapawasunchis paykuna jina allin iñiyniyoq kananchispaq, sasachakuykunatapas atipananchispaq.

20. ¿Imatawanmi ruwasunman aswan kusisqa kananchispaq?

²⁰ Llapanchismi munashanchis Diospa llaqtanpi astawan yanapakuyta. Ichaqa wakinninchisqa manapaschá munasqanchisman jinachu Jehová Diosta serviyta atishanchis. Chaywanpas manapunin pisikallpayananchischu. Mosoq pachapiqa aswan allintan Jehová Diosta servisunchis. Chay p’unchay chayamunankaman ichaqa tukuy atisqanchista Jehová Diosta servinanchispaq kallpachakunanchis. Chayta ruwasunchis chayqa aswan kusisqan kasunchis, jinaspapas Jehová Diostan jatunchasunchis (1 Tim. 1:11).